رواية ميراث نور
بقلم لينا بسيونى
الفصل العاشر والحادى عشر
قولتلهم :
قفلوا الشبابيك بسرعه !!
جريوا قفلوا الشبابيك وياريتهم ماقفلوها ...
أستنشقت الدخان وحسيت الدنيا بتلف بيا , فضلت تلف تلف لحد ما وقفت بالمشقلب.
شوفت سقف الفيلا أرضيه , والارضيه سقف !!
شوفت تحتى محسن والشباب بيضحكوا بشكل هستيرى وبيقولولى :
أيه ياسطى اللى طلعك السقف , وأزاى واقف على السقف من غير ماتقع؟ !!!
فجأة لقيت تعابين ضخمه جايه وراهم!!!
قولتلهم وانا بصرخ:
حاسبوا !!!
بس الثعابين لفت عليهم وبلعتهم وهما بيصرخوا !!!!
فجأه لقيتنى بقع من السقف على الارض ،وببص ورايا لقيت ثعبان أسود كبير , بصلى وطلع لسانه الطويل وهجم عليا فغمضت عينى علشان ماشوفوهوش وهو بياكلنى !!!
وفضلت مغمض , بس مأكلنيش!!!!
فتحت عينى براحه , لقيتنى واقف قدام الدخان اللى طالع من الحله ومحسن والشباب قدامى بيتمطوحوا يمين وشمال !!
فجأه جدران الفيلا أختفت , والمكان أتغير , بقينا واقفين فى الرسيبشن بتاع الفيلا بس فى وسط الصحرا!!
شوفت غبار كثيف لحاجه جايه من بعيد و بتجرى علينا !!
ركزت فى اللى بيجرى ناحيتنا وبيقرب بسرعه كبيره جدا!!!
لحد ما فوجئت بقطيع من الذئاب قرب علينا وبيعوى !!!
حاولت أحذر الشباب بس كانوا سكرانين ومش راضين يتحركوا من مكانهم !!!
سيبتهم وطلعت أجرى، لقيت الذئاب هجموا عليهم ونهشوهم وبيجروا ورايا
فضلت أجرى لحد ماوقعت على الرمل والذئاب حاوطتنى من كل حته !!!
زاموا عليا فبانت فأسنانهم وانيابهم الطويله !!!
وكانوا لسه هيهجموا عليا ، بس شافوا نور أبيض قوى جاى من ورايا , فخافوا وطلعوا يجروا!!!
بصيت ورايا لقيت جدى ناير واقف ورايا وفى أيده زى شعله و بتطلع نور أبيض !!
قولتله :
جدى ؟!!!
لف ضهره وسابنى ومشى !! فقومت من على الرمل ونفضت هدومى،لاقيتنى رجعت طفل يدوبك بعرف أمشى، حاولت أجري ورا جدى ,بس خطوته كانت سريعه جدا, كنت بجرى علشان أحصله وهو ماشى !!!
سمعت صوته بيقولى وهو ماشى :
أنا زعلان منك جدا يانور , انت خالفت وصيتى وأستخدمت السحر فى أذية الغير !!
قولتله وطلع صوتى زى صوت الطفل :
جدى , أنا...
قطع كلامى وقال :
أنا أنتقمت بالسحر قبل كده , بس ندمت وبتحاسب دلوقتى على غلطتى دى حساب عسير , أنت كمان لما تموت هتتحاسب حساب عسير.....
بعدها سكت جدى!!!
فضلت أجرى علشان أحصله فى مشيته وأشوف ملامحه لحد ماحصلته بالعافيه ،وبصيت على ملامحه لقيتها ملامح غراب , هجم عليا وهو فاتح منقاره ....
فتحت عينى لقيتنى قدام الحله اللى لسه بتطلع دخان , كتمت نفسى بسرعه المره دى ومشيت وانا بتموطح و جبت أزازه ميه ورميتها على الثمره اللى بتولع ...
فطلع دخان كثيف و بعدها أنطفت ,بصيت على اللى متبقى من الثمره لقيت ماتحرقش منها ألا ربعها بس!!!
مشيت وانا بتموطح يمين وشمال و حاولت أفتح الشباك علشان الفيلا كانت معبيه دخان , ومكنتش شايف حاجه , وصلت للشباك و فتحته , وخدت نفس عميق من الهوا النضيف اللى بره الفيلا , استنيت لحد شبورة الدخان ما أختفت ...
ودخلت دورت على الشباب , فوجئت بتلاته ماسكين أيد
بعض وبيتنططوا وهما بيقولوا :
أحنا فشار ... أحنا فشار !!!
حاولت أفوقهم , بس كانوا بينطوا مع بعض وهما متحمسين جدا وبيقولوا :
أحنا فشار ... أحنا فشار !!!
دورت على محسن مالقتوش خالص , أختفى تماما !!!
فضلت أدور على محسن فى الفيلا ،لفيت على الاوض كلها مالقتوش....
بصيت ناحية التلاجه لاقيت حواليها كل الاطباق والادراج اللى كانت جواها !!!
فتحت باب التلاجه لاقيت محسن مفضى التلاجه وقاعد فيها !!!
حاولت أشده وأطلعه من التلاجه بس كان بيترجانى أسيبه وقالى :
سيبنى ياسطى أبوس أيدك .. أنا أيس كريم ولو طلعت من التلاجه هسيح !!!
راسى كان فيها صداع قوى جدا....
فجأه سمعت جرس الباب بيرن , روحت ناحية الباب وبصيت من العين السحريه....
وفوجئت باللى واقف على باب الفيلا ...
سندس !!!
أيه اللى جابها هنا وعرفت مكانى أزاى!!؟
فتحت الباب، وقولتلها وانا مغيبب وبفتح عينى بالعافيه :
سندس !!!
قالتلى :
أزيك ياسيدى؟ !!
قولتلها :
أيه اللى جاب....
حسيت فجأه جسمى بيهبط وأغمى عليا !!!
فتحت عينى لاقيتنى على السرير وسندس جمبى وبتبحلق فيا!!!
فكرت نفسي لسه بهلوس , فركت عينى وقولت لسندس :
أنتى هنا ياسندس فعلا ولا ده تهييس؟ !!
لا ياسيدى مش تهييس , انا هنا!!
عدلت نفسى على السرير وقولتلها :
أصحابى اللى كانوا معايا فين !؟
أصحابك طلعوا عينى على مافوقتهم علشان يشيلوك ويطلعوك على أوضتك ,كبيت عليهم ميه لحد مافاقوا , بس فى واحد دوخنا اوى على ما فاق ,اللى كان فى التلاجه !!
قولتها :
وانتى أزاى جيتى هنا أصلا !؟
قالتلى :
ده علشان أنا بنت حلال وزنانه !! فضلت أزن على معتز باشا واروحله الفيلا كل يوم , لحد مازهق وأدانى عنوانك وأدانى فلوس كمان علشان أجرة السكة بس الفلوس أتسرقت منى فى القطر و طلع عينى على ماوصلتلك !!!
بس أنا مادتش عنوانى لحد و..
قطعت كلامى لما أفتكرت ان معتز باشا فى جهه سياديه عليا وسهل أوى يعرف عنوانى...
قولتلها :
يابنتى وايه اللى جابك !!؟
قالتى :
أنت ياسيدى !!! أنت اللى قولتلى أجيلك !!
قولتلها بأستغراب :
نعم !!!؟
قالتلى :
لما سيبتنى ومشيت أنا مزعلتش منك , ماينفعش أزعل من سيدى , فضلت أيام انادى عليك من بره الكهف وانا مفكراك جوه , بس ماكنتش بترد ...
جوعت فنزلت البلد أشحت أكل وقولت أبقى أرجع أستناك تانى على التبه.
وفوجئت بأهل البلد بيقولوا أنهم شافوك خدت عربيه من الموقف ومشيت من البلد !!
روحت عند التبه وانا بعيط علشان ضيعت منى , ونمت وانا دمعتى على خدى .
جيتلى فى المنام وطبطبت عليا وقولتلى :
أنا محتاجلك ياسندس ..
صحيت من النوم , وجريت فى البلد على بيت معتز باشا وفضلت قدام بيته شهر لحد مازهق منى وأدانى العنوان والفلوس اللى أتسرقت ....
مبقتش عارف أقولها أيه !!! يخربيت الهبل !!!
فقولتلها :
ماشى ياسندس , بس أنتى هتعيشى فين هنا ؟!!
ماينفعش تعيشى معايا فى بيت واحد , عيب أكيد أنتى فاهمه الكلام ده !!؟
قالتى :
لو على نومتى انا هنام فى الشارع قدام الفيلا !!!
قولتلها :
يابنتى أنتى مش فى البلد عشان تنامى فى الشارع , الشارع هنا خطر عليكى !!
قالتلى :
ولو برده , والله لو هيقطعونى شرايح مش هتعتع من قدام الفيلا !!.
طيب دى أقولها أيه دى ؟!!
بصيت عليها لقيت شكلها متبهدل وهدومها متقطعه , شكلها أتمرمطت لحد ماوصلتلى,صعبت عليا أوى ...
قولتلها :
أنتى جعانه يابت ياسندس !!؟
كنت جعانه ولما شوفتك شبعت ...
أبتسمت لما أفتكرت شنطة الاكل اللى خلصناها مع بعض ...
أيه رأيك نضرب بيتزا مع بعض ؟
قالتلى :
معرفهاش ياسيدى !! بس أى حاجه تجود بيها بركه !!
والله ليكى واحشه ياسندس .
طلعت الموبايل من جيبى وكلمت محل بيتزا مشهور وطلبت أربع بيتزات حجم عائلى .
البيتزا وصلت .
وسندس عجبتها البيتزا جدا، وكانت بتاكل بشراهه, شكلها ما أكلتش من أيام !!
فتحتلها التليفزيون تتفرج عليه وهى بتاكل، وسيبتها فى الفيلا وخدت عربيتى وطلعت على مول نضيف أشتريت فساتين حلوه على مقاسها على كام طقم بيتى تنام بيهم , ورجعت تانى على الفيلا.
فتحت الباب وبصيت على سندس اللى نايمه على الكنبه قدام التلفزيون وفى أيديها قطعة بيتزا!!
دخلت بشنط الهدوم والفساتين وحطيتها على الترابيزه وناديت عليها بهدوء علشان ماتتفزعش :
سندس!!
لقيتها فطت برده من مكانها !! ورمت حتة البيتزا اللى فى أيديها ومسحت أيديها فى هدومها وهى بتقول :
أؤمرنى ياسيدى !!
قولتلها :
الامر لله ياسندس , أنا جيبتلك حبة هدوم علشان تغيرى فيهم .
وفتحت شنطه من الشنط وطلعت فستان وقولتها :
أيه رأيك فى ده ؟
لاقيت عينيها غرغرت ونزلت على الارض علشان تبوس رجلى !! فزيحت رجلى بسرعه بعيد عنها
فقالت وهى على الارض:
أنا عمر ماحد أشترالى هدمه , أنت جايبلى ده كله ليا أنا ياسيدى؟ !!
أنا حاسه انى موت ودخلت الجنه .. ربنا مايحرمنى منك ياروحى اللى بتنفس بيها !!
وحاولت تبوس رجلى تانى ,فشيلت رجلى ونزلت أناكمان على الارض
كانت موطيه رأسها , مديت ايدى ورفعت راسها وبصيت على وشها فلاقيت عينيها مش باينه من الدموع ...
قولتلها بحزم :
أياكى تحاولى تبوسى رجلى تانى ياسندس عشان فعلا هزعل منك !!
ومسحت دموعها من على خدها، وقولتلها وانا مبتسم :
يلا أطلعى فوق فى الاوضه اللى فى اول الطرقه , دى هتبقى أوضتك،هتلاقى فيها سرير ودولاب وحمام صغير كمان , خدى شاور وغيرى هدومك وريحى كده ونامى..
علشان بكره الصبح هاخلى أحلى ميك أب أرتست فى مصر , كوافيره يعنى , تيجيلك الفيلا علشان تضبطلك شعرك وتروق عليكى .
لاقيتها هتعيط تانى فقولتلها بنفاذ صبر :
أخلصى ياسندس والا والله أالعنك !!
فخدت الشنط وجريت على فوق وهى طايره من الفرحه !!
تانى يوم الصبح ظبطت مع الميكب أرتست وسيبتها مع سندس وخدت نفسى وطلعت على الكليه ...
دورت على نيللى مالقتهاش , سألت واحده صاحبتها عنها ففاجئتنى وقالتلى أنها كانت هتنتحر أمبارح ,و مكتئبه جدا ومش بتخرج من أوضتها!!
أستدعيت نصير فحضر ,و قالى :
أيه يانينو !! عجبتك تفاحة الجن ؟!دماغ جرباج صح ؟!!
قولتله :
كرباج ايه بس ..منك لله يا شيخ سحولتنا .. المهم قولى هو أنت لسه مخلى نيللى معفنه !؟
قالى :
هو أنت قولتلى فركش؟ أنا مينفعش أفركش من
نفسى !! ...ايه خلاص أفركش ؟!
قولتله :
أنت بتهزر يانصير , طبعا فركش , البنت هتنتحر !! ... ولا أقولك أستنا!!
قالى :
حيرتنى معاك !!؟
قولته :
أصبر ياسيدى ساعتين بالضبط وفركش ...
ماشى يانينو , هتشغلنا أمتى بقى ؟!
قولتله :
أشغلكم أيه !!؟
مانا قولتلك يانينو لو مشغلتناش ,هنشتغل عليك ومفيهاش زعل !! .. ماينفعش تسيبنا كده عواطليه , عايزين شغل زى بتاع البنت المجنونه اللى روحنالها قبل كده ...
قولتله :
أجيبلكم شغل منين زى ده؟ !! , دى مصلحه وخلصت وبعدين أنا مش بتاع جلب الحبيب وشرب الحليب واكل الزبيب ..
فكك منى يانصه دلوقتى , بليل نبقى نقعد ونتكلم فى الحوار ده , أروق بس واشوف أنتوا عايزين أيه !!
قالى :
بشوقك يانينو , ساعتين والبنت بتاعتك هترجع ريحتها طبيعيه .
قولتله :
تشكر يانصه , أخلع أنت بقى .
أنصرف، فخدت عربيتى ورحت الفيلا بتاعة نيللى .
وصلت الفيلا , وفوجئت بكل الامن اللى بره على الفيلا لابسين كمامات علشان الريحه اللى كانت فايحه جدا , كنت شاممها قبل ما أوصل الفيلا !!
طلبت أقابل نيللى , بس بتاع الامن قالى :
نيللى هانم مش بتقابل حد...
قولتله :
قولها بس نور زميلها وهى هتدخلنى !!
بتاع الامن كان رافض يكلمها , بس انا اصريت , كلم نيللى من على البوابه وقالها أنى واقف على باب الفيلا , ردت عليه وهى بتزعق و رفضت تقابلنى , فعليت صوتى علشان تسمعنى من على البوابه وقلتلها :
أنا معايا علاج ليكى يانيللى !!
فقالتله يدخلنى بسرعه...
فتحولى البوابه ودخلت فيلا نيللى الفخمه , كل الخدم الى كانوا فيها كانوا لابسين كمامات.
الريحه كانت صعبه جدا !!
واحده من الخدامات قابلتنى عند باب الفيلا ومشيت بيا ناحية أوضة نيللى , سألتها عن بابا نيللى ومامتها قالتلى وهى قرفانه :
ماطقوش الريحه وقعدوا فى الفيلا التانيه اللى فى اخر الشارع , ووصلتنى أوضتها .
خبطت على الباب ففتحتلى نيللى ودخلت الاوضه
أتفاجأت بنيللى فى حاله يرثى لها , شعرها متنعكش ووشها أصفر وعينيها حمرا من كتر العياط , قالتى وهى بتصرخ فيا :
أيه اللى جابك !!؟ أنت مش شامم ريحتى !!!
لا شامم ... شامم ريحة برفان نيللى اللى بيدوخنى اول ماتعدى من جمبى , مش شامم اللى الناس شامينه , علشان انا مش زى كل الناس ولا عمرى شوفتك زى كل الناس .
قالتلى :
حتى بعد ما كل الناس بعدت عنى ..دا حتى أهلى سابونى ومشيوا لما ماطقوش ريحتى !!
قولتلها :
ولا يفرق معايا يا نيللى , انتى بس اللى تفرقى معايا ..
أمال بعدت عنى ليه !!؟
قولتلها :
علشان جرحتينى يانيللى , أنا كنت واقف وراكى اليوم اللى أتققنا نتقابل فيه فى الكليه وانتى ماشوفتنيش .
سمعتك وأنتى بتتكلمى مع طارق عليا ..
سمعت كل اللى قولتيه وعرفت انك كنت بتسغلينى , وأتصدمت أنك مكنتيش بتحبينى !!
الكلمات تاهت منها ومبقتش عارفه تقول أيه فقالت :
نور ... أنا .. والله .. ماكنش قصدى .. انت فهمت غلط ..
قولتلها :
أنا سامحتك يانيللى خلاص علشان اللى بيحب بجد بيسامح ..
وطلعت من جيبى أزازه كنت معبيها حبة ميه بسكر ومكسبات طعم ,وأديتهالها وانا بقول :
خدى دى يانيللى أشربيها وهتبقى كويسه , دى خلطة من عند عطار شاطر أوى وصديقى قولتله على حالتك , وقالى أن اللى عندك ممكن يكون مرض أسمه متلازمة السمك !!
بصتلى بأستغراب وقالتلى :
متلازمة السمك !!؟
هو مرض نادر شويه , أبقى أبحثى عنه على النت , بيخلى الجسم مايعرفش يكسر حاجه أسمها مركب ثلاثي ميثيل الامين , المركب ده لما الجسم بيعجز أنه يكسره بيخلى ريحة الجسم عامله زى البيض الفاسد أو السمك , فتقريبا أنتى عندك نفس المرض , وعلاجه بسيط أنك متاكليش بيض ولا تشربى لبن كتير وأبعدى عن السمك برده .
وخدى الدوا اللى أدتهولك ده على بوق واحد , هينضف المعده ويطهر الجسم ,وبعد كده التزمى بقائمة الاكل اللى هبعتهالك على الواتس ,ان شاء الله هتبقى زى الفل.
واعتبريها ياستى زى أختبار ,بين ليكى الناس اللى بتحبك بجد والناس اللى بعدوا عنك .. فى الكليه فاكره .. طارق ها.
عينها غرغرت وقالتلى :
أنا أسفه يانور .. انا مش عارفه أقولك أيه .. انا فعلا ماقدرتش حبك ليا وجرحتك وأوعدك لما نرجع لبعض تانى هبقى نيللى تانيه خالص ..هترجعلى تانى صح يانور ؟!
حضرت نفسى علشان أقوم وقولتلها :
لما تقومى بالسلامه يانيللى وتطمنينى عليكى نبقى نقعد ونتكلم تانى , هسيبك انا ومش هوصيكى أشربى الدوا على بوق واحد.
سيبتها ومشيت من الفيلا وركبت عربيتى ورجعت على طريق الفيلا بتاعتى .
وانا فى الطريق تليفونى رن وشوفت أسم نيللى فرديت وأنا مبتسم , أتفاجات بيها بتقولى فى التليفون :
أها ياكلب يامخادع !!!
وقفلت السكه فى وشى !!!
وفوجئت بعربيتين ماشيين ورايا , كل ما أدخل شارع يدخلوا ورايا , فدوست بنزين وجريت بالعربيه علشان أهرب منهم , جريوا ورايا , وفؤجئت بواحده من العربيات خبطت عربيتى من ورا جامد !!
عربيتى لفت على الطريق ,و خبطونى تانى فعربيتى أتقلبت على جنبها .
العربيتين وقفوا جمب عربيتى المقلوبه، وجه واحد بعضلات شدنى من العربيه وطلعنى منها وانا متخرشم ,فجأه سمعت صوت طارق أبن عم نيللى بيضحك وبيقولى :
متلازمة السمك ... هو انت مفكرنا عبط !!
أحنا جبنا قرارك وعرفنا انك ساحر وجدك ساحر وعرفنا كمان أنك علشان تقتل ساحر لازم تقطع رقبته , وشاور على اللى معاه فمسكونى وثبتونى على الارض.
ولقيت طارق ماسك سيف وبيقرب عليا ...
رفع السيف ونزل على رقبتى وقطع راسى !!!
فتحت عينى وانا مفزوع ومسكت رقبتى , فضلت فتره أدرك اللى بيحصل!!
بصيت حواليا لقيتنى لسه قدام الفيلا بتاعة نيللى وما اتحركش بالعربيه !!
سمعت صوت نصير وهو بيقول :
لو مشغلتناش هنشتغل عليك !!
بصيت فى مراية العربيه, لقيته قاعد فى الكرسى اللى ورا و مسخسخ على نفسه من الضحك!!
بصتله وانا مصدوم و كنت لسه بدرك اللى بيحصل قولتله :
هو أيه !!!... انا مش فاهم حاجه .. يعنى نيللى مكلمتنيش !!؟
سخسخ على نفسه من الضحك أكتر وسمعت أصوات تانيه بتضحك معاه قالى وهو بياخد نفسه من الضحك :
بص هو نيللى..
ونام على ضهره ودخل فى نوبة ضحك تانيه فقولتله :
أخلص يانصير فهمنى أيه اللى حصل !؟
قالى وهو بيحاول يتمالك نفسه :
أنت مدورتش العربيه أصلا , احنا أشتغلناك أول ماركبت العربيه . نفس الحوار عملناه مع جدك كان مروح رايق فى يوم وقطعناله دراعه كده وكده ....
ودخل فى وصلة ضحك تانيه ...
قولتله وانا بدور العربيه وراجع بيها الفيلا:
ماشى يا نصير .. أنا هكهربكم لمدة أسبوع متواصل على الحركه دى !!
سمعت اللى معاه بطلوا ضحك وهو كمان وقف ضحك ونسى بوقه مفتوح من الصدمه!!!
شويه وقالى :
:
نينو !!! أحنا بنهزر معاك , مش غشوميه ياصاحبى , أنا ما أذيتكش والعربيه سليمه أهيه بكيسها احنا بنشتغلك بس عشان مفيش شغل وقلتلك مينفعش نقعد عواطلية ...
قولتله :
وانا اجيبلكم شغل منين دلوقتي؟
قالى :
مش بتاعتى دى , أنت لازم على الاقل تجيبلنا شغلانتين فى الاسبوع , وكده أبقى عامل معاك الواجب, جدك كان بيعمل معانا يجى 20 أوردر فى الاسبوع !!!
أوردر !!! .... يانصه ياحبيبى جدى كان ليه صيت والناس كلها كانت عارفاه أنما أنا محدش هنا يعرفنى ,ولا عايزنى أمشى فى الشارع واقول ;
ساحر نضيف ياللى عنده حد ملبوس .. ولا أروح اعمل اعلان في التلفزيون وأقول ...
سكت لما جاتلى فكرة ممكن أجيب بيها ملبوسين , وقولت لنفسى مش هتيجى على مشوارين فى الاسبوع مش هيأثروا على الدراسه وكمان علشان أرضى جدى اللى زعلان منى جدا..
ركنت العربيه على الطريق وطلعت الموبايل , دخلت علي الفيسبوك وعملت اكونت جديد باسم "الشيخ نور ناير" وأشتركت فى كام جروب من اللى مفتوحين.
وكتبت بوست
" الشيخ نور لفك المسحور وعلاج الملبوس من غير فلوس"
التواصل علي الخاص
.
و شيرت البوست على الجروبات
قولت لنصير :
أهو ياعم نصه أنا عملت اللى عليا أهوه , أصبر بقى عليا يومين على ماتفرج بزبون, بس ورحمة جدى لو أشتغلتنى تانى , لأبعت أجيب محول كهربا من اللى بيشغلوا بيها المصانع الكبيره , وده بقى مابيفصلش ومبيتحرقش , والعزم بتاعه شديد ...
واخد بالك يانصه....
قالى وهو مرعوب :
ياعم أنا مش عايز مشاكل , أنا عايز نفضل حبايب يانينو ,هاتلنا شغل وأحنا مانشتغلكش وبالتالى أنت مش هتهكربنا ويبقى كله اتراضى يا عم نينو...
خلاص يانصه يومين زى ماقولتلك , روح أنت دلوقتى وهستدعيك لما حد يرد على البوست ...
قالى :
يومين يانينو متتأخرش علشان بنزهق بسرعه !!!.
ماستناش ردى وأختفى !!
دورت العربيه تانى وطلعت على الفيلا بتاعتى.
وصلت الفيلا وركنت عربيتى.
أول مادخلت من باب الفيلا , لقيت الميكب أرتيست اللى كنت جايبها لسندس قاعده فى وشى ومستنيانى فى الرسيبشن !!
أخخ!!! نسيتها خالص وشكلها لما لاقتنى أتأخرت جابت الزباين بتوعها الفيلا علشان ماضيعش على نفسها أوردرات .
قولت للميكب أرتيست :
أنا أسف والله , أنشغلت جدا ونسيت حضرتك !!
وبصيت على الزبونه الجامده اللى قاعده جمبها وقولتها :
أنا أسف يا أنسه لو أضطريتى تيجى الفيلا , بس فعلا طلعلى حوار أخرنى جدا. ...
الزبونه هزت رأسها فى تفهم .
بس زبونه أيه جامده جدا أجمد من حنوش فى مجده
الميكب أرتيست ,قالتلى بأبتسامه :
عادى ولايهمك أنت كده كده هتدفع زياده علشان التأخير وعلشان ضيعت عليا أوردرات كتيره.....
قولتلها :
ياست الكل ماتشغليش بالك بالفلوس , المهم عملتى أيه مع سندس !!؟ هى فين؟! فوق صح!!؟
قالتلى وهى بتقوم وبتحضر شنطتها :
الحساب 20 ألف جنيه !! , وسندس قدامك أصلا من أول مادخلت !!
فين !!؟
قالتلى وهى بتشاور على الزبونه الجامده :
أهيه حضرتك ...اللى أعتذرتلها من شويه !!!!
فوجئت بالزبونه مطلعه صوت سندس !!! وبتقولى :
أيه رأيك ياسيدى فى اللى عملته الكى كى أرتسيت !!!
فركت عينى وودانى وقولت للميكب ارتيست :
بصى يأما أنتى بتهزرى يااما أنتى قريبة حنوش !!
قالتى وهى مبتسمه :
حنوش !!!على فكره أنا عامله الميكب سيمبل علشان ملامحها رقيقه جدا وبشرتها نقيه ...
فضلت مبحلق فى سندس اللى كانت مكسوفه أوى وحاطه طرف صوباعها فى بوقها وبتبص الناحية التانيه !!
الميكب أرتيست بصتلى وقالتلى بنفاذ صبر :
ممكن أمشى !!؟
أعتذرتلها وجريت على أوضتى جيبت الفلوس واديتهالها وشكرتها على باب الفيلا.
ورجعت تانى لسندس اللى لسه مكسوفه وموديه وشها الناحية التانيه.
كنت ببصلها وأنا مندهش جدا , معقوله سندس حلوه كده فعلا !!!
معقول الجمال ده كان مستخبى ورا العبايه المقطعه والاهمال!!
سندس !!
قالتلى :
أؤمرنى ياسيدى !!
قولتلها :
أيه يابت الحلاوه دى !!؟
قالتلى :
ولا حلاوه ولا حاجه أنتى اللى عينك حلوه ياسيدى .
قولتلها :
يابت قسما بالله , اللى يشوفك يقول عليكى فتاة أرستقراطية .
قالتلى :
يعنى أيه سراطيه ياسيدى , دى حاجه حلوه يعنى؟ !!
قولتها وانا بضحك :
يعنى بنت ملوك ياسندس...
أنكسفت جدا ووشها أحمر زى التفاح وقالتى وعينها بتغرغر :
طول عمرى ماشوفتش حد طبطب عليا غيرك ياسيدى, حتى من قبل ما أشوفك بعينى , أنا كمان لما شوفت نفسى فى المرايا معرفتنيش وفضلت أدعيللك , أنت خلتنى أدخل الجنه قبل ما أموت ياسيدى , ربنا مايحرمنى منك واعيش اللى باقى من عمرى تحت رجلك .
وفوجأت بيها برده بتنزل على رجلى وعاوزه تبوسها , مسكت دراعتها وقومتها وانا بقول :
ليه كده ياسندس مش قولتلك بلاش الحركه دى , وبعدين ياسندس مين قالك أن ليا فضل عليكى , على فكره بقى أنتى اللى وش الخير عليا , من أول ماقابلتك عند حقل الذره والدنيا الحمد لله ماشيه معايا عنب ,وأغتنيت أهوه ببركتك أنتى ياسندس , وبعدين كفايه عياط بقى هتبوظى الميكب , حرام عليكى , أنا دافع فيه تقريبا مايوازى حق تشطيب شقه !!!، ويلاه بينا علشان هاخدك النهارده وأعشيكى فى أحسن وأغلى مطعم فى مصر كلها , أنتى هتتعاملى النهارده كلملكه ياسندس ...
لاقيتها هتعيط قولتلها :
بقولك أيه !! بطلى شغل الموالد ده , أنا عايزك فتاة أرستقراطيه , يعنى كأنك مولوده فى قص...
تليفونى رن وشوفت أسم نيللى على الشاشه ,رديت عليها فقالتلى فى التليفون :
نور أنا مش عارفه أقولك أيه .. انا بحبك أوى .. انا خفيت يانور .. الدوا بتاعك جاب نتيجه , أنا بعشقك يانور وبتمنى نرجع لبعض تانى .
صوتها اتغير وسمعتها بتعيط هى كمان وبتقول :
أنا ندمانه على كل حاجه وحشه عملتها معاك , ومش هسيبك تانى , أرجوك يانور لازم نرجع لبعض , أنا مقدرش أعيش من غيرك .
قلبى كان هيقف من السعاده , نيللى بتترجانى أرجع تانى , أيه أعمل أيه !!؟ صح !!
أنا هتقل عليها برده شويه واعمل نفسى لسه زعلان علشان تفضل تصالحنى وتحاول ترضينى , فيها متعه دى أوى .
وعلى رأى الفنانه أليسا " ع بالي تجرحني لحتى تصالحني
بلمسه حنونه بغمره مجنونه ".
تقلت وقولت لنيللى:
الحمد لله انك بقيتى كويسه يانيللى , بعدين نبقى نتكلم .
بعدين أيه !!؟ أنا خدت عهد على نفسى أول حد أخرج معاه من الفيلا أنت يانور وأنا نفسى أخرج دلوقتى .. ممكن تيجى يانور .. أرجوك يانور .
نيللى أصلى أنا مرتبط بميعاد دلوقتى ومش هينفع ...
قطعت كلامى وقالت وهيا بتعيط :
كده يانور , يبقى أنت ماسمحتنيش زى ماقولت , أرجوك يانور انا محتجاك جمبى , ماتسبنيش زى ما كلهم سابونى .
ضعفت وفوجأت بيا بقولها نص ساعه وأكون عندك!!!
قفلت التليفون وبصيت على سندس اللى كانت بتبحلق فيا .
معلش بقى ياسندس , طلعلى حوار كده فجأه , نعوض الخروجه يوم تانى.
ولا يهمك ياسيدى هو انا كنت أحلم باللى أنا فيه دلوقتى , انا هستناك لما ترجع من بره .
لا أنا احتمال أتاخر , نامى أنتى...
ولا يغمضلى جفن الليله دى , دى أحلى ليله فى عمرى .
قولتلها وانا بمشى من الفيلا :
ربنا يحلى أيامك كلها ياسندس .
روحت الفيلا عند نيللى وكلمتها فى التليفون فخرجت من الفيلا لابسه فستان سواريه شيك و كانت جميله كالعاده , ركبت معايا العربيه وطلعنا على مطعم فخم .
قضيت السهره مع نيللى و فضلت تترجى فيا علشان نرجع لبعض , كنت بضعف أكتر قدامها لحد مامسكت أيدى وباست بطن كفى بحنيه وهو بتترجانى , لاقتنى بقولها :
انا عمرى ماكنت هبعد عنك يانيللى , أنا بحبك يانيللى وعمرى ماهستغنى عنك أبدا.
فرحت جدا وقعدنا نتكلم عن فترة الاجازه وورثى , طبعا ماقولتلهاش أن جدى ساحر قولتلها بس أنه كان ليا ورث أراضى وبعتها
طبعا سألتنى على حنوش فقولتلها انها بنت عمى وكانت عايشه فى فرنسا وانها مش خطيبتى ولاحاجه و جات معايا الكليه زياره قبل ماترجع باريس تانى ..
قضينا سهرتنا ورجعنا لبعض , ووصلتها الفيلا بتاعتها , وفاجأتنى ببوسه على خدى دوختنى !!
ونزلت جرى من العربيه على الفيلا وهو مكسوفه ....
كنت سعيد جدا , ويعتبر كان أسعد يوم فى حياتى .
بس قفل قفله وحشه !!
روحت الفيلا بتاعتى وأنا فرحان لاقيت سندس نايمه على الكنبه , صعبت عليا ومارضتش أصحيها , سيبتها نايمه وطلعت على أوضتى ,ومعرفتش أنام الليله دى
كنت سعيد جدا والفرحه طيرت النوم من عينى .
فتحت الموبايل بتاعى وفوجأت بالبوست بتاع علاج الملبوسين اللي حطيته معدى التلات آلاف لايك !!!
ده غير كمية الكومنتات والرسايل الكتيره جدا وطلبات الصداقه اللى جاتلى !!
يالهوى .... مصر كلها ملبوسه !!!
فوجئت بجرس الفيلا بيرن!! ببص فى الساعه لاقيتها سته الصبح !!
روحت على باب الفيلا وبصيت من العين السحريه فشوفت على الباب ضابط وأربع عساكر !!!
بلعت ريقى وفتحت الباب وقولت بأبتسامه :
صباح الخير .
الضابط ماردش عليا الصباح وقالى بدون مقدمات :
انت الشيخ نور ناير ؟
ركبى خبطت فى بعضها وقولت فى بالى :
اووباااا شكلهم رصدونى وفكرونى دجال ومشعوذ وهروح في حديد .
بلعت ريقي و قولتله :
أكيد حضرتك فاهم غلط انا كنت بهزر بس !!
يعنى أنت الشيخ نور ناير !!
هزيت راسى بالموافقه وانا مرعوب.
فلاقيته بيقول للعساكر اللى معاه هاتوه على البوكس
مسكونى وشدونى بره الفيلا , بس فوجئوا وفوجئت معاهم بسندس بتشدنى من ورا وبتقولهم :
وسع ياراجل منك له ,سيبوا سيدى ناير ليسلط عليكم الجن و يلعنكم!!!
خشى جوه الله يخربيتك , أنتى كده بتسلمينى !!
قالتلى وهى بتضرب فى العساكر :
سلط عليهم الجن ياسيدى ناير !!! وأنفخهم زى مانفخت اهل النجع !!
الضابط كان بيبصلى وشكله ناوى ينفخنى قولتله :
ياباشا دى عيله هبله والله أنا معنديش جن ولا حاجه !!
قال بعصبيه :
هاتوهم الاتنين على البوكس !!
بصيت على سندس لاقيتها فرحانه أنها هتركب معايا البوكس !!
ركبت البوكس وأنا مذهول وبصيت على سندس اللى راكبه جمبى فى البوكس ولاقيتها بتقولى :
ألعنهم ياسيدى .. ألعنهم وأقلب العربيه !!
روحى ياشيخه يلعن أبو معرفتك .. ضيعتى مستقبلى ...
فوجئت بالبوكس بيقف عند فيلا لسه بتتبنى ونزل منه العساكر وجم ينزلونا .
فقلتلهم :
أنتوا مش بوليس أنتوا واخدنا فين !! مش المفروض تاخدونا القسم ؟!!
لاقيت الضابط بيزعق فيا وبيقولى :
أنزل ياله وبلاش لماضه !!
قولتله وانا ماسك ايد سندس:
مش نازل اللى لما أتأكد أنكم بوليس !!
قالى بنفاذ صبر :
وعايز تتأكد أزاى ياروح الحاجه .
قولته:
ورونى كارنيهاتكم ...
طلع الكارنيه بتاعه وكذلك العساكر , وطلعوا بوليس فعلا!!
أتأكدت ياروح الحاجه , أنزل ياض من البوكس !!
نزلت من البوكس وخدت فى أيدى سندس ,ومشيت قدامهم .
دخلونا فيلا لسه على الطوب ...
اول ما دخلت لاقيت واحد لابس بدله وقاعد على كرسى خشب ومدينى ضهره!!
الضابط قاله :
تمام يافندم .. الشيخ نور ناير .
لف بوشه وبان شكله , رجل فى أول الاربعين دقنه محلوقه ومفيهاش شعر,وليه هيبه !!
قال للضابط :
ومين اللى معاه دى !!؟
فردت سندس وقالت :
أنا الدرويشه بتاعة سيدى ناير ولو جيتوا ناحيتنا هيلعنكم كلكم وهيخلى الفيران الكبيره تاكل فيكم , صح ياسيدى ناير !!؟
لطمت على وشى وقولتله :
والله ياباشا دى عيله هبله ودماغها على أدها .
شاور للضباط والعساكر ,وقالهم يستنوا بره الفيلا.
وفضلت أنا وسندس بس ..
عزم عليا بسيجاره فقولتله :
شكرا ياباشا مابدخنش , فولع سيجاره وقال:
انت بقي اللي عامل بوست وبتقول فيه أنك بتعالج الملبوس من غير فلوس.؟!!
قولت لنفسى :
أوبا انا كدا لبست رسمى ,منك لله يا نصير عايز تشتغل يخويا ادينا هنشتغل احنا الاتنين بنكسر حجر في السجن.
قلتله وانا متردد :
ايوا بس..
قطع كلامى و أتصدمت بيه بيقول:
انا جبتك هنا عشان تساعدني انا شفت البوست اللي نزلته امبارح علي جروب وجبت عنوانك من مباحث الانترنت !!
خدت نفسى وحسيت ان روحى رجعتلى، وقلتله :
نشفت ريقى ياباشا ماتقول كده من الاول !! ايه المشكله اللي عند حضرتك ؟!
بص على سندس فحسيت انه محرج...
قولت لسندس :
أستنينى بره ياسندس .
رفضت تماما , وفضلت أزقها لحد ماطلعتها بالعافيه من الفيلا ورجعت تانى وقولتله :
أتفضل ياباشا ماتتكسفش , أول طريق العلاج من المرض الاعتراف بيه .
قالى على طول :
انا مربوط بقالي سنتين مش عارف اقرب من مراتى، لفيت على دكاترة كتير قالولى معندكش حاجة وصحتك زى الفل وان الموضوع ممكن يكون نفسي، رحت لدكاترة نفسيين قالولي انت زى الفل , رحت لكذا شيخ وكلهم بيطلعوا دجالين ومشعوذين.
معرفوش يعالجونى وقبضت عليهم كلهم !!!!
اتمنى تطلع شيخ بجد وتعرف تعالجنى...
قلتله وانا ببلع ريقى :
قبضت عليهم كلهم !!
كلهم !!
متقلقش يا باشا انت جيت للشخص الصح وربنا يستر.
استأذنك بس لو فيه حنفية ميه هنا علشان هحتاج أتوضى الأول
.
شاورلى على حنفية ميه فروحت أتوضيت، ووقفت فى نص الاوضه اللى أحنا فيها وصرفت العمار واستدعيت نصير وللي شكله كان نايم! !!
قلتله بهمس:
بقولك أيه صحصح كده , جبتلك شغل , بس عليا النعمه يانصير لو طلعت فستك لانفخك علشان انا هتنفخ.. فاهم ؟!!
قالى وهو بيتاوب :
الكلام على أيه !!؟
قولتله وانا بشاورله بعينى :
الباشا مربوط واللى مبيعرفش يفكه بيقبض عليه !!!... واخد بالك يانصير .. بيروح فى حديد ... صحصح أبوس أيدك .
قالي :
عيب عليك يا نينو , ده أحنا كل الجن عارفينه !!
ولقيته أختفى !!
بصيت للراجل وقولتله وانا مبتسم :
ثانيه واحده ياباشا وهتبقى زى الفل !!
أتفاجأت بالرجل وقع على الارض ولقيته بيتنفض
وبدء يتكلم بصوت واحدة ست وفضلت تزعق وتقول:
مش هسيبه انا بحبــــــــــــــــــه مش هطلــــــــــــــــــع!!!
ناديت على نصير بقلق وقلتله:
ايه يا نصير دا ايه اللي بيحصل؟!!
جنيه عاشقة لابسه الراجل وحالفه ما تطلع !!
علت صوتها وقالت:
مش هسيب مصطفي انا بحبك يا مصطفي!!!
كلمتها وقولتلها :
عيب ياست انتى اللى بتعمليه ده !! الراجل متجوز وأنتى كده موقفه حاله , أطلعى ياوليه والا هحرقك .
لقيتها بترد عليا وبتقول:
بحبه مش هسيبه احرقونى عذبونى مش هسيبووه!!!
قلتلها :
انتى اسمك ايه يا شاطرة؟!!
أسمى عاشقه مصطفى .....مش هسيبك يا مصطفى !!
قلتلها :
عايزة ايه فى الاخر من مصطفى !!
هتجوزه وهخليه يطلق مراته القردة ويتجوزنى واخده معايا !!
ناديت على نصير وقولتله :
فيه أيه يانصير ماتلموا حريمكم ياعم !!! , وأيه اللى أخرك كده !!!
يانصه مابتردش عليا ليه !!؟
قالى :
ثوانى يانور , الجن العاشق بيبقى صعب أوى , ومتعطلنيش ياعم أقعد أهرى معاها فى أى حاجه على ما أجيب قرارها
قولتله :
أقول أيه يعنى؟ !!
مردش عليا !!
فقولتلها :
يابنتى عيب اللى بتعمليه ده الراجل متجوز وشكله وحش قدام مراته , بالك لو شاب وسنجل كنت أتعاطفت معاكى , وكنت أقنعته يتجوزك فى الحلال كمان , أصلى جواز البنى أدمين من بعض بقى غالى اليومين دول .
لقيت مصطفى بيطلع صوت حيوانات , وقعد يهوهو وينونو وبعدين رجع صوت الجنيه تانى وهى بتقول :
مصطفى مبحبش غير مصطفي مش هطلع .
و بعدها صرخت وهى بتقول لاااا سيبنى انا بحبه مش همشيييي.
و بعدها سمعت صوته حشرج و أختفى خالص .
لقيت نصير رجع وبيقول :
خلاص يا نينو !! شويه والراجل هيفوق.
قلتله :
أنا مش فاهم حاجه !! ايه اللي حصل؟!!
عرفت العشيرة بتاعتها ورحت جيبتلها اخوها جرجها من شعرها وهيحبسها في البيت، وهددته وخدت عليه العهد انها لو رجعت تانى هخليك تحرقها ومش هيبقى ليها ديه.
ما كنت قلتلى احرقها ازاي وخلصنا ،افرض رجعت تانى اروح في داهية!!!
انت مفترى وغشيم كدا ليه يا عم ؟!! مينفعش تحرقها كدا علي طول.
الجن لما بيلبس البنى آدم مفروض بتحذره وتاخد عليه العهد انه ميرجعش 3 مرات اول مرة لو رجع تفكره بالعهد وكذلك التانيه والمرة الثالثه بقي لو رجع ،حقك ساعتها تحرقه من غير ما يبقي ليه ديه.
إنما لو حرقته علي طول كدا اهله وعشيرته هيأذوا المريض وأهله كمان عشان ينتقموا!!!
امممم طيب ربنا يستر واخوها يعرف يشكمها.
أوعى تقول للراجل لما يفوق على أى حاجه من اللى حصلت ,
خليك ناصح وماتقولش كل حاجه !!!
شويه ولقيت الراجل فتح عينه وفاق قالي وهو مستغرب :
ايه دا أيه اللى حصل ؟!!
قلتله:
حصل خير ياباشا انت كدا خلاص بقيت تمام يا مصطفي بيه.
قالي بأستغراب:
انت عرفت أسمى ازاي!!؟
حطيت أيدى على بوقى، علشان أسكت لسانى اللى هيودينى فى داهيه
و بعدها قلتله :
عادى ياباشا مانا بتاع جن وكده ... تقدر حضرتك تروح البيت ولا مؤاخذه أنت هتعرف لوحدك ان كل حاجة بقت تمام...
اوكى هنشوف.
أستأذن أنا بقى ياباشا !!
لا طبعا , أنت هتفضل هنا لحد ماأروح البيت وأطمن على نفسى الاول, لوصدقت هتروح، ولو طلعت دجال , هتطلع من هنا على السجن !!
وسابنى ومشى.
قولتله وهو ماشى :
ان شاء الله خير ياباشا و هتدعيلى , متقلقش .
شويه ولاقيتهم دخلوا البنت سندس قعدت جمبى واستنينا مصطفى يرد علينا ويقولنا أن الدنيا تمام.
فضلنا قاعدين يجى عشر ساعات فى الفيلا اللى على الطوب
كل شويه كنت بطلع أسأل الضابط اللى حابسنا فى الفيلا هنروح امتى ، بس مكانش بيرد عليا وساعات كان بيزعقلى !!!
الضابط كان رخم جدا !! لدرجة أنه كان بيرخم على أخته فى التليفون ، كان بيقولها :
على جثتى يا " مى" تدخلى كلية أعلام ... صحافة أيه اللى عايزه تشتغلي فيها ... أنا اخوكى الكبير واعرف أكتر منك وهتدخلى كلية سياسه !!!!
فضلنا مستنين والضابط برده كان مرخم ومارضاش حتى يتصل بالباشا ويسأله لو ينفع نمشى ولا لأ
لحد الحمد لله مالقيت مصطفى باشا جه بنفسه و داخل عليا وكان وشه مبتسم , وخدنى بالحضن وفضل يبوس فيا , وطلع روزمة فلوس وحاول يدهالى :
قولتله مابخدش فلوس فى الخير ياباشا , عايز اروح بس .
وصلونا بالبوكس لحد الفيلا !! كان يوم غريب جدا !!!
بس مش أغرب من اليوم اللى كان فيه عيد ميلاد نيللى!!!!!
أغرب وأصعب يوم فى حياتى !!!!