رواية تركة أثر
بقلم نهى الحفناوي
"الفصل الأول"
أمى الله يرحمها دايما كانت بتقولى" خليكِ البنت الى يتمناها أى حد فى حياتة
كونى الصاحبة الجدعة والزوجة الهادية الأصيلة الى يتمناها أى واحد وخليكى حضن الأمان لأى حد، ولازم تسيبى أثر فى حياة كل الى تعرفيه، إحنا جاين الدنيا فترة وهنروح نكمل حياتنا فوق عند ربنا مش مستاهلة تشيلى من حد، فقضى الفترة الى هتعيشى فيها بسلام، فلازم تسيبى أثر حلو فى حياة كل الى تعرفية وخليك دايما مع ربنا "
أنا إسمى أخلاق بس بيقولولى خوخا إسمى مش غريب زى ماالناس مستغربة، ولا من قلة الأسامى، بس كل الحكاية إن أمى قالت إنها سمتنى أخلاق علشان كل ماافتكر إسمى أحترمة، واضح كدا إنها كان عندها بعد نظر وكانت عارفة إنى هطول لسانى على أى حد يجى عليا بس طبعا فى الحق ، بس بحاول أمسكة، بحب الهزار والضحك وبقلش على أى حاجة وسعات بتنمر عارفة انة غلط بس بحاااول أتوب وعلى فكرة انا مش علشان بهزر وأضحك ابقى تافة لا بالعكس انا عاقلة جدا بس مبحبش ابدا أظهر حزنى ولا وجعى لحد رغم ان جوايا بركان،بس مبحبش أبين وبخبى كل دا بالهزار والقلش، حلم حياتى إن المطعم بتاع امى الله يرحمها يكون أكبر واحسن مطعم فى اسكندرية كلها وعندى يقين انى هوصل لحلمى
حكايتى بدأت من أول يوم أمى ماتت فية، وسابتنى أنا وأخويا وأبويا سعتها شيلت مسؤلية مكنتش أدها، بس مع الوقت عرفت ان لازم اتغير والبنت الى أحلامها انها تلبس وتخرج وتعيش حياتها، اتحولت لست بيت لازم تاخد بالها من أخوها وعمها الأخرس الى ساب كل حياتة علشان يربى عيال أخوة الى مات من قهرتة على مراتة، ابويا كان بيحب أمى أوى لدرجة من زعلة عليها مات على طول بعدها بسنة، وسابنى انا وأخويا الصغير وعمى، ، عمى الله يكرمة عمرة محسسنى بأى حاجة كان شايل مسؤليتنا،اه مكنش بيعرف يتكلم، بس حنيته عليا أنا وأخويا كانت عندنا أحسن من ميت كلمة ،هو الركن الهادى والحضن الحنين، وكل حاجة حلوة، بيطبخلنا ويكنس،ويشتغل وبيصرف علينا، وعمره محسسنا ان احنا عبء عليه، ودايما معانا، كان لينا ام وأب وكل حاجة، وكأنه هو عوض ربنا لينا، دا انا سعات بحس ان ابويا لو كان عايش مكنش هيحبنا كدا زى عمى محمود مبيحبنا
ليا اتنين صحاب، منة وأيات، منة إنسانة هادية ورقيقة ممكن يكون الحظ مش واقف معاها، بس انا دايما بقولها ان أى حد سابها هو الى خسران، أهلها غصبوا عليها تتجوز واحد هى أصلا مرتحتش معاه، كان بيغير وبيشتم وهى كانت أطيب من إنها تاخد حد مبتحبهوش وكرها فى حياتها كلها ضحك عليهم وعرفهم انه بيصلى ومبيسبش الجامع ورسم عليهم الدور وانه هيسافر ومعاه فلوس،وبعد الجواز طلع كداب،واطلقت منه بس بعد معقدها فى حياتها كلها، طبعا النصيب، وأهلها الى اعتقدوا إنها بتحب حد وهتعرهم وقالوا لازم يجوزوها،
منة مغلطتش لما حبت، بس كل الحكاية ان زياد كان زميلنا فى الكلية كان اكبر مننا بتلت سنين، وزية زى أى شاب محتاج لسة يبدأ من الأول عمرى مشفت حد بيحب بالطريقة دى كان بيخاف عليها ودايما محافظ عليها وعمره مخلى حد يجيب سيرتها، بس كان محتاج وقت علشان يجهز نفسة، ويجى يتقدم ،بس طبعا لما أهلها عرفوا معجبهومش الوضع قالوا لا هتعنس والجو دا وان زياد لسة قدامه كتير ، وهو طبعا مستحملش انها اتجوزت حد غيرة،سافر دلوقت ومحدش عارف حاجة عنه بس أهلها دلوقت ندمانين لما شافوا بنتهم الوحيدة اتبهدلت كدة، بس طبعا الحسنة الوحيدة الى طلعت بيها من الجوازة دى زين ابنها عمره سنة ونص بس حتته من الجنة، البراءة وكل الراحة النفسية لما بنبص فى وشة،
اما صاحبتى التانية هى أيات الست أيات طبعا دماغ فى نفسها كدا، حد روش، بتعشق الضحك والهزار،، وسنجل وبائسة زى بس الفرق انها هتموت وتجوز، وكل يومين يجى عريس وتقعد معاه وميعجبهاش وتقعد تتريق علية، ومبترحمش نفسها، تقريبا هتدخل موسوعة جينس فى اكتر بنت بتقعد مع عرسان ومبيعجبهاش حد، وشكلها فى الأخر هتتخطب ليوسف جارها الى هى مبتسطلفهوش وبتقول مستحيل،وشكلها كدا هتحقق المستحيل
البنتين دول هما الكنز الى طلعت بيه من الدنيا معنديش اخوات بنات بس دول هما اخواتى وصحابى وكل حاجة ليا،احنا التلاتة شخصياتنا مختلفة عن بعض وقليل لما نتفق على حاجة بس الحاجه المشتركة بينا اننا بنحب البحر هو فى حد طبعا يكرة بحر اسكندرية،اه صحيح نسيت أقولكوا ان إحنا اسكندرانية،أيووووه ياجدع ،وبنقول على الجنية،جنى وبنقول أحيه الى بتوع مصر دايما بيستغربوها، والمرسى ابو العباس، احنا اسكندرانية ونتحب
دى ملخص بسيط لحياتى وانا خلاص قررت أكتب مذاكراتى علشان لما أموت أسيبهم مش عارفة هلاقى حد مهتم بقرأ ولا لا بس حبيت أكتب
*أخلاق قعدة سرحانة وبتكتب مذاكرتها وبصة على البحر وبتلعب بعصاية فى الرمل
وأيات ومنة جاين من وراها براحة علشان يُخضوها *
أيات:اية دا قررتى تكتبى مذاكراتك،ولا ايه ياعم طة حسين
أخلاق: لا بكتب وصيتى ولو مسكتش هضربك بالرصاص واحرمك من الميراث، يا أيات وبعدين مش تتندهى شايفانى سرحانة وعميقة فى نفسى كدا
أيات: ماشى يا ست العميكة *أيات بتقولها بتريقة*
_اتريقى اتريقى، المهم عملتى اية مع العريس بتاع إمبارح اقعدوا اقعدوا
منة: هى أيات بتعمل حاجة فى حياتها غير انها هتموت وتتجوز وفى الأخر مبيعجبوهاش وتكسفهم وتمشيهم
أخلاق: احكيلنا ياست ايشوارى راى عملتى ايه
أيات متفكرونيش بالى جرا مترجعونيش تانى ورااااا ،
أخلاق: انت هتغنى ماتخلصى عملتى اية
البية ألدغ واسمة ثامح وبيقولى ازيك يا أنثة ،طبعا انت متعرفنيش،قولتله أه ،قالى طب إثمك إية يا أنثة أيات،فاكر نفسه بيستظرف بروح أمة، المهم بيقولى أنا مش عاوزك تكونى زى بنات جيلك ويكون ليكى حثاب على الفيثيوك،
_أخلاق: اومال لوعرف ان ليكى انستا وتويتر كان مضاكى على تعهد انك متمسكيش تليفون
منة واخلاق هيموتوا على روحهم من الضحك
أيات:استنوا بس أما أكملكوا انتوا لسة شوفتوا ضحك، وبعدين بيقولى أنا عندى ثيدلية وبشتغل دكتور فى المستشفى، والثيدليةهتشتغلى فيها معايا وهنكَون نفسنا،وانا كل الى عملاة متنحة ومستنية أشوف هيعمل إيه للأخر وبعدين،بابا دخل قعد يشوفنا وكدا،والدكتور المحترم بيقول لبابا هو انتوا ياعمى عندكوا ثوابق فى عيلتكوا أصل عاوزة أدخل ولادى انشاءالله شرطة، بابا قالوا لا يابنى وبعدين امى ندهت لأبويا علشان يسبنا مع بعض،
الأقى البية بيقولى تفتكرى هنقعد مع بعض كام ثنة، فا أنا قولتلة إية التفاؤل دا إحنا أساسا مش هنقعد مع بعض تانى وسبتة ومشيت
منة: الله يخربيت كدا، دا انتى طيرتى جبهت الراجل خالص،
أيات:اسكتى يامنة دى أشكال مايعلم بيها إلا ربنا
أخلاق مش قادرة تمسك روحها من الضحك وبتقولها،بش انت مش قولتلنا ان العريس اسمة عبدالله
أيات:لا يابت دا الى قبلة،ما انا قولتلكوا بس انتوا طبعا بتنسوا بس دا طفشتة بردو خالي الى كان جايبهولى شغال معاه فى المكتب وبيقولة انه عند أرض وكدا وبيدور على عروسة فخالى الله يسامحة جبهولى، انا قولت مش مشكلة لو حلو خلاص أعيش معاة فى البلد،الريف الريف مش مشكلة بدل كويس خلاص الاقى الأستاذ داخل معاه أمه، وامه بتقوله يابودى الشاى سخن سيبه يبرد الأول وانا أمى سيبانى أشرب عادى شوفت كدا ومقدرتش أمسك نفسى من الضحك،وهو استغرب وبيقولى بتضحكى على إيه، كنت عاوزة أقولة على خيبتك بس قولتله مفيش افتكرت حاجة كدا، وامى وامه،طلعوا وسابونا علشان نتكلم شوية نتعرف على بعض وكدا وياريتهم يا أخلاق يا ختى ماسبونا، الاقيه بسلامتة
بيقولى بتعرفى تربى فراخ، بصيتله بإستغراب وقولتله لا، قال ولا حتى كتكوت صغير، المعفن كان عاوز يفتح مشروع فراخ على قفايا وصحتى
قولتلة لا، وبعدين يقولى بتعرفى تحلبى علشان مرات أخويا جموسة وانت جموسة
والله مكان حد جموسة غيره،قال ايه انا هحلب جاموسة ومرات أخوة جاموسة
كنت عاوزة أديلة بالجزمة بس احترمت انه فى بيتنا ولما حس ان مش طيقاة قالى بكل برود إية هى موصفات فتى أحلامك، قولتلة بصراحة أى موصفات غيرك
وبعدين حبيب ماما نده على أمه ومشى، غار فى داهية
أخلاق:تصدقى بالله انا هموت من كتر الضحك عل عرسانك بجد ايه دا ياشيخة ارحمى بقى انت مستعجلة على الجواز كدا ليه، اهدى يامنار ها اهدى يامنااار
أيات: اسكتى يابت
منة: اصبر الصبر حلو أحسن متقعى فى حد وتبقى زى،
أيات:لا ياختى بعد الشر، مش قصدى يامنة بش انا عاوزة أتجوز، زالبس الفستان الأبيض بقى،واقول حطتشبى راح،خطتشبى جة
أخلاق: يا أيات الحياة مش كدا،لازم الى تختارية تكونى مقتنعة بية،مش علشان،خايفة انك تكبرى وانه يروح عليكى يبقى أى عريس والسلام ، لازم الى هتكملى معاة حياتك يكون شخص بيتقى ربنا، شخص يعرف قيمتك يكون ليكى اخ واب وزوج وكل حاجة يكون ركن الأمان وقت الخوف، يكون بيحبك انت،مش علشان عاوز يجوز وخلاص،وبتد كدا يسيبك ويكرهك فى حياتك وتكرهييه، دورى على الى شبهك مش
المهم يكون عندة شقة ويعرف يجيب شبكة وخلاص ،لا لازم يكون انسان عنده طموح يكون يخاف ربنا وويتقيه،يعرف ان بنات الناس مش لعبة وانه لازم يحافظ عليكى ويخاف ربنا فيكى.
أيات: تفتكرى حد كدا، دا انا هفضل سنين ضوئية أدور علية
أخلاق: طول ماانت موجودة هو كمان موجود وفى يوم هتلاقية بس متستعجليش
الإستعجال بيخلينا نخسر كتير أوى علشان حجات مش هتدوم فى مقابل لو صبرنا بس شوية هنلاقى كل حاجة حلوة
منة:ياااة الوقت اتأخر أوى زمان زين صحى دلوقت ومبهدلهم فى البيت يلا أنا همشى
، إستنى خدينا معاكى، احنا كمان اتأخرنا
*البنات ماشين مبسوطين وبيغنوا البحر سمكة بتزق سمكة،على الشط واقف صياد بشبكة، ووصلوا العمارة بتاعت أخلاق لاقوا خناق وزعيق*
أخلاق: أحيه مينا مهبب القطرين تانى
أيات مينا مهبب القطرين جاركوا بيتخانق تانى، تصدقى يا أخلاق انا شكلى هتوب على إيد مينا ومريم جيرانكوا دول ومش هقعد مع عرسان تانى
أيات:أنا همشى أنا يا أخلاق واطلعى انتوا فضوا المعركة الكلابية بتاعت كل يوم،احسن انا قلبى وجعنى منهم ودماغى لسة مخفتش من أخر كوباية اتحدفت بيها وزين زمانة صحى
أيات: خدنى معاكى يامنة استنى احسن فى عريس ممكن يجى، وبالسلامة انت ياخوخا وابقى سلميلى على الشهدا الى معاك
أخلاق: لا أصيل يابو رحاااب
*أخلاق طلعت وطبعا مينا ومريم زى كل مرة ماسكين فى بعض خناق وردح*
بالمناسبة مينا ومريم جيرانى من زمان مسحين اتجوزا بقالهم خمس سنين وجم سكنوا هنا،كانوا بيحبوا بعض وخدوا بعض غصب عن الكل واتحدوا الظروف،ودلوقت بيطلعوة علينا، بس
فى الأخر بيصلحوا وميقدروش يستغنوا عن بعض بس مشكله مريم انها بتحب التملك مش عاوزة اى حد ياخد مينا منها وهو بحكم شغلة بيتكلم مع ستات وكدا لأنه ترزى حريمى شاطر جدا بس طبعا مفيش حظ فسعات بيستغلحجات تانية غير شغلانتة بحكم الظروف والمعيشة اتعلم حجات كتير ،بس هو
بجد فنان وبيعمل أحلى فساتين وعلشان كدا بيتعامل مع ستات وهى بتغير وطبعا رايح فين وجاى منين،فكراة زى العيل الصغير،وهو بيكبر دماغة وبيسبلها البيت، ويمشى وكل خناقتهم عن كدا
أخلاق: فى إية يا جماااااعة، استهدوا بالله صوتكوا جايب أخر الشارع
مينا: اية الجديد يا أخلاق تقريبا الصوات عند الست دى مزاج بترتاح لما ببتصوت،وبعدين الجيران يقلقوا علينا لو مسمعوش صوتنا،
مريم: شايفة يا أخلاق بيستفزنى إزاى
مينا: قصدك انى مستفز
مريم: لا انا الى مستفزة وستين مستفزة.
مينا:علشان تعرفى انا مستحملك بس
أخلاق: بااااااس، انا زهقت بجد وصدعت، وكدا كتير على الأقل علشان العيال دول حرام يشفوكوا كدا
مينا: قويلها يا أخلاق،علشان هى مبقتش تعمل إعتبار لحد، وعلى العموم انا سيبلها البيت وماشى هروح عند امى
*مينا طلع ورزع الباب وراه*
مريم:شايفة يا أخلاق بيرزع الباب ازاى وكل مرة يعمل كدا انا بجد مبقتش طايقة،بقى دا مينا،الى انا وقفت قدام الكل علشانة هو دا الى كان بيحبنى وكان هيموت ودخل المستشفى لما عرف ان هتخطب لحد غيرة، كل يوم بيثبتلى ان اهلى كان عندهم حق لما قلولى انه مش أد المسؤلية
أخلاق: بتحب الحق ولا بن عمة
مريم : عاوزة تقولى ايه يا أخلاق
_يا مريم مش كدا احنا البنات بنحب نعيش دور المظلومين كتير ، انت طول الوقت متعصبة ومش طايقة نفسك ودايما زعيق، ومينا مش صغير لكل شوية انت رايح فين وجاى منين، ومين كلمك ومين معاك وصحبت مين ومشيت مع مين، دا انت ناقص تديلة المصروف وتروح تقولى للأبلة اضربية وكسرى عضمة واناهجبس
سبية هو يحكيلك متحسسهوش انه بيعمل حاجة غلط لأنك كدا بتخنقية، وبعدين دى مريم الى اسكندرية كلها كانت بتكلم عنها وعن حلاوتها وشياكتها، طول الوقت مبهدلة فى نفسك،ياشيخة دا انا شمة ريحت البصل من هنا ارحمى نفسك ، دا حتى العيال مبيبطلوش خناق، وياريتك بتسكتيهم بتروحى تصوتى يقوموا يتعصبوا ويعيطوا، وعاوزاة يقعد فى البيت، ياختى راعينا احنا الجيران قربنا نمضيلموا تنازل عن العمارة كلها علشان تعرفوا تصوتوا يبقى فيه مساااحة
مريم:يعنى هما عيالى لوحدى، وبعدين مضحكنيش يا أخلاق انا دلوقت متعصبة
وبعد لما تسبلنا البيت مين هيجى يحوش يعنى
_يابت مش كدا خليكى عاقلة وناصحة ووفقى بين كل حاجة، يعنى اية ذنبة يجى من الشغل يلاقيكى بتقوليلة امسك الواد على معمل الأكل، نظمى وقتك وبيتك واهتمى بنفسك وارجعى انت الأول مريم بتاعت زمان علشان هو يرجع مينا بتاع زمان ابدئى انت، ومتخليش اى حد راهن على فشل جوزاك يكسب، حافظى على بيتك يامريم، مينا بيحبك وميقدرش يستغنى عنك، بس انت محتاجة بس تفهميه، وبعدين انت عارفة الظروف،وشغلة مش مستقر وبيشتغل كذا شغلانة علشانك انت والعيال
تراهنى انه هيجى كمان شوية يفتح البيت ويدخل، لأنة ميقدرش ينام بعيد عنك
مريم بصت لأخلاق وضحكت وقالتها طول عمرك جنبى وبتساتدنى أكتر من أختى كام مرة كنت بفكر أسيب البيت وامشى بس انا دايما بتقنعنى، انا اه أكبر منك بس صدقنى انا بتعلم منك كتير، حقيقى انا بحبك وبحب هزارك ونفسى ماريةبنت تطلع شبهك
أخلاق: ربنا يسعدكوا ويهديكوا ويخليكوا مارية ومازن وتفرحوا بيهم
*وبعد شوية مينا دخل وقعد جنب مريم وضحك *
أخلاق: على فكرة يامريم شكرا على الشاى الى انا مشربتوش
مريم: انا اسفة معلش ماخدتش بالى بس استنى هقوم اعمل متمشيش انا جاية اهو
*مريم دخلت المطبخ تعمل شاى، واخلاق ومينا والأولاد قعدوا فى الصالة:
أخلاق: على فكرة يا مينا يا مهبب القطرين مريم بتحبك اوى وملهاش ذنب انك تطلع عليها أرف الشغل هى ملهاش دعوة، وبعدين بقى ياراجل كل يوم تدخل البيت وش الفجر ذنب أمها اية انها تقعد لوحدها مش حرام عليك، ومتنساش انها وقفت قدام الكل علشانك
مينا: أنا عارف يا أخلاق بس هى على طول شاكة فيا وهى متأكدة انى عمرى ماهحب حد غيرها
أخلاق: هى أه متأكدة، بس سعات بتنسى، من وقت لوقت ابقى فكرها ، انت أخر مرة جبتلها هدية امتى، اخر مرة قولتلها انها حلوة كانت امتى اكيد من خمس تلاف سنة حضارة، مريم محتاجة الإهتمام، مفيش بنت مبتحبش تحس ان الى قدامها ميقدرش يستغنى عنها، واقل حاجة بتفرحها، اهتم بيها وكون معاها ماتكونش عليها طمنها دايما قولها انك فى ضهرها ومتقدرش تستغنى عنها قولها ان اليوم بيبقى وحش لما بتنزل الشغل علشان مبتشوفهاش، وبعدين انا الى هقولك،ولا انت بس شاطر تعملى روميو وقت الخطوبة، امسك قبل متيجى دى شيكولاتة كنت جايباها لمدثر أخويا بس مش مشكلة، مش خسارة فى مريم ادهالها وقولها حبيت أصالحك يلا خبيها أحسن جات
مريم: الشاى يا أخلاق تلت معالق سكر وعليه نعناع زى مبتحبية
أخلاق: أيوووووووه انا اتأخرت جامد، هنمشى بقى قبل ميستعوقنى فى البيت ويقلقوا عمى ومدثؤ زمنهم قلقانين، هنزل أشوفهم بقى ومرة تانية هبقى اقعد واشرب الشاى الى بالنعناع
*أخلاق مشيت ومينا ومريم فى نفس واحد انا اسف، انا اسفة*
مينا: متزعليش منى يا مريم انا عارفة ان الفترة دى متعصب شوية علشان شغلى وكدا وامسكى الشيكولاتة دى يا أحلى واطيب مريم فى الكون كلة
مريم: انت الى متزعلش منى انا الى مفروض استحملك بس معلش ان شاء الله مش هنتخانق تانى،ربنا يخليك ليا يا أحن راجل فى الدنيا كلها وشكرا على الشيكولاتة الى اخلاق ادتهالك انا شوفتها وهى بتدهالك وسمعتكوا بس استنيت لحد ماتخلص انا كنت متأكدة انها مش عاوزة شاى بس عاوزة تتكلم معاك
مينا: أخلاق دى بنا جدعة جدا بتحب الخير لكل وبتساعد كل الناس بجد فعلا الى لازم ياخدها حد يكون مختلف زيها،
مريم: ربنا يسعدها علشان تستاهل كل خير
*أخلاق مشيت ونازلة البيت سمعت دوشة فى الشارع نزلت بسرعة لقت، البوليس واقف، وبسأل عليها وبيقول انها لو مجتش دلوقت هيعتبر انها بتهرب *