رواية فرعون
الفصل الواحد والعشرون
بقلم / ريناد يوسف
سميه
لحظات من السكوت واحنا قاعدين على السفره قبل ماخبطه من ايد ماهر على السفره توقع وتزلزل كل اللى عليها ...
كلنا اتخضينا وقمنا من مكانا ووقفنا حوالين السفره .انا ونادر ودياب ..
ماهر بصلى بعيون بتطق شرار واتكلم وهو بيجز على سنانه :
حسابك تقل معايا اوى ياسميه ، تقل لدرجة انى مبقتش مستحمل اكتر من كده ولازم فاقرب وقت اصفى حسابى معاكى ...
وهنا دياب رد على باباه بمنتهى الغضب لدرجة ان عروق رقابته كانت بارزه من شدة العصبيه ...
كفايه بقا يابابا كفايه ...كل حاجه تحصل تحمل مسؤليتها لماما، اى حد يزعل تبقى امى هى السبب وهى اللى لازم تتحاسب ..
امى بتتحاسب طول الوقت على حجات ملهاش زنب فيها كفاياك ظلم بقا ...
ماهر :ولما اختى الوحيده اللى مليش غيرها فالدنيا تيجى بيت اخوها الوحيد ومرات اخوها تاخد عيالها وتقعد بيهم فوق وتاكل وتاكلهم وتسيب عمتهم وبنتها لوحدهم من غير اكل بعد مامشت كل الخدامين يبقى دا العدل فنظرك ؟!
لما اجى البيت ومتقوليش ان اختى كانت هنا ولا تجيبلى سيرتها معتقده بانها اتخلصت منها يبقى دا ايه ؟!
مترد ياللى بتتكلم فالظلم والمظالم لما وحده تتعامل بقلة احترام فبيت اخوها يبقى ايه ؟
دياب :واديك قلتها هى تبقى اختك انتا مش اختها هى ...يعنى هى مش مجبره انها تتقبل وجودها معاها فنفس المكان لو هى مش حابه دا ...
ياترى بقا هتعاقبها بايه على عدم تقبلها وجود عمتى معاها وهتهددها بأيه المرادى ...
اظن اننا كبرنا على انك تاخدنا وتحرمها مننا دورلك على تهديد تانى جديد
ماهر سقف بأديه :لا برافو حفظت الدرس كويس يادياب ، ياريتك بتقدر تحفظ دروسك زى مابتحفظ كلام امك كدا كنت هتطلع من الاوائل ..
دياب :عارف انى مبطلعش من الاوائل وعارف انى مش بحفظ دروسى ..
وعارف انى مش زي ابنك اللى دايما محسسنا انه احسن واحد فالدنيا ودايما بتقارنا بيه ...
ولعلمك انا مش عاوز اكون زيه ولا اشبهه فحاجه ،لان انا وانتا عارفين كويس ان غريب عنده نقص وبيكمله بالمزاكره والتفوق ....
وعارف كمان انك طول الوقت بتقف جمبه عشان ترفع من قيمته ويبقى زيه زينا ...
لكن لا يابابا ابنك من اللقيطه عمره ماهيبقى زى اولاد سميه هانم ..
ولعلمك احنا مش هنروح ولا نسأل عليه ولا هنسلم على اختك ولا بنتها ولا هنسمحلهم يجو يعيشو معانا ...ولو جبرت امى على اى حاجه تانيه انا هرفع عليك قضية حجر واجردك من كل سلطه ليك بتهددنا بيها .
ماهر راح على دياب وضربه بالقلم ودياب حط ايده على مكان الضربه وبص لابوه بنظره كلها كره
ماهر قعد على الكرسى وهو بيهز دماغه بعدم استيعاب وتصديق للى قاله دياب من شويه وبص لسميه لقاها بصاله ورفعاله حاجبها بانتصار ...
بص لنادر يشوف رد فعله على كلام اخوه لكن نادر هرب بعنيه من ابوه وبص بعيد ...
ماهر قام واخد مفاتيحه عشان يمشى وقفه صوت سميه :متنساش تجيب ناديه معاك وانتا جاى المره الجايه...مش عاوزه بنتى تفضل بعيد عنى ...
ماهر :لا يمكن هخليكى تسممى افكارها زى ماعملتى مع اخوتها ابدا ياسميه....
انتى مش بنى ادمه انتى شيطان !لكن العيب مش عليكى ..
العيب عليا انا عشان سبتك تربى الولاد لوحدك وسمحتلك تزرعى بذور الغل والحقد جواهم وكل يوم ترويها بالغيره والكره .
نادر شاف باباه بيمشى بعدم اتزان وزى مايكون هيوقع جرى عليه وسنده ...
نادر :خلينى اوصلك مكان منتا عاوز يابابا انتا تعبان ومش هتقدر تسوق ..
ماهر ادى المفاتيح لنادر من سكات واتسند عليه.... وهو ماشى بص وراه بصه اخيره على دياب وسميه لقى دياب حاضن سميه من كتافها وباصص على ابوه بتحفذ زى مايكون ديب ومستعد للهجوم فأى وقت ...
ماهر اتنهد لما تيقن ان خلاص قلب ابنه دياب سميه قدرت تملاه بالكره على آخره وختمته بختمها الخاص وقدرت تخليه نسخه تانيه منها ..امته وازاى ميعرفش ...
نادر اخد باباه وراح الشقه وفتح الباب بمفتاحه ودخل نادر وهو ساند ابوه وكل اللى فالشقه لما شافو المنظر قامو من اماكنهم وجريو عليهم والكل مد ايده يسند فماهر
ماهر هنا ابتسم ونادر حس ان من حق ابوه يحب الناس دى على اللهفه اللى شافها فعيونهم عليه ....
قعد ماهر، وداده سميره جريت جابتله ميه، واخته جميله جابتله عصير، وناديه ماسكه ايده وتبوس فيها ،وحتى غريب المدشدش جه وقعد جمب ابوه وفضل ماسك ايده بقلق ،والكل بيسأل فيه ماله وحصله ايه ،
وبيسألونى وانا مش عارف ارد واقول ايه لكن قلت انه تعب شويه وهو فالفيلا وطلب منى اجيبه هنا ....
الكل محاوطينه وحسيت بهالة حب ماليه المكان عمرى محسيتها فبيتنا ...
بصيت للزاويه بتاعت الصاله وشفت جواهر واقفه ومتابعه اللى بيحصل من بعيد من غير ماتتدخل او تنطق بحرف واحد مفيش الا الخوف فعنيها وهى بتراقب ارتباك الكل ...
شويه وحسينا بابا ارتاح وابتدا يفك ويوزع ابتسامات على الكل يطمنهم عليه ...
هنا الكل حس براحه وانا بصيت لغريب وشفت انه من حقه عليا انى اسأل عليه حتى من باب العيش والملح اللى كنا بناكله سوا...
نادر :حمداله على سلامتك ياغريب والف سلامه عليك ...
غريب :الله يسلمك ياحبيبى ..
نادر :اخبارك ياعمتو واخبار جواهر
جميله :بخير ياعيون عمتك طول مانتو بخير وسعاده
غريب حس بان ابوه وعمته عاوزين يتكلمو مع بعض قرر انه يسحب نادر لاوضته :ايه رأيك يانادر تعالا اسندنى دخلنى اوضتى نقعد شويه مع بعض زهقان من القعده لوحدى
نادر :اه طبعا ياغريب تعالا ...وقام سنده
غريب وهو داخل بص لجواهر وقلها :لو سمحتى خدى ناديه معاكى لاوضتك شويه ياجواهر ...جواهر فهمت ان غريب عاوزها تسيب المكان وبالفعل اخدت ناديه ودخلت الاوضه
داده سميره لما شافت ان الكل انسحب انسحبت هى كمان وسابت المكان وراحت على المطبخ
جميله :هاه احكيلى بقا ايه اللى حصل وصلك للحاله دى !
ماهر :سميه عملت غسيل دماغ للولاد ونقلتلهم كل افكارها المسمومه ...
جميله :على حسب مافهمت انها مش متقبله غريب معاها فالبيت صح
ماهر هز دماغه
جميله :وطبعا انتا رحت النهارده وقلتلها انى هعيش معاكم فالفيلا وخليت الحرب العالميه التالته قامت صح .
ماهر :تقريبا كده
جميله :وطبعا سميه كانت الجانب الاقوى بمساندة اولادها ليها وانتا لما حسيت بضعفك قصادهم مستحملتش لانك طول عمرك بترفض الهزيمه او حتى التنازل ..
ماهر :بالظبط كده
جميله :طب عاوز رأيي ....ابعد غريب عن الفيلا احسنله واحسنلك واحسن لكل الاطراف ....خليه هنا وخليك انتا مابين هنا وهناك وانا على حسب مافهمت ان الولد فمدرسه داخليه يعنى اغلب وقته بعيد ...
ماهر :
بس انا عاوز نفضل كلنا مع بعض عاوز كل حبايبى يبقو قدام عنيا ...اظن دا مش طلب كبير ولا امنيه مستحيله!
جميله :مش كل امنيه ياحبيبى بتتحقق بسهوله ...وان كان على نادر ودياب شويه شويه هنقربهم من اخوهم ونحببهم فبعض ومتخافش ياسيدى انا جيت يعنى انتا من هنا ورايح مش لوحدك ....
اتنهد ماهر وحط ايده على عنيه بتعب وكلام دياب عمال يتعاد فدماغه ،مره ،بعد مره، بعد مره
لغاية ماتعب وقرر انه ينام عشان يريح دماغه من التفكير شويه ،وفعلا اتمدد فمكانه وراح فالنوم قدام جميله اللى قامت من على الكنبه عشان تسمح لماهر يرتاح فنومته وقعدت قصاده وهى بتتأمله ...
شويه وقررت انها تبدا اول خطوه عشان تقرب اولاد ماهر من بعض وتريح ماهر من حوار اخوات يوسف اللى بيعانى منه دا ...
دخلت على جواهر وناديه وطلبت منهم انهم يجو وراها على اوضة غريب... وراحت لداده سميره طلبت منها تعمل هوت شوكلت للولاد وتجيبلهم طبق كيك وحلويات
وقررت انها تخلى الاولاد يقعدو مع بعض ويعيشو الجو الاسرى ويندمجو فالكلام عشان يقربو من بعض ويحصل مابينهم تآلف ووحده وحده يتحول لمحبه وتنبنى بينهم علاقه اسريه قويه محدش يقدر يقطعها ...
وفعلا الكل اجتمع فاوضة غريب وجميله كانت شاطره فخلق المواضيع الشيقه اللى تجزب الواحد انه يتدخل فالكلام غصب عنه
الكل اندمجو مع بعض وجميله طلبت من داده سميره انها تحكيلها عن الحجات المحرجه اللى كل واحد من الاولاد يعملها وهو صغير عشان يضحكو عليه شويه ...
لكن اكتشفو ان داده سميره مش حافظه غير اللى كانت بتعمله جميله فطفولتها وابتدت تحكى تاريخها الحافل بالفضايح والكل بيضحك على جميله اللى بتحاول تسكت داده سميره بكل الطرق لكن داده سميره ماصدقت اتفتحت ...
غريب وهو بيضحك : ومن حفر حفرة لاخيه وقع فيها ياعمتو ..
نادر :وانقلب السحر على الساحر .
جواهر :وكل السنين اللى عدت دى دوشانى بطفولتك وتقولى وانا صغيره كنت نسمه وانا كدك كنت ملاك واحنا مكناش عيال واتاريكى كنتى خارباها ياجميله ؟!
الكل ضحك على كلام جواهر وجميله بعدها قعدت متكلمتش واضطرت انها تسمع فضايحها على لسان داده سميره وهى ساكته ومفيش غير الابتسامه والنظرات الجانبيه منها ورا كل حادثه تتحكى ☻
فضلو قاعدين القعده الجميله دى ومحسوش بالوقت وجميله ارتاحت ان غريب ونادر استمتعو جدا بالقعده
وحتى جواهر اندمجت لما لقت امها مندمجه فالكلام ومنطلقه فالهزار ودى اول مره جواهر تشوف الجانب دا من مامتها و اخدهم الوقت ومحسوش بنفسهم غير وكل واحد نايم فمكانه ..
غريب ونادر وجميله على السرير ...وجواهر وناديه وسميره على الارض ...
اتقلب ماهر وقام لصلاة الفجر وشاف باب الاوضه مفتوح شويه بص منه وشاف المنظر ابتسم عليهم ودخل غطاهم عشان الدنيا سقعت وقفل الاوضه عليهم وراح اتوضى وصلى ودعا ربنا انه يزرع الحب فقلوب ولاده لبعض ......
***********
دياب
امى عرفتنا حقيقة بابا وكشفته قدامنا وعرته من كل التدين والالتزام والمثاليات اللى بيبيعها علينا ...
ساعتها سقط من نظرى ومبقاش ليه عندى اى ذرة احترام ..
ماما فهمتنى ان فلوس بابا من حقى وشركاته المفروض تبقى تحت ادارتى انا بما انى الكبير ولازم انزل الشغل واعرف كل كبيره وصغيره عشان اعرف اتصرف فالوقت المناسب وخصوصا ان تهديد بابا الوحيد لماما انه يجردنا من كل حاجه ويكتبها لغريب .....انا بقا هتغدى بيه هو وغريب قبل مايتعشو بينا وهعرف ازاى اسرسب كل حاجه من بين ايديك يابابا واخليك انتا وسى غريب بتاعك تستنو منى الحسنه ...
انا هوريك ازاى الواحد يتسول من ابنه او اخوه زى ماكنت عاوز تشوفنا بنتسول من غريب ...
ابتديت اول خطوه ..لبست ونزلت فميعاد الشغل ورحت على الشركة لبابا وطلبت منه انى اشتغل ...
مشفتهوش فرح بأنى كبرت ونزلت عشان اشيل عنه زى مابسمع الابهات بتعمل وتتمنى ....ولا حتى سألنى كليتى هعمل فيها ايه
كل اللى شفته منه ابتسامه وهو مديق عنيه كأنه بيقولى فاهمك ...
رن جرس على المكتب وجاتله سكرتيره طلب منها انها تاخدنى وتودينى لوظيفتى اللى اختارهالى بابا حبيبي واللى شاف انها تليق بأبنه الغالى ... موظف فالارشيف بتاع الشركه ...
حسيت ساعتها بأهانه مابعدها اهانه ...ازاى يقبل على ابنه انه يشتغل موظف صغير ويتحكم فيه اللى يسوا واللى ميسواش !
بسيطه ياماهر بيه بسيطه وكله هيبقى سلف ودين ...
***********
سميه
دياب خلاص بقا زى منا بتمناه ...
مش قادره اوصف فرحتى بيه لما وقف قصاد ابوه عشانى ودافع عنى وسمع ماهر كلام يقسم الضهر ....ياااه على السعاده اللى حسيت بيها لما شفت صدمة ماهر وانكساره ....ولسه ياغريب اللى زرعته فيا وعيشتنى فيه سنين هخليك تعيشه وهخلى اولادى يسقوك من نفس الكاس ....
فهمت دياب انه ينزل الشغل مع ابوه وفعلا حبيبي سمع كلامى ونفذه....
ونزل الشغل
ماهر الغبى اتصرف اكتر تصرف خدمنى وصب فمصلحتى لما شغل ابنه شغلانه حقيره فشركة ابوه ودا خلى حقد دياب على ماهر يكبر اضعاف بدون اى مجهود منى ....
ودا اثبت لدياب كلامى عن ابوه وخلاه متأكد مليون % ان ماهر مفيش فحياته حد مهم غير غريب وبس ...
نادر من يوم ماراح يوصله ومن ساعتها حاله اتشقلب ...حسيت بخوف عليه من ماهر وجميله خفت يكونو بيعملو للولد غسيل مخ وانهم يحاولو يسحبوه لجبهتهم والظاهر ان اللى خفت منه حصل ....
الولد جايلى من هناك تانى يوم العصر واقوله كنت فين يقولى كنت فبيتنا التانى
والغريب انه ابتدى يخرج لوحده من غير اخوه ويغيب ساعات كتير وبعدها يرجعلى شبعان ومبسوط ومنتشى ؟!
***********
ماهر :غريب اعمل حسابك هننزل النهارده عشان نروح لدكتور قلب كويس عشان هكشفلك عنده ...
غريب :ليه يابابا انا قلبى مش تعبان !
ماهر :امال ايه الوجع اللى بتحس بيه دا وتفضل تدلك فقلبك ...على فكره مامتك كان عندها القلب ياغريب .
غريب :بس انا مش بحس دايما بالالم دا غير لما ازعل جامد غير كده مبحسش باى حاجه حتى مع اقصى مجهود بدنى ..
ماهر :غريب قلت هنكشف ونطمن يعنى هنكشف يلا خلينى اساعدك تغير هدومك .
جرس الباب رن وناديه فتحت وطلع نادر اللى ع الباب .
ناديه :ادخل يانادر ..بابا ..غريبو ..
عمتو نادر جه .
نادر :اوعى ياقوزعه من قدامى وخلينى ادخل وبعدين ابقى جمعى الكل .
ماهر:تعالا يانادر ياحبيبي ادخل
دخل نادر وعنيه بتدور فكل الشقه على حد معين الشخص دا بقت شوفته كل يوم ادمان عند نادر (جواهر ) اللى مبقاش يحس باليوم اللى ميشوفهاش فيه ويملي عنيه بجمالها ...
نادر بعد مادور بعنيه وملقاش اللى بيدور عليه دخل لابوه وغريب ..
ماهر طلع غيار لغريب عشان يلبسهوله ورايح عشان يساعده .
نادر :ايه هتلبسه هدوم خروج ليه !
غريب :عاوز ياخدنى للدكتور ياسيدى وبقوله معنديش حاجه مش سامع الكلام ..
نادر :لا طالما دكتور والموضوع يتعلق بصحتك لازم انتا اللى تسمع الكلام .
ماهر :حبيبى ندوره ...ايوه كده خليك دايما واخد صف ابوك ..
نادر :خلاص يابابا سيبهولى انتا وانا هغيرله هدومه غصب عنه واتفضل حضرتك عشان تلبس ...
ماهر :تمام هروح واقول لعمتكم تلبس هى كمان وتلبس البنات عشان نخرج كلنا ونتعشى مع بعض بعد مانكشف لغريب
نادر سقف بأديه:اهو هو ده الكلام المظبوط ...خروج وعشا وفسحه ..اموت انا فالسنكحه والسرمحه ..
خرج ماهر وفعلا الكل لبس ونادر غير لغريب وخرجو كلهم ماعدا داده سميره اللى رفضت الخروج معاهم وفضلت فالبيت ...
جميله وجواهر وناديه فضلو فالعربيه
ونادر وغريب وباباهم طلعو للدكتور بغريب ...
عند الدكتور ...
الدكتور :قوم ياغريب
غريب قام من على سرير الكشف وقعد قدام الدكتور بمساعدة نادر وابوه
الدكتور :قولى بقا التعب اللى بتحس بيه دا ابتديت تحس بيه من امته .؟
غريب :من وانا صغير يادكتور كل مازعل بحس بنغزه فقلبى جامده شويه وبتروح ..
الدكتور :طيب بص ياغريب انتا معندكش اى مشاكل فالقلب ...بمعنى ان كل وظائف القلب الحيويه شغاله وزى الفل ....
ودا واضح جدا قدامى
ولو كنت شكيت فأى حاجه مش طبيعيه كنت هحولك اشاعات ونعمل كل اللازم ...لكن رسم القلب اللى قدامى دا تمام وكل حاجه تمام لكن .
انتا عندك مشكله من نوع خاص :
قلبك بيتأثر بالمشاعر القويه زى الفرح الشديد او الحزن الشديد ...وفى الحاله دى القلب كل مايتعرض لنوبات اكتر بيبتدى يتأثر مع الوقت وتحصل معاه مشاكل تانيه حيويه ...
بمعنى ان كتر الحزن هيضعف قلبك ...
ابعد عن اى حاجه بتأثر عليك وبتوصلك للاحساس اللى بتحس بيه دا واكيد انتا ادرى بالحجات دى اكتر من اى حد غيرك ..
خاصم الحزن ياغريب من النهارده وصاحب السعاده ولو مش موجوده حاول تصنعها لنفسك ...
مش هكتبلك علاج عشان علاجك هيكون فتغيير نمط حياتك ....
افرح لكن برضو حتى الفرحه تكون باعتدال ...
ماهر شكر الدكتور وخرجو وغريب شاف ان العلاج اللى وصفهوله الدكتور هو اصعب علاج فالعالم ...
ازاى هيدور على السعاده والفرحه وسط حياه كلها هموم ..
نزلو العربيه وطمنو جميله وطلعو على المطعم اتعشو وانبسطو كلهم ماعدا جواهر اللى برضو واخده جمب من الكل ودايما على الوضع الصامت ،ودا مجنن خالها ماهر ومش عارف يعملها ايه عشان تخرج من حالتها دى ...
نادر :
من اول يوم وصلت فيه بابا للشقه اللى قاعد فيها مع عمتو وغريب وانا لقيت هناك حاجه عمرى معرفتها فبيتنا ...لقيت الحنان ...
شفت عمتو جميله بتهتم ازاى ببابا اهتمام امى عمرها ماهتمته بيه ..
لقيتها بتهتم بغريب وبكل تفصيله تخصه كأنها امه ...ومش بس كده ..دى بقت بتهتم بيا انا كمان ..
بتدرس ايه حابب دراستك مين صحابك ايه هواياتك كل دى حجات من وجهه نظر ماما حجات تافهه وميتسألش عليها ..لكنها متعرفش ان الحجات التافهه دى بالنسبالى هى حياتى ..
كمان عرفت منى بحب اكل ايه وبقت كل يوم تعملى اكله بحبها وبقيت لازم اتغدى معاهم كل يوم ..
حتى غريب وبابا وناديه كل واحد كانت بتعمله الحاجه اللى هو بيحبها وتتعب عشان ترضى كل الازواق ...
خلتنى احب القعده وسطهم وروحهم الحلوه ...البساطه وعدم التكلف فالكلام والافعال ..التلقائيه فالمعامله
والاهم والاغرب ..بابا ماهر اللى بيهزر ويضحك ودمه طلع خفيف بطريقه مش معقوله ...كأنى بكتشفه من جديد ..كانه اب تانى غير اللى كان معانا فالفيلا واللى حكت لنا عليه ماما حاجات فظيعه ..
قربت من غريب ولقيته طيب اوى وطبعه هادى مش مرغم على الهدوء وعدم الكلام زى ماكنا فاكرين ان ماما بترغمه على دا ...
ولما قعدت معاه واتكلمنا مع بعض اكتشفت ان عقله كبير اوى وبيعرف فكل حاجه ، وله فلسفه عجيبه فالحياه ....
بالرغم من انه اصغر منى الا انى بحس جمبه انى الاصغر عقلا وفهما وادراكا ..غريب دا طلع غريب فعلا ...
وناديه كمان اكتشفت انى كنت بعيد عنها ومعرفش ان اختى بالحنيه والطيبه دى ..دى فاكره نفسها ام غريب وبتهتم بيه طبعا على اد معرفتها، بس دى حاجه حلوه اوى
حسيت انى فوت الاحاسيس الجميله دى كلها على نفسى طول الوقت اللى عدى .....
احلى حاجه بقا لما لقيت حد اثق فيه واقدر احكيله ادق اسرارى وانا مطمن ومتأكد من ان عنده الحل لجميع مشاكلى ....عمتو جميله ..
لو حد طلب منى فيوم وصف لعمتو جميله هوصفها فكلمه وحده (الاحتواء) الكلمه دى اتخلقت مخصوص عشانها ...
شفت صورة ام غريب ..بصراحه صورتها بتحكى عنها ... تحس براحه نفسيه وانتا بتبص لصورتها ..قلت لنفسى مابالك بقا لو عاشرتها ...اكيد بابا معذور فحبه ليها وتفضيله ليها على ماما ....مفيش طبعا ادنى وجه مقارنه بينها وبين ماما وخصوصا بعد ماغريب فتحلى قلبه وحكالى حكايتها هى وبابا بصراحه اتقهرت عليها اوى وعلى بابا كمان ...والاكتر بقا على غريب ...
حسيت مع الوقت ان فيه رباط قوى بقا بينى وبين الناس دى مش عارف اتبنى فالكام يوم دول ولا هو كان موجود من الاول وكان محتاج بس شوية قرب بينا عشان يقوى ويظهر
من الآخر ..انا حبيت عيلتى .
**********
غريب
انا النهارده اسعد انسان على وجه الارض عشان فالوقت اللى عرفت فيه انى ماما سميه مش امى وانى مليش ام ربنا بعتلى احن ام فالدنيا
عمتى جميله ...
الست دى عوضتنى فعلا عن حنان الام اللى طول عمرى محروم منه وبدور عليه عند الانسانه الغلط .
ومش بس بوجودها لقيت حنان الام بس لا دنا كمان على اديها وبفضلها شفت حب الاخ ....
اخويا نادر اللى اقدر دلوقتى بس اقول انى عندى اخ اسمه نادر قولا وفعلا ...
عمتى قربته منى ومن بابا واتعلقنا بيه وهو اتعلق بينا جدا ...
فعلا من يوم ماعمتى دخلت حياتنا وحياتنا اتغيرت للاحسن .
الايام بتعدى علينا بسرعه والاجازه قربت تخلص لكن المشكله هرجع ازاى بدراعى المكسور ده ..بابا راح اخدلى اجازه مرضيه وقدم التقارير والاشعات والاداره وافقتلى على الاجازه ..لكن المشكله فقاسم لما يرجع ميلاقينيش هناك اكيد هيقلق عليا ...قررت انى اروحله بيته واقعد معاه شويه قبل مايرجع المدرسه واعرفه الظروف واشبع منه اصله وحشنى اوى ....
فرعون
البارت الثانى والعشرون 22
بقلم /ريناد يوسف (صاحبة السعادة)
ليل
الايام بتعدى عليا زى بعضها مفيش جديد غير بس مؤمن ودا وجوده فحياتى زى عدمه ...ياجى على عشيه ياكل ويشرب ويمشى ...حتى الكتب اللى قلى اقريهم وابقى فهمهمنى اجى اتكلم معاه يقولى افهمى انتى كأنى فهمت انى ...
ودايما عنيه فالارض عمره مايغلط ويبصلى فمره ابدا
وانى الوضع دا تاعبنى والهم الكبير ان ابوى وامى جهزو كل حاجه وجوازى كمان اسبوع يعنى مرارى طافح ...
********
جنه
خلصت كل حاجه محتاجها الفرح وكله بقا تمام ومش فاضل غير بس نخلصو الخبيز وبعدها بت عمرى تتجوز وافرح بيها والناس تغنيلى افرحى يام العروسه ...
طاهر كمان فرحته متقلش عن فرحتى ومعدش حيلته كلام غير عن مؤمن ....حسيت انه فرح بيه وحبه زى مايكون ولده اللى اتمناه وربنا مأردش بيه يكون من صلبه ...
الحمد لله محتاجناش للغنمات فحاجه وقاعدين زى ماهما ببركتهم ..اصل اهل البلد عملو الواجب وزياده ومقصروش معاى بنقطه ولا مساعده ....
انى منكرش ان مؤمن واد زين ومعدل وسيد الشباب كلهم بس برضو مش مرتاحه لحتة انه معيبصش لليل واصل ...دنى حتى بفضل مراقباه طول القعده عشان يرفع عنيه ويبص للبت ..ابدا ...ايه ديه كسوف يعنى ولا ادب ولا دين ولا كره ولا ايه بالظبط ...
يلا كلها كام يوم وتبقى مرته ويورينى هيفضل منزل عينه فالارض ولا بعد الجواز هتبقى عينه تدب فيها رصاصه!
***********
نادر :بقولك ياغريب متيجى نخرج .
-نخرج نروح فين
نادر :يعم اى حته نتمشى نتفسح نقعد على الكورنيش ونتفرج على ال...وعمل بأديه حركه يوصف جسم البنات ...على الدره المشوى
غريب بأبتسامه جانبيه خفيفه :الدره برضو ؟
نادر :يعم سيبك من الدره خالص نشم هوا بس ،...انتا ايه مبتزهقش من قعدة البيت خالص ...
غريب :لا متعود على قعدة البيت انا مبزهقش ...بص لو عاوز تخرج تعالا هاخدك ونروح لحد هتحبه جدا ..
نادر :مين ..فين ...ياااالااا
غريب :اهدى شويه بس وتعالا ساعدنى البس وننزل محسسنى انك مبتشوفش الشارع اشحال لو مكنتش ليل نهار فالشارع مبتدخلش البيت
نادر :لا معاك انتا الامر يختلف ...
عاوز نخرج مع بعض واشوفك فالاماكن المفتوحه بتبقى عامل ازاى ..
غريب :بعكس الوان زى البسفور ...
هبقى عامل ازاى يعنى ...خلاص كفايه كده حلو ياله بينا ....
غريب ونادر استأذنو بباهم واخدو العربيه ونادر ساق ...ووصلو بناء على تعليمات غريب اللى طول الطريق مبتسم ونادر يسأله مبتسم ليه وغريب ميردش ...
وقفو قدام عماره راقيه غريب طلب من نادر يركن العربيه وينزل ...
نادر نزل من العربيه وهو عاقد حواجبه وراح فتح الباب لغريب وساعده ينزل : انتا جايبنى فين ياغريب
غريب :اطلع بس وفوق هتعرف .
نادر :انزل وفوق هتعرف ؟ ايه دا ياغريب انا قلتلك نتفرج بس ..انتا طلعت عملى اوى ياعم ..
غريب :انا سمعت عن سلاكة الودان وسلاكة السنان لكن اوعدك اول مااسمع انهم عملو سلاكه للدماغ هشتريها عشان اسلكلك بيها دماغك من الافكار الوسخه اللى فيها ...
بقا انتا اخ كبير وقدوه انتا ...
وسابه وطلع العماره ونادر طلع وراه وهو مش فاهم حاجه ...
غريب وقف قدام شقه ورن الجرس وبعدها بدقيقه وحده الباب اتفتح وغريب ابتسامته وسعت لما شاف موده اللى عرفها اول ماشافها من وصف قاسم ليها ...
موده بصتله ولسه هتسأله هو مين لكنها عدلت النضاره وزعقت باستغراب :فرعون ؟!
غريب استغرب عشان عرفته ولسه هيسأل على قاسم لقى موده بتنده عليه بصوتها كله :
قاسم ياقاسم ...انتا ياولا ياقاسم
قاسم خارج من المطبخ ماسك خياره بياكل فيها :
ولا ؟!...حظابط قاسم العو على سن ورمح تقوليله ولا ...وحياتك ياموده اول مااتخرج بس وعينونى فقسم لاول وحده ازفر بيها الزنزانه تكونى انتى
موده :اتكتم بس وتعالا شوف مين اللى جالك ....
قاسم :مين يعن.....ولسه هيكمل لقى غريب قدامه برق عنيه وكان واخد قطمه من الخياره لسه فبوقه مبلعهاش ووقف متصنم ثوانى قبل مايفتح بوقه والخياره توقع منه ويصرخ ويجرى على غريب ....
قاسم :فرعون حبيبى اخويا ...انتا عرفت عنوانى ازاى ...ولما انتا تقدر تعرف عنوانى مجتنيش ليه من زمان .
يلا انتا واحشنى اوى اقسم بالله تعالا ادخل .... ايه اللى دشدشك كده ومين الباشا اللى معاك دا ..
غريب: اولا اللى دشدشنى حادثه ثانيا دا نادر اخويا
قاسم :اهلا وسهلا تشرفنا يانادر بيه باشا ...والف سلامه عليك ياحبيبي ياريت اللى فبالى وانتا لا ..اتفضلو ادخلو ...
موده زمجرت لانها مش بتدخل حد البيت من غير ماتعقمه وغريب عارف دا وضحك وفضل فمكانه ...
قاسم بصلها بزغره ورجع يتكلم معاهم :متدخل يبنى انتا وهو اتسمرتو كده ليه
موده :عمممممم
نادر :ياعم ندخل فين متشوف اللى بتزوم دى كل ماتقولنا ادخلو ...
غريب:استنى ياعم نتعقم الاول قبل ماندخل عشان نظام موده هانم ميبوظش ....
قاسم :موده ايه ونظام ايه انتا تدخل بالكوتشى تلف البيت كله ياجدع دانتا فرعون قلبي ادخلو ومتخافوش هى بتزوم بس ...دا اخرها مش هتعض يعنى
نادر هيدخل لكن غريب وقفه بأيده :لا بقا انا مصمم اننا نتعقم الاول وهنقلع الكوتشيهات على الباب كمان ...
موده بصت لغريب بأعجاب وقالتله وهى بتعدل النضاره :على فكره انتا انسان محترم وفعلا تستاهل كل كلمه قالها قاسم عليك وتستاهل حبه ليك وتستاهل التعقيم ثوانى وراجعالكم .
قالت كده بسرعه ودخلت الحمام وهى بتعدل نضارتها مره تانيه ..
نادر :انا مش فاهم حاجه احنا هنا فين وايه اللى بيحصل دا ؟!
غريب :احنا هنا فبيت صاحبى وحبيبى وشريك سكنى قاسم ودا بيتهم وهما هنا ماشيين على نظام قاسى من التعقيم والحمايه مسؤله عنه البرنسيس اللى دخلت دلوقتى دى واللى بتكون اخت قاسم واسمها الانسه موده ....
موده سمعت كل كلام غريب وسمعت هو عرف اخوه عليها ازاى وعنيها طلعت قلوب واتعجبت على الاسلوب واللباقه فالكلام والشياكه
وقالت لنفسها :اهى دى الناس ولاد الناس مش عبسلام مخلفلى شوية زبالين وفرحانلى بيهم ..
عقمت غريب ونادر ودخلو البيت اخيرا تحت نظرات قاسم اللى هتحرق موده على الاحراج اللى احرجتهوله بوسواسها القهرى دا قدام غريب واخوه ....
دخل غريب للبيت اللى ياما اتمنى يدخله ويتعرف على اهله اللى عارفهم واحد واحد من كلام قاسم عليهم ....
لكن المفاجاه انه زى ماهو يعرفهم طلعو هما كمان يعرفوه برضو من كلام قاسم عليه ...
اتعرف عليهم واتعرفو عليه وحبوه جدا وزعلو عليه لما شافو دراعه مكسور وهو كمان حبهم وحتى نادر حب قاسم اوى واعجب بشخصيته المرحه
بعدها ااتفقو هما الاتنين على غريب واستلموه تريقه وهزار وهو بس رافعلهم حاجبه ومش قادر يرد عليهم قدام الكبار لانه متعودش على كده وهما استغلو الحته دى اسواء استغلال ...
ماجده مرضيتش تسيبهم من غير مايتغدو معاهم ودا كان راى عبد السلام برضو ، وقاسم مسك فيهم عشان يقضو مع بعض اطول وقت ممكن ...
موده بقا اندمجت مع غريب اوى وعجبها طريقة تفكيره وتقله ورزانته وفهمه ووعيه للامور .
اما محمود واحمد اصرو على غريب ونادر انهم ياخدوهم يفسحوهم على حسابهم ويخرجوهم ويخرجو معاهم ودى كانت خطتهم لسحب مبلغ مالى محترم من خزينة المنزل اللى هى ماجده وبالفعل الخطه نجحت ...
ماجده ادتلهم مبلغ محترم وطلبت منهم يرفعو راس اخوهم قدام زمايله ويفسحوهم فسحه معتبره ..
الاتنين ضربو الفلوس فجيبهم وخرجو كلهم راحو ع الكورنيش واكلوهم دره مشوى ...
نادر وهو بيبص للبنات :شوف سبحان الله لفينا لفينا وبرضو رجعنا للدره ..انا فيا حاجه لله ربنا بيحققلى كل امنياتى ..
غريب :يابنى معاك اخت غض بصرك عشان غيرك يغض بصره عنها ..
نادر :ولما الناس تغض بصرها عن اختى قولى بقا هتتجوز ازاى ها ؟
اللى هيتجوزها دا مش لازم يشوفها ويدرس تفاصيلها واخلاقها عشان تعجبه ويخطبها .....عرفت بقا انى بفكر فمستقبل اختى وبخلقلقها فرص عشان تلاقى اللى يعبرها.
محمود :انا اقتنعت !
احمد :وانا اوى ! ومن هنا ورايح هبص عشان الاقى حد يبص لموده وياخدها ونخلص منها ..
غريب بص لنادر:عندك قدره فالاقناع والجر للمعصيه تفوق قدرة الشياطين
.........
الخمسه سهرو مع بعض ضحك وهزار وانبسطو جدا وقاسم متفاجئ ومستغرب على غريب اللى اتحول ١٨٠ درجه وبقى يضحك ويتصرف طبيعى واختلط بسرعه مع احمد ومحمود وشاف منه وش تانى خااالص غير اللى كان فالمدرسه ..
قاسم :والنبى يانادر وهو راجع المدرسه متطفو زرار الفرفشه بتاعه سيبوه كده عشان الوضع الصامت بتاعه مقرف اوى ....او بص عرفونى طريق الزرار وانا اطفيه واشغله براحتى ...
*********
ماهر
فرحان اوى باللى عملته جميله مع الاولاد وفرحان بحبهم لبعض وعشان كده لازم افرحها زى مادخلت الفرحه على قلبى بأى تمن ...
ماهر :جميله ...جوجو ..تعالى عندى ليكى خبر حلو هيفرحك ...
المحامى رفع قضية طلاق على جوزك محمد والجلسه بعد يومين وهتطلقى غيابى .
جميله طارت من الفرحه وحضنت ماهر وباسته فخده ...
ماهر :ودا ورثك من ابوكى حولتلك نصيبك فالشركه لفلوس سايله وقدرت نصيبك فالفيلا وفكل الاملاك وحطيته بأسمك فالبنك ودلوقتى ياجناب المليونيره تقدرى تتصرفى ففلوسك زى متحبى ...
جميله حضنته مره تانيه وباسته فالخد التانى ...
ماهر :جميله محدش يعرف انى حطيت فلوس بأسمك او انك اخدتى نصيبك من الورث اصلا ...خلى الكل معتقد انك لسه ليكى حق فكل حاجه وليكى حق التدخل فأى وقت
فهمانى
جميله :فهماك جدا ياماهر ..
ماهر :ودلوقتى غريب هيرجع مدرسته واحنا لازم نرجع الفيلا عشان الشقه دى ديقه علينا ...
جميله :ديقه علينا ولا حاسس اننا اقتحمنا محراب زكرياتك واستولينا عليه ؟
ماهر :اكتر حد بيفهمنى فالدنيا هى انتى ...وبعدين بصراحه اميره واحشانى جدا وليا كتير مقعدتش معاها لوحدنا ....قالها وهو بيبص لصورة اميره ويبتسم ...
جميله ابتسمت على اخوها وبصت بعيد وهى بتفكر ازاى هتقدر تعيش مع سميه فبيت واحد وقررت انها هتجَمع من داده سميره اكبر قدر من المعلومات عن سميه عشان تعرف تلاعبها بنفس مستواها ....
*********
مؤمن
ياحامد مش قادر كل ماافكر انى هقربلها ببقى عاوز ارجع دنا مش بطيق ابص عليها يخرب بييييتك
حامد :يامؤمن اخزى الشيطان داالنهارده دخلتك والناس مستنيينك عيب قوم شوك جلابيتك ويلا بينا على بيت طاهر ....
مؤمن :الهى يدخل عليك دم حامى ياحامد على الورطه داى ...يبوووى هعمل كيف انا دلوكيت .؟
حامد :ياخى متكبرش الموضوع للدرجادى .. خد امسك القزازه دى قربعها اول ماتدخل الاوضه مع ليل وبعدها مش هيفرق معاك شكلها ولا لونها ....
مؤمن :هتعمل ايه القزاااازه فليل ياحاامد هتعمل ايه ...
حامد :له تعمل كتير قوى بس انتا اشربها على بوقين تلاته وخد حط حتتة الحشيشه دى تحت لسانك وانى متوكد ان لو طاهر جه قدامك مش ليل هتخلص معاه ...
مؤمن :طب والله طاهر احلى من بته ياريت اتجوزه هو بدالها ...
حامد :شفت مش قولتلك الصنف ديه حلو اديك سكرت من قبل ماتشرب😂 ...
مؤمن :لبست وحطيت القزازه فجيب الجلابيه واخدنى حامد ورحنا بيت طاهر ودخلنا المندره كتبنا بالسنه وبقيت جوز ليل 😢
قعدونى جمبها ومغطيين وشها بالبوشيه والحريم كلها شغاله تهيص وترقص وتغنى وانى حاطط ايدى على خدى وعبص عليهم ونفسى اقوم اعفص عليهم واجرى لبره البلد ومحدش يعرفلى طريق ....
الفرح خلص وجنه قومتنى انى وليل ودخلتنا الاوضه وسدت علينا الباب
انى لقيت نفسى دخلت فالجد وقلبى بقا زى الطبل ....بصيت حواليا لقيتهم محضرين وكل اتلفتت يمين وشمال وطلعت القزازه وقعدت آكل واشرب زى المسروع ....
بعد ماخلصت بصيت على ليل وقلت :
الله يحرق ابوك ياحامد وابو قزازتك المضروبه دا البت قاعده زى ماهى وانى لساتنى واعى لكل حاجه ....
*********
ليل
النهارده فرحي انى ومؤمن وجنه لعبت بحالى لعب ...فرفرت فيدها وهى بتجلى وتنضف وتسبح وتفرك وتعمل حجات العرايس ..
فين وفين وبطلوع الروح خلصتنى .. بس ايه بصيت فالمرايه بعدها .....ملقيتش اي حاجه اتغيرت 😂بصراحه صعب عليا تعب امى اللى تعبته عليا عالفاضى ...
مكنتش حاسه بفرحة العرايس اللى بيتكلمو عليها وعشوفها فعنين البنته وهى لابسه الفستان الابيض وعتدس فوشها بالطرحه من الكسوف ..
انى كنت حاسه ان فرحتى ناقصه ..يمكن لو كانت جواهر جارى كان كل حاجه اختلفت ويمكن كنت حسيت بشوية فرحه ....
كل اللى جو الفرح بنته وحريم اول مايشوفو شكلى فالفستان الاوبيض اللى عاكس سوادى يضحكو ...
لدرجة ان امى اتدايقت منهم ونزلت الطرحه على وشى وقالتلى مترفعيهاش تانى لما نشوفو لؤم الحريم ديه ....
دخل مؤمن هو والرجاله والمأذون وكتبولى بالسنه والرجاله طلعو مقعدش غير مؤمن فالبيت ...حتى ابوى قال انه هيبيت حدا واحد صاحبه النهارده عشان ناخدو راحتنا ...
مؤمن جه وقعد جارى وحط يده على خده زى اللى طحينه اتكب منه ...
خلصت الهيصه والكل روح بعد مااتفرجو وعيبو واتعشو وضحكو عليا شويه ....
مفضلتش غير بس كام مره مع امى يلمو البيت اللى اتشقلب حاله ديه ..
دخلونا الاوضه انى ومؤمن وفضلت واقفه وباصه عليه من تحت الطرحه وهو عنيه بتشرق وتغرب فالاوضه وبعدين شاف الوكل ونزل عليه زى مايكون عمره ماشاف وكل الحزين ...يخرب مطنك دانى كل يوم اطيبلك زفر يبن المفجوعه ...
دعبس فجيبه وطلع قزازه وفضل يقربع فيها مع الوكل لغاية ماخلصها وشبع ....قام بعد ماشتم على حامد معرفش ليه ومسح يده فجلابيته وجه عليا ولف حواليا وبعدين وقف قدامى وقلع جلابيته ورماها على السرير
ومحسش الا وانى متشاله ومهبوده على السرير ومؤمن فوق منى ورامى تقل جسمه كله عليا لما كتم نفسى ...بقيت مش عارفه ازيح فيه من علي ولا اشيل اللى على وشى وكاتم على نفسى بزياده ...
بعد شويه حسيت ان اللى امى فهمتهولى حصل بس حسيت بوجع عمرى ماحسيته قبل اكده ...
مؤمن بعد عنى وانى بقيت الم فالفستات واغطى نفسى ودموعى نزلو وانى شايفه مؤمن نزل وقعد جمب السرير وسند ضهره وغمض عنيه كأنه كان شايل حمل فوق كتافه وانزاح ...
رفعت الطرحه من على وشى وانى حاسه ان اى جرح وكل كلمه عفشه حد سمعهانى فيوم فكوم ...وان جوزى يدخل عليا وانى وشى متغطى عشان ميشوفهوش دا كوم تانى خالص ....
طلع مؤمن بعد شويه وانى دموعى موقفتش وبعد ماطلع دخلت امى وكام وحده معاها واول ماشافو البشاره باركولى وامى بقت تحبحب فيا وبقو يزغرتو وكل وحده تعلى على التانيه كأنهم فمسابقه ...
مخلصوش زغريت وسمعنا ضرب نار بره خلانى نطيت فحضن امى
امى ضحكت وخدتنى على الحمام وصبتلى وسبحتنى وبعدها كلفتتنى زين بالبشاكير والهدوم واحنا فعز الحر ولما سألتها ليه عتعمل اكده قالتلى انتى دلوكيت عضمك مفتح ولو خدتى برد عضمك يقعد طول العمر يصل عليكى ..
رجعتنى لاوضتى اللى بقت دلوكيت اوضتى انى ومؤمن واول مادخلت قفلت الباب ومشيت ...
دخلت وشفت مؤمن متمدد على السرير وفارد اديه ورجليه وبيشخر حاولت ا نى ازحزحه عشان انام جاره مقدرتش ...كان عامل كيف القتيل ...فضلت باصه عليه وانى عحاول اتخيل شكل حياتنا الجايه هتكون كيف ....