رواية حكايات بنات
الفصل الثامن8
بقلم نجمة براقة
عز
الشركه كلها فيها كاميرات حتى مكتب السكرتيرة، ولما شوفتها داخله الشركة، دخلت علي كاميرة مكتب السكرتيرة وشوفتها داخله تتسحب وحطت ودنها على الباب،
ف مشيت بشويش وفتحت الباب مره واحده، لتقع علي الارض، ورغم انها هي الغلطانة بس مبطلتش مقاوحه وطلعت انا الوحش وبقتل القتيل وامشي في جنازته،..
ورغم طولت لسانها عليه الا انها بضحكني بسبب تصرفتها، وكتير بكون قاعد وتيجي علي بالي وابتسم من غير ما احس، واسامه كل شويه يقولي اللي واخد عقلك يا عزوز، انا مش عارف ايه علاقة الضحك على موقف يضحك بأخد العقل، ملهاش علاقة أبداً بس هما بيحبو يعملو قصه من الهوا،
اسامه _ بقينا نبتسم مع نفسي خير يا عزوز اللي واخد عقلك
عز _ انت هايف اوي علي فكره،
اسامه _ بس قولي مبتسم ليه
عز _ مفيش سبب.
اسامه _ ما انا مش مرتاحلك الأيام دي، من امتي واحنا بنبتسم في السر
عز _ يابني مفيش، كل الحكاية اني افتكرت موقف حصل مع صحابي
اسامه _ صحااابك، طيب ابقا بوسهملي هنا وهنا وهنا
عز _ احترم نفسك
اسامه بضحك _ ايه ياحبيبي مش بتقول صحابك، يعني رجاله ف عادي
عز بزهق _ انا ماشي
اسامه _ رايح تبيع لبن ولا أيه
عز _ ايوه اجبلك كيلو
اسامه _ لا بجد رايح فين بدري كده
عز _ ورايا مشوار تبع الشغل
اسامه _ ماشي بسلامه
عز _ طيب خلص فطار واغسل الاطباق اوكي
اسامه _ اوكي
ومتنساش تتاكد من الحنفية كويس قبل ما تخرج
اسامه _ مش خارج النهارده
عز _ مش رايحه الجامعه؟
اسامه _ لأ،
عز _ دا انا قولت حبها وهينتظم
اسامه _ هروح بعد يومين بس دلوقتي عاوز اناااام
عز _ طيب وايه مصحيك بدري
اسامه _ جاني قلق عادي
عز _ انت بتقلق زينا عادي كده
اسامه _ ههههه لأ
عز _ طيب لينا قعده بالليل ونشوف موضوع القلق ده
اسامه _ وبالمره نشوف موضوع صحابك، ونبي وصلهم البوسه ضروري
عز بغيظ _ انت عيل بارد
اسامه بضحك _ انت هتتعصب عليه ،، يلا روح الحق مشوارك
سبته ودخلت جوه خدت الموبايل اللي جبته بالليل، وروحت على مدرسه عدي، وأول ما وصلت لقيته مستني في نفس المكان
عدي بإبتسامة _ كنت عارف انك هتيجي
عز بإبتسامة _ ما انا وعدتك ولازم اوفي.. ايه الاخبار
عدي _ زي الفل، لو شوفت زمايلي بيحترموني ازاي من امبارح ولا الواد منير وهو بيحاول يصاحبني
عز بإبتسامة _ عظييم... اتفضل
عدي _ ايه ده
عز _ افتحها وشوف
عدي يفتح الهدية يلاقي تليفون حديث
عدي بذهول _ لمين ده
عز _ ليك انت وفيه خط كمان
عدي بإبتسامة _ هو حلو اوي بس متشكر مش هقدر اخده
عز _ ليه بقا
عدي _ انا اسف مش هينفع
عز _ هزعل منك لو مخدتهوش
عدي _ أمنية هتزعل مني لو خدته
عز _ قولها لقيته
عدي _ متعودتش اكدب عليها
عز _ خده انت بس وقالها صديق جابهولك هديه
عدي _ هي عارفه كل صحابي مقشفين
عز _ قولها اي حآجه ياعدي
عدي _ هتخليني ارجعه وانا مش حابب ازعل حضرتك،
عز _ قولنا خالو، واتفضل خد تليفونك ويلا على الفصل
عدي بإبتسامة _ ماشي بس لو امنيه زعلت هرجعهولك
عز _ اوكي بس اوعدني انك لو قدرت متقولهاش انه مني، متقولش
عدي _ حاضر، مش هقولها
عيله كلها نفسها عزيزه، بس انا حبيته زيه زي اسامه وحبيت افرحه، لكن لو امنيه عرفت هتقولي بغري اخوها عشان اوصلها... متخلفه اوي
في الشركه
عز _ صباح الخير،
امنيه _ صباح النور
عز _ في مواعيد ايه النهارده
امنيه _ مجهزالك لسته بكل المواعيد
عز _ تمام هاتيها
امنيه _ اتفضل
عز ياخد منها الورقه ويبصلها
عز _ اول معاد الساعه 12 كويس، طيب لو عليكي محاضرات دلوقتي روحي وتعالي قبل 12
امنيه بحده _ متشغلش بالك بيه
عز بتنهيده _ براحتك، بس ممكن اعرف هتفضلي كده لأمتي
أمنية_ لغيت ما ترفدني
عز _ ولما ارفدك هتشتغلي ايه
أمنية_ دي حآجه بتاعتي انا ملكش فيها
عز _ طيب انا مستعد ارفدك في حالتين بس
أمنية_ هما أيه
عز _ تلاقي شغل كويس بمرتب زي هنا او تتخطبي لواحد كويس يساعدك
أمنية _ وانت يخصك في ايه اتخطب او لأ انت فاكر نفسك ولي امري ،، بجدمصدق نفسك انك كبير عليه ولا دي حركه من بتوعك علشان توصل للي عاوزة
عز بزهق _ يادي النيله، لحظة واحده........ بصي كده، دي صورة مراتي الله يرحمها، عمري ما بصيت لواحده غيرها حتى بعد موتها من تسع سنين، واكيد مش هاجي دلوقتي ابص لعيله في سنك
امنيه _ الله يرحمها.. طيب وافسر اللي انت بتعمله معايا بأيه
عز _ اثرتي اعجابي ياستي،وجديده عليه
امنيه _ اثرت أيه
عز _ مش زي ما فهمتي،قصدي اعجبت بكفاحك وجهدك
أمنية _ يمكن
عز _ اكيد
أمنية _ ماشي متشكره
عز _ افهم من كده انك هتبطلي تفهميني غلط
أمنية_ والله دي حآجه بأيدك انت
عز _ ماشي ياستي، ربنا يستر، بس انتي كمان اهدي عليه انا مش قدك وكمان كبير عنك، احترميني بقا
امنيه بتردد _ ع فكره انت مش كبير معرفش سنك كام بس شكلك صغير علي قولت انك كبير كل شويه
عز _ عندي 38 سنه،، قربت اقفل الاربعين،
امنيه _ اه، لا عادي مش كبير بردو
عز بإبتسامة _ متشكر ياستي، يلا اسيبك ولو وراكي محضرات وعاوزه تروحي بلغيني وروحي
أمنية بإبتسامه_ ماشي، متشكره
في دقيقة واحدة بس قالت كلمه عدله في حقي وابتسمت، كانت اول مره اشوفها مبتسمه،.. دلوقتي بس عرفت هي ليه مش بتبتسم، . لأن ابتسامتها، ساحره فعلاً وزادتها جمال، واتمنا تكون اخر مره الواحد مش ناقص
أمنيه
كلامه عن مراته مأقنعنيش قد احتفاظه بصورتها داخل محفظته، يمكن ضايقني في الاول بس اهتمامه وانه يجيبني اشتغل بالمرتب ده من غير ما يعرفني واهتمامه اني احضر محضراتي، هو اللي قلقني منه، هيكون بيعمل معايا كده ليه غير لو كان عاوز مقابل .. مفتكرش ان دي طيبه منه،، لكن قولت لنفسي مقبلش حآجه بدون مقابل و اعامله كويس لغيت ما نشوف اخر ما عنده، واتمنا يطلع طيب فعلا مش تمثيل، انا في امس الحاجه ان الاقي حد حنين عليه بدون مايكون عاوز مقابل،
شيري
الليلة اللي فاتت منمتش دقيقة واحدة وانا مشغوله ب اسامه، وبحنيته رغم حزنه اللي دايما شايله في قلبه،، وانا وبحاول اساعده لقيته نفسي معاه، كلامه فيه احتواء وحنيه، وكأنه بيمسح الحزن من قلبي ...
روحت النهاردة الجامعه وبقيت ادور عليه هنا وهناك وملقتهوش، عدت ساعه اتنين تلاته لغيت خمس ساعات وانا مستنياه وبردو مجاش،
يارا _ هتقعدي اكده لميته عاد
شيري بقلق_ تفتكري هو كويس
يارا _ في ايه يابتي ايه حكايتك مع الواد ده، ايه كمية القلق دي
شيري _ يارا ارجوكي ابقي قولي اللي عاوزاه لما اطمن عليه
يارا _ حرام عليكي نفسك بتعملي اكده ليه وعشان مين
شيري بدموع _ وانا عملت ايه يعني، زميلي غايب وقلقانه عليه فيها ايه دي
يارا_ زميل.. طيب يابوي ماكانش حد غولب
شيري بزهق_ اه زميل يا يارا، بس شبهي احنا الاتنين بنمر بنفس التجربه
يارا _ صدقيني، ما هتحسي بالي بتعمليه ده غير لما يرجعك مكسوره وساعتها مفيش قوه هتقدر تجبرك، انا قولتلك نصيحتي من الاول لأني خايفه عليكي،، بس انتي مصدقاه بشكل عمياني
شيري بدموع_ يكسرني ازاي وهو ولا مره حاول يوصلي موضوع الحب و الارتباط،.. انتي فهماه غلط صديقني، اسامه مفيش اطيب منه واللي بيقربله بيفهمو ده
يارا _ ماشي ياشيري، الله يسترها عليكي يابت الناس وانتي حره عاد، انا مروحه
شيري ببكاء_ انتي بتعملي معايا كده ليه، من غير سبب، افترضتي انه بيخدعني وكمان بتزعلي مني
يارا_ مين اللي قال اني زعلانه منك، أبداً ياحبيبتي انتي اختي الصغيرة وربنا يعلم حبيتك كد ايه وخايفه عليكي، بس لما ملاقيش استجابه وتفهم لكلامي يبقا ليكى الحريه وانا مش هضايقك تانى
شيري بدموع _ يارا حبيبتي انا فهماكي بس صدقيني اسامه مش زي مانتو شيفينوه
يارا _ ماشي حبيبتي انتي ادرا بيه مني، وربنا يسعدك ويبعد عنك كل شر
يارا
شيري، فاكره نفسها بتساعد اسامه متعرفش انها اتورطت امعاه، وانه هو اللي فهمها اكده، وبعد ما يكسرها عمرها ما هترجع زي الاول، لانه قدر يوصلها بطريقة ذكيه ومتأكده ان في النهاية هيأذيها، وهي زي المسحوره مش قادره تقتنع انه صايع وبيلعب عليها،،، منساش شكله هو وبيضرب كفه بكف سامر وقت الصور اللي اتوزعت، مستحيل واحد زي ده يكون مرهف الاحساس زي ماهو مفهمها، لكن انا اللي قاهرني منه انها يتيمه زيها زيه كيه معطفش علي حالها وقال دي بت محتاجة حد يحتويها واللى بيعملو ده جريمه في حقها
قبل ما اتكلم معاها كنت في المكتبه وشوفت سامر بيقرا وشكله حب القراءة قوي، برغم اني مش طيقاه بسبب اللي عمله الا اني اقدر افهم كويس ان اهتماماته اتغيرت للأحسن، ودي حآجه كويسه بردك،،، لكن ده منسنيش التحدي بيني وبين نفسي اني هعرفه في النهايه مين يارا بت البواب،
سامر
بقيت قاعد في المكتبة اكتر ما بقعد في البيت، السبب الاول اهتمامي بالقراءة وتاني سبب تركيزي مع يارا، اللي مصدرالي الوش الخشب من وقت ما عرفتها، بس انا اتعودت يعني مبقتش واخد الموضوع تحدي زي الأول، لكن همووت ونكون صحاب، محتاج واحده زيها في حياتي،
بعد وقت شوفتها ماشيه ف استعرت كتاب، ومشيت وراها ولقيتها بتكلم شيري، وسمعت حديثهم لاني كنت قريب ومخدوش بالهم مني،، بجد صعبت عليه وفي نفس الوقت عجبني كلام يارا ليها، ودا اللي خلاني اروح وراها واكلمها
سامر _ يارا
يارا _ نعم
سامر بتردد _ انا جاى اعتذرلك
يارا _ تعتذر عن ايه
سامر _ افتكر انك عارفه
يارا _ لا مش واخده بالي الحقيقه، وضح
سامر _ انا مش ضامن انك مش بتسجلي دلوقتي، بس ما علينا، انا بعتذر عن حركة الصور اللي انا عملتها
يارا _ ايه ده هو انت اللي عملتها حقيقي مجيتش علي بالى
سامر _ لا عارفه وبتستعبطي، بس انا مستغربك ليه محاولتيش تشتكي
يارا _ وانا هستفاد بأيه غير الفضيحة، وزي ما قولت انا بت بواب وانت ما شاءلله باين عليك ود وزير وانا اللي هخسر في الأخر
سامر _ لو عاوزاني اروح اقول للعميد اني انا اللي عملتها ف انا مستعد
يارا _ وايه يجبرك علي اكده
سامر _ احساسي بذنب
يارا _ طيب فى عقاب تانى ممكن تنفذه، دا لو ضميرك مأنبك صح
سامر _ هو ايه
يارا _ انت من الواضح انك مبتحبش الدراسة بدليل عجزت وانت ولسه في السنه التالته، ف العقاب اللي اختارهولك، هو انك تعدي السنه دي بتقدير جيد جداً، وصدقني دي اصعب من الحبس بنسبالك
سامر بإبتسامة _ عندك حق، بس اوكي مستعد انفذ العقاب
يارا _ وفيه عقاب تاني
سامر _ اللى هو ايه
يارا _ متبقاش توقفني نهائي وتكلم معايا اكده
سامر بإبتسامة _ حاضر
قالتلي كده ومشيت، واختارتلي عقاب انا فعلاً شايفة عقاب، مبفهمش اي حآجه من كلام الدكاترة، ولا في بينا استلطاف، لكن مش مشكلة هنفذ العقاب وهنجح فيه، اهم حآجه ننول الرضا من بنت البواب
مشيت من الجامعه وفي الطريق كلمت اسامة وطلبت اننا نتقابل ف قالي اروحلو البيت، وروحتلو
اسامه _ كويس انك جيت، انا عاوز نسكافيه ومكسل تعاله شجعني
سامر _ يلا ياسيدي
**
اسامه _ هات المجات وشطفهم اعملك حركه كده
سامر _ ماشي ياعم،، مجتش ليه الكليه النهارده
اسامه_ مليش نفس اروح وهو بالمره نسوي الرز علي نار هاديه
سامر _ الرز اللي هو شيري طبعآ
اسامة _ ايووه برافو عليك
سامر _ البنت استوت لما قالت بس، لسة شايفها بتعيط ل يارا علشان قلقانه عليك
اسامه _ يادي النيله البت دي انا اتخدعت فيها لو اعرف انها كده مكنتش اتراهنت عليها من الأول
سامر _ طيب ما كفاية كده اظن ان كده وصلت للي انت عاوزة
اسامه _ احنا قولنا كسر قلب، وهي لسه قلبها سليم
سامر _ لازمته ايه، ياسيدي انا اعتبرتك كسبت وهديك الرهان، وانت كفايه كده
اسامه _ لأ مش قبل ما اخلص للأخر
سامر _ انا عارفك ياصاحبي عنيد بس مكنتش اعرف انك قاسي كده
اسامه _ مين قال اني قاسي، بالعكس انا زعلان من نفسي جداً، وخصوصآ انها طلعت ضعيفه ومعملتش مجهود كبير، دا غير اهتمامها انها تخرجني من حزني، لكن انا مكمل لسببين
سامر _ هما ايه
اسامه _ اول سبب اني متعودتش انسحب وتاني سبب انها لازم تتقرص علشان تنشف بعد كده ومتصدقش بسرعه
سامر _ انا عيني دمعت ياض انت عظيم، عاوز تكسرها علشان مصلحتها وانا اللي كنت فاكرك واطي
اسامه _ شوفت بقا، ودي مشكلتي ههههه... ناولني السكر
سامر _ خد..... بس بجد يا اسامة حاول تكون هين معاها، بيتهيالي انها ممكن تعمل في نفسها حآجه لو اذيتها
اسامه _ انت عارف اني بعاملها على اساس صحاب ولغيت ما اخلص مش هقولها بحبك والكلام بتاع كل مره
سامر _ لا ياشيخ يعني هي عامله كده في نفسها علشان صحاب بس امال لو حب كانت عملت ايه
اسامه _ هي حبتني اصلا
سامر _ طيب وناوي على ايه بعد كده
اسامه _ بعد ما تكون اتعلقت بزياده هقولها عاوز اخطب يارا وهتكون هي الوسيط... بووووم
سامر _ تخطب مين ياخويا،، لأ عندك و وقف دي تبعي انا
اسامة _ انت غبي ياض دي كلمه هقولها وخلاص وبعدين يارا مبتقبلنيش ومستحيل توافق
سامر _ بردو مدخلهاش في الموضوع دور علي غيرها
اسامه _ ماشي يامعلم نشوف حد تاني قريب منها... بس ايه الحكاية هو السحر انقلب علي الساحر ولا أيه
سامر _ ايوة يااض،، بص مبنسهاش حرفيآ
اسامه _ ياخيبتك ملقتش غير بنت البواب اللي توقعك، طيب دي لو نوااال هانم سمعت بس هتطردك من البيت ولا وكيل الوزارة هيحبسك
سامر _ المشكله الاكبر من دول ان بنت البواب دي مستحيل تبصلي تصدقها دي
اسامه _ ومتبصلكش ليه بقا، ولا انت قليل... حلو وغني ناقصك ايه
سامر _ اللي زي يارا دي مبدورش على الحلاوه والفلوس مشوفتهاش مجتهده ازاي ومفتخره ب أنها بنت بواب، طيب والله انا بكل الفلوس اللي عندي ما حسيت برضا عن نفسي زيها
اسامة _ هات الكاتيل اللي هيستنجد بينا عشان نوقفه ده، وتعاله نقعد عند التلفزيون نسمع فيلم اكشن بدال كلامك اللي ينقط ده... ما ليها حق تشوف نفسها عليك طالما انت هزء كده
سامر _ امال لو عرفت المصيبه الكبيره
اسامة _ ايه
سامر _ روحت النهاردة واعتذرتلها عن اللي عملته
اسامه بصدمه _ بلغت العميد؟
سامر _ تصور لأ.. دي كانت هاديه جداً وكأني دوست علي جزمتها مش فضحتها، وخد الكبيره بقا
اسامه _ ايه
سامر _ اختارتلي عقاب، وهو اني انجح واجيب جيد جداً... مش جيد بس لأ ده جيد وجدآ كمان
اسامة _ وانت قولتلها ايه
سامر بضحك _ وافقت وناوي انفذ
اسامه_ هههااااااي متخيل منظرك ياض وانت جايب جيد جداً بعد كفاح عشرين سنة، هتبقا مسخره وسط الشله
سامر بضحك_ احنا بطبعنا بنحب التحدي والرهان ما تيجي نتراهن على اني اجيب جيد جداً واهو تكون حآجه مفيده بدال العب على البنات
اسامه _ اوووكي 5000 جنيه وعزومه على حساب الخسرانه ،، انا محتاج المبلغ والعزومه دول جداً
سامر بضحك _ دا انت حكمت اني هخسر كمان
اسامه_ عندك شك في كده
سامر _ لأ بس خلينا نجرب ونشوف