CMP: AIE: رواية غلطة اخي الفصل الرابع
أخر الاخبار

رواية غلطة اخي الفصل الرابع


   
 رواية غلطة أخي
الفصل الرابع
بقلم : عبير سليم
💓💓💓💓💓💓

 بسم الله الرحمن الرحيم

تعالى في كتابه الكريم

" قل هل يستوي الذين يعلمون و الذين لا يعلمون إنما يتذكر أولو الألباب" 

و يقول سبحانه و تعالى
"ان الله لا يضيع أجر من أحسن عملا"

و يقول سبحانه و تعالى
"و قل اعملوا فسيرى الله عملكم و رسوله و المؤمنون"
           صدق الله العظيم 
ان الله هو اللطيف الخبير الذي لا تخفى عنه خافيه في السموات أو في الأرض وحده يعلم كل الأمور ظاهرها و باطنها أعلم بنا من أنفسنا
يرى من اجتهد و سعى فيثيبه و يكافئه و لا يضيعه يعطيه بقدر ما اجتهد و أكثر فإن الله هو الكريم هو العدل
 
نعم هو الحكم العدل الذي لا يضيع أحد و لا يقدر لنا الا ما فيه الخير لنا و لمصائرنا

فكم من مرة سعينا لشئ و تمنته قلوبنا و حدث ما لم نكن نريده فنحزن و تعبس وجوهنا و ننسى ان كل ما قدره الله لنا هو الخير لنا

فلنقل دائما اللهم خر لنا و اختر لنا اللهم قدر لنا الخير و اصرف عنا الشر فانت اعلم الاعلمين

 😘مش قادرة تقعد اعصابها متوترة جدا حتموت من القلق و الخوف الدموع نازله على وشها كله و مش قادرة تسيطر عليها و لا قادرة تمنع نزولها غصب عنها مش بايدها

رافعه ايدها للسما و بتدعيله ربنا من كل قلبها : يا رب انت العالم بحالنا يا رب اقف معانا يا رب و غلاوة حبيبك النبي الغالي تريح قلبي و تطمني عليه يا رب

يا رب متضيعش تعبه و لا سهره الليالي يا رب

يا رب يرجعك يا بني مجبور الخاطر يا رب

عبد الله : اهدي شويه يا كوثر مش كده حرام عليكي نفسك انا خايف عليكي حيجرالك حاجه

كوثر : عبد الله الله يخليك ابعد عني دلوقتى

عبد الله : يا كوثر انتي صعبانه علية محدش بياخد غير نصيبه و لكل مجتهد نصيب و احمد اجتهد و ذاكر و ان شاء الله ربنا مش حيضيع تعبه

كوثر : يا رب يا رب يا عبد الله يا رب هو اتأخر كده ليه ده بقاله اكتر من ساعه

عبد الله : اكيد في زحمه مش كل الطلبه معاه

كوثر : يكون بعد الشر مجابش مجموع كويس و مش راضي ييجي
لا لا الله لا يقدر و لا يكون أعوذ بالله من الشيطان الرجيم ان شاء الله خير ان شاء الله خير

عبد الله : لا حول ولا قوة الا بالله العلي العظيم يا حبيبتي اللي انتي بتعمليه ده غلط عليكي و انتي عندك السكر كده السكر حيعلى عليكي
و بعدين هو فين أيمن

كوثر : راحله على السايبر و انا قايلاله يبجي جري يطمني و هو كمان مجاش اهوه

عبد الله : افهمي بس يا كوثر بصي متنسيش ان النهارده نتيجة الثانويه العامه بتاعة الجمهوريه كلها و اكيد النت حيبقى تقيل ومش راضي يحمل

كوثر : لا انا مش قادرة استنى اكتر من كده انا نازلالهم

عبد الله : لاء خليكي انتي و انا حروحلهم

كوثر : اه عشان تروح تقعد معاهم انت كمان و تسيبوني بقى انا اتجنن هنا

عبد الله و هو واقف في البلكونه يلمح أيمن جاي يجري و الفرحه مالية وشه

عبد الله : ايمن جه يا كوثر
كوثر : أيمن جه

كوثر : و فين احمد احمد مش معاه ليه يارب استر استر  يا رب

تلبس اسدالها بسرعه و تنزل جري في الشارع

ايمن بفرحه و هو بيقلد الستات : لووولي مبروك يا ام أحمد الف مبروك لنجاح ابنك يا اختي

كوثر : طمني يا ايمن طمني و غلاوتي عندك قللي أحمد عمل ايه نجح جاب مجموع كويس

ايمن : هههه يعني الزغروته اللي زغرتها دي مش نافعه معاكي اتحزم و ارقص يعني اعملها و ربنا و انا يعني حعملها لاغلى من ابو حميد

افرحي يا كوثر ابنك نجح يا ماما و جاب ٩٨ ٪ يعني بقيتي ام البشمهندس رسمي نظمي ارتاحتي كده يا اختي 

كوثر : ابني نجح أحمد نجح و حيبقى مهندس خلاص بجد بجد يا أيمن طب احلف

أيمن : و احلف ليه اهوه ادي الجمل و ادي الجمال و هو جه اهوه روحي اسأليه

تلتفت كوثر على أحمد اللي بينادي عليها في الشارع بعلو صوته : ماما
نجحت يا ماما

نجري عليه كوثر و تاخده في حضنها و تفضل تبوس فيه و هو يشيلها و يحضنها و يلف بيها في  وسط الشارع كله ادام الناس كلها و صوت ضحكته عاليه جدا

و كل الستات يقفوا في الشبابيك و البلكونات يزغردوا و يباركوا و يهنوا
الكل جه عليهم  يباركلهم و عبد الله هو كمان نزل و باسه و حضنه

فرحه فوق الوصف مفيش حاجه تقدر توصفها و لا تعبر عنها
فرحة طالب تعب و اجتهد و سهر الليالي
و فرحة أم تعبت و ضحت و سهرت تدعي ربها طول الليل

و فرحة اخ باخوه و فرحة اب بنجاح ابنه الكبير و انه رفع راسه في وسط الشارع كله

و ييجي صاحب القهوة اللي جمب  بيتهم يحب يشاركهم فرحتهم فيوزع حاجه ساقعه على الشارع كله و يشغل اغنية عبد الحليم حافظ و حياة قلبي و افراحه بأعلى صوت

وكمان كلهم يباركوا لصاحبه عبد العزيز و لفريده كمان طبعا مش كلهم ولاد حته واحده

ما شاء، الله عليهم كلهم اجتهدوا و ذاكروا و تعبوا والنهارده يوم فرحتهم الكبيرة
بجد مفيش أحلى من فرحة النجاح

وحياة قلبى وافراحه .. و هناه فى مساه و صباحه

ملقيت فرحان فى الدنيا زى الفرحان بنجاحه

كان حلم جميل فى خيالنا .. و مغبش فى يوم عن بالنا

وبنالنا قصور .. و فرشها زهور

فى حياتنا و مستقبلنا

ولقيتنى فى عز هنايا .. و الدنيا فرح و يايا

بتهنى حبايبى معايا .. و تقول للكل ارتاحوااااا

ملقيت فرحان فى الدنيا زى الفرحان بنجاحه 
الناجح يرفع ايديه هيه
غنى فى عيد مواعيده هيه

و نقول و نقول دايما

و نجاحنا يطول دايما

دايما على طول دايما

داااايما على طول دايما على طوووووووول

دايما .. دايما .. دايما دايما دايما

قاعدين في الشقه واخداه في حضنها و دموعها مغرقه وشها

احمد و هو بيمسح لها دموعها : مش كفايه دموع بقى  يا امي مش الحمد لله ربنا نجحني و وصلت للي كان نفسك فيه طول عمرك يبقى ليه الدموع دي دلوقتى بس

كوثر : دي دموع الفرحه يا أحمد دموع فرحتي بيك يا قلب امك

أيمن : اما انا كنت ناوي اعمل فيكوا حتة مقلب بس صعبتوا علية و ربنا وخصوصا انتي  يا ماما قلت الست دي حتروح فيها 

أمنيه : كنت حتعمل إيه يا أيمن
ايمن : كنت حقولكم انه سقط و اشوفكم حتعملوا ايه

كوثر : اعمل ايه يا لهوي ده انا كنت طبيت فيها سكته
أحمد : ألف بعد الشر عنك يا ست الحبايب
أيمن : ما نا عشان كده قلت بلاش يا ولا الطيب احسن بدل ما يطردوك من البيت

عبد الله : عقبالك انت كمان يا بطل
أيمن : لاء بصوا كده و ركزوا معايا من دلوقتى اه عشان اللي أوله شرط اخره نور

انا محدش ليه دعوة بية انا واحد صحتي على ادي و راضي بأي حاجه انا لاحمل سهر طول الليل و لا افضل اجري ورا المدرسين

كوثر : أيوة يعني ناوي تفشل و اللا ايه انا مش فاهمه

أيمن : استغفر الله العظيم يا رب بابا هو حضرتك متأكد ان الست دي امي

عبد الله : ايوة طبعا الست دي امي قرفانه طول عمرها ماشلتش غير همك و انت اخر صبرها

كوثر : ههههههههه ربنا يفرح قلبك يا عبد الله

احمد تعالى يا حبيبي استريح شويه انت مكنتش بتنام الايام اللي فاتت دي كلها عشان بالليل حتلاقي الكل جاي ببارك و يهني

احمد :  حاضر يا ماما بس بشرط
كوثر : انت تتشرط زي ما انت عاوز يا بشمهندس

أحمد : انام في حضنك

ايمن : طب و انا بقى حروح عند مصطفى

كوثر : هو انت ايه حكايتك يا ولا بقيت لازق على طول عندهم كده ليه خليك حسيس يا بارد الناس حتزهق منك

أيمن : لا اطمني هما بيحبوني اوي
عبد الله : ربنا يحبب فيكم خلقه يا ولادي يا رب

أمنيه : خدني معاك يا أيمن العب مع مها
أيمن : يا للا بينا يا منتي 
عبد الله : ماشي و انا بقى حقوم انا كمان اريح شويه

في أوضه احمد

كوثر : الحمد لله يا حبيبي الحمد لله والشكر لله عقبال الشهاده الكبيره يا رب
أحمد : يا حبيبتي يا ماما ربنا يخليكي لية يا رب كله بفضلك انتي يا ماما

كوثر : لا يا حبيبي انت اللي ذاكرت و سهرت و تعبت و الحمد لله ربنا مضيعش تعبك

احمد : لا يا ماما حضرتك اللي لولا تشجيعك لية و خوفك علية و انك دايما موفرالي الجو الهادي مكنتش عرفت و لا قدرت انجح و لا اجيب مجموع كويس

انا متشكر اوي يا ماما متشكر عشان كل حاجه حلوة عملتيهالي انا لولاكي مش عارف كان حيحصللي ايه و لا كنت حبقى فين

كوثر : اخس عليك يا احمد كده بردو قلبك يطاوعك تقول كده

 هو في ولد يشكر أمه على اللي عملته معاه ده واجبي ناحيتك و حقك علية يا بني

انت ابني يا أحمد صحيح مش انا اللي خلفتك لكن انا اللي ربيتك و كبرتك 

 و اخدتك في حصني من و انت لسه عندك يومين  يومين بالعدد

 صحيح مرضعتكش من صدري لكن رضعتك حبي و حناني عليك

احمد : انا عرفت انك انتي و ماما الله يرحمها كنتم صحاب

كوثر : يا حبيبي انا و امك هناء الله يرحمها كنا اكتر من الاخوات كنا صحاب اوي

أحمد : ماما ممكن تحكيلي كل حاجه انا مسالتكيش و لا سألت حد قبل كده لكن انا كبرت و نفسي اعرف و افهم كل حاجه انا كل اللي اعرفه ان ماما ماتت و هي بتولدني و ان بابا اتجوزك و حضرتك ربيتيني

 لكن انا عاوز افهم كل حاجه ممكن يا ماما

كوثر و هي بتمسح دموعها : هناء الله يرحمها كانت اختي مش صاحبتي من يوم ما وعينا على الدنيا و احنا اكتر من الأخوات و لما دخلنا المدرسه كنا في نفس الفصل قاعدين في نفس التخته من سنه اولى ابتدائي لحد ما خدنا دبلوم التجارة

كنا بنلبس زي بعض بنتكلم زي بعض مبنخرجش غير مع بعض لدرجة ان في ناس كتير كانوا فاكرينا اخوات مش صحاب

كبرنا و حبنا لبعض كبر جوانا كنا بنفرح لفرح بعض و بعد ما خلصنا دبلوم التجارة و نجحنا  أبوك عبد الله أتقدم يخطبها وطبعاً كنت انا عارفه الخبر اول واحده

فضلت معاها خطوة بخطوة من اول يوم خطوبه لحد ما اتجوزوا
كل حاجه ليها او للبيت ده اشتريناها سوا فستان الفرح نقيناه سوا

انا اللي فارشه الشقه دي بايدي
البرواز و الساعه و الفاظه اللي في الصاله بره متعلقين انا اللي جبتهم لها هديه لما اتجوزت هي و ابوك

بعديها المفروض كنت انا كمان حتخطب لابن خالي كانوا من و احنا صغيربن يقولوا محمد لكوثر  و كوثر لمحمد و انا من كتر كلامهم كنت خلاص ظبطت حياتي  على كده

 لحد ما عرفت فجاة انه خطب واحده زميلته في الجامعه اصله ياسيدي دخل الكليه و قال اني منفعش ليه

لأنه عاوز واحده تكون في نفس مستواه في التعليم ليه يعني هو دبلوم مش شهاده بردو جته الهم هو كمان ملوش في الطيب نصيب

أحمد : هههههه و الله عسل يا ماما
و بعدين

كوثر : وقتها حالتي كانت وحشه اوي و كنت بعيط ليل و نهار و محدش كان بيخفف عني غير امك كانت تيجي و ابوك في الشغل تقعد معايا و تواسيني و تقوللي ان اكيد ربنا شايلي الأحسن

سبحان الله ما كنتش تعرف ان الأحسن ده يبقى جوزها

لحد الحمد لله ما بقيت احسن من الاول بكتير

و عدت الايام و مرت الشهور لحد امك ما حملت فيك و طبعا كنت انا اول واحده اعرف قبل حتى ابوك عبد الله ما يعرف

الدنيا مكنتش سايعاها من الفرحه و ابوك حق الله كان طاير من الفرحه طير لدرجة انه جابلها واحده تخدمها و تعمل الاكل بدالها عشان ميتعبهاش
 و هي كانت تقول انا حبقى ام البشمهندس أحمد

بس جت في الاخر بقت تعبانه كده و شكلها مش عاجبني و زي ما يكون سبحان الله قلبها كان حاسس

و في مرة كنت هنا في الشقه دي و قاعده معاها لقيتها بتكلمني و بتقوللي : مش عارفه ليه يا كوثر قلبي مش مطمن مش مرتاحه

كوثر : ليه بس يا نوءة
هناء : حسه اني مش حقوم منها يا كوثر

كوثر : ألف بعد الشر عنك ان شاء الله حتقومي بالف سلامه و حتربي أحمد و حتفرحي بيه

هناء : كوثر انا عاوزة اامنك امانه
كوثر : خير يا حبيبتي
هناء : لو حصللي حاجه تخللي بالك من ابني ده هو ده اللي حيبقى الذكرى الوحيده مني امانه عليكي تسالي عليه و تطمني  عليه و متسيبيهوش

كوثر : الف بعد الشر فال الله و لا فالك ايه الكلام ده حرام عليكي ده الرسول قال بشروا و لا تنفروا

و ربنا قال انا عند ظن عبدي بي
لازم تستبشري خير و بعدين لا نتي تعبانه و لا عندك حاجه بعد الشر يبقى لبه متولديش و تقومي بالف سلامه لبيتك و جوزك و ابنك

هناء : مش عارفه يا كوثر بس ده احساسي و خايفه اوي عبد الله صغير و اكيد لو جرالي حاجه حيتجوز و انا مش عاوزة ابني تربيه مرات اب خللي امي تاخده تربيه عندها

كوثر : كفايه بقى و الا و ربنا حقوم امشي الله ايه الكلام اللي  انتي بتقوليه ده و انتي عارفه اني مقدرش اعيش من غيرك يا هناء

هناء : معلش يا كوثر بس عاوزة اطمن

كوثر : و ليه ليه يا حبيبتي خايفه كده ليه

هناء : من حالة ساميه بنت خالتي الله يرحمها و اللي بعد ما امها ماتت و ابوها اتجوز بهدلوا البنت و طلعوها من المدرسه و في الاخر جوزوها لواحد معفن مبهدلها و ولا بيسالوا فيها و كأنها ماتت مع امها

اليتيم يتيم الأم يا كوثر والعيل لما امه بتموت قيمته بتقل و بيتعامل كأنه ابن ناس تانيين

عبد الله طيب و محترم بس انا معرفش ايه اللي ممكن يحصل بعد كده

كوثر و هي بتحضنها و تبوسها : متخافيش متخافيش يا حبيبتي ان شاء الله حتقومي بالف سلامه يا هناء و محدش حيربي ابنك غيرك يا حبيبتي قولي يا رب

هناء : يا رب يا كوثر يا رب 

و جت يوم الولاده و انا اللي جهزت معاها الشنطه اللي كان فيها حاجتها و حاجتك يا حبيبي 
قالتلي متسيبينيش قلتلها و لا انتي تسيبيني

و كنت معاها انا و ابوك و جدتك  الله يرحمها و جدك

و اول ما خرجت الممرضه بيك كلهم فرحوا اوي لما شافوك

انا مبصتش عليك كان كل همي اطمن انها قامت بالسلامه

لقيت الممرضه بتقول ان حالتها صعبه و عندها نزيف جامد و الدكتور مش، عارف يوقفه

المستشفى اتقلبت و بقوا الدكاترة داخلين طالعين و انا مش مبطله عياط  و عماله ادعيلها ربنا  لحد ما في الآخر خرج الدكتور و قال لنا  : البقاء لله شدوا حيلكم يا جماعه 

كوثر : انت انت بتقول ايه انت بتتكلم عن مين يا دكتور

الكل كان بيعيط و امها بتصوت و عبد الله واخد احمد في حضنه و نازل عياط

كوثر : لاء متعيطيش لاء هناء، عايشه الكلام ده غلط مش صح

دخلت اوضة العمليات و لقتهم مغطيين وشها بالملايه رفعتها من على وشها : هناء يا هناء  قومي يا حبيبتي قومي يا هناء قومي و النبي عشان خاطري و النبي متسيبينيش لاء يا هناء

هناء انتي ولدتي يا حبيبتي و جبتي احمد يا للا بقى بصي هو بيعيط برة عاوزك ترضعيه يا للا قومي بقى مش  عاوزة استعباط

طب  انتي مش قلتيلي متسيبينيش انا اهوه معاكي عاوزة تسيبيني انتي بقى ليه
هناء يا هناء بصي طيب اسمعيني

الدكتور : مينفعش كده يا آنسه اتفضلي اخرجي من هنا و حرام عليكي اللي بتعمليه ده الأفضل تدعيلها هي خلاص راحت للي خالقها مبقتش معانا خلاص و هي أكيد حسه بيكي و سامعاكي بس بقى بيننا و بينها حاجز مش حينفع ترد عليكي طمنيها انتي بس قليلها اي حاجه تريحها طمنيها على ابنها لكن بلاش عياط مش حيفيدها بحاجه ادعيلها ربنا يرحمها و هي ان شاء الله ربنا يحتسبها من الشهداء

كوثر : هههههه هههههه انت بتقول خلاص مبقتش في دنيتنا معناه ايه الكلام ده يعني خلاص مش حشوفها تاني

راح القلب الطيب راح الحضن اللي انا فيه برتاح
لاءءءءءءءءءة لاءءءءءة

ما أصعب أن يفتقد المرء  شخص كان عزيز و غاليا عليه بل و الأصعب اذا كان له كل الحياة

اللهم ألهم قلوبنا الصبر و السلوان على من افتقدناهم  و الهمنا الصواب حتى لا نفقد عقولنا

و مهما بلغ الحزن قلبنا لن نقول الا ما يرضي الرب

انا على من افتقدناهم محزونون و انا  لله و انا اليه راجعون

بعد مرور يومين
في المستشفى تفيق فتجد المحاليل معلقه في يدها و بجوارها امها مرتديه الثوب الأسود الذي لا يدل الا على الموت

تتذكر ما حدث فتبكي و لكن بلا صوت فلم يعد له فائده الحديث بعد ان ذهب كل شئ

والدتها : عيطي يا كوثر متكتميش حزنك يا حبيبتي

كوثر : هناء ماتت يا ماما صاحبتي و اختي و حبيبتي راحت خلاص
راحت و سابتني

والدتها : امانه و استردها صاحبها حنقول لاء حنعترض على حكمة ربنا

كوثر : بس انا مش حقدر اعيش من غيرها
والدتها : حتعيشي يا حبيبتي حتعيشي  و حتنسي

كوثر : لاء انا مش ممكن انسى هناء دي اختي و حبيبتي

والدتها : بصي عاوزة ترتاحي تعالي معايا شوفي امها شوفي ابنها يمكن نارك تبرد لما تشوفي حته منها قدام عينيكي مش بيقولوا اللي خلف مماتش

بعد مرور حوالي ساعتين
واقفه على باب شقة امها  و مامتها ماسكاها من ايدها عشان متنهارش

مش قادرة تدخل الشقه و هي عارفه انها مش حتكون موجوده

شايفه ناس قاعدين لابسين اسود كانوا مش كتير لأن ده كان تالت يوم عزا  و معظم اللي بيعزوا خلاص جم مرة و انتهينا

الموجودين دلوقتى القريبين منهم بس دخلت و اول ما عنيها وقعت عليهم كانت على ام هناء لقتها بتفتح لها دراعاتها

جريت كوثر عليها و فضلوا يعيطوا في حضن بعض و يواسوا بعض هما الاتنين

كوثر : هناء ما ماتتش يا طنط روح ايوة هناء عايشه هي بس راحت مكان تاني احلى من هنا بكتير و مستنيانا لغاية ما نروحلها

روح : قوليلي ماما متقوليش طنط تاني كفايه مش حسمعها منها تاني يبقى اسمعها منك انتي يا حبيبتي

كوثر : ربنا يصبر قلوبنا على فراقها يا رب

تسمع صوت طفل بيبكي ايوة هو صوته صوت احمد ابنها حته منها سابتها في الدنيا مكانها عشان تقولهم دايما انا عايشه اهوه

تقوم على الصوت و تفتح الباب تلاقي واحده شايلاه و بتحاول تديله الرضعه  و أحمد رافض ياخدها و بيعيط جامد

تلاقي كوثر نفسها بتاخده منها و تبصله تحسه بيكلمها كأنه بيسالها عن أمه

طفل عمره يومين معالم وشه لسه مبانتش لكن هيا شايفه هناء فيه تحضنه بشده و تبكي تبكي
و تكلمه كأنه فاهمها و سامعها انت عارف انا مين انا اللي حاخد بالي منك و مش حسيبك لحظه واحده اطمن يا احمد اطمن يا حبيبي

تقعد و تسمي الله و تديله الرضعه و احمد ياخدها و يبطل عياط و ينام فحضنها

خدته في حضنها الباب اتقفل عليهم هما الاتنين

و نام و شبع نوم و هي كمان نامت معاه
فتحت عليهم روح الباب ابتسمت و اتمنت انها تفضل معاه على طول

مرت الأيام و كوثر تقريبا مقيمه عند ام هناء خصوصا و ان والدها من وقت موت بنته مبقاش بيسيب المسجد ملقاش غير الصلاه هي اللي ممكن تصبر قلبه على فراق ابنته

و اخوها متجوز و عايش حياته مع مراته و ولاده و مبيجيش غير نادرا

 يعني طول الوقت كوثر و روح و أحمد مع بعض و اهل كوثر كانوا مقدرين و كانوا سايبينها على راحتها و خصوصا و انها خلاص بقى روحها فيه بقى كل حياتها كانت بتاكله و تشربه و تغير له و تاخده للدكتور و كمان يوم التطعيم اخدته هي و طعمته و الناس في الوحده الصحيه كانوا بيتعاملوا معاها على اساس انها مامته

لحد ما في يوم و احمد عنده تلت شهور دخلت كوثر على روح لقتها بتعيط

مالك يا حبيبتي في ايه
روح :خايفه اوي على احمد يا كوثر
كوثر : من ايه هو احمد فيه حاجه يا ماما
روح : خايفه عليه من اللي جاي يا كوثر ابوه كان هنا من يومين بس وقت ما كنتي بيه عند الدكتور

 ولمحلي انه عاوز يتجوز  انا مبقولش حاجه ده حقه هو لسه شاب صغير و ملحقش يفرح

 المشكلة انه عاوز ياخد احمد و بيقوللي محتاج ابني في حضني طب انا اعرفه لكن اعرف اللي حيتجوزها دي ازاي اعرف منين حتعمل ايه معاه و ابوه في الشغل مش عارف و لا داري باللي بيحصل 

كوثر : عاوز يتجوز براحته لكن احمد لاء احمد لاء ارجوكي يا ماما متخليهوش ياخد أحمد مني يا ماما

روح : ما هو انا كمان صحتي على ادي و ان عشتله النهارده مش حعيشله بكرة

كوثر : انا معاه مش حسيبه ابدا اوعدك عمري ما حسيبه ده هو اللي مصبرني على فراقها انتوا لو اخدتوه مني انا حموت

روح : يا حبيبتي ما انتي مسيرك تتجوزي و يبقالك بيت و ولاد

كوثر :  لاء انا مش عاوزة اتجوز انا مش عاوزة غير أحمد بس انا حتفرغ له مش حعمل حاجه غير اني اربيه

روح : طب ايه رايك تبقي انتي امه يا كوثر و تفضلي معاه على طول و محدش ياخده منك أبدا

كوثر : مش فاهمه تقصدي ايه

روح :  عبد الله قاللي اختار له واحده يتجوز ها اثق فيها و انا مش حلاقي غيرك انتي يا كوثر عمري ما حاتمن حد على ابن بنتي غيرك انتي يا حبيبتي هاه ايه رايك موافقه تتجوزي عبد الله و تربي احمد و يفضل في حضنك 

كوثر بصدمه : ايه الكلام اللي بتقوليه ده يا ماما لا طبعا استحاله أوافق انتي عاوزاني اخد مكان هناء عاوزاني اخد مكانها في بيتها و  في فرشتها و  اخد جوزها لا لا مقدرش ده الموت علية اهون

روح : بصي يا كوثر انتي قدامك الاختيارين يا بنتي يا تبقي مع احمد و عبد الله يا اما خلاص تروحي تشوفي حالك يا بنتي و متوقفيش حياتك على حد 

ما أصعب ذاك القرار و هذا الاختيار
كيف لي ان امتلك حياة من كانت حياتها هي

كيف لي أن احتل بيتا كان هو بيتها و مسكنا كان مسكنها
و ان يكون لي زوجا كان زوجها و حبيبها 

لا لن اقوى على هذا الأمر لن أستطيع ان افعل مثل هذا الأمر

و لكن كيف لي أن اتخلى عن هذا الطفل الذي أصبح بمثابة ولدي الذي لم الده
مولود لم يأذن له الله ان يخرج من احشائي و لكنه يحتل كل كياني

هل سوف أقدر على العيش في هذه الحياة بدونه هل ساستطيع أن اتنفس هواء لم يتنفسه هو لا لا هذا شئ مستحيل فلتلهمني يا رب الصواب قف بجانبي و لا تتركني يا أرحم الارحمين يارب العالمين 

كانت طبعا بتحكي له و عنيها مبتبطلش دموع لدرجة انها صعبت على احمد اوي و طلب منها متكملش لكن هي اصرت تكمل

احمد : و بعدين يا ماما وافقتي امتى
كوثر : و انت عندك ست شهور وقتها كان خلاص ابوك خد قراره انه حيتجوز
و جدتك مسابتنيش غير لما وافقت

جه اتقدملي و طبعا اهلي وافقوا من غير لحظة تفكير  واحده منهم

اشترطت على ابوك ميغيرش حاجه في الشقه و كل حاجه تفضل زي ما هي

كتبنا الكتاب على الضيق محضرش غير اهلي و بس و ملبستش فستان فرح و لا رحت كوافير  زي البنات ما بيعملوا رضيت بالعافيه ان واحده جارتنا تعملي شوية مكياج خفيف و لبستني فستانها اللي كانت حاضرة بيه كتب كتابها

انا مكنتش شايفه ابوك مكنتش شايفه غيرك انت انت و بس يا أحمد

يوميها امك جاتلي في المنام و لقتها جايه فرحانه و بتضحك و مبسوطه اوي استبشرت خير 

جدتك اخدتك عندها الليله دي و انا و ابوك جينا على هنا
كنت أول مرة ادخلها من يوم ما خرجت منها مع امك و احنا رايحين المستشفى يوم ولادتك

أول ما دخلت الشقه هنا شفتها قاعده كانت بتضحكلي نفس ضحكتها الجميله اللي انا عارفاها كأنها بتستقبلني و بتقوللي ادخلي متتكسفيش مني بعد كده اختفت من ادام عينيه كانها بتقولي عاوزة اسيبكم براحتكم

اتكلمت مع ابوك بصراحه و من غير كسوف عرفته سبب موافقتي على الجواز و هو اصلاً كان فاهم و عارف بس انا حبيت احط النقط على الحروف زي ما بيقولوا

طلبت منه اننا نعيش مع بعض زي الأخوات لحد ما اقدر اتقبل وجودي في حياته و وجوده في حياتي
 
أبوك راجل محترم سابني على راحتي و طلبت منه اني اروح ازورها محتاجه اتكلم معاها

نمت في الاوضة اللي احنا قاعدين فيها دي
و لما صحيت اخدني و رحنا عندها وقفت أدام قبرها و انا مش قادرة امسك دموعي :  وحشتيني اوي يا هناء الدنيا وحشه أوي من غيرك مش حسه بطعم اي حاجه
مش عارفه اقولك كان قلبك حاسس و اللا اقول ايه ابنك معايا يا هناء اطمني عليه يا حبيبتي أحمد في حضني و حيفضل جوة حضني العمر كله
عبد الله : نعم يا كوثر
كوثر : عاوزة أحمد عاوزة أروح اجيبه
عبد الله : يا للا يا كوثر

اخدتك في حضني و خدمت أبوك برموش عينيه مبقاش في حياتي غيرك و كنت  باخدك على طول لجدتك الله يرحمها

أبوك مكنش مخلينا عاوزين حاجه وجودك في حياتي كان غنيني عن الدنيا و ما فيها كنت طول الليل و النهار اكلمك و احكيلك  عن مامتك يا حبيبي

لحد ما جه يوم عيد ميلادك كان نفسي اعملك عيد ميلاد بس مرضتش اعمله في نفس اليوم عشان مفتكرش هناء لكن بعديها باسبوع خليت أبوك عملك تورتايه مخصوص كبيرة و عملتلك حاجات حلوة كتير و عزمت ماما و بابا و جدك و جدتك يحضروا و كنت فرحانه بيك اوي خصوصا انك في اليوم ده اتسندت و خطيت أول خطوة برجلك 

و لقيت جدتك بتقولي بعشم :
عقبال ما تخاويه يا كوثر

كوثر : اخاويه انتي بتقولي ايه يا ماما
روح : امال يعني عاوزة أحمد يعيش وحيد لا يا حبيبتي اتجدعني كده و هاتيله اخ او اخت

كوثر : اه ان شاء الله
روح : كوثر هو في حاجه كلامك مش مريحني قوليلي يا حبيبتي انا زي امك

كوثر : مش حينفع يا ماما كلهم موجودين
روح : خلاص بكرة نقعد نتكلم كده كده انا بايته معاكم النهارده بكرة بعد ما عبد الله ينزل الشغل تحكيلي ايه اللي مضايقك

تاني يوم
تتفاجئ بكلام كوثر : يا لهوي ايه الكلام اللي انتي بتقوليه ده يا كوثر يعني انتوا عايشين زي الاخوات من يوم ما اتجوزتوا يعني انتي  لسه بنت لحد دلوقتي

حرام عليكي يا بنتي انتي كده تشيلي ذنب كبير اوي

كوثر : ايوة بس عبد الله ما طلبش حاجه يا ماما من يوم ما اتجوزنا
و مغصبنيش على حاجه

روح : لا إله إلا الله مش انتي اللي قلتيله يا كوثر و هو مرضاش يجبرك على حاجه عشان عبد الله راجل محترم و فهم الوضع كويس و قدر موقفك

لكن ده حرام حرام يا كوثر انتي كده تاخدي ذنب كبير

كوثر : غصب عني يا ماما مش بايدي مقدرتش اخد مكانها مقدرتش انام في حضن جوزها مقدرتش

روح : مبقتش مراته خلاص انتي اللي بقيتي دلوقتي مراته مش هناء 

و الحي ابقى من الميت يا حبيبتي

كوثر : انتي اللي بتقولي كده يا ماما

روح : أيوة انا اللي بقولك كده مستغربه ليه

كوثر : مستغربه لأن انا فكرت لما تعرفي حاجه زي دي حتفرحي
 
روح : عاوزاني افرح في الظلم يا كوثر لا يا حبيبتي انا مرضاش بالظلم و اللي بتعمليه ده ظلم ليكي و لجوزك و ميرضيش ربنا  حرام عليكي تمنعي شرع ربنا ليه انتي كده بتاخدي ذنب و انتي مش حسه

كوثر : ذنب طب ليه انا محستش انه عاوز حاجه مني طول الفترة دي كلها محستش اني ظلماه بالعكس هو طول الوقت بيتكلم معايا عادي و بيدخل البيت و هو بيضحك و وشه بشوش على طول لو كان حاسس اني ظلماه اكيد كانت معاملته معايا حتتغير

روح : لا حول و لا قوة الا بالله العلي العظيم اقولها إيه دي بس يا ربي و افهمها ازاي
بصي يا كوثر انا عارفه و مقدرة اللي انتي فيه و يعز علية اني اشوف واحده تانيه مكان بنتي انا جوايا نار ربنا وحده العالم بيها نار مش حتنطفى غير لما احصلها عشان ارتاح

كوثر : ألف بعد الشر عنك يا ماما
روح : غصب عني يا بنتي مش بأيدي الضنا غالي غالي اوي انا لولا اني مؤمنه كنت اتجننت

اسمعيني يا بنتي هناء راحت للي أحسن من الكل راحت للي خالقها و ان شاء الله ربنا حيعوضها في الجنه بأمر الله

 لكن احنا دلوقتي بنتكلم في الحياة اللي احنا لسه عايشينها الراجل ليه احتباجاته يا بنتي و لو حتى كان مش مبين قدامك حاجه و ان هو عادي و طبيعي الله هو العالم  باللي جواه ده واحد مراته ميته من سنه و قبلها كانت حامل و تعبانه و العالم بيها ربنا يعني عنده احتياجاته  ايه نسيبه بقى يروح يدور عليها برة و نرجع نقول يا ريت اللي جرا ما كان
لا يا بنتي انتي لازم تعفي جوزك
 و تخلي عينه مليانه عشان ميبصش برة راضيه يا كوثر ربنا يرضى عنك

 عيشي عيشه طبيعيه و افرحي و عيشي حياتك و جيبي اخوات لأحمد يفرح بيهم و يفرحوا بيه و ازرعي جواهم الحب لبعض وعبد الله طيب و ابن حلال متخسريهوش يا كوثر

كوثر : مش عارفه اقولك ايه و الله يا ماما
روح : متقوليش انتي حاجه انا اللي حقول يا كوثر

ممكن و ملكيش دعوة خالص

تقعد مع عبد الله بعد ما جه من الشغل : بقولك ايه يا عبد الله انت من يوم ما اتجوزت كوثر و انتوا لا رحتوا و لا جيتوا في حته بقولك إيه ما تاخد كوثر كده و تروحو لكم اسبوع في اي مكان اسكندريه مطروح اي حته يا بني
تفكوا عن نفسكم شويه الواحد برضو لازم يفك عن نفسه عشان يقدر يستحمل الحياة و مشاكلها

عبد الله :  و الله انا معنديش مشكله يا امي لكن كوثر مش حتوافق عشان أحمد

روح : اذا كان على أحمد ملكمش دعوة بيه سيبوهولي لحد ما ترجعوا بالسلامة خدها يا بني فك عنها و عن نفسك و ربنا يهدي سركم يا رب

يبوس ايدها و يفهم من مغزى كلامها انها عارفه طبيعة الوضع اللي بينه هو و كوثر

و خدني ابوك و رحنا مطروح و دي كانت أول مرة اروحها
اتكلم معايا كتير اوي انا اه كنت عارفاه وقت ما كان متجوز امك لكن و هو بيتكلم معايا حسيت اني مكنتش اعرفه قبل كده

لقيت نفسي ببدأ معاه حياة جديده و اشتريت كتب دينيه بتتكلم عن علاقة الزوج و الزوجه و الحمد لله العلاقه بيننا بقت زى الفل

و بعديها خدناك و رحنا عملنا عمرة و انا عملتلها عمرة و ابوك كمان عملها

 و لما طلبت منه اروح لدكتورة عشان مجبش ولاد لحد ما تشد حيلك قاللي سيبيها على ربنا و فعلا ربنا كرمني بايمن و انت عندك اربع سنين و من يومها لحد النهارده عمر ابوك مزعلني و شايلني في حباب عنيه

و لما جدتك الله يرحمها تعبت اخدتك و رحنا قعدنا معاها

و طبعا فضلت توصيني عليك فضلت معاها لحد ما قابلت وجه كريم

و بعديها جدك هو كمان اتوفى و مبقالناش غير بعض يا حبيبي

عمرها ما غابت عن بالي لحظه في كل وقت فاكراها و بدعيلها امك وحشتني اوي يا أحمد هناء وحشتني أوي

و هي دي حكايتي انا و امك يا احمد
 
يمسح أحمد دموعه و يمسح لكوثر دموعها اللي غرقت وشها

احمد :  يا حبيبتي يا ماما كل ده في قلبك السنين دي كلها و انا مش حاسس

كوثر : انا اللي في قلبي محدش ممكن يحس بيه و انت و امك في قلبي يا احمد

 عارف يا أحمد انا بشوفها بتضحك لما تكون كويس و بشوفها حزينة لما تكون تعبان
دايما معايا في احلامي مبتسيبنيش

احمد : انا عاوز ازورها يا ماما عاوز، اقرا لها الفاتحه و اقولها اني نجحت و حبقى مهندس زي  ما كانت بتحلم

كوثر : انا اصلا كنت رايحالها يا حبيبي كان لازم افرحها بخبر نجاحك خلاص بكرة الصبح ان شاء الله نروحلها سوا دي وحشتني اوي

أحمد : بحبك اوي يا ماما انا عاوز اقولك اني عمري ما حسيت اني يتيم الام
عمري ما حنسى لما كنتي بتشيلي أيمن على دراع و ماسكاني من ايدي بالايد التانيه عشان توديني المدرسه و الدروس
و تقوليلي اخاف عليك من طريق العربيات

و عمري ما حنسى اهتمامك بية و سؤالك للمدرسين علية

ده الولاد كلهم كانوا بيقولولي يا بختك بمامتك

 و اما كنت بتعب و تفضلي طول الليل واخداني في حضنك 
أنا بحبك اوي يا ماما ربنا يخليكي ليا يا رب و ربنا يقدرني و اكون عند حسن ظنك فية 

كوثر : يا حبيبي يا أحمد انت اللي ابني حبيبي اللي رافع راسي دايما و مخللي كل الناس تقوللي عرفتي تربي يا كوثر تسلم تربييتك

انا عشت معاك فرحة اول كل حاجه اول طفل عيني شافته انت

و اول كلمة ماما اسمعها كانت منك انت اتعلمت معاك إزاي اكون ام انت اول كل حاجه يا احمد

أحمد : و انتي كل حاجه يا ست الكل



                  الفصل الخامس من هنا

تعليقات



حجم الخط
+
16
-
تباعد السطور
+
2
-