«ميراث نور»
بقلم لينا بسيوني
الفصل الاول و الثانى
أسمى نور فى سنه تالته كلية هندسه قسم كهربا
يتيم وماليش قرايب خالص
الساعه واحده بالليل خبط على بابى مندوب شركة توصيل !!وسلمنى طرد مبعوت لي من شخص مجهول , لما فتحت الطرد أكتشفت ان حياتى كلها كدبه!!!
..............
أمى ماتت وهيا بتولدنى وأبويا مات وأنا فى تالته أعدادى
من ساعتها وانا عايش لوحدى فى شقه متواضعه جدا فى منطقه شعبيه , بصرف على نفسى من وأنا فى ثانوى أشتغلت كل حاجه علشان أعرف أكمل دراستى فى كلية الهندسه .
أشتغلت بتاع شيشه فى كافيه , كنت أسيخ الشيشه وأغير الفحم لولاد الناس الأغنيه ....
أشتغلت فى مغسلة عربيات وكنت بغسل العربيات فى عز البرد ,الميه والبرد كانوا بيبوشوا جلدى , وينخروا عضمى ..
بس أستحملت علشان أعرف أصرف على نفسى فى كلية الهندسه
ربنا كرمنى بشغلانه فى شركة منظفات وبقيت مندوب مبيعات أد الدنيا , شغلانه نضيفه ,هيا مرمطه بس أحسن من البهدله برده
عندى هدف واحد فى حياتى عارف أيه ؟
لا مش أنى أبقى مهندس كبير والكلام ده !!!
هدفى الوحيد هو أنى أتجوز زميلتى "نيللى" ونعيش مع بعض فى بيت واحد
أنا ونيللى بنحب بعض من أول أسبوع فى الكليه , وبالرغم من انها بنت ناس أوى أوى ، حبتنى علشان مكافح وعصامى و بشتغل علشان أصرف على دراستى والاول على الدفعه تلت سنين ورا بعض ومرشح لبعثه بره علشان قدمت ورقه بحثيه
عن تطوير الدائره الكهربيه الرنانه علشان ننتج كهرباء عالية الجهد بس بتيار كهربائى منخفض .
وفكره صغيره بمخطط لجهاز غير مكلف شبه الراوتر
يمكن عن طريقه نقل الكهرباء لاسلكى زى الوافاى !!!
دى حاجه هتبقى أأمن من سلوك الكهرباء واللى السبب فى كتير من حوادث الموت بالصعق بالكهربائى
الفكره عامله زى خاصية الرنين الكهربائى اللى بيطورها معهد ماساتشوستس للتقنية .....
نيللى بتعشقنى وهتواجه أهلها علشان نتجوز , وانا بعشق نيللى علشان شافتنى من جوه ومبصتش على هدومى الرخيصه واللى أوقات كتيره بتبقى مخرومه !!
ومع ان أبن عمها "طارق "معانا فى نفس الكليه وبيجى كل يوم بعربيه شكل الا أنها بتستتقل دمه ومبتردش عليه لما يجى يكلمها وهى معايا وبتحرجه كمان , علشان كده بيكرهنى
نيللى فيها كل المميزات مرحه ودمها خفيف ومن حيث الشكل فهى أشيك وأحلى بنت فى الجامعه كلها
مشكلتها بس أنها مهمله فى الدراسه .. طبعا علشان مش هتستفاد حاجه بالشهاده ,ولو حتى خدت أمتياز فى الاخر برده هتروح تدير أى شركه من شركات أبوها ...
كنا طول الوقت مع بعض حتى فى الامتحانات كانت دايما بتبقى فى الكرسى اللى قدامى فى اللجنه وكنت بغششها علشان ماتسقطش برده .
النهارده المفروض أنه أخر واصعب أمتحان فى السنه كلها
الحمد لله خلصت الامتحان كله فى أقل من ربع ساعه
كنت ببص على زمايلى فى اللجنه وهما محتاسين فى الاسئله وحاطين أيديهم فوق راسهم من خيبة الامل ...
نيللى كانت متوترة جدا , ريحت ضهرها على الكرسى وقالتى بصوت واطى :
خلصت !!؟
قولتها :
من بدرى !! ... فيه حاجه واقفه معاكى !!؟
قالتلى بصوت واطى :
حاجه واحده بس ؟ أنا مش عارفه أحل ولا مسأله, الاسئله صعبه جدا !!!
قولتلها :
أوكى هبعتلك الاجوبه على الواتس أب ...أنتى كمرتى الموبايل بتاعك صح ؟
قالتى :
أها
قولتلها :
أصبرى عليا ربع ساعه وهبعتلك الامتحان كله
رجعت راسها تانى لقدام وعملت نفسها بتحل فى الورقه
بصيت على المراقبين بتوع اللجنه لقيتهم مش شايفنى ..
طلعت الموبايل من جوه لامؤاخذه البنطلون وحطيته بين رجلى وطلعت أيدى اليمين من كم القميص وسيبت الكم فاضى على الترابيزه كخداع بصرى, فى حين أن أيدى تحت وماسكه الموبايل
فتحت النت وبعدين فتحت الواتس ,
أتفأجات بكميه رسايل من العملاء على الواتس
اللى عايز كراتين صابون وشاور واللى عايز بامبرز !!!
هو ده وقته !!
الحمد لله أن الموبايل صامت , خرجت من الواتس وقررت أحل الامتحان كله فى نوت على الموبايل وبعد كده أبعت النوت كلها مره واحده لنيللى على الواتس .
كتبت تقريبا أجابة الامتحان كله فى النوت وعملت حفظ ولسه هبتعتها .....
فوجئت بأيد بتتمد مابين رجلى وبتخطف الموبايل !!!
قفشت فى الموبايل لا اردايا وقفلت الشاشه بتاعته قبل مايتاخد منى
بصيت على اللى أخد الموبايل لقيته دكتور الماده !!!
قالى وهو بيبص على الموبايل وبيحاول يفتحه :
اهلا وسهلا , مدخل موبايل اللجنه وبتنقل منه كمان !! ...هات باسورد الموبايل وأطلع بره اللجنه حالا !!!!
قولتله :
حضرتك فاهم غلط , أنا مكنتش بغش وال...
قالى :
هات الباسورد وبعدين نبقى نشوف انا فاهم غلط ولا لأ
قولتله :
مش هينفع حضرتك , الموبايل عليه صورى وأناعريان ومش هينفع حد يشوفها
قالى :
ياسلام !!!
قولتله :
وحياتك عندى , هات الموبايل وأنا أفتحهولك ونشوف مع بعض اذا كنت بغش ولا لآ
اطلع بره اللجنه ياغشاش !!!
رفضت أخرج من اللجنه وعملت دوشه
اطلع بره اللجنه ياغشاش !!!
أبن عم نيللى (طارق) قال للمراقب :
مش هينفع كده حضرتك مش عارفين نحل فى الدوشه , خدوه بره اللجنه وأتفاهموا معاه بعيد عننا !!!!
الدكتور قالى :
أنت كمان بتشتت زمايلك، أتفضل أطلع بره الجنه حالا و ألا هطلب الامن
خرجت بره اللجنه وفضلت مستنى بره لحد مالمراقبين يخرجوا ...
وقت الامتحان خلص والمراقبين خرجوا ومعاهم الورق ولمحت الدكتور اللى خارج من القاعه ومعاه الموبايل بتاعى , حاولت أكلمه .
تجاهلنى وسابنى ومشى
مشيت وراه وقعدت أترجاه مايضعيش مستقبلى .
مكنش بيرد عليا برده !!!
فضلت ماشى وراه وماسيبتوش لحد ماوصل لمكتب الشئون القانونيه ولقاه مقفول
سأل عليهم أمن الكليه قالوله أن الشئون القانونيه لسه ماشيين حالا ...راحوا اجتماع عند رئيس الجامعه وهيروحوا بعد الاجتماع ويجوا بكره .
فراح ناحية المكتب بتاعه وروحت وراه برده وانا بترجاه
فتح المكتب ودخل، جيت أدخل وراه وقف على الباب
وقالى :
أنت غشاش وهتاخد جزائك , الموبايل هيروح للشئون القانونيه بكره وفى التحقيق أبقى قولهم بقى على الصور العريانه اللى فى الموبايل
قولتله :
يادكتور أرجوك ماتضيعش مستقبلى ،أنا مرشح لبعثه بره وكده هتضيع عليا !!!
قالى وهو مكشر :
يبقى أخدتها بالكوسه أو بالغش ومش من حقك ياغشاش .. يمكن ربنا عمل كده علشان تضيع عليك وحد تانى احق منك ياخدها
وقفل الباب فى وشى !!!
خبطت على باب مكتبه كتير وصعبت عليا نفسى ودمعت !!
فوجئت بالأمن جه وخدنى من قدام باب مكتبه وخرجونى بره الكليه , كان شكلى قدام زمايلى والامن بيطردونى وحش جدا !!
خدت نفسى ومشيت من الكليه وما أستنتش نيللى اللى كانت بتنادى عليا .
وصلت شقتى وقفلت بابى عليا وفضلت أبكى .
حياتى كلها اتدمرت فى ساعه واحده !!!
لو طبعوا اللى على الموبايل هيلاقوا أجابه الامتحان كله !!
لو اثبتوا ان كنت بغش على حسب قانون الجامعات أقل عقوبه هيسقطونى فى مادتين أو تيرم كامل !!!
يعنى أستحاله اتخرج بأمتياز وأستحاله أطلع البعثه لانى هبقى غشاش , ده غير السنه اللى هيعيدها تانى
سنه مهمه هتضيع من عمرى ,مصاريف زياده!!
تليفونى رن ولقيت أسم نيللى على الشاشه فكنسلت وقفلت التليفون
محتاج أبقى مع نفسى شويه يانيللى .
فضلت أفكر لحد نص الليل مفيش حل قدامى , توجهت لربنا وقولته أنقذنى يارب .....
أنا تعبت يارب واجتهدت
انا عارف أنى غلطت بس ده هيبقى عقاب قاسى أوى يارب
أنقذنى أرجوك !!
فجأه سمعت صوت الباب بيخبط !!!!
بصيت فى الساعه لقيتها داخل على واحده بالليل !!!
بصيت من العين بتاعة الباب فشوفت واحد لابس كاب وشايل صندوق !!
وماسك ورقه فى أيده وبيبص فيها وهو ساند الصندوق على الباب تقريبا بيتأكد من العنوان
قولتله :
مين ع الباب ؟!!؛
قولتله :
قالى :
شركة فاست للشحن والتوصيل يافندم !!!
وهو فيه شركة شحن بتيجى متأخر كده ؟!
قالى :
حضرتك السبب يافندم , موبايلك مقفول ومكنتش عارف أتواصل معاك علشان أوصل للعنوان بالضبط وخدت وقت على ما...
فتحت الباب وقولته :
وجايب معاك أيه !!؟
قالى :
معرفش يافندم ، الطرد مقفول زى ماحضرتك شايف .. ممكن تمضيلى بالاستلام علشان أمشى , حضرتك اخرتنى جدا !!!
قوتله
ومين اللى باعت الطرد !!؟
قالى بنفاذ صبر :
معرفش يافندم ...
بصيت على الورقه لقيت اللى باعته مجهول !!
قولتله :
اللى باعته مجهول !!مش هستلمها ،مش ممكن تكون قنبله ولا مخدرات !!!
قالى :
قنبله أيه يافندم الطرود بيتكشف عليها بجهاز اول ما نستلمها
قولتله :
متأكد بتعملوا كده فى الشركه عندكم ؟
قالى وكان هاين عليه يشتمنى :
وحيات امى ينكشف على الطرود , أنجز عايز أروح ....طلعت ميتينى !!!
مضيت على الورقه وخدت منه الطرد فطلع يجرى وهو بيقولى :
الصراحه مابنكشفش على الطرود!!!!!
لسه هقوله خد ياد لقيته أختفى من قدامى !!
لقيتنى شايل الطرد فى أيدى ,خوفت أرميه على الارض لينفجر فى وشى ولا حاجه
مشيت بيه براحه وحطيته على الترابيزه بشويش وبعدت عنه
حطيت ودنى عليه ماسمعتش حاجه !!!
فتحت الطرد براحه , وبصيت على اللى جواه وفوجئت باللى شوفته !!!
قميص !!
قميص شكله غريب مش قادر أحدد لونه أيه بالضبط !!!
طلعته من الصندوق فلقيته طويل زى البالطو !!!
ملمسه كان غريب جدا عليا ،لاهو ملمس القطن ولا هو ملمس الحرير بس ملمسه منعش جدا ومريح !!!
زرايره عباره عن أقراص كبيره وبرده عينى مش قادره تحدد لونها أيه بالضبط !!!
كل اللى شايفه موجات ألوان كتيره داخله فى بعضها !!!!
قلبته علشان أشوف ضهره ..
لقيت لونه كله بقى أبيض !!!
قلبته تانى لون أتغير بقى أحمر !!!
كل أما الفه وأقلبه على أى وش يدى لون مختلف !!
خدت بالى من كلمه مكتوبه على القميص من تحت كانت مكتوبه بلغه غريبه !!!
تقريبا حد ماضى بأسمه عليه !!
لبست القميص وروحت شوفت نفسى فى المرايه
قفلت زراير القميص وأنا ببص على شكلى فى المرايا
زررت آخر زرار فى القميص
وبعدها أتصدمت من اللى شوفته !!!!
الفصل الثاني
وبعدها أتصدمت من اللى شوفته .....
ماشوفتش حاجه أختفيت تماما !!!!
فكيت زرار القميص ظهرت تانى !
أندهشت وقفلت آخر زرار فأختفيت تانى !
وقفت فتره استوعب اللى بيحصل ....
تقريبا لازم أزرر كل زراير القميص علشان أختفى !!!
فكرة الاختفاء موجوده فى العلم مش أسطوره وفيه علماء أخترعوا بالفعل عبايات بتخفى اللى تحتها ,مصنوعه من بلورات الكالسيوم منشورية الشكل
ده غير أنه فيه ماده أسمها الماده الفائقه أو الميتا ماتريل دى الماده اللى بيتصنع منها عدسات الكاميرات اللى بتشوف ورا الجدران وتحت الملابس ,
الماده دى العلماء حاليا بيطورها علشان هيصنعوا منها عبايه بتخفى أى حاجه تحتها !!!
بصيت على القميص تانى وتأملته
معقوله يكون القميص مصنوع من الميتا ماتريل !!!
مين اللى بعتلى الطرد !!؟ ويعرفنى منين !!؟ الموضوع كان مقلقنى جدا .
بس كان مفرحنى أكتر , وحسيت أن ربنا أستجاب لدعائى
وبعتلى حاجه تنجدنى.
منتمتش اليوم ده ,فضلت أكتشف فى قدرات القميص وبيشتغل أزاى !!!
أنبهرت بالاوبشنز اللى فيه!!!
جاتلى الفكره اللى هتيجى لاى حد فى مكانى !
طلعت الصبح على الجامعه وأنا لابس القميص من غير ما أقفل آخر زرار , وتقريبا كنت أول واحد يوصل الجامعه
وقفت على جمب فى حته مستخبيه وزررت القميص ومشيت قدام الامن وكنت خايف يشوفنى ..
بس ماشافنيش وأنا داخل بوابة الجامعه علشان مسألنيش على الكارنيه !!!
روحت ناحية الكلية بتاعتى , عديت من قدام امن الكليه عادى برده !!
روحت ناحية مكتب الدكتور اللى خد منى الموبايل , حاولت أفتح باب أوضته بس كان مقفول بالمفتاح !!
كنت عامل حسابى وخدت معايا بنستين شعر
دى موهبه اتولدت بيها ,بعرف أفتح أى باب من غير مفتاح ,
تقريبا جدى كان حرامى أو نجار !!
فتحت الباب ودخلت الاوضه , ولعت النور ودورت على موبايلى و لقيته على المكتب فوق رصة كتب
مسكت الموبايل وفتحته ومسحت النوت اللى كاتب فيه اجابة الاسئله وسيبت الموبايل مكانه بالضبط , وخرجت من الاوضه وقفلت الباب
حاولت أقفله تانى ببنس الشعر علشان مايبنش أنه اتفتح
قفلته وكنت خلاص همشى من قدام الاوضه بس فوجئت
بحد بيخبط فيا وداس على رجلى جامد فطلعت صوت
.
.. أه ...
بصيت لقيت الدكتور دايس على رجلى !!!
بعدت عنه بسرعه , وحطيت أيدى على بوقى علشان ماطلعش صوت ولا نفس
الدكتورأتخض لما حس أنه خبط فى حاجه واقفه عند الباب !!
فضل يتلفت حواليه
كنت خايف يشوفنى , بس مكانش شايفنى خالص !!
كان مندهش جدا !!!
فرك عينه بس ماشافش حاجه برده ,
طلع المفتاح بتاع الباب , وفتح الباب وهو بيبص وراه وبيتلفت يمين وشمال ....
نزلت ودخلت حمام الكليه وقفت قدام المرايه ،وفكيت زرار واحد من القميص فظهرت تانى
لفيت لفه كامله بالقميص وانا بفكر فى اللون الازرق
القميص أتحول لونه لازرق !!!
جيت أخرج من باب الحمام لقيت الدكتور فى وشى !!
القميص أتحول لونه لازرق !!!
بصينا لبعض من غير كلام فقولتله :
يادكتور أرجوك ماتضيعش مستقبلى ,حضرتك فاهم غلط ولووالاشاعه بتاعت انى غشاش وصلت للبعثه أحتمال يستبعدونى حتى لو برئ!!!!
ضحك بسخريه وقال :
برئ !! أنا ماسكك وأنت بتنقل من على الموبايل !!
قولتله :
يادكتور والله حضرتك فاهم غل...
قالى :
هو أنت هتفضل تطاردنى كده كتير!!!! , قولتلك ابقى قول الكلام دا للشئون القانونيه ...
وزقنى ودخل الحمام !!!
الساعه 12الضهر أستدعونى للتحقيق
المحقق سأل الدكتور على اللى حصل فقاله :
الطالب كان بيغش من الموبايل, ومسكته متلبس بس قفل تليفونه ولما سألته على الباسورد قالى أنه حاطط على الموبايل صوره وهو عريان , وكان بيشوش على زمايله ورفض يخرج من اللجنه..
المحقق هز رأسه بالتفهم , وبصلى وسألنى على أسمى وكودى
نور ناجى أحمد
المحقق قالى بلهجه رسميه :
أسمك رباعى ياطالب ؟!
قولتله :
نور ناجى أحمد ناير ....
وكودى ٠٨٠٦٠٤٧٧
سألنى :
ايه اللى حصل ؟
حضرتك الدكتور فاهم غلط , انا مكنتش بغش والله وحاولت أفهمه بس هو كان متعسف جدا معايا ومحاولش يسمعنى .
المحقق قالى :
مسلمتش موبايلك ليه قبل ما تدخل اللجنه زى زمايلك ؟!!
قولته :
أقسم بالله سلمت موبايلى الشخصى وممكن حضرتك تسأل المراقبين ، بس الصراحه ماسلمتش موبايل الشغل اللى هو فى أيد حضرتك،
وكملت كلامى وانا متأثر :
أنا بشتغل مع الدراسه علشان أنا يتيم وماليش حد يصرف عليا , شغلى مهم لانى من غيره هموت من الجوع حرفيا ومش هعرف أكمل دراستى
أنا حضرتك بشتغل مندوب مبيعات لشركة منظفات، وبالرغم من أنى بصرف على نفسى الا انى الأول على دفعتى تلت سنين ومرشح لبعثه بره مصر
وبعد ماخلصت الامتحان كله فى ربع ساعه ....الحمد لله
فتحت موبايل الشغل علشان أرد على عملاء كانوا عايزين أوردرات وطلبات !!! .. كنت عايز أستغل الوقت لأن حضرتك عارف أن مينفعش أخرج من اللجنه قبل نص مدة الامتحان
وبصيت للدكتور وقولت للمحقق:
الدكتور مسكنى وأنا برد عليهم وحالف يضيع مستقبلى
مش كده بس ده كمان أهاننى قدام زمايلى وجابلى الامن علشان يطردونى , ومرديش يسمعنى بالرغم من أنى قولتله انى هفتحله الموبايل بس مايدخلش على صورى !!
المحقق مسك الموبايل وقالى :
الباسورد أيه !!؟
قولته :
الباسورد أيه !!؟
مش هينفع حضرتك عليه صور ليا وأنا عريان والله ومحبش حد يشوفنى بالوضع ده !!
المحقق زعق فيا وقالى :
وضع أيه !!؟ هات الباسورد يا طالب !!
قولتله:
حاضر يافندم بس أرجوك ماتدخلش على الصور ...
شخط فيا جامد وهددنى بالفصل !!ا
قولتله على الباسورد , وفتح الموبايل وفضل يقلب فيه مالقاش حاجه
ولقى فعلا رسايل واتس جايه من العملاء فى وقت اللجنه بتسألنى على بضاعه ومردتش عليهم .
دخل على الصور وأندهش !!
شويه ولقيته بيعتذرلى وقالى :
انا بتأسفلك جدا يا أبنى على سوء الفهم .
الدكتور كان مندهش وطلب يشوف الصور بس المحقق رفض تماما ووجه كلامه ليا وقالى :
الحادثه دى حصلت من أمتى !!؟
قولتله :
السنه اللى فاتت يافندم ، عربيه خبطتنى جامد والصور دى طلبها منى دكتور العظام علشان يشوف مكان الكدمات وشكلها لانه كان مسافر مصيف.
الدكتور قال للمحقق :
ممكن اعرف بتتكلموا عن أيه !!؟
المحقق قاله :
الصور اللى على الموبايل صور ليه فعلا وهو عريان !!
صور كدمات فى مناطق حساسه أسفل ضهره !!و مفيش حاجه من اللى حضرتك بتقول عليها ومفيش أى حاجه ليها علاقه بأى أمتحان على موبايله , اتفضل حضرتك شوف بنفسك بس ماتدخلش على الصور !!
المحقق أدى للدكتور الموبايل واللى فضل يقلب فيه ومالقاش حاجه ولقى برده رسايل الواتس من العملاء .
الدكتور اتصدم !!
المحقق قالى :
تقدر تاخد الموبايل وتمشى انت يانور , أنت بنى أدم عصامى وهيكون ليك مستقبل باهر , وابقى أفتكرنى لما تطلع البعثه أن شاء الله ، بس برده غلط تدخل بالموبايل اللجنه فاهم ؟؟!
هزيت راسى وقولتله :
ربنا يخليك يافندم وطبعا عمرى ماهنسى لحضرتك موقفك ده , ومساندتك ليا .
أنا بساند الحق يابنى .. يله أخرج دلوقتى وخد موبايلك وسيبنى مع الدكتور لوحدنا .
خدت الموبايل وأنا فرحان ، وفتحت الباب وخرجت , وبسرعه زررت أخر زرار فى القميص فأختفيت ودخلت الاوضه تانى قبل الباب مايقفل
سمعت المحقق بيقول للدكتور :
أنت مدين للطالب بالاعتذار ،و أظن أخلاقيا المفروض يكون قدام زمايله لانك أتهمته دون دليل أنه غشاش ومحاولتش تفهم منه .
الدكتور حرك شفايفه بكلمات غير مفهمومه وتقريبا على كلام المحقق .
روحت على البيت وأنا طاير من الفرحه.
الحمد لله الف حمد وشكر ليك يارب !!
كلمت نيللى فى التليفون
سألتنى عملت أيه فى التحقيق , قولتلها وانا عامل نفسى زعلان:
لما نتقابل بكره فى الكليه هتعرفى , وعندى ليكى مفاجاه غريبه جدا من نوعها , هتندهشى لما تشوفيها !!!
كانت بتتحايل عليا علشان تعرف المفاجاه بس انا رفضت تماما وأصريت اعرفها بكره
تانى يوم ...
لبست القميص وروحت الجامعه وقعدت أدور على نيللى فى الكليه لحد ما لمحتها قاعده قدام الكليه وجمبها أبن عمها طارق
أكيد بيرخم عليها زى كل مره , روحت الحمام وزررت القميص واختفيت , قررت أروح اشتغل طارق وأبين أنه أهبل.
قربت من طارق وهو قاعد جمب نيللى ونفخت فى وشه ,فكان بيهوش بأيده , وسمعته وهو بيقول :
هتعرفى تخلعى من الواد ده !!!؟
أتفاجأت بيها بنضحك وبتقوله :
نور !!! ده عبيط خالص , هشوفه عاوز أيه وأسربه على طول !!!
قالها :
لا أنا عايزك تسربيه خالص .. كده كده مش هتستفادى منه تانى , أتمسك وهو بيغش وأكيد هيعيد السنه ومش هيبقى وراكى فى لجنة الامتحان السنه اللى جايه , أحنا متفقين تمثلى عليه علشان يغششك وتنجحى !!!
قالتله :
منه لله بابا بقى , هو اللى شرط عليا أجيب تقدير فى الكليه علشان يخلينى أدير شركة أدوات التجميل , مش عارفه أيه ده ....هستفاد ايه لما أبقى مهندسه ولا أجيب تقدير !!!
طارق قالها :
هو عمى كده عامل زى بابا بالضبط، مبيديش الحاجه من غير مقابل ,المهم خلينا فى الاهبل ده عايزين نخلص منه , الصراحه زهقت من التمثيليه دى , ومبقتش طايقه !!!
قالتله :
متشغلش بالك بيه .. هو من نفسه هيفهم اللى فيها , انا كنت ضاحكه عليه ووعداه أنى هقنع بابا بيه علشان البعثه اللى طالعها , دلوقتى البعثه بح ,وشكله هيفضل طول عمره مندوب منظفات , تصور بيقولى عاملك مفاجأه , انت عارف المفاجأه هتبقى أيه !!؟
أيه !!؟
قالتله وهى بتضحك :
عرض شامبو وصابونه بريحه !!!
ضحك طارق بصوت عالى وقالها :
بموت فيكى وفى دمك الخفيف!!
قالتله :
وانا بموت فيك ياروقتى !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
الدنيا كانت بتلف بيا ووقعت على الارض من الصدمه بس محدش شافنى ولا حس بيا
طول عمرى ماحدش بيشوفى او بيحس بيا حتى حلم حياتى طلع كدبه !!!
روحت على البيت وانا مخنوق وبفكر أزاى أنتقم منهم ...
انتقم من اللى مثلت الحب عليا طول السنيين اللى فاتت
علشان أغششها فى الامتحان !!!
Lina Basyouni
كنت هضيع مستقبلى علشانها ومكنش عندى مانع فى ده !!
جرحتنى !! وكسرت قلبى !!!
كنت بكسر فى كل حاجه فى البيت وانا منهار كنت بصرخ وبشتمها وبشتم أبن عمها و أبوها وعمها
أنا هندمكم كلكم .
سمعت الباب بيخبط !!
بصيت فى الساعه لقتيتها واحده بليل
بصيت من العين اللى فى الباب ,
لقيت مندوب تانى من نفس شركة التوصيل !!
فتحت الباب , وبصتله من غير ما أقوله حاجه !!
فبصلى بأندهاش !!!
فضلت أتفحص فيه بنظرات ثاقبه
فلقيته قالى بأستغراب :
فيه حاجه يأ أستاذ !!؟
أللى فى أيدك ده طرد مبعوت ليا من حد مجهول صح ؟!!!
بص على الايصال وقالى :
أها يافندم الراسل مجهول !!!
قولته :
طيب انا فاتح موبايلى . أيه بقى اللى أخرك !!؟
أسف جدا يافندم على التأخير بس موبايلى انا اللى فصل شحن ومعرفتش اتواصل مع حضرتك , وتوهت فى العنوان .
مفيش مشكله .. هات الوصل امضيلك عليه .
خدت الايصال ومضيت عليه وشيلت الطرد واللى كان تقيل جدا وحطيته على الترابيزه
وقولت لنفسى ياسلام بقى لو بنطلون كمان يبقى كملنا الطقم
فتحت الطرد
وفتحت بوقى من اللى شوفته جواه .....