غريق_علي_البر
الفصل الثالث والرابع
بقلم نعمه حسن،،
♡♡♡♡♡♡♡♡♡♡
_ديب!
قالتها "فرحه" بهلع و صوت منخفض مرتعش و إختبأت خلف ظهر "أحمد" الذي ظل ينظر إلي الذئب نظرات ثابته و قال:
=إرجعي لورا بالراحه.
فعلت "فرحه" كما أمرها و إزداد خوفها فقال: لازم نولع نار بسرعه.. إجري و خدي أي جزع شجره و وولعي فيه و هاتيه.. بسرعه.
قالت وهي ترتجف خوفاً: أولع فيه إزاي يعني؟!
رمقها بغيظ و قال: هاتي حجرين من اللي علي الأرض دول و حكيهم في بعض هيطلعوا شرارة نار..ولا أقوللك هاتي غصنين من اللي جمبك دول و حكيهم في بعض جامد و حطي بينهم ورق شجر.. إخلصي.
مدّت أناملها المرتعده و أمسكت بغصنين شجر ملقين علي الأرض و فعلت كما أمرها و فوجئت عندما إشتعلت النيران فنظرت له بفرحه و قالت:دي ولعت.
_بسرعه ولعي جزع شجرة و هاتيه.
أمسكت بجزع شجرة ملقي علي الأرض و أشعلته من النار التي صنعتها و ناولته إياه فأمسكه و دار حول الذئب فدار الذئب حوله بدوره.
ظل يدور حول الذئب عدة دورات ممسكاً بيده العصا المشتعله حتي تركه الذئب و إنصرف.
قالت متعجبه:ده سابك و مشي!!
إستند إلي الشجرة خلفه و قال وهو يلتقط أنفاسه بصعوبة:الديب مع إنه من أقوي الحيوانات لكن ربنا سابله نقطة ضعف واحده و هي شوكه في ضهره بتخليه ميعرفش يلف رقبته لازم يلف بجسمه كله
فـ عشان كده فضلت ألف حواليه و هو يلف خايف يقرب من النار لحد ما داخ و مشي.
مصمصت فرحة شفتيها في إعجاب و قالت: يحلاوة..صحيح العلم نور يا ولاد!
نظر لها حانقاً و قال؛أهو ده اللي باخده منك..ثم قال مقلداً صوتها:يحلاوة..صحيح العلم نور يا ولاد.
قالت بغضب طفيف:الله!!و أنا في إيدي إيه أعمله يعني و معملتوش؟!
_لا من اللحظة دي لازم نقسم المهام بيننا و كل واحد يلتزم بالشروط اللي هنحطها دلوقتي.
=إتفضل ياخويا..قسّم و سمعني!
نظر لها مذهولاً فقالت:مش أنا قولتلك متدقش معايا..إنجز يا إسمك إيه..ألا إنت إسمك إيه صحيح؟!
_إسمي أحمد..إسمعي يا فرحه..أنا هحاول أوفر ميه نشرب منها و إنتي تدوري علي أكل أو العكس..المهم نبدأ من دلوقتي قبل ما الليل يليل.
قالت ساخره:حااضر يا أحمد أفندي..هخطف رجلي لحدايت السوق اللي في آخر الغابه و أجيبلك اللي نفسك فيه..حاضر.
لعن تحت انفاسه و قال:بلاش سخريه، مش نقصاكي..
خلاص إختاري إنتي السهل و إعمليه..هتعرفي تدوري علي ميه؟!
_منا بقولك نشرب من البحر قولتلي مينفعش!هجيب ميه منين أنا؟!
=لا قولتلك هنقطرها الأول..بس لازم نلاقي حاجه نحط فيها الميه علي النار..دي هتكون مهمتك..و أنا هحاول أصيد سمك لعل و عسي أنجح.
_ولو منجحتش؟!
قالتها بتلقائيه فأجاب:ماشاءالله كتلة طاقه سلبيه متحركه..يبنتي تفائلي شويه مش كده!
_طيب ي احمد افندي هتفائل..روح يا رب تصطادلنا دنيس و شبار هو أنا عايزة إيه يعني؟!
=إتريقي براحتك..يلا معاكي حوالي ساعه علي ما أرجع تكوني عملتي نار و قطرتي ميه للشرب.
_و الحاجه اللي هقطر فيها الميه أجيبها منين؟!
=إتصرفي بقا مش إنتي المفروض ست بيت؟!
_لا و إنت الصادق ده أنا بقيت ست غابه!
لم يستطيع أن يمنع ضحكته فأدار وجهه و ذهب نحو الماء.
♕♕♕♕♕♕♕♕♕♕♕♕♕
إختفاء طائرة مدنية مصرية على متنها 62 شخصا عن الرادارات بعد خمس و أربعون دقيقة من انطلاقها إلى تركيا .
وقال موقع تتبّع الرحلات الجوية إن الطائرة فقدت أكثر من 3000 مترا من ارتفاعها في أقل من دقيقة.
وقال أحد البحارة: أنه شاهد تحطم الطائرة و أن قبطان سفينته قرر العودة إلي اليابسه و اضاف:
"الطائرة سقطت مثل البرق وانفجرت في الماء"، مضيفا أن الحادث وقع على "مسافة قريبة منا نسبيا"، وأن بعض "الشظايا كاد أن يصيب السفينة".
وقال سكان جزيرة قريبة من مكان اختفاء الطائرة إنهم عثروا على أشياء يعتقدون أنها من الطائرة.
وأرسلت السلطات أكثر من عشر سفن وعددا من الغواصين من سلاح البحرية إلى الموقع الذي يُعتقد أن الطائرة سقطت فيه.
ويفحص محققون أجسامًا يعتقدون أنها من حطام الطائرة المفقودة.
وصرّح المتحدث بإسم وكالة البحث والإنقاذ بأنها تسلمت حقيبتين "إحداهما بها أغراض مسافرين، والأخرى أشلاء .. ولا زلنا نفحص ما نعثر عليه لتحديد هويته".
إستمع والد"فرحه"و أخواتها و"رجب"إلي ذلك الخبر الذي ذاع علي كل قنوات الأنباء فقال والدها بنياط قلبٍ متمزقه:أنا قولت في حاجه حصلت محدش صدقني..ما هو مش طبيعي إن رضوان ميردش علينا أديله يومين.
قال رجب مطمئناً:متقلقش يا عمي إن شاء الله مجراش حاجه عفشه..هما لسه بيدوروا و إن شاء الله هيلاقوهم أنا قلبي حاسس إنه خير والله..و بعدين دي فرحه يا عمي يعني قطه بسبع أرواح.
قال الأخيرة ممازحاً فرمقه شقيق فرحه"رامي"بغيظ قائلاً تعرف يا رجب يابن عمي فرحه كانت دايماً تقول عنك إيه؟!
هز"رجب"رأسه متسائلاً بحماس فأجاب رامي:إنك عديم الحساسه!
قطب رجب حاجبيه بضيق و قال:تشكر يبن عمي..طيب يا عمي ناوي علي إيه دلوقتي؟!
_هننزل مصر نستنا في المطار مع اللي بيستنوا..ربنا يردك بالسلامه يا فرحه يا بتي.
♕♕♕♕♕♕♕♕♕♕♕
ظلت"فرحه"تبحث في محاولة منها لإيجاد وعاء يصلح لوضع المياه به و لكنها فشلت..جمعت أكوام من الحطب الجاف و قسمتهم إلي ثلاثة كومات و ذهبت بإتجاه البحر فوجدته يقف بداخل الماء فسألته:يا أحمد أفندي..صيدت كام سمكه؟!
قال بيأس:ولا سمكه!
_ولو فضلت واقف هنا طول السنه مش هتصيد حاجه..السمك موجود في الميه القليله اللي بين الصخور مش موجود علي الشط مطرح ما انت واقف كده.
نظر لها بإستهزاء و لم يعيرها إنتباهاً فتركته و ذهبت بجوار المياه الضحله و مدت يدها فإبتعد السمك مسرعاً..ثبتت يدها بداخل الماء حتي عاد الماء ساكناً مرة أخري و عاد السمك يمر من فوق يديها فتلتقط هي ما تستطيع الإمساك به و ترمي به إلي الرمل.
حسّه فضوله غلي ان يذهب و يري ماذا تفعل و لكنه تفاجأ قائلاً:يا بنت الإيه!!!أربع سمكات؟!صيدتيهم إزاي دول؟!
نظرت له بفخر و غرور قائله:ملكش دعوة.
قال مغتاظاً:إيه مليش دعوة دي هو أنا جاي اشحت منك؟!كفي نفسك ياا ماما.
_منا يدوب هكفي نفسي ب الأربع سمكات يا افندي..حد قاللك إني عازماك ولا حاجه؟!
ذهب بإتجاه المياه حانقاً و قد بدأت أمعاءه تستغيث.
ذهبت "فرحه"ناحية النار و بدأت حفلة الشواء خاصتها و هي تغني بخيلاء و فخر.
جلس هو أمام البحر بيأس و حيرة و شرد بخاطرة ناحية شقيقته و عما أصابها في غيابه و عن خطيبته"نورا"فقاطع شروده جلوس"فرحه"بجانبه و هي تمد يدها له بورقة شجره غليظه فوقها ثلاث سمكات.
نظر لها بإستفهام فقالت:إيه بتبص كده ليه؟!يلا بسم الله.
_إيه ده؟!قالها متعجباً
=شوسي..هيكون إيه يعني يا أحمد أفندي سلامة الشوف.
ضحك ملء فمه و قال مصححاً:إسمه سوشي علي فكره..و بعدين إنتي جايبالي أكلك ليه؟!
_لا وهو أنا هديك أكلي ليه؟!عاشقاك في الضلمه مثلاً؟!ده منابك.أنا صيدت 6سمكات و دي قسمة العدل.
ربت علي ظهرها بتقدير و قال:لا يا فرحه شكراً مش عايز..كلي إنتي بألف هنا.
_لا و يمين الله ما أمد إيدي إلا أما تاكل معايا..يلا سمكه هنيه تكفي ميه.
ضحك بشده و بدأ يشاركها الطعام و قال:إلا قوليلي يا فرحه.
_اقوللك يا فرحه ليه لامؤاخذة؟!
نظر لها بتعجب و هز رأسه بيأس فقالت:بضحك معاك يا أحمد أفندي..اصل أنا بحب الهزار و الضحك قد عنيا.. مبحبش النكد و شيلة الهم.
_معاكي حق..مفيش حاجه مستاهله.
اومأت بتاكيد و قالت:هاا كنت عايز تسأل علي إيه؟!
_أه..إنتي قولتيلي إنك كنتي مسافرة تركيا عشان أختك بتعمل عمليه هناك..مظبوط؟!
هزت رأسها بنعم فقال:بس سفر تركيا مكلف جداً و كمان العمليات هناك مش بسيطه!
=آاااه..تقصد يعني عشان إنت شايفني بسيطه و كده ف إزاي جيبنا مصاريف العمليه و السفر.
_بصراحه أه..عندي فضول أعرف.
=بص يا أحمد أفندي..إحنا فلاحين يعني عيشتنا بسيطه جداً بس حالنا متيسر جداً الحمد لله..يعني عندنا أطيان و لا مؤاخذه مواشي و الحمدلله مستورة فلما جه موضوع عملية "بدر" أبويا باع أرض من اللي عنده لواحد فلاح قريبه بردو و بدر سافرت و عملت العمليه الحمد لله و لما جيت أنا أسافر بردو كان عنده "عجله"صغيره باعها لـ"رجب" إبن عمي و سافرت و ياريتني ما سافرت..أهو خسرني و خسر العجله.
إنفجر هو ضاحكاً فشاركته الضحك و قالت:الحمد لله ده أنا كانت عصافير بطني صوتت من الجوع..عقبال الميه ياارب.
_شكراً يا فرحه علي أكلة السمك المعتبره دي..الغدا بكرة عندي هاا؟!
قال جملته ممازحاً فقالت ضاحكه:لا إنت بكرة تدور علي حاجه نقطر فيها الميه و انا يسيدي عليا الغدا
أومأ مبتسماً بإقتضاب و أشاح بوجهه نحو البحر.
🌷🌷🌷🌷🌷🌷🌷🌷🌷🌷🌷🌷
"خلاص بقا يا رضوي يبنتي إهدي بيقولوا لسه البحث مستمر أهو يعني إن شاء الله في امل!"
قالتها خالة رضوي تحاول تهدئتها فقالت رضوي بنحيب:لا يا خالتو انا قلبي مقبوض من يوم ما سافر و حاسه إنه جراله حاجه.أنا لازم أروح أستني في المطار ممكن ييجي منهم أي خبر.
♕♕♕♕♕♕♕♕♕♕♕♕
ظلّا أحمد و فرحه يجلسان أمام البحر في صمت لم يقطعه أيّاً منهما حتي تثائبت "فرحه"بشده و قالت:
_خلاص مش قادرة..عايزة أنام.
=و انا كمان النوم غلبني..قومي نروح هناك جمب النار أأمن.
ذهبا و جلسا بجوار النار فأحاطت"فرحه"نفسها بذراعيها تلتمس الدفء منهما و أسندت رأسها إلي الشجرة من خلفها و فعل هو المثل و غطّا في ثبات عميق قطعته فرحه صارخه فجأه...
غريق_علي_البر
الفصل الرابع بقلمي،، نعمه حسن،،
❤❤❤❤❤❤❤
_إنت مين؟! إنت ميييييين؟!
قالتها فرحه صارخه وهي تنهض بفزع مسرعه تبتعد عن ذلك الكائن الذي لا تعرف ماهيته.
قام "أحمد" من نومه مفزوعاً عندما إستمع إلي صراخها فوجدها تصرخ قائله"إنت مين؟! "و تركض مبتعده فنظر إلي حيث كانت ترقد و إنفجر ضاحكاً و جري خلفها فوجدها تختبئ خلف شجرة.
جاهد كي يمتنع عن الضحك و قال: ده سنجاب يا فرحه.. إنتي خايفه من سنجاب؟!
نظرت له بأعين دامعه مذعورة فـ رق قلبه لرؤيتها بهذا الحال و مدّ يده لها فأمسكت بها و خرجت من خلف الشجرة.
نظرت إلي" السنجاب"بخوف فقال: متخافيش يا فرحه.. السنجاب أليف.
نظرت له بشك فذهب بجوار "السنجاب" و أمسك بغصن شجرة و بدأ في مداعبة السنجاب بلطف ثم نظر لها قائلاً: ده صغير لسه ميتخافش منه. قربي.
_لا ياخويا شكراً.. إلعبوا إنتوا و إتبسطوا.. و بعدين يعني كائن زي ده عايش في جزيرة مهجورة زي دي بيعمل إيه؟!و بياكل إيه.. صحيح فقري إبن فقريه!
إسترعت كلمتها إنتابهه فقال بغتةً: برافو عليكي يا فرحه.. فعلاً وجود السنجاب هنا ده يدل علي إن في أشجار مثمرة في المكان.
_حتي لو في يعني.. هتطلع إنت الشجرة تجيب مثلاً؟!
زفر بغيظ قائلاً: يبنتي مش كده.. مش كل حاجه تقفليها في وشي كده.. أنا لو مموتش بسبب قلة الأكل و الشرب هموت بالطاقه السلبيه اللي بتنقليها لي.
لوت شفتيها ساخرة و قالت: خلاص يا أحمد أفندي أنا هخرس خاالص و إتفضل إنت إتصرف.
_نامي يا فرحه.. نامي أحسن.. الصبح إن شاء الله هبقا ادور أدور أنا.
=ده لو طلع علينا صبح يعني!
_لا حول ولا قوة الا بالله!!
قالها و هو يقلّب كفيه في تعجب من أمرها.
أسندت فرحه رأسها إلي الشجرة مرة أخري و قالت: طب هنام إزاي و أبو الصحاب ده مشرّف جمبي؟!
و أشارت برأسها إلي "السنجاب" فقال: قولتلك ده حيوان أليف.. و بعدين أنا مش هنام.. نامي إنتي؟!
_الله!! و مش هتنام ليييه؟!
قال ساخراً: أكيد مش عشان حضرتك صحتيني مفزوع و يستحيل أعرف أنام تاني دلوقتي.. لا.. ده أنا لازم أسهر علي حمايتك يا سمو الملكه فرحه.
زمت شفتيها بغرور و أغمضت عينيها و إستسلمت لسلطان النوم.
قام هو ببطء و ذهب و أحضر عدة وريقات من الشجر و قدمها بيده إلي السنجاب الذي أشاح بوجهه عنها فقال: أنا كلامي كده صح.. متربي علي الغالي.. أملي فيك يا بطل بكرة تساعدنا نوصل لأي شجرة ألا لو فضلنا من غير أكل كده هنمووت.
ظل يداعب السنجاب حتي إنصرف و شرد هو أمامه ينظر إلي نقطه وهميه.
تذكر "نورا" و إبتسم إبتسامه لم تصل إلي عيناه و تخيّل لو أنها هي من ترافقه في تلك الجزيرة المهجورة الخاليه من أي موارد بشرية ماذا كانت ستفعل؟! هل كانت ستحاول تجاوز الأمور ببساطة كما تفعل "فرحه" أم كانت ستظل تلعن حظها الذي أوقع بها إلي هنا!
تمتم بداخله: إيه الهبل اللي أنا بعمله ده؟! مفيش وجه مقارنه بينهم أصلاً!
نفض رأسه من تلك الأفكار التي تسبح بداخلها ثم أسند رأسه إلي الشجرة من خلفه و حاول الإستسلام إلي النوم...
♕♕♕♕♕♕♕♕♕♕♕♕
_مش عارفه يا بابي والله بس همّا بيقولوا لسه بيبحثوا.. و مرّات يقولوا إنهم هيوقفوا البحث لأنه بدون فايده و إن جميع الجثث إتحولت لأشلاء و بقا صعب التعرف عليها.. و أنا اهو كل يوم بعمل إتصالاتي و بحاول أوصل لأي جديد بس مفيش فايده!
=إعذريني يا حبيبتي إني مش قادر أكون معاكي في المحنه دي.. بس إنتي عارفه.. السفر دلوقتي مرهق جداً بالنسبالي.
_ولا يهمك يا بابي.. إن شاء الله لو في أخبار هبلغ حضرتك.. مع السلامه.
أنهت "نورا" مكالمتها فرمقتها "رضوي" بغيظ و غضب و قالت: إنتي بتتكلمي ببرود كده ولا كأن إن اللي كان في الطيارة ده المفروض حبيبك و هتتجوزوا بعد شهر!
إعتدلت "نورا" في جلستها لتقابل "رضوي" و قالت بعمليه شديدة: بصي يا رضوي.. إنتي لسه صغيرة و مش بتفكري غير بمشاعرك و عواطفك.. لكن لما توصلي للسن اللي أنا فيها دي هتتصرفي بعملية أكتر.. يعني أنا هستفيد إيه لما أفضل أبكي و أقول يا تري؟! مش. هستفيد أي حاجة.. بالعكس.. ده أنا هخسر.
هزت "رضوي" رأسها بتساؤل فأجابت "نورا" و هي تعدد علي أصابع يدها: هخسر وقت، هخسر طاقه، هخسر تركيز ممكن يساعدني إني ألاقي حل.. و أنا أكيد مضايقه و قلقانه زيك بالظبط.. بس مش لازم أوضح ده.. أنا مش ساكته.. انا بحاول أوصل لأي حاجه بس للأسف مفيش.
أشاحت "رضوي" بوجهها عنها في عدم إقتناع فقالت "نورا": أنا هفضل معاكي هنا النهاردة لغاية ما ترجع طنط.. قوليلي بقا فين المكان اللي هنام فيه؟!
_هتنامي من الساعه 9؟!
=أيوة ده ميعاد نومي.. إنتي عارفه إن أهم حاجه الإنضباط و الإلتزام.
أومأت" رضوي" و أشارت لها ناحية غرفة الضيوف قاصده إغاظتها و لكنها تعجبت عندما تقبلت "نورا" الأمر ببساطة شديدة و قالت: تمام.. تصبحي على خير.
♕♕♕♕♕♕♕♕♕♕♕♕
في كل صباح يستيقظ غزال يدرك أنه يجب أن يعدو بخطوات أسرع من خطوات الأسود وإلّا كان الموت مصيره.
وفي كل صباح يستيقظ أسد يدرك أنه يجب أن يعدو بخطوات أسرع من أبطأ غزال وإلّا سيموت جوعاً.
لا يختلف عليك الأمر سواء أكنت غزالاً أم أسداً، عندما تبزغ الشمس عليك أن تعدو بأقصى سرعة.
♕♕♕♕♕♕♕♕♕♕♕
إستيقظت"فرحه"من نومها عندما داعبت الشمس وجهها.. أفاقت ببطء و ظلت تجول ببصرها من حولها حتي ثبتت عيناها علي ذلك النائم بجوارها.
إختلست إليه النظر و تمتمت بداخلها:يخربيتك.. قشطه بالكريمه جاتك داهيه في حلاوتك.
قفزت صورة "رجب" في ذهنها فجأه فإمتعضت ملامح وجهها و قالت بصوت منخفض: جاتك القرف يا رجب يا نتن.. قال إيه مش عاوز يعمل فرح.
ثم أكملت بتوعد و إرتفع صوتها: صبرك عليا بس لما أرجع من المخروبه دهين و ديني لأسقيك المر و مش هعمل فرحي غير في فندق خمس نجوم.
"بتكلمي نفسك يا فرحه؟!" قالها "أحمد"بصوت ناعس وهو يضع يده فوق عيناه يحجب عنهما أشعة الشمس.
نظرت له"فرحه"مبتسمه و قالت:صباح الخير يا أحمد أفندي.
_صباح النور يا فرحه هانم.
إبتسمت فرحه و قالت:تحب حضرتك تفطر هنا ولا في الجُنينه بره؟!
قهقه عالياً و قال:المكان اللي تحبيه أنا معاكي فيه.
أومأت بموافقه فقال:هاا..كنتي بتكلمي نفسك بتقولي إيه؟!
زمت شفتيها بإيجاز و قالت:مفيش.. إفتكرت أهلي و بدر..يا تري بقت كويسه!و يا تري إكتشفوا غيابي ولا لسه؟!
زفر بحيرة مماثله و قال:أكيد يا فرحه إكتشفوا غيابك و أكيد مصر كلها بتحكى عن الخبر دلوقتي.
_طب و إحنا هنفضل هنا لحد إمتا يا أحمد أفندي؟!
=لحد ما ربنا يأذن إننا نرجع يا فرحه..مفيش قدامنا حاجه نعملها للأسف غير إننا نولع نار كإستغاثه..يا رب يكون حظنا حلو و يشوفوها.
_و لو حظنا وحش؟!
قالتها بتشاؤم كعادتها فإبتسم و أجاب:يبقي هنفضل هنا لحد ما تحصل معجزة و نرجع.
هزت رأسها بوجه خالي من التعبيرات و باغتته متسائله:ألا قوللي يا أحمد أفندي؟!
_و أقوللك يا أحمد أفندي ليه؟!
نظرت له بتفاجأ و ضحكت بشده فبادلها الضحك فقالت:لا دا انت كده هتنافسني بقا.
_أهو بنتعلم منِك أي حاجة..ها عايزة تسألي علي إيه؟!
=إن شاء الله لو رجعنا مصر..إيه أول حاجه هتعملها؟
_والله هو المفروض إن فرحي بعد شهر فـ.....
قاطعته قائله:بجد؟!! ده أنا كمان فرحي بعد شهر!
_معقوله!
=أيوة..و إنت كمان خطيبتك مش عايزة تعمل فرح ولا إيه؟!
ضيق بين حاجبيه قائلاً:دي حقيقه فعلاً..عرفتي إزاي!
_لا دي توقعاتي يعني..أصل رجب إبن عمي ده نفس تفكيره.. من النوع النتن حبتين..بيقول لي ليه نعمل فرح و مصاريف و تكاليف طب ما احنا قال إيه نستثمر الفلوس دي!
_هي "نورا"خطيبتي مش بتفكر من منطق التوفير يعنى..بس هي طبيعتها مبتحبش المبالغه..شايفه إن مصاريف الفرح دي ملهاش داعي..و إن الفرح كله ملوش لزمه يعني هي كانت عايزه نعمل حفله بسيطه نعزم فيها أقرب الأقربين و خلاص..مبتحبش الزيطه و الجو ده.
=إزاي يعني..و هو ده يبقا فرح؟!دي حتي إسمها ليلة العمر..يعني لازم طبل و زمر و هيصه و أفرح و الناس تفرح..و لو علي الفلوس فأنا عن نفسي شايفه إن مكانتش الفلوس تتصرف علي اللي يسعد الإنسان و يخليه مبسوط و فرحان يبقا ملهاش لزمه.
أومأ بإقتناع و قال:معاكي حق فعلاً..طيب و إنتي موافقه خطيبك علي قراره ده؟!
=لا طبعاً..و إن مكانش يعمل لي اللي أنا عاوزاه يبقا مع ألف سلامه.
_مش للدرجه دي يا فرحه..ما يمكن ظروفه متسمحش.
=ما هو لو ظروفه متسمحش كنت رضيت و قولت ماشي..لكن أنا عارفه هو بيعمل كده ليه.
_ليه؟!
=نتانه و بخل بعيد عنك..أصل رجب ده بيموت علي القرش.
_يا ساتر..هو لسه في كده؟!
=و أكتررر يا أحمد أفندي و أكتر..ده بينشف تفل الشاي عشرين مرة.
إرتفع صوته ضاحكاً ثم قال:طب يلّا يا فرحه هانم عشان ندور علي ميه و أكل.
و إنصرفا بداخل الغابه يبحثان عن موارد للأكل و الماء فسألته:أومال أبو الصحاب فين؟!
_اه..تقصدي السنجاب..مشي من إمبار..
بتر كلمته عندما إستمع إلي صوت السنجاب من أعلي الشجرة فرفع بصره للأعلي فسقطت تحت قدمه حبة من جوز الهند.
نظر إلي فرحه بحماس فبادلته نفس النظرة فإنحني مسرعاً و إلتقطها ثم نظر إلي الأعلي مرة أخري قائلاً:
شكراً يا بطل علي الكادو الحلو ده.
نظرت"فرحه"علي الأرض حولها ثم إنحنت و إلتقطت حجر كبير و ناولته إياه فتناوله منها و كسر به ثمرة جوز الهند و أعطاها شطرها و أخذ الشطر الآخر.
شربت "فرحه"ماء جوز الهند بتلذذ و قد إرتوي عطشها بعض الشئ و بدأت في تناول جوز الهند من الداخل بإستمتاع و عندما إنتهت منها نظرت إلي القشرة الخارجيه لجوز الهند و التي تشبه الوعاء ثم قالت بحماس:إحنا لو سيبنا القشرة دي يومين تلاته في الشمس هتنشف و ممكن نقطر فيها الميه!
_تصدقي فعلاَ فكرة..إنتي ممتازة يا فرحه.
طالعته فرحه بفخر و قالت:يا سلام لو أبو الصحاب يوقعلنا كمان خمس ست حبات من دول..تبقا جبرت.
لم تكمل جملتها إلا و قد وقع تحت قدميهما العديد من ثمرات جوز الهند فنظرا لبعضهما البعض و إنفجرا ضاحكين ثم جمعا الحبات و تقدّما للأمام يكملان البحث.
إقتربت"فرحه"من شجرة ثم إنحنت و إلتقطت بيديها شيئاً ما و همّت بأكله فصرخ بها قائلاً:إستني.