رواية حكايات بنات
الفصل الرابع4
بقلم نجمة براقة
بعد تلات ايام
امنيه
بدأت مشاكل تحصلي في الشغل انا معرفش سببها مره حد يطلب
اردر ويرجعني بيه، ومره واحد يهزقني علشان اتاخرت ومره الاقي حد بوظلي الموتسيكل وادفع تمن تصليحه
انا ومره ريتاج تقفل علينا باب الحمام واستغفر الله، تعمل حاجات غريبه..
واللي حصل النهارده العن واضل.. حد طلب اوردر ف روحت بالموتسيكل وشوفت شابين ماشين ورايا من عند
المطعم لغيت ما وصلت مكان كده و وقفوني فى الطريق وخدو منى الاوردر ابو 550 جنيه تحت تهديد السلا.ح
وانا مش حيلتي 100 جنيه ادفعها، بقيت واقفه فى الشارع اندب
حظي وانا مش عارفه اتصرف ازاى لغيت ما عربية وقفت جمبي ونزل منها راجل شكله في الاربعيني وشيك
حازم _ خير يا استاذ اقدر اساعدك
امنيه ببكاء _ الحراميه ثبتوني وخدو الاوردر ابو 550 جنيه اقول ايه لصاحب المطعم
حازم _ انت صوتك عامل كده ليه
امنيه ببكاء _ ونبي سيبني في حالي دلوقتي هو ده وقته
حازم يحاول يداري ضحكته_ خلاص متعيطش، خد دول تقدر تدفع منهم تمن الاوردر
امنيه_ وانت بتديني فلوس بتاع ايه
حازم_ حابب اساعدك، وياسيدي تقدر ترجعهم او تيجي تشتغل عندي في الشركه انا محتاج موظفين شباب
امنيه_ بتتكلم جد
حازم_ اه ودي فيها هزار
امنيه _ كام المرتب وهشتغل ايه
حازم _ في كذا وظيفه بس السكرتيرة مرتبها هيكون اكتر لو تلاقي لينا سكرتيره كويسة كده ياريت تجيبها معاك
امنيه بإبتسامة_ اه عندي واحده تنفع، كام مرتبها بقا
حازم _ 5000 جنيه ك بداية
امنيه بذهول_ واووو خلاص هات العنوان وانا هبعتهالك، هي بتعرف تتكلم انجلش كويس واكيد هتنفع
حازم _ اسمها ايه طيب
امنيه بإبتسامة فرحه_ امنية اختي التؤم
حازم بإبتسامه _ تلاقيها شبهك اوي
امنيه _ جداً، مش اختي التؤام، هات العنوان وبكره هتكون عندك
حازم بإبتسامه _ تمام اتفضل ده الكارت بتاعي وده عنوان الشركه وياريت متتأخروش هستناكم انت وهي
امنيه _ لااا اصل اصل انا مسافر ضروري بكره وهبعتها هي بقا
حازم _ تمام ياااا. اسمك ايه؟
امنيه _ اسمي عادل عبدالسلام
حازم بإبتسامه _ عاشت الأسامي، يلا خد الفلوس دي علشان تدفع تمن الحاجه اللى اتسرقت
امنيه بإبتسامة _ متشكره جداً، وقريب هردهملك
حازم _ قصدك متشكر
امنيه بلخبطه _ ايوه زي ماقولت كده
حازم بضحك _ ماشي يلا مع السلامه
الراجل ده نجده نزلتلي من السما.. سكرتيره اريح من عامل ديليفري بكتير بس يارب يقبلوني من غير شهادات ويكتفو بطيبة قلبي وخفة دمي
عز الدين
جه حازم الشركة وهو مبتسم وشكله انجز المهمه
عز _ شكلك نفذت اللي طلبته منك
حازم _ ايوووه وبكره جايه بشخصيتها الحقيقيه مش بشخصية عادل
عز بإبتسامة_ تمام اووي .. طيب وادتلها فلوس الاوردر اللي اتسرق
حازم_ اه طبعا.. بس صعبت عليه خدت اهانات في يومين محدش يستحملها
عز _ هنعوضها متقلقش بس عاوزك تربطها بمسمار جحا في الشركة
حازم _ لدرجة دي مالك ياحبيبي كنت بعقلك
عز _ ولسه بعقلي بس هي ممكن لما تشوفني تقول هسيب الشغل
حازم _ طيب ما تسيبه هي الخسرانه مش انت
عز _ اه صح.. بس زي ماقولتلك عندي فضول اعرف هي عاملة في نفسها كده ليه
حازم _ طيب ما كان ممكن نعرف من غير ما نشغلها عادى
عز _ اه فعلاً بس هي غلطت فيه المره الفاتت لازم تتعاقب
حازم بخبث_ اه غلطت وقالتلك انك بتحاول تبتزها، لا دي لازم تتعاقب اشد عقاب
عز _ مش كده بردو. يلا روح شوف وراك ايه
حازم _ انا مقولتلكش هي عملت ايه لما قولتلها تشتغل عندنا
عز باهتمام _ عملت ايه
حازم بإبتسامه _ يلا ياحبيبى هخلص الشغل واجيلك
عز _ داااا انت ياخي.. روح
حازم بضحك _ ماشى
حازم بيلمح بحاجات مش موجودة اصلا، انا مش صغير عشان احب عيله، حتي لو كانت كبيره بس فرق السن بينا كبير دا غير اني مستحيل افكر في واحده تانيه غير سميره.. هي مش اكتر من حاله استفزتني... ايوه هي كده وبس
اسامه
شيري غابت يومين ولما جت في اليوم التالت اظهرتلها حزني وعدم اهتمامي بيها وهي بالمقابل معبرتنيش وكأن مفيش حآجه حصلت ولا كأنها شيفاني. بالعكس دي دخلت المحاضرة وطلعت قعدت مع يارا في المكتبه
سامر _ ههههه الخطه باظت نفضتلك يا معلم
اسامه بغيظ_ مفيش واحده تنفض ل اسامة ياحبيبي، وحياتك لا اخليها تلف ورايا لغيت ما تتعب بس استنا عليه
سامر _ انسا مبقاش ينفع تعمل حآجه تانيه كده هتبقا فاكس وحركاتك هتتهرش مهما تعمل. هات الرهان وانساها
اسامه بتحدي _ لا يا حبيبي مش قبل شهر دي الفتره اللي بنتفق عليها دايما، ومبقاش انا اسامه لو مجبتهاش علي بوزها في اقل من كده بكتير
سامر بضحك _ اما نشوف بس خلي معاك ال 2000 عشان محتاجهم
اسامه بغيظ _ ونبي تخليك في الصعيديه اللي مش قادر تعرف عنها حآجه لدلوقتي
سامر _ لا ياحبيبي عرفت وعرفت كتير كمان، ومستني الفرصه علشان اخليها تمشي تطاطي راسها في الجامعة كلها
اسامه _ وعرفت ايه بقا
سامر _ طلعت بنت بواب وبتمسح السلالم لو تشوف شكلها هي وبتمسح مكنتش صدقت ان دي هي دي
اسامه _ بنت بواب ونافشه ريشها امال لو كانت بنت صاحب البيت كانت عملت ايه
سامر _ مش عارف ياعم ، بنات منفوخه علي الفاضي،
اسامه _ عيش ياعم خلينا ننضفها من اشكالهم
سامر _ طيب اسيبك بقا خليني اروح اقرا شويه وارقبها
اسامه _ تقرا؟
سامر _ ايووه اقرا واصلي الضحي كمان ماهي لازم تشوفني حد كويس علشان توقع،
اسامه _ ههههه ابو ام دي شغلانه اللي هتزلنا ياض
سامر _ بس تصدق ان بعيد عن التحدي وكده بس وانا بقرا اكتشفت ان الكتب دي عالم تاني بتاخدك لدنيا تانيه وانت قاعد مكانك،
اسامه بزهق _ بداية متبشرش بالخير
سامر _ متقلقش اخوك مسيطر
اسامه _ اما نشوف يلا غور وانا هروح اشوف ام اربعه وأربعين في اي داهيه
سامر _ مش بتقول انها راحت المكتبه
اسامه _ تصدق صح، خلاص يلا بينا نقرا، العلم نور بردو ههههه
سامر _ زادك الله من نوره يا فتي ههههه
اسامه بسخريه _ هيا بنا يا غلام
دخلنا المكتبه ولقيناهم قاعدين مع بعض وبيقرو ومنعزلين عن العالم، واحنا روحنا عند تربيزه وخدنا كتب وقعدنا نقرا، وانا بقيت اجيب الكتاب يمين شمال وانا مش فاهم هو عاوز يقول ايه
اسامه_ ودا بيقروه ازاي
سامر _ ملقتش غير فلسفة تقرا فيها، رجعه وهات نوادر جحا
سامر _ جحا ايه شايفني جيلك بحمار اي العك ده في ناس عاقله تضيع نظرها في الكتب دى، وأيه الخط دااا مش قاري. انا ماشي
سامر _ اترزع
اسامه يبص لشيري شويه وبعدين يتكلم بصوت عالي _ ولا كلمه سيبوني في حالي بقا، ايوه انا معقد وهفضل رابط نفسي بالماضي، وعيل بيبكي علي فراق امه، انا هبعد عنكم واريحكم من عقدي
سامر باستغراب _ ايه
اسامه _ لا ايه ولا اه خلصنا
قصدت اعلي صوتي عشان تركز معايا وفعلا بقت تبص علينا وانا رزعت الكتاب ومثلت الحزن ومشيت، وهي جت ورايا
شيري _ اسامه استنا
اسامه يمثل العصبيه _ افندم عاوزة تكملي عليه انتي كمان
شيري _ لا خالص انا اعتذرتلك قبل كده وبعتذرلك تاني، بس مفيش حآجه تستاهل تزعل عليها كده
اسامه بحزن مصتنع _ انتي متعرفيش حآجه
شيري بحزن _ اقدر افهم احساسك كويس، من فضلك متمشيش انت ومتعصب،، مينفعش تسوق وانت كده
اسامه بحزن مصتنع_ علشان ممكن اعمل حادثه يعني، طيب ياريت اهو علي الاقل اروحلهم وحشوني اوي اووووي
شيري بدموع _ ربنا يصبرك
اسامه _ متشكر
شيري _ طيب ممكن متمشيش وانت منفعل كده
اسامه بحزن مصتنع _ الكل فاكرني بدلع وبمثل الحزن محدش حاسس باللي حاسس بيه حتي صاحبي
شيري _ انا اقدر احس بيك وافهم شعورك كويس
اسامه _ انتي باين عليكي طيبه
شيري _ مش اوي
اسامه _ لا طيبة قدرتي تحسي بيه برغم اننا منعرفش بعض كويس
شيري _ متشكره، عن اذنك
اسامه _ متشكر ياشيري علي اهتمامك
شيري ترد عليه بإبتسامة وتمشي
قد ايه البنات هُبل صعبت عليها وجت ورايا، لأ وكمان دمعت وناقص انها تبكي، دا ايه العبط ده، بس انا كنت عاوز كده اصلا لكن متخيلتش رد فعلها الزيادة ده..
شيري
انا كنت متعلقه بأهلي اوي وخصوصا ماما، وكتير بيعدي عليه وقت ببقا عاوزة اروحلهم وبوصل لمرحلة الاكتئاب وبنعزل عن كل الناس، وفي البيت بقول اني تعبانه وعندي برد عشان مقليقش امنيه اللي مش ناقصه هم فوق همومها. ولما شوفت اسامه زعلان حسيت بيه وبحزنه، ف روحت وراه خوف من انه يوصل للحاله اللي بوصلها لما بيوحشوني اهلي، اتمنيت اقدر اخفف عليه اللحظه دي برغم اني كنت ناويه مبصلهوش حتي، بس في وقتنا ده الحزن بيوصل الانسان للانتـ.حار وانا محبتش ان حد يوصل للمرحله دي. وفعلا كلامي هداه شويه وطلع طيب بيهدا بسرعه
بعد ما خلصت كلام معاه رجعت ليارا وقعدت جمبها
يارا بغيظ _ روحتي وراه لييه معندكيش كرامه
شيري _ عندي بس مشوفتيش شكله كان عامل ازاي افرضي كان عمل في نفسه حآجه
يارا _ اباااي من البنته لما يميطو حوشو من خلقتهم ما يغور في نصيبه تروحي تكلميه ابتاع ايه انتي
شيري _ انتي مش شايفه انك بتغلطي فيه
يارا _ مقصديش ازعلك بس انا اكده مع اللي احبهم، وهو كان قاصد يبين الشويتين دول علشان يلفت الانتباه وانتي زي الحماره صدقتيه
شيري _ مفتكرش انه كان بيمثل انا زيه واقدر افهم احساسه وبعدين هو كان يعرف منين اني هروح وراه
يارا _ طيب اقطع دراعي من الكتف لو ما كان يقصدها
شيري _ ياستي حتي لو كان قاصد انا عملت اللي يرضي ضميري وخلاص مش هتتكرر
يارا _ اما نشوف
شيري _ اقري يا يارا اقري يا حبيبتي
يارا _ الكتاب خلص، هروح اشوف غيره علشان اخده امعاي البيت
الكل ممكن يفهمه غلط لمجرد انه شاب صايع وعجز وهو بيعيد السنه، بس انا واي حد جرب هيقدر يحس بيه، وانا مش ندمانه ولا حاسه انى قللت من نفسي لما روحت كلمته
يارا
الواد سامر بقا امبلط في المكتبه وانا عارفه من الاول انه امعيعمل اكده عشان يكون بينا كلام، بس هو نسي هدفه الحقيقي واندمج في عالم الكتب ودي حآجه زينه بردك.. العلم والقرأه قادرين يغيرو اي حد وانا لو بقيت وزيرة تربية والتعليم اول قرار هاخده ان النجاح ايكون بعددالكتب اللي تتقري ويجبولي املخص لكل الكتب اللي قروها، وهيبان في الملخصات دي النضج اللي وصله الإنسان من خلال القراءة ومن اهنه انعمر الامم.. بس اخساره عمري ما هكون وزيره،، اني عاوزة اكون فيلسوفه عشان اشتم الناس ابطريقة يفهمو اني امعمدحهم بيها ده هيبقا انهار حلو قوي والله
سامر _ احم
يارا تتجاهله وتكمل بحث
سامر _ علي فكره انا قريت تلات كتب ل مصطفى محمود عجبوني جداً
يارا _ ايوه
سامر _ متشكر علي ترشيحك ليه اني اقراله
يارا _ ماشي
سامر _ انتي عارفه اني بقيت مستعده مقومش غير لما اخلص الكتاب
يارا _ زين
سامر _ جميله القراءة
يارا بزهق_ ماخلاص يا توفيق الحكيم اني معرفاش اركز في الكتب اقعد عاد
سامر _ هو انتي بتصديني ليه
يارا_ ماهو انت لو عنديك دم مش هتسمحلي اصدك بعد عني
سامر _ علي فكره انتي انسانه مستفزه
يارا_ احسن ما اكون قليلة الحيا والقح نفسي علي الناس
سامر بغيظ_في ايه يابت انتي هتعيشي الدور... يابت دا انتي جايه من تحت البقر
يارا_ جايه من عند البقر عشان الاقيهم اهنه بس اهناك كانو بينعرو انما اهنه ابيتكلمو
سامر بغيظ_ هوريكي البقر دول هيعملو فيكى ايه يا فلاحه
يارا _ لو جبت سيرة الفلاحين تاني معيحصلكش خير ياود الوزير
مشيت وسيبته وانا متغاظه منه
والظاهر ان رمي السماد في الأرض البور عمره ما هيخليها خصبه. هو في ناس اكده كتير تفكيرهم تفكير بهايم
منه
عدو تلات ايام مشوفتش فيهم معاذ وكنت متردده اسأل عليه عشان ميفهمش اني مهتمه لأمره ويدي لنفسه امل. لغيت زميله ليه ندهت عليه انا وماشيه
نوران _ منه
منه _ ازيك يا نوران
نوران _ الحمدلله وانتى
منه _ بخير
نوران _ انا ومجموعه من الشباب رايحين دلوقتي نزور دكتور معاذ تيجي معانا
منه باستغراب _ ليه يعنى
نوران _ انتي مسمعتيش انه في المستشفي بقالو تلات ايام ودراعه متجبس
منه بقلق _ لا محدش قالي ايه اللي حصله
نوران _ بلطجيه ضربوه وكسروله دراعه ياعيني
منه _ بلطجيه يضربو دكتور معاذ اللي مفيش اهدا منه ، طيب ليه
نوران _ معرفش. قولتي ايه هتروحي ولا لأ
منه _ ايوه هروح طبعاً ،
روحنا المستشفى لقينا واحده قاعده معاه وبتقدمله الأكل باهتمام
ولما شافنا اعتدل في قعدته بمساعدتها
ميرنا _ اتفضلو... تمام كده ياحبيبي ولا ارفعلك المخده اكتر
معاذ _ لا حبيبتي كده تمام
بيقولها حبيبتي وتقوله حبيبي ويجي يرسم عليه في الكليه دا كويس اني مدتلهوش وش، كلهم زي بعض . دخلنا وقعدنا وبدأنا نسأل عليه
احدي الطلبة _ حمدالله على السلامة يا دكتور
معاذ بإبتسامة متعبه_ الله يسلمك
نوران _ قلقتنا عليك يا دكتور
معاذ_ نصيب، متشكر على زيارتكم... ازيك يا منه
منه _ حمدالله علي سلامتك
معاذ _ الله يسلمك، انا قولت انك مش هتيجي تسألي عليه
نوران_ مكنتش تعرف
معاذ _ غريبه دي
منه_ غريبه ليه، انا مكنتش اعرف غير من شويه
معاذ _ مش مشكله على العموم متشكر
ميرنا_ الظاهر انك محبوب من الكل في الكليه، دي الاوضه مفضيتش ساعه من الزوار
معاذ _ اتمنا اكون محبوب فعلاً، مضربش وخلاص
منه باستغراب_ من امتي وحضرتك ليك في الخناق
معاذ _ من اسبوع كده بدأت اتخانق وياريت سبب يستاهل
احدي الطلبة_ اللي يخلي الدكتور معاذ يتخانق اكيد سبب مهم
معاذ_ ساعات بنكون غشما ومبنفهمش
حسيت انه قاصد حآجه بكلامه بس مفهمتش هو يقصد ايه،..
مر الوقت وجينا نمشي ف وقفني وهو بيقولي
معاذ_ مبروك الخطوبه يامنه
منه باستغراب_ خطوبة مين
معاذ _ خطوبتك
منه_ خطوبتي انا
معاذ _ انا اسف مكنتش اعرف انك مخبيه
منه _ لا انا مش مخطوبه ولو مخطوبه هخبي ليه.. الف سلامه علي حضرتك
مشيت وانا مش فاهمه جاب الكلام ده منين لغيت ما قابلت مروان في الطريق ولقيته وقف قدامي بالعربية
ونزل وهو متعصب
مروان_ ايه وداكي عنده
منه _ عند مين
مروان بغيظ_ عند بتاع الكلية، في ايه بينكم وصلتي لمرحلة الصور معاه ولا لسه
منه ترفع ايدها وتديلو بالقلم _ وانت فاكر كل الناس و.سخه زيك. لو وقفتني تانى ولا اتعرضتلي بأي شكل هبلغ عنك انت فاهم
مروان بغيظ_ بتضر.بيني علشانه، ماشي يامنه المره دي كان كـ.سر دراع بعد كده هكـ.سر رقبته وهتكوني انتي السبب
منه بصدمه_ يعني انت اللي عملت فيه كده
مروان بحده_ ايوة وقولتله انك خطيبتي ويبطل يكلمك حتي، وانتي روحتيلوه لحد عنده بكل بجاحه
منه بغيظ_ انت فاكر نفسك ايه، فوق ياحبيبي انت لو اخر واحد مش هكون خطيبتك، وضر.بك ليه علشاني مش هعدهولك وهبلغ عنك
مروان بحده _ بلغي علشان اول نسخه من محادثتنا الساخنه توصل لاخوكي، وبعدها صورك الحلوه بالقميص،.. اعقلي احسنلك واسمعي الكلام
منه بصدمه _ هما لسه عندك
مروان _ ايوه تحبي تشوفي
منه _ انت كداب
مروان_ انا كداب، طيب شوفي كده مين الحلوه دي
منه بصدمه _ طيب ليه
مروان_ كنت محتفظه بمحادثاتك علشان بحبك بس شكلك كده هتخليني استخدمهم في حآجه تانيه
منه بدموع _ مش كفاية اللي عملتو فيه زمان، بسببك رقدت سنه
كامله في المستشفي غير الفضيحة اللي عملتهالي وسط صحابك،عاوز مني ايه تانى
مروان _ مش عاوز غير انك تسمعي كلامي وبس
وطول مانتي عاقله انا هنسا الحاجات دي
منه ببكاء_ ربنا ينتقم
منك يا حقير يا زبالة، كان يوم اسود يوم ما
صدقتك، غور من وشي مش طايقه اشوفك
مروان _ ماشي بس هنتقابل تانى