Ads by Google X

القائمة الرئيسية

الصفحات

رواية ميراث نور الجزء الثانى الفصل التاسع والعاشر والحادى عشر


 

 

الجـزء التاني من ميراث نـور 

         بـــــــارات(9/10/11)

للـگاتبةة /لينا بسيوني 


قطعت كلامى لما سمعت سندس بتصرخ وبتستنجد بيا. 


جريت عليها لاقيت دم كتير بينزل من تحتها و ماسكه بطنها وبتتلوى. 


قولتلها وانا ملهوف : 


- في أيه ياسندس !!! 


قالتلى : 


- بطنى ياسيدى بتتقطع !!؟ 


سمعت نصير بيقولى : 


- لازم تاخدها وتروح بيها للدكتور حالا يانور !!! 


قولتله : 


- في ايه يانصير ؟!! 


قالى : 


- بسرعه يانور , الدكتور هيبقى يقولك على كل حاجه . 


شيلتها على دراعى , وقولتله : 


-  أنقلنا بسرعه يانصير !! 


نصير نقلنا مستشفى المركز , ظهرت فى الرسيبشن وانا شايل سندس وجريت بيها على الطوارئ , خدوها من الطوارئ على العمليات ,فضلت مستنى قام العمليات , لحد ماخرج الدكتور وقالى : 


- البقاء لله !!! 


مسكت فى هدومه وقولتله بعصبيه : 


- البقاء لله فى مين ؟!! انت مجنون ... سندس مراتى ماماتتش !! 


قالى وهو بيشيل أيدى من على هدومه : 


- أهدى يا أستاذ مرات حضرتك كويسه  , بس الجنين البقاء لله. 


- جنين !!؟ 


قالى : 


- المدام كانت حامل تقريبا فى شهر او شهرين و ...... 


قولتله : 


- و أيه ؟!! 


قالى : 


- و الطفل مات وفى مشكله حصلت فى الرحم  

وسكت شويه , وقالى : 


- أنا أسف بس مرات حضرتك بنسبه كبيره ممكن متخلفش تانى , أرجو من حضرتك تجيبلها الموضوع واحده واحده. 


قولتله : 


- الحمد لله أنها بخير , قدر الله وماشاء فعل. 


الدكتور ربت على كتفى وقالى : 


- ربنا يصبركم !!! 


دخلت على سندس لاقيتها فايقه وبتعيط . 


قعدت جمبها على السرير ومسكت أيديها وبوستها , ودت وشها الناحية التانيه وهى بتعيط !! 


قولتلها وانا بجتهد فى رسم الابتسامه :

- أيه يابت بتعيطى ليه؟

مردتش عليا ,قولتلها : 


- طيب مابترديش عليا ليه !!؟ هو انا زعلتك منى فى حاجه ؟!! 


أها أنتى زعلانه علشان الجنين يعنى !! .. ياسيتى العمر قدامنا طويل. 


عيطت أكتر وأتشحتفت وهى بتقول : 


- لا ياسيدى أنا ظلمتك !! 


قولتلها  بأستغراب : 


- ظلمتينى !!؟ 


قالتلى وهى بتبكى : 


- أها  ظلمتك , أوعى تكون فاكرنى مش عارفة اللى جرالى , أنا حسيت ياسيدى ..  حسيت أنى بقيت زى الارض البور ومش هطلع زرع تانى أبدا .

قولتلها : 


- مين اللى قالك كده ؟!! أنتى زى الفل .وأنا أصلا مش عايز عيال  ...  دول دوشه  يابنتى , ومش هيخلوكى تعرفى تيجى ورايا فى كل حته ,  أحنا كده فل أوى .

مردتش عليا  وفضلت تعيط ,قولتلها : 


- كده ياسندس مبترديش عليا !! 


قالتلى وهى لسه بتعيط : 


- أنا ظلماك ياسيدى ومش هسامح نفسى ... أنا ظلماك من اول ما وافقت أتجوزك انت كنت تستاهل واحده بنت أصول ومتعلمه , مش درويشه وجاهلة وكمان مبتخلف.. 


قطعت كلامها وقولتلها : 


- أنتى عبيطه يابت , مانتى درويشتى أصلا . 


الدكتور دخل علينا وأحنا بنتكلم علشان يطمن على سندس فقولتله : 


- دكتور , أنا أسف بس هسألك سؤال شخصى !!؟ 


بصلى بأستغراب !!، فقولتله :

- لو قدامك أتنين  حلوين والمفروض تتجوز منهم واحده هاى كلاس أوى وواحده درويشه ليك , مبتفكرش فى حد فى الدنيا غير فيك , بتتمنى ليك الرضا ترضى وسبب سعادتك وضحكتك فى الدنيا , هتختار مين !!؟ 


- أوعدنا يارب بالدرويشه !! 


قولت لسندس : 


- شوفتى !!! أى راجل سوى فى الدنيا هيختار الدرويشه. 


الدكتور كشف عليها وقالنا : 


- هى الحمد لله كويسه!!

قولت للدكتور :

- يعنى نقدر نخرج النهارده !!

قالى :

- أها طبعا , بس لما تدخل الحمام أو تخرج ريح علشان نطمن على حركة الامعاء والمعده !!

وكتبلنا على شوية أدويه .

رجعنا على الكهف , سندس كانت لسه حزينه ,أجتهدت علشان أخليها بس تبتسم , وأبتدت تضحك لما رجعت فى يوم وانا فى أيدى أكتر أكله بتحبها، السمك , أخر مره اكلنا فيها سمك كانت يوم الهجوم على الكهف .

الايام عدت وكنت لسه مافتحتش الخيمه , لحد ما سمعت نصير بيقولى  :

-  نينو !!!

قولتله :

- نعم يانصه !!

قالى :

- عايزين نشتغل !!

قولتله :

- ياريت , يانصه , أصلى زهقت أوى من القاعده , بقالنا كتير أوى .

قالى بحماس :

- طيب يلا بينا !! 


فتحنا الخيمه و بعت سندس تعرف الناس اللى فى القريه وأستنينا الناس تيجى !!

بس مفيش غير حالتين بس اللى جم طول النهار !!

قولت لنصير :

- في أيه يانصه !!؟ فين الطوابير !!؟ الناس راحت فين !!؟ , ده حتى اللى كانوا متابعين معانا العلاج مجوش !! 


قالى بأستغراب : 


- علمى  .. علمك  !! بس وش كده في حاجه غلط !! 


- ماتروح تطقص وتعرفلنا أيه اللى بيحصل !!؟ 


أختفى نصير وغاب شويه , ورجع. 


قولتله : 


- أيه يانصه !!؟

قالى : 


- سألت عمار كذا بيت فى القريه , وياريتنى ما سألت !! 


قولتله بفضول : 


- أنجز يانصه في أيه ؟!! 


قالى : 


- شهاب و نيللى !! 


- مالهم !! وأنجز أحكى الكلام مره واحده ماتنقطنيش. 


قالى : 


نيللى وشهاب عاملين خيمه كبيره فى القريه اللى جمبنا , قرية شهاب  , وعامل الخيمه على أنه بيعالج الناس مجانا , بما أنه بيدرس طب , بس الحقيقه أنو هو ونيللى بيعلموا الناس السحر الاسود ,وبيقضوا حاجة الناس اللى تخص منفعتهم الشخصيه و أذية الغير , بقى اللى عايز تجارته تكسب يروحلهم واللى عايز يأذى حد يروحلهم . 


بيربطوا الرجاله وبيسلطوا الجن يلبس الستات وبيعملوا أعمال وبيدفنوها فى المقابر , وكله ببلاش . 


قولت لنصير وانا مصدوم : 


- نفس اللى كان بيعمله جد شهاب , خزاعى !! 


سكت شويه وقولت لنصير : 


- طيب ازاى يانصير شهاب لسه معاه جن , هو مش أحنا قضينا على جيشه كله وقت المعركه !! 


نصير قالى :

- أولا خد بالك من كلامى انا قولت شهاب ونيللى , يعنى نيللى كمان بقى عندها جن !!! وبقت تمارس السحر !!! , أنما بقى هو جاب جن تانى منين , فأكيد حضر جن تانى , هو مش هيبقى بقوة اللى كانوا عنده , بس لو بيحضر كتير ممكن يحقق معادله الكتره تغلب الشجاعه , خاصة أن نيللى  بتحضر هى كمان معاه وبتعلم الستات أزاى يسحروا أجوازهم , وأزاى يأذوا غيرهم . 


- ليه الناس بتعمل كده !!؟ 


نصير قالى :

السحر وسيله سهله وقويه فى الانتقام , والناس زى ماعندها رغبة قويه فى الانتقام من أعداؤهم عندهم الفضول فى انهم يشوفوا فعالية السحر اللى عملوه ,ومتنساش أن السحر ممكن يخليك تاذى عدوك من غير مايبقى عليك مسئوليه جنائيه , وفى حالة شهاب طبعا الانتقام مجانى !! 


بس اللى الناس دى ماتعرفوش , أنهم هيتنفخوا دنيا وأخره !!

فى الدنيا لو حد أبطل السحر ورده اللى فاعله , ساعتها اللى عمل السحر هيتنفخ , غير الاخره بقى . 


طيب وبعدين يانصير هنعمل أيه !!؟

قالى :

مفيش فى أيدينا حاجه الناس هتفضل تروح لشهاب ومحدش هيعبرك  , مع شهاب بيحققوا مصالحهم , انما انت بتقولهم الطاعه لله !!

وعلى فكره احنا لازم نتحرك بسرعه , لآن الموضوع مش ببلاش زى ما ماشهاب بيقولهم , مفيش حاجه ببلاش فى السحر الاسود , وأكيد شهاب بيحضر لحاجه زى جده .. وممكن يكون بيحضر المخلوقات  اللى كان بيحاول يحضرها جده !!  وممكن يقدم كل الناس اللى راحتله أضحيه ليهم.

لازم نوقفه يانصير .

قالى :

- مبقناش عارفين نوقف مين ولا مين !! حياتك كلها مشاكل , بقيت أكتر حد عنده مشاكل فى أجدادك كلهم . 


سكت شويه وقالى: 


- المفروض اول حاجة نعملها , نخلى الناس تبطل تثق فى شهاب وفى سحره . 


قلتله : 


- ازاى ؟!! 


قالى : 


- هنعمل حملة تنضيف فى المقابر اللى دافنين فيها أعمال للناس ونبطلها , نمنع الاذيه الاول ، وعايزين نخطط كويس المره دى , وبلاش نروح نبلغ عنهم زى المره اللى فاتت ...  واخد بالك يانينو !! 


أكيد شهاب عامل حسابه والا مكنش عمل خيمه فى وسط البلد ووقف معاه نيللى اللى محكوم عليها بالسجن . 


- عندك حق.. 


شويه ولاقينا باب الكهف بيخبط , سندس راحت تفتح الباب , لاقيت حنوش واقف على الباب فقالتله : 


- أزيك ياوله ياحنوش , مبتجيش ليه ياوله ؟!! 


نادى عليا وقالى :

- يانينو , تعالى شوف مراتك بدل ما اشوطهالك فى النيل !! 


وبصلها وقالها : 


- أنتى تعرفى عمرى كام سنه !!!  علشان تقوليلى ياوله !! 


- تعالا ياحنوش .. ادخل !! 


قالى : 


- لا ياعم أنا مش بتضايف,  تعلالى بره أنت ونصير عايزكم !! 


خرجنا بره الكهف ,وقلتله : 


- خير ياحنوش ؟! 


قالى : 


- وانتوا معرفتكم يجى من وراها الخير أذا كنت انت ولا الزفت التانى نصير .

قولتله : 


- أهدى ياحنوش فى أيه ؟!! 


قالى : 


- مفيش حاجه !!! 


قولته : 


- طيب لما هو مفيش حاجه عامل أزعرينه ليه !!؟ 


قالى : 


- ماهو ده اللى يقلق يافكيك ,طول ما مفيش حاجه أعرف أنه فيه مصيبه هتحصل , الهدوء اللى قبل العاصفه، ماتفهمه ياعم نصير .. 


سمعت صوت نصير بيقولى : 


- المفروض الخدم بتوع الساحر الافريقى , يجوا علشان ينتقموا , معنى انهم مجاوش يبقى فيه حاجه مش طبيعيه بتحصل!! 


حنوش كمل على كلام نصير وقالى : 


- الساحر ده أفنى حياته كلها بيحضر فى جن ,  يعنى عنده جيوش من الجن ,  ومش أى جن ,ده غير انى كنت سنه محبوس فى كوخه وشوفت العجب , شوفته وهو بيدى الجن حاجات بتخليهم مهيبرين وبتزود قوتهم , انا كحنوش ماشفوتش قبل كده  جن بيتشكل لعملاق حقيقى مش وهم !! , على ما أعتقد أبن الهرمه كاتو عمل وصيه قبل مايجيلك علشان لو حصله حاجه , وده ممكن يكون اللى أخر الحرب !! 


- ماتقلقش ياحنوش لو كان معاه عمالقه فأحنا معانا تنين !! 


قالى بأستغراب: 


- تنين !!

نصير قاله : 


- ده موضوع كبير أوى , هبقى أحكهولك ياحنش فى قعدة روقان , عامة ماتقلقش زى مابيقولك نينو التنين . 


حنوش رد علينا وقالنا : 


- عليا النعمه انا ماقلقان غير منكم انتوا الجوز , انا غلطان اصلا أنى اتدخلت , طول عمرى فرى لانسر وبرنس فى نفسى , واول ما أتدخلت لبست فى حرب , وأيه!!!انا اللى واخد عهدها على نفسى !! 


روح ياشيخ منك ليه ياكشى تولعوا كلكم فى نار واحده .. 


وبعدها أختفى !!! 


نزلت مع نصير وعملنا حملة تنضيف للمقابر , طلعنا صور  عليها تعزيمات بتمجد الشيطان وبتطلب السرطان لصاحبة الصوره , واللى صورتها عليها قفل علشان يوقف حالها فى الجواز , حتى اللى متجوزين محطوط صورهم ومكتوب عليها طلاق وقتل , وصور اطفال مالهاش ذنب ولسه مبدأوش حياتهم مكتوب عليها مرض أو موت !!

طلعنا الصور و الورق اللى مكتوب عليه السحر وحطيتهم فى شوال، وطلعت على الكهف. 


فتحت الشوال وبدأت أبطل الاعمال، جبت جردل  وحطيت فيه ميه وقرأت على الميه الرقية الشرعية والفاتحه و أية الكرسى والمعوذتين وأيات أبطال السحر زى : 


فَلَمَّا أَلْقَوْا قَالَ مُوسَى مَا جِئْتُمْ بِهِ السِّحْرُ إِنَّ اللَّهَ سَيُبْطِلُهُ إِنَّ اللَّهَ لَا يُصْلِحُ عَمَلَ الْمُفْسِدِينَ

فَوَقَعَ الْحَقُّ وَبَطَلَ مَا كَانُوا يَعْمَلُونَ

إِنَّمَا صَنَعُوا كَيْدُ سَاحِرٍ وَلَا يُفْلِحُ السَّاحِرُ حَيْثُ أَتَى 


وبدأت أفك الاعمال وأسقطها فى الميه ,  وانا بفك الاعمال كنت بقرأ فى سرى المعوذتين علشان مفيش حاجه تيجى فيا , لو العمل مربوط بحبل كنت بفك الحبل براحه خالص , وأعدى الحبل من بين صوابعى علشان أتأكد أنه مفيهوش عقده , بعد ما أتأكد انه مفيهوش عقده أرميه فى الميه المقروء عليها وبعدها رميت الورق اللى مكتوب عليه الطلاسم  فى الميه .

الاقفال لازم تنفتح او تكسر  والاسلاك  المتلغبطه لازم تتفك وتترمى فى الميه  ,وانا بفك بردد أيات فك السحر. 


رميت كل حاجه فى الميه و طلعتها تانى وأستنتها تنشف وبعدين حرقتها ولميت الرفات بتاعها ودفنته فى حته مقطوعه ومحدش بيعدى عليها . 


فضلت على كده , بنضف ورا شهاب وورا الناس المؤذيه , وكل يوم المقابر كانت بتتملى أكتر بالاعمال , كل ليله كنت برجع بشوال البيت وابطله . 


طول الفتره دى سندس كانت بتزن عليا اتجوز تانى !! مش بس كده الهبله كانت بتجيبلى صور لبنات فى القريه علشان أختار منهم !!! 


سندس كانت حاسه بالذنب تجاهى وحاسه انها مقصره ناحيتى , ماتعرفش أن انا  اللى حاسس بالذنب تجاهها , لانى السبب فى اللى حصلها !! 


حاولت أكتر من مره أقنعها انى مش عايز عيال وانى مكتفى بيها , وان اهم حاجة عندى انها كويسه, بس كانت بتزيد أصرار وعند . 


لحد مافى مره أتفاجئت بيها داخله عليا الكهف وفى أيديها واحده  من القريه وبتقولى : 


- أيه رأيك  ياسيدى !!؟ 


قولتلها بأستغراب : 


- مين دى !!؟ 


قالتلى : 


- فردوس , بنت سماحه البقال !! 


قولت لفردوس : 


- أزيك يافردوس !! 


قالتلى وهى مكسوفه : 


- كويسه ياسيدى ناير !! 


قولت لسندس : 


- مالها فردوس !!! ملبوسه ؟!! 


- لا ياسيدى , انا جايباها علشان تتجوزها !!! 


فضلت فتره أستوعب اللى بتقوله سندس !! وقولتلها :

- أنتى عبيطه ياسندس !! رايحه تجيبلى واحده علشان تبقى ضرتك !! أنتى أيه مش من صنف الحريم ؟!! 


وبصيت على فردودس وقولتلها : 


- وانتى سايباها تسحبك زى الجاموسه !! انتى مالكيش رأى !! 


قالتلى بكسوف : 


- ربنا يكتبهالى ياسيدى وأبقى من حريمك !!! 


قولتها : 


- نعم !! من حريمى !!  هو في أيه ياسندس !!؟ 


- مانا عملت أعلان فى القريه انك بتبحث عن زوجه تانيه !! 


خبطت كف على كف وقولتها : 


- أنتى هبله يابت !!ولا انتوا كلكم هنا فى البلد هبل؟ !!! 


قولت لفردوس : 


- غورى ياشاطره من هنا , وقولى للى تقابليه انى مراتى سندس أتهبلت ومحدش ياخدلها على كلام . 


فردوس قالتى :

- يعنى مش هتتجوزنى ياسيدى ؟!!

قولتلها : 


- غورى يابت من هنا والا قسما بالله هقول لابوكى سماحه !! 


قالتلى : 


- ماهو أبويا عارف وبيقولك أنه بيشترى راجل واخر حاجة بيفكر فيها الفلوس, وهو اللى بعتنى مع سندس . 


قولتلها : 


غورى يابت من هنا بدل ما العنك انت وابوكى !! قال أيه .. أخر حاجه بيفكر فيها الفلوس ..  دا ابوكى ضلالى بيبع أكل الكلاب على انه بلوبيف!! 


البت فردوس معبرتنيش وكانت بتبص على سندس اللى بتغمزلها تستنى. 


شخطت فى فردوس وقولتلها : 


- غورى !!! 


خدت نفسها وجريت من الكهف . 


قولت لسندس : 


-  عيب ياسندس اللى عملتيه ده !! أنا كده هبدأ أزعل منك أوى . 


- لا والنبى ياسيدى ماتزعل , انا عايز أرضيك ,ومينفعش ياسيدى تعيش من غير خلفه , أنا كده أبقى طماعه أوى , اتجوزتك ووقفت سلسالك , أنا مبنمش ياسيدى  من يوم مارجعنا من المستشفى , أنا فكرت اموت نفسى علشان ماتحسش بالذنب وأجبرك تتجوز غصب عنك , والنبى ياسيدى تريحنى , عايزه انام . 


قولتلها وانا بقوم من مكانى :

- ماتنميش ياسندس خليكى صاحيه طول عمرك , علشان انا مش هتجوز عليكى ولو انطبقت السما على الارض , سلام  ياهبله .

سمعت صوت نصير فى ودنى وهو بيقول :

- سندس عندها حق !!! 


- بعد أذنك يانصه متدخلش فى حياتى الشخصيه !! 


- أفهم , انت داخل على حروب كتيره مع جن , صراع البنى أدم الدائم مع الجن بيضعف من قدراته وبيطفى نطفته , يعنى ممكن على سن التلاتين وتلاقيك عقيم مابتخلفش , لازم تتجوز بدرى يانور ويبقى ليك نسل . 


- أنا مش عايز خلفه ومش عايز اتجوز على سندس . 


- براحتك بس لو حصلك حاجه فى الحرب , الحمايه اللى على الكهف  هتروح وسندس حياتها هتبقى فى خطر  , لأن مفيش حاجه تربطنى بسندس , انما لو ليك أبن عايش فى الكهف , الحمايه هتفضل موجوده على الكهف علشان فيه سلالتك واللى هنبقى ورث له . 


قولتله : 


- ده لو أنتوا كمان نجيتوا من الحرب , سيبها على الله يا نصير , هننتصر والحياه هتبقى فل .

قالى : 


- الحياه عمرها ماهتبقى فل يانينو , قلبى حاسس أننا داخلين على أيام سواد .

كلام نصير قلقنى أكتر ومبقتش عارف أنام زى سندس وفضلنا متنحين فى بعض طول الليل , لحد ماجيت فى يوم وقولتلها : 


- موافق ياسندس بس بشروط !! 


فرحت الهبله كأنها هى اللى هتتجوز وقالتلى : 


- أشرط ياسيدى !! 


- مش هتعيش معانا فى الكهف , هيصعب عليا ياسندس واحده تانيه تبقى معاكى  فى الكهف , هأجر بيت فى القريه وهروحلها 3 أيام فى الاسبوع , ولما تخلف أن شاء الله  , ابنى او بنتى أنتى اللى تربيهم معاها , كلمتك هتمشي عليها وهى فى بيتها , تبقى عارفه أنى مش بحبها , وانى مبحبش غيرك انتى ياسندس .

سندس قالتلى :

- بس كده ظلم ياسيدى !! وانت كده بتعقدها مفيش واحده هترضى بكده .

قولتها : 


- يبقى بلاها أحسن , ونفضها سيره خالص . 


قالتلى : 


- لالا هتوافق , البنت فردوس هتوافق أصلها واخدانى مثلها الاعلى !! 


قولتها : 


- خدت بالى نفس صفيحة العبط اللى طلعتى منها بالضبط . 


- هجيبلك الخبر بكره علشان تكلم أبوها على طول .

قولتها: 

- بس بشرط. 


قالتلى :

- أيه تانى ؟!! 


قولتها : 


- أبوها يبطل يبيع بلوبيف !! 


تم الفرح وأتجوزت انا وفردوس كنت بروحلها 3 أيام فى الاسبوع وحسيتها نسخه من سندس نفس الطريقه , ونفس الهبل وكان دمها خفيف برده وكانت  بتحبنى جدا زى سندس , بس الصراحه انا محبتهاش زى ماحبيت سندس  , بس حبيت حب فردوس ليا ولسندس  , كانت أوقات كتيره بتبقى عند سندس فى الكهف , بيتسلوا وبيهزروا مع بعض . 


ودى كانت ميزه مهمه جدا , أنها لهت سندس عنى وبقيت بتحرك لوحدى بحريه من غير ماتلزق فيا . 


فردوس حملت بسرعه أوى تقريبا من أول يوم الدخله أو بعده بأسبوع  !!!

وسندس كانت بتاخد بالها منها , وانا روتينى ما أختلفش ,

الصبح بفتح الخيمه وبكشف على الكام واحد اللى بيجوا الخيمه , وفى نص اليوم بكلم معتز باشا فى امريكا أتطمن عليه وعلى أسرته , وباليل أطلع على المقابر ألم الاعمال اللى عملها شهاب واروح على الكهف أبطلها. 


لحد مافى يوم كنت راجع من المقابر وشايل على كتفى شوال الاعمال والسحر، طلع عليا يجى عشرين راجل من أهل القريه وشدوا من أيدى الشوال , وطلعوا كل الاعمال اللى فيه , وسمعت واحد منهم بيقول : 


- الست كان عندها حق , الساحر ناير هو اللى بيعملنا الاعمال !!!


ولاقيتهم بيحطوا أيدههم عليا  , زقتهم وانا بقولهم : 


-  نزل أيدك يابن الكلب منك له , والا ألعنكم كلكم !! 


كلهم خافوا ورجعوا لورا, شويه ولاقيت البلد كلها محاوطانى وبيطلعوا فى الاعمال اللى فى الشوال , اللى لاقى صورته ومكتوب عليها مرض  , اللى لاقى عمل معمول بصورة مراته وعليه قفل واللى لاقى صوة أبنه , كلهم باصولى كأنى أنا اللى عامل الاعمال . 


عليت صوتى وقولتلهم : 


- ياقرية السوء أنتوا اللى بتسحروا لبعض عند شهاب ونيللى , وبتيجوا تتهموها فيا !!!

بصوا ياحمير على الشوال وبصوا على الاعمال اللى فيه , هتلاقوها متربه يعنى كانت مدفونه وانا اللى طلعتها علشان أفك أسحاركم!! 


لعنة الله عليكم , أيه هتغلطوا نفس الغلطه اللى غلطها أجدادكم !!!

أغلطوها ....حاولوا بس تأذونى وانا ورحمة جدى ياكلاب ماهخليكم تشوف نور الشمس تانى . 


وشاورت على واحد فيهم وقولتله : 


- أنت مش جيتلى وانت مربوط ومكنتش عارف تيجى جمب مراتك , مين اللى حل عقدك بأذن الله ؟!! 


وطى رأسه فى كسوف وقالى : 


- أنت ياسيدى ناير !! 


قولتله : 


- وجاى تمسك فيا  دلوقتى !! 


وشاورت على واحده تانيه وقولتلها : 


- وانتى مش الناس اللى حواليكى كانوا بيشوفوكى قرده !!! , مين اللى شافاكى ياقرده بعون الله ؟! 


قالتلى : 


- أنت ياسيدى ناير !! 


شاورت عليهم واحد واحد وقولتلهم : 


- وانت ... وانتى ..وأنت .... كلكم جيتولى وعندكم علل , وانا اللى فكتها بعون الله ومن غير ماخد منكم قرش , وسيبتونى وروحتوا لشهاب علشان تسحروا لبعض بالسحر الاسود !!! 


- وانتى مش الناس اللى حواليكى كانوا بيشوفوكى قرده !!! , مين اللى شافاكى ياقرده بعون الله ؟! 


شاورت عليهم واحد واحد وقولتلهم : 


نص اللى واقفين قدامى عارفين ومتأكدين أنى معملتش حاجه , لانهم هما اللى عملوا كده , وهلعنهم لو حد فيهم أذانى أو أذى عيلتى , والنص التانى هلعنه لو صدق أنى ممكن أعمل كده وظلمنى زى ماظلمتم جدى قبل كده , ولعنتى وعذابى أضعاف أضعاف لعنات جدى . 


خساره فيكم الخير , خساره فيكم أنى بعرض حياتى للخطر علشان أحميكم وافك السحر اللى عليكم !!! 


نكسوا رأسهم فى الارض وسمعت منهم اللى بيطلب العفو والسماح . 


وسمعت واحد بيقول : 


- أشهدلك بدمى ياسيدى أنك أستحاله تعمل كده . 


وسمعت واحده تانيه بتقول للناس : 


- لفيت بأبنى على كل السحره وبيعونى بيتى  , وبرضه ماحدش شفاه , وسيدى ناير شفاه من غير ماياخد منى مليم وادانى فلوس علشان أجيب علاجه لما عرف أنى محيلتيش حاجه . 


وبصتلى وقالت : 


- أشهدلك بدمى ياسيدى أنت كلك أخلاق وكرم وبتتقى الله !!

بعدها سمعت كل الناس بتعتذر وبتترجانى أسامحها ,حتى اللى مسكونى وانا شايل الشوال , أعتذرولى وواحد منهم قال : 


- صح يا جدعان , أحنا مسكناه وهو طالع من المقابر , يعنى كان مطلع الاعمال مش رايح يدفنها !! 


- وبصلى وقال : 


- أعذرنا ياسيدى والله أحنا عمرنا ماشكينا فيك , بس لما الست مراتك جات وقالتلنا.. 


قولتله بأستغراب : 


- مراتى اللى قالت لكم !!!! مراتى مين ؟!! سندس؟!! 


قالولى : 


- لا ياسيدى مراتك التانيه فردوس !!! 


سيبتهم وجريت على البيت اللى مأجرة لفردوس وانا دماغى هتشت من التفكير!!! 


دورت عليها فى البيت كله مالقتهاش !!! 


جريت على بيت أبوها ومسكت فى خناقه وانا بقوله : 


- بنتك راحت فين !!؟ 


قالى وهو خايف ومندهش : 


- بنتى عندك ياسيدى ناير !! 


قولتله بعصبيه : 


- بقولك أيه مش ناقصه أستعباط !! 


قالى : 


- والله ما أعرف هى فين !!! هى عملت أيه بنت الكلب دى !!

- بنتك بتتبلى عليا وبتقول انى بعمل أعمال للناس !!

قالى بأستغراب : 


- فردوس !!! والله أبدا ماتعمل كده ياسيدى !! فردوس بتعشقك من قبل ماتقابلك.. انا ممكن أخون , أنما بنتى فردوس أبدا والله !!! 


سمعت نصير بيقولى : 


- سيب الراجل , الراجل مابيكدبش !!! 


سيبته وطلعت من البيت وقولت لنصير :

- أيه اللى حصل يانصير !!؟ 


- لسه ماعرفش بس ابو البت مابيكدبش , سألت قرينه وانت بتتخانق معاه . 


- أعرفلى حالا أيه اللى بيحصل !! 


قالى : 


- هروح أعرف, بس على ماجى لازم تروح الكهف وتتأكد ان مفيش حاجه ناقصه . 


جريت على الكهف وتممت على كل حاجه فيه , واتصدمت لما لاقيت حاجه مهمه وفى غاية الخطوره  أتسرقت من الكهف !!! 


نصير جالى على اخر الليل وقالى : 


- روحت علشان أعرف حوار البت فردوس  أتفاجأت بحوار تانى خالص أخطر من فردوس !! ...  سندس نايمه !!؟ 


- أها نايمه .. هاا ايه الحوار ؟!! 


قالى : 


- عرفت حاجه من اللى حصلت ؟!! 


قولتله : 


- مأظنش , انا جيت لاقيتها نايمه !! اخلص قول عرفت ايه ؟!! 


- طيب أفتح التليفزيون بسرعه و روح هاتلنا فشار , معايا فيلم يجنن واحتمال يكون أخر فيلم نتفرج عليه فى حياتنا , فعايزين نستمتع يانينو ونموت وأحنا مبسوطين . 


قلقتنى يانصير !! اكتر مانا قلقان !! 


قلقان يعنى علشان مخطوط العزيف أتسرق من الكهف!!!

و أن شهاب ممكن يحضر المخلوقات اللى كان بيحاول يحضرها جده ؟!! لا متقلقش خالص !!! 


شهاب حضر خلاص المخلوقات  و دى أخر حاجه هتقلق منها لما تشوف اللى جاى , أنجز يانينو هاتلنا فشار على ما أجيب قناة الجن اليوم !! 


قلتله : 


- فشار ايه يا نصير بطل هزار الموضوع مش ناقص !! 


- مش هوريك حاجة الا لما تجيب الفشار . 


قلتله : 


- ماشى يا نصير !! 


روحت عملت فشار بسرعه وجيت قعدت جنب نصير , فلاقيته بيحضنى وهو مبتسم وبيقولى : 


- ليه حطيت ملح على الفشار .. أنت مش عارف أن انا مبحبش الملح !!

قولتله : 


- نسيت يانصير . 


- قوم أعمل فشار تانى من غير ملح . 


قولتله بنفاذ صبر : 


- أخلص يانصير مش وقته.

- لا وقته .... نينو ياحبيى كلها ساعات وكلنا نموت , وانا نفسى فى فشار قبل ما أموت !!! 


قومت عملتله فشار من غير ملح وحطيته قدامه وقولتله : 


- ها مبسوط ورينى بقى عرفت أيه !!؟ 


قالى : 


- هبدأ معاك من أول فردوس اللى قتلوها !!! 


- قتلوها !!!  مين اللى قتلوها !!؟ 


قالى من غير ما يبصلى : 


-  بص يانينو على الشاشه !!! 


بصيت على شاشة التليفزيون وشوفت شهاب ونيللى مكتفين فردوس  فى  كرسى بفستان الفرح و جمبها قفص حديد كبير فاضى!!

شهاب قرب على فردوس وفى أيده خنجر منقوش عليها طلاسم من السحر الاسود وتمتم بتعزيمات هو بيطعنها فى قلبها بالخنجر !!! 


صرخت بصوت عالى ولفظت أنفاسها الاخيره !!! 


بعدها ظهر فى القفص واحده شبهها بالضبط بس عينيها مشقوقه بالطول ,كانت محبوسه وبتحاول تخرج فى القفص !! 


قولت لنصير : 


- مين دى !!؟ 


- دى قرينة فردوس  ...وهى دى الخدعه اللى عملها شهاب , قتل فردوس وحبس قرينها بعدها سخر جنية من الغيلان وأجبر قرين فردوس يمشى وراها فى كل حته , علشان ماشكش فيها , لان الجن مالوش قرين زى البنى ادم وعلشان كده معرفتش أن اللى كانت معاك جنيه مش فردوس !! 


قولتله : 


- أنا أتلخبطت يانصير , يعنى أنا دخلت على مين !!؟ 


- أنت دخلت على الجنيه !! فردوس قتلوها يوم الفرح !! 


- طيب والحمل !!؟ 


- معرفش كانت حامل فعلا ولا بتشتغلنا !!! أقدر أعرف بس بعد مايتولد ده لو كانت حامل!! 


- وهو ممكن جنية تحمل من بنى أدم !!؟ 


- ممكن تحصل بس نادر جدا , بنسبه كبيره الجنيه كانت بتشتغلنا علشان تعرف تدخل الكهف وتسرق الكتاب . 


بصيت على الشاشه تانى وشوفتهم وهما بيحضروا الجنيه وبيربطوها بقرين فردوس .. شويه ولاقينا نيللى بتبص وراها , كأنها بتبص علينا !! 


وقربت من الشاشه وفضلت تقرب لحد مابقت سده الشاشه كلها بوشها وفضلت بتتفرج عليا انا ونصير !!! وبعدين مدت أيديها وطلعتها من الشاشه !!! 


لاقيت نصير جرى وشد فيشة التليفزيون ,وبصلى وهو مصدوم !!!

قولتله بأندهاش : 


- ايه اللى حصل دا يانصير !!؟ 


قالى :

- معرفش , بس نيللى كده , شكلها عدت شهاب فى السحر الاسود !! 


-  نعم !!! أزاى !!؟ 


قالى وهو متنح فى شاشة التليفزيون المقفوله : 


- اللى بتشوفه فى التليفزيون ده وهم  وسحر انا اللى عمله بقولك عن طريقه المعلومات اللى عرفتها من قرين نيللى , ومعنى أن نيللى قدرت تتدخل فى الوهم بتاعى وتوهمنا أحنا الاتنين ان أحنا بقينا ملطشه .. والعيال دى بتستخدم السحرالاسود بغباوه !!

سكت شويه وقال : 


- يلا بجملة المصايب خد الخبر الانقح بقى !!! 


عارف أيه هى وصية الساحر الافريقى واللى أخرت الحرب كده !!!؟

قولتله وانا باكل فشار : 


- أرمى يانصير !! شكلها أيام سواد زى ماقولت .. 


-  وصيته أن كل الجن اللى معاه يروحوا تحت خدمة أكتر ساحر عدو ليك 


شهاب!!! 


شهاب دلوقتى معاه جن مالوش عدد , ده غير كتاب العزيف , أخطر كتاب فى السحر  وجن الساحر الافريقى اللى هيفضلوا معاه على طول لو انتصر عليك  فى حرب الميجوانا . 


- حرب أيه !! 


قالى : 


- الميجوانا دى حرب قايمه بين الجن المؤمنين من كل الديانات و الجن الخبيث والشياطين اللى بيتم استحضارهم بالطلاسم والسحر الاسود  .. على العموم هتفهم كل حاجه لما نوصل . 


- نوصل فين ؟!! 


- ساحة الحرب , مانا نسيت أقولك الحرب خلاص هتقوم مع طلوع الفجر !! 


ولما عرفت المصايب دى كلها بلغت حنوش قبل ما أجيلك علشان يحشد ويلم كل اللى العشائر اللى تبعنا و حاليا كلهم فى أرض المعركه , وانا جيت أقولك و اعرفك الحقيقه قبل مانموت كلنا !! ويله بينا علشان أتأخرنا . 


وقرب عليا علشان ينقلنى , قولتله : 


- هسلم على سندس طيب !! 


- مالوش لازمه يانينو هتحس أنه فيه حاجه ومش بعيد تمسك فيك . 


- طيب هبص عليها قبل ما أجى معاك . 


قالى : 


- طيب يله ياحنين خلينا نخلص , عندنا موته عايزين نلحقها ,  كويس انك لابس القميص يلا انجز .

قلتله :

-  انا مبقلعهوش من يوميها وشكلى هتدفن بيه . 


دخلت بصيت على سندس وهيا نايمه,  بوستها على رأسها وودعتها . 


ورجعت لنصير ,غمضت عينى واديتله أيدى . 


نقلنى لارض المعركه , فتحت عينى و أتصدمت من اللى شوفته!!! 

لاقيتنا فى خيمه واسعه ,  لفيت بعينى فى الخيمه وشوفت حنوش لابس درع وخوذه من المعدن وواقف قدام ترابيزه عليها خريطه كبيره مرسوم عليها تقريبا ارض المعركه ,  كان واقف جمبه مجموعه من الجن  شبه البنى أدمين بس عينيهم مشقوقه بالطول وأسنانهم مدببه وليهم أنياب طويله خارجه من بوقهم , لابسين دروع وخوذ زى حنوش وباين عليهم زعماء قبائل . 


فى وسط المجموعه دى  كان فى واحد شبه البنى أدمين بالظبط , شعره طويل واسود ودقنه خفيفه وعلى وجهه الوسامه . 


أول ماشافنى فتح دراعاته وقالى : 


- أخى الانسى !!

بصيتله بأستغراب وقولتله : 


- هو انت مش جن !!؟ 


ضحك وقالى : 


- أيه ده هو نصير مقالكش ولا أيه !!؟ , على العموم أها ياتنين أنا بنى أدم زيك بالضبط واسمى احمد بن قاف . 


نصير قالى : 


- السيد أبن القاف قائد جيوش الجن المؤمن فى حرب الميجوانا !! 


أبن القاف قرب عليا , ومسك كتافى وهو بيتفحص جسمى وبيقولى : 


- اللى يشوف جسمك العادى مايقولش أبدا أنك بتتحول تنين !! واضح أن روحك قويه زى جدك ناير !! 


- هو انت تعرف جدى ناير؟ !! 


- مفيش أنس او جن بيتسخدم السحر مايعرفش جدك ناير , جدك كان ساحر قوى جدا وساب علامه كبيره أوى فى العالم دا !! 


كان نفسى يكون فيه وقت ندردش فيه مع بعض , بس للاسف مفيش وقت حتى اشرحلك فيه الخطه... وبص فى ساعته وقال :

- الفجر خلاص أوشك على الطلوع . 


أشهر سيفه  واللى كان طويل ومصنوع من الذهب ومنقوش عليه أيات لابطال السحر من القرأن والانجيل والتوراه .

فالجن اللى حواليه أشهروا سيوفهم حتى نصير , تقدمهم  بن القاف وخرج من الخيمه ,وخرجت معاهم من الخيمه علشان أتصدم من هول المشهد 


أول ما خرجت من الخيمه , شوفت  صحراء شاسعه ، 

لون رمالها  أحمر !! 


قلت لنصير : 


أحنا فين يا نصه؟!

قالى:

فى مكان  ما على الأرض ، محدش من البشر  العاديه يعرفه أو رجله خطت عليه !!!

مشينا وسط جيش مكون من  الالاف من الجن اللى لابسين دروع وخوذ معدنيه ,منهم اللى واقف على رجله  , ومنهم  اللى راكب على خيول, و فيه اللى راكب على  حيوانات شبه الثعالب بس ضخمه !!!

الاسلحه اللى فى أيديهم كانت متنوعه  رماح طويله مدببه , سيوف وأقواس لرمى السهام  !!!

واقف جمبهم بنى أدمين عاديين  من كل الديانات !!

اللى ماسك مصحف واللى ماسك صليب و اللى ماسك توراه وكل واحد بيرتل من كتابه أيات وتعزيمات لتقوية أسلحة الجن المؤمن ولابطال السحر الاسود.

بصيت ورايا لاقيت قلعه سوداء ضخمة, جدرانها مطليه باللون الاسود ومنقوش عليها أيات بتعظم الله من كل الديانات وتعزيمات لأبطال السحر ولحرق الجن والشياطين  . 


قولت لنصير : 


- مين دول ؟!! وأيه القلعه دى؟ !! 


قالى :

- دول جيش الانس والجن اللى جمعهم أبن القاف !!

سحره من كل الديانات ومعاهم الجن اللى بيتبعوهم  , وحدهم  تحت سيف واحد وهدف واحد , هو نصرة  الله و الدفاع عن البشريه , ده غير الجن المؤمن الحر واللى أختار يشارك فى الحرب برغبته  ضد الشياطين.

وبالنسبه للقلعه فبناها بن القاف بعد ما أتخذ المكان ده مقر ليه فى حربه ضد الشياطين !! 

قولتله بأستغراب :

- أيه ده!! على كده أبو القاف ده هنا من بدرى !!

نصير قالى :

- زى ماقولتلك الحرب دى قايمه من سنين والفتره اللى فاتت كانت هدنه , ولما قتلنا الساحر الافريقى و اللى كان  المفروض بيحارب ضد أبو القاف , عمل الوصيه أياها , علشان يضرب عصفورين بحجر , يعلن الحرب على ابو القاف وينتقم منك . 


فضلنا ماشيين كلنا فى أرض المعركه , أبو القاف كان بيتأكد من تساوى الصفوف وبيشجع جنوده وبيطمن عليهم بالاسم !!! 


- هو أزاى حافظ أسامي الناس دى  كلها!! 


أبتسم وقالى : 


- أبن القاف مش بنى أدم عادى , عقله غريب شويه , بيستوعب حاجات كتيره وبيفهم تقريبا فى كل العلوم , زى جدك كده، بس بيتميز عن جدك  أنه  قائد عسكرى مخضرم وذكى جدا , وأفكاره فى الحروب دايما مجنونه, هيبهرك يانينو , بس أنا واثق أنك أنت اللى هتبهرهم كلهم النهارده !!! 


هشرحلك  بسرعه الخطه علشان مفيش وقت ،

أبن القاف مقسم الجيش تلت أجزاء ،

الجزء اللى قدام القلعه واللى احنا واقفين وسطهم دلوقتى (المقدمة )ِ 


وجزء  تانى جوه القلعه السوداء ورا جدرانها  , بيحميها وبيأمن ضهرنا ,علشان هى الملاذ لينا فى حالة الخساره لاقدر الله ،لأن القلعه مفيش جنى أو شيطان كافر يقدر يعديها أو يلمس جدارنها والا هيتحرق !! 


الجزء الاخير من الجيش واللى ورا القلعه , ودول جن مش مقاتلين  ومبيعرفوش يحاربوا ,  ابن القاف  أمرهم بحفر خندق (حفره ) عميقه  ورا القلعه وعلى بعد مسافه 500 كيلو من القلعه, وبيحفروا فيها من سنين ومش عارفين بيحفروا فيها ليه , بس تقريبا دى حاجه مخليها ابن القاف فى الاخر خالص , فى حالة الهزيمه الكامله !!

وصل  أبن  القاف  للحصان بتاعه واللى كان لونه أسود ومفيهوش نقطة بياض واحده !! 

نط فوقيه وركبه كقائد متمرس  وكذلك كل الجن اللى كانوا معاه فى الخيمه  ركبوا على خيولهم , وأتوزعوا كل واحد عند قبيلته اللى بيرأسها .

أبن القاف قال بصوت عالى :

- فين الكشافه !!؟ 


فواحد من قادة الجن قاله : 


- لسه ماجوش ياقائد !! 


- مين الكشافه دول !!؟ 


قالى : 


- دول اللى بعتهم القائد علشان يعدوا الجيش اللى هيحاربنا ويعرفوا أسلحتهم وتشكيلهم فى الحرب , أعدائنا برده هتلاقيهم عملوا كده بعتوا الكشافه بتوعهم علشان يعرفوا عددنا وأسلحتنا . 


قولتله : 


- جواسيس يعنى !!؟ 


- بالضبط !! وخليك هنا على ما أجيلك!!

- رايح فين !!؟

مردش عليا وسابنى  ومشى ناحية أبن القاف .

قرب من أبن  القاف وقاله حاجه ماسمعتهاش , فأبتسم وتحمس وقال بصوت عالى للجيش بتاعه   :

- نسيت أقولكم أن ربنا بعتلنا تنين يقف معانا فى المعركه , تنين بجد مش وهم ولا سحر , تنين قالوا عنه أنه ناره بتحرق الشياطين وتحولهم لرماد !!

نصير رجع ناحيتى, وهو بيزق الجن اللى حواليا  وبيبعدهم وهو بيقول : 


- وسع يا أخينا منك ليه !!! وسع ياد متنحش لاحسن  جناج التنين يجى فيك !! وسعوا كده ياجماعه وأدونا فسحايه !! 


وقرب عليا نصير وقالى : 


- يلا يانينو أتحول تنين !! 


رجعت لورا و غمضت عينى ولفيت لفه كامله بالقميص  وانا بفكر فى التنين !! وفضلت مغمض .... 


وقرب عليا نصير وقالى : 


شويه وفتحت عينى  


بصيت على نفسى  لاقيتنى زى مانا ما أتحولتش !!! 


نصير حسيته هيلطم وقالى : 


- أيه يا نينو !! هنلبس ولا أيه ؟ !! 


بصيت حواليا لاقيت الجن اللى كان بيوسعهم نصير  بيضحكوا عليا , وبيقولوا لنصير اللى فى نص هدومه 

- هو ده التنين يانصير !!! 


حنوش كان جمبنا وبيبص  عليا أنا ونصير بخيبة أمل . 


أبن القاف كان بيبصلى بتفحص وشاور وقالهم : 


- بس أمنع الصوت   !! 


فكلهم سكتوا وبصوا عليا !! 


بدأت أحس بنار بتولع فى صدرى  من جوه ,ووقعت  على الارض  و انا مغمض عينى و ماسك رأسى اللى بتشقق وبصرخ بصوت عالى . 


عضمى بدأ يتكسر وفتحت عينى اللى بقت مشقوقه بالطول ,  جلدى أتحول لحرافش ودراعاتى بدات تتطول وتتحول أجنحه . 


كل اللى فى  الجيش (جن  وأنس)  كانوا مندهشين وبيبصولى فى ترقب !!! 


ونصير كان بيبصلى بفخر . 


أكتمل تحولى و زمجرت بصوت  عالى هز أرض المعركه , نفثت النار من حلقى فى السما , بعدها فردت جناحى وشوطت بيه الجن اللى كانوا بيضحكوا عليا , فاأتنطروا بعيد !! 


نصير قرب عليا , فنزلتله جناحى وطلع فوقيا وقالى : 


- طير يانينو ....طير !!

طيرت فوق فى السما وفضلت اطير لحد مابقيت فوق السحاب وشايف كل اللى بيحصل تحت . 


شوفت جيشنا واللى كان تشكيله على شكل سهم ليه رأس وديل ,  وبصيت على جيش العدو وياريتنى مابصيت !!! 


سمعت صوت نصير بيقولى : 


- شايف اللى انا شايفه نينو !!!,  الجيش بتاعهم مالوش أخر !!! , لو فضلنا نحاربهم طول عمرنا مش هيخلصوا !!! مئات الالاف يانينو !! 


شوفت الجيشين وهما واقفين قصاد بعض , وسمعت صوت أبواق الحرب فى السما . 


وبعدها بدأ الهجوم , كنت هنزل من السما , علشان أشترك معاهم فى الحرب بس نصير قالى : 


- أهدى يانينو , أهدى ياحبيبى !! مش دلوقتى خالص , أحنا هنقعد  نتفرج من فوق لحد ماتيجى اللحظه المناسبة. 


شوفت بعين التنين كل اللى بيحصل تحت على الارض . 


الجيشين كانوا قصاد بعض وبعاد عن بعض مسافه مش كبيره  تقريبا 5 كيلو متر . 


دورت على شهاب وسط الجيش مالقتهوش !! 


نصير سمع صوتى فى ودنه وانا بقوله : 


- فين شهاب !!؟ مش شايفه فى الحرب !!؟ 


- شهاب والجن بتوعه لسه ماجوش . 


- نعم !!! امال مين دول كلهم ؟!! 


- مش قولتلك هنتنفخ , عرفت ليه أصريت تعملى فشار من غير ملح !! 


علشان فى كلا الحالات هنموت يانينو !!

بدأ القتال , اتقدم رماة الاسهم (النبالة ) من جيوش الشياطين , ومطوا أقواسهم واطلقوا اسهم طويلة فى السما فسقطت على جيش بن القاف !! 


جيش أبن القاف تصدى لسهام الشياطين بالدروع وهما واقفين فى مكانهم وثابتين . 


تقدم صف رماة الاسهم فى جيش أبن القاف و غطسوا اسهمهم فى جرادل فيها سائل لونه غريب . 


قولت لنصير: 


- أيه ده !!؟ 


- السائل ده زى البنزين  بس بيولع من غير نار مقرأى عليه تعزيمات وأيات لابطال السحر ولحرق الشياطين !! 


الرماة مطوا أقواسهم واطلقوا سهامهم المقرى عليها فى السما فسقطت على جيوش الشياطين واللى حاولوا يتصدوا ليها بدروعهم بس السهام كانت بتخترق دروعهم وتحرقها وتحرقهم .

جيش أبن القاف تشجعوا وصرخوا بحماس وهم بيرددوا : 


- النصر لله ... النصر لله . 


بصيت على أبن القاف اللى تمتم بكلمات على سيفه , بعدها السيف نور بنور ابيض ساطع،  وهز لجام حصانه الاسود فأنطلق بيه  فى اتجاه جيوش الشياطين وأنطلق وراه جيشه اللى كان متناغم جدا ومنظم وبينطلق بتشكيله اللى زى السهم فى أتجاه الشياطين , لحد ما أشتبك الجيشين ببعض وأخترق جيش بن القاف جيوش الشياطين . 


كل الشياطين كانت بتبعد عن النور الساطع  اللى خارج من سيف أبن القاف. 


واللى كانت ضربه واحده منه بتحصد أرواح المئات منهم بعد ما تحرقهم

كان منطلق بحصانه وبيخترق صفوفهم وبيقاتل بشجاعه هو وكل الجن اللى معاه , بس عدد الشياطين  كان كتير جدا .

كان قصاد كل محارب من جيش ابن القاف الالاف من الشياطين !! واللى كانوا بيتكاتروا على جنود بن القاف لحد ما يوقعوهم ويمزقوا اجسامهم   . 


أبن القاف هجم عليه الالاف من الشياطين وفضلوا يتراكموا فوقيه لحد مانور سيفه أنطفى !! 


كنت ههبط على أرض المعركه  علشان أنقذه , لكن سمعت صوت نصير بيقولى : 


- أوعى يا نور !!! ماتنزلش الا لما أقولك!! 


- أزاى يانصير !! دول أتكاتروا عليه و.. 


نصير قطع كلامى  وقالى : 


- أصبر وبص كويس. 


بصيت تانى على أرض المعركه لاقيت الشياطين بتتنفض من فوقيه وظهر ابن القاف بس مش بهيئته كابنى آدم !!

ظهر بهيئة ذئب ضخم  و على رقبته طوق من نور !!! 


هجم على الشياطين اللى حواليه  ومزق أجسادهم , فيه منهم اللى أترعب منه وجرى بعيد . 


أيه ده هو بيتحول زيي !!! 


لا مش زيك  ... بيتحول لذئب بس  !! 

أكتر حيوان بيخاف منه الجن والشياطين , السيف اللى معاه دا سلاح مهم فى الحرب زى القميص بالضبط .

جيوش الشياطين كانت مابتخلصش وكان محاوطين جيش أبن القاف من كل ناحيه , وفوجئنا بشبكه كبيره بتترمى على الذئب (ابن القاف ) وبتثبته  فى أرض المعركه . 


الذئب كان بيحاول يخرج بره الشبكه , بس الشياطين اتكاتروا عليه وثبتوا الشبكه بأوتاد فى الارض !!! 


جيش بن القاف حاولوا ينقذوا قائدهم بس مكانوش عارفين يوصلوا للشبكه من كتر الشياطين اللى بتتدفق وبتتكاتر عليهم من كل ناحيه .

الشياطين كانوا عاملين زى النمل اللى متكاتر على قطعة سكر  !! 


كانوا مغطيين جيش ابن القاف كله , لدرجة ان الجيش كله أتردم ومبقتش شايف غير الشياطين بس !!! 


- دلوقتى يا نور !! أنزل !! 


خدت نفس عميق وكتمته و ضميت جناحاتى على بعضها وهبطت  على ارض المعركة بسرعه زى ما بيهبط الصقر على فريسته .

نفثت النار من حلقى على كل الشياطين اللى محاوطين  جيش ابن القاف , وفضلت أحرق فيهم , نار التنين كانت بتنسفهم وبتحرقهم زى الحشرات .

لحد ماظهر جيش أبن القاف تانى و شافونى وانا بحرق الشياطين اللى كانت متراكمه فوقيهم  وبدوب جلدهم ,

فصرخوا بحماس وكملوا قتال فى الشياطين  ببساله .

حرقت  كل الشياطين اللى كانوا فوق الشبكه و متكاترين على الذئب  , وحرقت  الشبكه وحررته . 


بعدها أنطلق وهو بيلتهم في الشياطين !!!

سمعت نصير بيقولى :

- حلق فوقيهم وأنفخ النار من بوقك , بس ا حجزهم  فى دواير نار يا نور , وولعها زى جهنم !! 


نفثت النار من حلقى وفضلت أحرق فيهم , وحاوطتهم بدواير النار من كل حته لحد ما فتت جيوشهم وبقى كل مجموعه  منهم متحاوطه بدايرة نار ومحبوسين فيها . 


عفاريت الجن و اللى بيقودهم حنوش كانوا بينطوا فى دواير النار اللى حاوطت بيها الشياطين  ,  ويخلصوا على كل الشياطين اللى فيها فى غمضة عين !! 


حنوش كان بيتنطط بين دواير النار اللى محاصره الشياطين زى النحلة اللى بتتنقل بين الزهور  , وفى رمشة عين كنت بلاقي الشياطين اللى فى الدايره متقطعين قطع !!!! 


حاولوا يرموا عليا سهام ورماح وانا بعمل دواير النار اللى بحاوطهم بيها،  بس مكانتش بتأثر فيا . 


بدأت أشوف الخوف والرعب فى صفوفهم  , وبدأوا يجروا بعيد وفيه منهم اللى أختفوا تماما ,  و بدأوا يتقهقروا وينسحبوا ،اللى أتبقوا  من جيشهم هربوا  فى الصحرا !!! 


شوفت ابن القاف وهو بيرجع بنى أدم تانى , وبيرفع سيفه وهو بيقول : 


- النصر للخالق... النصر لله. 


رددوا وراه بحماس(  جن وأنس ) وقالوا: 


- النصر للخالق  .. النصر لله 


هبطت على الارض , ولفيت لفه كامله ورجعت بنى ادم تانى , جريوا عليا جن وانس وهما بيربتوا على كتفى وبيحيونى , و ابن القاف حضنى جامد وهو بيقول : 


- أنقذتنا النهارده .. بس لسه الحرب بتبدأ ياتنين !!! 


أمر كل الجيش اللى اتبقى يرجعوا على القلعه بسرعه ويحتموا فيها .. 


رجعنا كلنا على القلعه السوداء  ووقفنا قدام البوابة العملاقه اللى فى نص سور القلعه العالى, ابن القاف أدى الاشاره لجن واقف  على السور علشان يفتح البوابه 


سمعت صوت جنازير وتروس بتتحرك وبدأت تتفتح البوابة العملاقه  .... 


شوفت الجيش الصغير اللى جوه القلعة  كانوا ماسكين دروع و مرصوصين فى صفوف و بيحموا بوابة القلعه من جوه 


عدينا من وسطهم , كانوا بيهللوا و بيخبطوا سيوفهم فى دروعهم بحماس وبيحيونا وبيحيوا ابن القاف على النصر . 


أجتمع ابن القاف بالقاده فى قاعه جوه القلعه،  


الجن والانس اللى فى القاعه كانوا فرحانين بالنصر . 


فقال :

- اوعوا تفرحوا  , ممكن نكون كسبنا معركه واحده , بس الحرب لسه ماخلصتش , الساحر اللى مكان "كاتو" مكنش موجود فى الحرب، لا هو ولا كائنات العزيف اللى حضرها ,الصح أننا نحضر نفسنا بسرعه للهجوم التانى خاصة  بعد ما خسرنا  فى المعركه الاولى أكتر من نص جيشنا !! 


يعنى هنكمل الحرب بنص الجيش بس!! 


ولولا وجود التنين وسطنا كان زمان الحرب خلصت لصالحهم من أول معركه !! 


بصوا لبعض وهزوا رأسهم فى تفهم وطاعه . 


فكمل كلامه وقالهم : 


- القلعه محميه بجدرانها اللى محدش يقدر يلمسها من الجن الخبيث والشياطين  , وبرماة الاسهم اللى متمركزين على أبراجها العاليه , عايزين نعزز الحمايه بالمشا...

قطع كلام أبن القاف  صوت فرقعه قويه وصرخات داخل القلعه !! 


خرجنا من غرفة الاجتماع اللى فى القلعه وأتفاجئنا بأحجار وحمم بركانية  بتسقط من السما على الجيش اللى جوه القلعه وبتحرقهم !!! 


أبن القاف نط فوق حصانه، وقال للقاده اللى معاه: 


نصكم يجى معايا علشان نعيد تنظيم الجيش اللى عند البوابه والنص التانى يطلع على الابراج العاليه علشان يدعم الرماة ويشوف الهجوم اللى بيحصل علينا جاى منين . 


وبصلى وقال : 


-  انا مليش خطة ليك بس دافع معانا عن القلعه ياتنين !!! 


و انطلق بحصانه  هو ونص القاده ناحية الجيش اللى بيتحرق علشان يعيد تنظيمهم ويدعم البوابه. 


لفيت لفه كامله وأتحولت لتنين , طلع  نصير فوق ظهرى  ففردت جناحى وأنطلقت فى السما ,وشوفت الهجوم اللي بيتم علينا من فوق. 


ألاف من الشياطين بيحاولوا  يقتحموا القلعه بالسلالم والحبال  , وكل ما يلمسوا  جدار القلعه , النقوش اللى على جدرانها تحرقهم  , أتكاتروا كلهم  على سور القلعه العالى فوق بعض . 


رماة الاسهم اللى فوق الابراج كانوا بيرموا عليهم السهام والرماح زى المطر . 


بس برده عددهم كان كتير جدا , زى الفيضان مابيخلصش بالعكس بيزيدوا أكتر وبيهجموا على القلعه بضراوة . 


- أحرقهم كلهم يا نور . 


زمجرت بصوت عالى ونفثت النار وبدأت أحرق فى كل الشياطين اللى بيحاولوا يقتحموا القلعه , فضلت أحرق فيهم على طول سور القلعه , بس مكانوش بيخلصوا !! 


بصيت على السما اللى  بقت بتمطر على القلعه  حجاره ضخمه، وحمم مولعه بتحرق  جيش ابن القاف اللى بيدعم البوابه من جوه !!! 


حلقت أكتر فى السما علشان أشوف مصدر الحجاره  والحمم جاى منين !! 


طيرت فوق خالص وأندهشت من اللى شوفته !!! 


شوفت مخلوق ضخم جدا , لدرجة انى كنت شايفه ضخم من   أرتفاع عالى  فى السما!! 

كان شبه الضفدع أو التمساح  , وفاتح  فكه الضخم  واللى فى حجم وشكل فوهة البركان و بيرمى من بوقه حمم بركانيه وأحجار ضخمه فى السما علشان تسقط  علي القلعه السوداء !! 


سمعت نصير بيقول : 


- كيانات العزيف !!! 


أتفاجئت بعدها بكاي 


                الفصل الثانى عشر  من هنا

تعليقات