الحلقه الثلاثون
رواية
قلوب تنزف عشقاً
بقلمي :عبير سليم
❤️❤️❤️❤️❤️❤️❤️
فى منتصف اليوم حيث يعود إلى الفيلا يدخل فيجد العمل قائم على قدم وساق
حيث كانت ميرا وريم ومعها الشباب يعملون بكل جد
بينما ينظر للطرف الآخر فلا تنتابه سوى حاله من الغيظ الشديد عندما يراها تلعب مع الأطفال كطفله مثلهم بصحبة خالد وتتحدث إليه بعفويه :هههههه استنى بس ياخالد لاء تعالي هنا ياسوسو شوط يا اياد
شاطر ياجميل وتصفق بيدها كطفله تمرح وتلعب
لقد أثارت بضحكاتها العاليه الغيرة الشديده عليها
لم يشعر بنفسه إلا وهو يقترب منهم ويمسكها من ذراعها بقوة: تعالي عاوزك
خالد :خير ياباشا حصل حاجه
فلا يردعليه حمزة فقط يكتفي بسحبها إلى الداخل دون التحدث بكلمه
انت ساحبني كده ليه انت ساحب بقرة
لايرد عليها بل يشدها من ذراعيها ويدخلها داخل المنزل ويدفعها بقوة فتقع على أحد المقاعد :في إيه انت بتعمل كده ليه
ينظر إليها وعيناه تمتلئ بالشرار يتحدث بصوت عال :انا قلت ايه قبل كده هو الكلام مبيتسمعش ليه
ياسمين :هو حصل إيه لكل ده
حمزة :أنا مش قلت مفيش كلام ولاهزار مع خالد وانكم هنا بتشتغلوا مش اكتر من كده الكلام مبيتسمعش ليه
ياسمين :انا مش عبده عندك وده من صميم شغلي انا كنت برفه عن الولاد وده حقهم وكوني اضحك واهزر فده ملكش فيه مادمت مبعملش حاجه غلط ومبتعداش حدودي احنا بنلعب في الجنينه وانت ملكش حكم علية
حمزة بغضب حتى انها تخاف وتنتفض من نبرة صوته:ليه مصرة على اللي بتعمليه ليه
ياسمين :انت عاوز ايه انا عملت إيه لكل ده انت مالك بية أصلا
حمزة :انتي لسه بتسألي بعد كل ده عملتيلي إيه انا اللي المفروض أسألك عملتلك إيه عشان تعملي فية كده ده انتي مشفتيش مني غير كل حب يبقى ليه ليه
ياسمين :أنا معملتش حاجه انا عمري ماعملتلك ولا قدمتلك غير كل خير
حمزة :لا والله تصدقي ضحكتيني أمال غدرك بية ده يتسمى إيه
خيانتك لية دي معناها إيه
ياسمين :وانت كنت البرئ الوفي مش كده ياعيني تصدق صعبت علية وانت على كده بقى روحت انتحرت وقطعت شرايبن إيدك واللا اترهبنت
ماتجوزتش انت أول ما سافرت وخلفت مش كده وليك عين كمان تلومني وتعتب علية
حمزة وهو يضرب على الكرسي بقوة:ملكيش دعوة بية قليلي انتي ليه عملتي كده ليه من امتى وانتي كنتي ماديه بالشكل ده من امتى وانا مخدوع فيكي كده بقى انا انا اللي عمري ماحبيت غيرك تخونيني وتخدعيني كده تدوسي على قلبي بكل جبروت من غير مااصعب عليكي ليه تعملي فية كده ليه ازاي جالك قلب ازاي هنت عليكي ازاي إزاي
ياسمين :مش حقولك ياحمزة ومش حريحك وقلبك ده لازم يدوق العذاب اللي انت بتعذبهولي عاوز تفهم وتعرف روح دور بنفسك ياحمزة زي مانصبت المحكمه وكنت القاضي والجلاد واصدرت حكمك
وزي ما قعدت سنين بتدبر وبتخطط تنتقم مني ازاي وزي ماعرفت تكون حياة وتخلف تبقى تتشطر وتعرف انا عملت كده ليه
حمزة :قليلي فين حسين وهو وخلود اتجوزوا امتى وازاي
ياسمين :عديني عاوزة أخرج
حمزة :لاء لما أفهم الأول
ياسمين :وانا معنديش حاجه أقولها سيبني بقى
حمزة :مش حسيبك ياياسمين مش حسيبك انتي فاهمه
ياسمين :لا مش فاهمه ياحمزة مش فاهمه وأعلى مافخيلك اركبه مانت كنت سوبر مان وعرفت تراقبني السنين دي كلها وانت بتراقبني معرفتش حياتي ماشيه ازاي معرفتش كنت بعمل ايه السنين دي كلها
لاء انت مكنتش عاوز تشوف غير ياسمين الخاينه اللي ماصدقت انك سافرت وجريت راحت اتجوزت وكل تفكيرك بقى ماشي في اتجاه واحد بس ازاي تعذبها
روح بقى دور على اللي انت عاوزه انا معنديش جواب لأي سؤال انت اتهمتني ومفكرتش حتى تسألني مع انك المفروض متسالنيش السؤال لوحده معناه الشك والمفروض اللي كان بيننا كان أكبر من اي شئ في الدنيا
حمزة :يعني هو ده اللي عندك
ياسمين :أيوة هو ده اللي عندي ومعنديش غيره ياحمزة بيه
حمزة :طب اسمعي بقى انتي دورك هنا مقتصر على سيلا وبس انتي فاهمه هي دي اللي خدمتك ليها بتاخدي عليها أجر غير كده مشوفكيش بتعملي أي حاجه تانيه
ياسمين :أنا عارفه إني هنا مش اكتر من خدامه لبنتك وباخد أجري على ده وانا مبعملش حاجه خارج مهمتي ووقت ماتلاقيني اتعديت حدودي يبقى وقتها ليك الحق تتكلم معايا
عن اذنك وانا بحذرك انك تتعامل معايا بالطريقه دي تاني أدام أي حد مفكرتش شكلي يبقى ازاي دلوقتى ادام الناس اللي برة مفكرتش هما ممكن يقولوا ايه وهما شايفينك بتجرجر فية شبه البهيمه كده
حمزة :انا ميهمنيش حد
ياسمين :لكن أنا يهمني واذا كانت سمعتي متهمكش فحاجه فأنا معنديش غيرها
حمزة :انا ميهمنيش سمعتك ياياسمين انتي اتجننتي بتقولي ايه
ياسمين :انا مبقولش ياحمزة المواقف والتصرفات هي اللي بتقول عن إذنك بقى
تقوم سريعاً تتحرك من أمامه تاركه إياه يتخبط في أفكاره التى تكاد أن تفتك به
❤️❤️❤️❤️❤️❤️❤️❤️
يمر اليوم ويأتي المساء ويعود كل منهم إلى مكان راحته
إيه رأيك بقى ياحبيبتي انبسطتي
ريم :صدقيني لو قلتلك ان اكتر حاجه فرحتني وبسطتني النهارده اني شفت ضحكة إياد اللي بقالي كتير مشوفتهاش حتى كمان جنه ياحبيبتى لعبت وانبسطت أوي
ميرا :وانتي كمان ياريم لازم تنبسطي ياحبيبتي بصي ياريم انا مقدرة حبك لجوزك الله يرحمه ومدركه ان غيابه عنك مأثر فيكي لكن الحياة مبتقفش عند حد ولازم تستمر وولادك هما الذكرى الحلوة اللي فاضلالك منه وأمانه هو سابهالك لازم تحافطي عليها
ريم :انتي بتوصيني على ولادي ياميرا دول كل حياتي ده انا معنديش أغلى منهم
ميرا :يبقى حقهم عليكي انهم يشوفوكي كويسه بتضحكي عايشه معاهم حياتهم وسنهم ده حينعكس عليهم إياد ماشاء الله عليه برغم انه صغير لكن حاسس بيكي أوي زعلان عشانك اوي
ريم :حاضر يا ميرا حاضر ححاول ابقى كويسه عشانهم
ميرا :طب ياحبيبتى بصي انا حسيبك تستريحي عشان بكرة عندنا يوم طويل انا حنزل اقعد مع أكمل شويه تحت
ريم :حبيبتي ربنا يسعدكم ويكمل فرحتكم على خير يا رب
ميرا :ويريح قلبك ياحبيبتى يارب
تنزل ميرا وتقعد مع أكمل في الريسيبشن ويتكلموا مع بعض وهما فقمة سعادتهم واخيرا رجعت أيام حبهم لبعض تاني كلامهم مع بعض من غير حواجز بس يلاحظ أكمل شرود ميرا كل شويه
أكمل :مالك يا حبيبتي اللي واخد عقلك ياميرا
ميرا :انا مفيش حد يقدر ياخد عقلي ولا قلبي غيرك انت ياحبيبي
أكمل :بس انا كل شويه الاحظك بتسرحي مني
ميرا :غصب عني والله ياحبيبي كل ماافتكر اللي ياسمين فيه تصعب علية أوي نفسي اساعدها مش قادرة استحمل اشوفها وهي في الوضع ده وانا عارفه الحقيقه واسكت
أكمل :مش هي قالتلك وجهة نظرها
ميرا :أيوة بس انا مقتنعتش وخايفه اكون بشاركها في الظلم الواقع عليها
أكمل :هي معذورة ياميرا هو حكم عليها من غير مايسمعها ودي حاجه بتوجع أوي خليه يتعب ويدور ووقتها حيحس بنفس الوجع اللي حسسهولها بس انتي خليكي على اتصال بيها على طول ولو لقيتي الوقت طال على اللي هما فيه وقتها انا اللي حاخدك من ايدك وتقوليله كل حاجه حتى لو كانت حتزعل منك
ميرا :ربنا معاها يارب
❤️❤️❤️❤️❤️❤️❤️❤️
يمر الليل عليهم مر السنين دموع تنهمر من قلوب عاشقه ومااصعب الدمع الذي ينهمر من قلوب ليس بإمكانها شئ سوى الانتظار
تسلط الشمس اشعتها الذهبيه لتخترق كل الحواجز والجدران معلنه وقت انتهاء الاحزان والتكيف مع الامها وبدء يوم جديد
يسعى فيه كل منهم إلى وجهته المقدر له ان يسعى في طريقها
ولكن في وسط ذاك هناك قلوب كالزهرة التي تبدأ في التفتح لا تعرف ماالذي ينتظرها وماالمكتوب لها تضحك للدنيا وتفتح لها ذراعها
هي الآن في أول يوم لها للعمل مع أخيها :ماخلاص بقى خنقتني حفظت وربنا حفظت خلاص
سامي :مش بفهمك ياحمارة
سحر :لاء بص بقى حتغلط حغلط وخلينا بقى نسيب الشغل ونفضح بعض ونبقى مفضوحين برة وجوة ونغير اسم الجيم ونخليه جيم المفضوحين
سامي :انا عارف اننا حنقتل بعض هناانا إيه اللي كان خبطني فمخي وخلاني اجيبك دي شكلها حتبقى ايام سوده
سحر :اخس عليك ياسمسمتي كده بردو ده انا اختك حبيبتك اللي عارفه كل اسرارك وساكته ومتهنش علية ياحبيب أختك
سامي :طب بقولك إيه يااختي ياحبيبتي انا عاوزك في مشوار كده
سحر : بجد مشوار حتاخدني فين
سامي :لا انا مبخدش ياحبيبتي ربنا هو اللي بياخد
سحر :بعد الشر علية ده انا لسه صغيرة
سامي :يابت فتحي مخك معايا انا قصدي موضوع مهم بصراحه طلب
سحر :اه مانت حتدفع بقى وتقعد تقوللي مشوار وطلب قول وانت وحظك
سامي :جميله
سحر :اشمعنى
سامي :انتي حتدخليلي قافيه
سحر :مالها الست جميلة الجميلات بتاعتك ايه مش عاجبها الاسم اللي اختارتهولها واللا إيه
طب مش كنت قلتلي وانا كنت اختارتلها اسم حلو شويه بدل اسم الست سهير زكي ده
سامي : يااختي فكك هو اسم واللا اكتر
وبعدين تعرفي تكتمي خالص حتفضحينا الله يخرببيتك
سحر :مفيش حاجه بتستخبى يااخويا ياحبيبي ومسير الحق حيبان وابوك وقتها ممكن يروح مننا فيها
انا سمعت عن اللي بيروح فشربة مياه لكن انت ابوك حيروح فحرف السين ههههههه ههههههه وربنا انتوا عيله مسخرة
سامي :طب بقولك عاوزك كده زي الشطورة تقنعي ابوكي يروح معايا نتقدم للزفته دي كمان عشان نخلص
سامي :وانت متقنعهوش ليه أن شاء الله
سامي :حيقعد يقوللي كاني وماني لكن انتي بتعرفي تبلفيه بكلمتين سحر اقفي معايا وانا مش حنسالك جميلك ده
سحر :طب إيدك على ميتين وخمسين جنيه
سامي :ليه أن شاء الله
سحر : في بلوزة حموت عليها وقلت لامك حدفتني بالشبشب وقالتلي امشي من قدامي يابت ال.......... لا مش قادرة انطقها بعزقت كرامتي عالاخر
سامي :مفيش غير عشرين جنيه
سحر :ودول اشتري بيهم الزرار اللي فالبلوزة واللا الجيب
سامي :روحي هاتيلك شوية لب وقزقزيهم سحر خليكي انتي بس جدعه معايا وانا حشهيصك وربنا
سحر :وحياتك ساعتها ماحتعبرني وحتشهيص جميلة الجميلات بس ماشي حاضر عشان تعرف بس وعد الجمايل يامعلم
يسمعون من يأتي خلفهم :صباح الخير ياجماعه
يردون :صباح الفل يا كابتن
يحي :منورة ياسحر
سامي :ده نور المكان والله يايحي مش نورها خالص
يحي :لا طبعا ده المكان نور لما سحر دخلته
سحر وهي تضربه فصدره:شايف الناس اللي بتفهم ياعديم المفهوميه ان شالله يخليك ياكابتن يارب
يحي:بس يارب منكنش حنعطلك عن الجامعه والمذاكرة
سامي :لا اطمن دي فاشله ومبتذاكرش
سحر :استغفر الله العظيم بص انا محترمه يحي ومش عاوزة أرد
يحي :ههههههه قلبك أبيض يا سحر ده سامي بيموت فيكي هو بس عاوز يعاكسك
سحر :مانا عارفه هو في حاجه مصبراني عليه غير اني عارفه غلاوتي عنده
سامي :طب بقولك إيه بقى بصي انا عصافير بطني بتزقزق ماتخليكي جدعه كده وتروحي تشتريلنا فطار
يحي:فطار ايه يابني ادم انت يعني شحطين زينا يقعدوا وسحر هي اللي تروح انا حروح اشتري
تحبي تفطري إيه ياسحورة
سحر :عاوزة كرواسون وسينابون
سامي :مين اللي هو ازاي يعني امال مين اللي كل يوم تضرب فول وفلافل وبصل
سحر :يعني انت عاوز البنات تدخل تلاقينا بناكل فول وفلافل لازم نبقى قدوة يابني
سامي :ياسلام عالعقل
تدخل إحدى البنات :صباح الخير
سحر :تعالي حبيبتي اقعدك شويه عالاجهزة لحد ماتوصل المدربه وبقية زمايلك
البنت:طب انتي عارفه حلعب على إيه
سحر :اطمنى عالاخر ده احنا حنريحوكي تعالي ياشابه
ثم توجه ليحي وسامي الكلام :قطيعه ماحدش بياكلها بالساهل
سامي :ماشي يا ست ريا
حسرة عليها ياحسرة عليها حسرة عليها
جت رجليها ماجت رجليها
يحي :هههههههه هههههههه وربنا انتوا ماليكم حل
❤️❤️❤️❤️❤️❤️❤️❤️
عاجبك اللي حصل امبارح ده ياياسمين حرام عليكم اللي بتعملوه فنفسكم ده
ياسمين :يعمل اللي هو عاوزه
ميرا :وانتي مبسوطه كده
ياسمين :أنا خلاص مبقتش حسه بأي حاجه مبقاش فاضل فية غير شوية وجع جوايا منه
تخيلي اني اتبهدل البهدله اللي اتبهدلتها دي كلها وسنين تفوت وتعدي والكل يقوللي انسيه عيشي حياتك ده أكيد مات من سنين وانا أقول لاء حمزة عايش هو وعدني انه مش حيسيبني
يقوم بقى ايه يطلع عايش وعارف كل حاجه لاء وإيه يرتب ويخطط سنين عشان يرجع ينتقم مني ينتقم من قلب كل ذنبه في الدنيا إنه حب ووفى بوعده ومخانش العهد
تخيلي انتي بقى انا أبقى قاعده مستنياه يرجعلي ويعوضني عن كل اللي حصللي فبعده وهو قاعد مستني يرجع عشان ينتقم مني ههههههه ههههههه طب بزمتك مش حاجه تضحك
ميرا :ياسمين مفيش حد في الدنيا دي كلها حيحس بوجعك أدي انا عيشت نفس إحساس البعد وسوء الظن ولولا القدر خدمنا وطلعنا كل اللي فقلوبنا لبعض كان زماننا لسه تايهين ومشاعرنا متبعترة
ياسمين :قلبي واجعني منه أوي ياميرا
ميرا :ربنا يهدي الحال يارب
كانت ريم بتشتغل بكل همه ونشاط مع الشباب فجأة تلاقي خالد بيكلمها
إزيك يا مدام ريم
ريم :الحمد لله والله بخير
خالد الولاد مجوش معاكم ليه النهارده
ريم :كفايه عليهم إمبارح هما النهارده قاعدين فى الفندق مع خالهم
خالد :خالهم مين
ريم :دكتور أكمل
خالد : دكتور أكمل اللي كان هنا امبارح معاكم يبقى خالهم
ريم :ايوة يبقى خالهم
خالد: اصل لما رجع ياخدكم آخر النهار انا سمعت الولاد بينادوه بابا فاعتقدت انه باباهم
ريم:ريم :باباهم متوفي دكتور أكمل يبقى اخويا وهو اللي مربيهم فبينادوه بابا وعلى فكرة هو يبقى خطيب أستاذة ميرا
خالد :معقوله دي أنا آسف والله انا اعتقدت انه زوج حضرتك اصل محدش قاللي انه خطيب الأستاذه ميرا
ريم :ولا يهمك حصل خير
خالد :بس هو اللي مربيهم ازاي دول صغيرين أوي هو باباهم متوفي قريب
ريم والدموع تجري بعينيها : مقرب على تلت سنين وفاة
خالد:ربنا يرحمه ويغفر له
ريم :يارب ربنا يرحمه يارب
عن اذن حضرتك
خالد :اتفضلي يامدام ريم وأنا بعتذر مرة أخرى
تهز رأسها له وتتحرك من أمامه لتكمل عملها بينما هو يحدث نفسه :ياااه معقوله لسه في حد بيعرف يحب بالشكل ده لسه فى حد وفي كده
معقوله يكون الحزن اللي فعنيها ده بسبب حزنها على جوزها
بس دي البنت الصغيره شكلها اقل من تلت سنين يعني معنى كده انه ممكن يكون مشافهاش أصلا لا حول ولا قوة الا بالله
يمارس عمله في همه ونشاط كان يساعدهم ويقدم لهم العون وعيناه لاتحيد عنها فهو لا يعلم ماالسبب في انجذابه لها بهذا الشكل
لا ينكر أن حزنها الكامن في وجهها هو ماجذب نظره وتفكيره لها ولكن الآن ازداد إعجابه بها بعد أن شعر بوفائها لذكرى زوج وافته المنيه منذ عدة سنوات
اما هي فقد كانت تمارس عملها محاوله ابعاد ذكريات عنها لاتجني سوى الدموع والآلام
تحدثت عبر الهاتف اكتر من مرة للاطمئنان على أطفالها حتى انتهى اليوم وقد اتموا كل شيء على أكمل وجه
يرجع حمزة اخر النهار ويشكرهم على مجهودهم الكبير اللي بذلوه بشكل يليق بالحفل
وييجي أكمل عشان ياخدهم ويفسحهم قبل مايرجعوا الفندق وكان معاه الولاد اللي أول ماشافوا خالد جريوا عليه
وسلموا عليه وكأنهم عارفينه من زمان
يحتضنهم خالد بكل حب وحنان وكأنه يريد ان يزرع الطمأنينه في قلوب اطفال حرموا من نعمة وجود ابيهم في حياتهم فما أصعب اليتم في هذا السن الصغير
وما هناك أشد من أن يترك أحد أطفاله صغارا تهوى بهم الرياح وحيدون في تلك الحياة فما أجمل من يحيا كل اب وسط عائلته فلا يشعر بذالك إلا من حرمه القدر من التلذذ تلك النعمه
إيه يابطل كده بردو استناك ومتجيش طب أنا زعلان بقى
إياد :آسف ياعمو والله بس محبناش نيجي ونضايق حد بوجودنا
خالد :يانهار أبيض وده مين بقى اللي يضايق من كابتن مصر واللا من القمر الصغنن ده
لا ياراجل قول كلام غير ده واعترف انك خفت اكسبك وادخل فيك جون زي امبارح
اياد :هههههههه
خالد :حتوحشني يا إياد
إياد :وحضرتك كمان ياعمو حتوحشني
يحمل خالد جنه:وانتي يا احلى جنه في الدنيا حتوحشيني أوي
تضحك له الصغيرة وتحتضنه وكأنها تخبره بمدى ارتياحها له
كم شعر بالسعاده والفرح لذاك الأمر
وكم تعجب كل من ريم وأكمل لموقف الصغيرة التي لاتطيق احد غريب عنها ان يلمسها
يؤكد عليهم حمزة حضور الحفل لكن طبعآ ريم تعتذر لأن الحفله مش حينفع يكون فيها اطفال فبالتاكيد حتكون مع ولادها فى الفندق
ومش بس كده ده كمان اتفق معاهم على حفلة عيد ميلاد سيلا اللي معاده قرب
وطبعاً ده فرح خالد جدا عشان حيشوف ريم تاني قريب
يخرجوا من الفيلا ويطلع حمزة عشان يشوف سيلا وطبعا يطمن على حبيبة قلبه اللي متكلمش معاها نهائي من اليوم اللي قبله
يجدها تضع الغطاء على سيلا وتستعد للخروج
تلتفت لتجدها امامها:مساء الخير
ياسمين :مساء النور
حمزة :ياسمين بعد اذنك بكرة ان شاء الله حتفضلي انتي وسيلا هنا مفيش نزول نهائي انتي فاهمه طبعا ان الحفله مش حينفع يكون فيها أطفال
ياسمين :حاضر أي أوامر تانيه
حمزه :ماشيه
ياسمين :أيوة
حمزة :تحبي اخللي خالد يوصلك
ياسمين :شكراً عن اذنك
❤️❤️❤️❤️❤️❤️❤️❤️
بت ياسحر جاهزة
سحر :جاهزة يااخويا محضره البنادق والرشاشات انت مالك محسسني إني داخله معركه كده ليه
سامي :قلقان خايف يقول كاني وماني
سحر :يابني هو مش انت فتحت معاه الموضوع قبل كده وقال تمام وسلم عليها فخطوبة اختك
سامي :بس برضو قلقان منه ياللا بقى هو دلوقتي بيتفرج على فيلم ومزاجه عالي ادخل بقى عليه
سحر :طب إيدك على خمسين جنيه
سامي :مش لسه مديكي عشرين جنيه
سحر :جبت بيهم لب عاوزة أجيب شيكولاتايه
سامي :بخمسين جنيه يا مفتريه
سحر :خلاص مش عاوزة اديني قاعده اهوه
سامي :طب قومي يازفته الله يخرببيتك وبعد كده حديكي اللي انتي عاوزاه
سحر :ماشي بس خد بالك اي حركة غدر حعترف بكل حاجه
سامي : طب ياللا بقى قومي قبل مايدخل ينام
تخرجله وتقعد جمبه:بتاكل ايه يابابا
مش دي الكيكه المحروقه اللي ماما عملتها من يومين
سعيد :أيوة هي بعينها
سحر :ياحبيبي يابابا طب وايه اللي جبرك على كده
سعيد :أعمل إيه مانتوا ياولاد الجذمه مرضتوش تاكلوها وهي فضلت تتكلم تتكلم وتندب حظها ان ولادها مش عاوزين ياكلوها قمت ضحيت عشان خاطركم وقلت حاكلها أنا
سحر :ياحبيبي يابابا بس دي تضحيه كبيرة اوي للدرجه دي بتحبنا
سعيد :كان لازم اضحي بالام والجنين عشان الدكتور يعيش
مش أحسن من النكد اللي امك كانت حتعيشنا فيه
سحر :طول عمرك أصيل ياوالدي وإيه رأيك تكمل التضحيه وتحدد اليوم اللي حنروح نخطب فيه جميله لسامي
سعيد :جميله جميله مين
سحر :لا لا يابابا متفهمش صح ارجوك انا بوصفها انها جميله وامورة ومحترمه قصدي سهير مش انت شفتها يامعلم
سعيد :ايوة شفتها بس المنيل اخوكي معندوش شقه حروح أتكلم اقول إيه للناس دلوقتى
سحر :ثبتهم بأي كلمتين وخلاص المهم نخطبوها اصل ابنك خايف لتنخطف منه معلش يابابا نريحوه
سعيد :ماشي يا ستي عشان خاطرك انتي بس
سحر :تسلملي يابابا افرح ياسامي وسلملي على جميلة الجميلات