رواية فرعون
الفصل السابع عشر
بقلم /ريناد يوسف
واقولك حاجه كمان ابوكى اتجوز
....وهيجيبها وجايلكم قريب ...هاااه تحبى تبشرى امك انتى ولا ابشرها انى .هههههههههه
جواهر :انى سمعته قال اكده وحسيت بقلبي اتفت ..بعدت السماعه عن ودنى وبصيت على امى اللى بتهزلى فأيدها من بعيد بمعنى فيه ايه ...ولما مجاوبتش جات جرى وخطفت السماعه من ايدى وحطتها على ودنها ..
محروس :هاه سكتى يعنى هو الخبر لجم لسانك ولا ايه ؟ بس اسكتى ياجواهر ابوكى ديه زوقه عالى فالحريم قوى دا اتجوز وحده قاطعه الفرط تضرب امك على عينها ...
امى وقعت السماعه من ايدها ومره وحده لقيناها وقعت عالارض ...
جرينا عليها كلنا وشلتها انى ومرت عمى وحطيناها على الكنبه وانى جريت جبت كباية ميه ..
مرت عمى خدتها منى وبقت ترش على وش امى وتبل يدها وتملس على وشها ..
فين وفين لما امى فتحت عنيها ...بس كنت انى انتهيت من البكا والخوف عليها ...
قعدت جارها وحضنتها وهى بصت حواليها بتوهان ومره وحده برقت عنيها وهزت دماغها وصرخت صرخه رجت البيت كله ...
اول ماصرخت امى ستى مبروكه جريت وهى بتتسند على عكازها و بتقول :ارمحو ياعيال كنها وقعت على جنى الوكلاهم دى .
امى فضلت تصرخ ومفيش على لسانها غير كلمة ليه ..ليه ...ليييييه
مبروكه :طب قولى ايه ونقولولك ليه يافقريه بطلى صريخ ياحزينه ...
لو ماسمعتش صوط محمد جار محروس كان قلت جرت لولدى حاجه .
مال امك ياجواهر عمك قالكم ايه ؟
جواهر :قال انى ابوى اتجوز على امى ياستى .
مبروكه :ياالف ليله بييييضه ياالف ليله بيضه ...ومحمد جاب عروسته ودخل بيها الاوضه ...وبت بحرى اتكادت وبت بحرى اتكادت ..لولولى لولولى لولولى ....
جواهر :ياستى حرام عليكى هى ناقصه كيد ، يعنى مش شايفاها هتموت قدامك عاوزه تكملى عليها !
جميله :قومى ياجواهر هنلم حاجتنا وملناش قعاد هنا بعد النهارده ...
دخل عم جواهر اللى كان لسه جاى من بره :خير حسكم واصل لاخر البلد ليه ّ ديه مبقاش بيت ديه بقا كباريه
...ومين اللى تلم حاجتها وتاجى معاكى دى يمرت اخوى ؟ وتاجى معاكى على فين !
مبروكه :قال ايه سمعت ان ولدى محمد بسلامته اتجوز عاوزه تاخد جواهر وتمشى ...شفت محن الحريم ياولدى .
عم جواهر :هى عاوزه تمشى الباب يفوت جمل لكن لحمنا ميطلعش بره دارنا ....
قامت امى زى المجنونه ومسكت فقب عمى وتهز فيه وتصرخ بحس مش حسها زى ماتكون اتحولت :
لحم مين ...انتو بتصونو لحم ولا عيش وملح ولا عشره ، انتو اوسخ ناس شفتهم فحياتى ...عشت عمرى اخدم فيكم خدمة العبد للسيد وفالاخر دى جازاتى ...جوزى يتجوز عليا وامه تزغرتله وانتا عاوز تحرمنى من بنتى ....
دنا لو خدمتى اللى خدمتهالكم خدمتها لكلاب كانت حقت وصانت العشرة ...
قسما عظما ويمين مره مش راجل ...اللى هيوقف قدامى وانا ماشيه ببنتى مايلوم الا نفسه ...يلا ياجواهر على فوق لمى حاجتك بسرعااااااه ...
عمى بص لستى وبص لامى اللى زقته وطلعت على اوضتها عشان تلم حاجتها ....
عمى :ايه متكلمتيش يعنى هتسيبيها تاخد البت
مبروكه :سيبها هترجع كيف الكلبه ...اصلا هتروح فين اخوها واتبرى منها عشان فاجر واتجوزت اخوك من غير رضاه ...وهى ومقطوعه من شجره ، مش هتلقى حته تتاويها وهترجع وتعيش تحت الرجلين ...وان كان عالبت خليها تاخدها معاها وتذود عليها الحمل يومين بالعدد ويرجعو هما التنين.
انا بصيت لستى باستغراب ...ازاى بتتكلم عنى كده كانى ولا حاجه ، ولا كأنى بنت ابنها وفارقه معاها ..طب امى وبتكرهها بت ولدها تكرهها ليه ؟
لكن اللى تخلف محروس هيبقى عندها قلب ولا هتبقى زى باقى الناس ....ادى اخرت خدمتك وهدت حيلك ليل نهار ياجميله ...
مشيت وطلعت لامى لقيتها قاعده على السرير ومقرفسه رجليها ودافنه وشها فيهم ....
قربت منها وحطيت ايدى على كتفها
اتكلمت من غير ماترفع وشها :
ابوكى دبحنى ياجواهر...كسرنى كسره مينفعش تتجبر ...كسر عمرى وشبابى وصحتى وحبى وقلبى ....ابوكى كسر كل حاجه فيا ...
معقوله عشت مخدوعه فيه كل السنين دى ...ليه مصدقتش خالك ماهر لما قلى هتندمى ...ليه مخترتهوش هو لما خيرنى بينه وبين ابوكى ...
سبت عيشتى وبلدى وامى واخويا والخير والعز وجيت هنا ليه ؟
كنت مستنيه منه يقدملى ايه ؟ حب !
ملعون ابو الحب اللى الواحد يبيع الدنيا عشانه وفالاخر يطلع مزيف ، رخيص ، مغشوش ....
قعدت جمبها وحضنتها وقلتلها كفايه ياامى كفايه ...
سابتنى ونزلت راحت للمرايه ووقفت قدامها وبصت على نفسها :
ايه دا ؟! مين اللى فالمرايه دى ، فين جميله ؟ راحت فين، اتبدلت ازاى بالست الوحشه دى ...وايه التجاعيد اللى فقورتها دى وجمب عنيها ..؟
دورى معايا على جميله ياجواهر ...
او حتى قوليلى ادور عليها فين والاقيها ازاى ؟
آخد تمن عمرى اللى ضاع وملامحى وقلبى اللى شاخو من مين ....
بصتلى ولقتنى باصالها بخوف وقلق من حالة الانهيار اللى هى فيها دى .
قربت منى ومسكت وشى بين اديها وقالتلى :
انا مكسبتش غير حاجه وحده بس فجوازى من ابوكى ..انتى يا جواهر ، اغلى حاجه فدنيتى ...عوض ربنا ليا ومش هسمح لحد ياخدك منى ابدا ...
يلا بينا ياجواهر ..لمى حاجتك خلينا نمشى من هنا بسرعه مخنوقه هموت من المكان ده ...
لمينا حجاتنا الضروريه وامى اخدت دهبها والفلوس اللى معاها وكل اوراقها ونزلنا وامى مسكت ايدى وخرجنا من البيت ومحدش فيهم اتكلم ولا حتى مسك فينا بالكدب ولا سألنا رايحين فين الا قاعدين قدام التلفزيون بيتفرجو على المسلسل ولا كان حاصل حاجه ..كد ايه كرهت الكل فاللحظه دى ......
طلعنا من البيت وبصيتله ورايا وانا ماشيه وعلى الرغم من ان امى بتموت من الحزن الا انى حاسه بفرحه تكفى الكون كله وانا شايفه نفسى ببعد عن المكان اللى شفت فيه اسوء ايام حياتى ..
اتمنيت لو اقدر افجره واتفرج عليه من بعيد وهو بيتحرق وعمى محروس جواه مع الباقيين زى مابشوف فالتلفزيون .
مشينا شويه ووقفنا على الشارع الرئيسى بصيت لامى اللى بتتلفت يمين وشمال بتدور على عربيه نركب فيها لكن فى الوقت دا مفيش ولا عربيه بتعدى ...
قعدت امى على شنطه بأحباط وتعب وبصت للسما وغمضت عنيها ... حسيت فاللحظه دى وانا ببص لامى انها زى ماتكون كبرت عشرين سنه .
سالتها:هنروح فين دلوقتى يامه ؟
جميله :مش عارفه ياجواهر ، عاوزه عربيه توصلنا المحطه وناخد اول قطر على القاهره .
جواهر :طب ومدرستى دنا رايحه تالته اعدادى السنه الجايه حرام كل تعبي يضيع واسيبها
جميله :اووووف دنا ناسيه المدرسه دى خالص ...خلاص نشوف اى حته نبات فيها وبكره نروح نسحب الدوسيه بتاعك واقدملك على مدرسه تانيه لما نروح القاهره تكملى فيها آخر سنه ...
جواهر :طب اقولك فكره ...ايه رأيك نروح نبات حدا بيت ليل وخصوصا اننا ولانعرفو حد فالبلد نبيتو حداه ولا حد يعرفنا واهو بالمره اسلم عليها واودعها قبل ماامشى ...
جميله :الظاهر مقدمناش حل تانى ياجواهر وخصوصا ان الدنيا ليل والبلد بتخوف بالليل ...
امى شالت الشنطه الكبيره وانا شلت الصغيره ومشيت انا قدامها عشان هى ماتعرفش بيت ليل وهى مشيت ورايا .
وصلنا لبيت ليل وخبطت على الباب ثوانى وفتحت خاله جنه وهى بتلف شالها على راسها ...شافتنى وضربت على صدرها وقالتلى ...جواهر ؟مالك يابتى ايه اللى مطلعك من بيتكم فالليالى دى فيه ايه ؟!
امى زاحتنى واتكلمت من ورايا :ام ليل انا وجواهر جينا وقاصدينكم تبيتونا عندكم سواد الليل بس ويبقى جميل مش هنسهولك العمر كله ..
جنه :وه ليكيش حق يام جواهر ..جميل ايه ياحبيبتى ، خشى البيت بيتك واحنا اللى ضيوف حداكى ...خشى ياخيتى دحنا زارتنا البركه .
دخلت امى وانا دخلت وراها واتلفت يمين وشمال على ليل ...خالتى جنه قالتلى اللى عتتلفتى عليها عتتسبح ... دخلت لعم طاهر المندره اتحدتت معاه وبعدين خدتناودخلتنا اوضتها هى وعم طاهر ..امى طلبت اننا ننام مع ليل فأوضتها لكن خالتى جنه حلفت على امى متبات غير فأوضتها وهى وعم طاهر هيبيتو فالمندره ...قلتلهم انا هبات مع ليل ...
جنه :ينفع اسألك فيه ايه يام جواهر ولا هبقا عتدخل فاللى مليش فيه .. وهتقولى حشريه ...انى بس عاوزه اطمن عليكم دحنا واكلين مع بعض عيش وملح ..
جميله :لا عادى يام ليل انتى يعلم ربنا انى بعتبرك اختى الكبيره وليكى معزه خاصه عندى انتى وليل ...
انا سبت البيت وهسيب البلد كلها واطلق من محمد عشان اتجوز عليا ..
جنه :اخص عليه الردى قليل الاصل ..وانتى ايه ناقصك عشان يسيبك ويروح لغيرك الناقص ..دنتى قمرة البلد كلها ولو لف الدنيا كلها ميلقى فجمالك ولا عقلك ولا زوقك وطيب اصلك ..
بس يلا هو يعنى اللى راضع من مبروكه هيطلع ايه !
تزعليش ياحبيبتى والله انتى من لاول كتيره عليه ...
جميله :انا مش زعلانه عليه لان اللى زيه ميتزعلش عليه ، انا بس زعلانه على اللى خسرته لما اشتريته ..
جنه :صاحب العوض موجود ياحبيبتى ...ربنا يصبر قلبك ويرمى نارك فالبحر .
جواهر :رحت على اوضة ليل واستنيتها فيها، شويه وجات من الحمام متسبحه ...
قولتلها :عتبلبطى فالميه انتى ياخيتى ومش دريانه بحد مين كدك عروسه عاد ..
ليل :سمعت جواهر بتكلمنى وانى كنت حاطه البشكير على دماغى وموطيه عنشف راسى شلته بسرعه وشفت جواهر فعلا قاعده فأوضتى!
ليل :اباااااى ايه اللى جابك دلوك ياقزينه وجيتى كيف فالوكت ديه ومين سمحلك ...
شفت جواهر عنيها دمعت وقامت وجات جرى حضنتنى وبكت بصوت عالى ...انا شفتها اكده ومَسك فقلبى الرجيف ، بعدتها وسألتها :
مالك يبت وقعتى قلبى ايه اللى حوصول قولى ..
جواهر :هنسيب البلد انا وامى ياليل ومش هشوفك تانى 😢
ليل :كيف ديه وليه !
جواهر :ابوى اتجوز على امى وهى هتاخدنى القاهره ونعيش هناك ..
ليل :انا اهنه حسيت رجليا مقدرينش يشيلونى تانى رحت بالعافيه وقعدت على السرير .
قالتلى :ليه ياليل كل مانقربو ونبقو مع بعض ونفرحو تاجى حاجه تبعدنا ..ليه احنا مطلعناش خوات وعشنا مع بعض تحت سقف واحد !..
ليل :لو هنسألو ع الحجات اللى عتوحصول معانا دونا عن غيرنا هنفضلو نقولو ليه للصبح ياجواهر
وصدقينى بعدنا عن بعض سببه حظى انى اللى ولا مره وقف معاى فحاجه ...
لا شكل زى البنته ،ولا فرحت ولعبت وانى صغيره زي العيال، ولا اخ ولا اخت تونسنى، والكل بيبعد عنى، ويوم مالقيتلى وحده تحبنى وترضى تصاحبنى وبقت ليا الدنيا واللى فيها اهو عملها حظى وبعدنى عنها ....
شفتى انه حظى انى مش حظك انتى ..لكن ان كان عليكى انتى حلوه وطيبه وتتحبى ووكت ماهتطلعى من الحبسه اللى انتى فيها اهنه دى هتلاقى الف صحبه وحياتك تتملى ناس ، الدور والباقى عليا انى ...
انى يمكن حاجه من الحجات الحلوه فحياتك ، لكن انتى كل حاجه حلوه فحياتى ياجواهر .
جواهر :ومين قالك انى حياتى بالحلاوه اللى انتى مفكراها دى ياليل ..اسكتى والنبى وخلى اللى فالقلب فالقلب ..
:قربت منها وحضنتها وهى كمان حضنتنى ونمنا سوا واحنا حاضنين بعض وغمضنا عنينا وكل وحده برغم سنها الصغير الا انها فوق كتافها حمل كد الجبل
*********
غريب
بفوق من النوم و حاسس دراعى مخدل بصيت لقيت ناديه لسه نايمه عليه ببص للساعه لقيتنى نمت ٣ ساعات انا والعفريته دى من غير مانحس بالوقت...
سحبت ايدى بشويش من تحت دماغها واتسندت بضهرى بصعوبه على السرير بأيد مكسوره والتانيه منمله حاسس انى مشلول ، فكرت لو كانت فعلا حصلتلى حاجه زى دى وبقيت عاجز كنت هقدر اعيش ازاى ؟
حمدت ربنا على الصحه اللى ربنا مانن عليا بيها وغيرى يتمنى ربعها .
مديت ايدى تحت المخدة وسحبت الاجنده وفتحتها على الصفحه اللى وقفت عندها ..
📖
اميره
النهارده كملنا ٣ شهور متجوزين انا وماهر ....
هكون ظالمه لو انكرت ان ال٣ شهور دول يساوو حياتى كلها ...
لكن مش عارفه ليه اليومين دول حاسه ماهر فيه حاجه حاصله معاه ومش عاوز يقولهالى ...
ملاحظه من بصته ليا اللى زى مايكون حد بيودع حد ...ملامحه اللى فعز ضحكتنا سوا تتغير وتتحول للحزن وهو باصصلى ...
حاسه ان فيه صراع جواه بس مش عارفه ايه سببه وليه ..
سالته كتير بس كل مره اجابته ليا ...مفيش ...
اد ايه الكلمه دى قادره انها تحسسك بالغربه عن حبايبك ..
كلمة مفيش دى بحسها الدرع اللى بيخبى وراه كل حاجه عنى ..
لما بيقولى مفيش بحس انه بيقولى ملكيش دعوه انتى باللى فيا ابعدى ..
اكتر كلمه كرهتها فحياتى كلمة مفيش..
اتمنى ان اللى ماهر مخبيه ومش عاوز يشاركنى فيه ميكونش فيه اى اذي ليه ...دى امنيتى الوحيده.
بس انا متأكده ان مشكلته مش سببها وجودى فحياته، لان لهفته ليا لسه هى هى، وشوقه ليا بيزيد مش بيقل وتعلقه بيا كل يوم بيكبر ...اهتمامه بأدق تفصيله تخصنى نظرة عنيه بيأكدولى ده ....
انا ممكن معرفش احكم عن الناس من كلامهم او شكلهم زى مريم لكن انا بعرف اقرا الناس من عنيها لان اللى جوا القلب بينعكس عالعين ..
وانا شايفه الحب ليا فعيون ماهر انا متأكده من ده ...
📖
النهارده حصل معايا احلى تانى حاجه بعد جوازى من ماهر ....
النهارده رحت للمختبر بعد ماشكيت انى ممكن اكون حامل ...حللت وفعلا طلعت حامل ..
مش قادره اوصف فرحتى ..مفيش كلام يكفى ..
مفيش حروف تقدر تعبر عن سعادتى ...
انا جوايا حته من ماهر ...هتكبر جوايا واشيلها فعيونى ...ابنى او بنتى .....ياااااه امته ييجى واشيله بين اديا واشم ريحته ...
يارب يارب لو ولد يطلع شبه ابوه عشان كل ماابصله اشوف فيه ماهر ...وحتى لو بنت يارب تطلع شبهه برضو ..
اقوم اكلم ماما فريده وافرحهها ولما ترجع مريم من الشغل هكلمها هى كمان .... هوزع من فرحتى على حبايبى عشان يفرحو معايا ....
بس الاول هفرح ماهر ...مش قادره اتوقع رد فعله لما يسمع الخبر ..متخيله الف رد فعل منه بس كلهم يجننو ....اتصل عليه اقوله .؟!
لالا هستنى لبكره واقوله وانا واقفه قدامه عشان اشوف فرحة عنية ...
ياااااى متخيله فرحت مريم بانها هتكون خاله ...اول طفل فعيلتنا اللى اتعاهدنا انا وهى اننا هنكونها مع بعض بأولادنا ..اتفقنا اننا هنعلمهم من وهما صغيرين انهم اخوات وليهم امين ..انا ومريم ..
ياترى اقول الخبر لماهر ازاى ؟
اكتبهولو فورقة ؟ ولا آخد ايده واحطها على بطنى وهو يفهم ..
احسن حاجه استنى لبكره واكيد لما يكون قدامى هقدر افكر فالطريقه .
ودلوقتى هقوم آكل حجات مغذيه عشان ابنى حبيبي يتغذى وصحته تطلع بومب ...
📖
انا دلوقتى فالسرير ورايحه انام ولاول مره محسش انى لوحدى فغياب ماهر ...ابنى معايا ، نايم جمب قلبى ومطمنى ..
📖
النور بينور اهو وماهر قرب يجينى ..منمتش من الفرحه غير ساعتين اتنين وبعد كده فضلت طول الليل اتقلب ...
اتضحلى ان زى مالواحد مش بيقدر ينام من شدة الحزن مش بيقدر ينام من شدة الفرحه كمان ...
اقوم آخد شاور والبس احلى حاجه عندى عشان ماهر يعرف انى هكون احلى أُممم...
***********
📖
النهارده انا بكتب وانا قاعده فدار ايتام ...بس مش الدار اللى اتربيت فيها ..دار تانيه بعيده عنها ...بكتب وانا مفيش فيا حاجه تثبت انى عايشه غير النبضات الصغيره اللى حساها جوا بطنى ...بكتب بعد ماعدى عليا ٣ شهور مكتبتش ،
بالظبط نفس المده اللى قضيتها مع ماهر ...بس الفرق ان مع ماهر كانو ٣ شهور من الجنه ، لكن دول ٣ شهور من الجحيم .
خلينى اقول انى النهارده حبيت احتفل ...احتفل بعيد ميلاد جرح قلبى ...
قلبى اللى من كتر ماحس بالقهر بيموت ..نبضاته الضعيفه اللى لسه بينبضها دى سببها انه رافض يتخلى عن ابنى اللى عايش على دقاته جوا منى .
النهارده كملت اربع شهور ورحت انا ومريم عملنا سونار وطلع ولد ...
اد ايه فرحت ...وبرضو اتمنيت انه يطلع شبه ماهر ...برغم كل حاجه حصلت لكن مش عارفه ليه حاسه بحاجه غلط ...
لما اللسان يقول كلام لازم العيون تتفق معاه فاللى بيقوله ...لكن لما اسمع كلام وابص فالعين الاقى كلام تانى دى حاجه مؤلمه بجد ..
لكن الظاهر انى لا طلعت بعرف اقرا العيون ولا نيله ...ولا بعرف حاجه اصلا ..
وادينى قاعده دلوقتى فجنينة الدار وسط الاولاد الايتام وانا بتخيل ابنى قاعد وسطهم ...قلبي بينغزنى من مجرد الفكره ...طبعا اللى هيقرا مزكراتى دى فيوم من الايام هيسأل انا جيت هنا ازاى ..انا هحكى عشان تبقى كل حاجه واضحه ....
📖
لبست واستنيت ماهر ييجى فمعاد كل يوم الصبح وحضرت الفطار وفعلا سمعت صوت مفتاح الباب ..معرفش هو النهارده اتأخر عليا شويه ولا من لهفتى حسيت بده ...مش مهم المهم انه جه .
دخل من الباب وانا استقبلته بأبتسامه زى كل يوم لكن الغريبه انه مردش عليا بأبتسامه زى كل يوم ...بصيت لقيته ماسك كيسه سوده فأيده فيها حجات مربعه ...دا اكيد العصير بتاعى ..اكيد حبيبي انتبه انى شربت آخر علبه امبارح ..
فضل واقف مكانه بجمود لكن عنيه بتبص فكل مكان وعلى كل حاجه الا انا ...
قربت منه بخوف وسألته مالك ياحبيبى فيك ايه ..رفعت ايديا عشان اخد وشه بين ايديا لكن لقيته بعد عنى !..
وقفت وبصيتله وانا مستنياه يتكلم ..حساه متوتر والكلام مش بيطلع منه ...
سالته مره تانيه :ماهر اتكلم حصل ايه انا اعصابى ابتدت تتعب .
اخيرا نطق وياريته مانطق ولا اتكلم :
قلى :اميره بصى عاوزك تهدى وتسمعينى ..مرضتش اقوله انا هاديه وبسمعك عشان مقطعش كلامه وانا مصدقت انه هيتكلم اخيرا .هزيتله دماغى بالموافقه...
ماهر :اميره احنا خلاص كده وقتنا مع بعض خلص وخلاص كل واحد لازم يرجع لحياته الطبيعيه اللى كان عايشها قبل التانى ...خلاص لعبة الجواز دى انا وصلت فيها لليفل الاخير ومش هقدر اكمل بعد كده
انتى طالق يااميره .
انا سمعت كده ووقعت عالارض .. استنيته يقول بهزر معاكى ..، دا مقلب فيكى ، لكن المقالب مبيتقالش فيها انتى طالق ؟!
رفعت عينيا لماهر ولقيته واقف يبصلى بجمود سألته بصوت هستيرى بيرتعش من الخوف :ايه اللي انتا قولته دا ياماهر ؟ قول اني سمعت غلط ، طب قول انك بتهزر معايا وانك متقصدش اي كلمة من الكلام اللي قولتهولي ده ....طب بص بص قول انك متقصدش ..او قول آسف وانا هسامحك والله ..والله هسامحك ياماهر عشان بحبك هسامحك ارجوك متدبحنيش ، متدمرنيش بالشكل ده حرام عليك دنا مليش حد غيرك فالدنيا ...دنا مصدقت لقيتك
مردش عليا ...هنا ابتديت استوعب ...ماهر طلقنى فعلا دلوقتى ..
قمت وجريت على الاوضه وقفلت الباب ورايا وبقيت بلف حوالين نفسى زى المجنونه ...رحت على التسريحه وكسرت كل حاجه عليها ..
بشوفهم يعملو ده لما يبقو منهارين عملت زيهم قلت يمكن دا بيخفف الالم ...لكن فيه الم مفيش حاجه تقدر تخففه ...بيسموه اقصى درجات الالم ...هو دا اللى انا كنت حاسه بيه ...جمرة نار جوايا وكل مادا تكبر وتكوى كل ثانيه اكتر من اللى قبلها ..
لعبة ايه اللى بيتكلم عنها ؟ يعنى كل دا فنظر ماهر كان لعبه ؟
طب هو مش لازم اى لعبه كل الاطراف تبقا عارفه من الاول انهم جوا لعبه ؟
فضلت اصرخ وابص يمين وشمال يمكن الاقى حواليا دليل انى بحلم او ان دا كابوس ..لكن للاسف كان كله حقيقي ..
باب الاوضه اتفتح بعنف وصرخ فيا
ماهر لاول مره بصوت عالي وقلى :
خلاص بقا يااميره متتعبنيش كفايه من اللى بتعمليه دا ..مفيش وحده قبلك عملت اللى انتى بتعمليه دا ...انا سبتلك بره فلوس تكفيكي وزيادة لغاية ماتدبري حياتك ...انا قطعت الورقتين العرفي وخلاص مبقاش فيه حاجه تربطنا بعد كده ....
لو سمحتي لمي حاجتك واتفضلي فضي الشقه وادي المفتاح للبواب وانتي نازله ...وياريت ...ياريت تنسي انك قابلتي حد اسمه ماهر فيوم من الايام ...وكفايه عليكي اليومين الحلوين اللي عشتيهم معايا... واعتقد اني مقصرتش معاكي فأي حاجه ... ، وبحذرك يااميره اوعي تنطقي اسمي بصوت عالي حتي بينك وبين نفسك ...سامعه
كل اللى قاله مسمعتش منه غير جمله وحده فضلت ترن فودنى ومسمعتش حاجه غيرها بعد كده ...
(مفيش وحده قبلك عملت كده )...
يعنى ايه ؟!
يعنى كان فيه كتير قبلى ؟ يعنى انا لعبه جديده كان بيتسلى بيها طول الوقت ؟ مين اللى واقف قدامى وبيكلمنى دا؟ اكيد مش ماهر ...
هزيت دماغى برفض لكل اللى شايفاه وبسمعه ....
لا دا وكمان جايبلى فلوس تمن الايام اللى قضاهم معايا ...هو شايفنى ايه ؟ انتى ايه يااميره ؟ وحده رخيصه ولا بنت ليل عشان يعمل معاكى ويقولك كده ؟
وانا اللى مستنيه افرحك بأبنك اللى فبطنى ..الحمد لله انى متهورتش وقلتله فالتليفون والا كان ممكن يسقطنى ولا يموتنى ...
مديت ايدى ومسحت دموعى وهزيت دماغى وانا بحلف بينى وبين نفسى انى مش هشمت ماهر فيا واخليه يشوف انكسارى وضعفى واحتياجى ليه ...هخرج من حياته ..مش هاخد منك فلوس ولا عاوزه منه حاجه ...بس فالمقابل اللى عندى ملوش اى حق فيه ....
ابتسمت وبصيتله وهزيتله دماغى بالموافقه ولاخر لحظه عندى امل انه يغير كلامه لكنه رد عليا بمنتهى البرود وقلى بصوت واطى اقرب للهمس:ايوه كده شااااطره .
فضلت باصاله وهو اتفحص الاوضه كلها وادالى نظره اخيره وبعدها ادانى ضهره ومشى ..فضلت متابعاه بعنيا واقول دلوقتى هيلف ويرجعلى ..هيبصلى اكيد بصه اخيره قبل مايمشى ...نفسى اشوف عنيه لآخر مره ...لكنه خرج من الباب وخرج من حياتى وسابنى بمنتهى البساطه ... اتأكدت ان دى آخر مره هشوفه فيها ..
وايام سعادتى فالدنيا خلصت لحد هنا
اتمنيت انى اودعه لآخر مره وداع يليق باللى كان بينا ...عالاقل حضن ..اشم ريحته لآخر مره ..
حسيت بنغزه فقلبى بس المرادى كانت اشد من كل مره ، دلكت قلبى كتير لكن المرادى مش بتروح ولا بتختفى ، الظاهر ان قلبى هو كمان جاب آخره معايا ....
قفل غريب الاجنده وانتبه لدموعه اللى مغرقه وشه وحط ايده على قلبه بيدلك النغزه اللى حس بيها وعرف دلوقتى هو وارثها من مين ...
الظاهر ياامى انى مش بس ورثت منك نغزة القلب الظاهر انى ورثت منك قلة الحظ كمان .
فاللحظه دى ماهر كان دخل الشقه وشاف بوضوح غريب وهو بيمسح دموعه وبيدلك قلبه وحاضن الاجنده بأيده المكسوره على صدره . بصله غريب ودور وشه الناحيه التانيه وهو بيمسح دموعه عرف وقتها ماهر ان غريب وصل فى القرايه للى مش هيخليه يسامحه ابدااا..
ماهر اترمى على الكنبه وحس بخنقه وبسرعه فك الكرافات بتاعته ورماها جمبه وبص لصورة اميره كأنه بيترجاها تساعده ..وبعدها بص للسقف وغمض عنيه بيأس ..
فرعون
البارت الثامن عشر 18
بقلم /ريناد
جميله :
ودعناام ليل وليل انا وجواهر واخدنا عربيه ورحنا على مدرسة جواهر سحبنا الدوسيه ودلوقتى احنا فى القطر متوجهين للقاهره ....
مش عارفه اعمل ايه ..مفيش قدامى غير انى ارجع الفيلا ..ياترى ماهر هيعمل ايه لما يشوفنى ..اكيد طبعا هيشمت فيا ويسمعنى كلام زى السم ، لكن مقداميش غير انى استحمل واسكت ،
اصلا انا استاهل كل اللى يجرالى عشان غبيه ...
بس لو رفضنى ورفض بنتى هنروح فين ؟! وخصوصا انى بغبائى اتنازلتله عن كل ورثى فى سبيل انى اتجوز محمد ..
ياترى هيعمل ايه لما يشوف جواهر ..وياترى هو معاه ايه عيال ..ياه ياماهر لو تعرف انا كنت بتمنى اعرف اى خبر عنك ازاى ...لكن انتا قلبك حجر وطول ال١٦ سنه مفكرتش تسأل على اختك الوحيده ولو مره ...
بعد ٦ ساعات سفر بالقطر وصلنا محطة الجيزه ...نزلنا انا وبنتى ، اتلفت حواليا ....
وشفت ازاى الناس عايشه والستات بتمشى فالشارع بحريه وثقه بالنفس ..حسيت انى طالعه من سجن دام ١٩ سنه ودلوقتى بس بشوف الدنيا من تانى ...
جواهر بتبص يمين وشمال ياقلبى وعنيها هتطلع من مكانها على البنات ولبسهم وشكلهم ...اتندمت عشان بنتى مش زى البنات دى وانا السبب ..
الاختيار الغلط مش بيتعب طرف واحد ...لا دا بيدمر حياة ناس تانيه بريئه كل زنبها انها بتتحاسب على سوء اختيار ملهاش زنب فيه ..
ركبنا تاكس ووصلنا للفيلا ...اول مابصيت للفيلا حسيت انى رجعت للعمر اللى سبت فيه الفيلا ..رجعت من تانى عيله صغيره ونفسى ارجع اتنطط والعب بفرحهه زى زمان ...ياريت لو يرجع بيا الزمن لليوم اللى خرجت فيه من هنا كنت غيرت مسار حياتى نهائى ..
اتنهدت ومديت ايدى على الباب وخبطت ...شويه والباب اتفتح ...
لقيت عم حمدان البواب ...فالاول معرفنيش ...لسه هيسأل لكنه برق عنيه لما عرفنى وقالى ...
ست جميله هانم ...يامرحب يابتى عاش من شافك ياغاليه يابت الغاليين ..
جميله :ازيك ياعم حمدان عامل ايه ياراجل ياطيب واحشنى اوى .
حمدان :بخير بشوفتك ياست البنات ...ادخلى يابتى ادخلى دا الفيلا توها اللى هتنور ...بتك الاموره دى ؟
جميله :ايوه ياعم حمدان دى جواهر بنتى الحيله ..
مد حمدان ايده لجواهر يسلم عليها جواهر مدت ايدها سلمت عليه بسرعه ورجعت ايدها من غير اى كلمه ...
بصيت ورايا على صوت اعرفه كويس بيقول صباح الخير ياحمدان...
دا صوت عم طه السواق ...الراجل دا هو اللى ربانى بمعنى الكلمه ...اغلب وقتى معاه فالعربيه ويلف بيا فالشوارع ...لو قلتله بس انى زهقانه ومدايقه ...ياخدنى ويفضل يتكلم معايا وهو سايق لغاية مايسالنى الزهق راح اقوله راح يروحنى بعد كده ...
لفيت وهو اول ماشافنى ركز شويه وبعدين شهق واخدنى فحضن ابوى مقدمات ...انا سبت الشنطه وحضنته انا كمان ومقدرتش بعدها اتحكم فدموعى ...سلمنا على بعض وعرفته على جواهر فرح بيها جدا .....اثناء كلامنا وهو واقف جاله تليفون من بيته عاوزينه ضرورى ..
استأذن منى وراح لكنه قلى هرجعلك واملص ودانك واخليكى تحكيلى كل حاجه حصلت معاكى ف١٦ سنه كلهم ...
دخلت جنينة الفيلا وبدات اتفحص كل ركن فيها ...كل حاجه قاعده زى ماهى ، نفس الترتيب هو هو من ١٩ سنه ...حتى المرجيحه بتاعتى اللى قضيت كل طفولتى تقريبا عليها لسه قاعده فمكانها...
مشيت على الفيلا ودخلت بصيت حواليا لقيتها فاضيه زى ماتكون مش مسكونه ...وقفت مكانى انا وجواهر شويه ولقيت وحده نازله على السلم ....
بصتلنا من فوق لتحت وسالت :انتو مين وواقفين هنا بتعملو ايه ...
سميه :
نازله من فوق وشفت اتنين واقفين وماسكين شنط ...وحده منهم كانت جميله اخت ماهر ...ماهر كان طول الوقت يتكلم عليها ...اوضتها قاعده مقفوله ممنوع حد يدخلها ..كل مااقوله ناخدها نفتحها لناديه يقولى لا دى اوضة جميله وهى هترجعلها ...
كان مستنيها ترجع من زمان ..كان متوقع انها مش هتستحمل جوزها ولا اهله وعيشتهم كتير وهترجع من عنده ندمانه بعد ماتكتشف حقيقته ..لكنه استنى كتير وهى مرجعتش وبرضو لسه مستنيها ترجع .
فكرت انى استغل غياب ماهر واطردها واقولها دى اوامر ماهر ..بس اخاف يعرف وساعتها ابقى فعلا حكمت على نفسي بالموت المؤكد ...
لا انا مش هعمل كده ..بس هعمل اللى يخليها هى تمشى من نفسها ..
سألت :انتو مين وواقفين هنا بتعملو ايه ؟
جميله :انا جميله اخت ماهر ودى جواهر بنتى
سميه نزلت واتخطتهم وقعدت على الكرسى بتاعها قدامهم وحطت رجل على رجل ولسه بتبصلهم نفس بصة الاحتقار ....
اها عرفتك ..ماهر كان مره حكالى عنك ..انتى اللى سبتيهم ورحتى اتجوزتى واحد جربوع من الصعيد وماهر اتبرى منك
صح ؟ انا سميه مرات ماهر
جميله :نزلت دماغى للارض وملقتش رد ارده عليها لان دى الحقيقه ...
فضلت مسافه ساكته انا وبنتى وهى قاعده قدامنا وتهز فرجلها واخيرا قالت :
اقعدو واقفين ليه ...اكيد جايين جعانين وعطشانين ...بنتك دى مش كده .
-هزيتلها دماغى ..
سميه :طيب اقعدى وقعديها وانا هروح اقول للخدامين يجيبولكم اكل .
سألتها :هو ماهر فين
سميه :مسافر ...ومش عارفه هيرجع امته بس يمكن يطول ..
سابتنا ومشيت واحنا قعدنا على الكنبه انا وبنتى والوقت يعدى ومفيش اى حد باين فالفيلا ...لا حد جابلنا اكل زى ماقالت مرات ماهر ولا حد حتى فكر فينا بكوباية ميه .
حسيت بجواهر مدايقه ومش مرتاحه وتعبت من القعده قولتلها تعالى نطلع الجنينه شويه ...
مسكت ايدها واتمشينا ..
جواهر :الظاهر مش هينفع نقعد هنا ، انا مرات خالى دى محبتهاش خالص .
جميله :ومن سمعك بس هنروح فين ملناش مكان تانى ...هنقعد لغاية مايرجع ماهر مع انى متوقعه رد فعله من طريقة وصف مرات خالك هو عرفها عليا ازاى ...
جواهر :طيب انا جوعت قوى وبطنى عماله تظوظو حاسه ان اللى واقف جارى يسمعها ..
جميله :اتنهدت وصعبت عليا نفسى وبنتى اوى ....قلتلها تعالى فيه ورا الفيلا شجرة توت حلوه اوى ودا اوانه تعالى نجيب منها توت وكلى لما تشبعى ..
لفينا ورا الفيلا ولقيت شجرة التوت حبيبتى اللى ياما كنت بقعد طول اليوم من غير اكل طول ماهى طارحه مباكلش الا توت ...
فرحت جواهر بالتوت اللى منظرة وهو على الشجره يفتح النفس ...طلعت على فرع قريب وبقت تقطف وتدينى وانا احوش فأيدى لغاية ماايديا اتملت وهى بقت تاكل فوق الشجره وانا اقولها متاكليش من غير غسيل لكن هى مش سامعه كلامى ومنزلتش غير لما شبعت .
اخدتها واخدت التوت اللى فايدى ورحت اغسله فحنافية الجنينه .
جواهر :قاعده على المرجيحه فالجنينه وسرحانه بفكر فحالنا واللى وصلناله انا وامى وياترى الايام مخبيالنا ايه ....سمعت صوت حد ورايا بيكلمنى ...
ببص لقيت اتنين شباب واقفين وبيبصولى ... فيهم واحد جامد وواحد رفيع ...
انتى مين ياقمر انتى ...بنت حد من الشغالين ؟
بصيتله ورفعت حواجبى باستغراب ...رد عليه التانى ...سيبها يانادر دى الظاهر خرسه تعالا ندخل احسن ماما تطين عيشتنا لو اتاخرنا اكتر من كده ...
نادر :لا روح انتا انا قاعد هنا ، هشم هوا شويه ...
دياب :شم ياخويا شم بس بالراحه على نفسك فالشم 😉
دخل واحد منهم والتانى جه وقعد جمبى على المرجيحه وشفته بيبصلى بصه زى اللى كان عمى محروس بيبصهالى ...اتنفضت وقمت من على المرجيحه وهمشى مسك ايدى ...
ايه ياحلوه رايحه فين ...اقعدى شويه نتعرف بس ..
-انا بحاول افلت ايدى منه وهو متبت فيها مسابهاش غير لما سمع صوت ماما بتقول ...
جواهر ايه اللى بيحصل هنا ....بصينا احنا الاتنين عليها وهو ساب ايدى و برق مره وحده وقال :
عمتو جميله !
جميله :انتا تعرفنى ؟ انتا مين ياحبيبي ...
نادر :انا نادر ابن اخوكى ماهر ياعمتو
سابت ماما التوت اللى فأيدها على الطربيزه وجت عليه اخدته فحضنها وفضلت تبوس فيه وتقوله ياغالى يبن الغالى وهو يضحك ويقولها كفايه ياعمتو كده وهى تزيد .
خلصت امى فقرة البوس وسابته وهى لسه بتبصله :
بس انتا عرفتنى منين ؟
نادر :يووووه دا بابا طول السنين اللى فاتت دى ملهوش سيره غيرك ..اصلا مفيش فحياته غيرك انتى وغريب ...
جميله :غريب مين ؟
نادر :ابنه ...قصدى اخويا ...بصلى وسأل امى :
مين دى ياعمتو ؟
جميله :دى جواهر بنت عمتك ياحبيبي ...سلمى على ابن خالك ياجواهر .
نادر :دى م الصبح بكلم فيها واسألها انتى مين منطقتش بحرف واحد لدرجة انى افتكرتها خرسه .
جميله -معلش ياحبيبى هى جواهر خجوله حبتين وبعدين احنا كنا عايشين فالصعيد وانتا عارف هناك مفيش اختلاط زى هنا ...
نادر :معلش محصلش حاجه ...
جميله :هو ابوك هيرجع امتا يانادر ؟
نادر :والله ياعمتو انا ولا اعرف بابا بيروح فين ولا بيرجع امته احيانا بشوفه فالبيت نسلم على بعض وكل واحد يروح يشوف مصالحه .
جميله :ايه دا ليه كده ؟!
نادر عملها حركه ببقه ورفع كتافه بمعنى معرفش ...بصلى وبص لماما واستأذن ...
طب عن اذنكم ادخل انا ادى التمام لماما احسن تفكر انى لسه بره ...
دخل نادر الفيلا وانا بقيت مستغربه على كلامه ...ازاى ولد ميعرفش عن ابوه حاجه ؟ ازاى ده
قعدنا انا وبنتى فالجنينه لغاية قرب المغرب وبرضو محدش عبرنا ...لغاية مالمحت عم طه جاى من البوابه علينا
طه:هاه اظن ارتحتى ونقدر نقعد مع بعض شويه ...
بصيتله بعيون مدمعه وهو بصلى وبص لجواهر وهز دماغه بفهم ...
قوليلى اكلتو حاجه ؟
هزيتله دماغى برفض ....قالى طب قومى معايا
قلتله على فين ...
قلى قومى بس ادخلى هاتى شنطك وشنط بنتك وتعالى معايا من سكات انتى ملكيش مكان هنا ...
قمت من سكات انا وبنتى واخدنا شنطنا وخرجنا ولا حد حس بينا ولا حد من اللى شافونا رجعلنا ولا فكر فينا ..
اخد عم طه الشنط مننا وحطها فالعربيه وركب واحنا معاه واخدنا فى الطريق اشترالنا اكل و عصير وميه اخدتهم منه وشكرته وسالته هنروح فين قلى اصبري بس وليكى الصافى .
اكلنا انا وبنتى وشبعنا وفضل ماشى بينا بالعربيه لغاية ماوقف قدام عماره محندقه كده ...
نزل ونزل الشنط وقال تعالو ورايا ..
طلعنا فالاسانسير للدور الرابع ووقفنا قدام شقه ...
عم طه نزل الشنط ورن الجرس وشويه وفتحت الباب بنت صغنونه زى القمر ...
عم طه :بابا موجود ياناديه ...
ناديه :ايوه موجود ياعمو ثوانى هندهولك ....ودخلت تزعق وتقول بابا كلم ..باباكلم بابا.. بابا.. بابا
بصيت لعم طه اللى غمض عنيه بحركه يطمنى بيها ...
مفيش ثوانى ولقيت الباب بيتفتح وظهر من وراه ماهر .....
**********
قاسم
احمااااه متاخدنى تفسحنى ...
احمد :ليه انشاء الله ابن اختى الصغير ؟ ولا مبتعرفش تلبس وتنزل لوحدك خايف تتوه !
محمود :يبُنى ليس هذا مقصد اخيك قاسم ..اخيكَ قاسم ُ يقصد ان تاخذه وتخرج بهِ وتكون انت المسؤوول عن الماااااده ...افهمت يااهذا ؟
قاسم :الللاااااه ينصر دينك يابنى والله احبك وانتا بتشرح افكارى بالنحوى ...
هل فهمت الان يااحمااااه ثكلتك امك .
احمد :لااااا انسى الماااااده دى منى بتاتا ولا اخرجُ بهِ ولا ادخلُ بهِ...
قاسم :متتلم يلا ايه ادخل به دا كمان خلاص روح مخاصمك ومش عاوز منك حاجه ....حووووده اتعشيت احبيبي ..اجبلك تاكل ياروحى ..تيجى معايا تفسحنى ياحياتى .
محمود :...........
قاسم :مبتردش ليه ياحوووده انتا نمت احبيبي ...
احمد :يبنى انتا بتتسنكح على الناس الغلط صدقنى ....روح على ماما واديها بوستين هتخر اللى فجيبها وناخدك انا ومحمود نفسحك فسحه متحلمش بيها ...
قاسم :وهو انا لو اخدت فلوس من امى هحتاج تفسحونى انتو ليه !
منا افسح نفسى بنفسى .
احمد :ويلك ايها الردى اتبيعنا من اجل حفنة مال ؟ ضاعت الاخوه فى غياهب الدنائه .
محمود : طب انتا عارف لو كيشت وسبتنا هيحصل فيك ايه ..سيكون الويل لك ياقاسم ..الويل لك ...الويل لك .
يعم اوعو كده محسسينى انى قاعد وسط كفار قريش جاتكم البلا ....
خرج قاسم وشويتين ورجع وهو مكشر
احمد :هاااه ابشر
قاسم :رفضت ان تقرضنى تلك العجوز الشمطاء حفنةَ من المال .ارأيتم مثل هذا الجمود والجحود من قبل ! تباً لسكان هذا البيت جميعا وتبا لحاكم هذا البيت المدعو عبسلام ً ...تباً ..تباً ...تباً...
بص قاسم لاحمد ومحمود لقاهم باصين وراه ومبتسمين ..بص وراه لقى ابوه واقف وحاطط ايديه فجيب الروب بتاعه وواقف وباصص عليه ورافع حواجبه
قاسم :بابا ...أااااأااا احنا كنا بنمثل فيلم تاريخى على فكره اوعى تفهمنى غلط والبطل اسمه عبد السلام الايوبى ،يعنى اللى سمعته مجرد تشابه فالادوار .بس انا بحب اتقمس الدور فتحس انه طبيعى يعنى ...موهوب مش بايدى 😄
عبد السلام :امممم على العموم انا كنت جاى اديلك فلوس عشان سمعتك بتشحت من امك وهى مرضيتش تشحتك ....خد شحتلك انا منها بأسلوبى ، اتعلمو الاسلوب ياجهله.. مع انه خساره فيك والله يبنى ....قال عبسلام الايوبى قال ....خرج عبد السلام من الاوضه ورجع بعد شوية فتح الباب عليهم بعنف خضهم وكان رابط مفرش الطربيزه حوالين رقابته زى الرداء وماسك غطا حله وسكينة تورته وهجم عليهم ..
التلاته جريو ورا السرير وحضنو بعض ...
محمود :مالك ابابا عاوز تعمل ايه !
عبد السلام :همثل دور محمد على باشا لما جمع المماليك فالقلعه ودبحهم .....وقررت ان انتو هتكونو المماليك ...والاوضه دى هى القلعه
يااااع ....وابتدا يلف شمال وهما يجو يمين يروح يمين يجو شمال ..
قاسم :ياماجده الحقينا جوزك اتقمس الشخصيه وهيدبحنا ....الحقي ياموده ابوكى بيلعب فالطين هاتى معقماتك وانقذينا يخرررب بييييتك
ماجده وموده دخلو عليهم الاوضه وشافو المنظر دا قدامهم :
ماجده :اصرخ والم الناس وافرجهم عليكم وعلى ابوكم اللى عاملى عيل وبيتنطط زى العيال الصغيره دا !
يقولو ايه علينا الجيران لما يسمعو اربع شحوطه بيجعرو فالشقه بتاعتنا هاه يقولو ايه ...؟
موده :يلا ياماما سيبك منهم وتعالى هعقملك ايديكى عشان مسكتى الاوكره وكملى الاكل .
ماجده :ياااااموده انتى كمان..
خرجو من الاوضه وقفلو الباب وعبد السلام رجع تانى يجرى وراهم 😂
احمد :ياعبده فرهدتنا كفايه عرفنا انك بتعرف تمثل وهنقدملك فالتلفزيون تمثل اقعد بقا ركبى زيقت من اللف
عبد السلام :دا عشان انتو عيال خيخه ركبكم بلاستيك ...انما شوفو ركب السمن البلدى دى قاعده سليمه ازاى ...وعمل جرى فالمكان
قاسم :اه يلهوى يانى يمه دنا رجليا لسه مفلوقه من تدريبات المدرسه
...بص ياعبده ...بص فعنيا جامد كده وركز فيهم ....وابتدا يعمل حركة تنويم مغناطيسى بأديه ...انتا سوبر ماااااان اللى بتطير وتنقذ الناسسس يلا اعمل ايدك كدا لقدام والتانيه حطها فجمبك ونط من الشباك اللى وراك دا يلا ٣٢١ يلا طير ياعبده ..
عبد السلام: ...لا انا محمد على مليش دعوه .
محمود :يابابا اهدى والنبى حرام عليك ...
عبد السلام :طيب هسكت وأجل المذبحه بس بشرط
الكل :موافقين
عبد السلام :هتفسح معاكم
قاسم :يابابا تتفسح معانا ايه احنا هنلف كتير وانتا تتعب مننا .
عبد السلام :مين دا اللى يتعب ياولد انتا ...انتو قولو انكم خايفين احسن آكل منكم الجو والبنات تبصلى انا وتسيبكم ....
قاسم :يبابا بنات تبصبصلك ايه ...اسكت بدال مااخدك انتا وماما لشيخ واخليه يفك العمل اللى انتا عاملهولها عشان ترضى تتجوزك ...والله انا مش عارف وحده حلوه كده وبنت ناس ووحيدة ابوها وامها وعندها عماره رضيت تتجوزك ليه ؟!
عبد السلام :تصدق يلا ياقاسم انا بسأل نفسي السؤال دا كل يوم من ساعة ماتجوزت امك😂
قاسم :هو العمل مفيش كلام .
*ماجده ابتسمت وهى واقفه بتعمل الاكل .
موده :بتبتسمى ليه ابسطينا معاكى ياميجو ...
ماجده :بضحك على ابوكى اللى من ساعة ماتولدتو وهو بيلعب ويتكلم ويهزر معاكم وينزل لمستوى عقلكم الصغير وبيلاقى متعته فأنه يدايق اخواتك الولاد لغاية مايخليهم يشدو شعرهم منه ..
موده :بابا دا اجمل انسان فالعالم ..تعرفى انا لو ..لو يعنى اتجوزت بعد الشر يعنى نفسى يبقا جوزى نسخه تانيه من بابا ..فى خفة دمه وروحه الحلوه واسلوبه المختلف عن اى راجل قابلته فحياتى ..
ماجده :ربنا يرزقك ياموده ويفك عقدتك وتتجوزى وتتهنى واشيل ولادك يابنت قلبي يارب ...
***********
سميه
طلعت فوق بعد مادخلت المطبخ ونبهت على كل الشغالين يطلعو من الباب الورانى وياخدو باقى اليوم اجازه وفضلت قاعده وسايبه جميله وبنتها قاعدين تحت ومن خلال كلام ماهر عن جميله انا متأكده انها لايمكن هتقوم وتدور لوحدها على اكل ولا شرب لو ماتت من الجوع ..بحب اوى لما احارب حد يكون عنده عزة نفس وكرامه لانى بعرف العب كويس على الحته دى .
خرجت فالبلكون بتاعت اوضتى اللى بتطل على الجنينه لقيت جميله وبنتها قاعدين فيها وواخدين راحتهم عالاخر ..شويه ودخل دياب ونادر ..دياب سابهم ودخل لكن نادر لزق جمب البنت ... ضعيف قدام البنات طالع لابوه مش بأيده .
دخلت من البلكون ورحت على اوضة دياب لقيته بيغير هدومه قعدت جمبه على السرير ...بصلى ورجع يكمل ...
شكله فيه حاجه كبيره حصلت معاكى فيه ايه تانى مش خلاص غريب وبابا سابو الفيلا وارتحتى منهم خالص ...مالك بقا
سميه :جت اللى اسخم من غريب ...عمتك جميله اللى هتتحكم فكل حاجه عند ماهر وهتتحكم فماهر شخصيا ...طبعا مش محتاجه اقولك ابوك بيحب عمتك اد ايه ..وغريب لما يحب حد مبيشوفش غيره ...استلم بقا تحكم وبرطعه فالفيلا هى وبنتها ...واحنا هنبقى ضيوف عليها من هنا ورايح
دياب :يااااربى طلعتلنا منين دى كمان ؟ هى ناقصه قرف ...
قمت من على السرير وبصيت من شباك اوضة الاولاد وشفت جميله بتتكلم هى ونادر وبعدها سابها ودخل الفيلا ....
بعدت عن الشباك وقلت لدياب مينزلش وانا هجبلهم العشا هنا هو واخوه ونزلت اخدتلهم حاجه خفيفه من المطبخ يتعشو .....
اخدتلهم العشا وطلعت وبصيت من الشباك على جميله ملقتهاش فالجنينه ..نزلت دورت عليها فالفيلا ملقتهاش لاهى ولا بنتها ولا شنطهم . .اتنهدت براحه بعد ما عرفت ان خطتى جابت نتيجه وجميله خرجت من الفيلا من غير ماحد يعرف زى مادخلت من غير ماحد يعرف ...مش فاضل بس غير انى انبه على دياب ونادر ميجيبوش سيره لابوهم ان عمتهم جات وانبه على حمدان البواب وبكده جميله بح.
*******
غريب
حاسس بخنقه غريبه بعد اللى قريته فمزكرات امى النهارده ...قمت اتسندت ودخلت الحمام وخرجت لقيت بابا خارج من اوضته واول ماشافنى جرى عليا سندنى ووصلنى لاوضتى ...بصيت على ناديه اللى من ساعة ماصحيت من النوم مختفيه ..لقيتها عماله بتعك فالمطبخ وعامله نفسها بتطبخ وداده سميره قاعده على الكرسى وحاطه ايدها على خدها وبتراقبها ...
ابتسمت على منظرها ودخلت اوضتى ونمت على السرير بمساعدة بابا وغطانى بس من غير مايتكلم ولا كلمه ...
لسه هيخرج من الاوضه دخلت ناديه بصينيه عليها طبق فيه كعاكيل وحجات والوان غريبه كده فوق بعضها وحاطه فيه معلقه ....
قربت من السرير ووقفت قدامى وهى مبتسمه وماسكه الصنيه بفخر ...انا طبختلك ياغريبوو
بصيت لداده سميره اللى جات وراها وسالتها :الطبق دا فيه ايه ياداده
داده سميره :فيه كل حاجه فالمطبخ ..فيه حلاوه ومربى وعسل ونوتيلا وقشطه ولبن وكفته ورز وعليه صلصه ومزيناه بكسبره خضره ....
غريب :برااااافو اختى حبيبتى الطباخه الفنانه المبدعه ...وطبعا انتى عاوزانى آكل من الاكل اللى انتى واقفه من ااصبح بتحضريلى فيه صح
ناديه :صححح
غريب :الله اكبر
ماهر ضحك على منظرهم هما الاتنين واستنى يشوف الموقف اللى فيه غريب دا هيتصرف فيه ازاى ...
غريب :طيب ممكن نودى حبيبتى تروح تجيبلى جبنه عشان بحب آكل العك مع الجبنه 😢
ناديه :حاضر رايح
غريب :اسمها رايحه يابنتى ...بص لداده سميره ....داده روحى هاتيلى حاجه اقدر اغفل ناديه واحط فيها اليخنى دا من غير ماتاخد بالها ...
ضحكت داده سميره وخرجت وقابلت ناديه وهى راجعه بطبق الجبنه ...
دخلت ناديه ادت لغريب الجبنه وطلعت على السرير اتربعت وحطت اديها على خدودها وبتتفرج عليه وهو بياكل من طبيخها ...
ناديه :متاكل ياله؟
غريب :منا هاكل اهو ...فينك ياداده ..تعالى بسرعه شوفينى وانا باكل ..
جت داده سميره وفأيدها كوز استانلس ادتهوله وقالتله خد ميه احسن تزور وانتا بتاكل ...
بقا ماهر وداده سميره يكلمو ناديه يخلوها تبص عليهم وغريب ياخد الاكل يحطه فالكوز وياكل جبنه لغاية ماخلص الطبق ...
ناديه شافته خلص الطبق سقفت وهى فرحانه .....براااافو غريبووو خلص الاكل كله ... كل يوم هطبخلك عشان تخف بسرعه ....
غريب :لااااا هى المره دى ومتدخليش المطبخ تانى خدى ياداده الصينيه وديها المطبخ لو سمحتى ...
ناديه :انا اوديها
غريب :انتى تعالى اقعدى جمبى هنا متتحركيش تانى ...
ماهر بصلهم وهما بيتشاكسو مع بعض وابتسم على غريب اللى فثوانى معدوده ناديه قدرت تغير موده وتخرجه من حالته ودا ان دل فيدل على ان غريب يتملك قلب صافى نقى بيرجع يصفى بسرعه رغم عمق اى جرح يحس بيه ...خرج من جمبهم وسابهم وقفل باب الاوضه وراه .
دخل الحمام بيتوضى عشان يصلى وسمع صوت جرس الباب وبعدها سمع صوت ناديه بتنادى عليه ...
خرج يشوف مين وشاف آخر حاجه يتوقع يشوفها فالدنيا ...
غمض عنيه وارتخت كل ملامحه واتنهد وبعدها فتح وبص على صورة اميره وهو حاسس لما طلب مساعدتها لبتله طلبه وبعتتله جميله .
جميله واقفه وباصه لماهر وباين على ملامحها الصدمه والشوق والحنين ومستنيه رد فعل ماهر ومستعده انها تستحمل اى رد فعل منه الا رد الفعل اللى حصل من غريب