حب لا يموت 💙
بقلم منى احمد راضي
الفصل الرابع
مر يومان وسالي لا تتحرك تبكي فقط والجميع حولها لكن يارا ذهبت إليها وقالت : مامي انا مش بعرف اذاكر لوحدي والميس زعلت مني يلا خفي بقى عشان تذاكري معايا وتقوليلي شاطره يا يارا انتي وحشتيني اووي
قامت سالي بتحريك يدها فقالت يارا بصوت عالي : مامي حركت ايديها مامي حركت ايديها
ذهب الجميع للغرفه وحاولو مساعدتها
نظرت لابنتها وقالت : يااااارا
فرح الجميع لذلك وهي ضمت ابنتها فهي سبب استجابتها وتحملها لكل شئ
نظر إليها مصطفى رضوان وقال بحب : حمد الله على سلامتك يا بنتي متعرفيش صوتك كان واحشنا ازاي
نظرت له بحب صادق فهي تعتبره مثل والدها
نظر لروان لتأخذ يارا وبالفعل قالت : ايه رايك بقى نروح نقطع فاكهه لمامي عشان تاكول
يارا : ايوه صح انتي اكيد جعانه يامامي مش هتأخر عليكي وقبلتها وخرجت مع روان
فاكمل : انا مش عايزك تخافي من أي حاجه وكفايه انك كنتي مخبيه علينا اللي كان بينكو بس عايزك تعرفي اني طردته من البيت ومش راجع غير في حاله واحده بس لو انتي طلبتي ده
ابتسمت له وقالت : انا عارفه انك جمبي ومعايا يا عمو بس ارجوك انا عايزه أطلق وامشي من هنا واخد بنتي معايا انا استحملت كتير اوي
قال رضوان : حتى لو طلقتك منه هتفضلي معانا هنا ده بيتك انتي وبنتك فاهمه هو اللي ملوش مكان وسطينا عموما انا مش عايزك تقلقي خالص وركزي بس كده عشان ترجعي تمشي وتتحركي وانا هبلغ الدكتور أن الحمد لله اتكلمتي
ابتسمت سالي لوقفته معها وحمدت الله كثيرا
بالجامعه كانت غاليه تستعد لدخول المحاضره فاوقفها هيثم : ممكن افهم تليفونك مقفول ليه
غاليه : حاجه متخصكش على فكره انا حره وبعدين انت ليك عين تجيلي هنا بعد اللي مامتك عملته سيبني في حالي ياهيثم
هيثم : مش هسيبك يا غاليه انتي عارفه انا بحبك قد ايه واللي امي عملته ده عارف ان ملوش مبرر بس مكنتش أعرف والله اكيد لو كنت اعرف كنت منعتها تعمل كده
غاليه : كلامك مش هيرجع امي ياهيثم وارجوك سيبني في حالي خليني اشوف مستقبلي وحياتي من غير امي هعيشها ازاي بعد اذنك وتركته وذهبت
ظل ينظر إليها لا يدري ماذا يفعل فهو حزين علي ما حدث
بالشركه اتصلت روان بسالم لتخبره بتحسن حاله سالي
سالم : الحمد لله احلى خبر يا روان والله ويلا بقى عشان ترجعي الشركه ولا استحليتي القاعده في البيت
روان : ابدا والله انت عارف كنت قاعده عشان يارا والحمد لله سالي بقيت احسن كتير عموما انا هنزل من بكره بإذن الله
طارق : ناوي تعمل ايه مع اخوك
سالم : ولا اي حاجة الباشا رافض انه يدخل الشركه أو حتى يرجع القصر تاني وانا بصراحه مفيش دماغ له
طارق : وايه اللي شاغل دماغك يا صحبي الشغل وكله تمام ولا حاجه بره الشغل وغمز له
سالم : والله انت فايق يا طارق انا فيا اللي مكفيني وانت بتهزر
طارق : مش عليا يا سالم انت لسه بتحب غاليه وبتفكر فيها ومتوتر عشان رجعت شوفتها تاني
سالم بحزن : وانا كنت بطلت اشفها اصلا انا من ساعه ما خطبت نرمين واتجوزتها وانا مراقب غاليه عارف كل تحركاتها يا طارق انا اللي تاعبني اني شفت نظره عنيها ليا عتاب كنت فاكر انها نسيتني وكرهتني بس اكتشفت انها لسه بتحبنى اه ما قالتهاش ومش هتقولها بس انا حسيتها يا طارق
طارق : اتجوزها يا سالم
نظر له سالم بحزن شديد وتركه وخرج من المكتب
تضايق طارق لصديقه وقال لنفسه : انا لازم اشوف حل معاكي يا روان انا تعبت
عاد سالم للقصر فوجد الجميع بجلس على الطعام فابتسم عندما وجد سالي تجلس معهم وقال : القاعده كانت رخمه من غيرك يا سالي
ابتسمت سالي وقالت : ربنا يخليك يا سالم
يارا بفرحه : مامي نطقت اسمي انا اول حاجه انا اللي خليت مامي تخف
حملها سالم وقال : طبعا طبعا انتي احلى حاجه في البيت ده اصلا متجيبي بوسه طيب
ضحكت يارا بصوت عالي والجميع أيضا
نظرت نرمين وقالت : انا مسافره بكره بالليل حد محتاج حاجه اجيبهاله
لم يرد عليها أحد فقالت والدتها : متنسيش هديتي يانونو فاهمه هزعل منك بجد
نرمين : متقلقيش ياحبيبتي مقدرش انساها والتفتت لتمسك يد سالم وقالت : وانت ياحبيبي هديتك اول حاجه هشتريها من هناك
لم يعلق على كلامها ولكنه قال : انا طالع محتاج ارتاح شويه بعد اذنكو
رضوان بغضب : مش تقومي ورا جوزك يا نرمين تشوفيه ماله
نرمين : اكيد ضغط الشركه يا خالو هيكون ماله بس
رضوان بصوت عالي : قلت قومي ورا جوزك يا اما هحلف ميت يمين مفيش سفر مفهوم
ارتعبت نرمين وذهبت سريعا خلف سالم
مر أسبوعان لم يحدث فيهم كثيرا
ابراهيم كما هو لا يستطيع دخول الشركه ولا العوده للقصر مره اخرى
سالي تحسنت حالتها كثيرا وأصبحت أقوى من قبل
نرمين سافرت وروان مازالت تتهرب من طارق
سالم يراقب غاليه كعادته
وبدأت غاليه امتحاناتها ولم تنتهي مضايقات هيثم لها
بالشركه ذهب طارق لمكتب روان لأنه قرر التحدث معها وعندما وصل فوجئ بوجود ساره معها
طارق : سوري افتكرتك لوحدك ازيك يا ساره
ساره : ازيك يا طارق عامل ايه محدش بيشوفك
طارق : لا ابدا والله موجود عامله ايه في الجامعه
ساره : لسه راجعه من الامتحان ادعيلي بقى
طارق : ربنا معاكي يارب روان كنت محتاج اتكلم معاكي ضروري
روان : سوري يا طارق بس انا رايحه مشوار مهم مع ساره ممكن ناجله
تعجبت ساره من تهربها ولم ترد
خرج طارق ولاحظت ساره تضايقه وقالت : انتي ليه كدبتي عليه ياروان
روان : عشان هيتكلم كلام انا معنديش اجابه ليه
ساره : طيب ممكن نروح مكان نتكلم سوا ايه رايك نروح المكان بتاعنا واهه نفضفض سوا
ابتسمت روان ووافقت
عندما وصلو انتظرت ساره كي تتحدث روان لكنها ظلت شارده
ساره : ساكته ليه ولا مش عايزه تتكلمي
روان : ابدا بس سيبك مني انتي عامله ايه دلوقتي لسه برده بتحبي الولد اللي قلتيلي عليه
ارتبكت ساره وقالت : قلتلك حبي من طرف واحد يا روان ومستحيل يكون من نصيبي لأنه مرتبط
روان وقد لاحظت حزن ساره : انا اسفه يا ساره والله مش قصدي ازعلك
ساره : روان انتي بتحبي حد تاني غير طارق مش كده
روان بصدمه : ايه اللي بتقوليه ده يا ساره
ساره : اللي شيفاه يا روان واحده ع طول ماسكه الفون بس مش بتكلم خطيبها يبقى ايه عموما انا مش هقولك غير حرام عليكي اللي بتعمليه في طارق هو مستاهلش منك كده
روان : عارفه ياساره عارفه بس مش عارفه اعمل ايه انا لو سيبته علاقته ب سالم هتتهز
ساره : معتقدش يا روان اللي بينهم أكبر من كده بكتير بالعكس ممكن تتهز ف حاله واحده لو عرفو انك بتحبي واحد تاني وبعدين انا مستغربه ازاي تحبي واخد غير طارق ده انسان محترم وجدع وبنات كتير يتمنون
روان : ممل يا ساره ممل بحس معاه مفيش جديد حياتنا هتبقى شبه سالم ونرمين وانا مش هقدر استحمل
ساره وقد لاحظت حزن روان فقالت : خلاص خلاص احنا مش عايزين زعل احنا جايين نفضفض وبعدين انا غلطانه اصلا سايبه مذاكره وامتحانات وقاعده معاكي يلا قومي روحيتي
بالغرفه كانت امل تسرح لغاليه جزء لم تفهمه فقالت امل : مالك يا غاليه اول مره تكوني كده ايه اللي شاغل بالك
غاليه : هااااا لا مفيش حاجه بس تعبانه شويه
امل وقد لاحظت كذب غاليه : انا مش هفرض نفسي واصمم بس هتحكي لوحدك وساعتها هقولك مش فاضيه
ضحكت غاليه وقالت : انتي بتتقلي عليا ماشي يا امل انا هوريكي وأخذت المخده وظلت تضرب امل بها
سمعتهم والده امل ودخلت عليهم وقالت : في ايه يابنات مالكو
غاليه بضحك : دي امل مش فاهمه جزء في المنهج فكنت بشرحهلها عملي
ضحكت والده امل وقالت : ربنا معاكو ياحبايبي متسهروش عشان الامتحان بكره
وتركتهم وخرجت من الغرفه
في الصباح استيقظ سالم واستعد للذهاب للشركه لكن اوقفه والده وقال : مفيش اخبار عن اخوك
سالم : ابدا ياباشا هو حاول يدخل الشركه ومنعوه زي حضرتك ما أمرت
قال والده : طيب متعرفش بيصرف منين قاعد مع مين
سكت سالم ولم يرد أن يخبره الحقيقه وقال : اللي اعرفه ان عند واحد صاحبه عموما شوف انت عايز ايه ياباشا وانا معاك
ابتسم والده وقال : ربنا يخليك لينا يا ابني
بشقه هدى السكرتيره كانت تستعد للخروج
ابراهيم : رايحه فين
هدى وقد طفح منها الكيل بسبب إبراهيم : نازله اشوف شغل عجبك قعدتي جمبك دي
ابراهيم : قلتلك اصبري كلها كام يوم وهرجع الشركه تاني اصبري
هدي بغضب : من ساعه ما جيت وانت بتقول كده ومبيحصلش حاجه مراتك بقيت زي الفل ومحدش كلمك مستني ايه تاني يحصل عشان تتأكد انهم مش عايزينك تاني
ابراهيم : متستعجليش قلتلك قريب اوي الباشا نفسه اللي هيتحايل عليا عشان ارجع
ضحكت باستهزاء عليه وقالت : نفسي اعرف ايه الثقه دي جيبها منين
ضحك ولم يرد عليها وتركها وخرج من الشقه
بفرنسا كانت تجلس نرمين مع صديقتها بإحدى المقاهي
نرمين بضحك : قلتلك هيجي عشان تعرفي بس اني مش سهله وجيبته ع وشه كمان
قالت صديقتها : يخربيتك مفيش حاجه مستحيل معاكي حطيتيه ف دماغك ووقعتيه
نرمين : هو انا اي حد ولا ايه وهنا رن هاتفها فوجدتها والدتها : ايوه يا مامي انتي كمان وحشاني
تهاني : هترجعي امتى يانرمين طولتي اوي وكمان مش بتسالي على جوزك ليه
تاففت نرمين وقالت : يووو يا ماما اقفلي انا مش عايزه نكد اقفلي وأغلقت معها
نظرت صديقتها وقالت : مالك في ايه حد تعبان ولا حاجه
نرمين : لا كبرى دماغك انا مش هخلي حاجه تنكد عليا خالص ونظرت ناحيه الشاب ولم تجده لكنها صدمت عندما رأته يقترب منها وقال : انا عيسى الطيار ممكن نتعرف
نرمين بثقه : اهلا وسهلا
نظر إليها مطولا وقال : كنت حابب اعزمك على العشا ونتعرف على بعض لو مش هضايقك طبعا
نرمين : لا وهضايق ليه مفيش مشكله
ابتسم لها وتركهم
ضحكت نرمين لشعورها بالتغلب على صديقتها
نظرت إليها صديقتها وقالت : سالم مستاهلش منك كده يانرمين حرام عليكي
لم ترد عليها وتركتها وعادت لغرفتها للاستعداد للعشاء