كانو كلهم متجمعين في وقت السحور ومنتظرين معتز وهشام
آمنه : الاولاد اتاخروا ليه كدا
نهي : انا رنيت علي هشام وكنسل عليا جاي
في الوقت دا دخل هشام عليهم وقال : انا جيت
اتكلم مراد بسخريه وقال : ومعتز فين
هشام : انا صحيته بس شكله نام تاني
آمنه : روحي صحيه يا رحمه
شاورت رحمه علي نفسها بصدمه وقالت : أنا
مراد : لا استني أنا هروح اصحيه بدالك
آمنه :جرا إيه يا مراد ... هو معتز حد غريب ، دا جوزها
اتنهد مراد وقال : ماشي
بس بسرعه
وقفت رحمه وراحت لمعتز تصحيه
بس فجأه رجعت وهيه بتجري وبتتنفس بسرعه
وقف مراد بلهفه وقال : فيه إيه يا رحمه
اتكلمي عمل فيكي ايه
رحمه : م.م.محصلش حاجة والله يا مراد
د.د.دا بس يعني
مراد : بس ايه .. قولي متخافيش
رحمه : أبدا اتكسفت منه لانه نايم من غير تيشرت
ابتسم مراد بهدوء وطبطب عليها وقال : طب ادخلي انتي وانا هروح اصحيه
دخل مراد لمعتز البيت وراح لاوضته ونده عليه
مراد : أصحي يا قتيل انت
معتز باستغراب : مراد !! خير فيه ايه
مراد : قوم عشان تتسحر معانا يلا
قام معتز وقعد علي السرير وقال : انت اللي جاي تصحيني بنفسك .. دا ايه الشرف العظيم دا
مراد : والله مجتش بمزاجي
ثم انت لو نايم بلبسك كان زمانك فتحت عيونك عليها هيه مش عليا انا
معتز : علي مين ... تقصد مين
مراد بلؤم : رحمه
معتز بفرحه : رحمه .... رحمه جت تصحيني
مراد وقف وقال: ايوا بس لقيتك بمنظرك دا فاتكسفت وجريت
معتز بلؤم : وتتكسف ليه يعني .. انا جوزها
مراد : واضح انك لسه مصدق نفسك وعندك أمل انها تكون مراتك
معتز بحزن : ليه يا مراد لسه خايف عليها مني
مراد : لأ مش خايف عليها ، لانك متقدرش تلمسها او تاذيها اصلا طول منا في ضهرها
بس زي ما قولتلك في الاول جوازكم كان واضح لغرض حمايتها وبس
فمتخليش دماغك تروح لمكان تاني ، او تتخيل انها هتبقي مراتك في يوم
معتز : مراد أنا صابر كدا بقالي اكثر من 10 شهور
وانت واخدها عندك وعايشه معاك ومش بشوفها الا بالصدفه ، ليه كل دا
انا بوعدك خليها تعيش معايا ومش هتندم صدقني يا مراد انا بحبها
مراد : متضحكش علي نفسك يا معتز
انت اللي زيك مبيعرفش يحب او يتحب ... انت صعبان عليك انها ازاي تكون مراتك ومتعش معاها زي اي زوج وزوجه
معتز بصدمه : انت شايفني حقير للدرجادي
مراد : للاسف انت اللي خليتني آخد الصوره دي عنك
يلا بسرعه البس هدومك وتعالي عشان تتسحر ولسه هيمشي
معتز : طب ما تسيبها هيه تختار يا مراد .... ولا خايف تختارني وتبيعك
ضحك مرات بصوت عالي وقال : ضحكتني والله
انت فاكر انك لو قولت لرحمه يا انا يا مراد هتقولك لا لا متسبينيش يا معتز ارجوك
فوق لنفسك يا معتز واعرف حجمك كويس .. انت بالنسبه لرحمه وسيله لحمايتها وبس وسيبك بقا من قصة حبيتها والكلام دا
معتز : طب اعمل ايه عشان تصدقني اني بحبها بجد
مراد : تؤ .. مش هقولك علي حاجه معينه تعملها انا هسيبها للايام لما تثبتلي انك حبيتها
ابتسم معتز بثقه وقال : هتثبتلك ان شاء الله
مراد : قول يارب ... يلا عشان منتاخرش علي السحور
____________________________________
اتجمع الكل علي السحور وعملت رحمه الشاي وقعدوا يشربوه مع بعض
ابتسم معتز وقال : تسلم ايدك يا رحمه
رحمه بتوتر : بالهنا
معتز : ممكن نتكلم شويه في البلكونه
مراد وقف بغضب وقال : أنت هتستهبل ولا إيه يا معتز
مش معني اني قولتلك سيبيها للايام تثبتلي تتدحلبلها بالطريقه دي
آمنه : فيه إيه يا مراد متسيبهم براحتهم
مراد : محدش يتدخل لو سمحتو انا حر ... دي اختي ومن حقي اخاف عليها
وقفت آمنه بغضب وقالت : ودا جوزها ومن حقه يتكلم معاها في المكان اللي يعجبهم
وبعدين دول هيطلعوا البلكونه مش خارجين
مراد بغضب : أنتي بتعانديني يا آمنه عشانه
آمنه : لا مش عشانه ... عشانك انت
عشان مش عايزه اشوف شخصية مراد الاناني وانت عارف اخرة الانانيه وحشه اوي
عايزه دايما اشوف حنية مراد اللي سابقه تفكيره بعقله
مراد بعصبيه : عيزاني اكون طيب مع دا ... وشاور علي معتز
معتز صعبت عليه نفسه وسابهم وخرج
آمنه : عاجبك كدا .. اهو زعل
مراد : يزعل مش مشكله ...لازم يعرف أن اي غلطه عملها زمان هتفضل تطارده العمر كله
آمنه : مشبعتش عقاب فيهم
راح مراد عند آمنه ووقف قصادها وقال : مشبعتش ومش هشبع يا امونه
لاني حلفت لاندمهم علي كل دمعة وجع نزلت من عيونك بسببهم
واتنهد وقال : ودي البدايه
____________________________________
في بيت سامح
فتون : أصحي يا سامح يلا عشان تتسحر
سامح بنوم : كل يوم تصحيني يا تونه وكل يوم اقولك انا مليش في السحور اصلا
ياحببتي سيبيني انام بقا
فتون : لازم تاكل حاجه تسندك يا سامح ... يلا بقا متوجعش قلبي
سامح بزهق : حااااضر
قعدوا علي السفره مع بعض يتسحروا وكانت فتون عايزه تفاتحه في موضوعهم
سامح حس انها عايزه تتكلم بصلها وقال : قولي يا حببتي اللي عندك علطول بلاش لف ودوران
فتون : احمم ... ب.ب.بص انا شوفت صفحة دكتوره علي النت كدا ولقيت عندها حالات كتير جدا ماشاء الله خفوا واتعالجو
سامح مسح وشه بزهق وقال : انتي زهقتي مني ولا ايه يا فتون
يا حببتي قولتلك انا راضي بقضاء ربنا ومش زعلان بس إنتي لو مش راضيه دي حاجه تانيه ترجعلك
فتون : يا سامح يا حبيبي لا انت اول ولا آخر راجل يكون عنده مشاكل في الخلفه وان شاء الله مشكلتك ليها علاج أكيد
سامح بزهق : يووووووه مش كل يوم تنكدي عليا بسبب الحكايه دي يا فتون بقا
يا ستي انا راضي بقضاؤه وحكمه عليا ما ترضي بقضاء ربنا
فتون بعصبيه : عايزني اقبل بكل سهوله كدا اني اتحرم من الامومه يا سامح ، ليه بتعذبني كدا ... ليه راضي ليا بالعذاب وانت في أيدك الحل يا اخي
سامح : أنهي حل من وجهة نظرك
فتون : ما تسأل وتستشير كذا دكتور
ليه موقف حياتنا عند كلام دكتور واحد
سامح بزهق : يوووووووه ما خلاص بقا يا فتون مش كل يوم تنكدي عليا .. انتي عايزه مني ايه بس
فتون بدموع : عيزاك تحس بيا يا اخي ...عيزاك تحس بوحدتي اللي عيشاها طول اليوم وانت في شغلك
وبتيجي اخر الليل بتاكل وبتاخد حقك مني وتنام
انت بتنام وبترتاح وانا مبنمش من كتر تفكيري في الحكايه دي
سامح بحزن : أنتي ليه دايما قاصده تحسسيني بعجزي يا فتون
فتون قربت منه بحب وملست بأيدها الاتنين علي خده واتكلمت بحنيه وقالت : لا عشت ولا كنت يوم ما تحس بالعجز بسبب كلامي
كل الحكايه ان نفسي عمرنا مايضعش واحنا ممكن يكون بأدينا حل
اوعدني يا سامح نروح لدكتور تاني ونستشيره يمكن يطمنا ويديلنا امل
سامح بسخريه : أمل سافرت مع نادر
فتون بغيظ : وليك نفس تهزر
حملها سامح بايده وغمزلها بمشاكسه وقال : أنتي لسه شوفتي هزار
فتون : طب اتسحر الاول طيب
سامح : طبعا هنتسحر الاول ......
____________________________________
في اوضة مراد وآمنه
آمنه : مراد ممكن اطلب منك طلب
مراد : لأ
آمنه بصتله بأستغراب وقالت إيه ... انت عارف هتطلب منك ايه
مراد بصلها بحب وقال : مبقاش مراد حبيبك ولا انتي أمونه حبيبة قلبي لو مفهمتش عيونك عايزه تقول ايه من غير كلام
آمنه : طب ممكن اعرف لأ ليه
مراد : عشان مينفعش معتز بعد اللي عمله في حياته ينال رحمه بكل سهوله
آمنه : بس انا حاسه ان رحمه بتحبه ... ليه تحرمها من الحب
مراد : حببتي انا مش قاسي صدقيني .. بس معتز لازم يعرف ان الدنيا مش هتمشي زي ما هو عايز
مش عشان انتي واخواته سامحتيه يبقي وقت ما يلاقي الاختيار الصح يناله بكل سهوله كدا ... لأ طبعا
في الوقت دا خبط الباب ودخلت منه رحمه
رحمه : مراد لو سمحت ممكن اكلم جمال اطمن عليه
آمنه باستغراب : انتي ممعكيش تليفون يا رحمه
رحمه : كان معايا بس لما هربت منهم سبت كل حاجه في بيت كدا الاستاذ معتز كان مقعدني فيه
آمنه بلؤم : أستاذ معتز !! هو مش معتز دا جوزك
رحمه اتكسفت وحطت وشها في الارض
مراد : أحمم اتفضلي تليفوني يا رحمه وسلميلي عليه
رحمه : يوصل ان شاء الله
واخدت التليفون وخرجت للبلكونه
آمنه بلؤم : هاتلها تليفون يا مراد عشان تكلم اخوها براحتها
ضحك مراد بخبث وقال : أخوها برضو ... يا امونه عيب عليكي تكذبي وعلي مين ... عليا أنا
آمنه بضحكة دلع : والله انت دايما ظالمني كدا يا مارو
مراد بص حواليه وقال : هيه يوكا فين
آمنه : مع هشام
مراد : طب حلو اوي الحق اقولك علي الكلام المهم اللي عايزه بقا .....
منعت آمنه مراد بأيدها وقالت : أنا حامل
مراد بفرحه : إيه !!!
____________________________________
عند هشام ونهي
كانوا بيلعبو مع يمني وفرحانين
نهي : جميله اوي يا هشام ... يارب اجيب بنوته زيها وفي خفة دمها
هشام : هاااااانت كلها السنادي بس واول ما هتخرج نتجوز ونجيب زيها
نهي بكسوف : هشام بس بقا
هشام : الله وانا قولت ايه بس طاااه ... منا محترم اهو
شالت نهي يمني علي كتفها وقالت : انا هروح اديها لابيه مراد عشان عايزه انام
هشام : طب اديها لمراد وتعالي عايزك
نهي : لأ أنا هدخل أقرأ شوية قرآن لحد الفجر وانام .. يلا تصبح على خير
____________________________________
عند رحمه
كانت خلصت كلام مع اخوها وواقفه في البلكونه تعيط
خرج قصادها معتز في بلكونته وقال : واقفه ليه كدا يا رحمه ... ايه دا انتي بتعيطي ليه
رحمه مسحت دموعها وقالت : مفيش بس كنت بكلم جمال وقالي اللي اسمه هاني دا قالب الدنيا عليا ،وبصراحه خايفه يعرف يوصلي
معتز : وحتي لو وصلك محدش يقدر يمس منك شعره واحده طول منا جنبك
رحمه اتكسفت وسكتت
وكمل معتز كلامه وقال : أنا مش هسمح لاي حد مهما كان ياخدك مني يا رحمه ... انا خلاص مقدرش اعيش من غيرك
رحمه أنا ب.........
في الوقت دا جه مراد من وراها وقال : واقفه ليه كدا يا رحمه
آااااااه انتي واقفه مع الاستاذ بتعملي ايه ، ينفع كدا تقفي معاه لوحدكم
معتز : أستاذ ايه يا مراد ولوحدنا ايه .... انا جوزها
مراد بتاكيد : علي ورق
جوزها علي ورق وبس ... ولحد ما مشكلتها تتحل وتوصل لاخوها بالسلامه هتفضل جوزها علي ورق وبس يا معتز
معتز بعصبيه : انت ايه يا اخي ... انت ليه مش حاسس بيا
مراد بصوت عالي : ادخلي جوه يا رحمه .. واياكي أشوفك واقفه معاه لوحدكم مره تانيه ... فاااااهمه
لسه رحمه هتمشي وقفها معتز وقال : استني يا رحمه
انا بس اللي جوزك وكلمتي انا بس اللي تمشي عليكي
مراد ضحك بصوت عالي وسخريه : هههههههههه لا ضحكتني والله
وبص لرحمه بجمود وقال سمعتيني قولت ايه اتفضلي علي جوه
معتز : مراد بلاش اسلوبك دا معايا .... انا جوزها وهيه مراتك ايه دخلك مبينا ولا صفتك ايه تدخل ما بينا
مراد بثقه : أخوها .... صفتي اني اخوها
وانت عمرك ما هتكون جوزها يا معتز .... لان رحمه انضف من انها ترتبط بواحد زيك
واخد رحمه ودخلو لجوه
مراد بعصبيه : انا عايز اعرف حكايتك ايه بالظبط ... انتي نسيتي ان جوازكم عشان يحميكي وبس
بتقفي معاه ليه ولا بتتكلمي معاه ليه اصلا
رحمه : و.و.والله انا كنت بكلم جمال وهو طلع بعد ما خلصت الكلام وسالني واقفه وبعيط ليه
مراد : وتسمحيله ليه اصلا انه يكلمك
خرجت آمنه من اوضتها وقالت : جرا ايه يا مراد وفيها ايه بس يا اخي زهقنا بقالنا سنه نقولك جوزها جوزها جوزهااااا
مراد : جوزها علي ورق يا امونه ولحد لما ترجع لاخوها هيفضل جوازهم علي ورق وبس
وبص لرحمه وقال : ولا الهانم ليها رأي تاني وانا معرفش
رحمه بحزن : لأ مليش رأي تاني ولا حاجه يا مراد ... انا آسفه ، وسابتهم ودخلت الاوضه
آمنه : حرام عليك يا مراد بجد .. اسلوبك مع معتز ورحمه دا هيزعلنا من بعض كتير
مراد بمشاكسه : طب ياريت يزعلنا كتير من بعض عشان اصالحك اكتر
آمنه : ههههههههه مفيش فايده فيك ... سافل سافل يعني
طب ومالو بس لما ابقي سافل مع مراتي ... مش افضل لما ابقي سافل مع حد تاني وانتي تخسري كنز سفالتي دي
المهم تعالي جوه بقا عشان اباركلك علي الحمل الجديد .....
____________________________________
في اليوم التالي
كان سامح ومراد في المديريه وحكي مراد لسامح كل اللي حصل
سامح : ههههههههه لا واضح انك هتظبطه يا بوص
اتنهد مراد وقال : أنا مش وحش والله يا سامح ... بس عم ناجي وقف جنبي كتير اوي وقبل ما يتوفي وصاني علي جمال ورحمه وخصوصا رحمه ... مش عايز اسلمها لمعتز بسهوله كدا لازم يتعب عشانها عشان يعرف قيمتها ويعرف الفرق اللي بينها وبين كاميليا
سامح : هيه رحمه متعرفش انه كان متجوز
مراد هز راسه بمعني لأ وقال : بس هتعرف اكيد
المهم انت قولي مالك
اتنهد سامح بحزن وقال : فتون بتزن عليا اننا نروح لدكتور تاني
مراد : طب ما تريحها وتروحوا
سامح : مهو كدا ممكن يكشفلها اللي انا مخبيه
مراد : ولا هيكشف ولا حاجه انت روحله قبلها واتفق معاه
سامح : تفتكر هيوافق
مراد : هيوافق ان شاء الله....المهم هيه بتاخد ادويتها مظبوط
سامح : مش عايز اقولك بالثانيه
مراد : ان شاء الله خير .... الدكتور آخر مره قال التحاليل بتاعتها اتحسنت عن أول مره وفيه امل كبير
سامح : نفسي يا مراد اوي عشانها
مراد طبطب علي كتفه وقال : قول يارب يا سامح وهو هيحلها من عنده
سامح بأمل : يارب
____________________________________
عند هشام ومعاذ
كانوا متفقين يتقابلوا في كافيه وكان هشام منتظره
معاذ : صبااااحو يا زميلي
هشام : يا ابني بطل لغة الحشاشين دي هيتقبض علينا وربنا .... احنا ظباط ولينا هيبتنا
معاذ : اسكت بقا متفكرنيش بالكليه الله يخليك كفايه الخنقه اللي بشوفها فيها .... طمني عليك يا غالي اخبارك ايه
هشام سقف بايده وقال : لا حول ولا قوة الا بالله العلي العظيم
انا تركت العوض فيك والله
معاذ : فكك بقا انت وتعالي معايا لشقه كدا شوفتها وبفكر انقل فيها
هشام : لوحدك
معاذ : اه
هشام بإستغراب : ليه
معاذ : وجودي معاها في نفس المكان خطر
هشام : هههههههههه انت حالتك ميؤوس منها
معاذ : انا بشر يا جدع
هشام : وانا اللي ابن كلب يعني ... منا بشر انا كمان
معاذ : بس انا وحنين مع بعض من واحنا صغيرين وانا وهيه فتحنا عيونا علي بعض
هشام بسخريه : لا انا ونونه نختلف .... من اول ما شوفنا بعض واحنا خناق وتهزيق وحاجه آخر قلة قيمه الله وكيل
بس حبيتها برضو من اول نظره وعشقت كل تفاصيلها حتي المازوت اللي كانت بتحدفهولي كنت بعشقه
المهم يلا تعالي نلحق نروح مشوارنا عشان نرجع قبل المغرب
____________________________________
في بيت مراد عزام
كانوا متجمعين كلهم في الفطار مع بعض وبيتكلموا
مراد : جاهز يا هشام لآخر سنه ان شاء الله
هشام بحماس : جاهز جداااا
خلينا نخلص بقا عشان اتجوز وبص لنهي
مراد بحده : واضح أن الاستعجال دا شئ وراثي عندكم يا هشام
معتز كان بياكل ومهتمش لكلام حد
هشام : هو انا لو جبت تقدير كويس يا مراد ممكن اتوزع في المكان اللي انا حابه مش كدا
مراد : هو كدا كدا لازم اي ظابط يخدم 3 سنين في اي مكان في الصعيد
هشام : بس مش بعيده شويه الصعيد
مراد : لو اخدت ال 3 سنين في الاول وقدرت تثبت نفسك في الصعيد وتخرج بملف مشرف بعد كدا المكان اللي هتروحه هيبقي بدايه لحاجه اكبر
هشام بفرحه : تمام ان شاء الله هعمل حسابي علي الصعيد
نهي : بس أنا معنديش استعداد اني استقر في مكان معرفهوش يا هشام ولا اعرف فيه حد
الكل بص لنهي وسكت
مراد : الموضوع دا سابق لاوانه يا نهي
نهي : لا مش سابق ولا حاجه ... عشان هشام يعرف هيحدد مجري حياته ازاي
وبصت لهشام وقالت : أعمل حسابك انا مش هروح الصعيد معاك
معتز بأستفزاز : من الواضح يا مراد إن السيطره شئ وراثي عندكو
مراد خبط بايده جامد علي السفره وقال : تقصد ايه بكلامك دا هااا
آمنه : ايه بس وحدوا الله كدا .. اهدي يا مراد معتز ميقصدش حاجه اكيد
مراد بغضب : لسه بدافعي عنه بعد كل اللي حصل منه يا آمنه
رحمه بإستغراب لنفسها :يا تري حصل ايه منك يا معتز عشان مراد يفضل واقفلك كدا
آمنه : أنا بدافع عن الحق يا مراد والحق بقا اننا شيفاك مستقصد معتز
مراد : انا مش مستقصده أنا بعاقبه ... لازم يعرف ان اللي يخص مراد عزام بالذات خط أحمر
وانت يا معتز لازم تفهم كويس أوي ان جوازتك من رحمه مش زي جوازتك المره الاولي
رحمه بدموع : ج.ج.جوازته الاولي!!!!!
(الفصل الثاني)
في بيت مراد عزام
اتصدمت رحمه لما عرفت ان معتز كان متجوز قبل كدا
رحمه : ج.ج.جوازته الاولي !!!
وبصت لمعتز بدموع وقالت : انت كتت متجوز قبل كدا
معتز بحزن : للأسف أيوا .... بس طلقتها من زمان ومن قبل ما اتجوزك
دخلت رحمه لاوضتها وسابتهم وهيه بتعيط
معتز بص لمراد بحزن : يارب تكون مرتاح دلوقتي يا مراد .... وسابهم ومشي هو كمان
ودخلت آمنه لاوضتها وهيه زعلانه ودخل مراد وراها
واتبقي ع السفره هشام ونهي وسيف وعبدالرحمن
في اوضة مراد وآمنه
آمنه بعصبيه : ارتحت ... ارتحت يا مراد وفرقتهم عن بعض
من امته وانت اناني بالشكل دا هاااه ؟!!
من امته وانت بترد الاساءه بالاساءه يامراد ؟!!
ليه مش قادر تصدق ولا تستوعب انه بيحبها؟!!
ليه مش قادر تسيبهاله يتهني بيها
انت كدا خليت شكي بقا في محله منك من ناحية رحمه
مراد بهدوء عكس ما بداخله : شك ايه بقا ان شاء الله
آمنه بعصبيه : بتحبها
اتصدم مراد من كلمتها وضيق عيونه بتركيز وابتسم بسخريه وقال : بحبها!!
دا اللي هو ازاي يعني .... والحب اللي حبيتهولك والمرمطه اللي شوفتها عشان بس سيادتك تعبريني دي كانت ايه .. تمثيل
آمنه سكتت ومردتش عليه
مراد بعصبيه وصوت عالي : ما تردي
آمنه جسمها اتنفض من صوته العالي ومازالت ساكته
مراد : إيه اتخرستي دلوقتي
بس لما تيجي سيرة حد من اهل جوزك الله يرحمه تتحمقي أوي
من الواضح ان المرحوم كان ومازال عزيز علي قلبك اوي يا ست هانم
واي حد من حبايبه غالي وهيفضل غالي وعزيز
آمنه بصوت عالي : أنا مسمحلكش
مراد بصوت اعلي : وطي صوتك وانتي بتتكلمي معايا
من امته وانتي صوتك بيعلي عليا
آمنه : وهيعلي كل ما اشوف شخصية مراد الاناني قدامي
مراد بصلها بحزن وشاور علي نفسه بصدمه وقال: انتي شيفاني أناني يا آمنه
آمنه بأندفاع : أيوا ... ومبقتش شيفاك غير كدا
مراد بصلها بصه طويله اوي وقال : وانا مرضالكيش تعيشي مع واحد اناني زيي وبحلك من انك تكوني في عصمته
وسابها ومشي
____________________________________
عند هشام ونهي
كان الخلاف مستمر بينهم
هشام : يعني ايه اللي قولتيه قدامهم دا يا هانم
نهي بعند : اللي سمعته يابيه
صعيد ايه اللي عايز تروحلها دي هااه ... حد يسيب القاهر ويروح الصعيد
هشام : انتي بنفسك سمعتي مراد وهو بيقول لو انجزت اول 3 سنين ع خير بملف مشرف بدايه لحاجه أكبر
نهي : لا اكبر ولا اصغر ... انا ميفرقش معايا كل دا قد ما يفرق معايا اني اكون هنا وسط اهلي وناسي
هشام : انتي ليه مبتفكريش زي اختك
مهي امل سافرت مع جوزها وهيه حامل وولدت هناك لوحدها مع جوزها وعايشه سعيده ومرتاحه .. ليه مبتفكريش زيها
ان المكان اللي فيه جوزي انا هكون فيه ... ليه انانيه وعايزه كل حاجه جنبك
نهي : أنا مش انانيه يا هشام ... بس زي ما تقدر تنجز 3 سنين بملف مشرف في الصعيد ممكن تنجزهم هنا عادي
هشام : طب ما انا كدا كدا لازم هخدم في الصعيد ... ليه مأخدهمش في الاول واحنا مع بعض بنبدأ حياتنا من غير اطفال يتبهدلو معانا في السفر
انما انا لو اخدتهم بعدين ممكن يبقي معانا اولاد ويتعبوا من السفر رايح جاي
نهي بسخريه : هه ليه وانت فاكر أننا حتي لو معانا اطفال هسافر بيهم لبلد انا معرفهاش ... انت بتحلم شكلك كدا
لا يا حبيبي انا هقعد هنا معززه مكرمه وانت ابقي قضي خدمتك عادي وابقي تعالي في الاجازات ....عادي
هشام باستغراب : عيزاني اجيلك اسبوع كل شهر يا نهي
نهي بلامبالاه : عادي اللي هيمشي عليك هيمشي عليا
هشام : وبسهوله هتبعدي عني
نهي لفت ضهرها وقالت : المهم اني مبعدش عن ابيه مراد
هشام بجمود : يبقي خليكي جنبه العمر كله
وسابها ومشي
____________________________________
في عيادة دكتورة نسا
الممرضه لسامح وفتون : اتفضلوا ... دوركم
دخل سامح وفتون وشرحت فتون للدكتوره حالت سامح مع التحاليل والاشعات اللي قدامها
الدكتوره بصت لسامح وسكتت
الدكتوره لفتون : طب اتفضلي مع الممرضه عشان تعملك شوية تحاليل بسيطه
قامت فتون وسابتهم عشان تعمل التحاليل
الدكتوره ابتسمت وبصت لسامح : هو فيه لسه راجل بيخاف علي مشاعر مراته كدا
سامح بابتسامه : فتون مش مجرد مراتي يا دكتوره ... فتون كل عيلتي اصلا
ازاي بس عيزاني اجرحها بكل سهوله كدا واقولها العيب منك انتي مش مني
انا ميهمنيش الاطفال قد ما يهمني ان محسش بإنكسارها قدامي او تحس مني بنظرة عطف
ثم إن الدكتور قالي اخر مره انها اتحسنت بنسبة 65% ووصاني ان اهم حاجه الحاله النفسيه
بس هيه طلبت مني نيجي لحضرتك لانها متبعاكي علي الفيسبوك وعندها أمل اتعالج علي أيدك
الدكتوره بامتنان : استاذ سامح انا بجد بحيي رجولتك واتمني لو كل واحد عمل زي حضرتك كدا
سامح : انا بس طالب من حضرتك تنفذي اتفاقنا قدامها
وهتقولي اننا برضو العيب مني بس طمنيها ان فيه امل كبير واهم حاجه الراحه النفسيه ليا وليها
الدكتوره بإبتسامه : حاضر
____________________________________
في بيت صابر
وصل معتز وكان محتاج لحضنه يترمي فيه ويعيط بس لقاه في المسجد
غير هدومه بسرعه وراح عنده لقاه قاعد في ركن لوحده وبيقرأ قرآن
معتز بتنهيده : عم صابر
صابر بصله بفرحه وحضنه ومعتز كمان حضنه اووي وفضل يعيط في حضنه زي العيل الصغير
صابر : اهدي يا ابني ... اهدي واستغفر ربك
معتز : أنا مخنوق اوي ياعم صابر مش عارف بس ليه الدنيا معنداني اوي كدا
صابر : "وأصبر لحكم ربك فأنك بأعيننا "
اصبر علي كل شئ من ربنا سواء خير او شر ... مينفعش نقول ليه يارب ، مينفعش نسأل ربنا انت بتعمل كدا ليه
لو قريت سورة الكهف هتعرف معني كلامي كويس ، وهتعرف ان ربنا ما بيعملش حاجه وحشه ابدا إن ليه حكمه في كدا انت هتعرفها بعدين
بس قولي الاول اخبار رحمه ايه
اتنهد معتز بحزن وحكاله عن كل اللي حصل ، بس الغريب انه لقي صابر بيضحك
معتز بإستغراب : بتضحك علي إيه
صابر : أنا مستغربك اوي يا معتز يابني ... انت عايز مراد بين لحظه والتانيه كدا يسلمك اخته لمجرد انك تقوله انك بتحبها واتغيرت عشانها
معتز : مراد مصعبها عليا اوي ياعم صابر بقالي تقريبا سنه عايش معاهم ولا سابها في مره تخرج معايا .. او مره نقعد مع بعض لوحدنا خااالص
مش مديني اي فرصه اقرب منها أخليها تحبني
صابر :انت مش محتاج تقرب منها عشان تحبك ... لانها واضح جدا انها بتحبك اصلا
معتز بفرحه : عرفت ازاي
صابر بتريقه : بالعقل كدا واحده زعلت انك كنت متجوز قبل كدا هتكون ايه صعبان عليها انك مطلق
معتز : هههههههه كلام وتحليل منطقي
صابر : عيب عليك خد مني انا انا راجل كبير وعجوز آه لكن بفهمها وهيه طايره
معتز : يسمع منك ربنا ياعم صابر
____________________________________
رجع مراد لبيته بعد وقت طويل
دخل وقعد بره علي الكنبه ... اتنهد ومسح وشه وقعد يفكر في كلامه هو وآمنه مع بعض
سيف : بابا مراد ممكن اتكلم معاك شويه
مراد بابتسامه : تعالي يا حبيبي ... خير عايز تقول ايه
اتنهد سيف وقال : ماما اغمي عليها بعد ما حضرتك نزلت
مراد وقف بلهفه : إيه .. طب انا هدخلها حالا
سيف وقفه : استني بس يا بابا
ماما مش بيغمي عليها الا لما بتزعل وانا سمعتكم وانتو بتتخانقوا
ه.ه.هو حضرتك كنتو بتتخانقوا ليه
مراد : دي حاجات كبار يا سيف ولما تكبر اوعدك هفهمك ...يلا هسيبك وهدخل لماما اطمن عليها
بس وقفه صوت سيف وهو بيقول : علي فكره يا بابا عمو معتز هو اللي انقذ ماما وجبلها الدكتور قبل ما يمشي
مراد باستغراب : معتز !! ليه هو مشي راح فين
سيف : رجع البلد تاني ... وهشام كمان اتخانق مع نهي وساب البيت ومشي
مراد : زمانه جاي دلوقتي متقلقش
سيف : دا اخد هدومه ومشي
مراد اتنهد بتعب وقال : كماااااان
انا هتصرف يا حبيبي ادخل انت نام
دخل مراد لآمنه الاوضه وقعد جنبها ع السرير
مراد : أنا عارف انك مش نايمه ولا عمرك هتنامي طول ما أنا بره
آمنه : متخافش من النهارده هعود نفسي علي كدا
مراد نام جنبها وبص لعيونها الحمرا من كتر العياط وقال بابتسامه : مبقدرش امسك نفسي قدام عيونك دي وبضعف
لفت آمنه وادته ضهرها وقالت : اقفل النور لو سمحت عايزه أنام
مراد حك شعره بإحراج وقال لنفسه : اممم منا عارف برضو مش بسهوله تتراضي كدا
وراح عليها وحضنها من ضهرها وقال : أنا آسف
آمنه بدموع : تقدر تحلني من عصمتك امته
مراد : يوم ما اموت
آمنه في سرها : بعد الشر عليك ربنا يجعل يومي قبل يومك
مراد بزعل : حتي بعد الشر مش هاين عليكي تنطقيها ولا نطقتيها بقلبك
آمنه : لو سمحت بطل كلام شويه عايزه انام
سابها مراد وخرج راح لنهي اوضتها ولقاها بتعيط
مراد نفخ بزهق وقال : مالك انتي كمان
نهي بدموع : هشام مشي يا ابيه مشي وقالي انا بحلك من اي ارتباط بينا
مراد : والله راجل
نهي بصدمه : إيه
مراد : هو ايه اللي إيه
انتي ازاي اساسا تتكلمي قدام الكل وتقوليله كدا ... مفكراه هيبوس ايدك ويقولك لا لا يا نونه خلاص هفضل هنا لو حصلت اني اسيب شغلي
وكمل كلامه بعصبيه اكتر وقال : انتي مجنونه ولا شكلك كدا
نهي : يا ابيه انت بتزعقلي ليه بس
مراد : بزعقلك عشان اربيكي من اول وجديد لان واضح جدا اننا دلعتك بزياده
نهي : ايه الدلع بس في اني مش عايزه اسيبك ولا ابعد عنك
مراد : ما تبعدي يا حببتي براحتك اهم حاجه انكم تكوني مرتاحه
وانا هستفاد ايه لما تكوني جنب مني ومش مرتاحه ولا سعيده مع جوزك
اختك متغربه بقالها اكتر من سنه ونص وبعيده عني ... هقولك مش وحشاني ابقي كداب ، هيه وحشاني اوي كمان بس كفايه عليا لما اسمع صوتها وهيه فرحانه وصورها تبعتهالي وفرحانين عندي بالدنيا
تفتكري لو كانت اتجوزت شريف صاحبي كانت هتبقي سعيده كدا ، وكانت هتبقي جنبي كمان .... السعاده مش بالمكان ولا بالناس اللي حواليكي يا نهي
السعاده اللي بجد بتتمثلك في راحة البال ، وللأسف راحة البال دي انتي خسرتيها من بعد هشام
نهي بخوف : يعني ايه مش زوبعه كدا ما بينا وهتعدي
مراد : لا دا انتي اللي هتشوفي زوبعة هشام علي اصله ... ميغركيش انه بيضحك ويهزر بس قلبته سودا بعيد عنك
واتنهد وقال : نامي انتي دلوقتي وانا بكره هكلمه واشوفه فين
نهي بنفي : لا لا مش هيجيلي نوم الا لما اطمن واشوفه فين الاول
مراد : طلع تليفون واتصل بهشام وانتظر الرد
هشام : أيوا يا مراد
مراد : انت فين يا هشام
هشام : انا قاعد مع معاذ صاحبي في شقه كدا واخدينها ايجار
مراد : طب ارجع يا هشام وانا هصلح كل حاجه
هشام : آسف يا مراد كرامتي متسمحليش بكدا
مراد : طب انا هسيبك تهدي يومين ونبقي نتكلم تاني يلا سلام
قفل معاه وبص لنهي وقال : مخه قفل منك خالص
نهي : يالهوي يالهوي يالهوي يعني ايه .. والعمل ايه
مراد : عملك اسود ومهبب اتنيلي اتخمدي وهبقي اشوف حل معاه .... وآه لسانك دا قصيه انتي بدال منا اللي اقصهولك جتك نيله
وسابها ومشي
____________________________________
في اوضة رحمه
استاذن مراد ودخلها اوضتها لقاها بتقرأ قرآن وبتعيط
مراد : ممكن افهم انتي كمان بتعيطي ليه
مسحت رحمه دموعها بسرعه وقالت : ابدا مفيش يا مراد
قعد مراد قصادها واتكلم بهدوء وقال : من امته
رحمه عقدت حواجبها وقالت بأستغراب : هو ايه اللي من امته
اتنهدمراد : حبيتيه من امته
رحمه بتوتر : ح.ح.حب ايه بس يا مراد ... لا لا انت فهمت الحكايه غلط
مراد : لأ انا فاهم الحكايه صح وخليكي صريحه معايا يا رحمه
من امته وانتي بتحبيه ؟؟
رحمه نزلت وشها في الارض بكسوف وسكتت
مراد بلؤم : دا واضح اننا بتقرطس من زمان
وابتسم وقال : بصي يا رحمه انا عايزك تعرفي كلمتين مهمين اوي
عايزك تعرفي اننا مش وحش عشان اهدم علاقتكم ببعض ابدا والله ... كل الحكايه اننا بخاف عليكي زي اختي وحابب برضو معتز يعرف انك بالنسباله جوازه سهله متعبش فيها ولا دفع فيها مليم
رحمه : عمر الفلوس مكانت مقياس لغلاوة ومكانة بنآدم يا مراد
معتز لو بيحبني هيفضل شايلني فوق راسه العمر كله وهيعافر عشاني
البنآدم اللي بيدور على وصية ربنا ليه في مراته هو دا الانسان السوي وهو بس اللي يستاهل ان الست مننا تعيش معاه عمرها كله علي الحلوه والمره ... انما بقا تقولي الراجل اللي بيحترم مراته عشان دافع مهر ولا مؤخر كام الف او مليون ومراته عارفه بكدا
دا اساسا لا يستحق أنه يكون راجل ولا هيه تستحق تكون ست
الست اللي تتمن نفسها بالفلوس مهما زاد سعرها فهيه برضو رخيصه اوي
مراد ابتسم من كلام رحمه وقال : ربنا يكتبلك الخير يا حببتي
رحمه : بس انا عايزه اعرف معتز طلق ليه
مراد اتنهد وقال : دي حاجه ما بينكم انا مليش اتكلم فيها
لما الظروف تسمحلكو بالكلام اساليه انتي .... يلا تصبحي على خير
____________________________________
مرت الايام
مراد وآمنه لسه زعلانين من بعض
مراد بيحاول يصلح اللي قاله لكن آمنه رافضه تسمعله
هشام ونهي مازال بينهم الخلاف
نهي بتحاول تكلم هشام في التليفون من معاذ وهو رافض تمام
رحمه ومعتز
معتز عايش مع صابر بس دايما رحمه في باله ويتمني انها تكون بتفكر فيه زي ما بيفكر فيها
لكن اللي ميعرفوش ان فعلا معتز تفكيرها الشاغل
مرت باقي ايام شهر رمضان عليهم وجه يوم العيد
دخلت يمني لمراد تصحيه وفضلت تخبط علي وشه لحد ما فاق
مراد بابتسامه : صباح الفل يا يوكا ... فين بوسة بابا
قربت يمني منه وباسته من خده
في الوقت دا دخلت آمنه وقالت : يلا يا يمني عشان تغيري هدومك
مراد : كل سنه وانتي طيبه يا حببتي
آمنه من غير ما تبصله : وانت طيب واخدت يمني وخرجت
مراد : اممم ... لا والله مهيحصل ولازم تتراضي النهارده
مش كفايه مقضي ليلة العيد واحنا اخوات ... عنيفه اوي انتي يا امونه في خصامك
وفرك في ايده وقال : يلا استعنا علي الشقا بالله
خرج مراد وسلم علي نهي ورحمه وسيف وعبدالرحمن وعيد عليهم ودخل لآمنه اوضة يمني ، وكانت يمني خلاص جهزت
عيد عليها هيه كمان وقالها تطلع بره ليهم
لسه آمنه هتخرج شدها مراد لحضنه وقال : كل سنه وانتي في حضني
آمنه دموعها نزلت وقالت : حضنك دا اللي عايز تبعدني عنه مش كدا
مراد : مسك وشها بأيده الاتنين واتكلم بحب : حببتي انتي اللي غلطتي فيا الاول وكل كلامي كان رد فعل لكلامك
انتي مشوفتيش نفسك انتي كنتي متعصبه ازاي عليا
آمنه : دي مش اول مره اتعصب عليك ... بس دي اول مره انت تقف قصادي كدا
مراد بسخريه : شوفتي انا طول عمري بتهزق منك وراضي فيها ايه بس لما تتهزقي مني مره
آمنه : دا مش تهزيق دا دبش
مراد : من بعض ما عندكم انتي بالذات متتكلميش عن الدبش هاااه وان كنت ناسي افكرك
آمنه : طب وسع كدا خليني اطلع
مراد : عظيم بيمين ما يحصل ولا تخرجي وتسيبيني كدا ... مش كفايه نمت امبارح اندب بختي
آمنه : مش معني انسي كلمتك ابقي صالحتك .... انا لسه مصفتش ليك اصلا
مراد : ليه بس دا حتي الصلح خير ويلا نتصالح
حاولت آمنه تداري ابتسامتها وقالت : لأ
وسابته وخرجت
مراد : حلووو ضحكت يبقي قلبها مال ... بس عايزه صبر مني سيكا
____________________________________
اتجمع الكل وعملت رحمه شاي بلبن مع الكحك والبسكويت
عبدالرحمن : هنخرج فين بقا يا بابا النهارده
مراد بلؤم : المكان اللي ماما تقول عليه يا حبيبي عشان الحكومه متديلناش مخالفه بس
آمنه : شااااطر ادفع حق مخالفاتك القديمه عشان ميتكركبوش عليك يا حضرة الظابط
مراد : حاضر هدفع .. بس الجميل يرضي عني
في الوقت دا الباب خبط ودخل منه معاذ وهشام وكانوا لابسين جلبيات بيضا
الكل ضحك عليهم اول ما شافهم
مراد : إيه يابني اللي انتو لابسينه دا
معاذ : والله ياباشا دا الطبيعي في العيد مش ترنج خالص ، وبعدين احنا كنا بنصلي اصلا وروحنا عيدنا علي خالتي وحنون وقولنا نعدي عليكو
هشام : كل سنه وانتو طيبين جميعا
الكل : وانت طيب
نهي كانت بتبصله ومستنياه يبصلها ، لكن هو مبصش ليها خالص
هشام : أحنا هنمشي بقا عشان ننام لاننا لسه منمناش
آمنه بضحك : لسه زي ما انت عادتك يا هشام تقضي يوم العيد نوم
هشام بابتسامه : لا ابدا انا لسه هروح لنورا وفتون الاول اعيد عليهم وانام شويه عشان العصر اروح البلد اعيد علي معتز وعم صابر
في الوقت دا سمع صوت من وراه وهو بيقول : ومعتز جالك بنفسه يا اتش يعيد عليك
سلم عليه هشام وحضنه وهنوا بعض بالعيد ، ودخل معتز سلم علي الموجودين وهناهم بس وقف قصاد رحمه وشد ايدها الاتنين وباس جبينها وقال : كل سنه وانتي طيبه يا أغلي من حياتي
مراد بسخريه : يا محنووو
ضحك الكل علي كلمة مراد حتي رحمه ومعتز كمان ضحكو
معتز لرحمه : يلا غيري هدومك عشان نخرج شويه مع بعض
مراد وقف بعصبيه وقال : من الواضح لما بسكتلك مره وضعك بيزيد سوء يا معتز
يعني ايه تخرجوا قفص جوافه انا مفيش استئذان مني
معتز بتصنع الاستعباط : منك !!! ليه انتي تبقي لرحمه ايه يا مراد
لا انت اخوها ولا ابوها ولا حتي ابن عمها ... مجرد جارهم وبتعتبرك اخوها
وبصله بقوه وقال : بس مش اخوها
مراد : السكه اللي انت ماشي فيها دي مش مع مراد عزام
معتز بتحدي : ولا مع معتز الشهيدي
وقربوا الاتنين من بعض اوي وكانوا بيبصوا لبعض بتحدي
معتز بإستفزاز : أنا من رأيي تاخد مراتك وعيالك وتتفسحوا وتسيبني مع مراتي نتفسح براحتنا
مراد بعند : يبقي بتحلم !!!!!
لقراة باقي الفصول الجزء الثانى من هنا
لقراة فصول الجزء الاول كاملة من هنا