CMP: AIE: رواية ميراث نور الجزء الثانى2 الفصل السادس والسابع والثامن بقلم لينا بسيوني
أخر الاخبار

رواية ميراث نور الجزء الثانى2 الفصل السادس والسابع والثامن بقلم لينا بسيوني


 

الجزء التاني من ميراث نور 

بقلم لينا بسيونى 


              بارات(6/7/8)

واحنا فى النيل , شوفت مركب بتقرب علينا , وسمعت صوت نصير وهو بيقولى :

خد بالك يا يا نينو فيه هجوم علينا !!! 


قولتله : 


هجوم من مين !!؟

مردش عليا !!!

بصيت على المركب اللى جايه علينا فشوفت نيللى وشهاب راكبين فوقيه !! 


حاولت أستدعى نصير , مردش عليا برضه 


فعرفت انه أتحجب عنى !!! 


و فوجئت بتماسيح  ضخمه بتهجم على المركب  بتاعتنا !!! 


أو ما شوفت  التماسيح  بتقرب على  المركب , حطيت ايدى فى جيبى ومسكت عرق السواحل وقرأت سورة الزلزلة وانا مغمض عينى بعدها فتحت عينى وشفتهم جن أقزام متشكلين على صورة تماسيح !! 


توكلت على الله وقلت تعزيمة حمايه على المركب واللى كانت  تعزيمات بجانب ايات من سورة الجن .. 


التماسيح أول ماقربت من  المركب و أحتكوا بالتعزيمه , منهم اللى صرخ و منهم اللى ظهر على صورته الحقيقية قزم... 


وقفوا الهجوم بس فضلوا محاوطين المركب من كل ناحيه .. 


الست كانت مرعوبة وماسكة بنتها ومتبته فيها  و سندس كانت محاوطاها بدراعها وبتطمنها وبتقولها : 


متقلقيش  ....سيدى هيقوم بيهم كلهم 


ودعت وقالت : 


-  ربنا ينصرك عليهم يا سيدى 


شوفت مركب نيللى وشهاب واقفه قدامى بس مقربتش عليا وسمعت شهاب بيضحك بصوت عالى وبيقول : 


ايه التعزيمة الخايبه اللى انت عملها على المركب دى ..... بتستخدم تعزيمة علوية !!

واضح انك متعرفش حاجة عن السحر الاسود !! 


وشاور على مقدمه  المركب  بتاعتنا وهو بيتمتم بتعزيمات سفليه فيها كفر بالله !!! 


أتفاجئت بالتماسيح كلها  بتلف و بتهجم عند مقدمة المركب بعد ماشهاب عمل ثغره فى التعزيمه !! 


حاولت بسرعة استدعى نصير تانى ,سمعته بيقول : 


الحقنا يا نينو احنا متحاصرين!!! 


اتوترت ومبقتش عارف اعمل ايه!!! 


التماسيح بدأت تاكل فى خشب المركب !! 


فجأه جاتلى فكرة غريبة , لو فشلت هنموت كلنا !! 


قولت لسندس والست اللى معايا : 


تبتوا فى المركب وماتخافوش من اللى هتشوفوه ولوعرفت ارجعكم  للبر تانى , اجروا بسرعة على الكهف  .. الكهف عليه حمايه , فاهمين !!! 


ماستنتهمش يردوا عليا و  نطيت من فوق المركب وانا بلف فى الهوا بالقميص  لفه كامله وفكرت فى حيوان اسطورى !!! 


وقعت فى الميه  من غير ما يحصلى  حاجة , ماتحولتش !! 


وبدأت اسقط فى قاع النيل ... 


التماسيح سابت المركب وغطست ورايا علشان تصطادنى .... 


فجأة  حسيت بعضمى بيتكسر وسمعت صوت  طقطقه فى جسمى كله ، 


دراعاتى بدأت  تتحول  لاجنحه طويله  وجلدى لحراشف 


رقبتى طولت ,ورأسي كبرت وبقت ضخمة  جدا وعينى بقت مشقوقة بالطول !!! 


جسمى كله اتحول فى الميه والتماسيح ( الجن ) اللى غطسوا ورايا  لما شافوا شكلى الجديد سبحوا بعيد وهما مرعوبين !!! 


خرجت من الميه  وانا  "تنين عملاق" !!! 


حلقت فى السما وزمجرت بصوت عالى ونفثت النار من حلقى 

قربت من  المركب بتاعنا وشيلته  ونقلته للبر تانى علشان يبقى بعيد عن الخطر ..

وسط ذهول من كل اللى موجودين نيللى وشهاب  والجن اللى معاه 

والست اللى معانا على المركب !! 


الوحيده اللى مكانتش مستغربه , كانت سندس واللى  كانت 


بتشاورلى و بتسقف  !!! 

طيرت ورجعت تانى  لمركب نيللى وشهاب  اللى فى النيل 


شهاب ونيللى كانوا مذهولين من اللى شايفينه ومش مصدقين عينينهم !!! 


شوفت بعين التنين كل  الجن اللى حوالينا  وشوفت شهاب وهو بيدى الامر لمجموعه من الجن  علشان يهجموا عليا ,  فيه منهم اللى رمى رماح عليا , وتفاديتها على أد ماقدرت , 


بس فيه رمح صابنى !! 


أندهشوا زى مانا أندهشت من اللى حصل !! 


الرمح صابنى بس مأثرش فيا بسبب جلدى الصلب ! 


هجموا عليا وفضلوا يضربونى  بكرابيج طويله  على جسمى , محستش بحاجه برضه , كرابيجهم وسيوفهم ورماحهم مكانتش بتأثر فى جلدى !!!! 


الجن اللى بيهجموا عليا بدأو يرجعوا لورا وهما خايفين

خدت نفس عميق ونفثت من بوقى نار فى أتجاههم!! 


أتفاجئوا أن النار بتاعة التنين بتأثر فيهم وبتحرقهم !!! 


وأن ده مش مجرد وهم وسحر  تخيلى واللى قدامهم تنين فعلا!! 


فضلوا يصرخوا من النار القويه , منهم اللى  أتحرق وأتحول رماد ومنهم اللى جرى بعيد و بيحاول يطفى النار اللى ماسكه فيه. 


حرقت تقريبا نص المجموعه اللى هجمت عليا والنص التانى جريوا من قدامى وهما مرعوبين !! 


رجعت بصيت على المركب اللى فيها شهاب ونيللى , لاقيتهم أختفوا بالمركب !! 


سمعت صوت نصير بيستنجد وبيقول : 


ألحقنا يانور... بنموت !!! 


قولتله وأنا بتلفت حواليا  : 


أنت فين يانصير ؟ ! انا مش شايفك !!؟ 


قالى وهو بيصرخ : 


شغل تعزيمة عين الجن وبص فى السما  ناحية نجمة " الشعرى اليمانيه "  هتلاقينا فى الساحه ومتحاص.... 


صوت نصير قطع !!! 


ومالحقتش أقوله انى مش محتاج تعزيمة عين الجن لانى بشوفهم بعين التنين .. 


دورت على نجمة الشعرى اليمانيه أكتر النجوم سطوعا فى السما , النجم الوحيد بأستثناء الشمس اللى أتذكر أسمه  فى القرآن.. 


لحد مالقيته  بيلمع فى السما , ركزت نظرى عليه وشوفت ساحة الحرب  


حلقت فى السما ناحيتها . 


لحد ما وصلت للساحة 


وشوفت جيش نصير  اللى متحاصر  بالالاف من الجن و المخلوقات الغريبه!!و اللى في منها  شبه السحالى و الثعابين الضخمه وفى منها اللى شبه الاخطبوط  وليها أطراف كتيره . 


كانوا محاصرينهم  ومطوقينهم فى دايره , نصير واللى معاه كانوا بيحاربوا بشجاعه  فى نص الدائره , بس الجيش اللى قصادهم كبير جدا ومبيخلصش ومحاوطنيهم من كل ناحيه. 

كانوا بيديقوا عليهم الدايرة  و جيش نصير كان أوشك على الهزيمه  !!! 


هبطت فوق ساحة المعركه وخدت نفس عميق جدا ونفثت نار قويه  على الدايره اللى محاوطاهم وفضلت أحرق الجن والمخلوقات  الضخمه اللى فى صفوف الدايره .... 


المخلوقات حاولت تهاجمنى , بس نفخت النار عليهم , فأتحروقوا وجريوا وهما خايفين  ... 


فضلت أنفث النار على صفوف الجن , وانا بتقدم  لحد ما قدرت أصنع ثغره فى الدايره , ووصلت لنصير واللى معاه ... 


نصير واللى معاه أول ماشافونى  قدامهم , رجعوا لورا وهما خايفين , كانوا مفكرنى مخلوق من المخلوقات اللى مع شهاب ... 


زمجرت بصوت عالى وكملت حرق فى الجن اللى ضد نصير فى المعركة.. 


نصير كان بيبص على التنين بأستغراب  وقال بأندهاش : 


نينو!!!!!!!!! 


هزيتله راسى !! 


فلاقيته بيقول للى معاه  وهو فرحان كلام بلغة الجن مفهمتش معناه ... 


بس لاقيتهم فرحوا  و خبطوا بأيديهم على صدورهم وهما بيصرخوا بحماس وبصوت عالى , هز ساحة المعركه ,  والتفوا كلهم ورايا .... 


الجن اللى كانوا فى الحرب ضدنا أترعبوا أكتر ماهما مرعوبين منى , وبدأوا يتراجعوا , وفيه منهم اللى ساب سيفه وأختفى , أعدادهم بدأت تقل , بس لسه برده عددهم كبير وبيحاولوا يضربونى بالرماح والسيوف  .. 


كنت لسه مع نصير فى نص الدايره , فوجئت بنصير بينط  وبيركب فوق ضهرى وهو بيقول : 


طير يانينو !! طير !! 


فردت جناحاتى وحلقت فوق المعركه .... 


سمعته بيشاور على جن لابس تاج و شكله مميز , كان ماسك فى أيده صولجان  وبيقود الحرب ضدنا !! 


نصير قالى : 


طير ناحيته يانينو ومنتفخش نار الا لما أقولك 


طيرت ناحيته ونصير راكب فوقيا , لحد ماقربت عليه خالص 


ولاقيت نصير بيخبط على رأسى وبيقولى : 


ولعها يانينو !!! 


نفخت نار من حلقى على الجن اللى ماسك الصولجان , لحد ما أتحرق وبقى رماد .... 


بس الصولجان ماحصلوش حاجه !!! 


نصير نط من فوقيا و مسك الصولجان  ورفعه وقال : 


أقسمت عليكم أيتها الأرواح الروحانية المعتديه , أقسمت عليكم  بالذي تجلى للجبل فجعله دكا و خر موسى صعقا ، أقسمت عليكم أيتها الأرواح الروحانية بالرب العظيم محيي العظام و هي رمام  أن تذهبوا بلا رجعه ...... 


وكمل باقى القسم  بلغه الجن ,وخبط الصولجان  فاتكسر وأتفتت !!!! 


بعدها اختفى كل جيش شهاب ومفضلش فى الساحه غيرنا !! 


جيش نصير هلل ...وحضنوا بعض .... و بصولى وأنحنوا  ليا فى خضوع 


نصير جرى عليا وحضنى وانا تنين وقالى : 


ده انت اللى طلعت جامد تنين يانينو !!! 


هبطت من ساحه المعركه على الارض ولفيت لفه كامله ورجعت بنى أدم تانى ... 


سمعت صوت نصير بيقولى وهو فرحان : 


شوفت بقى أن الساحر القوى هو اللى بيفرق فى الحروب !!! أنت عملتها أزاى دى !!؟ 


قولتله : 


بالقميص يانصه !! 


قالى بأستغراب : 


أزاى !!؟ 


قولتله : 


بتعزيمة الغيلان اللى فى القميص تخيلت أنى تنين ولاقتنى تنين , الموضوع بسيط !! 


قالى : 


لا الموضوع مش بسيط زى مانت فاكر !!  جن الغيلان نفسهم مايقدروش يتحولوا لكائن قوى واسطورى زى دا  !!  بيقدروا يتحولوا لقطط وكلاب وحيات وعقارب وأقوى صوره ممكن يتحول ليها الجن هى صورة الانسان !! 


أنما محدش فيهم يقدر يتحول لتنين , وانا نفسى اللى عامل القميص مندهش من اللى بتقوله ومش مصدق أن القميص اللى عملته بأيدى ممكن يعمل كده !! 


سكت شويه وقال : 


يمكن علشان الميكس اللى حصل ، طاقتك كبنى أدم وسحر الجن اللى فى القميص !!؟ 


قولتله : 


معرفش يانصه أنا الفكره جاتلى لما كنت بجرب تعزيمة الغيلان أول مره فى الكهف , وأتحولت لنابليون بونابرت ويوسف وهبه وناس ماتت ومش موجوده فى الدنيا , ولاقيت القميص بيستجيب !! 


قالى  بحيره: 


انا صممت القميص بحيث  انه  بيعتمد على خيال اللى لابسه , بس ماتخيلتش أن حد ممكن يفكر فى  كائن أسطورى وبصفات خاصه كمان , دايما خيالكم كبنى أدمين بيغلب خيالنا كجن , احنا عندنا قدرات كتير بس انتوا  أتميزتوا عننا باهم حاجه،  بقدرة العقل البشرى على الخيال !!!  


سرح شويه وقال: 


قولى أحساسك كان أيه وانت تنين وجامد !!؟ 


قولتله : 


كنت شايفكم من غير تعزيمة عين الجن وحسيت بقوه غريبه و .. 


قطعت كلامى وانا بقلع القميص وقولته : 


خد جرب ألبسه وشوف !! 


قالى : 


ماتقلعش القميص انا أستحاله ألبسه !! 


قولتله : 


أيه بتقرف تلبس هدوم حد ولا خايف على نفسك ليجيلك تنيه !! 


قالى : 


هى قلشه رخمه بس هعديهالك علشان أنقذت حياتنا من شويه ... . ولا يارزل لو أى جنى لبس  القميص هيتحرق , حتى لو انا , القميص معمول علشان يلبسه بنى ادم بس ... 


والنهاردة اكتشفنا سلاح فتاك ومحدش هيقدر يقف قصادنا اى نعم انا زى الحداد اللى صنع سيف قوى،

بس مش كل من مسك سيف بقى  فارس  والنهاردة انت كنت فارس الحرب يا نينو .... 


رجعنا على الكهف تانى علشان أطمن على سندس لاقيتها مستنيانى قدام الكهف وأول ماشافتنى جريت عليا حضتنتى وبكت وهى بتقول  : 


حمد الله على السلامه ياسيدى , 


قولتلها : 


أنتوا كويسين !! 


قالتلى : 


كلنا كويسين  ... بس  .. 


قولتلها : 


بس أيه ياسندس !!؟ 


قالتلى : 


فيه ناس تبع معتز باشا جم وسألوا عليك وبيقولوا انه تعبان أوى !!! 


قلت للست :

انا مش ناسى ابنك ,قولى العنوان بالضبط لسندس وروحى لابنك وانا هفضى واجيلك ... 


وجريت على فيلا معتز باشا ومعايا نصير . 


دخلت عليه الاوضه لاقيته نايم على السرير و جمبه أربع دكاتره ... 


جريت عليه وقولتله : 


طمنى عليك ياباشا 


شاور للدكاتره فطلعوا بره الاوضه 


وقالى  وهو بيكح : 


مفيش تشخيص طبى  لحالتى , بيقولوا فيرس  برد قوى ,  وبيحاولوا معاه بالمضادات الحيويه !! بس انا عارف وحاسس أنه سحر !

قولتله وانا حزين : 


ماتقلقش ياباشا .. نصير معايا هنا وأن شاء الله هتبقى كويس ... 


قولت  بلهفه لنصير : 


بسرعه يانصير !! 


أختفى وغاب شويه ... 


بصيت على معتز باشا لاقيته غاب عن الوعى !! 


سمعت صوت نصير بيقول : 


فعلا سحر , مرض متسلط عليه مخصوص , وأتنقله عن طريق الهوا , زى البرد بالضبط!!!! 


قولتله : 


ومين اللى نقله  !!؟ 


سكت شويه وقالى : 


أنت !!!!!! 


قولته بأستغراب : 


أزاى يانصير !!؟ 


اليوم اللى جاتلك فيه نيللى الخيمه كانت حامله للفيرس ونقلتهولك فى الخيمه المقفوله !!! 


قولتله: 

مش فاهم حاجه !!؟ 


خدعونا يانور , كانوا مخططتين لكل حاجه , شهاب بعت نيللى الخيمه , لانه كان عارف أننا هندعبس علشان نعرف هى رجعت ازاى وايه اللى حصل ... 


لما روحت لقرين شهاب حكالى حاجات معينه , اللى وريتهالك فى التلفزيون , فأنت أتهورت لما عرفت أنهم هيقتلوا معتز فجريت تحذره ونقلتله الفيرس اللى نقلتهولك نيللى فى الخيمه , ونفذت خطتهم !! 


أنت كنت السلاح اللى صابوا معتز بيه  !!! 


أتصدمت والدنيا لفت بيا , أنا غبى !! ولو معتز باشا مات ذنبه هيبقى فى رقبتى !! 


قولت لنصير : 


أتصرف يانصير أكيد فيه حل !!؟ 


قالى : 


صعب يانور , السحر معمول ليه مخصوص ومتعزم عليه تعزيمات قويه بالسحر الاسود , وأنت مش هتعرف تفكها علشان ماتعرفش حاجه فى السحر الاسود ... 


أكيد فيه حل يانصير 


قالى : 


الحل فى أضحيه , زى ماحصل مع نيللى , أو ... 


وسكت .. 


قولتله  بلهفة : 


او أيه يانصير قول ؟!!

قالى : 


لو عرفت تحضر جن معالج من الجن المائين  !! 


وده بيتحضر أزاى !!؟ 


قالى : 


بالهبهاب النازف !!!!! 


بأيه !!، ايه ده ؟! 


قالى : 


الهبهاب النازف ده حجر أقوى من الحديد،ليه أنواع كتير بس  احنا هنحتاج الحجر الأفريقي، الحجر فيه  طاقة كونيه قوية جدا زى المغناطيس , السحره بيتسخدموه فى السحر الاسود وفيه ناس بتستخدمه لجلب أى مخلوق على وجه الارض!!

سواء كان جن او بشر على حسب اللى عايزه صاحب الحجر , فيه ناس كتيره بتدعى انه عندها بس الحقيقه أنه نادر جدا 


قولتله : 


وده هجيبه منين وهجلب بيه الجن المعالج أزاى !!؟ 


قالى : 


جلب الجن سهل احنا هنجيب مساعد السيد" ميططرون" ملك اطباء الجن  , هقولك على أسمه و هتحفره على الحجر هيحضر على الحجر,  المشكله فى أنك تلاقى حجر هبهاب حقيقى !! 


ما أنت أكيد عارف بيتجاب منين !!؟ 


قالى : 


ياريت أعرف , أصل أحنا كجن  بنحب ناكله أوى !!! 


بص هو الموضوع هيقى فى أيد حنوش , هو اللى يعرف الحاجات دى بتتجاب منين , أصله بيلف كتير , وبيحب السفر , ما انت عارف أنه فرى لانسر , بس أنصحك تتحرك بسرعه على ما أعتقد معتز فاضله يومين على حسب جسمه .. 


قولته : 


طيب بسرعه يانصير , شوفوه فين ؟!! 


قالى : 


لا أنت تروح على الكهف على ما ادور عليه , وأدعى ألاقيه أصلا , أصله فراك أوى ومبيقعدش فى حته معينه !! 


لا أنا هستنى هنا جنب معتز باشا على ماتجيبه وتيجى !! 


فضلت جنب معتز باشا وكنت بطمنه وقولتله ان نصير راح يجيب العلاج وجاى ... 


نصير أتأخر جدا !! فضلت طول الليل جنب معتز باشا لحد ماطلع الصبح .. 


وبصيت على معتز باشا وفوجأت بيه عينه بقت حمرا ووشه بقى أصفر !! 


عينه كانت زايغه وتقريبا فقد الاحساس بأى حاجه حواليه ... 


سمعت صوت باب الاوضه  بيخبط , روحت فتحت الباب , ولاقيت واحد من الخدامين واقف على الباب وفى أيده صينيه فيها فطار ,دخلته الاوضه علشان يحط الصنيه ... 


سمعت صوت نصير فى ودنى بيقولى : 


لاقيته بعد ماطلع عينى !! 


قولتله : 


طيب جيبه بقى وتعالا بسرعه  !! 


قالى : 


ماهو عندك فى الاوضه أهوه ياعم !! 


فين !!؟ 


قالى : 


السفرجى اللى دخلكم الاكل !!! 


بصيت على السفرجى ( حنوش ) فلاقيته قاعد بياكل من 


الاكل اللى فى الصينيه وبيشاولى وبيقول والاكل فى بوقه : 


أيه يانينو , نصير قالى أنك عايزنى فى مصلحه !! 


بسرعه ياحنوش عايز هبهاب نازف!! 


قالى : 


تدفع كام !!؟ 


اللى انت عاوزه ياحنوش بس تجيبهولى بسرعه. 

قالي: 

أنا كحنوش مقدرش أجيبه بنفسى , علشان المكان اللى موجود فيه متعزم عليه , بس أقدر ادلك على المكان اللى فيه , وعرقى هيبقى حجر هبهاب أكله !! 


نصير قاله : 


يابختك ياحنوش , طالع واكل نازل واكل !! 


موافق بس دلنى على المكان بسرعه ..

.

قالى : 


هو فى  حته ناحية اندونيسيا كده , عايز تروح امتى !؟ 


قبل ما أقوله : 


دلوقتى !! 


لاقيتنى فى وسط غابه كبيره شجرها عالى لدرجة أنى حسيت أنه لامس السما !! 


حنوش شاورلى على كوخ فى وسط الغابه , وقالى : 


جوه هنا !! بس خد بالك علشان صاحب الكوخ ساحر أبن كلب صايع !! 


قولتله : 


بس أنا معرفش شكل الهبهاب !! 


هتلاقيه محطوط جوه كوبايات ميه وبينزف فيها دم !!! 


قولتله : 


هو أيه !!؟ 


الحجر يانينو  ، حجر الهبهاب ركز !! 


هتلاقيه محطوط فى كوباية ميه وبينزف دم , خد بالك علشان الساحر حاطط كوبايات فيه أحجار مزيفه بتطلع صبغه  مش دم !! 


هزيت راسى وزررت القميص وأختفيت !! 


قربت ناحية الكوخ , وفوجات ببابه مفتوح , دخلت الكوخ واللى كان مليان حيوانات  محنطه ،وارفف فوق بعضها  مرصوص عليها  قوارير أزاز  كبيره فيها تعابين وفيران حيه !! 


دورت فوق الارفف على  الكوبايات اللى فيها الحجر , ولاقيت زى ماقالى حنوش كوبايات كتيره وفيها احجار مزيفه بتطلع لون صبغه مش دم , دورت على الكوبايات اللى بتطلع دم ,وطلعت منها الاحجار الاصليه كانوا أربع أحجار , حطيتهم فى جيبى وجيت أخرج ... 


حسيت بنغزه فى رقبتى, حطيت أيدى على رقبتى لاقيت أبره صغيره !! 


شديت الابره وبعدها أغمى عليا !! 


فتحت عينى , لاقيتنى متكتف و نصى اللى فوق عريان , وشوفت ساحر عجوز ماسك القميص بتاعى وبيبص عليه وهو مبهور وقال كلام مفهمتوش !!! 


وبعدين بصلى وقال : 


هل تتحدث العربيه ؟! 


قولتله : 


اها 


قالى : 


انت لص , وجئت اللى كوخى كى تسرقنى , ويحق لى ان أقتلك !! 


سكت شويه وقال : 


ولكنى لن أقتلك لآنى أخشى من أن تكون ساحر قوى , ويأتى خدامك للانتقام منى !!،أرى أنك جئت من أجل الهبهاب النازف !! 


فما رأيك بأن تبادلنى , انا أعطيك الاحجار فى مقابل هذا القميص؟! 


موافق , بس فكنى !! 


ولكن أياك ان تخدعنى !! 


قولتله : 


عيب عليك !! 


أول مافكنى زقيته جامد فوقع على الارض وراسه أتخبططت وأغمى عليه , خدت من أيده القميص و الاحجار وجريت بره الكهف ... 


قابلنى حنوش  وقالى : 


أتأخرت كده ليه !!؟ 


الساحر شافنى ومسكنى وكان عايز يبدل الاحجار بالقميص فخدعته وضربته !! 


حنوش قالى : 


ضربته !! 


قولتله: 


أها  

قالى : 


الف مبروك يانينو كسبت عدو جديد ، ومش أى عدو ،الساحر ده من اقوى السحره اللى قابلتهم واكيد هيتنقم منك .. و هينفخك على الحركه دى 

قولتله : 


فكك دلوقتى ياحنوش , انقلنى بسرعه لفيلا معتز باشا ... 


حنوش خدنى فى حضنه ونقلنى الفيلا ! 


وصلت ومعايا الاحجار , حنوش قبض وخد حجره وخلع وهو فرحان !!

طلعت حجر وعملت زى ما نصيرقالى , نقشت أسم الجن المعالج و أستنيته يحضر ، 

نصير قالى أنه مابيتعاملش مع بنى آدمين و أنه هو اللى هيتعامل معاه  كوسيط

الجن الطبيب حضر   و نصير بدا يتكلم معاه ويفهمه الحاله ...

شويه و لاقيت نصير بيقولى : 


الجن المعالج يقدر يعالجه بس ليه شرط ....


قولتله : 


- عايز أيه ده كمان ؟!! 


قالى : 


- كل احجار الهباب النازف اللى معاك , حتى اللى محضره عليه!! 


قولتله : 


- وهو عرف منين أنى معايا أحجار تانيه ؟!! 


قالى : 


- علشان زى ماقولتلك الحجر فيه طاقه كونيه عامله زى المغناطيس واحنا بنحس بيه لما يكون قريب مننا . 


- موافق بس  يعرف يعال... 


مكملتش جملتى لما لاقيت معتز باشا فتح عينه فجأه وشهق شهقه طويله  , شويه و رجع لون وشه   طبيعى ولون عينه رجع أبيض !! 


بصيت على الحجر اللى محضر عليه الجن المعالج لاقيته

أختفى !!!, حسيت كأن حد حط أيده فى جيبى , مديت أيدى فى جيبى مالقتش الاحجار !! 


نصير قالى : 


- كده كله تمام , المريض خف و الدكتور قبض الفزيتا بتاعته !!! 


بصيت على معتز باشا وقولتله : 


- أنت كويس ياباشا ؟! 


قالى بصوته الطبيعى : 


- حاسس أن روحى ردت فيا تانى  . 


كان بيقوم علشان يقعد على السرير , جيت أسنده , شاورلى بأيده , وقعد على السرير لوحده !! 


أنا عايز أقف على حيلى 


لفيت بعينى وانا بدور على العصايا اللى بيسند عليها فلاقيتها فى ركن فى الاوضه قومت علشان أجيبله العصايا ,و رجعت 


لاقيته واقف على رجله من غير عصايا !!! 


أندهش وبصلى , وبعدين أتمشى فى الاوضه , بعدها لف فى الاوضه وهو بيجرى !!! 


بصتله بأستغراب  والعكاز بتاعه فى أيدى !!! 


سمعت صوت نصير بيقولى : 


- نسيت أقولك الجن  المعالج ، عالج معتز من الروماتيزم والعجز اللى فى رجله الشمال , وكان عنده  كام حصوه فى الكلى وحبة مشاكل فى الكبد ,  وضبطله الدعامتين اللى فى القلب , على ما أعتقد كده بقى كويس !!! 


بصيت على معتز باشا لاقيته بينط لفوق !!!  


قولت لنصير : 


- دا عمله عَمره كامله !!

شويه ومعتز باشا قالى : 


- أنت عملت فيا أيه يانور !!!

- كل خير ياباشا , المعالج اللى حضر عالج المرض و حبة  أمراض صغنينين ، روماتيزم  و العرج وشال كام حصوه كانوا فى الكلى !!! 


قالى وهو فرحان : 


- انا مش عارف أشكرك ازاى يانور ... انا عايز أكافئك مكافأه كبيره أوى !! 


- أيه ياباشا أنت ناسى أنك أكتر حد وقف معايا وحمانى , أنا مهما عملت مش هوفى جمايلك عليا , وكمان أنت عارف كويس أنى مباخدش فلوس فى الخير  .. 


جري عليا وحضنى جامد , و فضل يخبط على ضهرى لحد ماوجعنى !!! 


كان مهيبر جدا ولاقيته بيقولى : 


- أنا جعان أوى يانور !! 


وجرى فتح باب الاوضه ونادى على السفرجى , فجه جرى , و أول ماشاف معتز باشا  أندهش وفضل متنح !!! 


معتز قاله : 


- بلغهم يعملوا وليمه كبيره فى الساحه  و أعزموا كل أهل القريه والقرى اللى حوالينا ، الليلة عايزها وليمة كبيرة يتحاكى بيها الناس لسنين قدام  , ودلوقتى هاتلى كل الاكل اللى فى المطبخ حالا!!! 


الاكل جه الاوضه ومعتز كان بياكل بشراهه , خلص أكل وقالى بحماس : 


- يلا بينا !!! 


قولتله بأستغراب : 


- يلا بينا على فين ؟!! 


- هنركب خيل  وبعدها هنلف فى تراك حوالين القريه و.. 


أبتسمت وقولتله : 


- حيلك ياباشا عليا أنا راجل صحتى على قدى !!! وبعدين انا منمتش من أمبارح , فهتستأذنك أروح انام ... 


- موافق بس هتجيب سندس وهتيجى الوليمه الليله , علشان نحتفل مع بعض . 


- أكيد ياباشا طبعا  

روحت الكهف ولسه هنام , لقيت سندس بتقولى :

اصحا يا سيدى فى واحدة بتنادى عليك من فوق التبه وبتقول انها صحافة !!! 


قلتلها  بأ ستغراب : 


صحافة !!! ودى عايزة ايه دى ؟!! 


الفضول قومنى من على السرير عشان اشوف الموضوع ايه !!! 


طلعتلها على التبه لقيتها واقفه مستنيه وماسكة ورقه وقلم 


أول ما شافتنى مدت أيديها وهى بتقول : 


- انا مى اليمامى صحفيه متدربة وطالبة فى تانيه اعلام  !! 


سمعت صوت نصير بيضحك وبيقولى : 


- انت عارف مين دى ؟! 


قلتله: 


-  مين يا نصه ؟!! 


- دى تبقى اخت الظابط الرخم اللى حبسك يوم كامل فى الفيلا المهجورة !!! فاكر ؟! 


قلت بصوت عالى : 


- اهااا  اخوها  اللى مكنش عايزها تخش كليه اعلام وعايزها تخش كليه سياسه !! 


أندهشت  ورجعت لورا وهى بتقول : 


- الله اكبر مدد يا شيخنا .. ممكن اعمل معاك لقاء صحفى ؟!! 


ماستنتش موافقتى ولاقيتها بتقول : 


_ عرفت اخويا منين ؟!!

قلتلها : 


- معتقدش ان فى حد فى مصر ميعرفش اخوكى !! 


بصتلى باستغراب وقالتلى : 


- انا جايه لحضرتك بخصوص الفيديو دا . 


وحطت شاشه الموبايل ادام وشى , اتصدمت من الفيديو اللى شفته !! 


فيديو متصور ليا وانا متحول تنين وبطير  فى السما !! 


الفيديو مكنش واضح اوى عشان متصور بليل و من بعيد , بس باين ان فى كائن بيطير فى السما وبينفخ نار , ومكتوب فى عنوان الفيديو 


"خدعة الساحر نور ناير فى سماء قريه النيارين " 


كنت مصدوم ومش عارف اقول ايه !!!! 


لاقيتها بتقولى : 


- هى الناس مختلفة , فى ناس بيقولوا ان دى خدعة ,  وفى صيادين بيقولوا انهم شافوك وانت بتتحول لتنين وصوروا الفيديو دا ,  وطبعا فى ناس بتقول ان الفيديو متركب ومش حقيقى وانا كنت منهم , بس  بعد ماقابلتك  دلوقتى بدأت اشك ان انت اللى عملتها !!!

قلتلها : 

- حيلك ..حيلك !!! هو مش الحوار الصحفى يعنى سؤال وجواب ؟!, انتى هتعملى الحوار وتردى على نفسك ؟! 


قالتلى : 


- اتفضل رد !! 


قلتلها 


- انا مليش علاقه بالفيديو دا ..

قالتلي: 

- ازاى!!! مش انت ساحر ؟!!

قلتلها : 


- لا حضرتك انا معالج روحانى بعالج بالقرأن والاعشاب الطبيعية , حضرتك شوفى اى ساحر من اللى بيعملوا خدع زى دى  , ممكن هو اللى عمل الحركة الهبله دى , وعلى فكرة الحركة دى سهله جدا واى عيل ممكن يعملها !!! 


قالتلى بفضول : 


- ازاى ؟!! 


- ركزى فى الفيديو , تقريبا دى العاب ناريه  , فى العاب ناريه من الصين لما بتضرب فى السما بتطلع اشكال حيوانات 


قالتلى بشك : 


- طب والصيادين اللى بيقولوا انهم شافوك وانت بتتحول ؟!!

- عيب عليكى لما تصدقى الكلام ده ، أنت  المفروض حد متعلم ، وأكيد عارفه أن اهل القريه هنا غلابه ودماغهم على قدهم , منتظرة ايه من ناس مؤمنه بالنداهة وعروسه البحر ؟!! 


شكلك طالبة بتدورى على اى خبر يعمل بووم وخلاص , بدليل ان مفيش صحفى تانى جيه غيرك !! وبعد اذنك بقى عشان عايز انام .. 


ولفيت ضهرى عشان امشى لقيتها بتندهلى وبتقولى  : 


- طب بقولك  ..بقولك أ ستنى  


قولتلها بنفاذ صبر : 


-خير أيه تانى ؟! 


- ينفع تعملى تعويذة ترجع الاكس  ؟!!! 


تعويذة  ترجع ال ايه يا ختى  ؟!! 


الاكس ... حبيبى السابق 

قلتلها بعصبية : 

بلا سابق بلا لاحق ،اتفضلى حضرتك مش ناقصه شغل مراهقين وابقى سلميلى على اخوكى الرخم .. 


سيبتها ورجعت الكهف تانى ونمت نومة اهل الكهف , لحد ما سندس جات  تصحي فيا ..

فضلت تهز فيا وهى بتقول  : 


- يلا ياسيدى هنتأخر على الوليمه . 


قولتلها وانا مش قادر افتح عينى : 


- روحى أنتى ياسندس !!! 


فضلت تهز فيا وهى بتقولى : 


- أزاى يعنى ياسيدى أروح من غيرك !!!!وكمان معتز باشا هيزعل اوى لو مروحتش . 


قولتلها وانا سكران من النوم :

- قوليله أنى تعبان وهو هيفهم 

- ماهو انا مش هروح من غيرك ياسيدى , والنبى ياسيدى دول عاملين وليمه كبيره ودابحين يجى عشرين عجل !! 


مردتش عليها ودورت وشى الناحيه التانيه ,فسمعت صوت نصير بيقولى : 


- اصحى  يانينو هنتأخر على الوليمه !!! 


- وانت كمان عايز تروح الوليمه ليه ؟!! 


مش أنا بس كل الجن اللى معايا هيتشكلوا لبنى ادمين ويجوا معاك الوليمه !! 


معرفتش أكمل نوم وقومت قعدت  من على السرير وانا فاتح نص عينى  وقولت لسندس اللى قاعده مستنيانى أصحى : 


- أعمليلى كوباية شاى علشان أفوق . 


فطت من على السرير وجريت تعمل الشاى وهى فرحانه . 


- نعم ياعم نصير أنت كمان , عايزين تيجوا الوليمه ليه !؟ 


- هو أيه اللى ليه!! علشان ناكل , ده بيقولك دابحين يجى عشرين عجل !!! 


- هتاكل  لحمه يعنى زى الناس !!؟ 


- لاطبعا أحنا مبحبش اللحمه أحنا بنحب العضم !!! 


- وبتحبوا أيه تانى ؟!! 


- الرز !!! 


قولتله :

- وفى العادى بتجيبوا الرز والعضم منين !!؟ 


- أغلبيتنا بيتشكل لبنى أدمين ويروحوا الاسواق !!! 


- أسواق !! الاسوق بتاعنا !!! 


- أها وحياتك , السوق بيبقى زحمه وفى الغالب لو أنت فى السوق هتصادف جن متشكل ,بيجيب أكل من عالمكم  أو بيقضى مصلحه وممكن يرمى  عليك  السلام  والتحية كمان !!!! 


قولتله  بأندهاش : 


- أنت بتهزر يانصير !! 


- وحياتك عندى مابهزر , طيب لو صادفت معاك ووقفت فى محل جزاره ولاقيت حد بيطلب لحمه بعضمها , فى الغالب ده جن من عندنا وبيجيب أكل !!!! 


- شوف أنا ساحر اهوه , وأول مره أعرف الحوار ده !!! 


- يلا بينا طيب , الرجاله جاهزه ومستنيه قدام الكهف !! 


قولتله :

- رجالة مين !!؟

- صحصح يانينو  .. المية جن اللى معاك أتحولوا ل١٠٠ راجل ومستنيينك بره الكهف  , أبقى قعدنا فى حته لوحدنا وحنوش هيعمل السفرجى ويجيبلنا العضم ويخدم علينا طول الحفله !! 


- حاضر يانصه هشرب كوباية الشاى , واخدكم وأروح الوليمه . 


قالى بنفاذ صبر : 


ياعم أبقى أشب الشاى هناك براحتك ,بسرعه أنجز قبل مايتصرفوا فى العضم , وعلشان توصيهم يطبخوه كويس !! ... قوم بقى . 


ونغزنى فى جمبى ففطيت من على السرير , لاقيت سندس جات وبتقولى : 


- نسيت أقولك أن الشاى خلص ياسيدى ومفيش سكر برضه فى الكهف !! 


قولتلها : 


- هو في أيه !! هو أنتوا متفقين مع بعض عليا ؟!! 


غسلت وشى وسرحت شعرى وروحت ناحية المرايه ولفيت لفه كامله بالقميص , وخليته بدله , وخدت سندس فى أيدى وخرجت بره الكهف , أول مافتحت الباب ... 


لاقيت ١٠٠ راجل ضخام الجته وطوال ولابسين جلاليب !! واقفين على باب الكهف ،ظهر نصير وهو لابس بدله شيك ببيونه ومسرح شعره وقالى : 


- بينا على الوليمه 


روحنا على الوليمه  كان ماشى جنبى نصير وسندس , وورانا ال١٠٠ راجل , 

روحنا ناحية الساحه  اللى كانت زحمه جدا 


الناس كلها كانوا فارشين الارض وكل عشره قاعدين على طبليه .

قعدت الرجاله اللى معايا فى حته بعيد لوحدهم وسندس راحت قعدت مع الحريم .. 


على مسرح الساحه كان فيه مغنى صوفى ومعاه الفرقه وعاملين زى حضره وبيغنوا : 


سقاني الغرام كأساً من الحب صافيا .. يا ليته لما سقاني  .. سقاكم . 


متى يا كرام الحي عيني تراكم .... وأسمع من تلك الديار نداكم... 


نصير كان واقف جنبى فى وسط الزحمه  وعدى من جنبنا سفرجى كان بيخدم على الناس اللى فى الوليمه , بصلنا وأبتسم !! 


فنصير بصله وابتسم وهو بيقولى : 


- ده حنوش على فكره !!! 


معتز باشا كان واقف  على المنصه جنب  الحضره    أول ما شافنا وسط الزحمه , نط من فوق المنصه كانه بيستعرض صحته  !!! 


وقرب علينا أنا ونصير . 


بص لنصير بتفحص وقالى : 


- مش هتعرفنى يانور ؟! 


قولتله وانا مبتسم : 


- نصير ياباشا 


معتز باشا أتحمس ومد أيده علشان يسلم عليه , بس نصير ممدش أيده . 


فقولت لمعتز باشا اللى  لسه مادد أيده : 


- لامؤاخذه ياباشا مش هيفنع يسلمك عليك  بالايد انت فاهم بقى !! 


سحب أيده بتفهم , بس كان متنح فى  نصير فى أندهاش شديد !! 


- باشا !! 


مردش عليا وفضل سرحان فى وش نصير 


قولتله  بصوت عالى : 


- باشااااا 


انتبه ليا وقالى : 


- أيوه يانور . 


- نصير والرجاله الى معانا عايزين العضم بتاعه الدبايح ينطبخ كويس , علشان عازمين  نفسهم على الوليمه !! 


قالى بأستغراب : 


- عضم !! مايكلوا لحم , الخير كتير 


نصير قاله : 


معلش يامعتز  خليلكم انتوا اللحم , هاتلونا أحنا العضم بس مش هوصيك , عايزين رز مع العضم !! 


معتز باشا مردش عليه وتنح فيه تانى ! 


فنصير قاله : 


- أيه يازوز  هتفضل متنح فيا كتير , بسرعه بقولك جعانين !! 


معتز باشا لف ضهره وراح على واحد من اللى شغالين عنده . 


شويه وحنوش طلع على المسرح  وخد الميكروفون من فرقة الحضره وقلبها فرح شعبى , وعمل عبد الباسط حموده  وغنى وقال : 


انا مش عارفنى .. أنا توهت منى  ..أنا مش أنا 

لا دى ملامحى ...ولا الشكل شكلى ..ولا ده انا !!!

حنوش خلص الاغنيه وشكر الجمهور اللى بيسقف  بحراره ونزل من المسرح وقرب علينا انا ونصير وقالنا : 


- انا همشى بقى .. كل وليمه وانتوا طيبين . 


- بسرعه كده !! 


قاله : 


- لاما انا هنا من بدرى وكلت لما شبعت , وعندى فرح تانى وعايز الحقه ! 


نصير قاله :

- يابختك ياحنوش حر وبتاع دماغك 


حنوش قاله قبل مايختفى : 


- شيل عينك يا نصير مش ناقصه حسد!! 


الاكل جه ونصير خدم على الجن اللى معاه بعد ماحنوش خلع 


كانت ليله ممتعه أنبسطنا فيها كلنا أنس وجن ...

لحد ماتعبت وناديت على سندس علشان نمشى , مكنتش عايزه تمشى وكانت عايزه تكمل لحد الفجر زى باقى الناس, بس أنا أصريت وخدتها فى أيدى ... 


فجاه لقيتها نامت ووقعت على الارض , بصيت حواليا لاقيت كل اللى فى الساحه من البشر ناموا على نفسهم مفضلش صاحى غيرى وكل الجن اللى متشكلين بشر !!! 


قولت لنصير: 


-  في أيه !!! 


- في سحر !!! , ثوانى هتحول جن وأشوف فيه أيه!! 


بصيت على نصير لاقيته مغمض عينه بس لسه بنى ادم !! 


نصير أتوتر ولاقيته بيقولى : 


- انا مش عارف أرجع جن تانى يانور !!! 


- مش فاهم !! 


نصير ماردش عليا وجرى على الجن المتشكلين وقالهم : 


- أرجعوا تانى جن بسرعه !!! 


مقدروش يرجعوا جن !!! 


نصير  جرى ناحيتى تانى وقالى وهو متوتر : 


- اتحول لتنين بسرعه يانينو !!! 


مسألتوش ليه !! ولفيت لفه كامله بالقميص وأنا بفكر فى التنين ,  بس ماحصليش حاجه ومتحولتش !!! 


نصير قالى  وهو مرعوب: 


- ده اللى كنت خايف منه , فيه حد أبطل استخدام السحرفى المنطقة. 


سمعت صوت بيرج المكان وبيقول : 


- لقد حذرتك من ان تخدعنى , واليوم هو يوم الانتقام !!!

نصير قالى :

- مين ده يانور !!

قولتله :

- الساحر اللى سرقت منه الهباب النازف !!


فجأه لاقيت نصير والجن اللى معاه ماسكين رأسهم وبيصرخوا  بصوت عالى من الصداع  , وأيديهم ورجليهم أتقيدت بأصفاد ( بكلابشات) من نار!!! 


وقعوا على الارض وقواهم خرت وضعفوا تماما وبقوا مش قادرين يصلبوا طولهم !!! 


فجأه لاقيت نصير والجن اللى معاه ماسكين رأسهم وبيصرخوا  بصوت عالى من الصداع  , وأيديهم ورجليهم أتقيدت بأصفاد ( بكلابشات) من نار!!! 


اتنفضت لما لاقيت أيد الساحر على كتفى !! 


التفت ورايا وشوفته وهو واقف ورايا وماسك فى أيده كورباج !! 


فرد الكورباج وضربه فى الهوا فطلع صوت طرقعه عاليه ,فهبط الجن بتوعه على الساحه وحاوطوا الساحه كلها !!! 


الجن اللى معاه كانوا متشكلين على هيئة عمالقه , طوال جدا ,طول الواحد فيهم  يعدى بيت من 5 أدوار !!! 


في منهم اللى عينه مشقوقه بالطول ولسانه طويل زى الافعى  مدلدل من بوقهم، ومنهم اللى رأسه رأس كلب  , كانوا كتير أوى ومحاوطنى من كل حته !!! 


و بيتحركوا حواليا كأنهم بيحضروا لحاجه !!! 


طلعوا على مسرح الساحه الكبير وزاحوا كل اللى عليه على الارض , كراسى وسماعات وبنى أدمين نايمين , رموا كله على الارض وفضوا المنصه كلها وجابوا جزع شجره كبير وحطوه فوق المنصه. 


واحد من العمالقه  اللى كانوا وافقين على المنصه ,  بعين واحده فى راسه وماسك فى ايده سيف طويل، وبيسنه على حجر صوان ضخم, السيف كان بيطلع شراره كتيره من قوة الاحتكاك وقوة  السياف !! 


قولت للساحر  وانا بترجاه :

- أنا أسف , أرجوك سامحنى , وخد القميص أهو, بس سيبهم أرجوك !! 


قالى بهدوء : 


- سوف أحصل على القميص عاجلا أو بعد أن أقتلع رأسك أولا ..... ولن يطاردنى خدامك  ليأخذوا بثأرك , أرى أن جميعهم  قد تشكلوا لبشر, سأقتلع رؤوسهم أولا , بعدها سأقتلع رأس ساحرهم  , رأسك أيها المخادع . 


قولت للساحر  وانا بترجاه : 


وضرب الكورباج بتاعه فى الهوا فعمل فرقعه , الجن العمالقه اترعبوا و شالوا نصير والجن اللى معاه وطلعوهم على المنصه !! 


أترجيته يوقف.... 


فجأه لاقيت جسمى بيتكتف وحسيت بحد بيجبرنى أنى أركع على رجلى , صوتى مابقاش بيطلع , كأن حد كممنى .

كل الناس اللى فى الساحه  كانوا مسحورين ونايمين , انا الوحيد اللى شايف  كل اللى بيحصل . 


الساحر مشى ناحية المنصه و وبعدها رجع وبص على سندس بتفحص  وقال : 


- هذه زوجتك !!؟ 


عينى دمعت وأترجيته ما يأذيهاش !! 


صوتى ماطلعش , صرخت بصوت عالى , لحد ماحسيت أن عروقى هتنفجر . 


شاور بأيده على بطنها وهو بيتمتم بتعزيمه . 


فجأه سندس أتنفضت وصرخت صرخه طويله بصوت عالى واغمى عليها تانى !!! 


كمل مشى ناحية المنصه وطلع المنصه فى الوقت اللى الجن بتوعه جابوله كرسى يقعد عليه 

قعد على الكرسى  , وضرب الكورباج فى الهوا للمره التالته 


فبدأت المذبحة !! 


شالوا واحد من الجن كأنهم بيشيلوا عيل صغير , وحطوا رأسه وهو منهك على جزع الشجره!!  


نصير وكل اللى معاه كانوا بيبصوا على زميلهم ورأسه على جزع الشجره ,نصير حاول يقوم , بس الاصفاد كانت مكتفاه وكان بيأن من التعب .  


السياف نزل بالسيف على رقبة أول جن , وأتفصلت رأسه على جسمه !!! 


نصير صرخ بصوت عالى وقال : 


- كنعاااااان!!! 


العمالقه شالوا الجن اللى بعده  وكان شكله الاكبر سنا بينهم وحطوا رأسه على الخشبه و السياف نزل على رأسه قطعها !! 


نصير وكل الجن صرخوا  بصوت واحد بأسمه : 


- طوميااار !!! 


الدنيا كانت بتلف بينا وكلنا حسينا أن الساحه ضاقت بينا ,العمالقه كملوا ذبح فى جيش نصير !! 


نصير كان بيصرخ  بصوت عالى كل ما السياف ينزل بسيف على حد من أتباعه !! كأنه هو اللى بيدبح . 


كنت مغيب وانا حاضر , كنت ببص وانا مشوش على سندس والمنصه !! 


منهار ومصدوم!!!  شايف كل حاجه بتحصل قدام عينى بس مش مصدقها!! 


العمالقه ذبحوا لحد دلوقتى عشرين جنى فى خدمتى ومكملين لحد مايقطعوا روؤسنا كلها ,صرخ نصير وهو  بيتوعد الساحر وقاله :

- عشيرتى من الجن مش هيسبوك وهينتقموا منك أشد انتقام , هيقلعوا قلبك من جذوره !! 


الساحر قال بغضب : 


- ساحركم هو من أعتدى , أى أنكم من المعتدين , ولو جاء أحد من عشيرتك راغبا فى الانتقام فسيلقى مصيرك!!!!! 


وشاور للعمالقه اللى معاه فسابوا الجن اللى كانوا هيشنقوه و وجم مسكوا نصير!! وحطوا رقبته على جزع الشجره ,مكنتش شايف المشهد من الدموع اللى فى عينى , حاولت أفلت من السحر اللى مكتفنى بس  مقدرتش. 


صرخت بصوت عالى بس جسمى كان متكتف , وكنت بتشنج وانا ببص على نصير اللى رأسه على الخشبه ومش خايف من الموت ... 


كان بيبصلى وهو بيودعنى !! 


السياف رفع السيف فى السما , غمضت عينى علشان ماشوفش المشهد اللى جاى ... 


بعدها سمعت صوت السيف وهو بينزل و بيصطدم بجزع الخشبه ,فعرفت أنه قطع رأس نصير !!! 


فتحت عينى علشان أبص على المنصه , لآقيت ضوء أبيض ساطع  مغطى الساحه كلها كأنه شابوره أو سحابه كبيره ونزلت على الارض , مكنتش شايف ايه اللى بيحصل بس كنت بسمع صرخات عاليه !! 


حاولت أركز عينى على المنصه , بس ماقدرش أشوف حاجه,  كل اللى كنت شايفه ضوء أبيض ساطع , عينى بدأت تألمنى منه. 


غمضت عينى علشان أريحها من الضوء وفتحتها تانى ,شويه والنور بدأ يخفت والسحابه تختفى والرؤيه أبتدت توضح . 


شوفت السياف وهو مشقوق نصين بالطول كأن حاجه هبطت عليه من السما !!! والسيف الطويل اللى كان فى أيده مش موجود!!!

الرؤيه بدأت توضح أكتر 


وشوفت كل الجن العمالقه اللى كانوا على المنصه متقطعين , دراعتهم فى ناحيه , رجليهم فى ناحيه ورأسهم فى ناحية . 


ونصير وسطهم  منهك وبيحاول يقوم !! 


نصيرعايش !!! 


ضحكت وانا بعيط!! 


وبصيت حواليا على العمالقة اللى تحت المنصه لقيتهم مندهشين زيي من اللى شايفينه !! 


شوفنا حنوش حاطط السيف الطويل على رقبة الساحر وبيقوله : 


-

- فاكرنى يا  كاتو ولا ناسينى !!؟ 


الساحر هز رأسه بالنفى وهو مرعوب . 


قاله : 


- أنا العفريت اللى عَزمت عليه وسخطته فار ، بعدهاحبسته فى قفص لمدة سنه فى الكوخ بتاعك , أهلا بيك فى منطقتى ,  ياكاتو  يابن الهرمه !! 


حنوش جز على سنانه وبدأ يجرح رقبة الساحر بالسيف وهو بيقول : 






- ساكت ليه!!!؟ ,  فك السحر اللى على الساحه وخد العهد على الجن بتوعك بدل ما أقطعك ... 

وحرب بحرب ياكاتو يابن الهرمه و أنت عارف كويس أوى قدرات عفريت الجن ....أنطق فك السحر وخد العهد . 


الساحر قاله وهو مرعوب : 


- عاهدنى أن  تضمن لى حياتى  أولا , والا فستحاوطكم لعنات هى أكبر من لعنات الحروب  !! 


حنوش قاله : 


- أعاهدك يابن الهرمه ,!!! بس فك السحر وخد العهد والا هشق رأسك وأشوطها برجلى لحد الكوخ بتاعك !! يلا !!! 


الساحر هز رأسه وقال لحنوش : 


- حرر يدى كى أضرب بكرباجى الهواء !! 


حنوش قاله : 


- لا صايع ياكاتو , فك السحر بالتمتمه ,مش محتاج كورباج ياروح أمك , شكلك ناوى على غدر ياكاتو !!! 


وبدأ حنوش يمشى بالسيف على رقبته وهو بيعمق الجرح !!!

الساحر أترجاه يوقف وتمتم بكلمات .... 


شويه اختفى كل الجن العمالقه اللى حوالينا , بعدها الكلابشات النار اللى فى أيد نصير أختفت و كل الجن اللى معاه بدأوا يفوقوا ويقوموا على حيلهم . 


وانا حسيت أنى تحررت وجريت على سندس , فلاقيتها الحمد لله عايشه وبتتنفس .

بصيت على المنصه لاقيت نصير بيقرب من الساحر اللى مثبته حنوش و عينه كلها غضب ورغبه فى الانتقام  .. 


- أياك يانصير انا واخد العهد على نفسى !! 


نصير تجاهل كلام حنوش !! 




وفوجأنا كلنا بخنجر ظهر فى أيد نصير , طعن بيه صدر الساحر و مد أيده جوه صدر الساحر اللى بيصرخ من الالم .

نصير فضل يبصله فى عينه , لحد مأقتلع قلب الساحر ورماه على الارض !! 


حنوش رمى السيف الطويل وقال لنصير وهو بيعاتبه : 


- ليه كده يانصير , ليه بتعلن الحرب !!! 


نصير أدى ضهره لحنوش وامر كل الجن اللى معاه ينضفوا الساحه ويرجعوها زى ماكانت !! 


شويه والدنيا رجعت طبيعيه ... الناس فضلت نايمه لحد ماطلع الفجر وصحيوا كلهم مره واحده . 


سندس فتحت عينيها وقالتلى : 


- هو أيه اللى حصل ياسيدى ؟!! 


خدتها فى حضنى وانا بعيط وبقول: 


- حصل خير ياسندس .... حصل خير !!! يلاه بينا نرجع على الكهف اتأخرنا أوى !! 


سندتها فقامت , سألتها : 







- أنتى كويسه ياسندس !! 


قالتلى : 


- زى البومب ياسيدى !! 


حمدت ربنا انها كويسه ومحصلهاش حاجه ,رجعنا على الكهف  ودخلت سندس تنام . 


وناديت نصير , فماردش عليا ... 


مارضتش أضغط عليه , بعد اللى حصل وسيبته لحد مايهدى . 


نصير فضل ميردش عليا لمدة أسابيع  فقفلت الخيمه . 


سندس كانت حاسه ان فيا حاجه غلط وكانت دايما بتزن وبتسألنى على نصير ,وانا على طول كنت بتجاهلها. 


لحد مافى يوم أستدعانى معتز باشا علشان أروحله الفيلا بتاعته . 


طبعا ماقولتلوش حاجه عن اللى حصل . 


اول ماشافنى سلم عليا بحراره وقالى وهو متحمس : 


- أنا طلبت أقابلك علشان أقولك أنى هقضى أجازة الصيف فى أمريكا !!! 


قولتله بأستغراب : 


- أمريكا !!؟ 


اول ماشافنى سلم عليا بحراره وقالى وهو متحمس : 


قالى : 


- أصل عامل مفاجأة  لابنى وبنتى وهطب عليهم وانا من غير عكاز , من الاخر يانور أنا كنت زى الطير محبوس فى قفص وقررت أطير يانور أطير . 


- طير ياباشا .. طير .. ربنا يسعد أيامك . 


قالى : 


- شكرا يانور ... بس أنا مش جايبك علشان كده , انا جايبك علشان أقولك أنى كلفت واحد بحمايتك وانا مش موجود , رن عليه بس هتلاقى الداخليه كلها عندك , وانا كل يومين هبقى أكلمك برضه واطمن عليك . 


قولتله : 


- ماتشغلش بالك بيا ياباشا . 


قالى وهو بيدينى كارت : 


- خد الكارت , واى حاجه تحصل معاك لاقدر الله رن بس وقوله أزيك يا أبراهيم هتلاقيه عندك وبيخلص !! 


خدت منه الكارت وشكرته على اهتمامه. 


يومين وكان معتز باشا ساب البلد وراح امريكا وبقيت لوحدى مفيش ونيس . 


بنادى على نصير مابيردش برده . 


وقررت أستدعى نصير بالتعزيمه غصب عنه !! 


حضر وكان شكله مضايق وحزين !! 


- مش بترد عليا ليه يانصير ؟!! 


قالى وهو مهموم : 


- علشان حاجات كتير , منها أنى اتهورت وأعلنت الحرب , وممكن اللى أتبقى من أصدقائى يموتوا , وعرضت حياة حنوش للخطر بعد ما أخد العهد على نفسه علشان ينقذنا , غيرعشيرتى اللى مات تقريبا ربعهم فى وليمة عضم !!! 


وقفت وقولتله : 


- أذا كان على الحرب فأنت معاك تنين , واذا كان على عشيرتك فده أجلهم وعمرهم وانت جن مؤمن ولا أيه !!؟ 


المفروض تحمد ربنا انه سترها معانا وبعتلنا حنوش البطل ... صح قولى هو ازاى حنوش قدر يعمل ده كله لوحده !؟ 


قالى وهو بيجتهد علشان يبتسم : 


- حنوش عفريت من الجن , قوته تقريبا ممكن توصل من عشر أضعاف لالف ضعف قوة الجن العادى  , ده غير أنه من سلسال العفريت اللى عرض على الملك سليمان انه يجيبله عرش ملكة سبأ . 


أحنا يعتبر جمبه عيال صغيره , جن كبير يعنى , هو بس اللى بيحب يلف كتير ورحال !!

أبتسمت وقولتله : 


- فاكر اول مره قابلتلك فى الكهف قولتلك أيه عن حنوش ؟! 


أبتسم وقالى : 


- أها المفروض نعمله تمثال . 


- طيب مانت حلو أهو يانصه وفاكر كل حا...

قطعت كلامى لما سمعت سندس بتصرخ وبتستنجد بيا 


                      الفصل التاسع من هنا

القراة باقي الفصول الجزء الثانى من هنا

لقراة باقي الفصول الجزء الاول اضغط هنا



تعليقات



حجم الخط
+
16
-
تباعد السطور
+
2
-