في احدى القرى الريفيه تسكن عائله موسى الشهيدي
عندما يبدا النهار بلمعته الزرقاء تبدا آمنه تستيقظ من نومها لتستقبل اشراقاً جديدا ويوما منهكاً كالعاده
ولكنه يمر من ابتسامة من حولها اولادها واخوات زوجها وحماتها وسلفتها
صحيت آمنه من نومها خرجت بره الاوضه لقيت ابنها الصغير عبد الرحمن قاعد قدام التليفزيون
وقفت على باب الاوضه وقالت : صباح الخير يا بودي
عبد الرحمن : صباح الخير يا ست ماما ايه التاخير ده
امنه : تاخير ايه بس يا ابني ده لسه الساعه 6
عبد الرحمن : ايوه تاخير طبعا حضرتك معودانا تصحى الفجر والساعه6 يبقى تاخير ولا مش تاخير
آمنه : اه يا مراري منك وانا هعرف اخد معاك حق ولا باطل أنا همشي احسن اجهزلك الفطار هو فين سيف اخوك
عبد الرحمن : سيف راح الكُتاب عشان عنده درس العصر ومش هيعرف يروح
آمنه : ماشي يا حبيبي هدخل أصلي بس الاول وهجهزلك الفطار
بعد شويه خرجت آمنه بالفطار الفلاحي لعبد الرحمن وهو بيض مسلوق جبنه قريش وقشطه وكوب من اللبن
عبد الرحمن : كل يوم الفطار ده انا عايز لانشون
امنه : لانشون ايه بس جاتك القرف هتاكل فيران ميته
عبد الرحمن : لا طبعا انا عايز من اللي انت بتعمليه في البيت
امنه : يا سلام اقتنعت بيه دلوقتي
عبد الرحمن : خلاص بقى يا امونه قلبك ابيض
امنه : ضحكت عليه وقالت طيب افطر انت وانا هدخل احلب الجاموسه عشان ابيع اللبن واطلع افطر الطير
عبد الرحمن : ماشي
سابته آمنه ودخلت حلبت الجاموسه فعلا وخرجت تبيع اللبن للبقاله اللي جنبهم
آمنه : دخلت البقاله وقالت صباح الخير يا عم صابر
صابر : بابتسامه صباحك فل يا امونه اتاخرتي ليه النهارده
آمنه : ابدا بس راحت عليا نومه يلا خد اللبن اهو وأكتبه على الحساب لما نشوف هنحتاج منك ايه
صابر : عيوني يا بنتي
آمنه : قولي فتون وبدور بناتك عاملين ايه
صابر : الحمد لله يا بنتي ... وضحك وقال اسكتي فتون جالها عريس
آمنه : بفرحه بجد الف مبروك منين
صابر : عصام ابن فرج السمكري
آمنه : ايه !! وانت هتوافق عليه يا عم صابر
صابر : اه يا بنتي هوافق ليه هو ماله
امنه : ماله !! انت بتهزر ولا بتتكلم بجد ... ده حشاش يا عم صابر
صابر : استغفر الله العظيم يا رب انتي متاكده يا بنتي
آمنه : عيب عليك يا عم صابر انت عارف امونه بتقول الحق وفتون دي زي اختي مش هقولها الا على الطريق الصح اوعي توافق والنبي ده هيمرمطها
صابر : روحي يا بنتي ربنا ما يوقعك في ضيقه ابدا ويسعدك ويريح بالك
في الوقت ده جاءت عليهم بنت اسمها نورا وقالت : يا صباح الدعاوي الحلوه ايوه بقا الست امونه طبعا
*نورا فتحي صاحبة فتون بنت صابر عندها 20 سنه وبتحب آمنه جدا وبتعشق معتز
آمنه : صباحك نور يا نورا ايه القمر ده كل مادا بتحلوي أكتر
نورا : اممم كلي بعقلي حلاوه بقى .. بقى اجيلك امبارح اسهر معاكي الاقيكي نمتي
امنه : غصب عني والله الساعه بتيجي عليا ثمانيه من هنا وبنام مبحسش بنفسي
صابر : الله يكون في عونك يا بنتي
نورا : احمم اصلك كنتي وحشاني
آمنه : غمزتلها وقالت اممم طب ابقى تعالى تاني عشان اكيد هوحشك
صابر : حاسس اني بتقرطس
آمنه ونورا : ههههههههههههه
نورا : مشكلتك يا عم صابر انك فاهمني صح
صابر : عيب انا راجل كبير اه لكن افهم اللي قدامي في لحظه
آمنه : طب يلا يا عم صابر خلصت اديني الحله خليني اروح اجهز الفطار واصحي دعاء عندها جامعه النهارده
صابر : أتفضلي يا ست امونه وسلميلي على الاولاد
آمنه : يوصل يا عسل سلام يا نورا
نورا : سلام
صابر : ربنا يجبر بخاطرك يا امنه يا بنتي وبص لنورا وقال ها يا نورا عايزه ايه
نورا : عايزه ......
رجعت امنه البيت ودخلت لحماتها لقيتها لسه نايمه ولعت البوتجاز على البيض يتسلق
وطلعت لشقه حازم ودعاء وخبطت عليهم
حازم : فتح الباب وقال بابتسامه صباح الخير يا امونه
امنه : صباح الفل يا زومه يلا اصحى وصحي دعاء عشان الجامعه
حازم : منتحرمش منك ولا من اصطباحتك السكر دي
امنه : متحرمش منك يا خويا يلا أجهزوا على ما اصحى المقتولين اللي فوق
وسابته وطلعت لمعتز وهشام وفضلت تخبط لحد ما فتح معتز وهو بيقول بصوت نعسان : يا صباح الغلاسه يا امونه
امنه : عيب عليك حضره وكيل النيابه التاخير ده اخلص بقى
معتز : يا بنتي النهارده اجازتي والمصحف وقايلك امبارح عشان برضه ما تصحينيش
امنه : يلا بلاش كسل صلي انت وانا هجهز الفطار
معتز : حاااااضر
امنه : فين هشام
معتز : نايم لسه
امنه : طب وسع كده انا هدخل اصحيه
ودخلت لهشام تصحيه وقالت هشام واد يا هشام
هشام : 😴😴😴😴😴😴
امنه : يا فقعت مرارتي منك مبدهاش بقى وجابت ازازة الميه وكبت عليه شويه
هشام : وقف بفزع وقالت سلم نفسك المكان كله محاصر هضرب في المليان
امنه : حطت ايدها على وشها بتعب وقالت يارب صبرني وبصتله وقالت طب انجح في الثانويه الاول يا اخرة صبري واحلم انك ظابط
هشام : قعد على السرير بتعب وقال ياه يا امونه حته مشهد اكشن بس إيه وصفر ببوقه
آمنه : قوم يا هشام عشان مش اخلي صباحك مش فايت
هشام : شد البطانيه عليه وقال طب هخطف حلم سريع أقبض فيه على المجرم وهرجعلك
امنه : قسما عظما لو متحركتش ...
هشام اتكلم مع امنه وقالوا مع بعض : هاخلي صباحك اسود من شعر راسك يا هشام فهمت
هشام : حافظها والمصحف اسمعلك اللي بعدها
امنه : بغيظ يا اخي ملعون ابو ....
هشام وامنه : ابو تربيتك تربيه هابطه
هشام : ها أقولك اللي بعدها
آمنه : كانت بتتلفت حواليها
هشام : بتدوري على ايه
امنه : كان في خرزانه هنا مش عارفه راحت فين
هشام : سمع كده قام بسرعه وجرى دخل الحمام
معتز : دخل الاوضه وهو بينشف في وشه وقال كفايه ارهاب لينا بقى يا امونه ارحمينا
آمنه : لا يا اخويا امونه ما بترحمش حد واخلص ورتبو أوضتكم دي على اما اطلع للطير افطروا
في الوقت ده تليفون معتز رن وكانت كاميليا خطيبته
امنه : رد على السنيوره بتاعتك
معتز : احم ايوه يا كوكي
امنه : رفعت شفتها من ناحيه وقالت كوكي طب سلملي على كوكي
وسابته وطلعت للطير اللي كان على السطح فطرته ونزلت عشان تكمل تجهيز فطار لعائلتها
_________________________________
في منزل في القاهره في الاحياء الشعبيه البسيطه
في بيت مراد عزام
صحي مراد من نومه على معاد شغله أدي فرضه ودخل المطبخ لقا امل اخته واقفه بتجهز الاكل
مراد : صباح الفل يا اموله
امل : صباح الخير يا مراد
مراد : عندك جامعه
امل : اه عندي بس متاخر شويه
مراد : وفين ام لسانين لسه ما صحيتش
نهي : جت من وراه وقالت لا صحيت وقامت ترد عليك كمان
مراد : حضنها وقال يا صباح الشقاوه
نهى : صباح الفل يا أبيه
امل : يلا يا نهى شيلي الاكل حطيه على الصبح عشان نفطر
نهى : حاضر وشالت الاكل وخرجت
مراد : أمل كنت عايزك في موضوع مهم بعد ما نهي تمشي
امل : ماشي يا مراد بس غير هدومك الاول على ما اعملك القهوه
مراد : ماشي يا حبيبتي
وبعد شويه غير هدومه وخرج قعد معاهم على السفره
نهى : ابيه مراد فيه رحله طالعه للاسكندريه وبصراحه نفسي اروح مع زمايلي اوي
امل : انتي أتجننتي يا نهى رحلة ايه دي
نهى : وفيها ايه بس يا ابله امل
امل : لا يا نهى انا اخاف عليكي
نهى : يعني زمايلي اهاليهم مبيخافوش عليهم عشان طالعين والنبي وافقي بقى يا اموله
مراد : طب انا عندي حل حلو يا نونه
نهى : ايه يا أبيه
مراد : انا هاخد ثلاثة ايام اجازه ونطلع اسكندريه ايه رايك
نهي : بس انا كان نفسي اطلع مع اصحابي يا ابيه
مراد : وحياتك عندي لا خليكي تروحي اماكن احلى اتفقنا
نهى : حضنته بفرحه وقالت اتفقنا يا احلى ابيه ربنا يخليك لينا
امل : طب يلا عشان الباص بتاعك وصل
نهى لبست شنطتها وسلمت عليهم ونزلت
امل : سيبك من الاجازه يا مراد وهي هتنسى
مراد : لا طبعا انتي هبله هنروح كلنا عشان نغير جو
امل : ربنا يخليك لينا يا مراد .... كنت عايز تتكلم في ايه
مراد : شريف
امل : كشرت وأبتسامتها أختفت وقالت ماله
مراد : عاوز يرجعلك تاني
امل : لا يا مراد خلاص اللي بيننا انتهى
مراد : طب أدي لنفسك فرصه يا امل صدقيني شريف طيب
نهى : بس شكاك يا مراد وانا مقبلش اعيش مع واحد بالشكل ده
مراد : يا نهى شغلانتنا دي علمتنا اننا نكون شكاكين أوي
نهى : طب انت ما بتشكش فينا ليه
مراده : اتنهد وقال مش كله زي بعضه
نهى : وعشان كده انا هاستنى لما ألاقي الراجل اللي ميشكش فيا يا مراد لاني مستاهلش الشك
مراد : طبعا يا حبيبتي ... يعني ده اخر كلام
نهى : ايوه وقوله يبطل كلام شويه هو بالنسبالي دلوقتي زيك وخلاص
مراد : اللي تشوفيه يا حبيبتي يلا انا هنزل الشغل
نهى : مع السلامه
____________________________________
في بيت موسي الشهيدي
صحيت وفاء آمنه من نومها
دخلت آمنه عليها وقالت صباح الفل يا أما
وفاء : صباح النور يا بنتي
راحتلها آمنه وقومتها دخلتها الحمام وسندتها لحد ما اتوضت وقعدتها في المكان الصح عشان تصلي وبعد ما خلصت جالتلها كوباية اللبن تشربها وسابتها ودخلت تجهز الفطار
نزلت دعاء وباست أيد حماتها وقالت صباح الخير يا ماما
وفاء : صباح النور يا حببتي رايحه الجامعه
دعاء : آه أدعيلي عندي أمتحان
وفاء : ربنا ينجحك يا بنتي
دعاء : يارب .. فين أمونه
وفاء : هتلاقيها في المطبخ
دعاء : ماشي لما أدخلها عشان اديها تالا وامشي
وفاء : ماشي يا بنتي
كانت آمنه واقفه في المطبخ وجت عليها دعاء وتالا
دعاء : صباح الخير يا أمونه
آمنه : صباحك فل يا دودو وباست تالا وقالت صباح السكر يا توته
دعاء : أنا همشي بقا اصلي اتاخرت
آمنه : طب أشربي كوباية اللبن الأول يا دودو
دعاء : والنبي يا أمونه بتقلب بطني
آمنه : بصتلها بعين وقالت بتحذير تقلبلك بطنك ولا أقلبهالك انا علي هدومك
دعاء : يا لهووي حااضر وشربت كوباية اللبن مره واحده وقالت تمام كدا
آمنه : يلا بقا اسرحي قعدي توته جنب عبد الرحمن وروحي انتي
دعاء : باستها من خدها وقالت يلا سلام
بعد شويه جهزت الأكل وحطته علي الطبليه وجهزت اللبن
نزل حازم ومعتز وهشام وقعدوا عشان يفطروا
وسندت آمنه حماتها وقعدتها معاهم علي الطبليه وقعدوا يفطروا مع بعض
حازم : تعالي يا بودي انت وتوته افطرو
عبد الرحمن : لا أنا فطرت من بدري
آمنه : سيب توته أنا هفطرها بعدين لما تجوع عشان أعرف اشبعها
هشام : طب أنا همشي بقا عشان ألحق الدرس
آمنه : محتاج فلوس يا هشام
هشام : لا لا مش لازم أنا كدا كدا بركب المكنه
آمنه : لا لا استني هتلاقي 50 جنيه جوه خدها في جيبك احتياطي عشان لو جوعت اشتريلك حاجه
هشام : ماشي يا أمونه ودخل أخدها ومشي
آمنه : صحيح يا حازم المعلم عطوه هيروح الارض بعد ساعه عشان يشتري المحصول انت ومعتز توصلوا قبله
معتز : ولزومنا إيه يا امونه بس ما تخلصي أنتي كل حاجه وخلاص
آمنه : بصتله بغيظ وقالت أنا لو عليا ممكن اخلص كل حاجه باشاره مني يا استاذ معتز لكن أنا بكبر بيكم .. الراجل لما جه عشان يتكلم أنا قولتله هبعتلك رجالة البيت
حازم : احمم معتز ميقصدش يا امونه .. هو بس يقصد يعني انه مطمن لو عملتي أي حاجه
معتز : آه والله
آمنه : ما علينا المهم هتخلصوا فطار وتروحوا تتفقوا علي السعر هو هياخد محصول الارض كلها
حازم : طب ومش هتحتاجي للبيت
آمنه : لا الارض التانيه هتكفينا وزياده. وبصت لمعتز وقالت وياريت تقلع الترنج دا يا معتز وألبس جلابيه بعد اذنك
معتز : وأنا هتصور معاه يا آمنه أنا حر
حازم : ضربه في رجله وقال هيلبس طبعا يا شيخه .. بس قوليلي نتفق علي السعر كام
آمنه : أقل من 8 ونص متبيعش
معتز : ياااه 8 ونص إيه في الارض كلها
آمنه : في الكيلو يا معتز متجننيش
حازم : ضحك وقال خلاص بقا يا أمونه فرفشي حاضر هقوله 8 ونص
آمنه : لا طبعا أنت تبدأ بعشره وتقرط جامد ولو حب ينزلها شويه ...
معتز : قطع كلامها وقال نقوله 8 ونص
آمنه : نفخت وقالت لا دا كتير عليا والمصحف هشام هيفقلي المراره وانت هتشيلي الزايده
حازم : اسكت بقا يا معتز .. قولي يا آمونه
آمنه : أنت هتنزله نص جنيه بس ولو لقيته ضغط أوي نزل كمان نص ولو زود نزل نص بس لو ضغط تاني قوله مش بايعين وأمشي
معتز : وليه الهري دا من الاول
وفاء : ما تسكت بقا يا واد انت واسمع الكلام
معتز : حاااااضر
حازم : حاضر يا امونه اللي انتي عيزاه هعمله
آمنه : ربنا يخليك يا مريح قلبي وبصت علي معتز وقالت مش زي ناس
معتز : اكيد هشام مش أنا
____________________________________
في بيت راضي الشهيدي
كانوا قاعدين كلهم بيفطروا مع بعض راضي وفايزه والسيد ومراته شيماء
راضي : هو نادر منزلش ليه لحد دلوقتي
فايزه : مش هيروح الجامعه النهارده بيقول عنده مشوار
السيد : ليه فاكر نفسه طالب في الجامعه مش هيروح دا دكتور فيها المفروض يروح كل يوم
في الوقت دا نزل نادر وقال : صباح الخير
الكل : صباح النور
راضي : إيه يا نادر مش رايح الجامعه ليه
نادر : أبدا يا ابا بس رايح مشوار كدا عشان عايز انقل ورقي لجامعة القاهره
فايزه : وليه وجع القلب دا يا بني مش هيكون صعب عليك تروح كل يوم
نادر : لا هما هيوفرولي سكن تبع الشغل .. وكمان فرصة العمل في القاهره هتخليني اتعرف علي ناس اكتر
السيد : ما تقول انك بتهرب وخلاص مش لازم تحللها
نادر : باستغراب اهرب !! اهرب من إيه
السيد : عشان آمنه رفضتك
نادر : اولاً آمنه مرفضتنيش ولا حاجه هيه رفضت طلبكم انتو .. انتو اللي روحتو من ورايا وطلبتوها ليا مش انا
ثانيا حتي لو كنت انا روحت واترفض منها دا شئ مش عيب يعني اني اهرب منه عادي
فايزه : بس خلاص كفاياكم كلام وافطروا
نادر : الحمد لله شبعت عن اذنكم وسابهم ومشي
شيماء : انت دايما تنكد عليه كدا يا سيد
السيد : عيل عبيط فاكرني مش فاهمه
راضي : خلاص يا سيد يابني كفايه ... المهم قولي كلمت المعلم عطوه عشان ياخد محصول الارض
السيد : آه كلمته بس قالي أتفق مع آمنه وهياخد محصولهم
راضي : نفخ بزهق وقال آمنه تاني هيه عامله زي المنشار طالع واكل نازل واكل
فايزه : سعيده اوي وفاء فيها يا خويا .. أبنها الكبير يموت من هنا وتطلعلنا الست آمنه تعمل زي اجدعها راجل واكتر كمان إيه دا
شيماء : يا جماعه الله يعينها برضو دي شايله بيت عمي موسي علي راسها
فايزه : سداده وبصت لشيماء بقرف وقالت مش زي ناس
شيماء : بزعل ليه بس يا أما وانا مقصره في حاجه
فايزه : بلا نيله ياختي .. دي حتي خلفتك مقصره فيها جيبالي 3 بنات جتك وكسه توكسك
راضي : مش عامله زي آمنه جايبه ولدين
شيماء : وانا مالي بس هو انا اللي بجيب دا ربنا اللي بيبعت
السيد : خلاص بقا يا أبا إن شاء الله المره الجايه هيكون ولد انا حاسس
فايزه : اتمني
راضي : المهم خلينا في موضوعنا يا سيد هنكلم مين ياخد المحصول ....
____________________________________
في مديرة أمن القاهره
كان مراد وصل لمكتبه وقعد يشوف شغله
بعد شويه الباب خبط ودخل منه شريف صاحبه
شريف : صباح الخير يا مراد
مراد : صباح النور يا شريف اتفضل أقعد
شريف : عندنا كمين النهارده الفجر علي الطريق المقطوع قي الشرقيه
مراد : آه اللواء بلغني وهكون جاهز إن شاء الله
شريف : أحمم ط.ط.طب كلمت نهي
مراد : وقف وحط أيده في جيوبه وقال آه كلمتها وبرضو مش موافقه
شريف : اتنهد وقال يعني إيه
مراد : يعني بتقولك خلينا أخوات افضل... المهم قولي مين طالع معانا الكمين
شريف : بتغير الموضوع .. ماشي عموما اللي طالع معانا العساكر بس مفيش حد من اصحابنا
مراد : المشكله إن الكمين دا الفجر يعني أنا هسيب اخواتي من الساعه 12 بالليل ومش هرجع الا 12 الضهر .. واتنهد وقال مشكله
شريف : ليه
مراد : هسيبهم كدا وقت كبير أوي وفي وقت صعب اصلا
شريف : باندفاع ليه مش واثق فيهم
مراد : لفله بغضب ومسكه من هدومه وقال قسما بالله إن الكلمه دي نطقتها علي لسانك تاني يا شريف هنسي الصداقه اللي بينا فهمممممت
شريف : عدل هدومه وقال علي فكره انا مقصدش حاجه انت اللي اخدت الموضوع بحساسيه
مراد : عندها حق والله متفكرش في الرجوع ليك من الواضح انها اتحملت بلاوي
شريف : اتنهد بتعب وقعد علي الكرسي وقال مراد أنا مخنوق من نفسي اوي .. انت فاكرني مبسوط باللي أنا فيه دا .. لا والله انا حاسس اننا بخسر كل حاجه حواليا بسبب الشك اللي عندي دا وبفكر اتعالج
مراد : خطوه حلوه أنك تتعالج يا شريف .. بس يا تري هتتعالج عشان نفسك ولا عشان نهي
شريف : بحزن عشانها
مراد : يبقي متتعالجش
شريف : ليه
مراد : عشان نهي مش هترجعلك لو عملت إيه يا شريف خلاص .. دي أختي وانا عارفها كويس انت اتعالج بس عشان نفسك .. وعشان لو لقيت واحده بنت حلال متعذبهاش معاك بسبب الشك اللي جواك دا
شريف : هز راسه وقال إن شاء الله انا هقوم أشوف شغلي
مراد : اتفضل
شريف : وقف وقال مراد ارجوك اوعي تتخلي عني وتسيبني انت كمان أنا مليش صاحب غيرك
مراد : حضنه وقال انا معاك وفي ضهرك يا شريف ومش هبعد عنك أبدا يا صاحبي
____________________________________
في الجامعه عند أمل
كانت وصلت ومستنيه دعاء زميلتها تيجي وبعد وقت وصلت دعاء
دعاء : صباح الخير يا أموله
أمل : كل دا تأخير يا ست دعاء ابقي اصحي بدري شويه يا كسوله
دعاء : وحياتك امونه مصحياني من الساعه 7 بس هعمل إيه المواصلات زفت ياختي .. انتي بتبصي لنفسك ياللي بتصحي تجهزي وتلبسي وتوصلي الجامعه في نص ساعه وأنا بتسحل في 35 مواصله علي ما اوصل
أمل : هههههههههه بتقري عليا الله اكبر
دعاء : قعدت جنبها وقالت طب يلا نطلع عشان الامتحان
أمل : لسه المجموعه الاولي مخرجتش اصلا وبصت في ساعتها وقالت قدامها ربع ساعه كدا ... قوليلي توته عامله ايه
دعاء : كويسه الحمد لله
أمل : مبتعيطش وراكي البت دي وانتي ماشيه
دعاء : ولااااا الهواا عادي بتقعد مع عبدالرحمن او سيف قدام التليفزيون وبمشي قدامها بتعملي باي كمان وتدخل لامونه
أمل : يا بختك بأمونه دي يا دعاء
دعاء : اتنهدت وقالت طبعا يا بختي أمونه دي عوضتني عن كل الحرمان والذل اللي كنت شيفاه علي ايد مرات ابويا بجد عمري مهلاقي زيها يا أمل .. بيقولو أن السلايف عقارب بس مع امونه دي عرفت السلفه اللي بجد .. هيه اللي شالتني وأنا والده ولما بكون تعبانه ولما بنزل جامعتي بسيب بنتي معاها بتأكلها وتشربها وتحميها وتسرحلها وتنيمها .. وتالا كمان بتحب أمونه أكتر مني أنا وبباها ومتعلقه بيها اوي
دعاء : ياما كان نفسي علا خطيبة مراد تكون هاديه وتقبل بينا في حياة مراد ونعيش معاها زي امونه كدا .. لكن هقول إيه باعته اول ما قالها اخواتي هيقعدوا معانا في البيت وخيرته ما بينها وبينا ... وابتسمت وقالت بس أختارنا احنا ومن وقتها لما جالي شريف قولت فرصه حلوه هتجوز وهخلي نهي تعيش معايا وبصراحه هوه كان معندوش مانع بيها خالص لانه كان عارف باللي علا عملته .. واتنهدت وقالت بس مفيش حظ معاه
دعاء : أنتي حبيتيه يا أمل اصلا
امل : هكدب عليكي لو قولتلك حبيته بس كلامه معايا كان بيجذبني ليه ولما كنا بنتخانق كان بيوحشني كلامه ... الشك دا اوسخ حاجه ممكن تهدم البيوت وتدمر العلاقات
دعاء : ربنا يرزقك بابن الحلال يا أموله
امل : يارب يا دعاء ... وبصت في ساعتها وقالت يلا عشان منتاخرش
___________________________________
في بيت موسي الشهيدي
كانت آمنه جهزت الغدا وخلصته وخرجت للصاله شويه
آمنه : انا خلصت الغدا يا اما مش هتاكلي
وفاء : لا يا بنتي مش قادره دلوقتي أنا محتاجه اريح شويه علي ضهري
آمنه : طب تعالي ادخلك الاوضه وسندتها ونيمتها علي السرير
وفاء : روحي يا آمنه يا بنت أمينه ربنا يديم عليكي صحتك وميحوجك لحد
آمنه : باست جبينها وقالت ولا يحرمني منك يا اما يلا ارتاحي انتي وانا هاخد توته ونطلع للطير
وفاء : ماشي يا بنتي
خرجت آمنه واخت الاكل للطير ومسكت تالا في إيدها وطلعوا للطير
آمنه : اقعدي هنا يا توته لما أأكل الفراخ
تالا : أنا هاف فخه (أنا بخاف من الفرخه)
آمنه : لا يا قلبي متخافيش اقعدي هنا ومش هتيجي عليكي
في السطح المقابل ليهم كان واقف جارهم صبحي ودا راجل مش تمام خالص وفضل يلقح بالكلام
صبحي : يا مساء السكر والاناناس علي أحلي الناس .. آااااه وحشتيني يا بت يا توته وحشتييييني اووووي .. ياما نفسي تحسي بيا يا توته وتعبري امي بكلمتين
آمنه : كانت عماله تنفخ وتسب في سرها بس متجهلاه عشان مش عايزه مشاكل
صبحي : ياللي واقف قصادي ومش معبرني . متحن يا جميل وقدرني
في الوقت دا جت من وراته قادره مراته وقالت : ما تتلم يا راجل يا عره مالك يا خويا شايف فيها إيه أحسن مني وعلت صوتها أكتر وقالت بس هقول إيه الحق مش عليك الحق علي اللي ساكته بتسمع الكلام ومبتردش شكل الكلام عاجبها مش كدا ولا إيه يا ست أمونه
أمنه : رمت الجردل من أيدها وبصتلها بغضب وقالت بابتسامه صفرا عيون الست امونه يا ست أسم علي مسمي
قادره : شهقت وقالت شوفي الست قال بطلودا واسمعودا بقا يا وليه ....
آمنه : قطعت كلامها وقالت ولولو عليكي ساعه يكون نفسك مقطوع فيها ... ولية مين يا قادره انتي أنا ليا أسم يا ختي والبلد كلها عرفاه ولو مش عرفاه انتي أنزلي اسالي أصغر واحد في الشارع عن الست امونه
قادره : ست علي نفسك يا حببتي
آمنه : عليكي وعلي اللي يتشددلك يا اسم علي مسمي
قادره : ولما انتي محترمه كدا مبتوقفيش الراجل عن كلامه ليه ولا جاي علي هواكي
آمنه : أصلي مبردش علي كلاب لما بتهوهو يا حببتي ومسكت الجرل واخدت تالا ونزلت
صبحي : أنا كلب يا بنت المزه
قادره : دايما جايبلي الكلام منها كدا مش عارفه عجباك علي أيه انطسيت في نظرك
صبحي : لنفسه لا والله انتي اللي انطسيتي في نظرك
نزلت آمنه وهيه علي آخرها من قادره وصبحي
في الوقت دا كان جاي معتز وحازم
آمنه : كالعاده بتتبسم في وشهم ومتقولهمش حاجه عشان مضايقمش وقالت : طمنوني عملتو إيه
حازم : تمينا الموضوع ب9 بالعافيه
آمنه : كويس برضو مش مشكله .. طب وقبضكوا
معتز : مرضاش قال هاجي بالليل أقبضكم ونشرب الشاي انشالله يطفحه
آمنه : خلاص مش مشكله طب إيه هتتغدوا
حازم : لا أنا هستني دعاء
معتز : وانا هطلع أكلم كوكي
حازم : ابو سآلة امك إيه الدلع دا
معتز : وأنت مالك يا عم وسابهم ومشي
في الوقت دا جه عليهم سيف وقال : السلام عليكم
حازم وآمنه : وعليكم السلام
آمنه : خلصت دروسك يا حبيبي
سيف : آه يا ماما .. بعد اذنك عايز آكل
حازم : مفيش ازيك يا بابا حازم
سيف : منا قولت السلام عليكم يا بابا
آمنه : هحضرلك الاكل يلا عشان تتغدي
سيف : هصلي الاول وهاجي وسابهم ومشي
حازم : ربنا يبارك فيك يا سيف
____________________________________
في الجامعه عند امل
كانت خرجت من الامتحان الاول قبل دعاء وقاعده مستنياها بره
في الوقت دا كان داخل نادر ولسه ميعرفش حاجه عن الجامعه لقي امل قاعده راح عندها وقال: لو سمحتي يا آنسه متعرفيش فين مكتب العميد
أمل : آه هتلاقيه الدور الثاني اخر الطرقه علي أيدك اليمين
نادر : متشكر اوي .. ومشي خطوتين ورجع قال طب تعرفي دكتور هنا أسمه عمار الشريعي
أمل : ضحكت وقالت مش عمار الشريعي دا اللي غني أنا زعلان منك يا دنيا
نادر : ههههههههه لا دا تشابه بس
أمل : لأ بصراحه معرفوش في قسم إيه دا
نادر : انجليزي
أمل : امممم قصدك عمرو الشيوعي مش عمار الشريعي
نادر : ضحك وقال مش عارف والله يمكن انا اللي سمعت غلط .. بس انتي عرفاه يعني
أمل طبعا عرفاه دا دكتوري أنا قسم انجليزي
نادر : لا والله طب اعرفك بنفسي بقا أنا الدكتور نادر موسي دكتور في قسم الانجليزي برضو بس جامعة الزقازيق وهنقل لهنا جامعة القاهره
أمل : وجاي تنقل والسنه خلصت خلاص
نادر : اتنهد وقال ظروف بقا
في الوقت دا جت دعاء عليهم وقالت : نادر !!!
نادر : دعاء ازيك ايه الصدفه الحلوه دي
امل : انتو تعرفو بعض
دعاء : آه طبعا نادر يبقي ابن عم حازم جوزي
أمل : بأبتسامه أهلا يا دكتور اتشرفت بحضرتك
نادر : ابتسم وقال الشرف ليا .. طب استني يا دعاء هعمل مشوار هنا ونروح مع بعض ارحمك من المواصلات
دعاء : لا مش هينفع انا كلمت أمونه وقولتلها أنا خلصت وجايه
نادر : لا الحقي روحي بقا اصلك لو اتاخرتي 5 دقايق هتلف عليكي بميكرفون
أمل : ضحكت وقالت للدرجادي بتخاف عليكي
نادر : بتخاف علي الكل بصراحه ... بتخاف علي اي حد تعرفه وبتحب كل اللي تعرفه .. ممكن تضحي بحياتها عشان اي حد متعرفوش .. عمرها مقالت لحد لأ
أمل : ابتسمت وقالت سبحان الله نفس الكلام عنها وبصت لدعاء وقالت انا متشوقه اننا اشوفها اوي
دعاء : هانت هتشوفيها في فرح معتز .. وكملت كلامها بسخريه وقالت : علي كوكي
نادر : ههههههه طب انا همشي مش محتاجه حاجه يا دعاء
دعاء : لا يا نادر ربنا يخليكي
نادر : يلا سلام وسابهم ومشي
دعاء : يلا أحنا كمان عشان متاخرش
أمل : يلا
____________________________________
في المساء
بعد ما جت دعاء من الجامعه ورجع هشام من الدروس اتجمعوا كلهم علي الطبليه عشان يتغدوا
آمنه : عملتي إيه يا دودو في الامتحان
دعاء : الحمد لله عدي علي خير
معتز : ما تنقلي يا بنتي جامعتك للزقازيق بدال المرمطه دي
دعاء : مش هيوافقوا لأن البطاقه لسه مكتوب فيها العنوان القديم
معتز : بسيطه نغيره
دعاء : لا خلاص هانت كلها كام يوم وهخلص امتحانات خالص وجامعه وهجيب الورق بحيث أكتب فيها حاصله علي بكالريوس تربيه مش طالبه وآنسه
هشام : آنسه !!
حازم : بصله بتحذير وقال هشااام
هشام : أنا اتخضيت بس يا زوما
آمنه : طب بطلوا كلام بقا وكلوا يلا
هشام : اومال الواد سيف فين مشفتوش النهارده
آمنه : اتغدي أول ما رجع من الدرس ودخل اوضته يعمل الواجب
هشام : طالع لعمه متفوق
حازم : بسخريه آه اوي
في الوقت دا سنعوا صوت واحد وهو بينادي وقام هشام يفتح الباب ولقاه المعلم عطوه
آمنه : أتفضل يا معلم بيتك ومطرحك أنت مش غريب
عطوه : دخل البيت وقال السلاام عليكم
الكل : وعليكم السلام
حازم : طب تعالي يا معلم اتغدي معانا
عطوه : لا غدا إيه ده أحنا دلوقتي بنتعشي
وفاء : علي ما الكل بيتلم فبنتاخر شويه في الغدا .. طب اتفضل اتعشي
عطوه : تسلمي يا حاجه وخرج من جيبه الفلوس وقال دي الفلوس اللي اتفقنا عليها يا ست آمنه
آمنه : أنت متفقتش معايا يا معلم انت اتفقت مع الرجاله
عطوه : احمم لا مؤاخذه وبص لحازم وقال دي الفلوس يا كابتن زي اتفاقنا
حازم : ومستعجل ليه يا معلم بس
عطوه : معلش كده احسن عشان الواحد يروق للي هيشتريه بعد كدا
حازم : ربنا يزيدك
عطوه : تسلم .... وسكت شويه وقال في موضوع كدا كنت عايز اتكلم معاكم فيه وبما انكم موجودين كلكلم فبقول اقوله وخلاص
معتز : اتفضل
حازم : خير يا معلم قول
عطوه : احم احم انااااا جااي طالب إيد الست آمنه
الكل بطل أكل وبصوا لبعض باستغراب إلا آمنه كانت بتأكل تالا ومبصتش ليهم أصلا ولا كأن أي كلمه اتقالت
هشام : بتقول ايه يا روح أمك
🌴الفصل الثاني🌴
في بيت مراد عزام
كان وصل من شغله ولقي أمل ونهي بينضفوا البيت
مراد : في حد يشتغل متأخر كدا يا اموله
نهى : قولها والنبي يا ابيه
أمل : بطلي لماضه ويلا خلصي وبصت لمراد وقالت اوضتك متنضفه من بدري يا مراد لو عايز ترتاح
مراد : لا أنا هاكل معاكم وهنزل تاني عندي كمين
نهي : بخوف ي.ي.يعني هنبات لوحدنا
أمل : ابتسمت عشان تطمنها وقالت وفيها إيه يا نهي لما نبات لوحدنا احنا صحيح بنات لكن متسيش اننا اخوات مراد عزام
مراد : حاوطهم بدراعه وقال غصب عني معلش استحملوني شويه وانتو خلو بالكم من نفسكم
أمل : متقلقش علينا يا حبيبي ... يلا غير هدومك انت عشان تاكل
مراد : طب هصلي علي ما تخلصوا وهجهز انا الاكل بسرعه
___________________________________
في بيت موسي الشهيدي
الكل كان بيبص لبعضه بسبب طلب المعلم عطوه
هشام : بتقول إيه يا روح أمك
آمنه : بشده هشااااااااام
حازم : احمم ل.ل.لامؤاخذه يا معلم عطوه ... احم بس حضرتك مش شايف طلبك دا غريب شويه
عطوه : ما غريب إلا الشيطان يا كابتن اني طالبها علي سنة الله ورسوله وبص لوفاء وقال ولا اني قولت حاجه غلط وانا معرفش يا حاجه وفاء
وفاء : لا يا معلم مفيش غلط ولا حاجه .. الرأي رأي آمنه ودا قرارها الاول والاخير
حازم ودعاء ومعتز وهشام بصوا لآمنه منتظرين ردها
وفاء : الراي رايك يا بنتي ومحدش يقدر يقولك حاجه ولا يعارضك
عطوه : وافقي ياست آمنه .. وافقي وعمرك ما هتندمي حرام تدفني شبابك وجمالك كده و...
آمنه : قطعت كلامه وقالت لو سمحت يا معلم انا مش محتاجه أنك توصفني وتفهمني اني بدفن نفسي وشبابي وكل الكلام دا
... انا من يوم ما عبد الرحمن استشهد وأنا كرست حياتي لأولادي وبس .. لكن بعد ما قررت آجي اعيش معاهم هنا وأنا بقا ليا عيله كامله أنا اللي مسؤله عنها محدش تاني
عطوه : برضو مفهمتش يعني موافقه ولا لأ
آمنه : كل شئ قسمه ونصيب يا معلم
عطوه : برضو ماخدتش عقاد نافع
معتز : مقالتلك كل شئ قسمه ونصيب هيه لازم تقولك لأ في وشك يعني
عطوه : وقف وسابهم ومشي
حازم : مش كنتي أخدتي وقت تفكري شويه يا أمونه
معتز : انت أتهبلت ولا إيه تفكر في إيه
دعاء : دا حقها يا معتز أحنا مش هنحرمها من أقل حقوقها
آمنه : ولا حرمانيه ولا حاجه يا دعاء أنا مرتاحه كدا ووقفت وقالت انا داخله اوضتي اريح شويه وسابتهم ودخلت اوضتها
____________________________________
في المديريه
وصل مراد وجهز العساكر اللي هتطلع معاه عشان الكمين وجه عليهم سامح زميله في نفس السن ونفس الرتبه
سامح : إيه يا بوص طالع الكمين
مراد : آه ادعيلي افضل مصحصح اصلي بقفل من دلوقتي
سامح : منتا لو خاطب مزه كنت اتسايرت معاها بالليل وفضلت مصحصحاك
مراد : ضحك وقال ادعيلي ألاقي بنت الحلال قريب
سامح : روح يا مراد يابن ... هيه أمك أسمها إيه
مراد : ضحك وقال فاديه
سامح : روح يا مراد يابن فاديه ربنا يوقعك في بنت الحلال اللي تخطف قلبك من اول نظره
مراد : ضحك بصوت عالي وقال من اول نظره ليه يابني هقابل الاميره ديانا
سامح : ولا تعلم فيه بنات كتير اوي أجمل منها كمان
مراد : ميفرقش معايا جمال ولا تعليم ولا ثقافه قد ما يفرق معايا أنها تكون بنت حلال وتتقبل أخواتي البنات في حياتي وبس
سامح : طبطب علي كتفه وقال هتلاقيها إن شاء الله.. بس اوعدني يوم ما تلاقيها تعزمني علي عشوة كباب وكفته ولحم مشوي
مراد : إيه دا كله سعراان
سامح : لازم نبني جسمنا عشان اللياقه ونعجب الستات لما نتجوز
مراد : اللي متتقبلكش وانت في اسوأ حالاتك متستحقش أنها تكون علي ذمتك أصلا .. هيه هتعيش مع قلبك وروحك مش مع شكلك
سامح : والله يابني انت اوقات بتقول كلام حكم تحس أن امك كانت بترضعك حكم اصلا
مراد : بطل قر شويه
في الوقت دا جه عليه شريف وقال : يلا يا شريف كله جاهز
سامح : إيه يابني مش شايفني
شريف : بصله وسكت ورجع بص لمراد وقال يلا انا هسبقك علي العربيه وسابه ومشي
مراد : معلش يا سامح استحمله شويه
سامح : متخلف اقسم بالله ... أنا لو كنت اقصد حاجه وحشه مكنتش هتكلم قدامه كدا وانت اخوها ومتكلمتش لانك عارف أخلاقي وعارف امل بالنسبالي اختي قبل ما تكون خطيبة صاحبي
مراد : خلاص مفيش خطوبه .. أمل فسخت خطوبتها من شريف ومش موافقه تديله فرصه تانيه
سامح : بزعل .. بجد ... طب انا ممكن اقعد معاها واكلمها يمكن تقتنع مني
مراد : لا خلاص مش هتقتنع شكل قرارها نهائى
سامح : عموما سيبها شويه كدا وبعدين كلمها تاني .. شريف بيحبها وكويس بس غيرته اللي مش كويسه
مراد : ربنا يقدم اللي فيه الخير يلا هسيبك أنا
سامح : ربنا معاك
____________________________________
اشرق صباح يوم جديد
في منزل موسي الشهيدي فاقت آمنه من نومها وبدأت تعمل اللي بتعمله كل يوم
فطرت عيالها وراحو للمدرسه حلبت الجاموسه وباعت اللبن وفطرت الطير وبدات تنضف البيت وتطبخ
دعاء : دخلت عليها وقالت أعمل معاكي إيه يا أمونه
آمنه : ولا حاجه يا دعاء اطلعي انتي بس ذاكري عشان امتحانك وسيبي تالا معايا
دعاء : لأ دا كتير عليكي يا آمنه يعني اطلع ومعملش حاجه وكمان اسيبلك تالا
آمنه : أولا انا أمونه ومتعوده منكم علي أمونه مش آمنه ثانيا مش كتير ولا حاجه انتي كلها كام شهر يا ستي وتخلصي خالص وأبقي اعملي معايا براحتك
دعاء : عارفه يا أمونه أنا لو ليا أخت عمرها مكانت هتعمل معايا كدا
آمنه : لا أنا كدا بقا هزعل .. إيه لو ليكي أخت دي وانا مش اختك ولا إيه
دعاء : لا انتي أمي والله وحضنتها
في الوقت دا جه عليهم هشام وقال : هااااااا يا مصيبتي يالهوي يا خرابي ايه اللي بيحصل دا
آمنه : فيه إيه يا آخرت صبري
هشام : أصلي مستغرب أن سلفتين بيحضنو بعض كدا عادي .. دا معروف عن السلايف عقارب
دعاء : ضحكت وحاوطت آمنه بدراعها وقالت لا أنا وأمونه كسرنا القاعده دي
هشام : طيب ربنا يهنيكم ببعض بس اعزموني علي الفرح هههههه وسابهم وجري
آمنه : أنا تعبت من الواد دا والله دا سيف وعبده أعقل منه
هشام : رجع وحط أيده في وسطه وقال بصوت انثوي .. طلقيني لو مش عاجبك
آمنه : يابني اعقل بقا هتبقي ظابط اهبل كدا ازاي بس ولا هتتجوز وتشكم مراتك ازاي
هشام : شهق وقال اشكمها ازاي .. لاااااا انتي متعرفيش هشام لما بيتعصب دا انا ممكن اعمل اللي محدش يعمله
دعاء : أيوه اللي هوه إيه دا
هشام : منا معرفش لسه لما هتجوز هقولكم وبص لآمنه وقال سلام يا مزه انا ماشي
دعاء : هههههههههه عسل الواد دا
آمنه : ابتسمت وقالت ربنا ينجحه وينجحك واتنهدت وقالت ويختار لمعتز الطريق الصح لاني مش مرتاحه لكامليا دي
دعاء : أنتي كمان .. تعرفي أن حازم دايما يقول أنا حاسس ان كاميليا دي هتبقي السبب في تفرقنا عن بعض
آمنه : بقلق وانا كمان حاسه بكدا بس هقول إيه لمعتز رايح يحب واحده مش من طينتنا اصلا سايب نورا اللي بتعشق جزمته ورايح يحب واحده متعجرفه وياريته عاجبها .. لا دي عايزه تغير معتز وتغير حاله .. واولهم طلبت تعيش في القاهره مش هتعيش في البلد معانا
دعاء : والله هيه اللي خسرانه
آمنه : اتنهدت وقالت كان نفسي تبقي اختنا التالته ونعيش مع بعض بسلام .. المهم انتي يلا روحي ذاكري وسيبيني بقا اشوف حالي
دعاء : ابتسمت وقالت حاضر وباستها في خدها ومشيت
____________________________________
في بيت راضي الشهيدي
نزلت شيماء من بيتها ومعاها بنتها الصغيره شيلاها علي كتفها
شيماء : صباح الخير يا اما
فايزه : صباح !! صباح إيه ياختي احنا بقينا الساعه 9
شيماء : غصب عني يا أما ما صدقت العيال راحت المدرسه والبت نامت نمت جنبها محستش بنفسي
فايزه : تقومي تنامي لحد دلوقتي ياختي إيه فاكره نفسك في البندر مش عارفه إن وراكي جاموسه عايزه تتحلب وطير عايز يفطر وبيت عايز يتنضف
شيماء : اتنهدت وقالت حاضر يا أما كل حاجه هعلمها بسرعه متقلقيش ومش هتتكرر تاني واتاخر بالشكل دا
فايزه : أتمني يا حبة عيني اتفضلي روحي بيعي اللبن وتعالي اطبخي
شيماء : هو انتي حلبتي
فايزه : آه طبعا اومال هستناكي لحد دلوقتي
شيماء : طب خدي البت علي ما اروح بس
فايزه : ارزعيها علي الارض انا مش قادره اشيل عيال
شيماء : طب ماهي هتعيط كدا
فايزه : ما تعيط ياختي هينزل من عينها اللولي ومصمصت بشفايفها وقالت حكم يلا انجزي
شيماء : بدموع حاضر
شالت شيماء بنتها علي كتفها وشالت حلة اللبن بالايد التانيه ومشيت في الشارع
كانت آمنه قدام بيتهم بتكنس الشارع ولقت شيماء ماشيه وعلي كتفها بنتها
آمنه : ندهت عليها وقال شيماء
شيماء : راحت عندها وقالت نعم يا آمنه
آمنه أخدت البنت وشالتها وقالت واخده البت معاكي ليه وبصت في عيونها وقالت انتي معيطه ليه .. آه اكيد البومه اللي معاكي منكده عليكي
شيماء : أنا تعبت والله يا آمنه منها اللي تعيده بتزيده وكله كوم وحكاية خلفة البنات دي كوم تاني خالص عقدتني منهم والله وخلتني اكره نفسي وبتمني لو ربنا ياخدني انا وهما عشان نرتاح
آمنه : طب أنتي غوري بالسلامه العيال ذنبهم إيه .. ولما البنات بعد الشر تموت ولادي يتجوزو مين وبعدين متقلقيش مني أنا هكون حما كويسه والله وطيبه
شيماء : ابتسمت وقالت أنتي ياريت الدنيا كلها زيك يا أمونه مقابلتش حد في حنيتك وطيبة قلبك
آمنه : يبقي انتي موافقه
شيماء : ضحكت وقالت وانا أطول .. ربنا يخليكي يا امونه خرجتيني من اللي انا فيه في لحظه
آمنه : أيوا كدا فرفشي وكبري دماغك روحي انتي بيعي اللبن وخلي ندي معايا
شيماء : ماشي يا حببتي متحرمش منك
ومشيت شيماء وباعت اللبن للبقاله ورجعت اخدت بنتها من آمنه ووقفت معاها
في الوقت دا كان معدي قادره جارتهم اول ما شافتهم نفخت بزهق وقالت
قادره : يا فتاح عليم يا رزاق يا كريم مش عارفه بس إيه الاشكال اللي الواحد بيصطبح بيها دي
شيماء : مالها دي يا امونه
آمنه : كبري دماغك منها وانتي هتستفزيها أكتر
قادره : راحت ووقفت قدامهم وقالت بقولك يا حلوه انتي .. لما تبقي تطلعي تفطري طيرك ابقي خفي شويه مش لازم تتقصعي .. ولا عاجبك فرجة الرجاله عليكي .. بس هقول منتي ليكي الحق محرومه من وجود راجل
آمنه : وليه متقوليش ان الرجاله اللي بتبص دي هيه اللي دقتهم ناقصه ومبيملاش عينهم غير التراب ... أو ممكن مثلا مش معاهم ست من اصله
قادره : بغيظ مين دا اللي مش معاه ست .. أنا ست الستات يا حببتي
آمنه : صح كدا انتي ست الستات وراجل وامشي بقا روحي كملي المسلسل بعيد عني
قادره : بصتلها بتوعد وقالت وربنا لاحرق دمك يا آمنه زي ما بتحرقي دمي كل مره كدا وسابتهم ومشيت
آمنه : بصوت عالي آنشالله اللي يكرهوني يا ست أسم علي مسمي وعلت صوتها اكتر وقالت وابقي اشربي ليموناتا يا حببتي عشان دمك ميتحرقش
شيماء : ضحكت وقالت يخرب عقلك دا انتي جبروت اقسم بالله إيه دا
آمنه : وليه مهزقه مفكراني هخاف منها ومن كلامها .. ولا جوزها الناقص دا
شيماء : طب مبتقوليش للاولاد ليه
آمنه : هعمله قيمه لو حد كلمه ... سيبك منهم انتي وروحي خلصي اللي وراكي بدال ما البومه بوزها يطلع
شيماء : سلمت عليها وقالت حاضر يلا سلام
____________________________________
في شقة دعاء وحازم
كانت دعاء بتذاكر ولقت تليفونها بيرن وكانت امل صاحبتها
دعاء : فتحت الخط وقالت ايوا يا اموله
امل : صباح الخير يا دودو انا نازله الجامعه هجيب الجدول بيقولوا نزل
دعاء : ومالهم مستعجلين ليه كدا
أمل : مش هتفرق بقا هنزل اجيبه النهارده والجو خالي من دفعتنا عشان اعرف انقله ولما هرجع هكلمك ماشي
دعاء : ماشي يا حببتي ربنا يسترها
فقلت معاها وقالت بخوف : يارب عدي التيرم دا علي خير أنا خايفه اوي
حازم : جه عليها وقال صباح الفل يا دودو
دعاء : صباح الخير يا حبيبي
حازم : إيه مالك خايفه من إيه
دعاء : الامتحانات قربت وانا خايفه اوي نفسي اعدي التيرم دا علي خير
حازم : هتعديه يا حببتي إن شاء الله.. فين توته
دعاء : مع أمونه تحت مرضيتش تديهالي وانا بذاكر
حازم : طب فطرتي
دعاء : لا لسه قولت استناك نفطر مع بعض
حازم : ابتسم بخبث وقال فعلا احنا نفطر لوحدنا مدام توته تحت .....
____________________________________
في اوضة معتز
كان بيكلم كاميليا خطيبته وبيتفقوا علي الفرح
معتز : طب نخليه في شهر 6 طيب عشان يكون هشام ودعاء خلصوا امتحانات وفضيوا
كاميليا : وهو هشام ودعاء هيعملوا لينا إيه يعني يا معتز ... دا هو يوم واحد وبس
معتز : لا يا حببتي عندنا بنعمل أكل يوم الفرح ودوشه كبيره اوي
كاميليا : يوووووه ما قولتلك سيبك بقا من التقاليد عندكم دي يا معتز أحنا هنعمل فرحنا في فندق سيفين ستار وبعدين هيبقي فيه بوفيه مفتوح
معتز : احمم آه بس آمنه يعني...
كاميليا : قطعت كلامه وقالت يووووووه آمنه آمنه آمنه جرالك إيه يا معتز دا فرحنا أحنا مش فرح آمنه .. أحنا نعمل فيه اللي احنا عايزينه واحنا بس اللي نحدده بانهي شكل يعجبنا مش هنمشي ورا كلام اي حد
معتز : يا حببتي آمنه بتحبني وعايزه تعملي حاجه تشرفني
كاميليا : بدلع وانا يعني اللي هعمل حاجه تقلل منك اخص عليك يا زوز
معتز : قلب زوز من جوه .. فين الدلع دا بس من بدري
كاميليا : موجود يا حبيبي وهتشوف كل دا بعد ما نتجوز
معتز : اشطااااا ياحلاوتك يا معتز
كاميليا : قولي يا زوز هنقضي الهاني مون فين
معتز : براحتك يا حببتي حابه تروحي فين
كاميليا : أنا بقول نروح المالديف
معتز : هااا .. لا يا كوكي مالديف إيه بس أنا أقصد براحتك آه بس في مصر منخرجش بره
كاميليا : نعممم ليه إن شاء الله في مصر .. اظن هتقولي آمنه
معتز : لا والله مش آمنه أنا بس اللي الفلوس هتكون مقصره معايا شويه فبقول خلينا دلوقتي جوه مصره وأجازه تانيه نبقي نروح واوعدك اننا نروح
كاميليا : اممم ماشي مدام قولت أوعدك.. انا عارفه زوز حبيبي هيوفي بوعده معايا
معتز : قلب زوز بقا .. المهم بباكي شاف الشقه
كاميليا : ايوا في شقه هنا في عمارتنا جاهزه فرصه كويسه اوي
معتز : خلاص مدام انتي مرتحالها يبقي علي البركه.... انا هنزل افطر بقا لإني جعت أوي
كاميليا : اوكي يا حبيبي
وقفل معاها معتز ونزل لآمنه
____________________________________
عند آمنه
نزل معتز وقال : صباح الفل يا امونه
آمنه : صباح الخير يا معتز شوفت سيبتك النهارده اهو مصحتكش
معتز : يسلم القمر وشمشم وقال إيه دا محشي صح
آمنه : آه طبخالكم محشي ومكرونه بشاميل
معتز : آه يا بطني لا أنا مش هفطر أنا هستني الوليمه الحلوه دي
آمنه : هههههههه وليمه .. ليه يعني حرماك من المحشي والمكرونه اوي
معتز : لا طبعا بس انتي عارفه بقا انا بحبهم اوي ولو اكلتهم كل يوم مش هزهق منهم
آمنه : اممم ويا تري بقا الست كوكي بتعرف تطبخ
معتز : إيه آه آه طبعا بس علي خفيف كدا
آمنه : طب قولتلها أننا عزماها يوم أجازتك الجاي
معتز : لا والله نسيت هكلمها تاني واقولها
في الوقت دا تليفون معتز رن وكان مراد عزام
معتز : سيادة المقدم بيكلمني بنفسه خير يا بوص
مراد : ضحك وقال أصلك واحشني
معتز : لا قديمه هات غيرها
مراد : اممم طب بص يا سيدي انا كان عندي كمين هنا جنبكم ومطبق من امبارح وجعان فقولت آجي أكل عندكم لو مفيهاش غتاته
معتز : بس كدا .. دا انت حماتك بتحبك والله عندنا وليمه بس إيه مقولكش أمونه عملالنا محشي ومكرونه
مراد : لا لا محشي إيه .. انا عايز قشطه فلاحي وجبنه
معتز : إيه الفقر دا بقا اقولك مكرونه تقولي جبنه وقشطه
مراد : هقول إيه والله ما بتفهم .. انت عشان متعود علي الحاجات دي فبنسبالك عادي انما هتيجي لواحد زيي مش بيشوفها الا فين وفين فدي بقا بالنسبالي الوليمه اللي بجد
معتز : يا عم ماشي تعالي انت وهخلي أمونه تجهزلك أحلي طبق قشطه
مراد : أنا قربت عليك أهو يلا سلام
معتز : سلام وقفل معاه وبص لآمنه وقال معلش يا امونه واحد صاحبي جايلي دلوقتي عايز ياكل جبنه وقشطه
آمنه : بابتسامه من عيوني حاضر .. هو منين دا
معتز : من القاهره .. مراد دا يبقي أبن خال كوكي
آمنه : بإبتسامه صفرا يا أهلا بريحة الحبايب .. متجوز ولا لأ الجدع دا
معتز : آه كاتب كتابه وفرحه قريب
آمنه : ماشي ابقي خده لاوضتك انت وهشام وانا هجهز الاكل وأجيبهلكم لفوق
معتز : متحرمش منك يا احلي أمونه
في الوقت دا سمعوا صوت حد بيناي علي معتز
معتز : دا مراد اكيد انا هطلع معاه بقا ومتتأخريش
آمنه : ماشي
خرج معتز وسلم علي مراد ورحب بيه واخده وطلعوا للدور الثالث
وقف مراد يتفرج علي الارض اللي كانت واضحه جدا من السطح
مراد : الله يا معتز يا بختكم بمنظر الارض دا
معتز : يا بختنا إيه مهو الارض بتجيب الناموس
مراد : شوف يا اخي البنآدم مننا الشيطان بيغويه فعلا .. يعني بدال ما تحمد ربنا علي النعمه دي بتتأفف بسبب الناموس .. ماترشه عادي
معتز : طب أدخل تعالي معايا
مراد : أنا عايز ادخل الحمام بس اغسل وشي واصحصح كدا
معتز : عندك اهو
مراد : بس ليه الدور دا مفيهوش الا اوضتين بس وحمام
معتز : دا خاص بيا انا وهشام بنام فيهم .. عشان بعد ما أمونه جت هنا بعد ما عبدالرحمن استشهد وعاشت معانا مكنش ينفع نقعد تحت معاها فبنينا الاوضتين دول والحمام عشان هيه تاخد راحتها وأحنا ناخد راحتنا بس الاكل والقعده تحت معاها
مراد : ربنا يخليكم لبعض
____________________________________
في بيت صابر
كانت فتون وبدور بينضفوا وبيطبخوا
وكانت بدور بتكنس السلم .. جت من وراها نورا صرخت في ودنها وقالت توووووووت
بدور : عاااااااااا
نورا : اتخضيت يا حاج كاامل
بدور : هتبطلي عبط امته بقا
نورا : بصت في ساعتها وقالت امم ممكن بعد ساعه كدا .. هنهزر
بدور : لا العفو ...
نورا : البت تونه فين
بدور : فوق ياختي بتطبخ
نورا : طب هطلعلها بقا عيزاها
بدور : متخضيهاش يا نورا
نورا : اخضها !! وانتي تعرفي عني كدا
بدور : لاااااا حاشا لله
طلعت نورا لفتون ودخلتلها المطبخ وقالت بصوت عالي حررررررريقه
فتون : اتخضت وصوتت وطلعت تجري
نورا : هههههههههههه آه يا عيله هبله
فتون : اصمالله علي العقل اللي بيخر منك .... هاا جايه ليه
نورا : جابه ليه !! ايه المقابله دي .. والله أمشي
فتون : ما تمشي
نورا : آه همشي طبعا .. كله الا الكرامه وأنا عندي كرامه
فتون : طب اقفلي الباب وراكي
نورا : لا أنا هقفل الباب فعلا بس عشان محدش يسمعني وخصوصا اختك السوسه
في الوقت دا دخلت بدور وقالت : انا سوسه يا نورا
نورا : تعالي شوفي أختك اللي بتشتم في حقك وتقول اقفلي الباب عشان السوسه متسمعناش
فتون : أنا !!
نورا : اومال أنا .. عموما أنا مبحبش الفتنه . دي الفتنه اشد من القتل وهمشي عشان مفتنش اكتر من كدا وسابتهم ومشيت
بدور : ربنا ما يحرمك من الجنان يا نورا
____________________________________
في الجامعه عند امل
راحت وكان معاها نهي اختها عشان تشوف الجدول لكن لقت زحمه كتير علي الجدول
نهي : هااار اسوح انتي هتدخلي وسط الناس دي ازاي يا أبله أمل
أمل : مش عارفه والله نستني شويه كدا يمكن يخف
نهي : طب مفيش حد يجبهولك
أمل : لأ معرفش حد هن.... وقطعت كلامها لما شافت نادر خارج من المبني الرئيسي ندهت عليه وقالت دكتو نادر
نادر : ابتسم وراح عندهم وقال ازيك يا آنسه أمل
أمل : الحمد لله تمام.. معلش لو هتعبك معايا بس ممكن تجيبلي جدول الامتحانات اصل الزحمه يعني...
نادر : طبعا طبعا لحظه واحده هجبهولك من الشؤون
أمل : شكرا لحضرتك
نادر : العفو ثواني بس وسابهم ومشي
نهي : مين دا يا أبله أمل
أمل : دا دكتور نادر أبن عم جوز صاحبتي
نهي : بس بس ياريتني ما سالتك اصلا ايه اللفه الطويله دي
أمل : ههههههه طب اسكتي يا لمضه
في الوقت دا رجع نادر وقال : اتفضلي يا ستي نقلتهولك كله هنا
أمل : متشكره اوي يا دكتور
نادر : العفو علي إيه بس وبص لنهي وقال أهلا وسهلا مين الاموره
أمل : دي نهي اختي الصغيره
نادر : اهلا يا آنسه نهي
نهي : أهلا يا ابن عم جوز صاحبتها
نادر : ههههههههه وليه اللفه دي
نهي : والله قولتلها كدا
أمل : طب بعد اذنك يا دكتور ومتشكره اوي لمساعدتك
نادر : العفو علي إيه
مشيت أمل ونهي وكان نادر بيبص عليهم ومبتسم وبعد ما اختفوا مشي هو كمان
شريف : كان واقف مراقب امل وشافها وهيه بتضحك مع نادر ضحك بسخريه وقال: زهقت من غيرتي قال .. أتاريها شافت حد جديد مالي عينها .. بس ماشي يا أمل مبقاش انا لو مفضحتك قدام اخوكي اللي مفكرك الخضره الشريفه
____________________________________
في بيت موسي الشهيدي
كانت آمنه بتجهز الاكل لمراد وجه عليها سيف وعبدالرحمن وقالو : السلام عليكم يا ماما
آمنه : وعليكم السلام يا حبايب ماما حمدالله علي السلامه
سيف : الله يسلمك
عبدالرحمن : بصي بقا ياست ماما انا هرجع بعد كدا لوحدي مش هرجع مع سيف
آمنه : ليه يا بودي عملت فيه إيه يا سيف
سيف : ولا حاجه والله يا ماما احنا اللي كل ما نمشي ويلاقي عيال بتلعب بالكوره في الشارع يروح يلعب معاها فكنت بشده
آمنه : بصت لعبدالرحمن وقالت دا حصل يا بودي
عبد الرحمن : آه أنا مكذبتش اهو متزعقيش
آمنه : ضحكت وقالت بعد كدا اسمع كلام اخوك الكبير يلا غيرو هدومكم وانت يا سيف اطلع الاول لبابا معتز وقوله ماما هتطلع بالاكل
سيف : حاضر
جهزت آمنه الصنيه وسخنت العيش البلدي وطلعت
طلع سيف قبلها وخبط علي الباب وفتحله معتز
معتز : أيوا يا سيفو
سيف : ماما بتقولك هتطلع بالاكل دلوقتي يا بابا
معتز : ماشي يا حبيبي
مراد : من جوه بابا !! انت خلفت ياض من ورايا
معتز : ادخل يا سيفو اتعرف علي عمو مراد
دخل سيف وسلم علي مراد وقال : اهلا بحضرتك يا عمو
مراد : ما شاء الله ايه الادب والاخلاق دي اكيد متقربش لمعتز اصلا
معتز : ضحك وقال لا والله ابن اخويا
مراد : بص لسيف وقال اسمك ايه
سيف : اسمي سيف عبدالرحمن موسي الشهيدي
مراد : ربنا يحميك يا حبيبي .. طب اقعد كل معايا
سيف : لا يا عمو معلش انا لسه جاي من المدرسه وعايز اغير هدومي واصلي الاول عن اذنك
مراد : ماشاء الله ربنا يحميك وبص لمعتز وقال عسل
معتز : طب ادخل غسل علي ما الاكل يطلع
قام مراد دخل الحمام يغسل ايده وطلعت آمنه بالصنيه وحطتها علي السرير
معتز : إيه كل دا يا امونه دا الراجل عاوز جبنه وقشطه بس تقومي تعمليله بيض بالزبده وفول بالزبده وجبنه قديمه إيه كل دا ولبن كمان
آمنه : الله انت هتبص للراجل في اللقمه يا معتز بالف هنا كله من البيت وخيركم
معتز : تسلم ايدك يا أمونه
في الوقت دا خرج مراد وهو بينشف وشه والفوطه علي وشه وشالها واتفاجئ بآمنه وقف وتنح قدامها
آمنه : عقدت حواجبها وقالت ماله دا كمان
معتز : احمم مرااااااد
مراد : انتبه لنفسه وقال ا.ا.ايوا يا معتز
معتز : مالك بلمت ليه كدا
مراد : احمم لا ابدا مفيش وبص لآمنه تاني
معتز : دي أمونه اللي حكيتلك عنها
مراد : احلف
آمنه : جزت علي اسنانها وقالت نورت يا استاذ مراد بعد اذنكم وسابتهم ومشيت
معتز : خبطه في كتفه وقال ما تصحصح بقا كويس أنها مش رزعتك قلمين يفوقوك
مراد : مش قصدي ابص والله .. بس أنا أستغربت بس أنت حكيتلي عن واحده بتحلب الجاموسه وبتربي الطير وبتروح اوقات الارض لو فيه شغل فيها .. انا قولت هلاقي واحده قدامي مهمله في نفسها .. بس لقيت قدامي قمر ما شاء الله
معتز : بغيظ ما تتلم بقا
مراد : بص للصنيه وقال يا جمال الفلاحي علي اصوله إيه الحلاوه دي بس
معتز : بالهنا يا عم
مراد : الاكل زي العسل يا معتز وقال لنفسه عسل زي اللي مجهزاه والله
____________________________________
نزلت آمنه لتحت وهيه بتضحك علي منظر مراد وهو متنح قدامها
وبدأت تجهزله شوية حاجات ياخدهم معاه
نزل عليها حازم ودعاء وكانوا بيضحكوا ودخلولها المطبخ
حازم : صباح الخير يا أمونه
آمنه : قول مساء الخير بقا يا كابتن
حازم : حك شعره بإحراج وقال أحمم معلش راحت عليا نومه
آمنه : ولا يهمك يا خويا
دعاء : أنتي رايحه زياره لحد ولا إيه
آمنه : لا أبدا صاحب معتز فوق معاه وطلب ياكل لقمه بقشطه وجبنه فبجهزله برطمان ياخده معاه وازازة لبن وحتة زبده
حازم : مين دا اللي مع معتز
آمنه : اسمه مراد وكملت كلامها بسخريه وقالت يبقي ابن خال كوكي
حازم : هههههههههه يبقي مراد عزام ... بس اطمني مراد دا طينه غير كاميليا نهائي
آمنه : وأنا مالي بيه أصلا آهو ضيف والسلام ياخد واجبه ويتكل
حازم : طب أنا هطلع أسلم عليه وسابهم ومشي
دعاء : مالك يا أمونه عاقده حواجبك كدا
آمنه : ضحكت وقالت مفيش يا حببتي
دعاء : فين تالا صحيح
آمنه : نايمه جوا جنب أمك .... يلا جهزي الطبليه عشان نتغدا
دعاء : طب والأولاد مش هنستناهم
آمنه : هينزلوا دلوقتي عشان اللي معاهم دا مش هيطول وهيمشي
عند معتز ومراد
طلع حازم ليهم وسلم علي مراد وقعد معاهم
حازم : كمل اكلك يا مراد أنا جيت قومتك
معتز : هيكمل إيه يا عم بس دا لحس الاطباق
مراد : ههههههه والله انا كنت جعان جدا جدا فوق ما تتخيل واكلت وشبعت تسلم يا ابو تالا ربنا يزيدكم
حازم : بالف هنا عقبال ما ناكل في فرحك
مراد : ربنا يسهل ... أنا هقوم بقا عشان يدوب ارجع لاخواتي لاني سايبهم لوحدهم من امبارح
حازم : نورتنا يا مراد وابقي اعملها مره تانيه البيت بيتك
مراد : إن شاء الله
ونزل مراد وحازم ومعتز ولسه هيخرجوا وقفهم صوت آمنه وهيه بتنادي وبتقول : استاذ مراد
مراد : غمض عيونه وقال لنفسه يا طعامة أسمي منك إيه الرقه دي وبصلها وقال بابتسامه نعم
آمنه : مدت أيدها بشنطه وقالت أتفضل دي هديه بسيطه لجماعتك في البيت
مراد : لا مش هينفع انا أكلت وخلاص كدا كتير
آمنه : ولا كتير ولا حاجه كله من خير الاولاد
مراد : اخد الشنطه منها وابتسم وقال شكرا يا أم سيف ربنا يزيدكم
آمنه : نورتنا وسابتهم ودخلت
معتز : أي خدمه كلت واخدت واجبك كمان
مراد : لا أنا هاجي عندكم كل يوم
حازم : تنورنا والله
مراد : تسلم يا حازم يلا اشوفكم على خير وسلم عليهم ومشي
____________________________________
في بقالة صابر
كان واقف في البقاله وجه عليه عصام اللي كان متقدم لفتون بنته
عصام : السلام عليكم يا عم صابر
صابر : وعليكم السلام يابني اتفضل يا عصام
عصام : لا تشكر .. انا بس كنت جاي اشوف رأي حضرتك إيه عشان نيجي أنا والوالد
صابر : كل شئ قسمه ونصيب يابني .. وانا بنتي مش مكتوبالك
عصام : ليه ياعم صابر انت سمعت عني حاجه وحشه لاقدر الله
صابر : لا يا بني بس البت مش موافقه
عصام : انت كداب ياعم صابر .. انا وصلني أنكم فرحانين وكنتو موافقين عليا
صابر : اولا عيب اوي أنك تقول لحد كبير في وشه انت كداب كدا
ثانيا آه كنا موافقين عليك بس سمعنا عنك حاجه خلتنا نتراجع في قرارنا
عصام : وحاجة إيه دي بقا
صابر : اتنهد وقال سمعت أنك بتشرب
عصام : وإيه يعني لما اشرب هاتلي راجل في بلدنا هنا مابيشربش ... وبعدين انا بشربه عشان المزاج مش مدمن يعني
صابر : وأنا معنديش أستعداد ارمي بناتي لأي حد يا عصام ... انا مليش غيرهم في الدنيا بعد امهم مش هروح أرميهم انا ... وبعدين انت بتقول بتشرب مزاج .. افرض اتعودت عليه لحد مابقي ادمان بنتي تعمل إيه
عصام : ياعم صابر متكبرش الحكايه كدا ووافق وتمم الجواز انا شاري بنتك
صابر : وانا مش هبيع بنتي يا عصام واللي عندي قولته
عصام : طب اسمع اللي عندي بقا .. بنتك ليا مش لحد تاني حتي لو اضطريت اخطفها واتجوزها والله لاخطفها
صابر : بعصبيه إياك تفكر بس وانا هكون دابحك ومعلق راسك علي اول الشارع عشان تبقي عبره لكل واحد فكر في شر لبناتي
عصام : ضحك وقال يبقي نسيب الايام بينا هيه اللي تورينا اللي هيحصل سلاام وسابه ومشي
صابر : روح ربنا ما يكسب اللي قالك علينا بس هنقول إيه هو هيجي من وراك حاجه عدله ورفع ايده للسما وقال يارب أحمي بنتي واحفظها من كل شر يارب
____________________________________
في بيت مراد عزام
وصل مراد وكان علي وشه ابتسامه مش عاديه دخل البيت ونده علي امل ونهي
خرجو امل ونهي وحضنوه
مراد : حضنهم وقال عارف انتو منمتوش امباارح اكيد
أمل : بصراحه لأ مقدرناش ننام خالص
مراد : طب يلا تعالو كلو لقمه فلاحي اصلي وندخل كلنا ننام ونخرج باليل نتفسح
نهي : بفرحه هييييييييه
أمل : بجد يا مراد
مراد : أيوا يا حببتي يس يلا كلو واللي يفيض دخلوه التلاجه
أمل : الله قشطه وجبنه وجبنه قديمه ولبن وزبده كمان ... منين دا يا مراد
مراد : دا يا ستي من عند معتز خطيب كاميليا
أمل : آه صح أنا نسيت أنهم أرياف وعندهم الحاجات دي ... شوفت أمونه
نهي : مين امونه دي يا ابله امل
مراد : أبتسم وقال آمنه ،،،،،،،