Ads by Google X

القائمة الرئيسية

الصفحات

رواية هي والعصابه الفصل الثالث

رواية هي والعصابه الفصل الثالث


 رواية هي والعصابه

الفصل الثالث 

بقلم ياسمين علاء الدين





سبحان الله وبحمده... 


  نور قاعده قدام الكلب ومش عارفه تعمل ايه كل اما تتحرك يقف قدامها .. 


نور. : انت فاكر نفسك ايه يا بتاع انت .  انا ميهمنيش كلب وله مش كلب 


هوهو الكلب عليها بصوت عالي 


نور : مبدهاش بقي.  هتعضني هاخد الحقنه  ،بس لازم اخرج من هنا . مش علي آخر الزمن كلب يمشي عليا .  انا نور علي سن ورمح


وقفت عشان تتحرك وهو قرب منها اوي .  


نور انكمشت في نفسها بخوف  :ده انا بهزر .  اصلي دمي خفيف بعيد عنك ...  انا اصلا بوء ..  هقعد تاني ومنه لله اللي كان السبب  .  ياكش تقع عليك حيطه يا بعيد وانا جاي .. الهي تتشك في معاميك . الهي وانتي جاي يقع عليك لوح ازاز 


حكت أيدها علي خدها وهي بتبتص علي الكلب اللي مدد في الأرض قدمها .  فضلت مراقباه عشان ينام يمكن تعرف تهرب من الشباك 


غمض الكلب عينه وقفت واتسحبت ولسه  بترفع رجليها عشان تخرج من  الشباك  الكلب هوهو عليها وجري ناحيتها .. 


مسكت المخده : اهدي يا استاذ كلب ده انا كنت بقفل الشباك عشان متستهوش.  وله عايز تاخد برد 


هوهو عليها مره  تانيه لتنفخ : هقعد مكاني.  حاضر 


بعد  ساعات طويله ... 


دخل جاد البيت كانت نور نايمه علي الكنبه ..  ربت علي رأس الكلب : شاطر يا عنتر .  يلا ادخل كل في اوضتك .. 


دخل عنتر الاوضه بطاعه 


..  ووقف جاد بصوت عالي يزعق عشان نور تصحي 


  جاد : بتنتتتت، قومي  .  . نايمه كده ليه. 


فتحت نور عينيها : في حد يصحي حد كده .  واصلا مش من حقك تحبسني كده.   انا مش عايزه اشتغل عندك 


حط أيده في جيبه :   خير تعمل شر تلقي اما صحيح ناقصات عقل ودين 


صكت نور علي أسنانها: بقولك ايه يا اسمك ايه انت. الستات اللي  بتقول عليهم مش عاجبينك دول طلعو الفضاء وبيشتغلو في كل حاجه.   ملكه انجلترا دي ست .  احنا بنعمل حاجات الرجاله متعرفش تعملها 


جاد : كلامك زي المتعلمين بتوع المدارس .  مش قولتي كنت بتشتغلي في البيوت وله بتكذبي  .  حكايتك ايه يا بت مش مرتاحلك 


نور : انا قولتلك حكايتي قبل كده . هي اغنيه كل شويه هغنيها    ، الشغاله كمان من حقها تتعلم . انا بعرف افك الخط وكمان بسمع تلافظيون 


جاد : تلافظيون .  .. قولتيلي  


نور لاحظت أن جاد ذكي وممكن يكشفها  : بقولك ايه يا جدع انت .  انا مش  عايزه اشتغل هنا .  خلاص مش هشتغل في بيوت تاني حرمت بعد اخر مره .  سبني اكل عيش بعيد 


جاد : انا محدش يمشي عليا كلمته ..  انا اللي اقول تروحي فين وتيجي منين .. وانا كبير الحاره هنا 


نور :   يعني ايه .هفضل تحت رحمتك 


تجمعت الدموع في عينها وجلست تندب 


جاد : بلاش ندب يا هبابه ، اترزعي هنا للصبح و هشوفلك اوضه  تقعدي فيها .  وابقي اشوفلك حاجه تأكلي منها عيش 


نور. : قشطه يا سيد المعلمين.  اهو كده الكلام

جاد : مش مرتاحلك يا بت انتي 


نور : يووه وهو انا عملتلك حاجه يا خويا.  والنبي ما عملت . عملت


جاد نفخ : اوووف.  اسكتي شويه وبلاش لت وعك

نور :لا مواخذه في الكلمه  اسمها عجن  يا خويا 


جاد بقرف : اخرسي وخلاص . قومي اعملي اي لقمه 


نور.: ها 

جاد : هو ايه اللي ها . اعمليلي طفح


نور : يا داهيه دقي . مبعرفش 


جاد : نعم يا روح امك . متعرفيش ايه يابت امال ازاي شغاله عند ناس 


نور : اصل . انا بص،  انا بص


جاد : أبص علي ايه 


نور : قله ادب مش عايزه . انت فاكر نفسك جوزي . ايه قومي اعمليلي اكل دي . انا بعترض .  مش عبده ليك .


لسه هتمشي مسكها من هدومها زي الحراميه : قولتيلي اسمك ايه 


نور :اتكلم باسلوب حضاري احسن  من كده  


جاد : بت انتي انا مش مرتحلك


نور : اوعي يا عم كنت بهزر معاك . ده انا بعمل الاكل بصوباع رجلي الصغير


جاد : ابو قرفك .


نور. : لا مش قصدي . قصدي ان الاكل ده لعبتي يا استاذ جاد 


جاد : طيب غوري علي المطبخ 


نور : لامؤاخذه في السؤال . قولي فين المطبخ ينوبك ثواب 


جاد : قدامك علي اليمين 


نور :  ماشي  مش تزق 


دخلت نور المطبخ وهي بتلطم اخر معلوماتها عن الأكل أن البيض بيتحط علي المايه ملح وهو بيغلي 


نور : اعمل ايه في المصيبه دي . يادي اليوم الاسود مش هيعدي علي خير .. انا مني لله .. عايزه اضرب نفسي بالجزمه عشان مسمعتش كلام لوزه يا اما اتحيلت عليا اتعلم الاكل وانا قال ايه عامله فيها الناصحه واقولها هتجوز واحد يجبلي خدامه ..  وقعت في شر أعمالي .  


وقفت بتفكر هتعمل ايه.   تفتح النت وتطلع وصفه سهله تعمل من علي اليوتيوب  بس جاد هنا في الشقه وممكن يشوفها 


قاعده تفكر في حل تاني.   الوقت متاخر  ولازم تفكر في حل  


نور : الوقت متاخر ومفيش غير حل واحد .  هو بيض ولانشون وجبنه وشاي بلبن عشان يكون في أصناف كتير . يا سلام لو في اندومي كنت طبخت كل انواعه .. عفارم عليكي يا نور . يلا ورينا الشغل


جاد غير هدومه وقاعد في أوضته منتظر نور تخلص عشان ياكل 


  خبطت نور علي الباب : انا خلصت الاكل .


خرج جاد :   ماشي 


نور : بص هبهرك .  غمض عينك عشان المفاجاه


جاد : ربنا يستر .


نور: تا تا فتح عينك 


جاد : ايه ده  .  انتي بتسهتبلي 

نور: ده عشاء . الساعه ١٢ بليل هتاكل ايه في الوقت ده .  هو ده العشاء عشان ميطلعش كرش 


جاد : ده انا اللي هطلعلك كرش في نفوخك .   انا مبكلش اكل العيانين ده .  


نور: ده اكل الناس الطبيعيه .  انت اللي مش عارف 


جاد : شيلي الاكل ده.  اعمليلي محشي وله فته ولحمه


نور: انت بتهزر .  محشي ايه اللي يتاكل دلوقتي .   هناك فته ولحمه بليل 


جاد : انا باكل كده يا نانوسه 


نور: شفلك غيري . خلاص وقت العمل بتاعي راح.  اوعي انا مش هنام هنا.   انا هروح لعم محروس 


جاد : عم محروس . روحي خلي الواد بندق يعمل معاكي الصح . عشان تتلمي . وهو اصلا واد مسطول  ومش هيحس بنفسه مش بعيد  كمان يقتلك 


نور : ها ..   تفتكر 


قعد جاد علي السفره وبدأ ياكل :  يوووه ده ممكن يقطع جسمك حتت صغيره  او يبيع اعضائك مثلا 


نور :  لااااع . كله الا اعضائي 


جاد : اقعدي ساكته بقي . والصباح رباح اشوفك اي داهيه تقعدي فيها 


نور : شكرا ياسيد المعلمين . ايه رايك في الاكل 


جاد :  علي اساس انتي اللي عملتي الاكل .. دي حاجات في التلاجه


نور : بس انا اللي جبتهم من التلاجه وحطتهم في الأطباق وكمان عملت شاي بلبن إنما ايه زي الفل 


جاد : انا باكل بس عشان جعان .  بس بكره تعمليلي المحشي   وكوارع


نور : مين 

جاد : كوارع ايه مسمعتيش عنها 


نور : لا لا . مليش انا في الكوارع .  مش بطيق ريحتها 


جاد : وانا مالي . اعملي اللي قولتلك عليه


نور : مش هعمل كوارع . انا مش بحبها وله عمري حبها ومستحيل اعملها. وبعدين أنا اصلا مش هقعد في البيت ده .  وله هقعد في الحاره دي تاني .. شوفلم حد غيري يعملك اللي بتاكله ده 


جاد : طيب عند فيكي هتعملي كوارع وممبار وفشه وكرشه


نور فتحت بوقها : علي جثتي.  فاهم يعني ايه 


جاد :  اتفقنا .  عنتررررر


خرج عنتر يجري  ووقف جنب جاد .. 


نور : انت هتعمل ايه  .. وبتنادي ده ليه 


جاد : عشان ياكلك مش قولتي علي جثتي 


تجمدت نور مكانها وهي بتبص لجاد بصدمه وحاسه أن دماغها بتلف 


نور : ءءء.  انت هتدخل الكلب ما بينا ليه 


هو الكلب .. نور : انا اللي كلبه يا عنتر وله تزعل 


قهق جاد عليها وهو يحشر الطعام في فمه باستمتاع من شكلها وهي بتترعش. 


نور : لو سمحت ممكن تدخل عنتر ونتكلم انسان لانسانه 


جاد : ادخل يا عنتر اما اشوف اخرتها مع الست كخه دي . 


دخل عنتر الي الغرفه بطاعه .. نور : اسمي نور مش كخه


جاد : انا استحملتك كتير وده عكس طبعي . متزوديش الكلام عشان ما اخليش عنتر ياكلك بأسنانه 


نور : احم .   حضرتك انا متكلمتش .. 


جاد : شاطره .  


وقف وهو ماسك كوبايه الشاي بلبن وبيشربها باستمتاع  :  اتعشي ولمي الاكل ونضفي الشقه ونامي في الاوضه لحد دي . مفيهاش حد 


نور  بصوت منخفض :  ضربه في قلبك ، راجل مستبد فاكر نفسه سي سيد وانا امينه اللي هتضربها السوارس 


كشر جاد : بتقولي حاجه

نور : ببرطم في الكلام . مبرطمش 


جاد : لا متبرطميش افردي وش اهلك واقفلي بوقك ده 


نور : حاتشر  


... دخل جاد الغرفه وهي حطت الاكل في التراجع وقاعدت تفكر في حل  . 


نور : مستحيل اعمل انا كوارع . مستحيل 




                                الفصل الرابع من هنا


تعليقات