رواية ميراث نور
بقلم لينا بسيونى
الفصل الثامن والتاسع
لبست القميص وبصيت على نفسى فى المرايا اللى فى الدولاب
نصير قالى :
أيه اللى تعرفه وجربته فى القميص !!؟
قولتله :
أنه بيخفى لما زرايره كلها تتقفل , وأنه بيغير لونه على حسب الرغبه لما ألف لفه كامله !!
ضحك وقالى :
بس؟ !!!
قولتله :
أخلص فيه أيه تانى !!
قالى :
بص ياسيدى ....
أولا أنا مش هقولك على كل حاجه بيعملها القميص .هقولك على حاجه واحده بس , أوبشن يعنى، وبقيت الاوبشنز هقولهملك واحده واحده , علشان يبقى فيه حاجه أساومك بيها لما تيجى تكهربنا تانى !!!.
قولته:
لا صايع يا نصه .. أخلص... قول على الاوبشن!!
قالي:
لف لفه كامله بس المره ده ماتفكرش فى لون , فكر فى شخص معين !!
غمضت عينى ولفيت لفه كامله وأنا بفكر فى نيللى ,
فتحتها وأندهشت من اللى شوفته فى المرايا !!!
فضلت أفرك فى عينى وقعدت فتره أستوعب اللى قدامى !!!
شكلى أتحول وبقيت نيللى نفسها ولابس فستان من
فساتينها !!!
قعدت أحسس على جسمى
فنصير قالى وهو بيصفر :
أوبا ...أحلويت أوى يانينو !!؟، بس كفايه تحسيس على جسمك، أنت مش واخد بالك أن كده عيب ولا أيه !!؟..
قولت لنصير :
أيه ده...
قطعت كلامى لما لقيت صوتى , بقى نفس صوت نيللى !!
وقولت وانا بجرب صوت نيللى :
ألو .. واحد .. اتنين .. تلاته .
صوت نيللى بالضبط !!!
قولت لنصير بصوت نيللى :
أيه ده يانصه ؟!! أنا أول مره أشوف حاجه كده!!
قالى :
دى تعزيمة رميتها على القميص وانا بغزله .. خدت فكرتها من جن الغيلان اللى بيتشكلوا لحيوانات وبنى ادمين , اللى حنوش منهم !!!
على فكره لو فكرت فى حيوان ولفيت لفه كامله هتتحول لحيوان برده !!!
لفيت لفه كامله وانا بفكر فى شخص تانى ..
وبصيت على نفسى فى المرايا ...
نصير شافنى وانا لابس البدله .
فقالى وهو مرعوب :
لالا أهدى كده يانينو .. رئيس الجمهوريه مره واحده هنتنفخ أحنا الاتنين !!! , أرجع يانينو ..أرجع ياحبيبى !!.
لفيت لفه كامله وفكرت فى نفسى فرجعت زى مانا بالقميص .
صرفت نصير
وفضلت طول الليل ألعب اللعبه دى , حولت نفسى لاسد ومره لكلب ومره لافعى ومره لسندس ومره معتز باشا ورجعت تانى لنيللى ...
وتصورت حوار بينى وبينها
تصورتها وهى بتقولى :
انا أسفه يانور ... لا لآ .. أنا أسفه ياسيدى وتاج راسى نور .
أتحولت لشكلى ورديت عليها وقولت :
انتى خاينه انتى حقيره ...
ورفعت أيدى علشان أضربها بالقلم , ولفيت بسرعه واتحولت لشكلها , وضربتها قلم جامد فمسكت خدها وقالت :
أضربنى كمان ياسيدى نور .. عايزه أتوب !!!
لفيت لفه كامله وحولت نفسى ليوسف باشا وهبى وهو على خشبة المسرح وخليته يقول لنيللى :
أه ياخاينه .. أنا هقتلك وأعوم فى دمك .. وأفضل أعوم أعوم حتى أصل اللى بر الشرف !!!
فضلت على كده خليت كل الشخصيات العامه تشتمها ,
حتى نابليون نفسه شتمها بالفرنساوى !!
فضلت ألعب كتير لحد ماتعبت وقولت لنيللى اللى أتمرمطت :
روحى بقى كفايه عليكى كده النهارده .
صحيت تانى يوم الصبح وروحت على بيت معتز باشا , لقيت هناك المحامى وشنطة الفلوس
مضيت واستلمت الفلوس .
بعدها معتز باشا أدانى صندوق صغير فتحته لقيت فيه حاجه زى كتاب !!
قولتله :
أيه ده !!؟
قالى :
المفاجأه اللى قولتلك عليها , مذكرات جدك ناير واللى بخط أيده حكى فيها قصة حياته كلها ,
عرفت بقى أنا عرفت نصير أزاى !!
المذكرات دى يعتبر من أغلى مقتنياتى ,وأستحاله كنت أفرط فيها , بس لما انت ظهر حسيت أنها هتبقى أنانيه منى لو أستحوذت عليها, عملت منها نسخه وأديتلك الاصل , أتمنى تقراها وتعرف جدك ناير ...
شكرته وسلمت عليه وخدت الفلوس والمذكرات وخلعت .
روحت على الكهف لميت هدومى
واتسحبت من ورا البت سندس واللى كانت نايمة على التبه
علشان ماتشوفنيش وتيجى ورايا
روحت الموقف وخدت عربيه بيجو مخصوص لوحدى وطلعت على القاهره ..
أول حاجه عملتها لما وصلت القاهره , أشتريت فيلا صغنونه ب3 مليون جنيه , وعربية مرسيدس كانت عامله نص مليون جنيه وأشتريت حبة أطقم شيك على برفانات وساعه روليكس عدت ال300 الف جنيه ...
وأسنيت أول يوم فى الدراسه , كل فتره كانت نيللى بترن عليا وانا مبردش , كنت مستنى اللحظه دى ...
اللحظه اللى تشوفنى فيها غنى وتتصدم , وتضرب نفسها مليون قلم وهى ندمانه أنها جرحتنى وفرطت فيا
اللحظه دى خلاص قربت , بكره أول يوم فى الدراسه .
الليله دى معرفتش أنام فيها , أستدعيت نصير وقولتله :
بقولك أيه يانصه , أنت تفهم فى الحريم وكده ؟!!
قالى :
بتوعنا ولا بتوعكم !!
قولتله :
هتفرق يعنى !!؟
اها الحريم بتوعكم مش ساهلين , ده أحنا ساعات بنتعلم منهم الحيله والكيد غير انهم لتاتين أوى وكمان صعبين فى التعامل , الحريم عندنا صعبه برده بس مش كده ياجدع !!
قالى :
على الاقل عندنا لما بتسألها مالك , بترد عليك عادى وتقول مالها !!!
قولتله :
شكلى هتجوز جنيه بالكلام اللى بتقوله ده , يعنى مابتفهمش فى الحريم بتوعنا ؟!!
قالى :
على رأى مطربى المفضل أبو الليف ..
"دول خبلانه أللى فاهمهم راسه تعبانه .., تفهم أيه !!؟ يحمكوك فى كنكه "
بس انا كنصير أعرف أن الست ماتجبهاش غير الست اللى زيها .
فكرت شويه وقولتله :
يبقى تغير شكلك وتعمل واحده حلوه وجامده جدا وتخش الجامعه و أنت أيدك فى أيدى !!
حيلك .. حيلك أنا جنى محترم وليا وضعى والحاجات اللى بتطلبها دى مش مجالى !!
لو عايز واحده ترافقك وتعمل نفسها حبيبتك , هكلملك حنوش هو مش فى خدمتك بس مش هيرفضلى طلب ,
وبيعمل حركه أجمد من اللى أنت عايزها
انما أنا مابعملش الحاجات دى, سمعتى تبوظ خالص ..
عايزهم يقولوا عليا ايه !!؟ جنى لامؤخذة !!!
خبط كف على كف وهو بيستنكر من اللى قولتله وقال :
على أخر الزمن ...
نصير أستدعى حنوش فجه وور انى الحركه اللى بيعملها
ولقيتها جامده جدا!!!
ده بالنسبه للرجاله ....
وبالنسبه للستات فهيشوفوا حنوش شبه أكتر واحده بيغيرو منها..
يعنى نيللى لو بتغير من أنجلينا جولى , هتلاقى واحدة شبه أنجلينا جولى مأنجچانى !!
ركبت العربيه المرسيدس وجمبى حنوش , وروحنا الجامعة !!
دخلنا الجامعه بالعربيه , ووقفت قدام مبنى الكليه .
كل الدفعه كانت موجوده , وكلهم ركزوا على العربيه المرسيدس اللى لسه بكيسها وركنت قدام مبنى الكليه.
أستنوا يشوفوا مين اللى هينزل منها.
نزلت من العربيه .
وشوفتهم كلهم وهما بيبحلقولى ومش مصدقين عينيهم ,حتى اللى مكانش مركز معايا , اللى جمبه نغزه فى جمبه وشاورله عليا .
نزل حنوش من العربيه , وهنا بدأت المدعكه ....
الطلبه كلهم عينهم بظت لقدام لما شافوا حنوش ,وفوجئت بيهم بيحتشدوا عند العربيه !!!
منهم اللى قال لحنوش :
الفنانه غاده عبدالرازق , انا بعشقك يافنانه !!
وفيه اللى قال :
هياتم !!!
أنجچت حنوش وعديت من وسط الطلبه بالعافيه...
فيه اللى كان عايز يمضى أوتغراف من الفنانه المشهوره وفيه اللى عايز رقم تليفونها !!!
طلعت بحنوش سلم الكلية , وشوفت نيللى وهى جايه جرى بعد ما واحده صاحبتها راحت ندهتلها وقالتلها عليا.
نيللى أول ماشافتنى جريت ناحيتى وهى مندهشه ومتغاظه
قالتلى بعصبيه :
ممكن أعرف كنت فين طول الاجازة؟!! ومكنتش بترد على تليفوناتى ليه !!!؟
تجاهلتها تماما علشان حنوش كان بيتمسح فيا , وقالى بصوت ممحون :
بليز يانينو , محتاجه أقعد فى مكان لطيف , الجو هنا مقرف أوى !!
قولت لحنوش :
عندك حق يابيبى , الجو هنا بقى خنيق أوى ,ومش من مستوانا خالص ...
حنوش رد عليا وقالى :
أنت اللى أصريت يابيبى نرجع من باغيس ( قصده باريس يعنى ) , ماكنت نقلت دراستك هناك , الجامعه هنا بيئه أوى !!
وبص على نيللى وقال :
الاشكال اللى فيها مش من مستواك خالص !!!
نيللى شاطط وقالتلى وهى بتبص على حنوش والغيره مولعه فيها :
ممكن ترد عليا , كنت فين الفتره دى كلها ؟! ومين البتاعه دى !!؟
مردتش عليها برده وخدت حنوش وجيت أمشى بعيد عنها , لاقيت نيللى مسكتنى من دراعى وقالت بعصبيه وبصوت عالى :
رد عليا بقولك , مين دى !!؟
حنوش شال أيديها من عليا وهو بيقولها بصوت ممحون :
بليز يا بيئه أنتى ... ممكن تسيبى أيد خطيبى , وتوسعى من طريقنا ...
بص عليا حنوش وقالى :
مين البيئه دى يانينو !!؟
نيللى أتعصبت جدا على حنوش وقالتلها :
بيئه !!! أنا بيئه !!! أنتى مش عارف أنا أبقى بنت مين !! ياعره
حنوش بص عليها من فوق لتحت وقال :
سوفاااج !!! ... بيئه أوى !!!
نيللى بصت عليا وعينيها غرغرت وصعبت عليها نفسها وقالتلى :
ماشى يانور ... سايبها تهزقنى كده وساكت .. كده يانور !!؟
تجاهلتها تماما , و بصيت لحنوش وقولتله :
بيبى !!
فرد عليا وقالى :
وى مون فيانسيه ( حنوش بيتموحن بالفرنساوى )!!!
قولتله :
أيه رأيك يابيبى ناخد العربيه المرسيدس بتاعتى ونروح نفطر فى مطعم culina فى فندق الريتز اللى على النيل !
حنوش قالى :
أووف أنا زهقت من المطاعم دى يابيبى , أيه رأيك نروح الفيلا بتاعتك وانا أعملك ال Coq au vin ( كوكو ڤا) اللى بتحبه بأيدى !!!
نيللى خرجت عن شعورها وشرشحت وقالت :
كوكو أيه ياختى !! كوكو أيه يانور !!! هو انت كمان عندك فيلا وعربيه !!! أها فهمت... ورثت ونضفت ودلوقتى بتنطط عليا .. ماشى يانور.. والله لاوريك ياندل .
مردتش عليها برده وخدت حنوش ومشيت بيه .
طارق أبن عم نيللى كان داخل الكليه متأخر , وأول ماشافنى مع حنوش أتجنن وفضل متنح فى حنوش وسمعته بيقول :
مايا خليفه !!!
خرجت انا وحنوش وركبنا العربيه وطلعنا بره الجامعه
كنت فرحان أوى وفضلت أبوس فى حنوش , قولتله :
يخربيتك ده انا صدقتك , أنت جامد جدا , ماتيجى تنقل معايا فى خدمتى .
قالى بصوت ممحون :
باردون!! بس انا بحب أبقى حره مون فيانسيه!!
فضلت أضحك عليه طول الطريق , لحد مالقيت نصير راكب معانا العربيه وقالى :
أيه رأيك فى حنوش ؟!!
قولتله :
حنوش مسخره .. هو أنتوا كلكم كدا كجن دمكم خفيف وبتحبوا الهزار ؟!!
قالى :
لا طبعا فيه اللى جد ومبيطقش صنف البنى أدمين بس مضطر يتعامل معاهم , انا كنت كده فى الاول بس لما عاشرت أجدادك حبيتهم .. كلكم فيكم نفس الروح .
سكت شويه وكمل كلامه وقال:
خلاص كده شفيت غليلك !!؟
لا انا لسه مابدأتش اصلا , انا عايز حاجه أقوى , عندك أيه !!؟
أخليها فى عين كل اللى يشوفها قرد؟ !!!
قولتله :
تسخطها قرد يعنى !! لالالا.. هيبان انها مسحوره وكده , انا عايز الناس تكرهها مع ان شكلها حلو , فاهمنى؟ !!
طلبك عندى يانينو ...
هتعمل أيه؟ !!
قالى :
هخلى ريحتها معفنه ومحدش هيطيق يقعد جمبها أمتار !!
طيب ماهى ممكن تستحمى أو تحط برفان.
قالى وهو بيضحك :
مهما عملت , حتى أبقى أسأل جدك !! أصلى عملتها فيه قبل كده !!
فكرت شويه وقولتله :
حلوه دى أعملها !!
عايز تبدا من أمتى !؟
حالا , انا هلف وأرجع الجامعه علشان أتفرج !!
طيب ألحق أرجع بقى , علشان انا بدأت !!
رجعت بالعربيه تانى على الجامعه , نزلت من العربيه لوحدى من غير حنوش.
لقيت اللى فى الكلية كلهم بيهشوا الريحه بعيد عن مناخيرهم وفيه اللى حط منديل عليها!!
كله كان بيتأفف من الريحه الوحشه , وكانوا بيبصوا على مصدر الريحه القذره " نيللى ".
كانت بتشم نفسها ومكنتش طايقه ريحتها هيا كمان .
جريت على طارق , فبعد عنها وودى وشه الناحيه التانيه وهو بيقول :
أبعدى يانيللى عنى هرجع !!
حاولت تلمسه ,بعد أيدها عنه وهو بيقولها :
أجرى يانيللى أستحمى ولا حطى برفان , الريحه صعبه أوى !!
أصحابنا اللى فى الدفعه فيه منهم اللى كان بيبص لنيللى بقرف وفيه اللى كان فرحان فيها , و كان بيضحك عليها ,
أصدقائها المقربين كانوا بيبعدوا عنها ومش طايقين ريحيتها.
جريت وهى بتعيط بعيد عن الكليه وركبت عربيتها ومشيت ..
هو أنا كده تقلت العيار !!!
هى ليه نيللى صعبانه عليا دلوقتى !!؟
ليه عايز أجرى وأخدها فى حضنى وأقولها أنا مسامحك بعد ما أنتقمت منك !! وجرحتك زى ماجرحتينى .
رجعت تانى ناحية العربيه , لقيت أربع شباب من الدفعه واقفين عند العربيه ,بيبصوا وبيحسسوا عليها وهما مبهورين !!
هما مش أصدقائى بس أصحابى وأعرفهم ، كنت بصور منهم الكتب اللى مبقدرش أشتريها, عيال أهاليهم غلبانه وبيدفعوا دم قلبهم علشان يعلموهم ويبقوا مهندسين أد الدنيا , بس مهملين فى الدراسه ومهتمين بالسهرات وبقعدات الحشيش بتاعة الشباب ...
اول ما شافونى رايح عند العربيه جريوا عليا و وواحد منهم أسمه "محسن"
قاللى:
أيه ياعم نور الاوبهه دى كلها , ومين ياسطى الصاروخ اللى كانت معاك دى ؟!! دى شبه هياتم فى مجدها و...
فواحد قطع كلام محسن وقاله :
أنت أحول ياد الصاروخ اللى كانت مع نور شبه هند رستم تبيكال!!
فواحد تالت قال :
على النعمه أنتوا الاتنين مابتفهموا فى الحريم البت شبه نانسى عجرم بالضبط!!
ماستنتش أسمع تعليق الرابع اللى معاهم وقولتهم :
فيه أيه ياجدعان دى خطيبتى على فكره , وعيب الكلام اللى بتقولوه ده !!
أعتذرولى كلهم فى صوت واحد !!
ومحسن قالى :
بس أيه ياسطى الاوبهه دى كلها برضه , ايه مفيش حاجه علينا ؟! غدوه حتى , أيه هتبخل علينا ؟!!ياسطى احنا كنا حبايبك .. هتنسانا ولا أيه !!؟
قولتلهم وانا برضى غرورى وبركب العربيه :
عيب عليكم يارجاله , الليله أنتوا معزومين عندى فى الفيلا بتاعتى , هبقى أبعتلكم العنوان على الواتس.. .
وخدت العربيه ومشيت وهما مذهولين لما سمعوا أنى عندى فيلا كمان !!
بليل لاقيتهم عندى قدام الفيلا وبيبصوا عليها من بره ,دخلتهم ...
أنتشروا فى الفيلا وفضلوا يتفرجوا عليها وهما مبهورين , محسن قاللى :
بس أيه ياسطى !!؟ منين الكلام ده !!؟
قولتله :
ياسطى انا طول عمرى غنى , انا بس كنت بمثل عليكم أنى فقير علشان أعرف مين اللى هيحبنى علشان شخصى ومين اللى هيحبنى علشان فلوسى !!!
محسن قاللى :
ياسطى وأحنا الاربعه نجحنا فى الاختبار ,كنا بنصورلك الكتب الغاليه , فاكر ياسطى التيشيرت الاسود بتاعى اللى أديتهولك؟ !!!
قولتله :
أها!!
أبقى رجعه بقى مادام طلعت غنى !!
ضحكت وقولتلهم :
لا الصراحه أنتوا كنتوا كويسين معايا أوقات كتيره , بس برده كنتوا بتستندلوا معايا فى حاجات.
محسن قال وهو بيبص على أصحابه :
بس الحلو أكتر من الوحش ياسطى صح ولا أيه ؟!!
الحلو أكتر يا محسن .
ياله روحوا هاتوا الاكل من المطبخ أنا طلبت كباب وكفته كتير من عنتر الكبابجى .
قالوا فى صوت واحد :
كباب وكفته !!!
وجريوا على المطبخ وفتحوا الاكل ونهشوه كله , بعدها فتحوا التلاجه و فضوا فى بطنهم كل العصاير والبيبسى اللى فيها !!
بعدها لقيت محسن بيطلع السجاير وحتة سولافانه فيها حشيش !!!
أنت بتعمل أيه !؟
بلف سيجارة حشيش أهضم بيها أنا والشباب !!؟
قولتلهم :
أنتوا مش مكسوفين من نفسكم !!, أنتوا طلبة هندسه !! , أزاى بتتعاطوا مخدرات !! وأسلوبكم بقى سوقى أوى !! , المفروض تبقوا محترمين وتحترموا اهاليكم اللى بيتعبوا علشان يصرفوا عليكم .
حسيتهم أضايقوا...
فيه أيه يانور ده حشيش عادى , هو أنت شوفتنا بنشد هروين , ده عامل زى السجاير يابنى!!
وبعدين ما أنت عارف اننا بنشرب حشيش , وياعم لو بتقولنا أمشوا بالطريقة , فعادى ياسطى كتر خيرك على الاكله الحلوه دى ...
وقام محسن وقف فاللى معاه كلهم وقفوا وحسسونى انى قليل الزوق وانى بتنطط عليهم علشان غنى وكده .
فقولتلهم وانا بحاول أصحح سوء الفهم :
ياجماعه انا خايف عليكم والله...
أستنكروا كلامى وفيه منهم اللى قال لمحسن :
يله بينا يامحسن من هنا , مش ناقصه فصلان!!
محسن رد عليه وقاله :
عندك حق , يله بينا ياعم وشكرا أوى ياعم نور على حسن الضيافه , الواد طارق أبن عم نيللى برقبتك على فكره وصاحب واجب , أبن ناس وياما روحنا سهرنا عنده فى فيلته وعمره ماهزقنا كده , تقوم أنت ياسطى تعمل كده .
ياخى يلعن أبو الفلوس!!
قولته :
انت هتعمل فيها ذكى رستم !!
وزعقت فيهم وقلتلهم :
أقعد ياد منك ليه , وبطلوا هبل , السهره كلها عليا .
مكانوش راضيين يقعدوا وكانوا مصريين يمشوا , حلفت عليهم ماحدش هيمشى ..
أستحاله أخليهم يروحوا يقولوا فى الكليه أن طارق برنس وأنى عيل أى كلام !!
وافقوا يقعدوا بس وهما عاملين نفسهم مجبورين , طلعوا حتة الحشيش ولفوها وشربوها...
شويه ولاقيت محسن بيقول :
الحشيشه طلعت فستك !! ياخسارة الجمعيه اللى عملناها يارجاله ...
وبصلى وقال :
أصل فيه ناس قرفتها وحشه ,وبوظولنا القعده قبل ماتبدأ , أرتحت ياعم نور ، نبرت فى الحاجه!!!
وقام وقف وقال:
يلا بينا ياشباب احنا لسه فيها , وطارق عامل حفله صغنونه وهنقعد على البسين ونتكيف كمان على حسابه !!
أتحمسوا وقرروا يمشوا مسكت فيهم وقولتلهم :
ياجدعان أقعدوا , عايزين أيه بس وانا أجيبهولكم !!؟
قالوا كلهم فى صوت واحد :
حشيش !!
أجيب منين حشيش بس دلوقتى !!؟
فمحسن قال :
خلاص ياعم نور كتر خيرك ياسطى على الاكله , أحنا نلحق نخلع أحنا بقى علشان مانرخمش عليك برده !!
بقولكم أيه !!؟ أنتوا هتكملوا سهرتكم هنا , وهيجيبلك أحلى حشيش هتشربوه فى حياتكم , انا هخليكم تتحاكوا على حفلة نور وعمركم ماتنسوها أبدا !!
قالولى وهما مش مهتمين :
ماشى يانور .. ورينا طيب .
روحت اوضتى وأستدعيت نصير ,فجالى وقالى :
أيه يانينو !!؟
عايز حشيش بس يكون فاخر !!
قالى وهو مستغرب :
ليه كده يانينو؟ !!
أصحابى بره وعايز أوجب معاهم ضرورى !!
معنديش حشيش بس عندى حاجه زيه !!
أيه !!؟
قالى :
تفاحة الجن !!!
أيه تفاحة الجن دى !!
ضحك وقال :
لا دى دماغ تانيه , أبقى أسال جدك عليها ...
جدى !!
على فكره لازم تقرأ مذكرات جدك اللى أدهالك معتز فيه حاجات كتيره فايتاك !!
قولتله :
أكيد هقراها فى أقرب وقت , المهم هاتلى بتاعة الجن دى بسرعه ...
غاب شويه ورجع تانى :
مد أيده وادانى ثمره فى حجم كف ايدى , شكلها غريب , و فيها شبه كبير من شكل البنى أدم !!!
قالى وهو بيدهالى :
جدك كان زارع منها فى الكهف جبتلك واحده!!، أبقى ارميها فى أى نار عندك وقفل الشبابيك , بس ماترميهاش كلها أرمى نصها , علشان كترها غلط وكمان جدك معزم عليها !!!
رجعت تانى للشباب وأنا فى أيدى حلة كبيرة فيها فحم وتفاحة الجن , بصولى وهما مستغربين واتلموا حواليا , بصوا على الثمره اللى فى أيدى .
وقالوا فى صوت واحد :
أيه ده يانور !!؟
قولتلهم بفخر :
تفاحة الجن , دماغ عمركم ماهتعلموا زيها فى حياتكم .
ولعت الفحم ورميت الثمره كلها فى الفحم !!
واتصدمت من اللى حصلنا بعدها !!!