رواية ست الدار بقلم اميره اسامه
الفصل الاول
في إحدي نجوع قري الصعيد بمحافظه قنا حيث يعيش بها أثنين من أكبر عائلات النجع..عائله الأشراف وعائله هواره عائلتين لا يعرفوا سوا الدم والثأر الذي يسوقهم إلي طريق الهلاك والضياع نزاعات نشبت بينهم منذ سنين و أنتهت بالصلح وتدخل كبار البلاد المجاوره بينهم لفض هذا النزاع و الذي كان بدايته وسببه👈..مشاجره لشاب من عائله معروفه مع شاب مراهق من عائله (هواره) فأسرع الشاب المراهق بالجري والإختباء وراء رجل عجوز مسن من عائله (الأشراف) ولكن أنتهت الواقعه بقتل الشاب المراهق الذي ينتمي لعائله هواره علي يد الشاب الاخر ولم يستطع الرجل المسن إنقاذه!! ومن هنا بدأت الحرب..وبدأت والدت المراهق ببخ سمها في أذن رجال هواره وبدلا من أن يأخذوا تارهم من ذلك الشاب وعائلته فحرضتهم علي أخذه من ذلك العجوز لانه لم يستطع إنقاذ ولدها وتم التربص به وبالفعل قتلوه. وبدأ مشوار الثأر الذي أصبح عدد ضحاياه لا تعد ولا تحصي من العائلتين وأصبحت الدماء بينهم بحور.
وبعد صراع دام سنوات أخيرآ أستطاع بعض كبار البلاد المجاوره حل هذا النزاع ووقف الدم بينهم ومن وقتها والحال بينهم هادئ ولكن!!☝️مايخفيه القلب من عائله هواره من كره لا يخفي عن عائله الأشراف.
حتي قامت المعركه الكبري من جديد حيث قام (هيبه)
الهواري بإشعال فتيل النار بينهم من جديد ولكن!!
سأروي لكم ما حدث
قبل المعركه الكبري بي 6أشهر
فلاش باك🌪️🌪️
بقلمي ……… أميره أسامه
في قصر كبير يظهر عليه الفخامه ويظهر علي ألوانه الراحه النفسيه التي تعكس شخصيه من يسكنه حيث يعيش به عائله ..وهبه كبير عائله الأشراف.وفي يوم مبارك وهو أول يوم رمضان
كان القصر تملؤه الحركه الكل بيجري وكأنها خليه نحل بيتسابقوا فيها عشان تحضير الفطار..
چليله...همي يابت يا سعديه ماباجيش كتير عالمغرب عاد
سعديه..حاضر يا ست چليله خلاص هحمر البط و الوكل كله خلصان
چليله..فين ستك فاطمه
سعديه..ست فاطمه مع ست فرحه بيجهزوا السفره.
چليله..ماشي أني هروح أشوفهم وأنتي همي يلا جهزوا العصاير وعايزه الوكل كله يكون جاهز وكل حاجه زينه ده الدكتور سالم خلاص علي وصول.
سعديه...يرجعه بالسلامه يارب.
چليله...يارب
خرجت چليله تشرف علي كل حاجه بنفسها.
فاطمه...كل سنه وأنتي طيبه يا حماتي صومآ مجبول أن شاء الله
چليله..وانتي طيبه يا مرت الغالي فين جوزك عاد
فاطمه..مهران مع الحاج في المضيفه بيخلصوا شويه شغل لحد معاد الفطار
فرحه..كل سنه وانتي طيبه يا أما
چليله..وانتي طيبه يا فرحه يابتي أن شاء الله السنه الجايه تكوني في بيت جوزك
فرحه..لاه أني ما هفكرش في الجواز التعليم الاول
چليله..يادي التعليم اللي واكل راسك ده عاد يابت البت ملهاش غير بيت جوزها في الأخر مسيرك تكوني أم ومسؤله عن بيت وراجل وعيال أني عارفه تعليم أيه اللي واكل دماغك ده عاد كله من سالم أخوكي.
فرحه..بضحك أن جيتي للحج يا أما مش سالم بس موسي أخوي كمان الله يخليه هو السبب وبعدين ياأما حتي لو مسيري لبيت چوزي كيف ما بتجولي لازمآ أكون متعلمه ومعايا شهاده أنفع بيها نفسي وولادي وأربيهم زين
چليله..بردك نفس الكلمتين اللي كل ما أفاتحك في الجواز تسمعيهملي ما أنا اهو ربيتك زين انتي وموسي ومهران وسالم ومامعيش شهاده يادوب بفك الخط بس هجول أيه ربنا يصلح حالك يا بتي وينولك اللي في بالك
فرحه...ويخليكي ليا ياأما
چليله..يلا هروح أشوف البنته عملوا أيه المغرب خلاص علي آذان
مشيت چليله علي المطبخ وراحت فاطمه علي فرحه بسرعه
فاطمه ..جدعه يابت يا فرحه إياكي تفرطي في شهادتك أبدآ أني كان حلم حياتي أكمل علام بس النصيب.
فرحه...طيب ليه مكملتيش عاد يا فاطمه أني أعرف أنك كنتي شاطره في المدرسه.
فاطمه..أني لما وصلت لحد الاعداديه كنت دايما الأولي علي الفصل بس لما چيت للثانويه أمي قالت كفايه علام وسمعتني نفس الكلمتين اللي امك سمعتهملك الوجت بس فضلت أتحايل عليها هي وأبوي وافجوا بس دخلوني تجاره خدت الدبلوم وجعدت ووجتها عرفت مهران وحبيته واتجدملي وصراحه وافجتهم وبعد ما خدت الدبلوم أتجوزت علي طول.بس أنا نفسي أحجج حلمي فيكي أنتي وعيالي.
فرحه...أنتي طيبه جوي يا فاطمه اني لو عندي أخت مكانتش هتحبني كيفك إكده.
فاطمه.أنتي مش اختي بس يافرحه أنتي بتي كمان أني دخلت البيت ده كنتي لسه صغيره ربنا يخليكي ليا. ويلا نكمل أحسن حماتي تاجي تعلجنا في السجف.
فرحه..بضحك يلا
بقلمي ……………أميره أسامه
بعد وقت قصير كان الشغاليين بيحضروا الفطار وفاضل ربع ساعه علي الآذان
سمعت چليله صوت الغفر في الخارج بيهللوا وبيرحبوا بسالم أبنها خرجت جري وأول ما شافته خدته في حضنها.
چليله...ولدي حبيبي أتوحشتك يا جلب أمك
سالم..بحب وأني أتوحشتك جوي ياأما
چليليه...بدموع أكده ياسالم كل ده تأخير ست شهور ياولدي ماشوفكش ولا تاچي تطل علي أمك خلاص يا دكتور أتكبرت علينا
سالم...حجك عليا يا اما غصب عني والله الشغل ما هيخلصش مابين المستشفي والجامعه والعياده وبعدين أتكبر أيه بس يا اما أني وصلت لكل ده بسببك يا ست الدار.
چليله.. أتوحشتك جوي يا سالم
فرحه...بعدي بجي يا أما خليني أسلم عليه حضنته فرحه بحب
سالم...وحشتيني يابت يافرحه أيه الحلاوه دي ست شهور يعملوا فيكي أكده علي كده لو غبت سنه هنداروكي من عيون الناس
فرحه..تصدج بالله انت اللي رافع من روحي المعنويه يا احلي دكتور في الدنيا
سالم...روح معنويه أيه بس يابت انتي مش عارفه جيمت روحك ولا أيه
فاطمه...يا ألف بركه نورت الدار يا دكتور
سالم...الدار منوره بناسها يافاطمه كيفك يامرت الكبير
فاطمه...بجيت زينه لما شوفتك
خرج مهران اخوه الكبير وزوج فاطمه وخرج معاه والده وهبه
مهران...بفرحه دكتور سالم وصل أخيرآ النجع نور.. أهو أكده رمضان كملت فرحته بچيتك
حضنه سالم وطبطب علي دهروا بحب
أتوحشتك يا أخوي
مهران..أني اللي أتوحشتك جوي
وهبه..ما تسيبولنا فرصه عاد نسلموا علي الدكتور راح عليه سالم باس ايده وحضنه بقوه
سالم..أتوحشتك يا أبوي
وهبه...چيتك ردت فيا الروح يا سالم كنت خايف ماتاجيش وتجضي معانا رمضان
سالم..وهو رمضان ينفع من غير ما أكون وسطكم يا أبوي
چليله..طيب يلا المغرب خلاص هيأذن أدخل أغسل يدك ووشك من عفره الطريج وبعد الفطار ابجي أطلع أتسبح وريح شويه
فرحه...ومفيش حد هيغسل يدك غيري
سالم...أني اطول الجمر ده يغسل يدي ألا صحيح فين موسي أخوي أتوحشته جوي
وهبه...زمانه علي وصول هو من الصبح في الأرض
چليله...بحزن أني عارفه عوج ليه عاد من بدري بكلمه محموله مجفول الاذان خلاص هيأذن
سالم..بأبتسامه متغيرتيش يا أمي طول عمرك جلبك مجسوم نصين نص لينا كلتنا ونص لموسي لحاله.
وهبه..بغيره ده إن مكانش جلبها كله وأنت الصادج
مهران..بضحك الكبير غيران عليكي يا چليله
چليله..كلكم عندي واحد والله بس موسي ده روحي بس أنتوا بردك نن عيني من جوه
مهران...بضحك متحاوليش تجملي الكلام يا چليله خلاص اللي في الجلب في الجلب ماشي ياست چليله ربنا يهني سعيد بسعيده يلا عاد الأذان خلاص هيأذن
دخلوا كلهم الفطار كان جاهز عالسفره غسل سالم ايده ووشه وراح أعد معاهم عالسفره
وچليله واقفه موبايلها في أيدها ولسه موبايل موسي مقفول وباين علي ملامحها الحزن
وهبه...أجعدي يا چليله هياچي الوجت حبيب الجلب
ضحكوا كلهم علي مشاكسه وهبه لچليله
چليله..عوج جوي يا وهبه
فالوقت ده دخل موسي بطلته اللي تخطف القلب بجلبابه الأسود ألأنيق وهيبه لا تليق إلا له.
موسي...السلام عليكم متجمعين عند النبي وكل سنه وانتم طيبين جميعا.
جريت عليه چليله خدته في حضنها.
👈نعم أنه من سكن الروح والفؤاد والعقل أبن عمرها وتوأمها الضحكه اللي بتنور حياتها وبترد فيها الروح
چليله...إكده يا موسي تخلع جلب أمك عليك
موسي....بأبتسامه وحنيه وكأنه مش شايف غيرها في الدنيا أتوحشتك يا ست الدار
چليله...إكده الهلال ظهر صوح ورمضان روايحه هلت مع طلتك يا سيد الناس
موسي...بأبتسامه حجك عليا المحمول فصل شحن يا ست الدار
وهبه...ماهنخلصش أحنا من الفيلم الرومانسي بتاع كل يوم
موسي...بأبتسامه ومضايج ليه عاد يا كبير راح عليه موسي باسه من ايده وراسه
وقف سالم بحب.. وأني فين من كل ده عاد ولا ألم خلجاتي اللي لساتها مخرجتش من الشنطه وأرجع مكان ما چيت
موسي...بأبتسامه قرب من سالم وشده لحضنه بقوه
سالم...وحشتني ريحتك يا أخوي ريحتك بس أشمها أحس أني رچعت من غربتي لأرضي ومكاني
موسي...كيفك يا دكتور أتوحشتك جوي
چليله...هملوا السلامات دي عاد ويلا أفطروا الوكل هيبرد
وهبه....يلا نسمي الله چليله مش طيجانا عشان حبيب الجلب لسه مفطرش.
ضحكوا كلهم علي غيره وهبه الواضحه وبدأوا أكل
بعد وقت بسيط خلصوا أكل وصلوا مع بعض وراحوا أعدوا مع بعض في مضيفه القصر.
بدل سالم ملابسه ونزل لابس جلباب صعيدي فضفاض وأعد معاهم في المضيفه
دخلت فاطمه بالشاي.
موسي...اااااه يا فاطمه لو أجولك كنت مستني كوبايه الشاي بتاعتك دي كد ايه
مهران...اي والله
فاطمه...صحه وعافيه علي جلوبكم هروح أظبط الدنيا وأجبلكم الحلو
مهران...تسلمي يا فاطمه
فاطمه....تسلم يا سي مهران خرجت فاطمه وسابتهم مع بعض.
وهبه...ايه أخبار الأرض يا موسي
موسي...كله تمام يا حاچ بالحج صحيح في أرض معروضه للبيع
وهبه...أرض أيه دي يا ولدي
موسي...أرض سعد الهواري اللي ورثها عن ابوه انت عارف هو ملهوش في شغل الاراضي وطول عمره أعد في القاهره
مهران...بقلق أني رأيي بلاش يا موسي سعد من الهواره وهما ما هيسكتوش لو حد غريب خدها منيهم
سالم...طيب وهو ليه
ماعرضش الارض عليهم ويبجي منهم في بعضهم أشمعني انت
وهبه...صوح ليه مابعش لعتمان
موسي...عرض عليهم والسعر معجبهوش الارض تساوي أكتر من السعر اللي عرضوه بكتير وهو سأل وعرف
وهبه...معارفش ياولدي بس اللي اعرفه انهم مهيسكتوش
موسي....ليه عاد يا أبوي عنهم ما سكتوا الأرض تخص
سعد وهو عايز يبيع وصراحه الارض متتسابش
وهبه...بتفكير هي صوح متتسابش بس أني مش عايز خوتت نفوخ وسكت شويه وبصله أنت لزماك الأرض دي يا موسي
موسي.. بصراحه أيوه لزماني هضمها علي الأرض الكبيره ونزودوا المحصول ونوسع التجاره ونفتح باب رزج لولاد البلد
مهران...ما بلاش يا موسي
موسي...مالك يا مهران عاد احنا هنسرجها صاحب الارض بايع وأني شاري فين المشكله
وهبه...طيب سيبني أفكر وأدورها في دماغي وهجولك رأيي
موسي....خد وجتك يا أبوي.
بقلمي ………….أميره أسامه
قضوا وقت طويل مع بعض وبعد وقت بسيط طلع سالم يرتاح من تعب السفر وكل واحد فيهم راح في مكان
خرج موسي عالجنينه الخاصه بالقصر يدور علي هريدي
موسي...هريدي واد ياهريدي راح فين ولد المركوب ده
جه بسرعه واحد من الغفر ...تؤمر بحاچه يا موسي بيه
موسي...فين الواد هريدي
الغفير...كان بيفطر معانا وبعدين مسك الربابه بتاعته وشوفته راح علي الخلوه
موسي....ماشي روح انت
راح موسي يشوف هريدي
واللي بيعتبره موسي الصاحب والخادم الأمين والسر بتاعه ورغم طوله لسانه وكلامه اللي زي الدبش لكن موسي ميقدرش يستغني عنه .
راح موسي علي الخلوه بص من الشباك المفتوح لقي هريدي ماسك الربابه وأعد يدندن عليها ومندمج ومغمض عينه
موسي....بتعمل أيه عنديك يا واكل لسانك
فتح هريدي عينه بفزع
هريدي...وه !! فزعتني مش تخبط ولا تتنحنح عاد
موسي...معلهش جطعت حبل أفكارك وبعدين أكح ولا أتنحنح أيه يا ولد المركوب كانت خلوه اللي خلفوك دي عاد أيه اللي چابك إهنه يا واد.
هريدي...بثقه رجع بضهره مفيش جولت أچي أدق عالربابه في هدوء
موسي...عارف يا واد يا هريدي سعات أجعد مع حالي إكده وأسأل حالي أني أيه اللي مصبرني عليك مع أني ما بطجش حد يحكلي علي مناخيري
هريدي...بثقه ووصلت لأيه عاد🤔
بصله موسي بصدمه😳
شوف الواد هيتكلم أزاي
هريدي....وأني جولت أيه عاد أني بتساير معاك
موسي...أتساير يا خوي ماهي نجصاك عاد المهم أبدا يا هريدي بيه كل المشكله إني بتنيل بحبك ومجدرش أستغني عنيك
هريدي....بحب طيب عشان الكلمتين الحلوين دول هعملك أحلي كوبايه شاي
راح هريدي عمله كوبايه شاي بسرعه ورجع أدهاله
هريدي...خد
موسي...😳 ياواد أسمها أتفضل يا بغل
هريدي....أستغفر الله ميصحش اجولك أتفضل يا بغل.
موسي...يخربيت اللي جابو أبوك ياض انت غبي أجصد متجولش خد لحالها جول
حتي أتفضل خد
هريدي....بلماضه وهو حاطط صباعه في وسط راسه وهتفرج أيه عاد كلمه أتفضل لما فالأخر هجولك خد😏
موسي...بقله حيله مفيش فايده عاد ..شرب موسي من الشاي بمزاج وإعجاب
موسي...ياسلام بيتهيألي ياواد يا هريدي أنت مش فالح غير في حاچتين في حياتك تعمل شاي وتدق عالربابه.
هريدي...يبجي تحمد ربنا هنطمعوا😒
موسي...بأبتسامه علي جولتك كفايه جوي تبجي فالح في حاچتين
هريدي...عارف يا موسي بيه ساعات كتير لما أجعد مع حالي أفكر لو مكنتش أنت خدتني أعيش وياكم إهنه في الجصر بعد ما أبوي وأمي وأهلي ماتوا كنت هعمل ايه كان زماني جاعد في الشارع والخلج هتبيع وتشتري فيا.
موسي...أني أوعي علي أهلك من وأنا صغير طول عمرهم ناس طيبه وفي حالهم وأبوك كان راجل صالح وربي اجيال صغيره كتير في الکتاب وليه أفضال كتير علي أهل البلد ومكنش ينفع أسيبك بعد البيت ما وجع عليهم لچل عيون الراچل ده بس تعرف السؤال اللي هيچنني أزاي أهلك كلهم يموتوا وأنت تعيش🤔؟؟
بقلمي ……………… أميره أسامه
هريدي...زعلان عاد أني عشت😒 أني يومها كنت بلعب في الشارع اللي ورانا وسمعت وجتها صوت هبد كبير وصوات في الشارع جريت لجيت البيت والأرض حته واحده أبويا وعمامي وأمي وأخواتي كلهم تحت الأرض ميتين
موسي....ساعتها اني جولت لأبوي يچيبك أهنه ومن يومها وانت جاعد علي جلبي مجدرش أستغني عنيك
هريدي...وجتها أني كنت أعرف بدر الهواري وكان بيحبني جوي وطلب من أبوه يخدني عنديهم عشان مبجاليش حد ولا حتي مطرح بس عتمان رفض وجاله كلمه عمري ماهنساها جاله مين ده اللي يدخل جصر هواره يكش يغور كيف ما أهلوا غاروا ووجتها وهبه بيه وافج أنك تاخدني أعيش معاكم
موسي...عتمان الهواري طول عمره جاسي وجلبه حچر
هريدي...صحيح يا موسي بيه أني اعرف ان بينكم تار جديم ومصانع الحداد ومحدش فيكم بيطيج التاني وعارف كمان أنك بتحب بدر الهواري والوحيد في عيله هواره الشهاده لله اللي طيب وبعيد عنيهم وعن شرهم بس السؤال بجي لما أنتوا أتصالحتوا من زمان ليه سر الكره اللي باين في عيونهم ده وخصوصا كره حمدان ولد هواره ليك
موسي...جبل ما أچاوبك بدر ده كان صاحب عمري ومازال هو فعلا غير عيلته لكن اللي تشبهه في جمال ونضافه جلبه عطر أخته وكمل بشرود عطر دي متشبهمش واصل يا هريدي كنها ملاك نازل من السما
هريدي...حط ايده علي خده وأيه كمان🤔
أنتبه موسي....أبو اللي چاب أبوك خلاص مهكملش حديت
هريدي...خلاص خلاص حجك عليا كمل مش هجاطعك تاني عاد
سكت موسي شويه ورجع كمل كلام.. كيف ما بتجول العيلتين أتصالحو من زمان لكن صوح محدش فينا بيطيج التاني كل واحد في العيله دي شايل من حد من عندينا ومن غير أي سبب
عتمان بيكره أبوي ونفسه يفرح فيه بأي طريجه عشان أبوي محبوب من الكل ولسانه زين مع كل الخلج وعمره ما ظلم أو أفتري علي اي حد واصل أما عتمان مكروه من الكل حتي الهواره نفسهم بيكرهوه وبيخافوا منيه ومن ظلمه بيعملوله ألف حساب مش احترام لكن خوف
أما بجي بخيته مراته فالكره للشرفا وراثه من يوم ما أخوها أنجتل وعم زكريا الله يرحمه مجدرش يحميه وهي شايفه هي وامها الله يرحمها ان لينا يد في جتله وكمان طول عمرها بتكره أمي حتي لما كانت تجابل أمي تكلمها عادي بس كرهها باين في عينها متعرفش تخفيه بس لما سألت أمي جالتلي أن بخيته كانت بتحب ابوي لكن أبوي كان بيحب امي وأتچوزها ومن يومها بخيته شايفه أمي عدوتها وشايفه أنها خدت أبوي منيها أما بجي أبنهم هيبه ده شيطان في صوره بني ادم ما بيطجش سالم أخوي بالرغم أن هو وسالم في فرج بينهم في العمر بس هو شايف أنه فاشل وسالم أحسن منيه أتعلم وبجي دكتور وهو خرج من التعليم بدري معاه أبتدائيه طول عمره فاشل و خسيس يجري ورا النسوان والشرب وأعده الجهاوي بايظ من يومه عتمان عمره ما أهتم بتعليم ولاده اللي كان يجول فيهم مش عايز يكمل كان يسمع كلامه عكس أبوي أني الحمد لله معايا بكالريوس تجاره سالم دكتور چراح حتي مهران اخوي كان معاه ليسانس حجوج وفرحه خلاص جربت تخلص أداب أثار يمكن أمي كانت عايزه تجعدها بس أني رفضت وسبتها تكمل علامها
فاهيبه بيحجد علي اي حد متعلم او حتي أحسن منيه لكن كرهه الأكبر من نصيب سالم أخوي
أما حمدان بجي...ده جصه تانيه لو يطول يطخني عيارين ماهيتأخرش عامل كيف أمه تشوفه وتشوف طريجته معاك تجول طيب وبيحبك لكن اللي في الجلب هيطلع علي العين حمدان بيكرهني عشان أني الكبير طبعا أبوي الله يطول في عمره كبيرنا لكن هو خلاص تعب سلم كل حاچه ليا فاده مضايجه حمدان كيف ابوه محدش هيحبه ظالم ومفتري وبيحط يده علي اي حاچه تعچبه ياما خد أراضي من ناس غلابه كل اللي حداهم كام جيراط ومن غير رحمه يرميلهم شويه ملاليم وياخدها بالعافيه عشان بس عچباه عايز يمتلك أكبر كميه من الأراضي عشان يجوي أكتر ويسيطر علي البلد كلها أول ما يعرف اني هشتري أرض يجري يسبجني قبل ما أشتريها لكن علي مين عايز يبجي أحسن مني بأي طريجه بس حب الناس مش سهل تمتلكه بسهوله
اما بدر بجي طيب ومش شبههم لكن هو من الأساس مكروه من أخواته نفسهم عشان حبه ليا وعشان هو الوحيد فيهم اللي متعلم بيچوا عليه عشان طيب وديما ياچي ينبهني من حمدان وأي أرض بحاول أخدها حمدان يچري جبلي عشان يحط يده عليها ويتفاچئ أني مخلص فيها وطبعا بدر السبب في ده ولولاه مكنتش هعرف حمدان بيفكر كيف
هريدي..طيب وعطر
موسي...أتحشم ياواد ومتنطجش اسمها علي خشمك
هريدي...جصدي ست عطر ومن غير يعني ما تتعصب أني يعني حاسس أنك بتحبها 🙄
بقلمي ………………أميره أسامه
موسي...بحزن حتي لو بحبها أيه الفايده اللي بينا أستحاله يتحسن عطر كيف بدر زي ما جولتلك طيبه ومش شبههم وهما بياچو عليها عارف أني لو روحت طلبتها هيوافج عتمان من غير تفكير عشان تكون درجه يوصلنا بيها مع اني أشك أن حمدان هيوافج عشان يحرج جلبي.
أمها مورياها الويل عشان رافضه تتجوز وهي صابره ومستحمله
هريدي...طيب ما انت لو بتحبها أطلبها وأرحمها من العيله دي
موسي...هعمل أكده بس مش الوجت في حچات كتير لازم تتظبط الأول وبعدها أفكر في حكايه الچواز دي وأنتبه موسي أنه أعد يحكي مع هريدي أتحول فجأه
موسي..وه 😡أنت جاعد يا واد تحجج معايا كيف وكيل النيابه جوم فز من جدامي.
هريدي...بتبجي زين وفجأه تجلب عليا😒
موسي...أبو اللي چاب أبوك أني ماشي خالص من جدامك
خرج موسي من الخلوه وطلع فوق علي أوضته يرتاح شويه قبل السحور
..........
في قصر هواره في المضيفه
كان جالس عتمان وابنه الكبير حمدان وبدر الصغير
عتمان بعصبيه..كيف يعني سعد عايز يبيع أرضه للشرفا أتجنن ده أياك
حمدان...جولتلك يا أبوي أطخه عيار ونخلص منيه
بدر..بغضب كيف يعني تطخه لاهو كان فروچ اياك
حمدان...ماليكش صالح أنت يا بدر أطلع منيها ولا انت فرحان عشان موسي عايز ياخد أرضنا
عتمان...بلا حديت ماسخ منك ليه خلينا في موضوعنا أعرض عليه مبلغ أكبر شويه زوده يا حمدان
حمدان...ايه يا أبوي هنركب سعد العفش ده علينا ولا أيه
عتمان...ياولدي لچل الورد ينسجي العليج
حمدان..وأن ماوافجش هنعملوا ايه عاد
عتمان...هيوافج ورجله فوج رجبته
وإن موافجش نفذ يا ولدي
بدر...هو ايه اللي لو ماوافجش نفذ ياولدي أنت هتعوم علي عومه يا أبوي
عتمان...بغضب بدررررر خلي بالك من حديتك
بدر...مجصدش يا أبوي حجك عليا بس يا أبوي الأمور ما هتتاخدش إكده
حمدان ..أمال هتتاخد كيف يا خريج المدارس
بدر...في حاجه أسمها عجل وحكمه چرب تعرف معروض عليه كام وأديله أزيد من المعروض عليه لكن انت الجتل عنديك أسهل من التفكير يا حمدان
حمدان...سعد العفش ده ما هيساومنيش اني ولا هيطول غير اللي هجول عليه أما بجي حكايه الجتل بصله وكأنه بيلمح علي موسي في أشكال أكده يا أخوي ماهتلدش عليا ومهحبهمش لله في لله وأخرهم عندي طلجه ونخلص منيهم بس كله بأوانه وأبتسم أبتسامه سخريه.
بدر....بأبتسامه قرف مش بجولك يا حمدان الدم عنديك أسهل حاچه ماشي تجتل في الخلج كأنهم لعبه في يدك مابحسش أنك مبسوط غير لما تشوف الدم كنك بتلعب لعبه وكل ما تموت حد فيها بتشحن بيها روحك وتزود عمرك مع نجصان عمر أخصامك😏
حمدان....عليك نور أنت إكده فهمتني في الوقت ده دخل هيبه
هيبه...سلام عليكم متچمعين عند النبي
عتمان...عليكم السلام خليك انت إكده داير تلف وتتسرمح ورا الحريم وسايبنا إكده كنت فين يا هيبه
هيبه..أيه اللي حوصل عاد أني جايبلكم خبر حلو المهم في ايه
عتمان..سعد عارض الارض للبيع وموسي ولد وهبه عايزها
هيبه...وكيف سعد ولد المركوب ده يبيع لموسي زودله المبلغ وإن موافجش عيار صغير نطخه بيه ونخلص
حمدان وهو بيبص لبدر بأستفزاز جولتش حاچه أنا؟
هز بدر راسه بقله حيله
هيبه...بسخريه ليه هو الأستاذ بدر عنديه كلام غير ده ولا أيه
حمدان...زعلان يا أخوي وبيجولي أسهل حاچه عنديك الدم وجاعد يسمع أخوه الكبير حديت خايب وماسخ وشكله زعلان عشان عايزين ناخد الارض من موسي أصله صاحبه😏
هيبه...المصلحه مفيهاش أصحاب يا بدر واطلع منيها انت بدل ما أحزنك علي صاحبك جبل ما أخلص علي سعد.
بدر...بغضب قام وقق وبصله بتحدي چرب تعملها يا هيبه واللي خلجني وخلجك أنجس يدي بالدم كيفكم بس المرادي هنجسها بدمك
هيبه....بغضب أنت أتچنيت أياك عايز تجتل أخوك يا بدر عشان موسي هي حصلت طيب أسمع يابدر بلاش تعصبني أحسن وشرفي أجتلك جبل ما أجتله
خبط عتمان بقوه عالتربيزه بايده
أجعد انت وهو عاد أيه هتتخانجوا جصادي خلاص مبجاش ليكم كبير واجفين جصاد بعض وهتجطعوا في بعض جدامي عشان خاطر ولد وهبه
هيبه....مأنتاش سامع كلامه اللي يفور الدم يا ابوي
عتمان...خلاص يا هيبه وأنت يا بدر بلاش تخليني أجلب عليك أنت خابر جلبتي زين مين موسي ده اللي يخليك توجف لأخوك وتهدده بالجتل أعجل يابدر.
بدر...يشيل موسي من راسه الأول يا أبوي ويبطل يحجد علي خلج الله
عتمان...اني اللي عندي جولته أجعد أنت وهو خلونا نكملوا حديت
أعد بدر غصب عنه كان نفسه يسبهم ويمشي لكن فضل عشان يعرف بيخططوا لأيه.
عتمان..جولي يا هيبه أيه الخبر اللي هتجول عليه ده
هيبه..سالم أبن وهبه سكت وبص لبدر بتحدي وأبتسامه سخيفه دكتور سالم أخو موسي وصل أنهارده من مصر وجاعد معاهم طول الشهر وشكل إكده هنتسلوا صوح
بدر...مفيش فايده فيك وده عملك أيه ده كمان عشان تتسلي صوح.
هيبه..عايز أكسر شوكته عشان يبطل يتباهي عالخلج بشهادته.
بدر..سالم محترم وعمره ما أتكبر علي حد ولا أتباهي بشهادته كيف ما بتجول وبترمي بلاك عليه وحتي لو بيتباهي أيه اللي مزعلك ومين عينك واصي عليه عشان تكسر شوكته كيف ما بتجول وحتي يا سيدي لو بيتباهي بشهادته حجه وكمل وهو قاصدكلامه حجه يتباهي ويفتخر واحد متعلم ومعاه شهاده ودكتور كد الدنيا مش چاهل ومعهوش شهاده وماشي ورا الحريم وهيرمي بلاه عالناس.
قام هيبه وهو شر الدنيا بيتطاير من عينه وكأن بدر أصاب نقطه النقص عند هيبه
هيبه لا أنت عايز تتربي صوح
قام عتمان وقف بينهم بسرعه
عتمان..جرا ايه هتمسكوا في بعض جدامي خلاص عدمتوا كبيركم
هيبه..مش شايف يا أبوي تلميحاته اللي كيف وشه
حمدان..بدر زودها يا ابوي هيبه عنديه حج
عتمان...جرالك ايه يا بدر نسيت أنهم أخواتك ولا ايه
بدر...لا يا أبوي منستش بس يظهر إكده أن هما اللي نسيوا أني أخوهم
هيبه..بغضب أدعي ربنا أني منساش أنك إخوي عشان لو نسيت يا بدر صدجني واللي خلجني وخلجك هحزنك علي عمرك☝️
بصله بدر بقرف من غير ولا كلمه وبص لأبوه بعد أذنك يا أبوي خرج بدر من المضيفه وهو علي أخره وأول ما خرج شاف حريم الدار كلهم واقفين بخيته والدته وعطر اخته وهنيه مرات هيبه وسهير مرات حمدان وهاجر مراته سمعوا كل اللي دار بينهم بسبب صوتهم العالي سابهم بدر وخرج علي الجنينه وهو باين علي ملامحه الغضب
جريت وراه هاجر وعطر وهنيه
ودخلت بخيته وسهير علي المضيفه.
بقلمي …………..أميره أسامه
بخيته..في أيه صوتك عالي ليه إكده
عتمان...تعالي أجعدي يا بخيته
هيبه..شوفتي ولدك يا أما واجف جصادي عشان أبن چليله
عتمان...ياواد أجعد ميبجاش دمك حامي إكده اللي أنت عايزه هيحصول
حمدان...يا ما نفسي أشوفه واجع جدامي وروحه متعلجه لا هو طايل موت ولا طايل حيا 😡
سهير..مالك بس معكر دمك ليه عاد بالهداوه اللي انت عايزه هيحصول بس روج إكده
عتمان...جوليلهم يا سهير يابتي
بخيته...ماعاش ولا كان اللي يعكر مزاجكم وأنت يا عتمان لازم تشد علي بدر انا معوزاهوش ليه صله بأبن چليله ده واصل داهيه تاخده هو وأمه أني نفسي أشوفها جدامي جلبها مفتور علي ولدها نفسي أشوف وچع الجلب صايبها😡
عتمان...هيحصول يابخيته بس بالهداوه ولو علي بدر سيبوه مينفعش اجوله كلم مين ومتكلمش مين ولدك مبجاش صغير ده أولآ أما ثانيا قربه من موسي في صالحنا عشان لما نضرب ضربتنا الشبهه تبعد عنينا يا بخيته أني مش عايز دم تاني لو فوتنا في سكه الموت دي من تاني ماهنخلصش ووهبه ما هيسكتش علي دم ولده ووجتها هنحيي التار من تاني وأني وانتي مش حمل الوجع علي حد من عيالنا
بخيته بفزع...بعد الشر عنيهم تف من خشمك
حمدان...متخافيش يا أما ولادك أسود
هيبه...صحيح يا أما أيه سر كرهك لچليله
أرتبكت بخيته وكأن السؤال جالها في مقتل لكن حبت تخرج منه بسرعه بذكاء
بخيته....شايفه حالها وديما بتحاول تبان الكبيره والنجع كله تحت إشاره منيها عايزه أكسر سمها وأذلها وأوجع جلبها
حمدان ...هيحصول ياغاليه وهزعلها علي حبيب الجلب جريب ومهيبجاش في كبيره غيرك
هيبه...جصدك حبايب الجلب أوعاك تنسي الدكتور بس همله عليا التحيه بتاعته عندي
ضحكوا كلهم بشر وحقد وسواد لا يليق إلا بقلوبهم.
.....
اما في الخارج خرج بدر وهو علي أخره
عطر...بدر يا بدر أستني رايح فين
بدر...همليني الوجت يا عطر أني مطايجش حالي
عطر...أستني يا اخوي الله يخليك هتروح فين بس
بدر....لازمآ أحذر موسي ياعطر أخواتك ما هيچيبوهاش البر الحقد مالي جلبهم الأسود وأبوكي فرحان بيهم وأمك طبعا هتشجعهم
هاجر...بلاش يا بدر الله يخليك أحنا مش حمل جلبت أخواتك علينا
بدر...عيزاني اعرف يا هاچر ان صاحب عمري في خطر وأسكت
هاچر ..مجولتش إكده بس أني خايفه علي ولادي وعليك يا بدر غصب عني حمدان وهيبه طبعهم واعر
عطر...بحزن هو حوصل ايه لده كله موسي طيب وفي حاله ليه حاطينه براسهم
كل ده عشان الارض كلمه يا بدر خليه يصرف نظر عن الأرض دي
بدر...أنتي طيبه يا عطر لا هو انتي فاكره أن اخواتك هاممهم الارض كيف ما بيجولوا حمدان اللي يهمه أي ارض موسي يحط عينه عليها عشان بس يجهره ويضايجه عشان هو من الاساس ماهيحبهوش وبيغير منيه يعني الجصه مش جصة أرض موسي بالارض من غيرها هو في خطر حمدان مش هيسيبه وأبوكي لادد عليه اللي حمدان بيعمله عشان يجهر وهبه وأمك عشان تحرج جلب چليله وهيبه أخوكي مش هامه كل ده اللي هامه يوجع سالم ويجتله بعدها أخواتك مش شايفيين ولا سامعين حد غير صوت نفسهم وبس.
عطر..بوجع يبجي لازم موسي يعرف يابدر
هنيه...بحزن وخوف بتحاول تخفيه صوح يا بدر موسي لازمآ يعرف حمدان واعر وهيبه چوزي وأني عرفاه الحجد مالي جلبه ويوم ما بيحط حد في راسه ماهيسبهوش
هاچر..بس أني خايفه أني سمعت هيبه وهو بيهددك بالجتل يا بدر
عطر..جتل ايه عاد هيجتل أخوه كمان يبجي أتچنن ده حديت خايب بيجوله لحظه غضب
هنيه...لاه يا عطر هيبه جاسي ويعملها مش هيبه اللي يفرج معاه اخوه
هاچر...شوفت يا بدر أها هنيه مرته وبتجول نفس كلامي
بدر...متخافيش عليا إن شاء الله ربنا هيلحها من عنديه
عطر...بحزن عن أذنكم هطلع اريح فوج شويه
هنيه...خديني معاكي ياخيتي
طلعت عطر وهنيه وفضلت هاجر مع بدر ساكته وسرحانه
بدر مسك ايدها بحب
متخافيش علي العيال يا هاچر
هاجر...اني خايفه عليك يا بدر لو جرالك حاجه هروح فيها ومهجدرش اعيش لحالي من غيرك
بدر...يابت جولتلك متخافيش وبعدين كيف ما عطر جالتلك ده كلام خايب طالع من هيبه لحظه غضب يعني ماهيجدرش يعمل حاچه أني أخوه يابت
هاچر...لاه يا بدر حمدان وهيبه مش كيفك أنت وعطر كنكم من أب وام تانيين هما طبعهم صعب وجلبهم جاسي
بدر...متخافيش يا هاچر محدش هيموت ناجص عمر خليها علي الله يابت
هاچر...بخوف ونعم بالله
........
في غرفه عطر
هنيه...وطي صوتك يا عطر لو حد طلع وشافك هتبكي أكده هنروح في داهيه
عطر...عيزاني أعمل أيه ياهنيه أعرف ان موسي أخواتي عايزين يجتلوه وأفرح
هنيه...بخوف وطي صوتك يا خيتي الله يخليكي أسمعي يا عطر موسي ماهيجرالوش حاچه طول ما أني عايشه أنتبهت هنيه علي الجمله اللي خرجت منها
هنيه...أجصد يعني طول ما اني عايشه مع هيبه هعرف ايه اللي بيفكر فيه هو وحمدان أول بأول وهبلغك انتي وبدر وبدر وجتها يتصرف
عطر..بدموع اني خايفه عليه ياهنيه
هنيه...متخافيش ياخيتي ان شاء الله ماهيصيبوش مكروه وابتسمت هنيه بوجع جهلته هنيه ..بتحبيه جوي أكده ياعطر
عطر...بحبه بس موسي الراچل الوحيد اللي دخل جلبي اني فتحت عيوني علي عشجه ياهنيه
هنيه...وهو كمان شكله بيعشجك يابت يابختك كان نفسي حد يحبني كيف ماهو بيحبك إكده بس نعمل ايه ربنا رزجني بأخوكي عاد 😒
أبتسمت عطر غصب عنها هتحسدينا إياك عالحب
هنيه...بحب لاه والله ماجصدي ربنا يخليهولك أنتي خيتي ياعطر واتمني أشوفك فرحانه وسعيده
عطر...يابت اني بضحك معاكي اني عارفه أنك بتحبيني من جلبك انتي وهاچر اخواتي اللي ربنا عوضني بيهم
هنيه...ربنا يديم بينا الحب يا خيتي
عطر...هو اني ليه يا هنيه دايما حساكي حزينه
سكتت هنيه بحزن..عادي ياعطر محدش بياخد كل اللي عايزه في الدنيا
عطر...هي حكايه الخلفه دي مضيجاكي اني عارفه.
هنيه...هتصدجيني لو جولتلك لاه صوح اني نفسي اكون ام بس لما بجعد أفكر مع حالي أجول لو ربنا رزجني بعيال كيف هجدر اربيهم مع أخوكي هيبه طبعه صعب يا عطر أخاف أچيب عيال أظلمهم معايا
عطر...ربنا يريح بالك يارب يا خيتي وأشوفك أسعد الناس
هنيه...ربنا يخليكي ليا يلا ههملك بجي لحالك وبطلي بكي ونواح عاد
عطر..بأبتسامه ماشي
خرجت هنيه راحت علي أوضتها ودخلت علي الحمام الخاص بأوضتها قفلت وراها وأنفجرت من العياط وكأنها بقالها سنين معيطتش بصت في المرايا تكلم نفسها
بتسأليني ليه دايما حزينه ياعطر ؟ طب أجولك أيه يا خيتي أجولك أن حبيبك هو حبيبي أجولك اني ما هشوفش في حياتي راجل غيره ولا أجولك أن لما أخوكي بيجرب مني بتخيله موسي عشان ميحسش اني رفضاه وسري ينكشف ولا
أجولك اني أتمنيت موسي يعرف حتي اني بحبه ونفسي يحبني ربع حبه ليكي ولا أجولك أني مباجتش أطيج أهلي عشان غصبوني علي جوازتي من أخوكي ولا أجولك اد ايه انا جلبي مخلوع عليه وخايفه يصيبه مكروه وان خوفك عليه ميچيش حاجه جمب خوفي عليه ولا أجولك اني بواسيكي
واني عايزه اللي يواسيني ويطبطب عليا ولا أجولك اني حرمت نفسي بيدي من النعمه اللي ربنا عطاها لكل الستات أني أبجي ام واني منعت نفسي بكيفي عشان مش عايزه عيال تربطني أكتر بأخوكي
ولا أجولك اني كارهه نفسي عشان حاسه اني بخونك بس والله ياعطر اني حبيته من جبلك غصب عني يا خيتي أجولك ايه ولا أيه ياعطر الصبر من عندك يارب💔
بقلمي ……………..أميره أسامه
عدي اليوم علي الجميع لكن عدي بكره وحقد وتربص علي البعض وخوف وقلق علي البعض الاخر
أما في قصر وهبه عدي اليوم بحب وسعاده وفرحه برجوع سالم..
...............
موسي...مالك يا عطر حزينه ليه؟
عطر...خايفه يا موسي
موسي...خايفه وأني چمبك
عطر...خايفه النصيب يفرجنا
موسي...مفيش حاچه ممكن تفرجنا عن بعض أبدا
عطر...أوعاك تهملني يا موسي أني مليش غيرك اوعاك تهملني لراچل تاني
موسي...محدش يجدر ياخدك مني ياعطر غير الموت
أبتسمت عطر وأبتسم موسي وفجأه صحي علي صوت والدته..
چليله ...موسي موسي جوم يا ولدي
فتح عينه بأبتسامه...صباح الخير ياست الدار
چليله...صباح الرضا يا سيد الناس أيه مين دي اللي بتحلم بيها
موسي....بأبتسامه أنتي جاعده بتراجبيني ياچليله وأني نايم أعده من ميته أهنه؟
چليله...اني صليت الفچر وچيت عليك ومن وجتها وأني أعده أطل في وشك
قام موسي أعد مسك أيدها باسها وبصلها ربنا يخليكي ليا يا ست الدار ..بس اني اكده أتعودت خلاص أصحي علي وشك جدامي هعمل ايه اني عاد لما أتچوز
چليله...أبجي طل في وش مرتك وجتها هتبجي راحت علي چليله.
موسي...انتي ميتراحش عليكي يا چليله أنتي جاعده چوه جلبي وماسكه بابه في يدك تدخلي معاكي اللي يلد عليكي واللي ما هيلدش ماهيدخلش جلبي.
چليله...طيب ما تجولي مين اللي كانت في منامك عاد وراسمه علي وشك الضحكه مش يمكن تلد عليا وأدخلها جلبك تشاركني فيه
موسي ..بأبتسامه حزن مفيش يا أما
چليله...من ميته بتخبي عن چليله دي سرك يا واد
موسي....ماهخبيش يا أما بس صدجيني ما هينفعش الموضوع من الاساس ما ملهوشي عوزه أتكلم في حاچه ماهتنفعش.
چليله...وأني عايزه أعرف ياسيد الناس
موسي...سكتت كتير ورجع بصلها...عطر يا چليله عطر بنت عتمان الهواري
بصتله جليله بصدمه ورجعت بسرعه أبتسمت عشان متزعلهوش ولما هي عطر فين المشكله عاد عطر دي ست البنات بت زينه واني بحبها.
موسي....عليا اني يا چليله مااني عارف اللي فيها من زمان وغير كل ده حتي لو انتي وأبوي موافجين مهينفعش محدش عنديها هيوافج.
چليله...سيبك من اللي حوصل زمان البت ملهاش ذنب ولا انت كمان وبعدين يرفضوا ليه أن شاء الله هما يطولوا يناسبوا موسي ولد وهبه كبير البلد ولد الشرفا
موسي..لا يا چليله بس حمدان يكره العما ولا يطيجني ما انتي خابره زين وابوه هيمشي وراه
چليله..أسمع يا ولدي هجولك كلمتين لو عاشجها صوح وهي عشجاك أوعاك تفرط فيها يا ولدي وأعمل أي حاچه عشانها ولو عايز رأيي هيوافجوا وماهيصدجوا كمان وحتي لو كيف ما بتجول أن حمدان ماهيحبكش بس كمان متنساش ان نسبك ليه شرف وهو يحب مصلحته ومهيضيعش الفرصه دي واصل حاول يا ولدي أنوي وفاتح أبوك ونطلبوها وان رفضوا كيف ما جولت ماتبجاش ظلمتها ولا ظلمت حالك علي الأجل تكون حاولت متفرطش فيها وان وافجوا بعيد عن اللي حوصل زمان اني هكون فرحانه جوي البت زينه وجمر ادب وأخلاج وجمال ملهاش دعوه بعيلتها السو دي واصل هي وبدر لسانهم طيب وولاد حلال وصراحت ربنا اني بحبهم
موسي..اللي فيه الخير ربنا يجدمه يا أما أدعيلي.
چليله...أني عايشه عشان أدعيلك يا سيد الناس
موسي..ربنا يطول في عمرك ومتحرمش من دعواتك أبدا
چليله..يلا جوم أتسبح محضرالك الحمام والخلجات كمان
أبتسم موسي بحب وباس أيدها تسلم يدك يا چليله
چليله..جولي صوح عايز تاكل ايه عالفطار
موسي..باس ايدها مره تانيه كل اللي ياچي من يدك حلو ونعمه يا چليله كفايه أنه يتعمل بيدك
چليله..اهو عشان الكلميتن الحلوين دول كل الوكل اللي هتحبه هيتعمل يلا ههملك عشان تتسبح وتجهز لشغلك
موسي..ماشي يا چليله
بقلمي ………………..أميره أسامه
عدي وقت بسيط نزل موسي
موسي..اني خارج يا چليله عايزه حاجه
چليله..عيزاك طيب وتخلي بالك عالمحمول مش كل يوم توچع جلبي
موسي..سلامت جلبك من الوچع يا ست الدار حاضر ياستي چوليلي فين ابوي ومهران وسالم
جليله..أبوك في المضيفه بيقرأ قران وسالم لساته في الاوضه نايم ومهران خرج من شويه راح عالارض
موسي..ماشي هروح أصبح علي ابوي واطلع علي مهران.
چليله..ماشي يا ولدي خلي بالك من روحك
موسي..بحب سلام عليكم
جليله..عليكم السلام يا سيد الناس ووقفت تمطر عليه بدعاويها اللي مبتخلصش
راح موسي علي المضيفه
موسي..صباح الخير يا كبير
وهبه..صدق الله العظيم صباح الخير يا ولدي
موسي..اني رايح عايز مني حاجه
وهبه..هتاچي ميته يا موسي
موسي..هاچي جبل الفطار في حاچه ولا أيه؟
وهبه..عايزك تيچي بعد العصر في چلسه هتتعمل وعايزك تحضر
موسي..چلسه صولح دي ولا أيه
وهبه..لا مش صلح بس في مشكله مع ولاد حاچ أسماعيل
موسي..ده أبوهم لساته ميت لحجوا يكون في بيناتهم مشاكل
وهبه..عالورث ياولدي
موسي..جولت إكده خلاص هكون عنديك علي صلاه العصر
وهبه..ماشي يا ولدي يلا أتوكل أنت علي الله شوف شغلك
خرج موسي بعد ما باس راس وهبه وراح عالارض وخد معاه دراعه اليمين هريدي.
......
في قصر عتمان
عطر..إصباح الخير يا أما إصباح الخير يا سهير
بخيته وسهير ردوا التحيه
عطر..أساعدك في حاچه يا أما
بخيته..لا ياعطر تعالي بس شوفي مرت أخوكي مالها
عطر..مالك يا سهير
سهير..بتمثيل ماعرفش يا عطر حاسه أني دايخه ونفسي غامه عليا معدتي مش علي بعضها
بخيته..بفرحه تبجي حامل ياسهير
سهير..حامل ايه ياحماتي بس
بخيته..مش بتجولي دايخه ونفسك غامه عليكي تبجي حامل يامرت الكبير
سهير..يامري وده وجته عاد
بخيته..وموجتوش ليه أني عايزه البيت ده يتملي عيال أسمعي عيزاكي ترتاحي ومتجوميش
سهير..بس احنا لساتنا في أول رمضان والحمل إكده هيبجي تجيل
بخيته..مالكيش صالح لو علي شغل البيت الشغالين مالين الدار والشغل يتجسم بين عطر وهاچر وهنيه
دخلت هنيه في الوقت ده صباح الخير
بخيته..بسخريه تعالي يا هنيه مش تباركي لسلفتك
هنيه..بأبتسامه هاديه مبروك يا سهير خير أن شاء الله
أبتسمت سهير بغيظ وغل
بخيته..سلفتك حامل هتچيب الخامس في وش العدو
هنيه..مبروك يا سهير ربنا يجومك بالسلامه
سهير..بكيد عوجبالك ياهنيه..وه جصدي ربنا يراضيكي
هنيه..بحزن الله يخليكي
بخيته..شايفه يا هنيه سلفتك هتچيب الخامس وأنتي معرفاش تشدي حيلك وتچيبي حتي واحد
بصت عطر لامها بلوم
هنيه...دي إراده ربنا يا حماتي ملياش صالح فيها ربنا لسه مأرادش هندخلوا في إراده ربنا
بخيته..أيه هتجفي تديني درس في الدين أياك
هنيه..العفو ياحماتي اني بس بجولك أن دي أراده ربنا وأني مليش يد فيها
بخيته...اهو دي اللي انتي فالحه فيه أنما تحبلي كيف الحريم معرفاش ارض بور صوح😏
دخل هيبه في الوقت ده
هيبه..صباح الخير يا أما
بخيته..إصباح الخير يا ولدي
هيبه..بص لهنيه لقاها دموعها نازله مالك يا هنيه هتبكي ليه؟
بخيته..مرتك زعلانه عشان بجولها تشد حيلها وتحبل كيف الحريم مرت أخوك حبله وهتچيب الخامس
هيبه..بجد مبروك يا سهير ورجع بص لهنيه وأنتي جالبه وشك ليه عاد أمي مجالتش حاجه غلط
بخيته..جولها يا ولدي.😏
وكالعاده وبكل قسوه داس هيبه علي هنيه أكتر ادام الكل ومن غير رحمه
هيبه..بتقليل من هنيه سيبك منيها يا أما هنيه مافيش أمل فيها خلاص
نزلت دموع هنيه بحرقه وخرجت بسرعه من المطبخ أبتسمت سهير بشماته
عطر..ليه أكده يا اما ليه يا هيبه حرام عليكم
بخيته..حرمت عليكي عيشتك وأني عملت أيه عاد
عطر..كسرتي بخاطرها يا أما يعني هو بمزاچها أنها متحبلش كيف باجي الحريم ليه ديما تسمي بدنها وتجهريها يعني انا لو مكانها يا أما ترضيها عليا
بخيته..بعد الشر عنك تفي من خاشمك أنتي زينه أنما هنيه أرض بور
عطر..وأيش عرفك أني زينه دخلتي في علم ربنا يا أما مش يمكن أطلع اني كمان ارض بور واللي بتعمليه مع هنيه ربنا يردهولك فيا بلاش كل شويه توچعيها بالكلام وانت ياخوي هنيه غلبانه وطيبه ماهتلاجيش زييها حرام تكسر بخاطرها
هيبه..كسر راسها سيبك منيها بوز الأخس دي ومن وجع الدماغ ده أني خارج ياما عايزه حاجه
بخيته..عيزاك تدور علي عروسه زينه ياولدي تچبلك حتت عيل جبل ما تكبر ولو علي السرمحه بتاعتك ورا النسوان خليك كيف ما أنت بس هاتلك كام عيل يا ولدي
هيبه..أن شاء الله يا أما سبيني بجي اروح لحمدان عشان رايح معاه لسعد الزفت كيف ما جال أبوي
بخيته..ماشي يا ولدي طريج السلامه
مشي هيبه وخرجت عطر من المطبخ بحزن علي معاملتهم لهنيه و طلعت بسرعه تطيب بخاطرها لقتها بتعيط خدتها في حضنها من غير ولا كلمه وفضلت تواسيها💔😔