رواية عشق على حد السيف
بقلم زينب مصطفي
الفصل الخامس والسادس
نظرت اليها سالي باعتراض وهي تهم بالكلام ليقاطعهم صوت سيف الصارم المتوتر
= زهره انتي قاعده كده ليه مفيش وراكي شغل
نهضت زهره بتوتر وهي تستشعر سماعه لحديثها مع شقيقتها
سيف بقسوه
= اتفضلي روحي شوفي شغلك واخر مره الاقيكي سايبه شغلك ومهملاه بالشكل ده
لتتوجه زهره بتوتر للحوض الممتلئ بالاطباق و تبدء في جليهم وهي تشعر باختناقها بالدموع وهي تستمع اليه يتابع بلطف
= سالي لو كنتي خلصتي فطار اتفضلي تعالي معايا العربيه مستنيانا بره
سالي وهي تترك طاولة الطعام وتقول بدهشه
= اروح معاك على فين
سيف بلطف وعيناه تراقب زهره التي تقوم بجلي الاطباق بتوتر
= المساعده بتاعتي هتاخدك تشتريلك لبس للبيت والخروج وكام فستان سهره
سالي بفرحه لم تستطع تخبئتها
= بجد ..
ليقاطعهم صوت زهره الغاضب
= طبعا لاء مينفعش مستحيل نقبل حاجه ذي كده احنا مش شحاتين ومستنين احسانك سالي عندها هدوم والنهارده هاروح اجيبها من البيت
سيف بصرامه
= انتي مين عشان تقبلي او متقبليش ايه الي دخلك اصلا في الكلام ..انا بتكلم مع سالي واظن هي كبيره وعاقله كفايه عشان تقول رأيها ولاخر مره إلزمي حدودك ومتتخطهاش
ليتابع بجديه
= سالي انتي عارفه كويس اني مقصدش حاجه من الكلام الي اختك قالته والهدوم دي اعتبريها هديه مني ليكي ..
ليتابع بلطف
والا انتي هترفضي هديتي
ابتسمت سالي بتردد وهي تنظر لشقيقتها الغاضبه
= لا طبعا انا مقدرش ارفض هديتك بس...
سيف مقاطعا لها وهو يبتسم
= مفيش بس..وكمان يا ستي النهارده عندنا حفله كبيره في الفيلا وعاوز أعرف الضيوف عليكي والا انتي مبتحبيش الحفلات
ابتسمت سالي بسعاده
= لا طبعا بحبها جدا ..خلاص انا موافقه انا جايه معاك
ليشير اليها سيف بالخروج معه وهو يبتسم لها بلطف
= طب يلا بينا عشا منتأخرش
لتتجاهل سالي شقيقتها وغضبها الواضح وتخرج معه بسعاده
زهره بغضب وهي تتابع خروجهم معا وحديثهم الضاحك
= بارد
توجهت زهره بغضب لطاولة الطعام وقامت برفع اطباق طعام الافطار
لتتفاجأ بيد سيف تقبض على معصمها بقسوه وهو يديرها اليه بغضب
= لسانك الطويل ده انا هقطعهولك والكلام الغبي الي قولتيه لسالي انك هتروحي البيت تجيبي هدومكم من هناك تنسيه خالص مفهوم
زهره بتحدي وهي تحاول الابتعاد للخلف لتجد المائده خلفها تعيقها عن الابتعاد
= لاء طبعا مش مفهوم انا كل لبسي ولبس اختي هناك مش معقوله هفضل لابسه اليونيفورم ده علطول
ليسحبها سيف بعنف من زراعها وهو يقول بتوتر وغضب مكبوت
= اقسم بالله يا زهره لو فكرتي تروحي هناك او قربتي من اي مكان امين موجود فيه لاوريكي وش عمرك ماتخيلتي تشوفيه مني بيت امين وامين نفسه محرمين عليكي امسحيهم من زاكرتك خالص انتي فاهمه
زهره باعتراض
= لاء مش فا....
ليقاطعها بغضب
= اخرسي واعملي الي بقولك عليه من غير نقاش والا متلوميش غير نفسك
ليتركها ويخرج بغضب وهي تنهار على احدى الكراسي ودموعها تتساقط بدون ارادتها وهي تقول بتعب
= انا تعبت..تعبت ومبقتش عارفه اعمل ايه
في نفس الوقت
= خرج سيف بغضب من المنزل وهو يشعر بالدماء تغلي بداخله
= الغبيه عاوزه تروحله تاني برجليها مش مكفيها الي عمله فيها
عاوزه ترمي نفسها في الخطر من تاني علشان شوية هدوم ميسووش
ليحاول التماسك والتحكم بغضبه وهو يدخل السياره ويجلس بجانب سالي التي تكاد تطير من فرط السعاده
ليشير للسائق بالتحرك وذهنه يسترجع بتوتر كلمات زهره لشقيقتها بمغادرتها منزله بمجرد عثورها على وظيفه ومنزل اخر
ليغمض عينيه وهو يقول بألم
= لسه برضه بتحاولي تبعدي عني يا زهره ولسه برضه بتوجع وبتألم من محولاتك بالبعاد ذي اول مره بعدتي واكتر
لتنظر له سالي باستفهام
= انت بتقول حاجه
سيف بابتسامه متكلفه
= بسألك هتروحي الجامعه النهارده
سالي بسعاده
= اه المفروض عندي سيكشن مهم بس...
سيف بتعب
= مفيش بس ولا حاجه بعد الشوبينج ابقي روحي احضري السيكشن بتاعك وبعديها استعدي للحفله ومتخافيش في فرد حراسه هيكون معاكي في كل تحركاتك وهيستناكي بره الجامعه
عشان لو امين حاول يتعرضلك تبقي في امان
لتقول سالي بسعاده من اهتمامه بها
= حاضر
ليبدء سيف بالانشغال بالتحدث بالهاتف تحت نظرات سالي المقيمه والمعجبه به
وهي تتحدث داخلها
= انا مش عارفه زهره الغبيه مستنيه ايه عشان تقولو الحقيقه هو ده يتساب وسيم وشخصيه و كاريزما و فلوس دا انا لو منها اهد الدنيا عشان افوز بيه بس اقول ايه طول عمرها فقريه
بعد مرور عدة ساعات
وصلت السياره التي تحمل سالي الى بوابة الجامعه الخارجيه ليقوم حارسها الخاص بفتح الباب لها باحترام وهي تخرج بسعاده وتكبر امام دهشة زملائها
لتدخل من البوابه الرئيسيه وهي تبتسم بسعاده
حتى اختفت عن عيون حارسها الخاص لتتفاجأ بيد تجذبها بشده من زراعها
لتلتفت بدهشه ونظرها يقع على شقيقها
لتقول بخوف
= امين..
ضحك امين بسخريه وهو يقول بسماجه
= ايوه امين مالك بتبصيلي كده ليه كأنك شفتي عفريت
ليتابع بتهكم
= والا فاكره اني مش هقدر اوصلك عشان العربيه والحراسه الي عليكي
لتبتلع سالي ريقها بتوتر وهي تتأمل وجهه المتورم و المملوء بالجروح والكدمات
= لا ابدا بس متوقعتش اشوفك هنا في الجامعه
امين وهو يقول بخبث
= واحد من الحرس الي على البوابه صاحبي وسهلي الدخول
ليتأملها في تهكم
= بس ابه الي انا شايفه ده.. يادوبك مر عليكي كام ساعه مع ابن السواق وبانت عليكي النعمه
لبس جديد وغالي وعربيه بسواق وحراسه هي ايه الحكايه انا توقعت زهره هي الي يحصلها كده مش انتي
ليتابع وهو يتأملها بخبث
= هي ايه الحكايه بالظبط هو بيحبك انتي والا بيحب زهره
سالي وهي تقول بغرور
= معرفش روح إسئله وعلى فكره عشان تطمن زهره معرفتوش حاجه من الي حصل زمان
امين وهو يعقد حاجبيه بتعجب
= ليه !!! دا انا قولت اول ماتشوفه هتقوله على كل حاجه عشان ترجعله من تاني
سالي وهي تمط شفتيها باستنكار
= فقريه ..طول عمرها فقريه مش فاهمه مستنيه ايه عشان تقوله ..دا مشغلها خدامه في البيت عنده ومبهدلها وبيعاملها معامله ذي الزفت
امين وهو ينظر لها بخبث
= لكن انتي عيني عليكي بارده بيعاملك معاملة اميرات يا ترى ليه
سالي وهي تعقد حاجبيها بتساؤل
= تقصد ايه
امين بخبث
= اقصد ان شكل ابن السواق عينه منك وزهره خلاص راحت عليها
سالي وهي تضحك بسخريه
= انت بتقول كده عشان مشفتوش بيبصلها اذاي وهي مش واخده بالها سيف لسه بيحبها يمكن اكتر من الاول
كمان بس شكل كرامته لسه وجعاه من الي حصل زمان
امين وهو يقول بخبث
= بيحبها ..بتحبه ..مش موضوعنا المهم احنا هنستفاد ايه
سالي بدهشه
= قصدك ايه
امين بجديه
= اقصد ان اختك فقريه ذي ما بتقولي ومبيهمهاش الفلوس وابن السواق بقى من اغنى اغنياء البلد واحنا كده هنطلع من المولد بلا حمص
ليتابع بشر
= اختك وسيف مش هيكملو مع بعض
بمزاجها غصب عنها استحاله اسمح لها ترجعله تاني ..وبعدين اختك عايشه في دور المثاليه واخر حاجه بتبص لها الفلوس يعني لو اعتمدنا عليها هنضيع
واراهنك انها بتخطط اذاي تسيبه وتبعد دي فقريه وانا عارفها
لتتزكر سالي كلمات زهره التي قالتها لها في الصباح عن بحثها عن عمل ومنزل جديد وترك الفيلا والابتعاد
لتقول بتصميم على عدم ترك الرفاهيه الجديده التي تعيشها في فيلا سيف
= طيب وانت شايف ايه
امين بخبث و قسوه
= شايف انك انتي الي تحلي مكانها ابن السواق دلوقتي غني جدا وعنده فلوس واملاك ملهاش عدد ومش لازم الفلوس والعز ده كله يضيع من إيدينا
سالي بدهشه
= تقصد...
امين بتأكيد
= اقصد انك توقعيه في حبك وتناسيه زهره خالص وطالما هي كده او كده هتسيبه يبقى انتي..وانا طبعا اولى بملايينه
سالي باعتراض متخاذل
= وافرض هي لسه بتحبه ومش عاوزه تسيبه و قررت تحكيله على كل الي حصل زمان
امين بشر
= تمنعيها .. باي طريقه تمنعيها وانا عارف ومتأكد انك تقدري دا انتي تربية امين
لتقول سالي باعتراض
= بس...
امين بخبث وصوت كفحيح الافعى
= سالي احنا مش هنلف وندور على بعض انتي قدامك طريقين..طريق تعيشي فيه ملكه كل طلباتك واوامرك مجابه وطريق الفقر و الشقى وغسل الصحون مع اختك في المحلات ..تختاري ايه
رفعت سالي رأسها بثقه
= اختار طريق الغنى يا امين انا اتبهدلت كتير و استحاله ارجع لطريق الفقر من تاني
امين بسعاده
= تعجبيني ..كده تبقي اخت امين بصحيح
ليتابع بشر
اسمعي بقى هتعملي ايه..
رواية عشق على حد السيف
الفصل 6
تكثفت الاستعدادات للحفل بعد وصول الشركه المنظمه للحفل
التي تولت كل شئ لتعمل زهره تحت امرتهم هي و زميلاتها الثلاثه في العمل
و فجأه تلقت ألفت اتصال تليفوني مفاجئ من سيف
ألفت وهي تجيب باحترام
= اؤمرني يا سيف بيه
سيف بجديه
= كل حاجه جهزت عشان حفلة النهارده
ألفت وهي تعدل من وضع نظارتها
= ايوه يا فندم الشركة المنظمه للحفله جت و إبتدت تجهز كل حاجه و الهام هانم اتصلت وقالت انها على وصول
سيف بتوتر صارم
= اسمعيني كويس الكلام الي هقوله يتنفذ ومش هسمح فيه بأي غلط
زهره متخرجش نهائي بره المطبخ لأي سبب من الاسباب مش عاوز اي حد من الضيوف يشوفها او يحتك بيها ..مفهوم
ألفت بدهشه حاولت الا تظهرها في صوتها
= مفهوم يافندم
سليم بحرج
= انتو فطرتو قبل ماتبتدو الشغل والتجهيز للحفله
ألفت بدهشه
= فطرنا....!!!
سيف مبررا بتوتر
= انا مش عاوز حد منكم يجي على بليل ويقع من طوله عشان مكلش طول اليوم مش عاوز فضايح
ألفت بدهشه
= انا فطرت والبنات فطرو مفيش غير زهره بس الي مرضيتش تفطر بتقول معدتها وجعاها
سيف وهو يتمتم داخله بغضب
= كنت عارف
ليحاول تمالك غضبه
= خليها تفطر قبل ما تبتدي شغل احنا مش مشغلينها في معسكر تعذيب
دا أمر ولو مش عاجبها تاخد حسابها وتمشي
ليغلق الهاتف فجأه في وجه ألفت التي نظرت للهاتف باندهاش
= ايه المجنون ده اذاي خدامه ومتحتكش بالضيوف
و فطار ايه الي متصل مخصوص علشان يسأل عليه الموضوع كده شكله ميريحش
لتتنهد بفروغ صبر
= وانا مالي بلاش أتدخل في إلي ماليش فيه ....اما اروح اخليها تفطر مش عاوزين مشاكل
دخلت ألفت للمطبخ لتجد زهره تلمع بعض الاواني الفضيه القيمه استعدادا للحفل
لتقول لها بجديه
= سيبي الي في ايدك ده وافطري الاول
زهره بتعب
= انا مش عاوزه افطر انا مش متعوده على الفطار أ..
لتقاطعها ألفت بصرامه وهي تضع امامها طبق به طعام
= اتفضلي اقعدي افطري مش ناقصين مشاكل
جلست زهره بتعب وهي تنظر لما تفعله ألفت بدهشه
= مشاكل ايه ان مش فاهمه
الفت بحرج وهي لا تعرف كيف تجيبها
= افطري يا زهره احنا كلنا فطرنا واساسا ممنوع نبتدي شغل قبل الفطار نظام الشغل هنا كده
لتضيف بصرامه
= وكمان وقت الحفله ممنوع انك تخرجي بره المطبخ هتشتغلي هنا في المطبخ من غير ما تحتكي بالضيوف او تخرجي بره.. مفهوم
تنهدت زهره براحه فهي كانت تشعربالقلق والخوف من خدمة ضيوف الحفل خشية ان يكون هناك من يعرفها من محيطها الثري القديم
= ايوه مفهوم
لتتركها ألفت سريعا وتتوجه للخارج وهي تقول بصرامه
= طب يلا كلي وخلصينا خليكي ترجعي لشغلك
لتبدء زهره في تناول طعام الافطار وهي تشعر بالدهشه من تصرفات ألفت
بعد مرور نصف ساعه
إنهمكت زهره في العمل مره اخرى
لتتفاجأ بدخول ألفت وبصحبتها سيده قمحية اللون طويله ورشيقه ذات شعر قصير اشقر يصل لبعد اذنيها بقليل وملامح ارستقراطيه جميله ترتدي فستان انيق اصفر اللون ضيق قصير يصل لمتتصف فخذيها وحذاء عالي الكعبين
الهام بعنجهيه وهي تحدث الشيف الخاص بالحفله
= عاوزه كل الاصناف الي طلبتها تكون جاهزه على وقت وصول الضيوف مش عاوزه اي تأخير اظن مفهوم
الشيف باحترام
= كل حاجه هتبقى جاهزه في ميعادها بالتمام متقلقيش يا فندم
لتتجاهله وهي تحدث ألفت
= انا جبت فستاني وحاجتي في العربيه خلي حد ياخدهم ويطلعهم
في الاوضه فوق
لتهم بالخروج وهي تتحدث لألفت لتتوقف فجأه وهي تتأمل زهره بتدقيق
= انتي ..انا شفتك فين قبل كده
زهره بتوتر
= مش....
لتقاطعها الهام وهي تتأملها بتدقيق
= انتي البنت الي خدمت علينا في الاوتيل ووقعت الكاسات مش كده
زهره وهي تبتلع ريقها بتوتر
= ايوه انا
لتضيق الهام عينيها بتفكير
= وايه الي جابك هنا..
لتتابع بثقه
= اه هما طردوكي عشان الكاسات الي كسرتيها وسيف شغلك هنا عشان صعبتي عليه
كتمت زهره غيظها وهي تقول بغضب مكبوت
= ايوه هو ده الي حصل
الهام بتكبر وهي تشيح بيدها
= طيب كملي شغلك....والا اقولك اطلعي هاتي هدومي من العربيه وطلعيها فوق وخدي بالك توقعي او تضيعي حاجه دا هيكون فيها موتك مش طردك بس
لتشير لألفت بتكبر
= وانتي تعالي معايا خليني اطمن على بقية التجهيزات
لتغادر برفقة ألفت التي قالت سريعا
لزهره وهي تهرول لملاحقة خطوات إلهام السريعه
= اوضتها تالت اوضه على الشمال ودي حاجتها هناك
لتختفي عن نظر زهره التي تشعر بمزيج من الغيره والغيظ الشديد وهي تقول بغضب
= بقى انا برضه الي كسرت الكاسات صحيح انك بجحه
لتتوجه للخارج حيث تصطف سيارة الهام الحديثه
لتفتحها وتخرج منها بعنايه شديده ملابس الهام وأشيائها التي سترتديها في الحفله
لتتفاجأ بسائق السياره يفتح شنطة السياره الخلفيه ويخرج منها ثلاث حقائب ملابس كبيره جدا
لتشهق زهره بتعجب
إيه ده كل دا هدومها هي ناويه تعيش هنا والا إيه
لتوجه حديثها للسائق بأدب
ممكن تساعدني وتطلعهم معايا فوق معلش اصل مش هقدر أشيلهم لوحدي
السائق باحترام وهو يشفق عليها من حمل الحقائب الثقيله
سيبي انتي الشنط الكبيره أنا هطلعها فوق وشيلي انتي الفستان والحجات التانيه الي في العربيه وإمشي قدامي
وريني هحطهم فين
زهره بامتنان
ربنا يخليك ..تعالى أنا هوريك تحطهم فين
لتتوجه للاعلى برفقة السائق الذي وضع الحقائب باحترام في الغرفه المخصصه لالهام وغادر سريعا
لتضع زهره الثوب بعنايه في خزانة الثياب
ويغلبها فضولها
لتقوم بفتح حافظة ثوب السهره لتجد فستان قصير جدا رائع من الشيفون الذهبي الشفاف الموشي بخيوط فضيه رفيعه و لامعه
زهره بزهول و غيره شديده وهي تتحسس الثوب
= يخرب بيتك ده فستان والاا قميص نوم
لتتابع بغيره
= طبعا اكيد لبساه عشان تغري سيف بيه
ماهو سايب لها بيته تتصرف فيه ذي ما هيه عاوزه ومخصص لها اوضه كمان
بجح وهي ابجح منه
لتتنهد بيأس ودموعها تتساقط بدون ارادتها وهي تحاول تهدئة نفسها
= اهدي كده يا زهره هتغيري والاا
ايه
هو من حقه يحب ويتحب وانتي ملكيش حقوق عنده عشان تغيري او تعترضي على تصرفاته
لتخرج من الغرفه وهي تشعر باليأس يستولي عليها وهي تنزل لأسفل وتقف في منتصف بهو الفيلا
وتجد شقيقتها سالي تدخل من الباب بمرح وهي تحمل مشترياتها الكثيره بيدها
لتندفع تجاه زهره الواقفه تتأمل مظهر شقيقتها الجديد بدهشه
سالي بمرح وهي تلتف حول نفسها
شايفه اللوك الجديد ايه رأيك ذي القمر مش كده
لتسحبها سالي فجأه من يدها تجاه غرفتها وزهره تعترض بتعب
= وخداني على فين يا مجنونه انا لسه ورايا شغل كتير
اغلقت سالي باب غرفتها وهي ترسم ملامح الفرح على وجهها
و تقول بخبث
= النهارده اجمل يوم في حياتي وكان نفسي اوي تكوني معايا عشان تختاري معايا هدومي الجديده..بس سيف مسابنيش ولا لحظه ونقى معايا الهدوم كلها واختارها كلها على زوقه
زهره بصدمه
= سيف هو الي اختارلك هدومك
سالي وهي ترسم ملامح البرائه على وجهها
= شفتي انتي مستغربه اذاي.. انا بقى كنت مستغربه اكتر منك دا غير اني كنت مكسوفه منه أوي ومكنتش عاوزاه يجي معايا بس هو صمم
لتضحك بخبث
= تصدقي انه لغى إجتماع مهم عشان يجي معايا
لتتابع بخبث وهي تراقب تغير ملامح شقيقتها
دا خلاني أقيس كل حاجه قدامه كان خايف أني أشتري حاجه تكون عريانه أو مكشوفه
لتتنهد بهيام امام زهره المصدومه
= لو شوفتيه وهو بيرفض اني اشتري فستان سهره عشان عريان شويه كنتي قولتي انه بيغير عليا
زهره وهي تردد بصدمه وزهول
= بيغير عليكي ..سيف ..انتي بتتكلمي عن سيف
لتضحك سالي بمرح
= يا شيخه انتي كمان أنا أقصد بيغير عليا ذي اخته
لتتابع بخبث وهي تظهر فستان سهره طويل رائع من اللون الرمادي اللامع
= شوفي اختارلي ايه بذمتك مش زوقه يجنن وحلو اوي صح
لتقول زهره بصوت مذهول من شدة الصدمه وهي تشعر بالدوار يلف رأسها
ايوه زوقه حلو... طول عمر سيف زوقه حلو
تابعت سالي ابتعاد و خروج زهره المهزوم بانتصار
= رايحه على فين مش هتشوفي بقية الهدوم الي إشتراها ليا
حاولت زهره منع دموعها من الانهمار و هي تخرج من الغرفه
وتقول بضعف
= هبقى اشوفهم بعدين عشان عندي شغل
لتغلق الباب خلفها وسالي تبتسم بسعاده وتقول بانتصار
= معلش يا زهره كان لازم اكدب عليكي
واقول ان سيف جه معايا و إختارلي هدومي
ما انا لازم احارب عشان مرجعش للفقر والذل من تاني
وفي نفس اللحظه توجهت زهره بانهيار لغرفتها لتغلق الباب خلفها باحكام وهي تجلس بتعب على ارض الغرفه وكلمات شقيقتها المسمومه تدور في ذهنها
لتقول بذهول
= معقول سيف وسالي ..طب إذاي