Ads by Google X

القائمة الرئيسية

الصفحات

رواية السر الفصل الرابع عشر14بقلم دينا زهران

 

رواية السر
 الفصل الرابع عشر14
بقلم دينا زهران


فى طريق دهب .... كان سليم وإيمان واقفين بيشاورو لاى عربيه معديه تاخدهم ف طريقها ...

ايمان : حسبى الله ،منه له .

سليم : ما خلصنا هى حدوته ، عطلت اى المشكله ، ما كل العربيات بتعطل . وعربيتك ما كانت عطلانه امبارح .

ايمان : ياريتنى حجزت مع اتوبيس .

سليم : ياريت ، كنت ارتحت من زنك .

رن هاتف سليم...

سليم بنرفزة: الو .

نور: ياساتر يارب جرى ايه ياسولى حصل ايه تانى .

سليم : العربيه اتنيلت عطلت ، وادينا عل الصحراوى والجو نار ،وولا عربيه راضيه تقفلنا .

نور : طب ومكلمتنيش ليه ياحبيبى من الصبح .

سليم : كنتى هتعملى ايه يعنى .






نور : كنت هجيلك مثلا ،اطلبلك ونش يشيلك ، ابعتلك ميكانيكى ،لو تشغل مخك دا كان فى ميت حل .

سليم : يوووه بقا مجاش ف بالى .

نور : خلاص خلاص انا جيالك ابعت اللوكيشن .

سليم : بعته .

نور : مسافه السكه .

ايمان : دى فريدة ؟! 

سليم : اه .

ايمان : هى بتقولك ياسولى 

سليم باستغراب : ماتقولى ،انتى مالك اصلا .

ايمان بتلعثم : قصدى عشان جوزها يعنى .

سليم : داهيه تاخدة .

ايمان : يارب .

سليم : اول مرة نتفق على حاجه.

ايمان : يظهر فريدة هى نقطتنا المشتركه الوحيدة ، هى قالتلك ايه .

سليم : قالت اقعدو ف العربيه وشغلو التكيف وانا جايه .

ايمان بفرحه : بجد !!! انا كنت فقدت الامل ،

فريدة دى احسن واحدة ف الدنيا اقسم بالله ، يلا طيب فيها تكييف البتاعه دى .

سليم بتهكم: اه ياختى فيها ، خشى خشى .

ايمان : وايه كمان بقا .

سليم ببلاهه: ايه ايه .

ايمان : هو انت على الله كدة ، بقولك ايه نقاطتنا المشتركه تانى ، بفتح كلام يعنى ، بتسلى.

سليم : اه اه ، لامؤاخذة اصلى مليش انا ف الحوارات وكدة ، عمرى ما كلمت بنات اساسا.

ايمان : ازاى يعنى امال فريدة دى ايه .

سليم بتدارك الموقف : لا فريدة مختلفه ، هى مش شبه البنات بريئه ولطيفه ،تحسى أنها طفله كدة .

ايمان بشرر يتطاير من عينيها : وانا !!! 

سليم : انتى ايه .

ايمان : انا مش لطيفه ولا بريئه !!!

سليم : هو فيه ايه كل شويه تتقمصى ، دا انتى قماصه جدا الواحد مش عارف يتكلم كلمتين من غير ما تقاطعيه ، ياستى براحه عليا ، معنديش زفت خبرة ف إدارة الحوار . مدب ودبش ارتحتى.

ايمان بابتسامه : اه كدة ارتحت . كمل .

سليم : اكمل ايه ،خلاص خلصت .

ايمان : يادى النيله ، ياسيدى بتهبب ايه ف الوجود.

سليم : اه اه معلش ، بلعب رياضه ، كورة ، خيل ، ضرب نار ، بوكس .

ايمان : بس كدة .

سليم : لا ساعات بقرا .

ايمان : حلو دا ، بتقرى لمين  بقا .






سليم : مراجع علميه .

ايمان : يابنى انت ، تعبتنى، يعنى أما بتعوز تتسلى بتعمل ايه .

سليم : مبفضاش ، معنديش وقت فراغ اصلا ، شغل الجامعه ،والمستشفى ، والعيادة . معنديش وقت اتسلى.

ايمان : طب وقبل كدة أما كنت بتدرس.

سليم : كنت بشتغل بردو .

ايمان : حلو بتشتغل ايه .

سليم : كنت بشتغل ف مطعم .

ايمان : ويتر ؟معقول ! شكلك ميجبش 

سليم : لا شيف .

ايمان : بتهزر صح .

سليم : لا والله كنت بشتغل شيف ف مطعم كبير كمان .

ايمان : شكلك ميقولش انك بتعرف تطبخ خالص .

سليم : لا بطبخ من زمان ، ابويا اللى علمنى ، بيطبخ حلو اوى .

ايمان : الله ، لازم تعزمنى ف يوم بقا ، طب ومامتك بتعرف تطبخ بردو ولا بتاكل عل الجاهز.

سليم وشه قلب واتعصب فاجأه : لا ماتت ،واقفلى كلام ف الموضوع دا .

ايمان : اسفه مكنتش اقصد . شكلى اتدخلت ف حياتك اذيد من اللازم sorry متزعلش .

سليم اخد نفس وحاول يهدى مينفعش يتصرف معاها كدة محتاجلها : بصى مبحبش اتكلم ف الموضع دا رغى ف اى حاجه بلاش دا .

ايمان : حاضر متزعلش .

سليم : ماشى ، ايه بقا موضوع شكلك ميجبش دا كل شويه شكلك شكلك ، ماله شكلى ، مسجل خطر انا يعنى ولا ايه .

ايمان : لا  ، بس اصل الطبخ دا فن محتاج  sense  .

سليم بنرفزة : ولا احساس ولا نيله ،محتاج واحد جعان معندوش حد يطبخله وبطنه وجعته من أكل الشارع مش اكتر .

ايمان : طيب خلاص خلاص متتعصبش ، مش عاوزة اتخانق معاك .

سليم : ليه .

ايمان : عشان بتخوفنى .

سليم : عشان الكلاب يعنى .






ايمان : حسيتك مش سوى نفسيا ، ومبعرفش اثق في حد مش ضامنه ردود أفعاله .

سليم : عندك حق ،بس اعتذرتلك .

ايمان : لا انت اعتذرت عن عرضك للجواز .مش عشان سبتنى للكلاب تعضنى .

سليم : طيب متزعليش ، تعالى نفتح صفحه جديدة .

ايمان ببراءة  : توعدنى متاذنيش .

سليم  بصدق : اوعدك.

------

فى الفندق ...

جمال : بتكلمى مين .

نور بنفاذ صبر  : هو انت موركش غيرى ، ما تحل عنى بقا ،روح شوف صحبتك ولا اخرجو ولا روح الجيم شوفلك شغلانه تانيه .

جمال : لا انتى شغلانتى خلاص انا فاضيلك ، مش هتحرك من قدامك ثانيه .

نور : خلاص اتحرك انا ، عن اذنك .

جمال : خدى هنا ، هو انا طربوش .

نور : لا ،لاسمح الله ، ف ..

جمال : ف. استاذنى ؟ 

نور : لا والله متلاقيش .

جمال : هو ايه اللي ملاقيش . انا جوزك .

نور : ما خلصنا بقا هى قصه ، من الصبح شغال جوزك جوزك ، ايه بتحفظها .

جمال : حلو اللقب اصله 

نور :طب ياخويا اشبع منه بقا قبل ما يخلص .

جمال : اوعدك ميخلصش .

نور : طب وسع كدة ،بدل ما اخبطك بحاجة.

جمال: انتى متربيه ف اصلاحيه ياماما ، فين هدوءك ورقتك .

نور : مبيجبوش مع امثالك .

جمال : انتى بتغلطى فيا على فكرة.

نور : وياريت البعيد عندة كرامه وبيبعد.

جمال : بحبك .

نور : كداب .





جمال: طيب لو سمحتى قوليلى رايحه فين .

بسال بأدب اهو .

نور : ايمان عطلانه عل الطريق هروحلهم .


جمال : ياخبر  ، طب استنى اجى معاكى .

نور : ولا ، ابعد من وشى .

جمال : ولا !!! طب مفيش نزول يافريدة .

ها .. ورينى بقا هتنزلى ازاى ، يا انا يانتى .

قال ولا قال .

نور : طب يا استاذ جمال لو سمحت خلينى اروحلهم ، الجو نار وواقفين من بدرى .

جمال : كان من الاول ،لازم ازعق يعنى . اتفضلى قدامى خلينا نروح .

نور : مش رايحه معاك ف حته .

جمال : وانت مش هتروحى لوحدك ف حته ، عاوزة تلحقيهم يبقا نروح سوا ودا اخر ما عندى .

نور بزهق : طب اتفضل خلصنى .

-----

فى فيلا هانى عبد اللطيف..

امل : دا مش هزار يامعتز ، بنات الناس مش لعبه . 

معتز : مين قال بهزر.

امل : ودى حبيتها امتى أن شاء الله ف الحلم !!

معتز : من اول مرة شوفت صورتها وحياتك .

بصى كلامى مش مترتب هو مش حب قد ما هو اعجاب ، بس بصراحه لو لفيت الدنيا مش هلاقى واحدة انتى تحبيها كدة وهى تبقى غلبانه كدة .

امل : بس دى  متجوزه !

معتز : ياستى دا كله تمثيل .

امل : أهلها ميرضوش بيك .

معتز : دا كله سابق لأوانه ، نور هتظبط الدنيا انا متاكد .

امل : متعلقهاش بيك يامعتز ، اصبر المهمه تخلص ، هى مش جاهزة نفسيا الارتباط لا بيك ولا بغيرك ،اهدى على الأقل تخلص علاجها .

معتز : مش مستعجل ، دى اللى عشانها استنى العمر كله .


                    الفصل الخامس عشر من هنا

لقراة باقي الفصول اضغط هنا


تعليقات