الحلقه الخامسه و الثلاثون
رواية
قلوب تنزف عشقاً
بقلم. :عبير سليم
❤️❤️❤️❤️❤️❤️❤️
تمر علينا من المحن مايكفي ليجعلنا نرفع أيدينا إلى الله داعينه بأن يرفع عنا ذاك البلاء
متيقنين تمام اليقين بأنه مهما طال الظلام لا بد وان تشرق
الشمس بنورها معلنه محو الظلم وتوقيع عدل الله
يابنتي ارحمي أمي انتي بتهببي إيه من الصبح
سحر :بحضر العفاريييييت ههههههه
سامي :عفريت لما يركبك ياشيخه يابت الله يخرببيتك عماله
من الصبح تتنططي من جهاز للتاني ولا كأنك شغاله معانا
سحر :اخس عليك ياسمسم خسارة فية
سامي :لاء خسارة لية بقولك إيه ركزي مع البنات حافظي على لقمة عيشك بدل ماتنطردي
سحر :والله تبقوا انتوا الخسرانين ده انا عاملالكم شغل هنا واللا لو وقفتوا على شعر راسكم ماكنتوا تعرفوا تعملوا
سامي :بقولك إيه بلاشعر راسنا بلا شعر صدرنا ياللا يازفته شوفي شغلك وبعدين انتي مالك أصلا بالأجهزة دي
دي للي عاوزة يخسوا ياحبيبتي انتي ناويه تختفي ده احنا يادوب مسندينك بالسلكتين اللي ماشيه عليهم
سحر :ياخي اتنيل حوش ياعم العضلات التي حتقطع القميص ده احنا بنعد العضم اللي في قفصك الصدري ياراجل
سامي :بردو معصعصه متحاوليش
سحر :ده اسمه عود فرنساوي ياعديم المفهوميه مش احسن من جميلة الجميلات بتاعتك
سامي :لا من فضلك إلا جميله اه متدخليهاش بينتا احنا نهزا بعض اه لكن هي سيبيها فحالها كفايه اللي هي فيه
سحر :وهي إيه اللي هي فيه ان شاء الله عاوزة إيه تاني كانت حتموت وتخطبها واديك خطبتها في إيه تاني
سامي :هو مش المفروض في شبكه وخطوبه باغبيه
سحر :طب متشتمش وبعدين ماتجيب الشبكه
سامي :منين ياحمارة الفلوس اللي معايا تجيب الدهب اه لكن تعمل شبكه لاء وابوعا الفقري منكد عليها عيشتها وعيشتي كل شويه
سحر :طب واللي يقنعهولك تلبسوا الشبكه عالهادي يازبادي
سامي :بجد ياسحر
سحر :وجد الجد كمان ده انا سحر والأجر على الله
سامي :ياحبيبتى يااختي
سحر :مانت عارف اختك بتحب تخدم من غير ايتها حاجه
سامي :انتي بتشحتي واللا إيه
سحر :يعني شوفلي أي حاجه أصلي مقشفرة أوي
سامي :طب خدي الخمسه جنيه دي
سحر :طب وعلى إيه خليهالك أحسن انا مبشحتش يابيه
يسمعون صوته خلفهم:ازيكم عاملين ايه
ترد سحر :الحمد لله بخير
يحي :واقفين كده ليه في حاجه
سحر :بنتخانق بس قصدي بنتناقش
يرن تليفون سامي:طب حسيبكم واروح استلقى وعدي
سحر :ابقى سلملي على فرجينيا جميلة الجميلات
يحي :ههههههه ههههههه
سحر لنفسها :يخرببيت ضحكتك ده انت ضحكتك حلوة أوي مز يابن الايه بركاتك ياياسمين يااختي
يحي :سحر ياسحورة
سحر :إيه اه نعم
يحي :الجميل سرحان في إيه اللي واخد عقلك ياقمر
سحر :سرحانه ايه لاء
شفت الأستاذ المحترم اخويا حبيبي بيزعقلي عشان بلعب عالاجهزة ده حتى طباخ السم بيدوقه
يحي :سم إيه بعد الشر عنك ده انتي تدوقي الحلو كله
سحر :طب اذا كان كده بقى في لسه جهاز مركبتوش معصلج معايا حبتين مش عارفه اركب عليه ابن اللذينه ده
يحي :بس كده تعالي
بس طمنيني الأول روان شغاله مع البنات جوة كوبس
سحر :شغاله زي الموتور ماشاء الله عليها متتعبش يخرببيتها
يحي :حرام عليكي البت حيجرالها حاجه
سحر :لا مانا قلت ماشاء الله وبعدين انت بتوه عشان متلعبنيش صح خايفين على اجهزتكم
يحي :لا طبعا باللا اتفضلي قدامي
هو ده بصي ياسحر انتي بترفعي رجلك عليه كده وبتبدئي تحركي عضلة رجلك دي الاول
وقعد يشرحلها تلعب عالجهاز ازاي وهي طبعا طلعت عشان تجرب ولسه بتحط رجلها راحت هوبه متشقلبه ولولا يحي لقطها بسرعه كان زمانها وقعت واتكسرت بس بحي لحقها بسرعه وتقريبا وقعت فحضنه وطبعا هما الاتنين الظاهر عجبتهم الوقعه وتاهوا فعيون بعض شويه
لحد مافاقوا على صوت سامي وهو بينادي عليهم
طبعا صاحبتنا نطت وقامت زي القرده وطلعت تجري على برة أما يحي كان لسه عايش في اللحظه الحلوه دي اللي كان يتمنى انها تطول اكتر من كده بكتير
خرجت تلقط أنفاسها مش مصدقة اللي حصل
سامي:في إيه يابت مالك
يحي وهو خارجلهم:كانت عاوزة تلعب ووقعت ولولا لحقتها كانت وقعت اتكسرت رقبتها
سامي :لحقتها ازاي يعني مش فاهم مسكتها مثلاً
يحي بارتباك وفهم ان سامي اتضايق :أيوة مسكتها كانت حتقع
سامي :ماتقع واللا تنكسر رقبتها حتى
وانتي ياهانم عاوزة تكملي معانا في الجيم هنا تلزمي حدود شغلك وبس يااما متجيش تاني انتي فاهمه
يحي بعد مالاحظ ارتباك سحر وتحول سامي بالشكل ده :مالك ياسامي بس محصلش حاجه وبعدين هي مش سحر زي أختي انت مكبر الموضوع كده ليه
سامي :معلش ياصاحبي أنا محبش حد يلمس اختى حتى لو حينقذها من الموت انا عارف انت مين يايحي ده انا ااتمنك على روحي لكن بردو مينفعش
سحر والدموع بتجري فعنيها:انا ماشيه
سامي :مش قلتي معندكيش جامعه النهارده
سحر :مش انت لسه مطفشني أديني ماشيه بكرامتي أحسن عن اذنكم
سامي :انتي يازفته استني الله يحرقك
سحر وهي خلاص بقت على اخرها واول مرة تضايق بالشكل ده :معلش ياسامي سيبني امشي من فضلك
يحي وهو بيمسك دراع سامي:خلاص ياسامي سيبها تمشي دلوقتى وابقى اتكلم معاها لما تروح
سامي :ييه بقى انا كنت ناقصها هي كمان
يحي :قول بقى انك مضايق وطلعت غلبك فينا نستحملك مفيش مشكله بس انت احرجتها جامد ولازم لما تروح تصالحها
سامي :متهنش علية المتخلفه دي وانا عارف حصالحها ازاي ربع لب صيني ومعاهم قرص مشبك والضحكه توصل للشارع اللي بعدينا
منك لله ياسحر انتي كمان مش كفايه جميلة الجميلات على رأيك
يحي :هههههه
سامي :عجبتك
يحي :بصراحه من سحر أحلى بكتير بتخليني افطس من الضحك وهي بتقولها
سامي :ماشي يافالح انت كمان جتكم الهم كلكم
❤️❤️❤️❤️❤️❤️❤️❤️
تجلس وهي تفكر من أين ستأتي بهذا المال لا لن يسعفها الوقت لتتصل على حسين فلا بد من تدبير المال سريعاً
لا لا أريد اللجوء إليه ولكن لمن اذا ألجأ ليس امامي سواه انها أم صديق العمر وهو أولى بها الآن
تطلب رقمه الذي سجلته عندها منذ فترة تحسباً لأي شئ
تنتظر رده الذي أتى سريعاً :أيوة يا ياسمين انتي فين
ياسمين :حمزة بعد اذنك انا محتاجه أربعين ألف جنيه ضروري وبسرعه مفيش وقت
حمزة :خير في إيه مين اللي تعبان عندك داده قالتلي انك فى المستشفى
ياسمين :مامت حسين
حمزة :مامت حسين صاحبي
ياسمين :أيوة انا معاها في المستشفى دلوقتى وهي حالتها صعبه أوي ومحتاجه قسطرة في القلب ضروري وبسرعه مفيش وقت
حمزة :انتوا فمستشفى إيه
ياسمين :مستشفى.........
حمزة :فخلال دقايق ان شاء الله حتكون عندكم عربية إسعاف وحتعمل العمليه فأحسن مستشفى فى القاهرة
تغلق معه الهاتف وتقوم بالاتصال على حسين وتخبره بمرض امه بس طبعا مقالتلوش انها داخله العمليات قالتله انها تعبانه أوي ولازم ينزل بسرعه وهو طبعا اتخض جدا على امه وخلود برغم انها حامل وتعبانه أوي لكن صممت تنزل معاه حجزوا على أول طيارة اللي للأسف حتكون تاني يوم
اما ياسمين اتصلت على سعاد عشان تاخد بالها من امها لأنها مش عارفه ظروفها ايه ولا حترجع البيت امتى
وصلت عربية الاسعاف ليهم وطبعاً ركبت معاهم العربيه ووصلت المستشفى وكانت غرفة العمليات مجهزة وفي استقبالها
ياسمين :شكرآ يا حمزة
حمزة :انتي بتشكريني على إيه ياياسمين دي أم صاحبي ياسمين هو انتي كنتي على علاقه بيها تعرفيها يعني
ياسمين :أيوة ياحمزة انا بزورها من وقت مااستقرينا هنا في القاهرة
حمزة :وطبعاً بتكلمي خلود وحسين مش كده
ياسمين :أيوة ياحمزة بكلمهم
حمزة :ماشي يا ياسمين نطمن على والدة حسين وبعد كده في كلام كثير أوي حنتكلم فيه
ياسمين :نطمن عليها الأول وعلى فكرة حسين نازل بكرة ان شاء الله
حمزة :ياااه أخيراً حشوفك ياحسين وحشتني اوي يا صاحبي
يجلسان أمام بعضهما ينتطران خروجها بالسلامه ينظر ان إلي بعضهما دون التفوه بكلمه فقط القلوب هي من تتحدث
ياترى حتسامحيني عاللي عملته فيكي ياياسمين حتسامحيني على سوء ظني فيكي
ياسمين :ظلمتني ظلمتني أوي ياحمزة حكمت علية من غير ماتفكر تسألني اتهمتني واصدرت حكمك علية قلبي واجعني منك أوي
حمزة :اذا كان قلبك واجعك انا قلبي اتقطع مليون حته مبقاش فيه ولا حته سليمه انتي متعرفيش انا كنت بتعذب كل يوم ازاي كل مااتخيل انك فحضن راجل غيري وانتي كمان غلطانه ياياسمين متحملنيش الذنب كله لوحدي ليه خبيتي علية ليه مفهمتنيش ليه مرضيتيش تقوليلي عنوان حسين اللي انا متأكد انه عارف كل حاجه سيبتيني عايش في اوهامي ليه ليه ياسمين
هنت عليكي خلاص واللا هان عليكي حبنا
ياسمين :انت تهون علية ده انت النفس اللي انابتنفسه ياحمزة ده انت عمري كله ياحمزة ده انا قلت لو مكنتش لحمزة مش حكون لغيره انا اتصدمت فيك صدمة عمري ياحمزة صدمه مش عارفه حفوق منها ولا ازاي
كلام كتير عيونهم وقلوبهم قالته بس للأسف لسانهم عاجز عن الكلام مر الوقت من غير مايحسوا لحد ماخرج الدكتور وطمنهم ان كل شئ، تمام لكن هي عشان عندها سكر وضغط لازم تدخل العنايه المركزة وبكرة الصبح حتخرج على أوضه عاديه ان شاء الله
حمزة :ياسمين انتي اظني سمعتي الدكتور قال إيه هي دلوقتى حتدخل العنايه مش حتخرج غير الصبح يعني وجودك دلوقتى ملوش لزوم انا حوصلك دلوقتى وبكرة الصبح ان شاء الله تجيلها
ياسمين :انا بعتذرلك اني مقدرتش اروح النهارده لسيلا وزي مانت شايف مش حقدر اروحلها بكرة كمان
حمزة :ولا يهمك يا ياسمين الداده معاها وخالد معاهم متقلقيش ياللا عشان اروحك
ياسمين :متتعبش نفسك ياحمزة انا حروح لوحدي
معلش مش عاوزة كلام من حد ده المرة اللي خالد وصلنا فيها انا وسيلا الشارع كله كان بيتكلم معلش المواصلات كتير. ولسه بدري
حمزة :خلاص حطلبلك اوبر اظني دي مفيهاش حاجه
ياسمين :مش انت معاك عربيه محمل اوبر ليه
حمزة :مخليه عندي احتياطي تحسباً لأى موقف
يطلبها أوبر ويخرج معاها ويقف لحد ماتوصل العربيه ويطمن عليها ويدخل المستشفى تاني عشان يطمن على جابر ووضعه الصحي
يدخل للدكتور المسئول عن حالته ويتكلم معاه والدكتور يقولله:طبعاً احنا نحمد ربنا انه فاق ورجع للواقع مرة تانيه لكن الموضوع مش حيبقى سهل حنتعب شويه معاه
حمزة :دكتور وضحلي اكتر من فضلك
الدكتور :جابر مقعدش فالغيبوبه يوم واللا شهر واللا حتى سنه ده قعد سنين وده حيخليه يسترجع ذاكرته بصعوبه وكل حاجه حيتعلمها كأنه طفل صغير لسه بيتعلم كل حاجه زي الأكل والكلام والمشي وواحده واحده ان شاء الله حيفتكر كل حاجه أهم حاجه دلوقتى إننا نفكره بكل حاجه حلوة بالناس اللي كان بيحبهم ببنته مثلا اللي هي دلوقتى أكيد أهم حد فحياته وبلاش خالص نفكره بالحادثه اللي ماتت فيها مراته لأنه حاسس انه كان سبب فموتها
حمزة :ممكن يخرج من المستشفى امتى
الدكتور :في أي وقت هو خلاص استرد وعيه ومفيش داعي لوجوده بس الأفضل نستنى بس لحد مانطمن إن أجهزة جسمه كلها بقت بتشتغل بشكل طبيعي
وطبعاً هو حيخرج من هنا على كرسي متحرك لحد مايقدر يتحكم فاعصابه كويس وحتكون في ممرضه مقيمه معاه فترة
وطبعا حطمن عليه وحتابعه باستمرار
حمزة :تمام متشكر أوي يادكتور ممكن أدخله اطمن عليه قبل ماامشي
الدكتور :طبعاً تقدر تدخله
يدخل حمزة يلاقيه عينيه مفتوحه لكنها تايهه مش عارفه هي فين
حمزة :ألف حمد الله على السلامة يا جابر
جابر بيبصله وبيبتسم من غير مايتكلم
حمزة:انت فبلدك يا جابر انت فمصر اطمن ياجابر كل حاجه تمت زي ماكنت عاوز بالظبط اسسنا شركه هنا كبيرة
وانت حترجع تقف على رجلك من تاني وحتستلم كل حاجه ياجابر
وحشتني اوي ياجابر وحشتنى اوى أنا مش مصدق نفسي إنك رجعتلنا من تاني كلنا محتاجينك انا محتاجك أوي أنا فاشد لحظات حياتي ومفيش حد حيحس بية غيرك ياجابر
وبنتك سيلا ياجابر محتاجاك هي كمان ويمكن أكثر مني بكتير
بمجرد ماجابر سمع اسم سيلا الدموع جريت على وشه
حمزة :سيلا كبرت بقت عروسه جميله بنتك بقت زي القمر ياجابر على فكرة كانت بتجيلك هنا علطول وكانت بتقعد تبوسك وتقولك وحشتني يابابي وانا متأكد ان هي كمان وحشتك أوي ياللا قوم عشان تربيها وتكبرها وتحقق فيها كل احلامك
متخافش عليها يا جابر سيلا مفارقتش حضني طول السنين اللي فاتت كنت بخاف عليها من الهوا الطاير فضلت محافظلك على أمانتك ياجابر لحد ماتستلمها وتكمل رسالتك معاها
يعلم ربنا انا حبيتها ازاي وحافظتلها على مالها لكن انا عارف اني مهما حبتها وخفت عليها حبك ليها حيكون حاجه تانيه خالص ياللا عشان تربيها على عاداتنا وتقاليدنا زي مااتمنيت ياجابر
قعد جمبه يتكلم ويحكي وجابر بيسمعه صحيح مكنش بيرد عليه بس كان بيسرح زي مايكون بيحاول يفتكر ويسترد ذكرياته
حمزة مكنش عاوز يقوم ولا يمشي مش مصدق ان جابر أخيراً وبعد السنين دي كلها فاق ورجع من تاني
نسيبهم بقى مع بعض ونروح لياسمين نشوف عملت ايه بعد ما وصلت البيت
طالعه السلم طبعاً تعبانه لقت اللي فوشها:سحر مالك في ايه يا حبيبتي واقفه كده ليه
سحر :مستنياكي من بدري وما صدقت لقيتك داخله قلت الحقك
ياسمين : طب تعالي ندخل
سحر :لاء تعالي عندنا متقلقيش ماما جوة عند مامتك تعالي بقى
تدخل معاها ياسمين وتقفل الباب :في إيه يخرببيتك شكلك بيقول في حاجه حصل ايه
سحر :ده اللي حصل واللي جرا لا ينكتب ولا بنقرا يا سوادك ياسحر ولسه لما ييجي سامي حيخلص علية يااختيي انا عاوزة انطق الشهادتين قبل ما ييجي
ياسمين :لا ده انتي تقعدي كده وتفهميني بالراحه هببتي إيه الله يخرببيت معرفتك السوده
سحر حكت لياسمين كل اللي حصل في الجيم
ياسمين :يا حلاوتك ياجمالك هو انتي يابت انتي ماصدقتي أول ما قلتلك كلمتين رحتي وقعتيلي فحضنه الله يخرببيت سنينك ياسحر انتي اتجننتي يابت
مش تتقلي شويه يامتخلفه ده الراجل بيحب البنت التقيله كده مش الخفيفه
سحر :خفيفه ايه وتقيله ايه بس ياياسمين هي كوباية شاي يابنتي بقولك اتشقلبت وقعت وربنا ما كان قصدي حاجه وانا ماتخيلتش ان يحي اول ماحيقول لسامي
سامي حيكون رد فعله كده ده زي مايكون ظبطنا فوضع مخل
ياسمين :طب احمدي ربنا بقى يافالحه انتي عارفه لو كان اخوكي دخل وشافك وانتي دايبه فعيونه ورايحه فدنيا تانيه كان اقام الحد عليكي وطخك عيارين وقالك جبتلنا العار يافاجرة ده شرف البنت زي عود الكبريت
هات الطبنجه ياولد اتشاهدي على روحك ياهنادي
سحر :لا ياخال متجتلنيش البشمهندس هو اللي غواني
ياسمين :بشمهندس الري مش أجده لازم اطخك واغسل عارك يافاجرة
سحر :وين هنادي ياخال
ياسمين :هنادي راحت في الوبا يا أمنه
سحر :يامرك ياسحر يامرك رحت بلاش ياعلوان
ياسمين وسحر :هههههه هههههه
ياسمين :يخرببيتك ياشيخه ضحكتيني ومكنش لية نفس اضحك بصي انتي حتستحملي الكلمتين اللي سامي حيقولهوملك انتي عارفه اخوكي بيخاف عليكم ازاي اديكي شايفه حاكم على سميرة وسعد ميخرجوش مع انه ابن خالتكم يعني مش غريب بيخاف عليكم حقه
مترديش وتقولي حاضر وطيب ونعم
سحر :طب والجيم
ياسمين :تروحي طبعاً هو انتي عملتي حاجه غلط دي لحظة شيطان وراحت لحالها وان النفس لامارة بالسوء
سحر :شيطان إيه منك لله انتي كمان انتي شكلك وربنا اللي حتوديني فداهيه
ياسمين :خلاص ياهبله مفيش حاجه ساميه بيحبك ده مش بعيد نلاقيه داخل علينا دلوقتى بكيس لب وبيصالحك
يسمعون طرقا على الباب
سحر :دي خبطته عارفاها جالك الموت ياتارك الصلاة
بصي انا حعمل نفسي مت وانتي تصوتي علية يمكن أصعب عليه
ياسمين :ياختي اتنيلي ادخل ياسامي ادخل يااخويا محدش كاشف راسه
سامي :قومي ياهانم ياللي عامله نفسك نايمه طبعا حكتلك اللي حصل مش كده
ياسمين :مظلومه وحياتك دي وقعت غصب عنها والراجل مهانش عليه تتكوم عالارض زي الجردل قام لحقها قبل ماتدب تقع يبقى بدل مانشكره نتخانق معاه ونهزاها كده ميصحش ياابو المفهوميه
سامي :لا ياياسمين مينفعش انه يمسكها مهما حصل انا عارف يحي وعارف اخلاقه كويس لكن لا يصح الا الصحيح واقسم بالله ياسحر لو طلعتي على اي جهاز من الاجهزة تاني لحوريكي حعمل فيكي ايه انتي فاهمه
سحر :حاضر يا اخويا حاضر
سامي :اتنيلي خدي
سامي :ياحبيبي ياخويا لب صيني ومشبك كمان
سامي :مانا قلت لتكوني قطعتي شرايين ايدك واللا حاجه ياللا انا رايح انام جاي تعبان
سحر :حتنام واللا حتكلم جميلة الجميلات
ياسمين :اخرسي بقى
روح ياسامي الله يسهلك
اسكتي بقى احمدي ربنا انها عدت على خير
سحر :طب اقعدي اقعدي نقزقز اللب وتحكيلي عملتي ايه النهارده وكنتي فين طول اليوم يابت
تدخل عليهم سميرة :انتوا هنا ياتحف خدوا جايبه معايا بسبوسه بالقشطه
سحر :تعالي تعالي ياسمورة دي القعده حتحلو
طبعاً فضلوا بتكلموا ويضحكوا وياسمين حكتلهم اللي حصل على مدار اليوم كله
سميرة :قطيعه تقطع الحب وسنينه ده اللي واخدينه منه
سحر :هو الحب حلو ياسمورتي
سميرة :معرفش
سحر :ليه ياسمورتي هو أبيه حسب الله مقالكيش
سميرة :مين اختنا الكبيرة حسب الله لا هو قال كلمتين صباح الخير
سحر وياسمين :وتتصبحوا بالخير وكده اهوه
وقعدوا يضحكوا ويهزروا واكلوا اللب والبسبوسه والمشبك
ياللا بالهنا والشفا والله لقول لجوزي انا كمان يجيبلي بكرة لب ومشبك وبسبوسه اشمعنى هما يعني
❤️❤️❤️❤️❤️❤️❤️❤️
بيتكلم معاها في التليفون وهو مبسوط والدنيا مش سايعاه من الفرحه
أنا النهارده قضيت أجمل يوم فحياتي كلها
صوفيا :وانا كمان انبسطت أوي
حازم:بجد ياصوفيا انبسطتي معايا
صوفيا :أيوة ياحازم انا منبسطش كده من ايام بابا الله يرحمه بجد انت عوضتني عن غيابه كتير
حازم :ياستي اعتبريني بابا وماما وأنور وجدي
صوفيا :هههههههه
حازم :تعرفي ان ضحكتك حلوة أوي
صوفيا :انت أحلى
حازم :انا أحلى ده إيه لا طبعاً انتي القمر نفسه فضحكتك وجمالك وروحك الحلوه
صوفيا : طب ممكن تنام بقى عندنا شغل بكرة بدري يااستاذ
حازم :أوامرك يامديرتي العزيزه بقولك سارة بتأكد عليكي ان شاء عشان تعملي حسابك وتحضري الفرح والا وربنا حتزعل منك هي والعيله كلها
صوفيا :وانا مقدرش على زعلهم أكيد طبعآ ححضر ان شاء الله
يقفل معاها المكالمه ويسمع اغنية عبد الحليم حافظ أول مره تحب ياقلبي
وصوفيا كمان كانت سعيده جداً بحبها لحازم وكان نفسها ان سعادتها تكمل بوجود اهلها فحياتها
دعت لباباها بالرحمه وقريتله الفاتحه ونامت
❤️❤️❤️❤️❤️
ييجي الصبح وياسمين تروح عالمستشفى توصل تلاقي حمزة بينزل من عربيته هو كمان ويدخلوا سوا
ويعرفوا ان كريمه خرجت من العنايه وهي دلوقتى في غرفه عاديه بس طبعا مش اي غرفه حمزة قعدها فجناح مخصوص واستئذن هو من ياسمين عشان يطمن على جابر وقاللها تدخل لام حسين وهو شويه وجاي
دخل لجابر واطمن عليه ولقى جابر الحمد لله بقى افضل حتى ان جابر أول ماشافه قالله:حمزة
حمزة :جابر حمد الله على السلامة يا حبيبي الدنيا كلها نورت برجوعك لينا بالسلامه
جابر :سيلا
حمزة :مستنياك ياجابر مستنياك
قعد معاه شويه وكانت كريمه فاقت وبدأت ياسمين تتكلم معاها :ألف حمد الله على سلامتك ياخالتي كده بردو متقوليليش انك تعبانه وتخبي عني ينفع كده
كريمه:مانا مرضتش اقلك احسن تقولي لحسين وتقلقيه علية
يدخل حمزة :صباح الفل يا ست الكل
كريمه :صباح النور يابني
حمزة :حضرتك مش فاكراني صح
كريمه:معلش يابني متاخذنيش بس مش واخده بالي
ياسمين :حمزة ياخالتي.
كريمه :حمزة حمزة مين
انت حمزةصاحب حسين حمزة خطيبك ياياسمين مش كده
تسكت ياسمين ومتردش
حمزة :ألف سلامة عليكي يا امي
كريمه :الله يسلمك يا بني انت رجعت بالسلامه امتى
شفتي ياياسمين شفتي كرم ربنا مش كنت بقولك اطمني وبطلي عياط لو ربنا كاتبلكم تتجمعوا حتتجمعوا الله بس انتي مقلتليش ياياسمين يابنتي
ياسمين :متشغليش بالك انتي دلوقتي ياخالتي أهم حاجه نطمن على صحتك
كان حمزة بيبص لياسمين وعيونه كلها ندم اما ياسمين كانت مقهورة منه ومش قادرة تتكلم
فجأة لقت تليفونها بيرن خدته وطلعت برة
كريمه :ياسمين دي بنت حلال أوي تعبت كتير وشافت ياما وكل مااقولها شوفي حياتك يابنتي تقوللي لاء حمزة حيرجع حمزة راجع طلع قلبها حاسس ياحبيبتي خد بالك منها يابني اللي زي ياسمين خلاص متلقيهاش تاني
ياسمين :أيوة ياحسين
حسين :انتوا فين ياياسمين احنا في مطار القاهرة
ياسمين :احنا في مستشفى........ مامتك عملت قسطرة في القلب
حسين :قسطرة ومقلتليش ليه ياياسمين
ياسمين :حتفرق إيه ياحسين كنت حتقلق هي الحمد لله بقت بخير وانت اهوه وصلت الحمد لله
حسين :ياسمين انتي جبتي فلوس المستشفى دي منين دي غاليه أوي
ياسمين :لما توصل بالسلامه حتعرف كل حاجه احنا في المستشفى واطمن عليها هي بخير والله
بعد مدة قليله يوصل هو وحمزة وخلود ويسالوا في الاستقبال ويفتحوا الباب مرة واحده
يلاقي ياسمين قعده جمب مامته بتشربها حاجه سخنه
تحتضنها خلود بشده حضن دام لعدة دقائق وتحتضن أم زوجها :الف حمد الله على سلامتك ياماما
كريمه :الله يسلمك يا حبيبتي يارب
طبعآ حسين سلم على ياسمين وقعد ادام امه يبوس فايدها ورجلها ووشها ويعيط فحضنها:كده بردو ياامي حرام عليكي تعملي فية كده تخبي علية انك تعبانه ده انا بكلمك في التليفون كل يوم وأسألك وانتي تقوليلي انك كويسه يعني ينفع كده
كريمه :انت فغربه يابني وعارفه لو قلتلك حتسيب اللي وراك وتيجي جري مينفعش ياحبيبي وبعدين كده بردو تجيب مراتك وهي حامل وتعبانه كده
خلود :وانا لو مجيتلكيش حاجي لمين وبعدين مش تشوفي القمر ده
كريمه :ياحبيبي ياحمزة ياحبيبي وحشتني اوي
خلود وهي بتقربه منها:بوس تيته ياحبيبي
حمزة:تيته
كريمه :ياحبيب تيته يانور عينيه وحشتني اوي ياحبيبي
حسين :ياسمين عاوزك برة ثواني عن اذنك ياامي ثواني وراجعلك
يخرج معاها وطبعا يسالها جابت تمن المستشفى هنا منين لأنه عارف انها غاليه جدا والفلوس اللي كان بيبعتها لأمه كل شهر صحيح بتغطي كل مصاريفها وزياده لكن بردو متقضيش مكان زي ده
ياسمين :حمزة ياحسين حمزة اللي اتكفل بكل حاجه
حسين :حمزة حمزة مين
ياسمين :حمزة عايش ياحسين مامتش ورجع وهو اللي دفع كل تكاليف المستشفى
حسين :ياسمين انتي إيه الكلام اللي بتقوليه ده حمزة حمزة عايش طب ازاي ازاي ومن امتى ومقلتيلناش ليه مااحنا بنكلموكي على طول
ياسمين :بعدين ياحسين نطمن على مامتك وتعرف كل حاجه
يلاقيه فجأة قدامه
حسين
حسين :حمزة
يجروا على بعض وياخدوا بعض بالاحضان والدموع مغرقه وشوشهم مش مصدقين انهم يتقابلوا بعد السنين دي كلها
حمزة :حسين وحشتني أوي ياصاحبي
حسين :انت اللي وحشتني اوي يا حمزة
يسلم على خلود وعلى حمزة الصغير ويفرح أوي لما يعرف ان ابنهم على اسمه وكانت مفاجئته لما عرف ان ياسمين هي اللي اختارت اسمه
قعدوا يتكلموا ويضحكوا ويهزروا ولكن خلود راسها فيها مليون سؤال وسؤال
بعد مدة يستئذن عشان يروح لجابر ويروح واتفق مع حسين انه بس يطمن على أمه وترجع بيتها بالسلامه وحيحكيله كل حاجه وحيجاوب على كل حاجه من غير ما يسأل
بعد شويه حسين يحس ان خلود تعبانه ويطلب من ياسمين انها تاخدها معاها ويمشوا عشان ترتاح وهو حيقعد مع أمه
❤️❤️❤️❤️❤️❤️❤️
ياحبيبتى ياخلود وحشتيني أوي يا بنت الغاليه
خلود :انتي وحشتيني اكتر ياخالتي والله
صفاء :يعني كان لازم حماتك تتعب عشان نشوفك
خلود :والله احنا أساساً بقالنا فترة نفسنا ننزل بس حسين كان مستنيني لما أولد بس اهوه لية نصيب بردو أنزل واشوفك عامله إيه طمنيني عليكي ازيك وازي صحتك
صفاء :الحمد لله والله بخير كل اللي يجيبه ربنا كويس
خلود :ان شاء الله ربنا حيكمل شفاكي على خير وحتقوميلنا بألف سلامه
صفاء :والله ياخلود انا ماعاوزة حاجه عير اني اطمن على ياسمين وافرح بيها وبعد كده يكون اللي يكون
خلود :ان شاء الله تفرحي بيها وتشيلي ولادها وتلعبي معاهم
صفاء :ان شاء الله طمنيني عامله ايه وجوزك عامل معاكي إيه
خلود :الحمد لله والله بخير يا حبيبتي وحسين ده هدية ربنا لية أحلى حاجة حصلتلي فحياتي كلها
صفاء :بركة ياحبيبتي والحمد لله ان ربنا نجاكي من اسامه ياعالم كان حيعمل فيكي إيه دلوقتي
خلود :ربنا يهديه ويصلحله حاله
صفاء :يارب والله على اد ماانا زعلانه منه بس مش قادرة أغضب عليه ابني ضنايا بس حنقول ايه ماباليد حيله
خلود :طب لازمتها إيه الدموع دي بقى دلوقتى قليلي البت ياسمين عامله معاكي إيه اوعي تكون مقصرة معاكي فحاجه
صفاء :ياسمين ربنا يباركلها فصحتها وعافيتها يارب
مش عارفه من غيرها كنت عملت إيه كل ماافتكر اني فرقت بينها وبين حمزة أندم واقول ياريت الزمن يرجع بية تاني واحوزهم وافرح بيهم
خلود خالتي معلش انا بس تعبانه شويه حاخد حمزة واروح أريح فاوضة ياسمين
صفاء :لا روحي انتي وسيبيه نابم جمبي تعرفي انه شبه أمك الله يرحمها بالظبط ده كنت كل مااشوف صوره اللي بتبعتيها اقول الله يرحمك ياهدى يارب
روحي ياحبيبتي ارتاحي ربنا يكملك على خير يا رب
تدخل معاها اوضتها وتقفل الباب ووشها يتقلب مية وتمانين درجه
ياسمين :مالك ياخلود في ايه انتي تعبانه
خلود وهي ماسكه ضهرها :انا اللي عاوزة افهم في ايه ياياسمين وانتي فاهماني كويس مش عاوزة لف ولا دوران ايه اللي اتفاجئت بيه ده انتي وحمزة اتقابلتوامعقوله دي طيب ازاي ومن امتى من امتى وانتوا عارفين بعض وازاي وصلتوا لبعض وانا معرفش ياياسمين امال لو مكناش بنكلم بعض مرتين وتلاته في الأسبوع
ماقلتيليش متجيبيليش سيرة أقسم بالله لو محكيتيلي كل حاجه دلوقتى لتكوني بنت خالتي ولا اعرفك
ياسمين :طب وطي صوتك الله يخليكي ماما متعرفش حاجه اسكتي وانا ححكيلك كل حاجه
حكتلها كل حاجه وطبعا خلود مصدومه من اللي سمعته
كانت عماله تلف في الاوضة زى المجنونه سانده ضهرها بايدها مش قادرة من التعب وحتتجنن من االي سمعته
انتي إيه اللي قلتيه ده يعني ايه بينتقم منك عشان انتي اتجوزتي إيه الكلام الفارغ ده وانتي انتي ازاي ماتحكيلوش كل حاجه ازاي تسكتي وتسيبيه يهين فيكي بالشكل ده ولما هو بيدور علينا وسالك عننا ليه مقولتيلوش ليه ليه
طب ليه محكيتيش لينا انا وحسين عاللي بيحصل واحنا كنا اتصرفنا
ياسمين :مانا قلتلك وجهة نظري ياخلود
خلود :وجهة نظر ايه وزفت إيه على دماغك انتي غبيه مبتفكريش مخك ده فيه إيه ازاي تعملي فنفسك كده ازاي تهون عليكي نفسك
لا لا ياياسمين انتي شكلك حبيتي دور الضحيه اللي عيشتي نفسك فيه عجبك دور المجني عليها اللي بتستحمل الاهانه من حبيبها ومستنيه المعجزة اللي حتحصل عشان يعرف الحقيقه وييجي تحت البلكونه يقفلك بعربيه مليانه ورد وينادي عليكي بالميكريفون زي تامر حسني ومي عزالدين مش كده لا ياماما فوقي انتي غلطانه غلطانه من ساسك لراسك
وهو هو كمان غلطان انتوا الاتنين غلطتوا
صحيح كل واحد فيكم معاه عذره لكن الغلط راكبك قبله
عالأقل هو معذور معذور ياناس راجل بيحب وضحى بعمره وحياته كلها عشان اللي
بيحبها شهر ويشوف صور فرحها وفيديو ليها ده غير الكلام
المسموم اللي قالهوله اللي منه لله هو كمان اسامه الكلب اللي
عمرنا ماشفنا منه غير الخراب عاوزاه يعمل ايه هاه مستنيه ايه يبعتلك بوكيه ورد ويتمنالك السعاده فحياتك
مااكيد لازم يفكر ينتقم منك على خيانتك ليه وحتى لو اتجوز زي مابتقولي امال كنتي عاوزاه يترهبن بعد مايعرف انك اتجوزتي وكان في ايدك تفهميه كل حاجه لكن ازاي كرامتي كبريائي
وقلتي لنفسك خليه يهين ويذل فية ويشغلني عنده خدامه
لبنته عشان افضل محسسه نفسي انه الظالم المفتري وانا المظلومه مش كده
وميرا دي كمان ازاي تطاوعك ازاي تشوفه بعنيها وهو بيهينك
وتسكت ازاي يجيلها قلب تعيش حياتها وتتجوز وتفرح
وتنبسط وهي شايفاكي بتتعذبي وهي بكلمه واحده كانت حتنهي كل حاجه
دي هي اللي عاشت كل حاجه معاكي دي هي اللي فايدها النجاة ليكي ليه عملتي كده ليه ليه
بتعيطي ياياسمين عيطي انا عاوزاكي تعيطي ياخايبه ياموكوسه
انا مش بدافع عنه لعلمك وهو حسابه معايا حيكون عسير عاللي عمله فيكي من غير مايسمع ولا يفكر
وبعدين ليه لما عرفتي هدفه من وجودك عنده ممشيتيش
وسيبتيه ليه كملتي شغاله عند بنته ليه ليه توطي بنفسك
كده ليه يااخي فداهيه لكن مانتي مش هاين عليكي طبعاً تبعدي عنه طب كنتي قلتيله فهمتيه
ياربي حسه اني حتشل انتي مش حتروحي عنده تاني انتي فاهمه مفيش شغل عنده تاني بعد النهارده
❤️❤️❤️❤️❤️❤️❤️❤️❤️
ليل طويل يدرك فيه كل منهم خطأه الذي ارتكبه في حق نفسه وحق من أحب
تدخل عليهم في الصباح الباكر صباح الخير يا ست الكل
كريمه :صباح النور يا حبيبتي أمال فين حمزة
خلود :سيبته مع خالتي وياسمين في البيت
كريمه :بس خالتك تعبانه ياخلود وياسمين عندها شغل
خلود :متشغليش بالك ياماما
معلش حاخد منك حسين ثواني بس
تاخده ويطلعوا بره
حسين :مالك ياخلود في حاجه
خلود :ده في وفي ياحسين
حسين :حصل إيه قلقتيني
خلود :بقى صاحبك يستفرد بالبت الغلبانه واحنا مش موجودين ويبهدلها ويشغلها خدامه عنده وعند بنته
حسين :إيه الألغاز دي ماتفهميني ياخلود صاحبي مين وبنت مين ماتوضحي كلامك
خلود :انا حفهمك كل حاجه
ينزل من التاكسي أمام الشركه بعد طبعاً ماعرف عنوانها منه لما اتكلموا مع بعض بالليل ويدخل ويمشي في الطرقات وهو مش عارف رايح فين ولا جاي منين فجأة يخبط فحد جامد
الله مش تحاسب يابني ادم انت
لسه جاي يقوله اسف فجاة تنحوا هما الاتنين لبعض :حازم
حازم:حسين
وطبعا بقى زي مانتوا عارفين الاحضان والسلامات الحارة
حسين :حازم انت هنا بتعمل إيه انت بتشتغل هنا
ايوة انا بشتغل هنا مع حمزة من فترة
انت كنت فين ياحسين دورت عليك ياصاحبي طول الوقت بتكلم انا وحمزة عنك
حسين :وياترى بتتكلموا عن ياسمين كمان واللا عني بس
حازم:مش فاهم انت مقلتليش صحيح عرفت مكانه هنا ازاي ده حيفرح أوي لما يشوفك
حسين:من ناحية حيفرح هو حيفرح بس باللي حعمله فيه ان شاء الله
وبعدين هو مبيقعدش معاك ويحكيلك عاللي بيعمله فيها
حازم :يعمله فياسمين هو حمزة شاف ياسمين
حسين :فين مكتب حمزة ياحازم
حازم :من هنا تعالى
يقتحم عليه المكتب وجواه غل منه
حمزة لسه مش مدرك ان حسين قدامه ولسه يادوب قايم من على مكتبه عشان يرحب بيه لكن مين ملحقش طبعا ملحقش أساساً يفتح بؤه بكلمه
اصلا هو ملحقش يشوفه تقريبا كده النور قطع وحمزة فقد كل حواسه محسش غير بلكميه فوشه خلته يقع ميحطش منطق
وسلم عالشهدا اللي معاك