حكايتنا بتدور بين دنيتين مختلفين وبطلتين مختلفين بينهم سر كبير هيضطر كل واحد فيهم أنها تسيب حياتها اللى بتحبها وتعيش مكان التانيه ويستغلو الشبهه اللى بينهم عشان يخفو السر دا عن كل اللى حواليهم
*********
الابطال
نور : نور رائد ف القوات الخاصة شغلتها الحماية وقوتها وشجاعتها خليتها من اشطر الضباط ف القسم كله عل الرغم من كونها بنت بس عمر ما حد حس ب كدة بسبب اهتمامها بشغلها بس وجديتها ف التعامل مع الكل حتى أهلها
اللواء هاني عبد اللطيف : والد نور وزى ما باين من الوصف هو طبعا اللي حببها ف حياه الخطر
دكتورة امل : مامت نور وفنفس الوقت دكتورة نفسيه اتعرفت عل جوزها من خلال شغلها معاهم ف تأهيل الضباط نفسيا
معتز : اخو نور وزى ما باين من عيلتها كلهم ضباط وطبعا اخوها زيهم ضابط وف نفس القسم معاها ولكن كان مجبر عل دا لأن من صغرة ضل لنور محدش شايفه ابدا ولا مديله اهتمام
سليم : صاحب معتز الانتيم ودكتور جراحه وبيكره الستات كلها
--------
فريدة :عكس نور تماما بنت رقيقه وهاديه شبه البسكوتة كانت ف كليه فنون جميله و بعد وفاه باباها ومامتها ف حادثه كان عمرها لسه ٢٠ سنه راحت عاشت مع جدها رجل الأعمال الكبير هاشم المصري هو اللي رباها من اول
وجديد ودخلها دنيا الأعمال والتجارة اللي عمرها ما ناسبت رقتها وعارض تماما أنها ترسم واجبرها تحول لكليه إدارة الأعمال عشان تقدر تشيل الحمل الكبير من بعدة
ايمان : صديقه فريدة الانتيم وكاتمه كل أسرارها وشبها ف رقتها وطيبتها
هاشم المصري: زي ما قولنا فوق رجل شديد وصارم التجارة قتلت جزء كبير من قلبه والباقي مات بعد موت ابنه الوحيد ابو فريدة عشان كدة قرر يقسى عل فريدة عشان تبقى قد الحمل اللي هيسبهولها وخصوصا أن أعداءه كتير جدا وعشان يطمن عليها اكتر خطبها لحفيد اعز صحابه
جمال حسين : رجل اعمال غني ومدلل وحيد والديه دلعهم ليه خسرهم كل ثروتهم والحل الوحيد عشان يستردوا وضعهم ف السوق هو جوازه من فريدة المصري ودمج شركاتهم سوا قبل ما يعلنوا افلاسهم
نجوى: والدته ست من الطبقة الراقية يومها بين النوادي و بيوت الازياء والكوافيرات عشان تعيش عل الموضة و تعمل اخر صيحه من كل حاجه
حسين الصريطى : والده ورجل أعمال فاشل معرفش يتعلم من والدة أي حاجه ولا يعلم ابنه أي حاجه
ماجد الصريطى: رجل اعمال مخضرم صديق هاشم المصري ومتفق مع صديقه
عل جواز حفيدة الوحيد من حفيدته عشان يربوهم هما الاثنين يمكن يقدروا اخيرا يتحملوا المسؤولية بعد ما الحياة الترف اللي بوظتهم عل حد تفكيرهم ...
١
المشهد بيدور ف مكتب اللواء امجد المالكي رئيس قسم العمليات الخاصة
امجد متحدثاً في الهاتف : متقلقش يا ضياء بيه العملية هتم ف منتهى السرية انا هكلف بيه اكفأ ضابط ف القسم عندي
عل الهاتف : مش مسموح بالغلط يا امجد أي غلطه بموت .
امجد : اطممن يا فندم دي مش اول مرة ...
بعد إنهاء المكالمة امجد رن الجرس ودخل عسكري
العسكري :تمام يا فندم .
امجد : الرائد نور وصل ولا لسه .
العسكر: لسه يا فندم.
امجد: بمجرد ما توصل تبقى عل مكتبي فورا بدون أي تأخير .
العسكري : تمام يا فندم.
ف بيت فريدة المنبه بيرن بتطفيه وتكمل نوم وبتدخل من الباب دادة زينب المربية بتاعتها...
زينب: ما كفايكى نوم بقا يا كسلانه جدك عامل زعابيب من الصبح يلا اصحى .
فريدة بكسل : جدى أي بس دلوقتي يازوزا حرام عليكى حد يجيب السيرة دي عل الصبح.
هاشم من وراها بزعيق : مالها السيرة يا هانم .
نطت فريدة من السرير بخوف ووقفت قصاد جدها بسرعه: لا ملهاش طبعا مكنتش اقصد والله ، انا بس راحت عليا نومه كنت بخلص الشغل المتأخر بليل، حالا هكون جاهزة .
هاشم بغضب اكبر بيطلع لوح رسومات لفريدة : شغل بردوا يا هانم ولا بترسمي انا مش قولت القرف دا ميخشش القصر عندي مفيش فايدة فيكي.
فريدة بعياط بتحاول تاخدهم :اسفه والله مش هتتكرر آخر مرة هاتهم والنبي خلاص ..
هاشم مشى عل المطبخ وفريدة جريت وراه لكن ملحقتهوش ،ومقدرتش تمنعه وهى شايفه رسوماتها كلها بتتحرق قدام عينها....
هاشم بصلها بحدة: دي آخر مرة هحذرك معاكي ربع ساعه وتكوني عل مكتبك ف الشركة.
فريدة مسحت دموعها وطلعت اخدت شاور ولبست بدله كالعادة جدها بيكره البنات ولبسهم وفساتينها وألوانها، زي ما بيكره رسوماتها خلصت وخدت عربيتها وطلعت عل الشركة.
ف مكتب امجد
نور. أيوة يا فندم بس دي مش قضيتنا، احنا ملناش علاقه لا بالبنت اللي هيقتلوها، ولا بالناس اللي عاوزين يقتلوها .أي اللي يورطنا بين مافيا رجال الأعمال دي.
امجد. انا مبناقشكيش يا سياده الرائد دا أمر مطلوب منك حمايه البنت دى ولو كلفك الأمر حياتك البنت دى حياتها مهمه عندنا اوى دلوقتي مش لازم يمسها أي حاجه
نور. تمام يا فندم محتاجه اعرف شويه معلومات عنها عشان اقدر احميها
امجد . كل اللي هتحتاجى تعرفيه موجود في الملف دا اقريه ف الطريق وعندك حريه تختاري الفريق اللي هيكون معاكي ف العملية دى بس لازم تروحيلها دلوقتي مفيش وقت عرفيها بنفسك وبمهمتك بمنتهى السرية.
نور عملت التحية وخرجت..
______
جمال ف مكتب هاشم : اللي حضرتك تشوفه انا معنديش مشكله في المهم بس فريدة توافق .
هاشم : فريدة رائيها من رائ ومدام انت موافق يبق جهز كل التحضيرات فرحكو اخر الشهر ...
ف العربية نور ومعتز متجهين للشركة عشان يبدؤوا عمليتهم ف الحماية
معتز. ممكن تبطلي تسحليني معاكي ف مهماتك انا راجل رايق محبش انا الفرهدة بتاعتك دى.
نور. ممكن تبطل رغى وتقرا بصوت عالي وتعبر مهمتك ف المهمة دى Recoder كدة .
معتز. اوووف ماشي يا اختي .
ومعتز بيقلب ف الملف لقى صورة وقعت منه كانت الصورة للبنت المطلوب حمايتها مسك الصورة وهو مبهور وكمل كلامه
. فريدة المصري الوريثة الوحيدة لكل شركات المصري جروب وخطيبه جمال الصريطى ملك الحديد عيله رجال أعمال أبا عن جد بس زي لهطه القشطة والله اللي زي دى حرام تموت يعنى أي اللي يخلى حد يكره بسكوته زي دى ويحاول يقتلها بس
نور بضحك:. والله انت عبيط بقولك مافيا تقولي بسكوته كمل يا حنين كمل .
ف الوقت دا كانت عربيه نور وصلت قدام شركات المصري ف نفس
الوقت اللي وصلت فيه عربيه فريدة اللي بمجرد ما نزلت
من العربية انهال عليها الرصاص زي المطر لكن حصل اللي محدش كان متوقعه ......