Ads by Google X

القائمة الرئيسية

الصفحات

رواية السر الفصل العشرون20بقلم دينا زهران

 


رواية السر

 الفصل العشرون20

بقلم دينا زهران


نور : سؤال غبى، قولتلك إجابته يوم ما جتلك مكتبك وخيرتك وانت اللى اخترت.

جمال: مش فاهم حاجه ؟! 

Flash back

جمال : هو انتى عاوزة تتجوزيني بجد ؟! 

نور : جدا جدا عاوزة اندمك عل اخطاءك من يوم ما تولدت انت ايه رايك بقا نتجوز الخميس واكفر سيائاتك وجدو يعرف عن افلاسك ولا تروح ترفض ف هدوء من غير وجع دماغ .

...

الحاضر...

جمال : ازاى مفهمتش معنى كلامك يومها !

نور : بردو !! الاجابه ف القطعه ... عشان غبى.

جمال : عندك حق ...بس...





نور : مبسش .. انت ف تخيلك مستنى منى ايه ؟

جمال : انا عارف انتى شايفانى ازاى دلوقتى،ودا اللى كنت بحارب عشان ميحصلش ،عشان كدة كنت بنفذ لرنا كل أوامرها ،وعارف كمان أن  مليش اى غلاوة ولا رصيد عندك يسمحولى بانى اطلب تسامحى لا انتى ولا ايمان .. ومهما قولت انى ندمان ،حقكو متصدقوش من كتر الكدب اللى كدبته ، بس اقسملك بالله انى ما فارق معايا اى حد ولا اى حاجه ، انا كدة ارتحت من تهديدها ليا ، الاتنين الوحيدين اللى زعلان انى خسرتهم هما انتى وجدى .. انتى عمرك ما هتدينى اى فرص تانى ، وهو لو سمع باللى عملته هيموت فيها .. المرة اللى فاتت نجى من الجلطه بمعجزة . ...انا تحت امرك ف اللى هتعمليه كله ،ولاول مرة انا مستعد ادفع تمن اخطائى كلها ، وراضى باى تمن تقبليه ..

نور : حلو وانا قررت اديلك فرصه تانيه ..

سليم وإيمان ف نفس واحد بهجوم : نعم !!!!

نور : كل واحد فينا يستحق فرصه تانيه ، فرصه حقيقيه يثبت أنه بنى ادم كويس ، بس هى فرصه واحدة بس ، ودى كرم منى اصلا انى ادتهالك، بس هتنفذ كل حرف أقوله ، مش هتخرج عن كلامى ، مش هتكدب عليا ، مش هتاذينى ،مش هتكلم رنا ولا تتواصل معاها نهائى ، هتسيبنى انا اتعامل معاها ومع البنوك و مع كل حاجه انت بس هتنفذ كلامى ، ها موافق ؟! 

_______

فى فيلا هانى عبد اللطيف كانت فريدة جالسه بالقرب من المسبح تخطو بألوانها البراقه على اللوحه التى أمامها وتدندن بكلمات رقيقه بصوتها العذب  لتصنع مزيجا من الحب والفن معا فى آن واحد ... يقف خلفها معتز دون أن تشعر يتأمل ذلك البريق الذى يشع منها ... انها حقا حلم يتجسد فيه كل ما يتمنى .. حتى انها اجمل بكثير مما قد يحلم ف يوم من الايام ... التفت برقه لتتابع الطير الذى طار من أمامها ،لتقع عينيها على معتز ،الذى كان يرمقها بنظرات حب وطيبه ...

فريدة : واقف من بدرى ؟

معتز : من اول  والحب بيجمع ناسه ..

فريدة : يااه كل دا محستش بيك .

معتز : محبتش اقاطعك صوتك ورسمك ورقتك كانك جزء من اللوحه محبتش اوقفك ، كنت مستمتع وانا شايفك .

فريدة بخجل  : ازاى ظابط وبتعرف تقول كلام حلو كدة ؟ 

معتز : هما الظباط ملهم يعنى ، مبيحسوش ؟

فريدة: لا مقصدش ، مكنتش اعرف انك بتعرف تعبر حلو كدة .

معتز : انا بوصفك ، انتى اللى حلوة زيادة وتخلى الحجر ينطق اعمل ايه انا بقا قصاد دا كله!! ...

فريدة وشها كله احمر : بس بقا ..

معتز : ممكن تكملى الاغنيه ..

فريدة : مش بعرف أغنى قدام حد .

معتز : انا ممكن ادير وشى على فكرة .

فريدة ضحكت : صوتى عجبك بجد؟

معتز : كلك والله مش صوتك بس .

فريدة حطت وشها ف الارض بكسوف ..

معتز : يلا بقا كملى عشان خاطرى .

فريدة : 


الدنيا بترتب صدف

وكل قلبي واحساسه

فجأه الطريق بينا بيقف

والحب بيجمع ناسه

الدنيا بترتب صدف

وكل قلبي واحساسه

فجأه الطريق بينا بيقف

والحب بيجمع ناسه

واحنا اتقابلنا وجه اوانا

شوفتك بقلبي اللي اتمني

وريتني ايام الجنه

ومليت بحبك اوقاتي

حلم حياتي

وصحيت وياك على يوم عيدي

حضنك قلبي ولمساك ايدي

والفرحه اهي عرفت مواعيدي

كتر يا سنين منها وهاتي

حلم حياتـــــــــــــي

كان سيرة في عمري اللي اتقضى

كان صورة ما بين نظرة وغمضة

وخلاص يا عيوني من اليوم دة

على حضنة هتصحي وهتباتي

لبعض أطمنا

وحلمنا وقلوبنا مأمناه

قدرنا نمشي بحبنا

بنوصلة لبيت احلامنا

علشان لبعض أطمنا

وحلمنا وقلوبنا مأمناه

قدرنا نمشي بحبنا

بنوصلة لبيت احلامنا

يا كلمة طول عمري بقولها

يا دنيا كان نفسي ادخلها

دلوقتي هلمسها واطولها

وهتبتدي معاك حكاياتي

حلم حياتـــــــــــــي

وصحيت وياك على يوم عيدي

حضنك قلبي ولمساك ايدي

والفرحه اهي عرفت مواعيدي

كتر يا سنين منها وهاتي

حلم حياتـــــــــــــي

ان سيرة في عمري اللي اتقضى

كان صورة ما بين نظرة وغمضة

وخلاص يا عيوني من اليوم دة

على حضنة هتصحي وهتباتي

.....

امل وهانى كانو واقفين ف الشباك شايفينهم سوا ...

امل : يظهر ابنك طب خلاص .

هانى : طلعت كل مشاعره مرة واحدة بنت الذينه .

امل بشرود : ياخوفى عليهم من بكرة .






هانى : انتى عاوزة تقلقى وخلاص ولا غيرانه بقا عل الحيله اخر العنقود ؟!

امل بجديه: الاتنين مش متنزنين نفسيا كفايه عشان يخشو ف علاقه حب وارتباط وجواز ، كل واحد فيهم خارج من صدمه بشعه ،مش مؤهلين لدا .

هانى : ياستى وانا مش مستعجل ابقى جد ، خليهم ياخدوا وقتهم ، هما هيعرفو يطيبو جراح بعض ، مش واخدة بالك من تغير معتز ، دى اول مرة يعيط ويزعق فينا اول مرة يطلع مشاعره اول مرة يتكلم عن يوم الحادثه ، كل دا بسببها ، فريدة غيرته .

امل : بينى وبينك فريدة كمان اتغيرت اوى عن يوم ماجت ، فاكر يومها كانت عامله ازاى ، كانت هشه اوى ، مبطلتش بكى لمجرد انى حضنتها ، بص عليها دلوقتى ، شايف ضحكتها اللى منورة وشها .

هانى : هى كانت عاوزة عيله ،وسند يحميها وتتقوى بيه ، حد يخاف عليها ،ويفديها بروحه ، ومعتز كان بيدور على حد يملى قلبه ويحرك مشاعرة بعيد عن النار والرصاص ،كان بيدور على دفى قلب يحن عليه ، هما الاتنين لقو اللى محتاجينه ف بعض ، مسير الوقت ينسيهم صداماتهم ويشفى جراحهم .

امل : عندك حق ، ومسيرنا نبقى جدود .

هانى : اه كبرونا العيال دى .


امل : لا يا بابا كبروك انت ،انما انا ، انا لسه ف عز شبابى .

ضحك الاثنان بحب وهم يحتضنون بعض  ، ونظرا الاثنان لمعتز وفريدة ب امل بانتظار أن تدخل الفرحه إلى هذا البيت المنكوب اخيرا بعد فقدان ابنهم الأكبر  ...

_______

فى سيارة نور ...


جمال بحماس شديد : موافق .

نور : مش عاوز تعرف هتنفذ ايه ؟

جمال : انا بقالى سنين رنا بتلعب بيا ،تفتكرى لما يجى حد يقولى هات ايديك انقذك من مستنقع الوحل اللى انت غرقان فيه دا أقوله انا لا ... انا لو اطول اقدملك عمرى كله مش كفايه ، ابوس ايدك يا فريدة متتخليش عنى انقذينى ، مش عاوز ارجع تانى ، والله من يوم ما اتجوزنا وانا مش راضى اشرب نهائى مرات قليله كانت بتدينى جرعه بالعافيه عشان تضمن سيطرتها على لكن انا جسمى مش قابل ، مش عاوز اكمل حياتى مدمن ، مش عاوز اعيش عبد ليها .

فريدة : لما نشوف .. خلينا مع الكداب .






طلعت فريدة من العربيه عملت مكالمه لمامتها ....

كان كل من امل وهانى فى مكانهم يضحكون ، قطعت ضحكاتهم رنه تليفون امل ..

امل : خير يارب رقم مين دا ؟

هانى بص للتليفون  وصرخ بلهفه : دى نور !!

هانى فتح بسرعه ورد بخوف : انتى كويسه ؟! 

نور : اه ،عاوزة اسم مستشفى او عيادة لعلاج الادمان.

هانى : انتى بتهزرى صح ؟! 

نور بهدوء : ادينى دكتورة امل من فضلك .

هانى باستغراب : حد جنبك ؟

نور بهدوء : اه .

هانى : طيب فهمينى من غير ما حد ياخد باله ، فى ايه ؟ 

نور بنفاذ صبر : محتاجه اتواصل مع دكتورة امل .

هانى اده التليفون ل امل : اتفضلى اما نشوف اخرتها .

امل : أيوة يانور عيني.

نور باشتياق وهمس : وحشتينى .

امل بدموع : بقا كدة كل المدة دى مسمعش صوتك ؟ هونت عليكى يا نور !!

نور لملمت شتات نفسها : عاوزة اعرف مستشفى او عيادة لعلاج الادمان ف دهب تكون خاصه .

امل بفهم : قصدك خاصه بالقيادة ؟

نور : اه بالظبط.

امل : تمام  ادينى دقيقه هبعتلك التفاصيل حالا وهبلغهم انك ف الطريق.

نور : اه ياريت ، الحجز باسم فريدة المصري .

امل : متقلقيش.مفهوم  .

بعتت امل اللوكيشن لنور ، عيادة صغيرة ف منطقه نائيه بس مش بعيدة عنهم طلعت نور


بالعربيه وراحت للعنوان ...

___ 

هانى بعصبيه وحيرة : هى بنتك متخلفه ؟!

امل : أهدى بس فى ايه ؟

هانى بزعيق : معتز ... 

معتز  وفريدة جريوا بسرعه بخضه وخوف من زعيق هانى : فى ايه؟! نور كويسه ؟! 

هانى : اختك هتموتنى ... بتجازف بكشف نفسها ... كلملى سليم فهمنى الحمارة دى بتهبب ايه ..

معتز : فهمنى انا بس ايه اللى حصل عشان اعرف اكلم سليم أقوله ايه .

هانى : الهانم اتصلت عل امك من تليفون فريدة ، بتسال عن مصحه للادمان .

معتز : طب ودى فيها ايه ؟ 

هانى : يادى المصيبه ، هاتيلى دوا السكر بسرعه يا امل .

امل جريت جابت الدوا وادتهوله .






هانى : بقالى ٣٠ سنه بعلم واربى ف جوز متخلفين مش عارفين أن مدام ف مهمه منكلمش حد لان اكيد مراقبين التليفونات.

معتز بفهم : اهاا ... لا لا متقلقش يابابا دا مش خط فريدة اصلا .

هانى بذهول : لا الرقم رقم فريدة  انا متأكد .

معتز : أيوة ياحبيبى هو رقمها بس مش نفس الشريحه، ولا نفس التليفون ، دى حاجة تفوتنا يعنى ، انا مغير لنور الشريحه والعدة من اول يوم اصلا ، اللى معاها دا رقم فريدة بس متشفر محدش يقدر يتجسس عليه ولا يراقبه .

هانى : دا انيل ، ما كدة هيشكو فيها اكتر .

معتز : لا بردو متخفش ،عاملين حساب دا ومن وقت للتانى نور بتفوتلهم مكالمات عل كام شات عشان يتطمنولها .

امل خدت نفسها اخيرا  : طب الحمد لله ياولاد طمنتونا ابوكو رعبنى .

معتز : أهدى كدة ياحج ، منبقاش ولاد سيادة اللواء هاني عبد اللطيف لو فاتتنا حاجه هبله زى دى .

هانى : اول ما شوفت الرقم قلبى وقف ربنا يسامحكوا  ، بس لمين المستشفى دى ؟!

فريدة بخفوت : اكيد لجمال ...

هانى : خطيبك ؟! 

فريدة بحزن : جوزى المفروض دلوقتى..

امل : هو مدمن ؟! 

فريدة : معرفش بس من مدة كدة دخل مصحه للادمان ،المفروض بطل ، بس كدة واضح أنه مبطلش ، ويمكن خد جرعه ذيادة ، أو جراله حاجه ف نور حاولت تلحقه .

هانى بذهول : متقلقيش يافريدة يابنتى هو لا جوزك ،ولا هيكون جوزك ، كل دا تمثيل وبمجرد ما تنتهى المهمه دى هتخلصى منه للابد .

فريدة : يارب .

امل : استنو بس ياولاد خلونى ابعتلها العنوان واكلم المستشفى افهمهم ...

_____


ف عربيه نور...

نور : يلا .

جمال بفزع : مصحه ؟! 

نور :امال هجيبك كوكى بارك ، جرا ايه ،مش قولنا مش هتناقشنى .

جمال بدموع حقيقيه : هتتخلى عنى ؟!

نور : لا ، بكتبلك حياه جديدة ، انزل يلا ...

وشاورت لايمان وسليم:  خليكو انتو هنا .





نزل جمال بخوف زى المسجون المحكوم عليه بالاعدام ورايح يتنفذ فيه الحكم ...

اما نور ل كان جواها الف سؤال وسؤال ، ليه بتساعدة ؟ وايه اللى بتعمله دا ؟ وليه صدقته ؟ ياترى هتندم ؟! مليون سؤال ملهمش اى اجابات عندها ...

____

داخل العيادة 

دكتور كرم  ...كان ف استقبال نور ...

كرم : اهلا اهلا مدام فريدة. اول ما اتصلتى انا جيت على طول .

نور : اهلا بحضرتك يا دكتور ..

جلست نور وجمال على المكتب أمام اكرم ..

نور : بص يادكتور ،انا عاوزة رأى حضرتك الطبى بمنتهى الصراحة والوضوح مهما كان صعب تقبله .

كرم : أهدى بس يابنتى ،داخله حاميه اوى انتى ، عموما متقلقيش اكيد هقولك كل حاجه بمنتهى الامانه ..

ووجه كلامه لجمال : انا عارف الموقف بايخ،بس دا مرض زى اى مرض ، والاعتراف بالمرض نص طريق العلاج ،ووجود هنا لازم يكون برغبتك انت ، محدش هيقدر يساعدك لو انت رافض تتعالج . ها قولى بقا عاوز تتعالج ؟!

جمال:  اه .

كرم : ليه ؟! 

جمال بسرعه : عشان فريدة .

كرم بص لفريدة : أن اسف مش هقدر اساعدك .

جمال : لا لا ليه ارجوك أنا عاوز ابطل بجد صدقنى .

كرم : مصدقك ، بس بتحارب ل هدف غلط  ، عاوز




 تتغير عشان حد تانى ،مش عشانك ، يعنى لو الصبح فريدة سابتك ولا عملت حادثه ولا جرالها اى حاجه هترجع تدمن تانى ،وهتبقى مدمن شره ووضعك 





هيكون اسوء بمراحل من دلوقتى،هو  حلو انك يكون عندك حد يدفعك تكون احسن ، بس مش حلو أن تغيرك يكون لحد غيرك .

جمال : طب اعمل ايه ؟!

كرم : خلى قرار التبطيل نابع منك، عشانك ، عشان جمال يستحق حياه من غير مخدرات ، من غير الغيمه السودا اللى مسيطرة على عقله ، عشان يستحق يعيش حر ، ياخد قراراته بنفسه مش يتسحب بشمه ، ويبيع عمرة بسيجارة.

جمال بندم وحزن وهو يتذكر ماضيه : عندك حق يا دكتور بس جمال ميستحقش يتحب، من غير المخدرات كنت مستهتر ،اينعم مكنتش مؤذى غير بيها ، بس مكنش ليا قيمه ،كنت ولا حاجه.

كرم : يبقى جه الوقت اللى نخلق فيه جمال جديد ، جمال من غير مخدرات ، ومن غير استهتار ، جمال احسن لنفسه ،وللى حواليه ... موافق .

جمال : موافق .

كرم : على بركه الله يلا بينا نبدء التحاليل والفحوصات  ، وواحنا بنعملها هسالك شويه أسئله...

جمال وهو ينظر لفريدة كطفل صغير يخشى أن تتركه أمه  : يلا بينا   .

نور : ممكن اجى ؟!

كرم : بتسالى عن رأى ولا الامكانيه ؟

نور : الاتنين .

كرم : وجودك هيدعمه عاطفيا ، بس مش هيبقى مبسوط وهو بيجاوب عل الاسئله دى قدامك ، خليكى هنا ومش هنتاخر راجعين على طول متقلقيش .






نور مسكت ايد جمال بقوه وقالتله : هستناك .. مش همشى ..مش هتخلى عنك ..مش هسيبك لوحدك ..انا هنا عشانك ...وهفضل هنا ...فاهم ؟!

جمال بحب حقيقى حضنها وهو بيعيط : فاهم . شكرا .

____


خلص الفصل انهاردة

كلمه منى ليكم 

متسمحوش لأى شئ أنه يسيطر عليكم الادمان مش بس على المشروبات الكحولية ولا المخدرات بأنواعها ولا حتى للسجائر والدخان بس ، الادمان هو اى شئ و أى شخص بيسطر على عقلنا لدرجه تلغى وعينا ويخلينا تابع ليه من غير ما ندرك تصرفاتنا .

*****


أما الجزء الجاى ف هو خاص باى شخص عاوز يبطل او يعرف شخص محتاج يبطل لعله يبقى سبيل ولو بسيط للمساعدة 

دا رقم الخط الساخن لعلاج الادمان 16023


ويتيح صندوق مكافحة وعلاج الإدمان والتعاطى التابع لوزارة التضامن 




الاجتماعى ، أن خدمات الخط الساخن "16023" لعلاج الإدمان متاحة على مدار 24 ساعة، وطوال أيام



 الأسبوع بدون توقف حيث تتنوع برامج العلاج المقدمة من الخط الساخن من علاج طبى وخدمات



 الدعم النفسي وكذلك برامج إعادة التأهيل وبرامج الحد من الانتكاسة.

            الفصل الحادي والعشرون من هنا

لقراة باقي الفصول اضغط هنا


تعليقات