🌱آمنه🌱عطاء وقسوه"
🌴الفصل السادس والسابع🌴
أشرق صباح يوم جديد
ملئ بالفرحه والحب والسعاده للجميع وبالاخص معتز وكاميليا
صحيت آمنه من نومها وقعدت علي السرير ومسكت دماغها بتعب وافتكرت اللي حصل مع مراد إمبارح
فلاااااااش باااااااااك
مراد : ممكن اطلب منك طلب
آمنه : عيوني اتفضل
مراد : متزغرطيش تاني
آمنه : برقت عيونها وقالت نعممم !!
مراد : أ.أ.أصل زغروطك حلوه اوي والكل بينجذب ناحيتها
آمنه : مش فاهمه برضو إيه العيب في كدا .. دا فرح وطبيعي اننا ازغرط وارقص كمان
مراد : بغضب تإيه ... ترقصي .. ليه هيه سايبه ولا إيه
آمنه : بعصبيه انت مين اصلا عشان تقولي اعمل إيه ومعملش إيه .. انت عشان ساعدتنا النهارده يبقي خلاص فكرت نفسك واحد من اهل البيت اصحي وفوق لنفسك كدا .. انت حياله ابن خال العروسه . والعروسه اساسا متخصنيش انا كل اللي يخصني معتز وبس انت فاهم
مراد : اتعصب منها ورد عليها بعصبيه اكتر وقال ياريت تسمعي لنصيحة غيرك وميبقاش صوتك من دماغك كدا .. اصل الصوت الواحد غلطاته كتير
آمنه : ياعم وانت مالك ما اغلط انا حره أنت جاي تعدل عليا ليه ولا بصفتك إيه يعني .. ما تروح تعدل علي خطيبتك وشوف بيتك هتمشيه ازاي وانا نقصاك انت كمان وسابته ومشيت
بااااااااااااااااك
فاقت آمنه من سرحانها وهيه بتضحك .. مش عارفه هيه ليه اتكلمت معاه بقلة الذوق دي علي الرغم إن دا مش من طبعها
بس برضو هيه طبعها مبتحبش حد يفرض سيطرته عليها ولا يحكمها ..
آمنه عاشت فتره كبيره تعتبر هيه الكبيره في البيت .... وكل خطوه في البيت بتمشي برايها هيه ومحدش كان بيعارضها في حاجه لان تفكيرها صح وعارفينها عاقله جدا وبتعرف توازن الامور صح
قامت من علي السرير وخرجت ادت فرضها وغيرت هدومها ونزلت حلبت الجاموسه وطلعت لقت اولادها وحماتها لسه نايمين
اخدت اكل للطير وطلعت للسطح لقت صبحي جارهم واقف في الشباك
نفخت بزهق وراحت عند الطير تاكله
صبحي : يا حلو صبح يا حلو طل ... دا انا مستنيك من بدري يا جميل وانت تقلان عليا ومصدرلي الطرشه ليه بس ... آه ياما نفسي تحس بيا وتحن عليا بقا دا القلب داب من كتر العذاب والشوق ليك يا أمونة قلبي
آمنه : رمت الجردل من ايدها وبصتله وقالت قولت إيه ياروح امك .. أمونة قلبك . ياخي ربنا ياخدك ويريحني من الاشكال اللي زيك دي
صبحي : همحيلك اي شتيمه يا حلو بس انت توافق وتحن
آمنه : أوافق علي إيه يا راجل يا مخبول انت
صبحي : نتجوز يا حبي
آمنه : بغضب وبصوت عالي .. جرالك إيه يا عرة الرجاله أنت .. اتجوز مين يا خويا .. ليه من قلة الرجاله هفكر اوافق عليك
صبحي : بغضب انا راجل غصب عنك وممكن اجي اوريكي كمان
آمنه : هستني إيه من راجل مهزق زيك .. منتا راجل وس*** ومش هستني منك إلا الوس***
صبحي : لمي نفسك يا وليه انتي
آمنه : انا اللي الم نفسي يا بواقي راجل .. ياخي اختشي علي سنك شويه وراعي ظروف الجيره
في الوقت دا خرجت قادره مراته وهيه بتقول : جرالك إيه يا ختي هو محدش عارف يلمك ليه .. شايفه نفسك علي إيه يعني
آمنه : انا لا شايفه نفسي ولا حاجه يا ست أسم علي مسمي .. أنا الحمد لله عارفه قيمة نفسي ومش عايزه انزل من قيمتي في الكلام مع شوية ناس زيكم
قادره : ناس زينا !! مالنا يا حببتي
في الوقت دا طلع هشام ومعتز علي صوت الزعيق
معتز : فيه إيه يا ست انتي بتزعقي ليه علي الصبح
قادره : قول لست الحسن مرات اخوك
هشام : اتكلمي عنها بادب احسنلك وقبل ما تنطقي اسمها قولي قبله الست فااهمه
قادره : شهقت وقال الست !! ليه يا خويا تكونشي الست ام كلثوم
صبحي : هعهعهعهعه صدقتي يا قدوره .. تكونشي ام كلثوم واحنا منعرفش
معتز : والنبي بدال ما انتو بتقلشو كدا روحو اتشطروا واعملو اي حاجه تنفعكم .. هو ربنا حرمكم من نعمة الخ........
آمنه : قطعت كلامه بحده وقالت معتززززز .
قادره وصبحي عيونهم دمعت ودخلو لجوه من غير كلام لانهم مبيخلفوش فعلا
آمنه : عيونها دمعت وصعبوا عليها وقالت ليه كدا يا معتز .. بتعايرهم بالخلفه اخص عليك دي اخلاقك
معتز : مهما اللي استفزوني يا امونه وانا مكنش قصدي حاجه
هشام : بس أجرحتهم يا معتز مينفعش كدا
قادره : خرجت تاني ليهم وقالت بدموع تشكر يا باشا علي معايرتك لينا دي .. بس قريبه خلاص أنت فرحك النهارده ولو بعد الشر مخلفتش هتحس بكمية العجز اللي احنا فيه وسابتهم ودخلت
آمنه : عيطت وقالت ليه يا معتز ليه ... انا مش عايزه قلبي يتوجع عليك .. شوف انت عايرتها ازاي ومع ذلك قالتلك بعد الشر لو مخلفتش مدعتش عليك متخلفش ... الا المعايره بالخلفه يا معتز فاااهم .. انت هتتجوز النهارده ، معنديش استعداد قلبي يتوجع عليك بذنبهم
معتز : انا آسف يا امونه مقصدش
آمنه : متعتذرليش انا انت تعتذر ليهم هما
معتز : نعم !! أنا اعتذر ليهم مستحيل طبعا
آمنه : هتعتذر يا معتز برضاك او غصب عنك برضو هتعتذر
____________________________________
في بيت مراد عزام
صحي من نومه وادي فرضه وبدا يجهز فطار لاخواته البنات
امل : صحيت وقالت صباح الخير يا مراد
مراد : صباح الفل يا اموله يالا صلي وصحي البت نهي وانا هحضرلكم احلي فطار النهارده
أمل : مش قبل ما اعرف إيه سر الهمه والنشاط اللي في عيونك دول وكمان الابتسامه اللي علي وشك دي
مراد : سند علي المطبخ وقال ابدا بس حلمت حلم جميل اوي بيها
أمل : ضحكت وقالت حلم جميل وهيه مهزقاك امبارح كدا
مراد : علي قلبي زي العسل أي حاجه منها .. موافق اتهزق منها كل لحظه بس اشوفها قدامي
امل : يا بركاتك يا ست امونه .. هموت واشوف الشخصيه اللي قلبت كيان مراد عزام دي
مراد : اتكلم بهيام وقال ملهاش وصف خالص وعمرك ما هتشوفي شخصيه زيها .. تبانلك قويه بس اللي يركز في كلامها وفي عيونها تتلبخ وتحسي انها بتتعصب زي ما يكون خايفه تكشفي جانب الطيبه والبراءه اللي فيها .. تحسي ان كل كلمه منها بتطلع بمقدار .. يعني بتوزن كل كلمه قبل ما تخرجها لما بتكون هاديه بس ... انما لما تتعصب ههههههه ممكن تخرجلك طوب تحدفك بيه
نهي : أنا شوفت المشهد دا في افلام كتير
مراد : انتبه لنفسه وقال نهي !! انتي جيتي امته
نهي : جيت من وقت كل كلمه منها بتطلع بمقدار .. إيه دا بتحب ميزان حساس
مراد : طب والله منا سايبك وطلع يجري وراها
أمل : ابتسمت بسعاده وقالت ربنا يجعلها من نصيبك يارب يا مراد وتعوضك كل خير
____________________________________
في بيت راضي الشهيدي
كانوا قاعدين بيفطروا مع بعض وفجأه دخل عليهم ابراهيم ابنهم
الكل قام من علي الفطار وجريوا عليه وسلم عليهم
فايزه : حمدالله علي سلامتك يا حبة عيني كدا تيجي من غير ما تقولنا برضو
ابراهيم : غصب عني يا ست الكل قولت اخليها مفاجاه ليكم
نادر : احلي مفاجأه يا هيما وحضنه
ابراهيم : همس لنادر وقال طمني عليها انا هتجنن واشوفها اوعي تكون اتخطبت
نادر : لأ أطمن لسه قاعده علي قلبك
ابراهيم : عقبال ما تقعد في حضني بقا يا نادر ادعي لاخوك
السيد : لسه فيكم نفس الداء دا تفضلوا تتوشوشو قدام الناس
ابراهيم : حضنه وقال حبيبي يا أبو البنات ربنا يباركلك فيهم يارب
فايزه : بغضب لا متقولش اللقب دا ليه تاني يا ابراهيم .. ان شاء الله المره الجايه ولد مش كده يا شيماء
ابراهيم : غضب من كلام امه وسلم علي شيماء الاول وبص لفايزه وقال ماله لقب ابو البنات بس يااما وبعدين ولد ولا بنت مش هتفرق كله رزق غيرهم مش طايل خالص
فايزه : لا طبعا الولد بيشيل اسم أبوه
ابراهيم : والبنت يعني معوقه مش هتشيله جرالك إيه يااما بس
راضي : سيبك من كل الكلام ده يا ابني واقعد ارتاح تلاقي طريق السفر هد حيلك دلوقتي انا عارف
ابراهيم : لا الحمد لله ياابا انا كويس . هروح أسلم علي ولاد عمي موسي وهاجي علطول
فايزه : محبكتش يعني يا ابراهيم اقعد افطر وارتاح
ابراهيم : لا عايز الحق معتز قبل ما يروح الشغل
نادر : لا شغل إيه النهارده فرحه يابني
ابراهيم : بفرحه بجد . عقبالي يارب
فايزه : شاور بس واحنا نخطبلك ستها
ابراهيم : إن شالله يااما بعدين يلا سلام
نادر : طب استني خدني معاك نروحلهم
ابراهيم : يلا ومشي خطوتين ورجع وقال صحيح البنات فين يا شيماء
شيماء : زينه ورحمه في المدرسه وندي نايمه جوه
ابراهيم : طب علي ما ارجع صحصحيها عايز العب معاها
شيماء : ابتسمت وقالت حاضر
وخرج نادر وابراهيم وراحو لبيت موسي
ابراهيم : طمني عليها يا نادر انا كنت بموت كل ثانيه هناك وكنت خايف تتخطب لحد غيري
نادر : كويسه يا حبيبي متخفش .. بس انت لازم تكلم ابوها بقا ومتمشيش المرادي الا وانت خاطبها
ابراهيم : عليا النعمه ما همشي المرادي الا وهيه مراتي مش خطيبتي بس .. انا مش هبعد تاني من غيرها . بس يارب ابوها يوافق علطول وميتعبش قلبي عشان هتعيش بعيد عنه
نادر : عم صابر راجل طيب ويهمه راحة بناته وبس .. وطول ما انت بعيد عن ابوك وامك هيرتاح صدقني
ابراهيم : هههههههه شكلهم متغيروش لسه وتفكيرهم زي ما هو.. بس قولي اخبار مزتك إيه اللي حكتلي عنها
نادر : قوام خليتها مزتي .. بس عموما هتشوفها النهارده وتتعرف عليها في فرح معتز لانها قريبة العروسه
ابراهيم : واخيرا هشوف حبيبة حبيبي
____________________________________
في بيت موسي الشهيدي
كان حازم ودعاء نزلوا وموافقين آمنه في قرارها ان معتز يعتذر لقادره وصبحي
معتز : أنا مش هعتذر لحد مهما يحصل
آمنه : يا معتز اسمع كلامي هتندم والله .. اعتذر دلوقتي عشان نيتهم تصفي ليك
معتز : بسخريه انتي خايفه منهم
آمنه : انا خايفه عليك يا معتز افهم بقا .. الله يهديك ياخويا يلا نروح نعتذرلهم
حازم : احنا مش بنتحايل عليك يا معتز أحنا بنؤمرك .. وانا بقولك اتفضل يلا عشان نطلع نعتذرلهم
معتز : بس.....
حازم : بشده معتزززز ... متخلنيش ازعلك يوم فرحك . عدي آخر يوم في البلد علي خير يلا
معتز : حاضر
واخدت آمنه معتز وحازم وهشام وراحو لصبحي وقادره يعتذرولهم
عند صبحي وقادره
كانو قاعدين بيعيطوا بسبب معايرة معتز ليهم بقلة الخلفه
في الوقت دا خبطت آمنه ودخلت عليهم هيه والاولاد
صبحي : بدموع جايين ليه .. جايين تكملوا معايره فينا
آمنه : راحت عنده وباست علي راسه وقالت حقك عليا انا يا استاذ صبحي .. معلش معتز انفعل عشاني انا
حازم : راح عنده وباس راسه وباس راس قادره كمان وقال حقكم عليا انا يا ست قادره .. امسحها فيا يا أستاذ صبحي
صبحي : انت مغلطش يا كابتن حازم عشان تتاسف
حازم غمز لمعتز عشان يتاسفلهم
معتز : احمم أنا آسف يا ست قادره .. متزعلش مني يا استاذ صبحي مكنش قصدي
صبحي : بكسره مكنش قصدك !! ليه يا باشا انت خبط فيا .. انت عايرتني يا استاذ معتز .. عايرتني بحاجه بايد ربنا وعيط بصوت عالي وقالت انا مش بايدي اكون مبخلفش انا ولا مراتي هنعمل إيه
هشام : احمم ماتفكها بقا ياعم صبحي وبعدين ما انت لولا انك خلبوص كدا مكنتش اتهزقت مننا بقا
صبحي : ابتسم ومسح دموعه وقال عندك حق يا اتش وبص لآمنه وقال حقك عليا يا ست امونه علي اي كلمه قولتهالك ضايقتك بيها
آمنه : حقك محفوظ يا استاذ صبحي احنا جيران وربنا وصانا علي سابع جار مابالك انت اول جار
قادره : تعيشي يا ست آمنه
معتز : يعني خلاص يا أستاذ صبحي مش زعلان وهتشرفني في فرحي
صبحي : ان شاء الله يا استاذ معتز ربنا يتمملك بخير
هشام : كمل دعوتك بقا وقول عقبالك يا إتش
صبحي : ضحك وقال عقبالك يا إتش
____________________________________
في بقالة صابر
كان وصل نادر وابراهيم وسلموا علي صابر
صابر : حمدالله على سلامتك يا بني
ابراهيم : تسلم يا عم صابر ربنا يخليك
صابر : مكنتش عارف تيجي من يومين كنت تحضر معانا حنة ابن عمك
نادر : هو ميعرفش ان فرحه النهارده اصلا . دا عرف مني بالصدفه
صابر : فرصه حلوه أوي عشان تقف جنب حازم وامونه
ابراهيم : إن شاء الله.. قولي اخبار فتون وبدور إيه
صابر : الحمد لله يا بني بخير
في الوقت دا دخلت فتون وقالت : بابا انا وب... قطعت كلامها لما شافت نادر وابراهيم وقالت بابتسامه حمدالله على السلامه يا استاذ ابراهيم
ابراهيم : الله يسلمك يا آنسه فتون عامله ايه
فتون : الحمد لله
صابر : خير يا بنتي عايزه إيه
فتون : انا جايه اقولك انا وبدور رايحين للترزي
صابر : محتاجه فلوس
فتون : لأ معايا بس جايه استاذنك
صابر : ماشي يا حببتي خلي بالك من نفسك واختك
فتون : حاضر عن اذنك وسابتهم وخرجت
ابراهيم : طب نستأذن احنا يا عم صابر ونتقابل في الفرح
صابر : مع السلامه يا بني شرفتني
خرج نادر وابراهيم وكانت بدور نازله من علي السلم بسرعه وقفوا
بدور : ابتسمت وقالت حمدالله على السلامه يا استاذ ابراهيم
ابراهيم : ابتسم وقال الله يسلمك يا بدور
وهو وبدور وقفوا يبصوا لبعض
نادر : شد ايده وقال ط.ط.طب نستاذن احنا عن اذنكم واخده ومشيوا لكن ابراهيم كانت عيونه علي بدور
فتون : ابتسمت وقالت ايه الحكايه يا دودي
بدور : انتبهت لنفسها وقالت هاا ل.ل.لا م.م.مفيش يلا بينا
____________________________________
في بيت موسي الشهيدي
كانو كلهم قاعدين مع بعض بيتكلموا ويضحكوا
هشام : اضحك يابني اضحك بكره هتودع الايام الحلوه دي
معتز : بيتهيالك اللي جاي احلي في حضن كوكي
آمنه : رفعت شفتها من جنب وسكتت
هشام : اقول اللي أنتي عايزه تقوليه واللي خايفه تقوليه لمعتز يزعل انك قولتيه
آمنه : تقول إيه
هشام : اللي نفسك تقوليه
حازم : ايوا اللي هو إيه يابني
هشام : اللي مش راضيه تقوله
دعاء : بس بس دوختنا معاك يا اخي إيه قولت وقالت وهتقول اسكت
وفاء : ضحكت وقالت ربنا يديم عليكم الفرح يا اولادي يارب
آمنه : وانتي معانا وبصحتك يااما يارب
في الوقت دا سمعو صوت حد بينده وخرج هشام يشوف مين ولقي ابراهيم ونادر
هشام : ياااااهلااا يا هيما حمدالله على السلامه وسلم عليه
نادر : وانا مش هتسلم عليا يا اتش
هشام : منا قرفان من وش امك هيه قصه ادخلو
دخل نادر وابراهيم وسلموا عليهم كلهم
آمنه : حمدالله على سلامتك يا ابراهيم
ابراهيم : الله يسلمك يا أمونه
معتز : دا من حظي أنك جيت يوم فرحي يا هيما
أبراهيم : لا دا من حظي انا يا بن عمي
حازم : عقبال فرحك ان شاء الله
ابراهيم : يارب
وفاء : أعمل حسابك متسافرش المرادي الا وانت خاطب بقا
ابراهيم : ادعيلي ربنا ييسرهالي بس يامرات عمي وانا مش همشي إلا وانا متجوز كمان
آمنه : يبقي شكلك مختار عروسه بقا
ابراهيم : ابتسم وقال أيوا بدور بنت عم صابر
الكل ابتسم وفرح لاختياره جدا
دعاء : أحسنت الاختيار يا ابراهيم
ابراهيم : بجد
آمنه : طبعا اذا كانت بدور او فتون الاتنين يا بخت اللي هياخدهم .. واي بنت من البلد والله
نادر : إيه يا جماعه وانا شفاف في القعده دي ولا إيه الكلام كله مع هيما بس
هشام : بتحط نفسك في مواقف بايخه
وفاء : هههههههه لا يابني بس انت معانا علطول انما هيما قولنا نطمن عليه قبل ما يفلسع تاني
ابراهيم : أدعيلي بس يا حاجه ربنا ييسرلي الموضوع دا بسرعه عشان الحق اتجوز واسافر
وفاء : ربنا يوفقلك الخير يا بني
____________________________________
في المساء
لبس حازم ودعاء وهشام والاولاد سيف وعبدالرحمن وكانو منتظرين خروج آمنه من الاوضه
حازم : هيه اتاخرت ليه كدا
دعاء : معلش هيه لبست الاولاد وامك الاول وبعدين دخلت تلبس
حازم : بص في ساعته وقال يادوب نتحرك هنتاخر علي معتز كدا وهو هيقلق
هشام : والنبي ما هيفتكر حد وهو في حضن كوكي ياخويا
وفاء : بطل غلبه يا هشام بقا
حازم : ما تستعجليها بقا يا دعاء
في الوقت دا دخل فتون وبدور ونورا
نورا : إيه يا جماعه اتاخرتو ليه كدا الناس بره مستنين بالعربيات
هشام : صفر ببوقه وقال الافراح بتخلي الحلوين يظهروا برضو
بدور : احنا حلوين من يومنا يا اتش
هشام : غمزلها وقال يابخته النهارده هيهيص
بدور : مين دا
هشام : أ....
في الوقت دا خرجت آمنه وهيه مكسوفه وحاطه وشها في الارض وقالت : احمم ي.ي.يلا انا جاهزه ..ومش عايزه اي تعليق من حد علي اللبس عشان اقسم بالله هحلف ما اروح الفرح
الكل : هههههههههههههههه
آمنه : بتضحكوا علي إيه
فتون : ماشاء الله يا امونه قمر
نورا : والله العظيم انا متاكده انك هتكوني احسن من العروسه نفسها
حازم : طب يلا بقا عشان منتاخرش أكتر من كدا
وخرجو كلهم وراحوا للقاعه ومشيوا وراهم عربيات تانيه تبعهم واخده جيرانهم
____________________________________
في القاعه
كان معتز وكاميليا دخلوا وسط الزفه وكانو قاعدين في المكان المخصص ليهم
وكان مراد وامل ونهي قاعدين مع بعض بيتكلموا
أمل : ممكن تهدي نفسك بقا
مراد : ومين قالك انها في دماغي اصلا
امل : مش عليا يا مراد .. انت مضايق منها وفي نفس الوقت هتموت وتشوفها
مراد : اتنهد وقال بصراحه آه
أمل : طب اهدي بقا وسيب الامور تمشي زي ما ربك مدبرها
مراد : حاضر اهو ههدي
سامح : جه من وراه وقال عقبالك يا بوص
مراد : حبيبي يا سموحه عقبالك
سامح : اوعدني اقع في واحده بنت حلال كدا اصل البضاعه الايام دي اكترها ميكب ونفخ
أمل : هههههههه وهو معقول برضو الظباط ينخدعو
سامح : منتي بنت وعارفه بقا يا اموله الحيل اللي بيعملوها الايام دي .. والله لو مش بعتبرك اختي كنت اتجوزتك عشان اضمن
أمل : لاااااا خلاص انا حلفت علي الظباط
سامح : الله طب ما اخوكي ظابط
أمل : وانت هتجيب مراد ليكو لا طبعا مراد دا حاجه نادره
سامح : ما تحضرنا ياعم مراد .. مراد .. مراد
مراد : كان سرحان وبيبص للناس اللي داخله القاعه ولقي آمنه بالفستان .. انبهر بجمالها اكتر وقف مكانه وابتسم بتلقائية
مراد : بصل لأمل وقال جت يا امل هناك اهي
سامح : المزه اللي قولتلي عليها فين دي
مراد : ضربه في بطنه بكوعه وقال اسكت يا متخلف هتفضحني وبص عليها وبرق عيونه وقال ليلتك سودا يا آمنه بتعمل إيه دي....
عند اهل معتز
دخل الكل وراح سلم علي معتز وكاميليا
آمنه : الف مبروك يا حبيبي وحضنته
معتز : ابتسم وقال إيه الجمال دا بس يخرب عقلك يا أمونه
آمنه : كله من خيركم يا حبيبي وراحت لكاميليا وقالت مبروك يا كاميليا
كاميليا طبعا غارت من شكل آمنه مكانتش متخيله انها تكون جميله بالشكل دا بس محبتش تبين وقالت بقرف : ميرسي
آمنه : ربنا يتمملك بخير يا معتز وسابتهم ومشيت
معتز : قعد وقال تخيلي مكنتش اتوقع ان امونه تكون حلوه كدا النهارده
كاميليا : آه عادي يعني مش جميله اوي
عند مراد
كان مضايق جدا لما شافها بتسلم علي معتز وحضنته
مراد : بعصبيه يعني إيه تحضنه هاا فهموني كدا
أمل : يا حبيبي وطي صوتك بقا الناس
سامح : انتي لسه هتقولي الناس .. يلا خلينا نطلع بره لما يهدي شويه
مراد : شد أيده وقال مش هخرج بره أنا
أمل : وبعدهالك يا مراد بقا الناس
سامح : ما تعقل كدا يا مراد جرالك إيه يا جدع
مراد : يعني عاجبكم اللي عملته دا
سامح : واحنا مال امنا يا مراد .. بقولك إيه انت من يوم ما حبيتها وانت بقيت شبه الست الحامل بهرموناتها
أمل : هههههههههه انت فظيع يا سامح
سامح : طب بزمتك مش ..... وسكت وبرق لما عيونه جت علي فتون وقال لا دا شكل فرح معتز دا هيحل عقدتي يا بوص
مراد : بص مكان ما بيبص وقال إيه عجبتك
سامح : عجبتني بس .. يالهوي اما اروح اشوف المزه دي تبع مين وسابهم ومشي
مراد : شوفتي الواطي باعني مع اول مزه تعجبه
أمل : احمم وانا كمان هروح اسلم علي دعاء واتعرف علي أمونه
مراد : طب هتقوليلها إيه
امل : ولا هقول حاجه هتعرف عليها بس
____________________________________
بدات أغنيه سلو وطلبو من العرسان يرقصوا عليها وكانت كاميليا مختاره اغنيه أجنبي لزوم الاتيكيت
بدا كاميليا ومعتز يرقصوا عليها وطبعا معتز مش فاهم حاجه
معتز : حببتي انتي اختارتي اغنيه أجنبي ليه ما العربي كتير كنا نرقص علي أي واحده علي الاقل كنا ننسجم معاها بدال منا مش فاهم حاجه كدا وبرقص وخلاص
كاميليا : لأ طبعا الاجنبي تحس انه كريتيف عن المصري التقليدي دا
معتز : كريتيف !! طيب والنبي قبل ما تخلص عرفيني عشا اهدي شويه في الرقص مش اكون منسجم والاغنيه بتخلص والناس تضحك عليا
عند آمنه ودعاء
أمل : جت عليهم وسلمت علي دعاء وقالت : إيه القمر دا يا دودو أكيد ذوق حازم كالعاده
دعاء : وانتي عرفتي ازاي يا لمضه
أمل : عشان اختارك طبعا يبقي لازم زوقه يبقي حلو
دعاء : امم هعديهالك .. عموما دي أمونه أختي اللي حكيتلك عنها
أمل : بإعجاب ماشاء الله إيه القمر دا
آمنه : من غير مجامله بس
أمل : لا والله مجاملة إيه بس انتي مش شايفه نفسك ولا إيه
آمنه : تسلمي يا حببتي
أمل لنفسها : دي ليه الحق يتجنن ويتهوس بيكي .. وانا اللي كنت بقول اخويا اتهبل علي إيه
دعاء : امل دي يا امونه تبقي اخت سيادة المقدم مراد صاحب معتز وحازم
آمنه : رفعت حاجبها وقالت آاااااه أهلاااا
هشام : جه عليهم وقال : بقولكوا إيه الاغنيه دي عملتلي حموضه ودربكه في بطني
دعاء : ههههههه وانا كمان يا واد يا اتش
هشام : طب احترميني قدام المزه ومد ايده لامل وقال معاكي هشام اخو العريس وفاشل ثانويه عامه بس مز وقمر
أمل : هههههههه لا ومتواضع كمان
هشام : شايفين الناس اللي بتفهم... المهم انا هروح بقا أعمل حاجه مجنونه كدا سلام وسابهم ومشي
آمنه : ربنا يسترها من جنانك يا هشام
____________________________________
عند سامح وفتون
كانت فتون بتكلم بباها بره وبعد ما خلصت كلام معاه لفت لقت سامح واقف
فتون : اتخضت وقالت ف.ف.فيه حاجه حضرتك
سامح : ابتسم وقال لأ مفيش
فتون : طب واقف ليه كدا
سامح : عادي .. هو مش لما اي حد بيشوف القمر كامل بيقف يتفرج عليه
فتون : نعم !! انت هتهزر
سامح : طب وحيات القمر اللي بيكلمني دا مبهزرش
فتون : طب بعد اذنك
سامح : رايحه فين
فتون : نفخت وقالت ما تطلع من نافوخي عاد
سامح : ههههههه عاد ... يبقي انتي اكيد من الشرقيه
فتون : ضحكت بسخريه وقالت ومالهم الشراقوه يا جدع .. انت هتغلط ولا إيه
سامح : يتقطع لساني لو غلط فيهم .. دا أنا بحب الشراقوه وبعشقهم كمان
فتون : ابتسمت وقالت ماشي
سامح : طب قوليلي بقا أسمك إيه
فتون : أسمي فتون وجارة معتز
سامح : فتون !! لازم تكوني فتون لان جمالك دا فتنه لوحده
فتون : طب ممكن امشي بقا
سامح : طب انا اسمي سامح وبشتغل ظابط برتبة مقدم وصاحب معتز
فتون : و.و.وانت بتقولي ليه وبتعرفني علي نفسك ليه
سامح : يمكن تحبي تعرفي فقولت اوفر عليكي الطريق بس
فتون : ماشي خلاص اتعرفنا ممكن امشي بقا
سامح : طب هشوفك تاني صح
فتون : ابتسمت وسابته ومشيت
سامح : لاااا دا واضح ان فرح الواد معتز دا هيحل عقدتي
____________________________________
عند هشام
أخد هشام المايك واتفق مع الديجي علي الاغنيه اللي عاوز يغنيها وكانت اغنية ( أنا جاي ابارك ) لاكرم حسني
غني هشام وراح عند معتز وهو بيقول
أنا ... أنا
جاي .. جاي
هنا ... هنا
عشان ... عشان
أجامل .. أجامل
أخويااا .. أخوياا
وأقوله ياعريس .... يا عريس .... ياعريس
وساب معتز وراح وقف جنب كاميليا وقال :
وأنا .....
جاي ....
أبارك ... أبارك
ليكي ... ليكي
ياعروسه .. يا عروسه ... يا عروسه
وساب كاميليا وراح جنب آمنه وقال :
ياجوز هند علي اناناس
يا شاغله قلوب الناس
اسد الغابه لو شافك
يتحول يادوب نسناس
وراح جنب دعاء وقال :
يا مايه وساقعه في القله
ومش يا سمينه لأ فله
دا لما بتمشي في الشارع
كله يغني يا حلولا
في الوقت دا كانت كاميليا متغاظه جدا انه بيغني وهو جنب آمنه ودعاء مش جنبها هيه
هشام شد معتز وحازم ورقصوا مع بعض
عطشان وحبك مايه ساقعه في القله
اول ما بشوفك قلبي يغني يا حلولا
يا حلولا... يا حلولا ... يا حلولاا
وراحت آمنه ودعاء ورقصوا معاهم بس آمنه مكنتش بترقص طبعا كانت بتهز كتافها بس ... بس كاميليا قامت بالواجب
بشوفك ببقي متصابي
هبلغ مامي او بابي
ميخلوكيش تخرجي من البيت
خلاص بوظتي اعصابي
في حبك هنهي تعليمي
وعامل بحث اكاديمي
وبعد مذاكره ودراسه
نجحت وتم تكريمي
وبعد ما هشام خلص الاغنيه الكل سقفله وسابو معتز وكاميليا يقعدوا وهما قعدوا علي ترابيزه لوحدهم
حازم : عملت اللي نفسك فيه وغنيت يا اتش
دعاء : لا بجد فرحتنا يا هشام
آمنه : مكنتش اعرف انك موهوب كده يا اتش
هشام : عقبال ما اغني في فرح اخويا الكبير يارب تاني
دعاء : برقتله وقالت نعمممم
هشام : ههههههههه هجري قبل ما تقلب
دعاء : بس لما ترجعلي بس
عند مراد وسامح
مراد : الهانم بتترقص يا سامح
سامح : كان بيكتم ضحكته عليه وقال ما تهدي بقا هيه كانت مراتك للغيره دي
مراد : لا لا أنا مش هستني أكتر من كدا يا سامح بقا أنا هنبه عليها واقولها لو قامت تاني هكسرلها رجليها
سامح : ما تعقل بقا يا مراد ... الناس يابني أنت .. وبعدين لو قولتلها كدا انت مش ضامن رد فعلها اسكت بقا
مراد : يعني هفضل اتفرج علي الهانم بتترقص كدا واسقفلها زي بلطجي الست .. أنت مش شايف نظرات الرجاله ليها ازاي
سامح : نفخ بزهق وقال اعمل اللي انت عايزه وسابه ومشي
مراد : ماشي .. مااااشي
____________________________________
عند هشام
راح عند البوفيه يجيب عصير وكانت هناك نهي بتطلب عصير هيه كمان
الاتنين خبطوا في بعض ووقعوا العصير علي بعض
نهي : مش تفتح يا اعمي
هشام : أنا اعمي .. يبقي انتي حوله بقي
نهي : لم نفسك احسن ألمك
هشام : بسخريه وهتلميني ازاي بقا في شيكاره
نهي : لا هقطعلك لسانك دا يا خفه
هشام : أما انتي بت بجحه صحيح
نهي : أنا بجحه يا قليل الذوق
هشام : أنا قليل الذوق يا جربه
نهي : جربه !! طب ورحمة امي لهوريك ... وصرخت بصوت عالي عاااااااااااااا الحقني يا ابيه مراد وجريت من قدامه
هشام : ملبوسه أقسم بالله .. ربنا يهدك بوظتيلي البدله بس
عند نهي
جريت علي مراد وهيه بتعيط وقالت الحقني يا ابيه واحد بيتحرش بيا
مراد : نعمم مين دا تعالي معايا وريهولي .. دا ليلة امه سودا
سامح : طب استني أنا جاي معاك
ومشيوا هما التلاته وراحو عند البوفيه وكان هشام بضهره
نهي : هو دا يا ابيه
مراد خبط علي كتف هشام وليه بيلف يشوف مين .. مراد ضربه بالبوكس في وشه
هشام : يالهووووووي
سامح : بص علي الولد لقاه هشام قال : دا يالهوي فعلا دا هشام يا مراد ونزل يسنده
مراد : هشام !! وبص لنهي وقال هو صحيح عاكسك ولا بتكذبي يا نهي ومتكذبيش عليا
نهي : م.م.مهو قل ادبه عليا يا أبيه
مراد : طب اتفضلي روحي لأمل ومتنتقليش من جنبها فااهمه
نهي : حاضر وسابتهم ومشيت
سامح : انت اللي عاكست نهي
هشام : كان حاطط أيده علي عينه وقال بالم آااااه
مراد : مش لاقي الا نهي اختي وتنطبش فيها يا هشام .. دي لسانها متربي منها
هشام : بالم واضح يا خويا .. وواضح انها قالتلك اننا اغتصبتها كمان مش عاكستها بس عشان كدا ضربتني من غير لا احم ولا دستور
سامح : ههههههه ضربه تفوت ولا حد يموت يا اتش
هشام : وعيني اللي باظت دي يا خويا
مراد : لا لا عينك سليمه
هشام : طب الحمد لله
سامح : بس ورمت
هشام : برق عيونه وراح يبص في المرايه لقا حواليها احمر ومنفوخه شويه بص لمراد وقال : أنا مش هدعي عليك انا هدعي علي اختك ربنا يشلها ويشل لسانها .و... يالهوووووووي
____________________________________
علي ترابيزه تانيه
كان قاعد عليها سمير والد كاميليا واللواء سالم
سالم : هيه مين دي يا سمير وشاور علي آمنه
سمير : آه دي مرات اخو معتز جوز بنتي
سالم : يا خساره متجوزه
سمير : لا دي ارمله .. جوزها متوفي من زمان اوي
سالم : ومتجوزتش
سمير : حس بفرحه من كلامها عنها وحب يكرها فيها . وقال : لأ مين يرضي يتجوزها دي .. ميغركش النضافه اللي هيه فيها دي اصلها فلاح بتحلب جاموسه وبتربي طير
سالم : أنا شوفتها قبل كدا في القسم لما جت مره مع معتز .. بس كانت غير كدا تماما
سمير : غير كدا ازاي يعني
سالم : يعني كانت جايه بجلابيه سودا .. انما هنا في الفرح ماشاء الله عدت جمال العروسه نفسها
سمير : اتغاظ منه وقال .. احمم م.م.مهو كله ميكب لزوم الفرح بس وبعد كدا هترجع لطبيعتها من تاني فلاااااحه .. محدش يرضي يبصلها مش يتجوزها
سالم : بس هيه توافق تتجوزني وانا راضي بيها
سمير : نعم !!!!
🌱آمنه🌱
"عطاء وقسوه"
🌴الفصل السابع🌴
في الفرح
عند نادر وأبراهيم
ابراهيم : ايه يابني أنت هتفضل تبصلها كتير كدا ما تروح تكلمها
نادر : خايف تكسفني ماتيجي معايا
أبراهيم : يا عم خليك جرئ كدا ويلا اعمل الحجه انك بتبارك لامونه علي معتز وسلم عليها
نادر : نفخ بزهق وقال تفتكر صح اللي هعمله دا
ابراهيم : صح بس انجز
نادر : ماشي .. وسابه وراح عليهم
ابراهيم : اشطا بقا اروح اشوف بدور فين الاغيها شويه
عند نادر
راح نادر علي آمنه ودعاء وأمل ووقف سلم عليهم
نادر : ألف مبروك يا أمونه
آمنه : الله يبارك فيك يا نادر عقبالك يارب
نادر : لأ عقبال هشام الاول
هشام : جه من وراه وقال هشام باظ
آمنه : شهقت من الخضه لما لقت عينه حمرا ووارمه وقالت : مين عمل فيك كدا يا هشام
هشام : بص لنهي بغيظ وقال واحده ... واحده بنت حلال اوي .. لأ وعليها لسان بينقط مازوت
نهي : اتلم عشان مخليش المازوت بتاعي يغرقك
هشام : سقف بايده وقال لا حول ولا قوة الا بالله.. انتي يابنتي كنتي بترضعي إيه زباله
نهي : أيوا كنت برضع زباله من اللي كنت بترضعها
هشام : بعصبيه وصوت عالي بت انتي احترمي نفسك
نهي : باستفزاز يامي يامي خوفت انا كدا
هشام : بت انتي والله لو ......
آمنه : قطعت كلامه بحده وقالت هشاااااااام ... فيه إيه ما تلم لسانك شويه مش عيب كدا ... انا مربياك علي كدا
نهي : هو مش متربي اصلا
هشام : شوفتي بتغلط ازاي
أمل : خلاص بقا يا نهي اسكتي احسن هناديلك مراد والله.. وبصت لهشام وقالت متزعلش منها يا هشام هيه نهي لسانها طويل بس قلبها طيب والله
آمنه : متعتذريش يا امل هو اللي هيعتذر
هشام : برق عيونه وقال نعم !! اعتذر لمين دي ... دا علي جثتي
آمنه : هتكسر كلمتي يا هشام ... انا قولت هتعتذر
دعاء :خلاص بقا يا اتش اعتذر عشان خاطر امونه
آمنه : لأ هيعتذر لأنه غلط .. واللي غلط بياخد جزاؤه
أمل : خلاص يا أمونه مفيش مشكله مش لازم الاعتذار
نهي : كملت كلامها بهدء وزعل مصطنع وقالت وهيه حاطه وشها في الارض : أنا اللي غلطت خلاص يا ابله أمونه ومستعده اعتذرله
هشام : بصلها بسخريه وقال يا حلووووه .. إيه الادب دا
نهي : بصوت هادي ورقيق أنا مؤدبه والله يا أستاذ هشام بس انت اللي عصبتني .. بجد سوري
هشام : بصلها وسكت بس فهم لعبتها قدامهم
آمنه : اتفضل اعتذر .. زي ما اعتذرتلك
هشام : جز علي اسنانه بغيظ وقال آسف يا آنسه نهي
نهي : بصوت هادي ورقيق أسفك مقبول طبعا
نادر : خلاص يا جماعه بقا عيلين وغلطوا
نهي : حطت ايدها في وسطها وقالت بصوت عالي .. نعممممم مين دي اللي عيله
هشام : شوفتوا ملبوسه اقسم بالله بتقلب في ثانيه كانه بيحضر عليها عفريت
نهي : عفريت لما ينططك انت كمان ... أنت هتلبخ ولا إيه يا جدع
هشام : ربع أيده علي صدره وبص لآمنه وقال : قوليلي انت ارد عليها بأيه
نادر : يا جماعه خلاص متقفوش لبعض علي الواحده كدا
كانت آمنه بتبص علي نورا كانت قاعده جنب بدور وفتون وفجاه قامت خرجت بره وكان شكلها بتعيط
في الوقت دا جه عليهم مراد وقال : مساء الخير يا جماعه
الكل ماعدا آمنه : مساء النور
مراد أفتكر ان آمنه متجهلاه ومش عايزه ترد عليه لكن كانت مشغوله بنورا وبتبص عليها
مراد اتغاظ منها اكتر وقال : ايه يا ام سيف مركزه مع مين
آمنه : بصتله وقالت هااا .. بتقول حاجه يا استاذ مراد
مراد : كنت بقول.....
آمنه : قطعت كلامه وقالت بعد اذنكم وسابتهم ومشيت
نادر : احمم ازيك يا سيادة المقدم
مراد : الله يسلمك يا دكتور نادر ورجع بص علي آمنه تاني
____________________________________
عند نورا
خرجت نورا وهيه بتعيط وسندت علي الحيط وفضلت تعيط بصوت عالي وهيه حاطه ايدها علي قلبها
جه عليها شاب وقال : مالك يا آنسه فيه حاجه
نورا : مسحت دموعها وقالت لا لا مفيش
الشاب : لو تعبانه انا ممكن اندهلك حد من اصحابك .. انتي تبع العريس ولا العروسه
نورا : ابتسمت بسخريه وقالت العريس
الشاب : طب اندهلك مرات اخوه الست آمنه او حازم
نورا : بصتله باستغراب وقالت انت تعرف آمنه
الشاب : طبعا اعرفها كويس اوي .. نسيت اعرفك بنفسي ، أنا رائد صديق حازم
نورا : ايوا اسمك ايه
رائد : أبتسم وقال اسمي رائد
نورا : بزهق يوووووه بقولك اسمك . اسمك مش مهنتك
رائد : ضحك بصوت عالي وقال انا أسمي رائد مش مهنتي رائد
نورا : حكت شعرها بإحراج وقالت احمم سوري بس استغربت الاسم بس
رائد : مفيش مشكله ... بس انتي كنتي بتعيطي ليه
نور : وقفت بجنب واتنهدت تنهيده طويله وقالت كنت بعيط علي غبائي
رائد : مش فاهم
نورا : مش مهم تفهم عادي
رائد : امممم ... بصي انا بشوف المشهد دا في الروايات والافلام بتبقي البطله بتحب وحبيبها خانها او سابها ... وكمل كلامه بلؤم وقال : او ...... اتجوز مثلا
نورا : دمعتها نزلت وحطت وشها في الارض
رائد : اتنهد وقال بصي يا آنسه .... إلا انتي اسمك ايه صحيح
نورا : ابتسمت وقالت نورا
رائد : ابتسم وقال بصي يا آنسه نورا .... اوقات كتير ربنا بيبعد ما بينا وبين حاجه احنا متعلقين بيها لحكمه ... يعني لو كان ربنا عارف ان الحاجه دي هتريح بالك أكيد كانت هتبقي من نصيبك ، ربنا مابيظلمش حد وعارف كل واحد يستحق إيه " لو علمتم الغيب لاخترتم الواقع "
يعني أنتي احمدي ربنا علي اي شئ مهما كان وأصبري وهو هيجازيكي بصبرك دا
في الوقت دا جت آمنه وقالت : نورا بتعملي إيه
رائد : ازيك يا أم سيف
آمنه : ابتسمت وقالت الحمد لله ازيك يا رائد
رائد : الحمد لله
آمنه : انت تعرف نورا
نورا : ل.ل.لا دا بس شافني....
رائد : قطع كلامها وقال شوفتها دايخه فسندتها بس
آمنه : ماشي شكرا يا رائد
رائد : احمم .. طب بعد اذنكم انا داخل لحازم ومعتز. وسابهم ومشي
آمنه : بصت لنورا وقالت كنتي واقفه معاه ليه
نورا : أبدا دا بس ك.ك.كنت ....... وسكتت
آمنه : أتنهدت وقالت كنتي بتعيطي وهو شافك حاول يواسيكي وقالك كلمتين وواسوكي فعلا ... مش كدا
نورا : هزت راسها بمعني آه
آمنه : اسمعيني كويس يا نورا ... انا صيحيح الاولاد غلاوتهم عندي متقلش عن اولادي .. لكن برضو انتي وبنات عمي صاير بالدنيا وميهونش عليا حد يكسر بقلوبكم ... وانا شايفه انك تفوقي لنفسك بقا ، لو مش عشان نفسك يبقي عشان اهلك يا حببتي
نورا : بدموع يعني اتجوز يا امونه
آمنه : وليه لأ
نورا : بضعف .. لسه بحبه
آمنه : جربي ... جربي تدخلي حد حياتك يملاها وشوفي فترة الخطوبه الاول لو قدرتي تتجاوزي الفتره دي صح يبقي قطعتي شوط كبير أوي أنك تتجاوزي خطوه مهمه في حياتك
أنا مش عيزاكي تعيشي دور الوهم انه هيطلق كاميليا في يوم ويرجعلك ... لا يا نورا اعتبري معتز دا حب مراهقه وكلنا بنتجاوز مرحلة المراهقه
نورا : حضنت آمنه وقالت هحاول والله يا أمونه
آمنه : طبطبت عليها وقالت : طب يلا روحي الحمام أغسلي وشك وتعالي جوه عشان نرقص مع بعض
نورا : ضحكت وقالت حاضر
مشيت نورا وكانت آمنه بتبص عليها وهيه بتضحك وبتلف عشان تمشي لقت مراد في وشها
آمنه : خير فيه حاجه
مراد : بنبرة تحذير .. قسما بالله لو رقصتي تاني لهكسرلك رجلك دي فااااهمه
آمنه : كانت بتبصله وساكته
مراد : ساكته ليه
آمنه : بصت وراها وقالت هو الكلام دا ليا انا ولا فيه حد ورايا انا مش شيفاه
مراد : ابتسم باستفزاز وقال لأ ليكي ... اظن كلامي واضح
آمنه : بعصبيه .. انت مش ملاحظ انك مزودها يا جدع انت ولا إيه ... إيه متزغرطيش ومترقصيش وانت تطلع مين انت عشان تقولي اعمل إيه ... أنا عايزه افهم بس انت بتحب تحرج نفسك كدا مع كل واحد شويه ولا معايا انا بس
اصلها لو مع كل واحد تبقي مريض يا حرام وعايز تتعالج ... انما لو معايا انا فقولهالك اهو تاني .. انت ملكش دعوه بيا وياريت يا سيادة المقدم تحترم نفسك وحدودك متتخطهاش معايا انا بالذات
واذا كنت سمعت عن أمونه في جوانب الحب والجدعنه والاخوه والصداقه وبس... انا بقا مستعده اوضحلك امونه علي حق في جانب الردح ... ومش هتني الكلام دا عليك تاني ويارب تكون فهمت وسابته ومشيت
____________________________________
دخلت آمنه الفرح وهيه متغاظه من مراد جدا وقعدت بعيد عن الكل
وبقت تقول لنفسها : غبيه .. غبيه سكتيله ليه من الاول ... دا كان عاوز قلم علي وشه يفوقه ويعرفه انتي مين
واتنهدت بحزن علي حالها وقالت : آاااااه يا آمنه يا تري الدنيا لسه مخبيالك إبه بس
كل واحد بيشوفك .. بيحبك من ناحيه ترضيه هو وبس
ياتري هتفضلي لامته كدا
بعد وقت
انتهي الفرح ورجعت آمنه وكل اهل البلد من تاني لبلدهم
ورجع مراد واخواته البنات لبيتهم البسيط
وسافر معتز وكاميليا للغردقه عشان يقضوا شهر العسل
____________________________________
بعد مرور شهر
كانت آمنه عامله عزومه لمعتز وكاميليا بمناسبة جوازهم وعشان يتلموا مع بعض زي زمان
حازم : طب انا ذنبي إيه والنبي يا امونه أنا جعاااان
آمنه : اصبر بقا يا حازم زمانهم علي وصول اومال أنا عامله العزومه ليه .. مهو عشان نتلم زي زمان
هشام : وهما هيوصلو بسهوله كدا .. لااا لسه الست كوكي هتحط ميكب ياختي وتصفر شعرها
دعاء : اسمها تصففه يا جاهل
حازم : أنا بفكر اقول لمعتز يخلي كاميليا تتحجب
آمنه : ملناش دعوه يا حازم دا قرارهم هما مش احنا .. أنت اقل كلمه منك ممكن تعمل مشكله مابينهم واخوك خاطبها وهي بشعرها .. يعني مش جديده علينا
دعاء : الغريب ان عيلة كاميليا كلهم محجبين إلا هيه .. يعني امل صحبتي ونهي اخوات مراد عزام صاحبك ياحازم محجبين
هشام : محدش يجبلي سيرة البت دي .. عفاريت الدنيا بتركبني
آمنه : ههههههههههههه
هشام : بتضحكي يا أمونه
آمنه : بقولك إيه متعملهمش عليا انا عارفه انك اكيد غلست عليها
هشام : مش اوي يعني
وفاء : متنساش يا حازم معاد ابن عمك راضي عشان تروح معاهم يقروا الفاتحه
حازم : متخافيش ياأما فاكر .. وبص لآمنه وقال أنتي ريحالهم صح
آمنه : آه طبعا لازم اكون مع البنات
في الوقت دا دخل معتز وكاميليا وهما شايلين شنط كتير فيها هدايا ليهم
معتز : اناااا جيييييييت
الكل قام وسلم عليه ورحبوا بيهم وبدأو يجهزو الاكل واكلو مع بعض
بعد شويه كانوا قاعدين مع بعض بيتكلموا
آمنه : نورتي بيتك التاني يا كاميليا
كاميليا : ميرسي
هشام : والنبي يا كوكي فكي شويه كدا وشيلي الحدود وخلي الدنيا براح ما بينا .. انا مش عايز اعتبرك مرات أخويا . أصلي لو اعتبرتك مرات اخويا هحترمك .. ولو احترمتك ابقي أنا مش أنا
حازم : مهزق من يومك
هشام : حبيبي يا زوما
دعاء : ضحكت وقالت انتي لسه مكسوفه مننا يا كاميليا
كاميليا : طبيعي اتكسف منكم يعني .. انتو مش اهلي عشان آخد عليكم مابين يوم والتاني
الكل بص لبعضه وسكت وزعلو من كلمتها
وفاء : بلوم .. ليه كدا يا بنتي أحنا مش أهلك ليه .. مش احنا اهل جوزك يعني اهلك يا حببتي
كاميليا : احمم سوري بس المعني خاني مقصدش كدا اكيد يا طنط
وفاء : قوليلي ياأما او يا ماما زي دعاء
كاميليا : أما وماما!! احمم ل.ل.لا معلش أنا هقول يا طنط
آمنه : اللي يريحك يا كاميليا ووقفت وقالت أنا رايحه لبنات عمي صابر ياأما وسابتهم ومشيت
كاميليا : إيه قلة الذوق دي ازاي تسيبني وتمشي وانا معزومه عندكم
هشام : اتكلم بعصبيه وقال أولا مرات اخويا مش قليلة الذوق ولا حاجه ... ثانيا هيه مش عزماكي محدش بيعزم حد في بيته ... ثالثا هيه مش سابتك ومشيت وانتي لوحدك احنا كلنا قاعدين إيه شفافين احنا
معتز : هشام انت اتجننت ولا ايه ازاي تكلم مرات اخوك كدا
حازم : هشام مغلطش يا معتز
معتز : يعني عاجبك يتكلم مع مراتي بالاسلوب دا
دعاء : هشام ميقصدش يا معتز حاجه .. هو بيفهمها بس ان آمنه مغلطتش
معتز : لأ غلطت .. ازاي فعلا تسيبنا وتمشي
دعاء وحازم وهشام بصو لبعض
وفاء : دعاء تعالي دخليني اوضتي ارتاح شويه لاني مليش لازمه اقعد مع ابني
معتز : ليه بتقولي كدا يااما بس
وفاء : بصوت عالي دعااااء يلا يابنتي دخليني اوضتي
دعاء : ح.ح.حاضر يا ماما وسندتها ودخلتها الاوضه
حازم : وقف وقال منور بيتك يا معتز .. ياخويا وسابه ومشي
هشام : بصلهم بلوم وسابهم ومشي هو كمان
كاميليا : وقفت بعصبيه وقالت أنا مستحيل اقعد هنا لحظه واحده يلا بينا ومشيوا هما كمان
____________________________________
في بيت صابر
كانت آمنه مع فتون وبدور بينضفوا البيت وبيجهزوا الحاجات اللي هتتقدم
بدور : ربنا يخليكي ليا يا أمونه مش عارفه اشكرك ازاي
آمنه : ربنا يتمملك بخير يا حببتي يارب وعقبالك يا تونه
فتون : اتنهدت وقالت يارب
آمنه : طب يلا يا بدور بقا ادخلي خدي دوش سريع عشان تلبسي وأظبطك
بدور : حاضر وسابتهم ودخلت
آمنه : بصت لفتون وقالت هاا قوليلي حاجة إيه اللي عايزه تحكيلي عنها
فتون : بس دا سر والنبي متقوليش لحد
آمنه : هقول لمين يعني يا فتون اخلصي
فتون : احمم ب.ب.بصراحه كدا من اسبوعين رقم غريب اتصل وكان بيعاكس فانا صديته في الكلام وقفلت في وشه وخلاص نسيت الموضوع دا .. بس من يومين اتصل عليا رقم تاني ولما رديت عليا طلع سامح
آمنه : سامح مين
فتون : د.د.دا ظابط شوفته يوم فرح معتز واتعرفت عليه وقالي انه حابب يجي يتقدملي
آمنه : وكلمتيه تاني
فتون : آ.آ.آه بيكلمني يعني ع.ع.عادي
آمنه : بس دا عيب وحرام يا فتون
فتون : اتنهدت وقالت عارفه بس غصب عني والله يا امونه
آمنه : خلاص قوليله يكلم معتز يجيب منه رقم باباكي ويكلمه النهارده ويتفق معاه علي معاد ومن النهارده لحد ما يجي ويتقدملك مفيش كلام معاه تاني إلا بعلم ابوكي
فتون : حاضر .. بس افرضي بابا موافقش عليه
آمنه : سيبيها عليا انا .. ابوكي بياخد رايي في كل حاجه وانا هسال حازم عليه وهشوفه الاول
فتون : حضنتها وقالت ربنا ما يحرمني منك يا امونه يا اطيب قلب في الدنيا
آمنه : ربنا يسعدكم يا حببتي
____________________________________
في بيت سمير والد كاميليا
كانت بتحكيلهم عن اللي حصل وهيه متغاظه
صافي : ومعتز فين دلوقتي
كاميليا : نايم تحت من وقت ما جينا
سمير : بقولك إيه يا كوكي .. هو اللي زي آمنه دي مش تتجوز
صافي : بتقول إيه يا خويا
سمير : مش انا طبعا يا صفصف دا اللواء سالم صديقي هو اللي معجب بيها وهيتجنن عليها من يوم الفرح وكل يوم يكلمني يقولي بلغت معتز ولا لأ يكلمها
صافي : إيه !! بقا يوم ما تتجوز .. تتجوز لواء .. لا طبعا دي آخرها فلاح زيها
صافي : لا يا بت يا كوكي دا الموضوع دا جه من حظك
كاميليا : أنا ازاي يا مامي
صافي : ياريتها توافق وتغور من البيت عشان معتز يبقي معاكي انتي وبس .. انتي مش شايفه جوزك زعلان عشانها ازاي عشان مشيت وسابتكم
سمير : عندك حق يا صافي اللي زي آمنه دي عمود البيت اللي شايل البيت كله لو العمود دا خرج من البيت هيتهد ويتفتفت ودي تبقي فرصتك يا كوكي انك تستفردي بمعتز وتخليه يبيع ورثه كله وتضمني انه مش هيحن لبلده دي تاني
كاميليا : بتفكير امممم هو كلام مقنع بس يعني مكنتش حباها تكون احسن مني في جوازتها
صافي : احسن منك في إيه يا هبله .. دي ارمله وواخده واحد مهكع اصلا .. انما انتي واخده الشباب والفلوس
كاميليا : طب والمطلوب مني إيه اقول لمعتز ان اللواء سالم عاوز يتجوزها
سمير : لا سيبيها عليا انا .. انا اللي هقوله
صافي : يارب توافق وتغور من وشك بقا
كاميليا : يارب يا مامي
____________________________________
في ببت مراد عزام
كان مراد قاعد في اوضته سرحان في آمنه .. كان واخد قرار انه يبعد عنها وينساها لان حبه من طرف واحد .. بس في نفس الوقت مش قادر
امل : دخلت عليه وقالت وبعدهالك يا مراد هتفضل حابس نفسك كدا
مراد : اتنهد وقال مش عارف اعمل ايه يا أمل لا انا قادر اقرب منها ولا انا قادر ابطل تفكير فيها .. وخايف اخد خطوه اندم
امل : مش يمكن لما تاخد خطوه ترتاح يا مراد
مراد : ويمكن أتعب اكتر
أمل : مهما كان قرارها يا مراد هيكون راحه ليك .. بدال ما عمال تفكر في الموضوع وشاغلك كدا وواقف محلك سر
مراد : تفتكري
امل : ايوا افتكر .. ودا الصح بس انت اللي خايف من رد الفعل عشان كدا انت ساكت ومش عايز تاخد خطوه لقدام
مراد : طب ادعيلي ربنا يقدملي الخير
امل : ان شاء الله يا حبيبي ربنا يكتبلك كل خير
____________________________________
بعد مرور اسبوع
كان مراد قرر أنه يروح ويتكلم قدام الكل ويعترف انه بيحبها ويطلبها قدامهم رسمي .. خلص شغله وركب عربيته واتجه للشرقيه
في بقالة صابر
كانت آمنه قاعده مع صابر قدام البقاله وبيتكلموا وحكتله عن اللي حصل من معتز آخر مره
صابر : هتفضلي كل شويه تشتكي منهم وفي الاخر مش هتسيبيهم برضو .. تاعبينك ومش هاين عليكي تفرطي فيهم . عليكي بايه من دا كله يابنتي
آمنه : ياعم صابر انت ليه مش فاهمني .. انا بالنسبالي حازم ومعتز وهشام ودعاء وحتي حماتي .. بحس انهم اولادي وانا اللي مسؤوله عنهم زي سيف وعبدالرحمن
الام ياما بتزعل من عيالها وبتغضب منهم وتغضب عليهم لكن متقدرش تستغني عنهم .. وهو دا حالي بشتكي منهم بس عمري ما استغني عنهم
صابر : اتنهد وقال لا حول ولا قوة الا بالله.. مش عارف يا بنتي أقولك إيه
آمنه : ادعيلي يا عم صابر .. ادعيلي ربنا مايفرق بيني وبينهم
صابر : روحي يا آمنه يا بنت أمينه ربنا ما يفرق بينك وبينهم إلا للخير
آمنه : يارب يا راجل يا طيب .. يلا انا هقوم أمشي بقا وانت قفل الدكانه انا اخرتك
صابر : طب ناديلي حد من البنات عشان يدخل الحاجات دي معايا
آمنه : حاضر وندهت لفتون وسابتهم ومشيت
وصلت عند البيت ملقتش المفتاح افتكرت انها سابته علي الكرسي لما قعدت مع صابر
رجعت تاني عشان تاخده بس اتفاجئت بمراد
آمنه : بأستغراب استاذ مراد !! خير
مراد : كنت عاوز أقولك كلمتين في وجود الكل
آمنه : تقولي انا !! مفتكرش ان فيه مبنا كلام
مراد : معلش لما ...
قطع كلامه لما صوت حد بيصرخ
آمنه : بقلق د.د.دا صوت فتون وجريت
هو كمان جري وراها بسرعه يشوفوا في إيه
لقو عصام بيحاول يخطف فتون وهيه بتضرب فيه وبتحاول تجري منه
جريت آمنه وشدتها منه وفضلت تضرب فيه بغل لحد ما وصل مراد وشده من ايدها وفضل يضرب فيه بالبوكس في وشه لحد ما وقع علي الارض
مراد : لف لفتون وقال انتي كويسه
فتون : ك.ك.كويسه بس بابا شكله أتخدر
مراد : متقلقيش ان شاء الله....
قطع كلامه لما اخد ضربه علي راسه من عصام وحس الدنيا بتسود قدامه
آمنه وفتون : صرخوا كتير لحد ما اهل البلد تقريبا كلهم اتلموا وجريوا ورا عصام ومسكوه وشالو مراد وطلعوه لاوضة هشام ومعتز وجابوله دكتور وربط راسه وركبله محاليل
____________________________________
أشرق صباح يوم جديد
فتح مراد عيونه ببطء شديد لقي نفسه في اوضة معتز
أستغرب وقام من علي السرير ومسك دماغه بايده بالم
هشام : حمدالله على السلامه يا بطل
مراد : الله يسلمك .. هو إيه اللي حصل
هشام : هاا . انت فقدت الذاكره ولا إيه اصحي وصحصح كدا وشوف انت بتكلم مين .. ها انااا مين
مراد : مش وقت هزارك يا هشام حصل إيه
هشام : ابدا ياسيدي الواد عصام ضربك علي راسك واتفتحت وجبنالك دكتور امبارح وقال الجرح سطحي وربطلك البونيه الحلوه دي وركبلك محاليل ... وإيه تاني .. آه وجالك سخونيه في الليل وفضلت انا وأمونه سهرانين جنبك هديت حيلي ربنا يهد حيلك
مراد : ضحك بتعب وقال ماشي يا اتش معلش تعبناك
هشام : لا الشهاده لله أمونه اللي تعبت اكتر .. علي فكره انت ليك حقنه دلوقتي مضاد حيوي عشان جرحك .. وآه اختك اتصلت كتير عليك وآمنه ردت عليها وقالتلها انك تعبت شويه وانت عندنا فابقي كلمها طمنها
في الوقت دا دخلت آمنه بصنية الفطار وهيه مبتسمه وقالت الفطار الفلاحي اللي حضرتك بتحبه اهو
مراد : وليه التعب دا
آمنه : تعبك راحه متقولش كدا مش عارفين نشكرك ازاي بس علي اللي عملته معانا لولاك ياعالم كانت فتون حصلها إيه
مراد : المهم الراجل عمل إيه
هشام : زي القرد يا خويا جه اطمن عليك مرتين
آمنه : ضحكت وقالت يلا عشان تاخد الحقنه معادها وبعدين افطر
مراد : ومين هيديني الحقنه
آمنه : أنا طبعا متخافش انا ايدي خفيفه
هشام : وقف وقال متقلقش يا معلم امونه ايدها بلسم
آمنه : انت رايح فين
هشام : يا دوب الحق الدرس
آمنه : طب استني مينفعش
هشام : معلش لازم امشي اتاخرت وهبعتلك دعاء وحازم بسرعه
آمنه : وقفت وقالت طب يلا ابعتهم بسرعه وانا هستني بره لما يجو
هشام : حاضر
خرجت آمنه بره وسابت مراد في الاوضه
مراد : قام وقف علي باب الاوضه وقال انتي خايفه مني
آمنه : ابتسمت وقالت لا طبعا مش خايفه .. بس دي الاصول والحلال
مراد : ابتسم وقال غلبتيني .. ومن اول ما شوفتك وانتي كل مره بتغلبيني بكلامك
آمنه : بغلبك بس بكون صح مش غلط
مراد : هز راسه وقال ايوا .. بس يا تري المرادي مين هيغلب التاني
آمنه : مش فاهمه
مراد : انتي عارفه انا كنت جاي ليه امبارح وكنت عايز اتكلم في إيه
آمنه : آه صحيح انت قولت انا جاي أقولك كلمتين قدامهم .. كلمتين إيه دول
مراد : أنا بحبك وعايز اتجوزك
آمنه : إيه !!!
____________________________________
في بيت معتز وكاميليا
كان معتز منمش طول الليل بسبب كلام ابو كاميليا ليه ان اللواء سالم طالب ايد آمنه
كاميليا : أنا مش عارفه والله ليه كل القلق اللي انت فيه دا
معتز : بعصبيه ممكن تسكتي بقا .. انتي مش فاهمه حاجه
كاميليا : وهي يعني هتفضل عايشالكم العمر كله .. مهي مسيرها تتجوز
معتز : بغضب لأ.. لأ مينفعش تتجوز وتسيب البيت انتي ليه مش فاهمه
كاميليا : عصبيتك دي هتخليني اشك انك كنت بتحبها يا معتز
معتز : انتي مجنونه انتي كمان احب مرات اخويا
كاميليا : اخوك الله يرحمه .. وانت حبك ليها مش طبيعي ودلوقتي لما جالها عريس منفعل بطريقه غريبه عاوزني اقول إيه والنبي
معتز : بعصبيه وصوت عالي .. كاميليااااااا مش عاوز كلام كتير ملوش لازمه .. انا مهما افهمك آمنه دي يعني إيه لينا كلنا مش هتفهمي
كاميليا : يعني هتعمل إيه من الآخر
معتز : اتنهد وقال مش هقولها حاجه .. واللواء سالم لما يعرف اننا مردتش عليه اكيد هيفهم أنها رافضه وهيسكت .. ومسك دماغه بأيده الاتنين وقال ويارب يسكت وميفتحش سيرة الموضوع دا تاني
كاميليا : نفخت بزهق وقالت انت حر وسابته ودخلت الحمام
____________________________________
عند آمنه ومراد
اتصدمت آمنه من طلب مراد ليها
آمنه : إيه !! اتجوزك إيه .. انت مش متجوز
مراد : أنا .. لأ طبعا انا كنت كاتب كتابي بس متجوزتش وطلقتها
آمنه : ليه
مراد : عشان متقبلتش وجود اخواتي في حياتي
آمنه : آه وجايلي انا بقا عشان شايف ظروفي وعارف اننا هتقبل وجود اي حد في حياتك صح .. دا انا احمد ربنا انك اتقدمتلي اصلا
مراد : انا عمري ما فكرت في كدا لما شوفتك .. انا من اول لحظه شوفتك فيها وانا حبيتك . هتقوليلي ازاي هقولك والله العظيم مش عارف .. بس حسيت بطيبه وحنان جواكي شدوني ليكي .. ولما نطقتي اسمي حسيت اني في عالم تاني .. انتي ساكته ليه
آمنه : هزت كتفها وقالت هقول إيه
مراد : ردي عليا وقولي رايك
آمنه : لفت ضهرها وقالت يوم ما كنا في القسم وكان صاحبك هيمد ايده عليا وانت لحقته وضربته .. حسيت انك بتضربه انتقام انه فكر يمد ايده عليا .. بس كدبت نفسي وقولت لنفسي
متوهميش نفسك علي الفاضي.. ولما طلبت مني مزغرطش يوم حنة معتز استغربت اكتر وعشان كدا رديت عليك بقلة ذوق عشان اختصرلك الطريق وافهمك اننا مش منهم .. ولما رجعت تاني طلبت مني يوم فرح معتز مرقصش رديت عليك
بطريقه مش كويسه عشان اوضحلك ان الطريق اللي انت داخل فيه مقفول واننا مش من النوع اللي تحب تعمل معاها صداقه بحجة الخوف وانك صاحب الاولاد ..
بس كانت حاجه جوايا بتقولي لأ ما يمكن تكوني غلطانه .. لكن دايما كنت بفكر نفسي بالحمل والمسؤليه اللي عليا اللي تجبرني أننا مفكرش باي حاجه من دي وانساها .. انساها للابد
مراد : انتي مش أنسان آلي عشان كل حياتك تبقي ليهم وبس وميكونش ليكي قلب زيهم
آمنه : ضحكت بدموع وقالت قلب !! ضحكتني والله .. قلب إيه يا استاذ مراد لواحده زيي
مراد : زيك !! ليه وانتي فيكي إيه
آمنه : فيا إيه .. هقولك فيا إيه
أولا انا ارمله وعندي ولدين .. ثانيا فلاحه مبتعرفش تعمل حاجه في حياتها غير أنها تحلب الجاموسه وتربي طير
وتشتغل في الارض والبيت زي الخدامين لأني معايا دبلوم يا باشا .. ثالثا بقا عندي 30 سنه يعني عيبه في حقي لما قلبي يدق وشغل المراهقين دا
مراد : لفها ليه وقال انتي ليه شايفه نفسك قليله كدا
آمنه : أنا فعلا قليله يا باشا
مراد : إيه باشا واستاذ اللي انتي بتقوليهالي دي
آمنه : عشان اصحصح نفسي ودماغي متروحش لحته بعيد حتي بالكلام
مراد : آمنه انا بحبك ومحتاج وجودك في حياتي
آمنه : وتقدر تبني سعادتك علي تعاسة غيرك
مراد : تعاسة غيري .. مين دول
آمنه : البيت كله .. حازم ودعاء ومعتز وهشام وامي واولادي حتي تالا الصغيره
مراد : وانتي مالك بكل دول .. يعني انتي تسعديهم وتتعسي نفسك انتي ساذجه اوي
آمنه : انت اناني علي فكره
مراد : اناني عشان عاوزك تفكري في نفسك شويه وتبصي قدامك وتشوفي حياتك
آمنه : انا حياتي هنا مش في اي مكان تاني
مراد : لا ممكن تبقي معايا بس انتي اديلي فرصه
آمنه : مش بقولك اناني .. طب والبيت هنا اسيبه لمين .. هسيب حماتي لمين .حماتي الكفيفه اللي مبتعرفش تخطي خطوه في حياتها من غيري. ولا دعاء .. دعاء اللي حازم
بيسافر وبيسبها أمانه في رقابتي هيه وبنتها .. وهشام .هشام اللي بيرجع من بره بيسأل عني مش بيسأل عن امه ... ومعتز . معتز اللي اتجوز وهو مآمن علي بيته وامه عشان انا موجوده .. تبقي اناني ولا مش اناني
مراد : لو انتي شيفاني اناني .. يبقي انا هشوف طيابتك الزايده دي هبل
آمنه : اعتبرني هبله .. وسيب الهبله في حالها
مراد : طب خدي وقتك في التفكير وردي عليا ... متتسرعيش
آمنه : الموضوع محسوب بالنسبالي يا استاذ مراد ومش هفكر فيه .. معنديش استعداد اهد البيت اللي بنيته في سنين عشان حد
مراد : ضحك بسخريه وقال انتي فاكره انك لما يتقدملك عريس وانتي وافقتي هما هيوافقوا عليه عادي وهيفرحولك ...
لأ دول مش بعيد يعملو اي حاجه عشان يبوظولك الجوازه دي ... مش دايما كل الحب والخير اللي بنعطيه للناس بناخد زيه .. اوقات بناخد مقابله انانيه واستبداد يا آمنه
آمنه : يبقي انت متعرفهمش عشان كدا بتتكلم عنهم بالشكل دا
مراد : مش بقولك هبله .. يعني اعتبر دا رد منك نهائي
آمنه : ايوا
مراد : دخل اخد الجاكيت بتاعه ومفتاح عربيته وخرج ووقف على السلم وبصلها وقال انا هبعد عنك ومش هتشوفي وشي تاني .. بس اوعدك لو احتاجتيني هتلاقيني موجود
آمنه : ربنا يخلي حازم ومعتز وهشام .. طول ما هما معايا مش هحتاج لحد
مراد : لما ظنك يخيب فيهم ابقي افتكري كلمتي دي كويس " كتر الحب بيتقلب بأنانيه واستبداد" وهز راسه بحزن وقال يا خساره انا حزين علي جهلك .. مش جهل تعليمك لأ جهل عقلك وقلبك وسابها ومشي
سؤال للمناقشه ؟؟
تفتكروا آمنه ولا مراد اللي صح
تفتكروا تفكير آمنه صح في أنها ملهاش حق تتجوز لمجرد انها ارمله وعندها اولاد .. لان العادات والتقاليد الريفيه بتحكم بكدا وهيه خايفه من كلام الناس عليها
معظم الناس بتبص للارمله والمطلقه بنظره غريبه شويه ... أنها ملهاش حق تعيش كبنآدمه
مش كل المطلقين .. فاشلين عشان نحتقرهم
ولا كل الارامل لازم يتفرض عليهم العيشه لوحدهم بسبب نظرة الناس وخصوصا لو عندها بيت واولاد وعيله زي ظروف قصة بطلتنا آمنه