معلش شوفي تميم ماله هبعت بس الايميل ده و هخده منك
قولت الكلام ده لخالتو كانت قاعدة بتتفرج على المسلسل بتاعها
-حاضر ركزي بس في شغلك و ملكيش دعوة بيه انا هروحله و هيسكت
تسلميلي يا حبيبتي
راحت تشوف ماله و انا قعدت اخلص كل الشغل الي ورايا و ملقتش اي صوت لتميم
قفلت اللاب و روحت على الاوضة لقيته نايم في حضن خالتو
-هاخده انا بقى و اروح خدي بالك من نفسك و هتصل بيكي بعد الفجر افكرك بالدوا
-ما تخليكوا بايتين معايا انهاردة انت تعبتي معايا حقك عليا
-ولا تعب ولا حاجة المهم تكوني كويسة بس معلش مضطرة اروح علشان مش عاملة حسابي في لبس و حاجات لتميم
-الي تشوفيه عارفة دماغك ناشفة و مش هينفع معاكي كلام
ابتسمت ليها بهدوء و شيلت تميم على كتفي و خدت شنطتي و تليفوني
-ابقي طمنيني لما توصلوا
-حاضر
بحب حنيتها رغم اني ساكنة في الشارع الي جمبها و بردو قلقانة عليا
نزلت من عندها و ركبت عربيتي وعشر دقايق كنت وصلت البيت ركنت العربية و شيلت تميم الي رايح جدا في النوم طلعت بيتي و اخيرا حسيت بهدوء دخلت اوضتي و حطيت تميم على السرير حبيبي تعب انهاردة و انا تعبت اكتر منه محتاجة آخد اجازة من حاجات كتير و بالفعل بعتت للمدير اني محتاجة آخد اجازة و دخلت اخدت شاور اهدي بيه افكاري الي مبتوقفش طلعت و لبست بيجامة مريحة و نمت جمب حبيبي بعد ما غيرتله هدومه
صحيت على الفجر صليت و اتصلت بخالتو افكرها بالدوا و مش مهم ترد المهم انها تسمع الرنة
خلصت و مكنش جايلي نوم برغم ارهاقي قعدت شوية سمعت بودكاست و حاولت مشربش قهوة غير لما انام و اصحى تاني
و بالفعل حاولت انام و نمت صحيت على رنة تليفوني و فرك تميم خدت التليفون و رديت على الي كنت متوقعة اتصالها
-الو يا سلمى
-ايه يا موج انت كويسة و ابنك كويس خدتي اجازة ليه؟
-اه احنا كويسين بس حبيت آخد اجازة افصل شوية لاني مرهقة
-مبلغتنيش ليه قلقت عليكي والله
بس اوكي افصلي شوية انتِ بجد محتاجة ترتاحي
-ماشي يا حبيبتي هقفل بقى لان تميم زعلان
-تمام سلميلي عليه الضغنن ده
-من عيوني يوصل باي
قفلت معاها و بصيت لتميم الي بيبصلي من الجنب و مديني ضهره و ابتسمت على حركاته
شيلته و حطيته قدامي على السرير
-حبيبي زعلان ليه
لف وشه عني:
-مش زعلان انا
-لا بجد ده كله و مش زعلان
بصلي و هو بيكشر بطفولة :
-انتِ مش بتلعبي معايا
-ما علشان كدة انا عملالك مفاجأة
-ملامحه اتبدلت لفرح علطول و سألني بسعادة احب اشوفها في عيونه:
-ايه هي
-امم مامي حبيبتك خدت اجازة علشان خاطر عيون تميم العسول و هتقضي اليوم كله معاه و يلعبوا سوا
فرح اكتر و قام حضني :
-هييي انت اجمل مامي في الكون
حضنته بسعادة اني قدرت افرحه
لبست تميم بعد ما خد شاور و قعدته على السرير يلعب بالدبدوب لغاية ما اخلص لبس
خدت شاور دافي و لبست دريس ابيض عليه ورد بلون البيبي بلو و فردت شعري و لبست صندل و خدت شنطتي و تميم و نزلنا من البيت
اتحركنا في اتجاه حديقة هادية كنت بحب اقعد فيها زمان
كنت عاملة ساندويتشات اكلنا انا و تميم
-مامي انا هروح العب في المرجيحة هناك
-ماشي و انا هقعد قريب منك هنا و عيني هتبقى عليك خلي بالك من نفسك
-اوكي
راح يلعب و انا طلعت رواية كنت بقالي كتير مكملتهاش اعتقد في احداث كتير نسيتها
كنت بين الحين و الآخر ببص على تميم و هو بيلعب
بس للأسف اندمجت شوية و ببص عليه ملقتهوش في مكانه بيلعب !
اتخضيت!
و دورت بعيني عليه و انا مخضوضة و متوترة لقيت
راجل شايله على كتفه و ماشي بيه!!
و تميم مبيديش اي رد فعل ولا بيصرخ ولا بيعيط!!
جريت عليه و انا بوقفه و بنادي على تميم
الراجل وقف و انا زقيته و خدت تميم منه
كانت عيني على تميم و انا بتفحصه و بزعق في نفس الوقت
-انتَ ازاي واخد ابني كدة و رايح بيه فين يا حرامي
و في وسط ما انا عماله بزعقله ملقيتش اي رد فعل منه!
و لاول مرة من ساعة ما وقفت معاه رفعت عيني ليه و ياريتني ما بصيت اتصدمت لما شوفته!!
»»»»»»»»»»»»»»»»»»»»»»»»»»»»»»»»»»»»»»»
جسمي كله اتجمد من الصدمة للحظة حسيت اني بحلم و مش مصدقة اني شايفاه
كل المشاعر الي دفنتها رجعت مرة واحدة، و الذكريات هاجمتني بعنف بالرغم اني كنت بقنع نفسي على قد ما اقدر اني نسيته و قدرت اعيش من غيره بس اتضح اني كنت بوهم نفسي و بكدب عليها
كنت عايزة اعيط و انهار من كتر الحاجات الي كدبت على نفسي فيها ليه يظهر و يبوظ كل خططي و يرجعني لنقطة الصفر حسيت عقلي بيقولي فوقي يا مغفلة انت لسة منسيتيهوش ولا اتعافيتي منه
~~~~~~~~~~~~~~~~~~~~~~~~~~~~~~~~~~
كنت باصصلها و انا سرحان فيها مش مصدق انها قدامي لسة حلوة زي ما هي لا دي احلوت اكتر
كان نفسي آخدها في حضني من كتر ما انا مش مصدق!
وحشتني جداً وحشتني اكتر ما كنت اتصور
بس فوقت من سرحاني و افكاري لما الجملة اترددت في دماغي كإن عقلي بيقولي فوق مبقاش ينفع
(ابني) معقول خلفت !!
لا يا رب تكون وداني باظت ولا يكون ده صح
بتمنى يكون ابن اي حد تاني الا هي
~~~~~~~~~~~~~~~~~~~~~~~~~~~~~~~~~~
~اتحمحمت و قولت : عاملة ايه يا موج
-الحمد لله بخير و انتَ عامل ايه يا ادهم
ادهم : كان نفسي اقولها بقيت كويس لما شوفتك بس مفيش حاجة قدرت تخرج مني ولا قدرت اقولها غير السؤال الي بيدور في بالي كإني عايز اثبت اكتر ان عقلي غلط و مستني اجابة غير الي عقلي مصدقها
~انتِ اتجوزتِ؟
موج : اتوترت اكتر ما انا متوترة
هو عبيط ازاي يسأل سؤال زي ده
-قولت بثقة مزيفة حاولت ابينها: اه و ده ابني تميم
~صدمتني باجابتها و ابتسمت بحزن و سخرية و قولت : غريبة
-رفعت حاجبي و قولت : ايه الي غريبة
~لا ولا حاجة
بس حاسس ان الولد مش شبهك
موج : يا ربي على اسئلته انا عايزة امشي بقى
-لا ما هو شبه باباه
~امم طيب بما اني شوفتك و اتقابلنا يعني عايز رقمك بقى لانك غيرتيه
-اه انا فعلا غيرته من زمان بس ليه عايزه
~لاني عارف انك بتحبي تصممي و ليكي تجارب تشهد بكدة فكنت هفتح شركة ليا هنا و محتاجك تصممي الديكور و الشكل و كدة
-اه تمام اتفضله
خد رقمي و كان نفسي جداً اديله اي رقم غلط
-اه صحيح انتَ كنت واخد تميم و رايح بيه على فين
~شاورت و انا بقول: كنت رايح اجيبله ايس كريم من هناك علشان كان بيجري و انا كنت معدي فخبط فيا و قولت اجيبله حاجة بدل ما يزعل
-تمام عايز حاجة بقى لاني لازم امشي سلام
موج : مستنتش رده و رحت جبت حاجتي من المكان الي كنت قاعدة فيه و مشيت و كل ده و هو متابعني بعينه
~باي باي يا تميم هات بوسة
تميم ساب ايدي و راح يسلم عليه !
هو يعرفه منين علشان يسلم عليه ولا يبوسه انا معرفتش اربي ابني والله هو اي حد يضحكله و يروحله باستسلام
و أخيراً ركبت عربيتي و خدت نفسي بارتياح
اتحركت و روحت البيت و مكنتش هروح عند خالتو لان انهاردة ابنها امير هيجيلها و اكيد مراته معاه و هي مش بتحبني فلو هي موجودة هناك انا مبروحش و بريح دماغي
خدت شاور و قومت اعمل غدا و انا لسة دماغي مشغولة كانت ناقصاه يا ربي
تميم راح نام بعد ما اكل و انا نضفت الشقة و قعدت ارتاح.
كنت بعمل سكين كير قبل ما انام و تليفوني رن كان رقم غريب فمهتمتش اني ارد
لكن كان في اصرار كبير من المتصل فرديت و انا نعسانة
-الو
فتحت عنيا على وسعها بعد ما كنت عايزة انام لما سمعت الرد !
بكرة الساعة خمسة محتاج اقابلك
الفصل الثاني
~بكرة الساعة خمسة محتاج اقابلك
موج : هو عبيط ازاي بيأمرني من غير اي نقاش كدة هو مين اصلا علشان يديني امر انفذه
-ايه ايه استهدى بالله كدة ، هو انتَ عبيط؟!
~الفاظك يا ماما ، بقولك محتاج اقابلك بكرة قولت ايه يعني غريب
-عايزني في شغل يعني؟
~اعتبريه اه، شوفي بقى استأذني جوزك انك خارجة شغل و ادي تميم لحماتك او اخت جوزك ،كتر خيري بقولك من دلوقتي علشان تعرفي تتصرفي و تكوني فاضية
و اعملي حسابك ده هيبقى نظام الشغل ممكن في اي وقت اطلبك
موج : استفزتني طريقة كلامة بجد بارد
-علفكرة بقى انا موافقتش اصلا اشتغل معاك و لسة مستأذنتش جوزي هو كدة كدة حبيبي مخليني اشتغل، لكن لسة هقوله اني هشتغل مع حد تاني
~زي ما قولت بكرة متتأخريش
موج : يلهوي على البرود ده مستناش ردي ولا اي حاجة مني و قفل التليفون في وشي اعععع بارد طب مش رايحة بكرة و يعمل الي يعمله بقى انا اصلا مشغولة بكرة و مش فاضياله طلعلي منين ده يا ربي
ندمت اني اديته رقمي يعني هو انا الوحيدة الي بتعرف تصمم ما يشوف حد غيري ، لو فاكر اني هصمم ببلاش يكون اهبل كمان مش عبيط بس
ادهم : مستفزة و بتعرف تلعب بالكلام و دي عادة قديمة فيها انا اصلا مش عارف ايه الي بعمله ده حتى بعد ما عرفت انها اتجوزت و خلفت، بس كل الي شاغلني اني الاقي اجابات لاسئلتي قبل ما اموت من كتمانها جوايا
~~~~~~~~~~~~~~~~~~~~~~~~~~~~~~
كنت قاعدة بعد الفجر و انا مش عارفة انام نفسي اق*تل عقلي على كتر افكاره ، الفترة دي عندي اوڤر اوڤر تفكير افتكرت ذكريات قديمة و فجأة لقيت دموعي بتنزل على خدي من غير ما احس ساعتها كرهت مشاعري و نفسي اني لسة بحن ليه بعد الي عمله فيا ،اصل ليه راجع و بيتصرف عادي ولا كإن حاجة حصلت كإنه ميعرفش اني اتجرحت منه و جاي بعد ما حياتي بقت حلوة يبوظ كل الي عملته كتمت عياطي و مسحت دموعي و كنت قايمة انام
~مامي انتِ فين
جملة حبيبي تميم قالها و هو جاي بيفرك في عينه بنوم
رحت ليه و انا بحضنه
-انا هنا يا حبيبي ايه الي صحاك دلوقتي
~مش عارف انام لوحدي تعالي
-حاضر هاجي معاك انا بس كنت بصلي و جاية اهو
رحت نمت على السرير و خدت تميم في حضني
بوسته من راسه و هو اصلا كان راح في النوم و نمت أنا كمان
~~~~~~~~~~~~~~~~~~~~~~~~~~~~~~
صِحيت الصبح و صَحيت تميم اديته شاور و لبسته و خدت شاور و لبست بنطلون فورمال على شيميز و لميت شعري ديل حصان و رحت اعمل فطار
كلت بسرعة علشان كنت متأخرة و اكلت تميم و خدته و نزلنا اتحركت بالعربية في اتجاه بيت خالتو
وصلت شيلت تميم على كتفي وطلعت خبطت و للاسف فتحلي امير
~ايه ده موج ازيك عاش من شافك
-الحمد لله بخير
معلش بس ادي تميم لخالتو و قولها احتمال اتأخر انهاردة ، هي صاحية ؟
~اه صاحية جوا حاضر هقولها
-تمام شكراً عايز حاجة
لقيت نرمين مراته جاية و هي بتحضنه و بتقف جنبه
*حبيبي يلا علشان الاكل هيبرد
~حاضر جاي
*ايه ده موج عاملة ايه ، معلش مشوفتكيش تعالي ادخلي افطري معانا
قولت بابتسامة صفرا زيها : الحمد لله كويسة لا معلش متأخرة على شغلي
وسبتهم و نزلت بجد عبيطة هو علشان امير اتقدملي قبل كدة ابقى بحبه و هو اصلا كان اتقدملي بسبب خالتو و طبعاً انا كنت قدامها اول واحدة و ابنها عايزة تفرح بيه و كلام الامهات ده و نرمين بقى من ساعة ما عرفت كدة شاكة اني اكون بحبه او عيني عليه انا مش كدة خالص و قولتلها مليون مرة انه اخويا ما لو كنت بحبه و عاوزاه كنت وافقت عليه لكن الكلام معاها ملهوش اي فايدة
وصلت شغلي و قابلت سلمى سلمت عليها و قعدت علشان ابدأ اشتغل
بعد شوية:
سلمى : موج مستر احمد عايزك
-ياربي متعرفيش عايز ايه
~لا ما اعرفش كنت عنده بسلم ملفات و قالي ابعتيلي موج
-تمام هروحله
قومت رحت لمكتبه و خبطت
~تعالي يا آنسة موج
-نعم حضرتك طلبتني
~اه بصي محتاجك تجمعيلي التصميمات الغير مباعة لآخر تلات شهور و تجيبيهم قبل ما تمشي او الصبح بدري
-حاضر بس يا فندم حصيلة آخر تلات شهور كتيرة
~اه عارف لو مش هتقدري تخلصيهم انهاردة هاتيهم بكرة بدري
-حاضر تحت امرك
عن اذنك
~اتفضلي
مشيت من عنده و انا عايزة اولع في نفسي بجد ايه ده ابو الاندبندت على الي عايز يشتغل
يا ربي انا كنت عايزة انزل اعمل شوبينج في حاجات ناقصة في البيت و لتميم
و طبعاً بعد الشغل الي خدته ده مفيش وقت اعمل حاجة
~~~~~~~~~~~~~~~~~~~~~~~~~~~~~~
~يااه يا موج انا هروح و آخد شاور و اقعد اكلم خطيبي و هعمل لنفسي موڤي نايت
-تصدقي انك باردة يا سلمى انا غلطانة اني بقولك على حاجة انتِ أصلا ندلة
كنت بتكلم انا و سلمى و احنا خارجين من الشركة مروحين
~يا بنتي اصلا احمد بيحبك علشان كدة اختارك تجمعي انت التصميمات
-اه ما هو باين الحب و لسة تميم لما اروح البيت مش هيسيبني اشتغل علشان امبارح ملحقتش العب معاه
~خلاص هاتيه عندي انهاردة و خلصي شغلك
-لا مقدرش استغنى عنه ، ده انا بسيبه الساعات بتاعة الشغل مع خالتو بالعافية ما بالك مش هينام في حضني كمان ، و انا عارفة اني مقصرة معاه كتير بس بحاول
~ربنا يعينك عليه و يخليهولك يا روحي
*موج
سمعت حد بينده عليا جماعة انا عايزة اغير اسمي بجد زهقت
التفت للصوت و الي كان ادهم كان واقف عند عربيته
سلمى : مين ده يا موج
-بصي روحي انتِ و انا هبقى احكيلك بعدين
~ايوة بقى العب طالما امشي انتِ يبقى فيها قصة حب مع المز ده صح
قالت الكلام ده و هي بتغمزلي
موج : امشي يا حيوانة غوري دلوقتي مش ناقصاكي
~ايه ده بقى هو الواد الحليوة ده هيغطي عليا
-امشي يا سلمي غوري بدل ما افتح دماغك دلوقتي حالاً
~حاضر متزقيش ماشية سلام
سلمى مشيت و انا رحت للي واقف بيتابعنا
قولت بضيق : خير عايز ايه و عرفت مكان الشركة الي بشتغل فيها ازاي
ادهم : انا قلتلك الساعة خمسة و الساعة دلوقتي خمسة ونص
و عرفت مكان الشركة ازاي اظن مش غريبة عليا يعني
-ادهم ارجوك انا مش فاضية انهاردة لما افضى ابقى اكلمك و نبدأ و لو مش هتقدر تستنى شوف حد غيري
~متهربيش مني انا عارف الي بيدور في دماغك و انا مش هضغط عليكي اصلا مش فارقلي حاجة ده كان زمان
-مش بهرب انا اصلا مفيش حاجة اهرب منها انت الي قليل الزوق و بجح و راجع تكلمني اكن مفيش حاجة حصلت
كلامي اثر فيه و اتعصب علشان لقيته بيقبض على ايده جامد
~اتكلم بعصبية و صوت عالي : ايه الي عملته ؟ انا لغاية دلوقتي معرفش انا عملت ايه !
- يا أخي انت لسة بتنكر مبتزهقش
على العموم مبقاش ينفع شوف طريقك و حياتك بعيد عني يا ادهم
موج : سيبته و مشيت و انا حابسة دموعي الي خلاني اتعصب اكتر الدبلة الي شوفتها في ايده
ما انا مستنية منه ايه يعني اكيد اتجوزها
بس خلاص خد الي هو عايزه عايز مني انا ايه تاني
جاي يبوظ حياتي لما لقى نفسه زهق ؟!
و انا مش هسمحله يعمل كدة يبقى في احلامه !!