رواية ميراث نور الجزء التاني
بقلم لينا بسيونى .
الفصل الاول والثاني
(نيللي)
أسمى نيللى كنت بنى آدمه و دلوقتى مسخوطه قرد !!!
أنا بنت ناس أوى من عيله غنيه جدا , من فتره كنت جميله جدا وبسحر أى حد أعدى من جمبه , قبل الكلب" نور" مايسخطنى قردة !!
القصة أبتدت لما أتعرفت على شاب زميلى فى كلية هندسه , أسمه نور ناير , أتصاحبت عليه ومشيت معاه علشان كان متفوق جدا وذكى و كنت دايما قدامه فى لجنة الامتحان
عشان ترتيب أسمائنا على حسب الحروف نور ونيللى .
اها كنت بستغله فى الامتحانات وبغش منه وكنت بمثل عليه الحب ووهماه أنى هتجوزه , لحد مابقى بيموت فى التراب اللى بمشى عليه , ومبقاش يقدر يستغنى عنى .
كان مفكرنى بحبه , بس الصراحه أنا مبحبش حد , مبحبش غير نفسى , أظن ده حقى !!!
لو كنت هحب حد مش هحب واحد زى نور , شاب معدم محيلتوش مليم وبيجى الكليه بهدوم قديمه ودايبه من كتر الغسيل
حصلت مشكله كبيره مابينا وأكتشف أنى كنت بستغله ومش بحبه , وفضل فترة أجازة الصيف مبيردش عليا ومحدش يعرف عنه حاجه !!
لحد ماظهر أول يوم فى الدراسه , بس ظهر نور تانى خالص , كان لابس شيك ومعاه عربيه أحدث موديل وجمبه واحده شبه بنت طنط روفيدا اللى عايشه فى باريس , أكتر بنت بكرهها فى حياتى علشان على طول كانت بتحرجنى وبتتريق عليا وشايفه نفسها أحلى منى !!
كنت شايطه من جوه , وكنت عايزه أعرف أيه اللى نضفه كده والسر اللى وراه , حاولت أكلمه ...
تجاهلنى !!!! وعرفت أنه أشترى فيلا كمان , أتجننت اكتر !!
وفى نفس اليوم اللى ظهر فيه فى الكليه والناس كلها اتلمت عليه ...ريحتى بقت وحشه جدأ والناس كلها بقت تهرب منى !!!!
طبعا شكيت أنه ورا ريحتى اللى بقت وحشه فجأه , وأتأكدت لما جانى علشان يعمل فيها المنقذ ،وأدانى دوا قالى انه هيعالج حالتى , وبالفعل بعد مامشى من عندى خفيت !!!
ماسيبتوش لما أتأكدت أنه ورا اللى حصلى وأنتهزت فرصه أنه لسه بيحبنى وفضلت وراه لحد مارجعته ليا ,علشان أعرف أيه السر اللى قلب حياته بالشكل ده وبالفعل عرفت بالصدفه أيه اللى وراه !!.
فى يوم عيد ميلادى وبعد الحفله الكبيره اللى كنت عاملاها فى الفيلا بتاعتى , طلعت أوضتى و فتحت الباب فافوجأت بيه فى الاوضه بتاعتى و بيظهر بعد ماكان مختفى !!!
أتصدمت من اللى شوفته !! بس داريت صدمتى وبينت ليه أنى مش مضايقه بالعكس بينت أنى فرحانه أوى أن حبيبى طلع ساحر, علشان أشجعه يحكيلى على كل حاجه , فقالى أنه ورث جن قوى عن اجداده وكمان قميص أخفاء !!!
وأكد عليا أن ده سر وأنى لازم أحفظه !!
قولتله :
سرك فى بير .
بعد مامشى من الاوضه على طول كلمت طارق أبن عمى وحكيتله على كل حاجه وقولته ياخد بلطجيه ويروح يضربوه ويجيبوا القميص !!!
وبالفعل طارق أجر ساحر وبلطجيه وراحوا فيلته علشان يسرقوا منه القميص ، ورجعلى طارق والقميص فى أيده.
أول ماشفت القميص أتجننت وخطفته من أيده ووقفت قدام المرايا ولبسته , بس ما أختفش !! أستغربت جدا !!
فطارق قالى أنى علشان أختفى بالقميص لازم ألف لفه كامله وانا بفكر فى أكتر حيوان بكرهه .
غمضت عينى ولفيت لفه كامله وانا بفكر فى أكتر حيوان بكرهه , القرد ...
فتحت عينى لما حسيت بأيد بتقلعنى القميص , بصيت ورايا مالقتش طارق وبصيت قدامى فى المرايا لاقيتنى أتسخطت قرد!!!!!!!!!!!!!!!!!!!!!!!!!!!!!
فضلت فتره أدرك اللى حصل , بعدها صرخت بصوت عالى , بس ماطلعش صوتى و طلع صوت قرد!!!!!
غطيت بأيدى وشى علشان ماشوفش شكلى اللى بقى قذر .
بكيت وصرخت واتنططت مكانى زى القرد , لحد ماسمعت صوت باب أوضتى بيتفتح وبتدخل منه الخدامه , أول ماشافتنى صرخت وطلعت تجرى ونادت على الخدامين التانيين وهى بتقولهم :
قرد !! فيه قرد فى أوضة نيللى هانم !!
الخدامين طلعوا يجروا على أوضتى , منهم اللى فى أيدى مكنسه واللى فى أيده جارووف واللى فى أيده عصايا خشب وحاوطونى علشان يمسكونى !!!!
حاولت أقولهم :
يابهايم أنا نيللى !!
بس صوتى كان بيطلع بصوت قرد !!!!
قربوا عليا وواحد من الخدامين ضربنى بالعصايا , فصرخت ونطيت فى الهوا ومسكت فى النجفه اللى فى الاوضه , فضلوا يهشونى بالعصايا ونغزونى بالعصايا وانا متشعلقه فى النجفه ,فنطيت من شباك اوضتى للجنينه بتاعة الفيلا !!
الخدامين بصوا من الشباك عليا و نادوا على الامن اللى بره الفيلا علشان يمسكونى .
الامن قرب عليا وفى أيدهم عصيان الكهربا وجريوا ورايا فى الجنينه , واحد من الامن لحقنى وكان هيكهربنى , بس هربت منه ونطيت من فوق سور الفيلا للشارع ..
جريت فى الشارع وفضلت أجرى بعيد عن الفيلا , وبعدت عن المنطقه اللى كنت عايشه فيها .
توهت فى الشوارع
وأى حد كان بيشوفنى كان بيجرى منى !
العيال الصغيره بس اللى كانوا بيقربوا عليا وعايزين يصطادونى علشان يلعبوا بيا !! أما الكبار اللى مكانوش بيخافوا منى كانوا بيهشونى أو يرموا عليا طوبه علشان ماقربش منهم !!
قررت أنتحر ...
وقفت فوق كوبرى قصر النيل وفكرت فى كل اللى حصل , ومكنتش لاقيه تفسير لحاجات كتيره بس اللى أكتشفته فى الاخر أن نور خدعنى وسخطنى قرده بعد مافشيت سره لطارق ...
وانتصر عليا فى الاخر !!!
ميلت جسمى وهيأت نفسى للانتحار ولسه هرمى نفسى فى النيل .....
رجعت لورا وخوفت !!!!
وقولت لنفسى :
أنا هعيش .... هعيش لهدف واحد بس أنى أنتقم من نور , هعذبه اللى باقى من عمره , أنا مش هخسر أنا اللى هكسب فى الاخر يانور ...
لازم أنجو وأنا قرده لازم أتعايش فى الشارع , بدل ما الاقى نفسى فى قفص فى محل بيع حيوانات أو فوق سطح واحد هاوى تربية قرود !! وممكن ألاقى حوالين رقبتى طوق والعيال الصغيره يجرجرونى فى الشارع !!!
رجعت تانى فى المنطقه اللى فيها الفيلا بتاعتى , واللى فيها نفس الفيلا اللى قاعد فيها بابا وماما اللى وحشونى أوى ..
حاولت أقرب من الفيلا بتاعتهم , بس الامن هشنى وكانوا هيمسكونى وجريوا ورايا فى الشارع والمنطقه كلها شافتهم وهما بيجروا ورايا !!!
تانى يوم السكان بعتوا جابوا ناس من اللى بتلم الحيوانات الضاله ..
وفضلوا يجوا كل يوم المنطقه بيدوروا على القرد المطلوق فى المنطقه الراقيه ..
كنت بستخبى منهم فوق الشجر أول ما أشوفهم وفضلت على كده فتره لحد مابطلوا يجوا ..
ففكرت أتنقل من المنطقه واروح لطارق , بس المشكله أنه فيلا طارق بعيده أوى ورحلة زى دى هتبقى خطر جدا , فقررت أستقر فى المنطقه اللى فيها فيلا ماما وبابا
عرفت انجوا فتره فى الشارع ...
لما كنت بحس بالجوع كنت بنزل من فوق الشجره وألم بواقى اكل الناس اللى بتاكل فى المطاعم الراقيه وأرجع تانى فوق الشجره .
ساعات بيبقى فيه أطفال كيوت وبيرمولى موزه أو تفاحه , كانت بتبقى أسعد أيام حياتى .
مكنتش ببص لنفسى فى المرايا ولو صادفت وشوفت نفسى على سطح عربيه متلمعه , كنت برجع لورا وانا مرعوبه وأقعد بالايام معرفش أنام !!!
قررت اختبر قدرات البنى أدمين اللى عندى علشان أشوفها شغاله وانا قرده ولا لآ.
قدرت أسرق قلم و جورنال من بتاع الجرايد وطلعت فوق الشجره .
وبدأت أختبر قدرتى على القراءه .
حاولت أقرأ عناوين الاخبار اللى فى أول صفحه , واجهت صعوبه فى الاول وكنت حاسه الكلمات داخله فى بعضها , وصدعت من كتر ما انا مركزه فى الكلمات والحروف , بس ركزت لحد ماقدرت أفصلها عن بعضها , بمخى , وقدرت أقرأها بوضوح وقررت أمرن نفسى على قرأءه نص طويل .
فتحت الجورنال وتصفحته , وأتصدمت لما شوفت صورتى انا وطارق وخبر عن تورطنا فى قتل رشا زميلتنا فى الجامعه , وصور ليا انا وطارق وأحنا شايلين جثة رشا وبنحطها فى العربيه علشان ندفنها !!!
والخبر بيقول أن طارق كمان مختفى !!!
اه يانور الكلب !!!
كمان سخطت طارق!!! ياترى سخطته أيه !!
طارق ممكن يكون الكلب البلدى اللى كان بيجرى ورايا فى الشارع ؟!!!
أتجننت ... وعيشتى وانا قرده جننتى أكتر !!!
وحياة أغلى حاجه عندى , وحياة نفسى يانور اللى خليتها قرده لآندمك على اليوم اللى أمك الحيوانه ولدتك فيه !!!
تمالكت أعصابى وفكرت فى حاجه واحده بس وهدف واحد بس هعيش وأموت علشانه
الانتقام من نور .
كملت أختبار قدرات البنى أدمين و مسكت القلم بأيد القرد وحاولت أكتب , الموضوع كان صعب برده , كأنى لسه طفل لسه بيتعلم يمسك القلم .
وقدرت أكتب أول كلمه :
أنا .......
كملت كتابه , فكتبت :
نيلى يا م
وفضلت أكتب الجمله على الجورنال أكتر من مره علشان أمرن أيدى عليها لحد ما قدرت أكتبها كلها !!
أنا نيللى ياماما !!
عملت خطه للتواصل مع ماما , فقربت من مكتبه علشان أسرق فرخ ورق كبير وألوان .
أتسحبت ودخلت المكتبه , سرقت الالوان ولسه هسرق فرخ الورق , لاقيت اللى شغالين فى المكتبه قفلوا الابواب بتاعة المكتبه , وحاوطونى وبالعصيان الخشب !!!
فضلت أتنطط فوق أرفف المكتبه وخطفت فى أيدى فرخ ورق وأنا بتنطط وهربت من مواسير التكييف المركزى اللى فى المكتبه ...
طلعت على الشجره وكتبت بخط كبير وبطول الفرخ :
"أنا نيللى ياماما"
ولميت الفرخ وطلعت على شجره طويله جمب الفيلا وبتطل على بلكونة أوضة النوم بتاعة بابا وماما .
وفضلت مستنيه يفتحوا البلكونه , أستنيت يومين فوق الشجره , بس ماحدش كان بيفتح البلكونه ...
تبقى مصيبه لو نقلوا من الفيلا خالص !!!
كده يبقى أمالى كلها ضاعت، لحد ماسمعت البلكونه بتتفتح تالت يوم الصبح ..
بصيت لاقيتها الخدامه بتاعة ماما , فاستخبيت فى الشجره بسرعه !!
مش عايزه حد يشوفنى ويعرف أن نيللى بقت قرده ...
شوفت ماما وهى بتعدى من ورا الخدامه وبتقولها تنزل تجيب باقى الشنط من تحت .
تقريبا كانوا مسافرين ولسه راجعين !!!
ماما خرجت فى البلكونه فشاورتلها , وصرخت بس ماخدتش بالها ...
رفعت فرخ الورق بسرعه , بس كانت دخلت الاوضه تانى !!!
تحمست أكتر خاصة انهم لسه هنا ومنقلوش .
شوفت زى خيال بابا فى الاوضه وشوفته وهو بيدخل البلكونه وبيقول لماما :
البلكونه كلها تراب !!
فقالتله وهو فى الاوضه :
مانا قولت للخدامه تنضفها بعد ماتجيب الشنط .
بابا قالها :
وقوليلها كمان ماتنساش تسقى الورد ...
قطع كلامه لما لقا قرد بيتنطط فوق شجره وهو ماسك يافطه مكتوب عليها :
أنا نيللى ياماما!!!!!
نادى على ماما وهو بيفرك عينه ومذهول, ماما جات و قالتله :
فيه أيه يا...
أتصدمت لما شافت اللى شافه بابا !!
الاتنين جريوا فى الشارع وقربوا من الشجره , نزلت من الشجره وقربت عليهم وانا ببكى بدموع القرد .
ماما كانت بتعيط وبابا كان بيبصلى وهو مش مصدق
ماما قربت عليا....
فبابا قالها :
لالالالا أوعى تقربى منها , أستنى لما نتأكد أنها نيللى مش ممكن يكون قرد عادى وحد ممسكه يافطه علشان يشتغلنا !!!
هزيت راسى وحركت صوباعى وانا بقوله :
لا والله يابابا أنا نيللى والكلب نور هو اللى سخطنى كده
بس طبعا طلع صوت قرد.
قلبت فرخ الورق و كتبت عليها قدامهم :
أنا نيللى ياماما سناء ..
ماما بكت بحرقه و خدتنى فى حضنها وبابا عينه دمعت , وبص حواليه علشان يتأكد ان محدش شايفنا وخبانى فى هدومه وهو داخل الفيلا...
جابولى ورق وقلم وبابا فضل يسألنى أسئله كتيره علشان يتأكد أنى نيللى ، سألنى عن تاريخ ميلادى وأسم جدى وجدتى وغيره
عقله مكنش مصدق أن بنته بقت قرده !!
وانا كنت بجاوب بالكتابه على الورق ، ماما كانت حضنانى وبتعيط حست بقلبها أنى بنتها من أول ماشافتنى عند الشجره !!
بابا أتأكد انى نيللى , وشوفت فى عينه الحيره والغيظ و الرغبه فى الفتك والانتقام من اللى عمل فى بنته كده .
سألنى على كل اللى حصل وأنا كنت بجاوبه بكلمات بسيطه بكتبها على الورق لخصت فيها الحكايه وقولته ان طارق كمان ممكن يكون ملعون زيي ...
بابا خبى الموضوع عن كل الناس حتى الخدامين , خلى محدش يدخل عليا الاوضه غير ماما وبعت لعمو "بابا طارق" علشان يجى الفيلا
عمو وصل الفيلا وبابا هحكاله على اللى حصل.
عمو مكنش مصدق فى الاول , بس لما سألنى حبة أسئله عن طارق والعيله ولاقانى بكتب وبجاوب بدقه , فأتصدم هو كمان!!!
بابا وعمو أتفقوا يجيبوا كل السحره الكبار اللى فى البلد واللى بره البلد .
أول حاجه عملوها السحره جابوا مرايه سودا وحطوا ادمها شوية حاجات وفتحوا حاجة اسمها مندل!!
وعملوا شويه حاجات غريبة علشان يلاقوا طارق , وأتصدمنا لما عرفنا أنه مات !!
عمو أبو طارق كان هيموت من الغيظ وكان ناوى يروح يقتل نور فى وقتها .
بس بابا هداه علشانى , ووعده اننا هناخد كلنا بتارنا لما يعالجونى , خاصة ان السحره حذرونا من الجن القوى اللى معاه واللى بيحميه
السحره حاولوا يرجعونى لهيئتى بس كلهم فشلوا يرجعونى بنى أدمه تانى .
فضلوا سنه بيحاولوا يعالجونى لحد ما بابا وصل بعلاقاته لساحر أفريقى قوى جابوه من الهايتى
أخد مبلغ كبير علشان يرضى يجى مصر , وقدر يفك لسانى ويخلينى أتكلم بصوتى زى البنى أدمين , بس مقدرش يغير هيئتى لبنى آدمه..
المترجم بتاعه قالنا أن السحر اللى عليا قوى جدا ومعمول من جن قوى وشغلانته نادره فى عالمهم , وقالنا أسم الجن اللى عمل القميص " نصير "
وقال أنى مش هينفع أرجع بنى أدمه تانى غير بالقميص اللى أتلعنت بيه , وانه ممكن يساعدنا نتغلب على الجن اللى مع نور !!!
سألنا على نور وعرفنا انه خلص السنه ورجع قريه أسمها النيارين ..
حاليا أحنا فى الطريق لقريه النيارين أنا و بابا و عمو ،ومعانا كتيبه مسلحه من البلطجيه وعشرة من أقوى السحره اللى جولنا وعلى رأسهم الساحر الافريقى , هننزل مباشرة على الكهف اللى عايش فيه الكلب" نور" مع مراته سندس , وهتشفى فيه هو ومراته بعد ما أخد القميص وأرجع بنى أدمه تانى ..
الفصل الثانى
(نـــور)
أنت برده مش مصدقنى ؟!!
قولتها :
أصدقك أزاى يعنى !؟ هو أنتى رسول ولا نبى يابنتى؟ !!
قالتلى :
طيب وحياتك عندى ياسيدى انا دعوتى مستجابه !!
قولتلها :
أدينى مثال !!
قالتلى :
مثال واحد بس !! قول أمثله , طيب أقولك على حاجه , أنا قابلتك و أتجوزتك بدعوه !!
قولتلها بأستغراب :
أزاى يعنى !!؟
قالتلى :
قبل ماتيجى البلد بليله واحده , كنت عند المقام وببص على صورتك اللى متعلقه عليه ،وقولت يارب يا تودينى زمانه وأتجوزه ..... ياتجيبه زمانى وأتجوزه برده !!
تانى يوم لاقيتك فى البلد , ومن ساعتها وانا متبته فيك.
قولتلها :
أنتى بتحورى يابت ... أزاى !!؟ دا انتى مكنتيش مصدقه اصلا أنى طالبك للجواز !!!
قالتلى :
والله ياسيدى ده حصل , أنا مكنتش مصدقه أصلا أنك جيت زماني..
وسكتت شويه وقالت :
طيب انا مره دعيت على زعروره الحلاق يجيله تعلبه فى شعره علشان ضربنى....
قطع كلام سندس باب الكهف اللى بيخبط جامد!!!
جريت فتحت الباب فلاقيت حنوش ... شكله كان مش مظبوط , أول ماسندس شافته على الباب قالتله وهى بتضحك :
تعالا ياياد ياحنوش , تعالا كل سمك !!!
حط أيده على أنفه علشان الريحه وقالى بعصبيه :
ماتفهم مراتك ياعم انى مش واد ,وأنى جن فى عمر أجداد أجداد أهلها , وبطلوا أكل سمك قلبتوا معدتنا , ويلاه بينا نهرب من الكهف حالا !!!
قولتله :
نهرب !!؟
قالى :
يلا يانور مفيش وقت !!!نصير رصد جيش من الجن بيقربوا علينا !!
قولتله وانا مصدوم :
جيش من أيه!! ودول جاين لي...
قطع كلامى وقال بلهوجه :
أنجز ياعم مفيش وقت!!
ناديت على سندس وقولتلها :
بسرعه ياسندس بيقولك جيش من الجن !!!
سندس فضلت تلف فى الكهف , وبتدور على حاجه
حنوش قالى :
بسرعه يانور مفيش وقت !!
قولت لسندس :
أنجزى ياسندس بتدورى على أيه !!؟
بدور على الشبشب ياسيدى !!
حنوش شد فى شعره وقالنا :
أنا ماشى ياعم ياكشى تولعوا !!!
ولف ضهره ومشى .
سندس لقت الشبشب تحت طبلية الاكل ، وجرينا ورا حنوش اللى سبقنا , قبل مانوصل عند التبه , فوجأنا بعربيات كتيره بتحاوطنا من كل مكان , وبينزل منها بلطجيه كتيره معرفتش أعدهم من كترهم, وفى أيدهم أسلحه ورشاشات , فى أقل من دقيقه كانوا عاملين دايره حوالينا وحوالين الكهف !!
شويه ونزل من العربيات يجى عشره تانيين شكلهم مختلف عن البلطجيه , ماسكين فى أيد بعض و عاملين صف وبيتقدموا بحذر ناحيتى أنا وسندس وحنوش
بيقودهم واحد شكله أفريقى , كانوا بيتمتموا بكلمات مش مفهومه !!
سمعت صوت نصير فى ودنى بيقول :
يالهوى لو شوفت اللى انا شايفه يانينو !!
قولتله :
نصير !!! أنت كنت فين ؟! وأيه اللى بيحصل دا !!؟
قالى :
كنت بلم الجن اللى تبعنا علشان الحرب , و اللى بيحصل أن نيللى ،البت أياها اللى سخطناها قرده، جايه هى وأبوها وعمها علشان ياخدوا بتارهم منك !!
قلتله باستغراب :
ايه دا هما لاقوها !!!
مش وقته يا نينو دول جايبين معاهم سحرة كبالا يهود!! وساحر فودو أفريقى اللى هو بيقودهم قدامك ده , مفكرينك ساحر شبيح وصايع , ميعرفوش الخيبه اللى أنت فيها !!
لقيت صف السحره اللى بيتقدم ناحيتنا وقف وكلهم رفعوا رأسهم لفوق مره واحده وبصوا فى السما !!
قولت لنصير :
فيه أيه يانصه هما بصوا لفوق مره واحده ليه ؟!!
مردش عليا !!!
بصيت على حنوش لاقيته بيبص معاهم فوق فى السما !!
قولتله بقلق :
فيه أيه ياحنوش !!!؟
قالى وهو بيلطم :
يالهوى ... يالهوى , ده أنتوا هتتنفخوا !!!
ولاقيته أختفى !!! وهو بيقول:
سلم ع الشهدا اللى معاك !!!
سمعت صوت نصير بيقول وهو قلقان :
عايز تعرف أيه اللى بيحصل !!؟ أتفضل بص فوق أنا خليتك تشوف بعين الجن .
بصيت فوق فى السما لاقيت ألالاف من المخلوقات اللى شكلها غريب !!!
عينيهم كانت مشقوقه بالطول زى الثعبان ودانهم طويله مدلدله على أكتافهم , أنيابهم طويله خارجه من بوقهم , والوان جلودهم مختلفه عن بعض فيه الاحمر ولااخضر والاصفر...
فيه منهم اللى كان فى حجم الاقزام وشكله وحش جدا ومنهم اللى طوال وليهم أكتر من دراع وايد
جسمهم متغطى بشعر كثيف!!!! عريانين ومش لابسين حاجه خالص !!
ماسكين فى أيديهم رماح وسيوف وراكبين فوق حيوانات شبه الضباع بس ضخمه جدا , الجيش ممتد لحد أخر السما !!
بصيت ورايا علشان أشوف الجيش اللى مع نصير لاقيت هيأتهم شبه البنى أدمين شويه بس عينيهم مشقوقه بالطول وودانهم طويله برده , كانوا ضخام الجته وطوال جدا وليهم عضلات وباين عليهم القوه والبأس .
كانوا لابسين زى دروع معدنيه مغطيه صدرهم وبطنهم و راكبين على كائنات شبه الخيول بس ضخمه , وماسكين فى أيديهم سيوف ورماح طويله جدا.
كانوا متجهزين بس عددهم مايعديش ال100 جن !!!!!
نصير قالى :
أعمل أى حاجه !!! ساعدنا , أسند معانا انت شايف عددهم !!!
أعمل أيه !!؟
قالى :
جدك لو هنا كان زمانه نفخهم , أنما أنت خيبه , أزاى يعنى ماتعلمتش حاجه من الكتب اللى فى الكهف ....
نصير قطع كلامه لما لاقى جيش الجن العريانين بدأ الهجوم .
حضر نفسه للهجوم وهو بيقول :
محدش بياكلها بالساهل !!!
هجم الجيشين على بعض , شوفت نصير واللى معاه وهما بيزيحوا بسيوفهم ورماحهم الطويله مئات من الجن العريانين , بعدها أختفت الرؤيه بعين الجن ،
وعينى رجعت تشوف زى البنى أدمين تانى ..
بصيت على التبه لاقيت أهل البلد كلهم متجمعين فوق التبه بيتفرجوا علينا تحت والبلطجيه محاوطنا !!
محدش فيهم رمى حتى طوبه علشان يدافع عننا ,عرفت أنهم زى ماكان بيقول جدى عليهم فى مذكراته...
ناس واطية !!
فجأه لاقيت السحره رجعوا لورا وأدوا الاشاره للبلطجيه , أنهم خلاص خلصوا !!
البلطجيه قربوا عليا انا وسندس اللى كانت مستخبيه ورا ضهرى , وشدونا ورمونا على الارض وفضلوا يرفسوا فينا برجليهم .
مسكت أيد سندس وهما بيضربونا لحد ما لاقيتهم بطلوا ضرب فينا ووسعوا الطريق لحد معدى وسطهم , لحد ماوصل عندنا !!!
رفعت رأسى وبصيت وفوجأت بأبو نيللى و فى أيده قرد وجمبه راجل معرفوش ...
لاقيت القرد بيتكلم بصوت نيللى وبيقول :
كنت مفكر نفسك هتكسب يانور , القميص فين ياكلب ياحقي.....
قطعت كلامها لما لاقيت سندس فطسانه على نفسها من الضحك !!
القرد (نيللى ) بصت لسندس بأستغرب فسندس قالت وهى بتضحك :
ياحلاوه ياولاد أول مره أشوف قرد بيتكلم !!! ألحق يا سيدى!!!
ودخلت فى نوبة ضحك تانيه !!!
قولتلها وانا بضحك :
بس ياسندس عيب ماتتريقيش على حد !!
ودخلنا فى نوبة ضحك مع بعض...
القرد ( نيللى ) أتغاظ , وفوجئت بالراجل اللى معرفوش بيشدنى من شعرى وبيقولى :
وديت ابنى طارق فين يابن الكلب؟ !!!
سندس دخلت فى نوبة ضحك تانيه وهى بتقولى :
أوعى يكون قاصده على طارق السمكه ياسيدى !!!
الراجل بصلنا بأستغراب وقال :
سمكه !!
سندس قالتله وهى مش ماسكه نفسها من الضحك :
دول عملوه فيليه من بدرى وتلاقيهم شخوه كمان !!
قولتلها وانا بحاول أمسك نفسى :
عيب ياسندس ماتقوليش اللفظ دا تانى !!!
الراجل أتغاظ مننا وضربنى برجله فى بطنى جامد , فصرخت .
سندس أتخضت عليا و قالتله :
اللهى تنطخ رصاصه فى نفوخك !!!!
فقعدت أضحك وانا بتأوه من الالم , سندس بصتلى ودخلت فى نوبة ضحك تالته أشد بعد مافهمت انا بضحك على أيه .
الراجل أبو طارق طلع مسدسه وشد أجزاءه و قالى بعصبيه :
أنتوا مجانين , بتضحكوا على أيه !!؟
قوتله
أصل سندس دعوتها مستجابه و....
مكملتش الجمله لاقيت رصاصه فى نص رأس أبو طارق !!!
السحره والبلطجيه أتصدموا وبصوا حواليهم ..
فشوفنا كلنا معتز باشا واقف فوق التبه وساند على عصايته الخشب ووراه قوه كبيره من الامن المركزى بتحاوط البلطجيه والسحره وسمعت صوته بيقول فى ميكرفون:
هعد لحد 3 لو لاقيت بنى أدم واحد واقف عند الكهف ,
القناصه هتفرتك مخه !!!
واحد ... البلطجيه والسحره بدأوا يبصوا لبعض .
أتنين ... جريوا على عربياتهم .
تلاته .... العربيات خرجت بتجرى من عند الكهف .
وفى أقل من خمس دقايق كانت الحته اللى قدام الكهف فضيت ومفضلش غير أبو نيللى والقرد واللى كانوا مصدومين من اللى بيحصل ومالحقوش يهربوا !!!
رجع صوت نصير فى ودنى وانا على الارض و قالى :
نينو !!!
فقولتله :
نصه !!! أنت عايش !! أنا كنت قلقان عليك أوى !!
قالى :
أحنا تمام عندنا حبة أصابات خفيفه بس كله تمام , هغيب شويه وهرجعلك تانى .
تمام..
قومت من على الارض و سندت سندس وقومتها من على الارض ونفضت هدومها بأيدى وانا بغنى وبقول :
الليل الليل ... الليل ياميمون وكمان الليل أكون ممنون .
وفضلنا نضحك أنا وسندس على القرده نيللى اللى كانت بتتنطط من الغيظ وصرخت وهى مصدومه :
مش هتكسب كل مره يانو.....
فوجأنا كلنا بعاصفه رملية هجمت علينا , خبيت سندس فيا وأديت ضهرى للعاصفة , وكل اللى كانوا على التبه وحوالين الكهف غطوا وشهم من الرمل والتراب اللى غطى المنطقه كلها !!!
شويه و العاصفه هديت !!!
لفيت ضهرى و فتحت عينى براحه و بصيت على نيللى
لاقيتها أختفت هى وأبوها وجثة أبو طارق !!!
الدنيا اتلمت بفضل معتز باشا والجهه السياديه اللى شغال فيها , روحناله الفيلا أنا وسندس وشكرناه على وقفته معانا .
طبعا اهل البلد أتلموا علينا وفضلوا يعتذروا وهما خايفين من عقابى علشان ما وقفوش معانا ودافعوا عننا , وبرروا موقفهم بأنى محذر محدش ينزل من التبه والا هلعنه !!!!
بيتسعبطوا ولاد الهرمه !!
نصير رجعلى الكهف بعد ما أطمن على الجن اللى معاه وقالى وهو مضايق :
على فكره مش هينفع كده !! لازم تشتغل معانا يانينو ..
الساحر القوى هو اللى بيفرق فى الحرب أحنا كنا هنموت على فكره , جدك لو موجود كان على الاقل عمل تعزيمة حمايه لينا !!
قولتله وانا بتأسفله :
ماتزعلش يا نصه وفك التكشيره دى !!
فصل مكشر برده فقولتله :
وعد يانصه بعد الموقف ده أتعلم السحر بس محتاجك تساعدنى.
قالى وهو مقموص :
هساعدك فى حاجات معينه أنما فيه حاجات مينفعش أعلمهالك , لازم تتعلمها بنفسك .
خلاص نبدأ من بكره .
قالى بحذم :
لا ...تبدأ حالا!!
يانصه هبدأ من بكره !!
شخط فيا وقالى :
ولااااا بطل أنتخه , المره الجايه هنسيبك , مش هضحى باللى معايا علشان حضرتك مكسل تتعلم السحر ومعتمد علينا فى كل حاجه .
قولتله وانا بهديه :
حاضر هقوم أهوه !!!
سندس كانت بتطبخ فى مطبخ الكهف , عديت من وراها وروحت ناحية الكتب ...
الكتب كتيره أوى ومش عارف أبدأ بأيه !!
فقولت لنصير :
يانصه أنا مش عارف هبدأ منين ؟!!
أبدأ اعرفنا الاول !!
قولتله:
مش فاهم !!
قالى :
أنت تعرف أنا أى نوع من الجن ؟!!
من النوع أبن الحلال المصفى !!
سمعته بيلطم ،وقال :
افتح المجلد الاحمر اللى قدام عينك بالضبط .
فتحت المجلد وقعدت على المكتب اللى جنب الكتب فى اول الكهف , لاقيته بالعربى , فقريت شويه , بصيت جمبى لاقيت سندس مقرفصه على الارض !!!
وبتقولى :
بتقرا أيه ياسيدى ؟!!
لا بقولك أيه دى مش مذكرات جدى ...ده سحر , مش لعب عيال هوه .
قالتلى وهى فرحانه :
الله , علمنى السحر ياسيدى !!
قولتلها :
مش لما أتنيل أتعلمه أنا الاول .. أمشى ياسندس !!
لاقيتها لازقه جمبى ومش راضيه تتحرك !!
سمعت نصير بيقولى :
وزعها علشان تعرف تذاكر .
ما أنت شايف أهوه لازقه .
أتصرف !!!
روحى ياسندس كملى طبخ , انا شامم ريحة الاكل بيتحرق .
قالتلى :
هو نصير قالك وزعنى ولا أيه !!؟
سمعت نصير بيقول فى ودنى :
على فكره البت سندس دى بتفهم عنك , ولو بقت ساحره هتاكل منك ومن أجدادك السيط كله !!
قولتلها بعصبيه :
روحى ياسندس من قدامى !!
فضلت برده لازقه , قفلت الكتاب وقولتلها :
طيب أنا مش هقرأ أنا هنام .
وسيبتها وروحت ناحية السرير ومددت وعملت نفسى هنام فعلا ...
بصت عليا ودخلت المطبخ .
أتسحبت وطلعت القميص من تحت المرتبه بتاعة السرير ولبسته وزررت أخر زرار وأختفيت !!
روحت ناحية الكتب وفتحت المجلد تانى على المكتب .
بدأت أقرأ وأتناقش مع نصير وعرفت فى أول درس أنواع الجن .
عرفت أن أقوى انواع الجن واللى منهم نصير أسمهم الجن الضوئيين( النصيبيين ) ومنهم الامراء وملوك الجان السحره، وبيبقوا شبه البنى أدمين اللى حد كبير وعددهم قليل جدا بالنسبه لعدد الجن المهول اللى موجودين على الارض
واللى عددهم بيعدى ال 1000 تريليون جنى !!
يعنى كل بنى أدم قدامه 100 مليون جنى !!!!!!
ومفيش مكان على الارض مفيهوش جن , حتى البحار والمحيطات فيه نوع من الجن بيسكنها أسمهم الجن المائي ودول أتذكروا فى القرأن فى صورة "ص " ايه 37 ( وَالشَّيَاطِينَ كُلَّ بَنَّاءٍ وَغَوَّاصٍ )
نصير قالى أن غالبية الجن دول بيشتغلوا فى الطب !!!
فيه انواع تانيه زى الجن الارضى والقمرى والنارى .
أوحش وأدنى جن هو الترابيون او الجن الارضى ودول اللى بيبقوا فى الاماكن المهجوره ،وبيسكنوا بين الشقوق اللى فى الجدران و شكلهم بيبقى قبيح جدا ودول أكتر جن منتشرين وبيستخدمهم السحره فى الاعمال والسحر !!!
عالم تانى شبه عالمنا ، الاقوى هو اللى بيحكم فيه , كنت مندهش جدا من اللى بقرأه و اندهشت أكتر من قدرات نصير ، من حيث القوه وقدرته على ممارسه السحر ، جن قليل جدا اللى بيقدر يستخدم السحر زى البشر ،
أيه ده يانصه , ده أنت طلعت جنى جامد تنين .
قالى بخيبة أمل :
الخضره فى أيدك ناشفه !! , أستغلتنى فى أيه أنت غير لعب العيال ونفخ البلالين !!
يخى روح , مش عايز أدعى عليك !!
قولتله وانا بضحك :
أوعى تكون دعوتك أنت كمان مستجابه !!
وليه ماتكونش مستجابه يعنى !!؟
هو انت مؤمن بربنا وكده ؟!!
أنت ليه مش قادر تصدق أننا زيكم بالضبط !! على فكره أحنا فينا جن مسلم ومسيحى ويهودى وهندوسى وكل الديانات اللى عندكم , فيه ملاحده وكفره كمان , يابنى أحنا زيكم بالضبط , أو ممكن تكونوا أنتوا اللى زينا لاننا قبلكم على الارض !!
طيب أنت أيه يانصه ؟!! مسلم ولا مسيحى ولا يهودى ولا كافر ؟!!
قالى :
لا طبعا انا مؤمن ...بس مش هقولك على ديانتى , لان مؤمن بمقولة:
أن الدين لله والعالم للجميع !!
قولتله :
الله عليك يانصير باشا زغلول !!
فكرت ازاى أخلع من سندس علشان ماتشوفنيش وانا بتعلم السحر وتلبد جمبى.
قولتلها أنى كل يوم هروح عند معتز باشا الفيلا علشان أتابع معاه المصنع اللى بيتبنى على أرض جدى .
كنت بخرج بره الكهف قدامها وبعدين أختفى وأستناها تدخل جوه الكهف خالص عند المطبخ , وأرجع تانى أقعد على المكتب الصغير اللى عند الكتب ،
سندس مكنتش بتحس بيا خالص !!!
الوحيد اللى كان بيحس بيا غرابى حفيد غدااف واللى سميته غدااف برده , كان بيجى يقف على الكرسى اللى قاعد عليه وانا بذاكر !!
وفى يوم و انا بقرأ فى كتب السحر , فوجأت بحد ورايا , حط أيده على كتفى وأنا مخفى !!
أتنفضت من مكانى ,بصيت ورايا فلاقيت شاب طويل فى سنى مكحل عينه بكحل أسود تقيل !!
فوجأت بيه بيبصلى كأنه شايفنى !!
بصيت على القميص لاقيته مقفول !!
سمعت صوته بيقول :
أنت مفكرنى مش هشوفك علشان لابس قميص أخفاء !!!!
أنت مين !!؟ ودخلت الكهف أزاى!!؟ وأزااى شايفنى ؟!!
ضحك وقالى :
دى كلها أسئله , أنا نسيت انا هجاوب على أيه ..
أنت مين ؟!!
أنا ساحر زيك!!!
سمعت نصير بيقول فى ودنى :
أوباااااااااا, التاريخ بيعيد نفسه يانينو .. شكلنا داخلين على أيام سواد
لقراءة باقي الفصول الجزء الثانى من هنا
لقراءة باقي الفصول الجزء الاول اضغط هنا