رواية: قاتلي المتأجر
البارت: العاشر
بقلم: نادية ستارز
عند جين وإكس
جين: أنت مين و ليه خاطفني بدل ما تقتلني
إكس: شايفه الكوخ إلي جمبك على طول دا
جين: أه ماله هيولع بينا والنار هتمسك فيك وهتموت وبعدها يطلعو علينا خمس رجال مسلحين يكونو بيتاجرو في الأعضاء ياخدو أعضائي ويموتوني بعدها عيني عليك يا جين مش هتلحقي تستمتعي بجمال الطبيعة
إكس بزعيق: أخرسي خالص و أرحميني بقى أيه مبتعرفيش تسكتي ويدخل إلي كوخه
جين: قليل الرباية والأدب سبني ودخل ممكن دلوقتي كلب سعران يهجم عليا ويفضل ياكل و ياكل وأنا أموت بس المشكلة مش هنا المشكلة إلي بجد لو أنا لحمي طلع مالح شوية برضو هياكلني ولا مش هيعرف ياكلني سؤال حيرني و حير العلماء
إكس من الداخل : صوتك وصلي ومش عارف أنام بسببه أنتِ بالعه تليفزيون قبل ما أخطفك
جين: نااام وعدي اليوم أحنا لسه في أوله بدل ما أهرب منك
إكس يخرج لها: فعلاً أنتِ تقدري تعمليها بس هما هيسبوكي طب هتعرفي أصلاً لا طبعاً أنتِ في مكان مفيهوش مخلوق و الكوخين مفتوحين على بعض وقبل ما تكملي وتزعقي في ستارة فاصلة أتهدي وأتخمدي وكفاية كلام أنتِ مبتتعبيش أبداً و دخل
جين بتقليد إكس: كفاية كلام أنتِ مبتتعبيش أبداً
وهو أصلاً إلي شخص لكاك وبيتكلم كتير لكن أنا معرفش أيه معنى الكلام دا وتدخل إلي كوخها
جين: طب بما أنك سامعني أنت مخلتنيش أجيب هدومي هلبس أيه دلوقتي
إكس: من هدومي
جين: ليه يعني من قلة الهدوم في الحياة حد قالك أني بحب البس مكان حد من بكرة هننزل نشتري هدوم ليَّ وبرضو هشتري ليك
إكس: هو أنا واخدك فسحة ولا بخرجك أنا كان مالي ومال العملية دي والله لو كنت أعرف إني هخطف واحدة بالشكل دا مكنتش وافقت
جين: طب مش هتقول للي خطفها هي مخطوفة ليه إين حقوق الخطف
إكس: حرف كمان وهديكي لأي أسد جعان يكلك وأرتاح من صوتك
جين: خلاص سكت طب مم
إكس: دا أخر تحذير
جين وهي تستلقى على السرير الصغير : مجربتش تاخد مهدئات دا أنت بتتعصب من أتفهه حاجة ودا هيتلف جهازك العصبي
إكس: ….
جين: أنت نمت
إكس: أنا أمنيتي في الحياة أن ربنا يديني شوية من برودك قاعد مع فريزر
جين: تلجاية بعد أذنك تختلف لما تعوز تلج خدني بس متكولنيش وتفضل تقول آه يا سناني وأنتِ السبب يا جين عارفة أنا الحركات دي
إكس: وأنا شبه المياه المغلية النقطة مني بحرقك
جين: عنيف أوي
بعد خمس دقائق
جين: أبو كمامة سودا الحقنااااااااااااي
___________________________
في بيت جين عند ليث
ليدخل شخص إلي البيت بأستغراب ويقول
الشخص: أنتو بتعملو أيه في بيتي مكانكم لأطلب البوليس
ليث: بوليس وأحنا موجودين لا لا والله عيب في حقنا خدلي يا عيسى الكائن دا على البوكس
عيسى يميل عليه وبصوت واطي : أستنى بس نعرف حكايته يمكن يكون تبعهم ونوصل لجين و يا دبلة الخطوبة عقبالنا كلنا
ليث:هو دا وقته مش لما نلاقيها الأول
عيسى: بلاش حسد في الموضوع
ليث: أتلهي في خيبتك
عيسى: مش أدام الراجل الغريب
ليث: طب روح يا عيل أعملي قهوة
عيسى: أخدت عليا أوي أنت
الشخص: أنا تعبت من خناقكم ممكن أعرف بتعملو أيه في بيتي
عيسى: مش دا بيت الأنسه جين
الشخص: ما هي أتخطفت ودا معاد تجديد الأيجار وأنا صاحب البيت والشقة من حق صاحب البيت صح ولا غلط يا حكومة أنا عايز شقتي يا حكومة
ليث: تجديد الأيجار أيه هو أنت بتجدد باقة النت .
صاحب البيت: دلوقتي مين هياخد حاجتها ولا أرميهم في الشارع وهي يتيمة ملهاش حد
عيسى: دا محتاج يتأدب شهر أقل حاجة على كلامه دا
ليث: أوافق الرأي جداً
عيسى: طب أنا هنزلو ياخدلو لفة في البوكس وأحنا كدا خلصنا
ليث: أمسك الموبايل واللاب
عيسى: كل حاجة أنا إلي أمسكها لكن أمسك الفين تلات الاف جنية لا طبعاً أزاي متحصلش دي هاتهم
ليث يطلع الكلبشات: الكلبشات دي للناس الغالية على قلبي مبتطلعش لأي حد
صاحب البيت: الكلبشات دي فضة حقيقية ولا فالصو و بتضحكو علينا
ليث: بنستهبل عليكم أنزل
عيسى: طب وحاجات جين مين هينزلها
ليث: خليك هنا وهبعتلك حد من العساكر
عيسى: لا مينفعش
ليث: ليه
عيسى: ممكن يطلع عليا حد يكون مريض نفسي وبيقتل في الناس بصاروخ عارفه دا البتاع الدايرة ولفي بينا يا دنيا وفي الأخر الاقيني ميت وأجزاء جسمي متقطعه أجي أصحى أسمع حد بيقولي من هو ربك لا أنت إلي هتفضل هنا زمن الضعف والسكوت دا كان زمان أدامي يا أبو كلبش ويغادر
ليث: ياربِ يعني أنا أخلص من جين وجنانها يطلعلي عيسى أعمل في نفسي أيه أموت نفسي هيقولو مات منتحر أنتحر ما هي نفس الحاجة أدعي عليكي بأيه يا جين لا سيباني وأنتِ موجودة ولا و أنتِ مخطوفة بس خطفوكي ليه أحنا متفقين على قتل بس أكيد هيرجعوكي مش هيستحملو الكلام الكتير بتاعك أو يدبحوكي أيهما أقرب يا عسكررررري
عسكري: أنا أهو يا فندم
ليث: اتأخرت ليه
عسكري: كنت بشرب كوباية شاي تفوقني
ليث: بتشرب وأنا لا روح هاتلي واحدة وخليه يحط فيها نعناع
عسكري: أوامرك ولسه هيخرج
ليث: أنت رايح فين هو أنا جايبه اسألك اتأخرت ليه تعالى خد الشنط إلي في الأوضة دي
عسكري: حاضر يا فندم ولسه هيدخل
ليث: أستنى هو أنت أي حد يقولك أدخل هتدخل مش يمكن سفاح واقفلك على الباب تعالى ورايا
عسكري: حاضر يا فندم
ليث:أنا أتخنقت من حاضر يا فندم معندكش غيرها
عسكري: أوامرك يا فندم
ليث: أدخل أدخل الأوضه أنا غلطان إني أتكلمت
عسكري: أنا أخدت الشنط في ورق على السرير أخدو
ليث: لا روح أنت أنا هجيبه
دا ورق أيه دا ليتذكر رسالة جين ويقول: ودي هرجعلها بيتها أزاي دا أنا بخاف أمسك المسدس ودي ست شرانية تمسك منشار تقطع رقبتي عيني عليكي يا رقبتي هتوحشيني سلميلي على رقبة الشهدا إلي معاكي و يأخذ الورق و يغادر
ليث ينزل يجد عيسى
___________________________
في بيت هكول عند إنتصار
هكول: التمانية مراتاتي وأنتِ التاسعة
لتقع إنتصار مغمى عليها.
أحد الستات: أحيه أنت جايبلنا واحدة مش عارفة تقف على طولها
ست أخرى: دي الخدامة إلي هتخدمنا صح
هكول: أخرسي يا ست منك ليها وطلعوها للدور التاسع
الست: يا مصيبتي السودا الحقو يا نسوان بيقول الدور التاسع الشيخ أتجوز التاسعة
لتتعالى صوت الصويت في المكان
هكول: أخرسي يا ولية أنتِ وهي وخدو الزفتة دي
إنتصار وهي تفيق: مين إلي زفتة يا هكول
هكول: الف رحمة و نور عليكي أنتِ أخيراً فوقتي يلا قومي
إنتصار: مين دول يا هكول دول مراتاتك بجد أزاي تسعة
هكول: مثنى وثلاث ورباع
إنتصار: فين تسعة في الموضوع
هكول: أتنين و تلاتة بكام
إنتصار: خمسة
هكول: هنضيف عليهم الأربعة يبقو كام
إنتصار: تسعة
هكول: قول الله دا ولا قولي
إنتصار تنهض : دا كلام عفاريتك عديني كدا خليني أمشي كان يوم مطلعلهوش شمس ولا قمر يوم ما شوفتك
هكول: أنا معنديش ست تخرج برا البيت
إنتصار: مشيني من هنا بدل ما وربنا أضرب نفسي وأعمل فيكم محضر
هكول: وأسلم وصل الأمانة ونتحبس كلنا
إنتصار: هتحبس مراتك أهون عليك هي شقتي فين
هكول: مش الشرع محلل أربعة بس
إنتصار: الشرع هو أنت و كلامك إلي يمشي
هكول: كدا أنتِ عقلتي خدوها يا ستات لشقتها
إنتصار: وأنت مش هتطلع
هكول: ساعة و هطلع
إنتصار: تمانية كتير يطلعوني أنا أتفعست واحدة كفاية
الست: دا الترحيب إلي بنرحب بيه للتامنة
إنتصار: ماشي وفي داخلها: يا خيبتك يا إنتصار أنا هعتبر نفسي ضيفة وبليل أخد الآثار وأهرب قال خمسة و أربعة تسعة هيحلل الشرع على مزاج عفاريته أنا أخد الأثار وأقفل عليه المقبره
ما كفاية خبط فيَّ يا ست منك ليها كفاية
أحد الستات: لسانك وصوتك اليوم فري بس من بكرة هتنزلي على كل شقة تنضفيها والسلالم تمسحيها وصلنا أدخلي الشقة
الست: وأي صوت ليكي مش عايزين أي حاجة نسمعها ولا حركة كأنك مش موجودة علشان تف تف بعيد عليكي وعلى السامعين ميحضروش ليكي
إنتصار: طيب ممكن هدوم
الست: مينفعشششش يزعلوووو مننا و أحنا مش قد زعلهم
إنتصار: خلاص مش عايزه بالسلامة أنتم التمانية
أحد الستات: دي بتطردنا وبتشتمنا سيبوني عليها
الست: سكينة أحنا قولنا أيه لازم نزرع في قلبها السكينه والطمئنان
إنتصار: والله في الأخر هترشقو فيَّ السكينة أنا عارفة
الباب في أيدكم منك لله يا ضبع كل الرجالة إلي دخلتهم حياتي طلعو شبه حياتي دي حياة سودا على دماغي
بعد ساعتين يدق الباب
إنتصار: طب لو حد من مرتاته أعمل أيه أكيد معاهم نسخة من المفتاح يا غبية .خلاص جاية
تفتح الباب يالهوي هكول أيه إلي عمل فيك كدا
________________________
عند مريم
ماجد: هحكيلك كل حاجة
مريم: يلا بسرعة أنت لسه هتخترع كدبة قول الحقيقة بدل ما والله هحفر حفرة وأدفنك فيها
ماجد: هكول إلي بعتني ليكي وأداني رجل المعزة البسها علشان متشكيش فيَّ
مريم: تعرف إلي معايا دا أيه
ماجد: منشار دراعه خشب علشان تعرفي تمسكي
مريم: حلو ومره واحدة أنزله على رجلة يقطعها وتبقى تلبس رجل المعزة
ماجد: أنا همشي ولا كأنك شوفتيني شوفتي الموضوع خلص أزاي
مريم: أسكت وكمل عايزك تفضل معايا ليه
ماجد: الشهادة لله يا أنسه معرفش هو أداني خمس بواكي
مريم: أسلوبك بلدي بس تمام
ماجد: وقالي أقولك على عملية أمك
مريم: مامتك بعد أذنك أيه أمك دي
ماجد: الحاجة الوالدة
مريم: بجد ولدت الف مبروك جابت بنت ولا ولد
ماجد: أنتِ يعتبر خطفاني وبتهزري
مريم: أه علشان أسود في أسود وأنا لابسة أسود في أسود ويوم أسود في أسود أنطققققق
ماجد: الجيران بتزعقي ليه كدا أنا أدامك على طول
مريم: كمل
ماجد: قالي أقولك علشان تدخلي معاها شريكة وهو كان مخطط لكل إلي حصل والوصلات إلي مضيتي عليها من تخطيطو علشان عارف أنك مش هتقدر تدفعي المبلغ
مريم: وعمل ليه كدا
ماجد: الأجابة عند هكول مش عندي
مريم: وجيت تاني ليه
ماجد: بصراحة أستحليت اللعبة وقولت أخليني
مريم: تبقى قول لأهلك يلبسه رجل خروف بعد كدا علشان ميتكشفوش بس عرفو عنواني أزاي وجم ليه
ماجد: كانو مراقبيني وجم علشان يشوفوني بعمل أيه ووقت ما نزلت أجيب أكل كنت بكلمهم
مريم: أخر سؤال وبعدها هتغور أنت مين وعرفت هكول منين وأنت قولت هكول عارف أني مش هقدر أدفع المبلغ مع أنه عارف إني هاخد الأثار فقولي الحوار
ماجد: دا أزيد من سؤال بس أنا شخص محترم وهقولك
مريم: يعني مش علشان مربوط و خايف
ماجد: تؤتؤ علشان شخص محترم
أسمي ماجد أربعة وعشرين سنة أتخرجت السنة دي من حبيبة الملايين تجارة عاطل عن العمل و من غير ما تسأليني علشان كدا أنا أشتغلت مع هكول
مريم: بتخدم الأسياد بتاعته
ماجد: لا مسمحلكيش أنا راجل متدين
مريم: باين طبعاً علشان كدا أنت مع هكول وبعدين أربعة وعشرين سنة ليه و ليه قولتلي أن أسمك أحمد أنت محوراتي ليه كدا
ماجد: علشان أنا عارف كل حاجة عنك وعارف حكاية أحمد و أكيد بتكرهي الأسم دا فمش هتوافقي لكن لما أقول أسمي الحقيقي هيناسبك و كمان هو حرف الميم يعني أحنا لايقين على بعض
مريم: عرفت أزاي و ليه عرفت قول لأنك أستهلكت كلام كتير مني وأنا تعبت
ماجد: أنا تعبت أكتر من الربط أنتِ رابطة عجل قبل دبحه
مريم: أنا ماشية دلوقتي البيت ضلمة وأنت مربوط أي حركة زبالة هتعملها هزعلك في فرق بين البنت إلي كانت معاك في المطبخ وإلي قاعدة قدامك
ماجد: معاكي حق إلي في المطبخ كانت منكوشه ووشها في عيوب الدنيا وإلي يشوفها يقول واقفة في بير لكن إلي قدامي ملكة جمال الميكب بيعمل عجايب
مريم: واحد حقير أنا أصلاً ملكة جمال في كل أحوالي لو دخلت مسابقة ملكة جمال المجرة ومن غير ميكب هكسب أكيد
ماجد: مش كنتي ماشية أمشي يلا
مريم:دا بيتي يا ساقط جامعة
ماجد: عرفتي أزاي
مريم: أربعة وعشرين ولسة متخرج أكيد ساقط سنة أو سنتين
ماجد:وبكل فخر صنع في مصر سنتين سقوط
مريم: أنت حالياً دوشتني كفاية عليك كدا كلام
و تضع على فمه شريط لاصق و تخرج
_________________________
عند إيوان
إيوان بصدمة : أزاي
الظابط: تعالى معايا وهتعرف كل حاجة
كوثر: بس دا كان هيوديني لبنتي لأنو خاطفها أعمل أيه
الظابط: خدو
إيوان: حضرتك دي حماتي وبعد وفاة مراتي عقلها تعب جداً متخدش في كلامها
كوثر: أنا مش مجنونة هو وراني الفيديو كان بيعذبها على تليفونه
الظابط: هات تليفونك
إيوان: أتفضل
الظابط:هفتحه أزاي ما تنجز
إيوان يفتح التليفون والظابط يقلب في كل الصور والفيديوهات ميلقيش حاجة
الظابط: مفيش أي حاجة يا حجة
كوثر: أزاي دا من ساعة ونص تقريباً
الضابط: مشاكلكم العائلية مليش دخل فيها خدوه و تعالو ورايا
إيوان يميل عليها وبصوت واطي لا يسمعه أحد غيرها: أربعة و عشرين بالكتير وهبقى على الأسفلت وإلي معملتهوش في بنتك بقالي يومين هعمله فيكي بالزيادة يوم غير سعيد يا حماتي السابقة
كوثر: أحميلي بنتي يارب دا أنا مليش غيرها طب أسافر ولا أفضل في مصر لو سافرت مش هعرف أوصلها لوحدي دي بلد كاملة ولو فضلت مش هعرف أعملها حاجة
أنا هسافر كدا كدا مليش حاجة هنا هحرر بنتي من ظلمو وربنا معايا وتصعد على متن الطائره
_______________________
عند ملحم
ملحم بصدمة : إيوان متهم في قضية قتل أزاي
الشخص: ……….
ملحم: طب أقفلي أحاول أوصله
ليتصل عليه إيوان
إيوان: حالاً تكون في مصر أنا محبوس في قضية قتل
ملحم: يا للهول قتل يا إيوان قتل من أمتى وأنت بتتمسك لما بتقتل أحم قصدي لما بتقتل فار صرصار ضفدع أكيد أخدوك في حاجات شبيهه لكدا
إيوان: وسن
ملحم: مالها
إيوان: هي إلي متهم بيها وتبعتلي محامي يخرجني وتشوفلي وسن فين عايزها أول لما أخرج
ملحم: مش قولت أنها أتقتلت وأنك أتخدت بسببها
إيوان: أنا بفهم في حمار وحشي إلي قولته يتنفذ
ملحم: طب إكس و ج
إيوان: العب عادي إكس وأوو مع أي حد أتصرف وهات حد تلعب معاه ويغلق الخط
ملحم: طب دلوقتي هسافر مصر وهعمل أيه في أحلام أجبها ولا أخليها أنا لا ينفع أخدها ولا ينفع أخليها لازم أكلم وسن تاني تلاقي حل . ليدق عليها مرتان ولم يتلقى رد
ملحم بتركيز وصدمة: لو إيوان بيقول أن وسن ماتت فأنا كنت بكلم مين
ويجد أحلام تصوت ليدخل إليها سريعاً
ملحم: في أيه مالك
أحلام: كابوس وحش أوي
ملحم: طب أهدي أنا معاكي ويصب لها كأس من الماء
خدي مياه
أحلام: شكراً
ملحم: بقيتي أحسن
أحلام: طول ما أنا متحرره فأنا أحسن
ملحم: هسيبك ترتاحي تاني
أحلام: لا أنا خلاص صحيت دلوقتي دورك تحكيلي أنت مين وكل حاجة عنك
ملحم: أسمي بشار عمري خمسة وتلاتين مصري بس أنا لبناني
أحلام: أخر جزء مفهمتهوش
ملحم: أنا مصري بس مينفعش حد يعرف إني مصري وهما فاكرين إني لبناني .
أحلام: أنت بتشتغل مع إيوان في الموقع
ملحم:هو حكيلك
أحلام: بيعرف أني بكره الدم والقتل علشان كدا عمل الموقع دا من سنتين بش أفتكرتك مش زيه طلعت معاه ويا تري شريكم التالت موجود هنا ولا لسه
ملحم: شريكنا مين
أحلام: ملحم الكلب الزبالة الحيوان الحقير إلي مشافش تربية ولا أخلاق هو السبب في حالتي دي
ملحم: كفاااية حراام عليكي قصدي قصدي يعني حرام الشتيمة في الناس
أحلام: حرام وهو إلي زيكم يعرف معنى الحرام مشيني من هنا فوراً مش عايزة أشوف وشك
ملحم: أتهدي بقى دا أنتِ هريتيني شتايم
أحلام: قصدك أيه
ملحم: مش أنتِ بتشتمي فريقنا وأنا واحد من الفريق دا
أحلام: أنا شتمت ملحم مش بشار أنت ملحم
ملحم:أنا بشار أنتِ ملحم
أحلام:أنا أحلام
ليفتح أحد الباب ويقول
و أنا حبيبة الناس كلهااا
____________________
في القسم عند إيوان
إيوان:أقدر أعرف هخرج أمتى
الضابط: ربع قرن نص قرن تأبيدة أعدام الله أعلم أنت وحظك
إيوان: عايز كام وتخلصني
الضابط: أمممم واضح من براند لبسك هيرميس والرولكس أنك هتحاول بكل طرقك الشمال أنك تخرج بس هتعرف ترشي ظابط مخلص لبلده وبيلم الزبالة إلي كل شوية تنتشر أكيد لا وليك عليا هعملك تقرير يخلي حياتك الجاية في السجن
إيوان: محدش بحياته فكر يعلي صوته أو يقول كدا وأنت عملتها و زي ما قولت هخرج سواء بطريقة يمين أو شمال
ينادي الضابط على العسكري بصوت عالي
يدخل العسكري و يؤدي التحية
الضابط: خدو على التلاجة
إيوان: وقت خروجي من هنا هيبقى نفيك من الداخلية أستنى كام ساعة
ويأخذه العسكري ويغادر
أدخل
إيوان: أنتم دخلتوني مكان غلط قال تلاجة مش بحر هو أنا هعوم
العسكري: هي دي التلاجة
إيوان: طب هقعد فين و جزمتي هتبوظ مستحيل أدخل المكان دا
العسكري: بلاش كلام
إيوان: طب هقعد فين
العسكري: أتني رجلك
إيوان: خلاص أطلع
أشوفك يا وسن وهشرب من دمك بالشاليمو وأنا واثق أنك عايشة بس لحقتي تعملي كل دا أزاااي دماغي هتنفجر
________________________________
عند جين
إكس: في أييييه
جين: أعاني مش أضطراب النوم
إكس: طب أهببلك أيه
جين: سليني لحد ما أنام
إكس: سوداني أنا ولا لب
جين: ياااه كنت فضلت أدخل و أتف أدخل و أتف والعملية تتكرر كتشير أوي
إكس: في موز جمبك يا قردة
جين: نفسي مش جياني عليه طب ما تحكيلي عن نفسك
إكس: عايز أنااااام
جين: إلي بيبقى عايز ينام دا مش بيقدر يتكلم بيقول عايز أنام مش بيجعر
إكس: أنا بجعر
جين: لا أنا إلي بجعر يا طب عندك كام سنة يا إكس
إكس: أنتِ عايزة تعرفي ليه هتفرق
جين: أحنا مش في فوازير نيلي وشيريهان ما تقول يا أبو كمامة سودا و أنت جايلي ليه و أنت لابس أسود في أسود جاي عزا جاي تخطفني من مقبرة
إكس: والله لو سمعت صوت هربطك وتنامي مربوطة
جين: طيب خلاص هنام
ليدق هاتفه
إكس: هو أنا مش هنام في اليوم دا
جين: أحسن علشان تفتري عليا
إكس يرد على الهاتف
إكس: الو
المقتول رقم واحد هيبقى الظابط ليث .