رواية السر
الفصل الثاني والعشرون22
بقلم دينا زهران
رجع اكرم وجمال للمكتب ....
نور :. ها ؟!
اكرم : ولد زى القمر ما شاء الله ، اللى جابلك يخليلك .
نور باستفهام: مفهمتش ؟!
اكرم : مالك متوترة ليه ! مش مستنيه نتيجه الشهاده الثانويه ، كله خير ،اهدى ..
نور ف سرها : يامجايبك اللى تفرح يا دكتورة امل..
اكرم : بصى ياستى ... احنا بنقسم مراحل العلاج ل ٤ مراحل أساسية ، اول واحدة اللى احنا فيها دلوقتى... اللى المريض فيها بيعترف بمرضه وبيحط لنفسه هدف يبدء رحله العلاج عشانه... وعلى الأساس دا بنبدء الفحوصات الطبية اللى بتبين لنا وضع المريض ،وبناء على التحاليل بنبتدى نحط برتوكول العلاج ...
وبنقسم المرضى ل ٤ انواع ، الاول دا ف مرحله التجربه .. اخد مرة ولا اتنين وخلاص دا علاجه سهل وممكن يتعالج ف البيت عادى ، التانى بقا دى بنسميها مرحله التعاطى القصدى .. يعنى المريض اخد وجرب وعجبه وكمل شرب بالقصد بس مطولش ودا بيبان ف الفحص طبعا وعلى مدى تأثير المخدر بنحط
البرتوكول بتاعنا عشان نحميه من الانتكاسه ودا علاجه اسابيع بسيطه بس الاهم المتابعه بعد العلاج، التالت بقا الادمان ... دى مرحله مش سهله ابدا المريض فيها مبيقدرش يوقف المخدر لوحدة ، لازم تدخل قوى ، ورعايه طبيه مكثفه وانعزال تام عن العالم الخارجي. لان اعراض الانسحاب بتبقى قويه جدا . اخر مرحله بقا هى الاحتراق ... ودى مرحله بشعه من الادمان ... بيعيش فيها المريض سنين المخدر بيكون جزء أساسى من تكوين جسمه على مر سنين من التعاطى ...
نور بنفاذ صبر : وجمال ف انى مرحله من دول ؟!
اكرم : جمال ف تالت مرحله ... هنحتاج شويه وقت بس حالته مش ميؤس منها وخصوصا أن صحته الجسديه هايله ماشاء الله ورياضى وسنه لسه صغير وبإذن الله جسمه هيستجيب بسرعه ...
نور بنرفزة : أيوة يعنى اد ايه ؟ انا مش دكتورة ومش فاهمه حاجه اساسا من كل دا.
اكرم : انا بشرحلك عشان تفهمى ، لانك انتى اللى هتمشى معاه المشوار دا لاخرة ، لأن على حسب ما فهمت مش هتسيبه ف المصحه وتمشى .. ولا ايه ؟!
جمال يصلها برجاء : مش هتمشى صح ؟!
نور بديق : ماشى بس اختصر معلش مبحبش التفاصيل ..
اكرم : معانا من ٣ ل ٦ شهور عل حسب الحاله وعلى حسب الاستجابه يمكن ااقل .. ويمكن اكتر ...
نور : بتهزر !!.. انا معنديش الوقت دا كله ...
اكرم : كل ما طالت مدة الادمان طالت مدة العلاج .. جمال مدمن بقاله خمس سنين .. كون أنه يقدر يرجع لنفسه ف شهور دى اساسا معجزة ..
جمال برجاء : صدقينى هستجيب بسرعه ، متتخليش عنى ، انا هنفذ كل حرف تقولوه ، بس خليكى جنبى يافريدة .
نور بحزن : مش هقدر ..الوقت مش ف ايدى .. مينفعش نختصر المدة دى ؟!
اكرم : بصى خلينى اشرحلك الاول المدة دى ليه ... البرتوكول اللى حطيتهوله متقسم ل ٤ مراحل ...
نور بعصبية : يادى ال ٤ زفت ، انا اتخنقت ...هو كله اربع مراحل، اربع انواع ،اربع علاجات، انت عندك مشكله مع رقم اربعه ؟! وعماله اقولك اختصر اختصر خلفى ديق ...
انفجر جمال واكرم ف الضحك ...
اكرم : انتى نرفوزة اوى طولى بالك بس 😂
نور : اختصر معلش عشان خاطرى ..
اكرم : حاضر والله 😂 ... البرتوكول ...
نور : ٤ مراحل ها ..
اكرم : الاولى دى بتبقى ..
نور : ٤ ايام 🙂
اكرم بضحك شديد : برافو عليكي اديكى بقيتى معانا على نفس ال line اهو .
نور : انت بتهزر صح !!
اكرم : لا صدقينى ، ٤ ايام فعلا .. دا الديتوكس .. بنسحب المخدر بالتدريج لحد ما نوقف مخدر تماما وبنطهر جسمه من السموم.. وبعدين ندخل ف تانى مرحله ودى حوالى ١٦ يوم دى بتبقى اعراض الانسحاب فيها قويه المدة دى هنعالج فيها المضاعفات.. لو عدت بسلام ف احنا خلصنا نص الرحله والنص الباقى نص جمال لوحدة .
نور : ازاى ؟!
اكرم : تالت مرحله هى التأهيل السلوكى دى حوالى ٩٠ يوم .. دى هتم مع دكتور نفسى.. ودى اهم مرحله حلى بالك .. وانا ارشح بشدة دكتورة امل الهادى ...
نور ارتبكت ووشها جاب ميت لون لما جاب اسم مامتها : ورابع مرحله ؟
اكرم : دى حوالى ١٣٠ يوم ، بتبقى متابعه خارجيه بيكون فيها ف البيت عادى .
نور : طيب يعنى تقريبا المدة اللى هيفوق فيها ٢٠ يوم صح كدة ؟!
اكرم : يمكن اكتر ويمكن ااقل دى مجرد مدة تقريبه .
نور : مفهوم ماشى . ال ٢٠ يوم دول فيهم مراحل تانيه ولا هنعمل ايه فيهم بالظبط ؟
اكرم : بصى هو المفروض ال الفترة دى تتم ف مصحه ، بس مدام دا مش متاح في البديل أنه يكون فيه شويه قواعد .
نور : زى ايه .
اكرم : هنغير المكان اللى عايش فيه .
نور : سهله كدة كدة عزلنا لبيت جديد . ايه تانى ؟
اكرم : عظيم ، هنغير روتين الحياة اليومية اللى كان بيعمله زمان هنغير الاماكن المواعيد نعيد ترتيب اليوم بمعنى اصح مع وشوش جديدة موثوق فيها انها مستحيل تخليه يقرب من المخدر تانى أو تديله اى نوع ف الاكل ف الشرب باى شكل .
نور : سهله بردو هنعمل دمج ، مكتبه هيبقى ف شركتى تعامله مع موظفينى الاكل ف البيت بس من ايد دادة زينب .. ممكن اصلا ناخد الكام يوم دول اجازة اساسا عشان شهر العسل ..
اكرم : دى فكرة هايله ، كمان محتاج يكون فى وسط يقبله ويديله احترام لذاته وتقدير لمجهودة وسط يقدر يشارك فيه افكارة بحريه من غير خوف من الانتقاد ..
نور : بسيطه بردو ، انا موجودة كمان ايمان وسليم .. كلنا معاك كلمنا اى وقت ف اى حاجه.. احنا موجودين عشانك .. كمان سليم دكتور ..اظن دا ممكن يساعد ..
جمال : ما بلاش الواد الساقع دا ..
نور : عل فكرة هو كويس ، وخطيب ايمان ، عامله حلو .
جمال على مضض : ماشى .
اكرم :كمان جلسات العلاج الجماعى ممكن تفرق كتير ...
نور : لا بلاها دى دلوقتى، الله واعلم مين هيقابله هناك .
اكرم : تمام كدة مش فاضل غير كام حاجه بسيطه .. اشغل يومك بهوايات رياضه .. انشطه.. متقعدش فاضى ... الفراغ مفسدة .. كمان راجع نفسك باستمرار قيم يومك كل يوم شوف كسبان قد ايه وكنت خسران قد ايه ... اخر حاجه بقا لازم كل يوم يبقى فيه مكافأة تشجيعيه بس هتم بعد فحص المخدرات بشكل يومى يعنى كل يوم بليل تعمل تست جديد عديت تاخد مكافأة .... خيشت .. نبدء عد من الاول ...
نور : مفيهاش خيشت ... خيشت .. تكمل لوحدك .. ها موافق ؟!
جمال : موافق .
اكرم : يبقى كدة احنا اتفقنا ... دى الروشته فيها الادويه اللى هتحتاجيها والمواعيد .. اول ٤ ايام افضل تكونو قريبين منى عشان لو احتجتو مساعدة .. معاكى رقمى كلمينى اى وقت .. هتقابلك شويه اعراض طبيعيه متقلقيش منها .. اى حاجه مختلفه كلمينى فورا ..
نور : زى ايه الطبيعي دا !
اكرم : صداع ودوخة.عدم تركيز وزغللة في العين.قلق وتوتر.اضطرابات في النوم وأرق.اكتئاب.هلاوس” في بعض الأحيان.العدائية والتحفز. تكسير في الجسم وخمول. اضطرابات في الجهاز الهضمي. صعوبة في التنفس.آلام في الظهر والعضلات. آلام في العظام والمفاصل.
نور : تمام يادكتور .. متشكرة اوى لحضرتك.
اكرم : تحت امرك ف اى وقت يابنتى . وانت ياجيمى .. معاك رقمى .. عندى استعداد اسمعك اى وقت لاى كلام .. فاهم ..
جمال : فاهم .. ومتشكر اوى لحضرتك.
خرج جمال ونور من العيادة وراحو يركبو العربيه ...
جمال بهمس : شكرا .
نور : انا معاك ، مش هتخلى عنك .. متتخلاش انت عن وعدك ليا .
الفصل الثالث والعشرون من هنا