رواية غرام الاسد كامله جميع الفصول بقلم شروق محمد

 رواية حكايات بنات 

 الفصل التاسع عشر19

بقلم نجمة براقة

تانى يوم 

أسامة 

صحيت بدري ولحقت خالي قبل ما ينزل،

أسامة _ صباح الخير ياعزوز 

عز _ صباح النور 

أسامة _ هنروح نحول الفلوس النهارده؟

عز _ ايوه 

أسامة _ طيب ايه رايك بعدها تروح معايا عندهم بدل ما اروح لوحدي 

عز _ انا مسافر انهارده ومش هقدر احضر الخطوبه حتي

أسامة _ لا والله كده ازعل،  تتأجل السفريه متهزرش ياعم

عز _ لازم اسافر 

أسامه _ لا ياخالي مش هتسافر

عز _ يا اسامه  بطل شغل  عيال انت  كبرت وتقدر تخطب لوحدك 

أسامة _ بص مليش دعوه انت لو مجتش معايا انا مش رايح 

عز بخنقه _ اسامه انا مش ناقص،  قولت مسافر يعني مسافر 

أسامة _ براحتك بس انا كمان مش هروح الخطوبة 

عز بخنقه _ ياخي بقا 

أسامة _ قولت اللي عندي وانت حر

عز بخنقه _ ماشي بس هما خمس دقايق وهمشي

أسامة _ اي حاجه المهم يشوفوك

عز بخيبه_ اه لازم  يشوفوني طبعا... حاضر يا أسامه 

أسامة _ حبيبي والله..  يلا بينا 

روحنا حولنا الفلوس وكنت لسه هتصل ب عدي وخالي قالي ماشي

عز _ انا  ماشي 

أسامة _ رايح فين استنا انا هخليهم يجو ونروح نختار الفستان والخاتم مع  بعض 

عز بعصبيه _ لأ اختارو وحدكم،  اناااا  ورايا شغل 

أسامة باستغراب _ خلاص  متتعصبش روح 

بعد ما مشي اتصلت ب عدي عشان اضايق شيري شويه 

أسامه _ ازيك يا حبيبي 

عدي _ بخير يا اوس اوس،  فينك النهارده 

أسامه _ هعدي عليكم دلوقتي علشان نروح  نجيب الفستان والخاتم،  فين  شيري،  اقصد  امنية 

عدي _ امنيه نايمه وشيري اهي جمبي...  لا لا مش  جمبي 

أسامه  بإبتسامة _ ادهاني

عدي _ بتقول  انها نايمه 

أسامه _ ههههه  قولها كلمي لا يجيبك من شعرك 

عدي _ خدي لا يجيبك من شعرك  قال

 شيري تاخد التليفون بزهق _ ايوه 

أسامه بإبتسامة _ ازيك يا صديقتي الجميلة 

شيري _ تمام،  خير يا اسامة 

أسامه _ ونبي تقولي للغاليه انها تجهز نفسها  عشان  نروح  نجيب  الفستان والخاتم علي  ذوقها 

شيري _ نايمه دلوقتي 

أسامة _ صحيها

شيري _  تعبانه  ومش هتقدر تقوم دلوقتي

أسامة بإبتسامة _ سلامتها ان شاءلله انا وهي لا 

شيري _ ان شاءلله..  اقصد  بعد الشر 

أسامة بإبتسامة _ طيب انا جاي اطمن عليها

شيري

أمنية رجعت امبارح وهي زعلانه ومش بتكلم حد كل اللي قالته داخله انام محدش يصحيني ولما كلمناها الصبح قالت انها تعبانه ومحتاجه تنام،  والنهارده أسامه كلِمنا وقال انه جاى،  وبعد ساعه جه  

عدي بإبتسامة _ اتفضل 

أسامة ينظر لشيري _ متشكر،.  ازيك ياشيري 

شيري _ الحمدلله 

أسامة _ قلقتوني اوي علي أمنية،  هي فين 

عدي _ نايمه وقالت محدش يصحيني 

أسامة _ ازاي طيب والفستان مين هيجيبوه معايا 

عدي _ انا 

أسامة _ مش هنعرف لا انا ولا انت...  اية رأيك تروحي معانا يا شيري 

شيري _ انا قاعده مع أمنية 

أسامة _ طيب عدي يقعد معاها وانتي تروحي معايا لأننا مش هنعرف نختار لوحدنا 

شيري _ لا 

عدي _ ما تروحي 

شيري بحده _ قولت لأ اسكت انت 

أسامة _ ما تروح تتحايل على امنية خليها تيجى هي اكيد ذوقها احلى منها 

عدي _ ماشي  هشوف  

بيمشي عدي وهو بيبتدي يرخم 

أسامة _ انا مش مصدق ان بكره خطوبتنا انا و روح قلبي 

شيري _ الف مبروك 

أسامة _ الله يبارك فيكي،  عقبالك 

شيري بإبتسامة _ قريب 

أسامة _ قريب ازاي 

شيري _ هتعرف في  وقتها 

أسامة _ لا افهم دلوقتي 

شيري بإبتسامة _ واحد متقدملي واحتمال اوافق،  

أسامة _ اه....  طب  كويس  ،،  شكله ايه العريس ده 

شيري _ اهو عريس زي اي عريس 

أسامة _ وعاجبك 

شيري _ ايوه هو كويس وابن حلال 

أسامة _ وطلبك من أمنية ولا كلمك من بره بره 

شيري _ كلم امنيه 

أسامة _ انا مش موافق 

شيري _ مش مهم 

أسامة _ إيه هو اللي مش مهم 

شيري _ موافقتك مش مهمه 

أسامة _ انا بقيت خطيب اختك وفي مكانه اخوكي وقولت مش موافق،..  انتي  لسه  صغيره 

شيري  _ قول اللي انت عايزة انت بره الموضوع اصلا 

أسامة بحده _ طالما بقيت واحد من عيلتكم يبقا ليه 

شيري بإبتسامة _ ارتاح هروح اعمل ليمون 

أسامة بحده _ بلاش استفزاز يا شيري،  مش هتجوزي غير  لما  تخلصي تعليم 

شيري _ وانت مالك،  متنساش نفسك 

أسامة بحده _ انسي مش هتجوزي  

شيري _ اما نشوف،  يلا اترزع هعملك ليمون 

أسامة _ مش عاوز منك  حاجه 

شيري بقرف _ تريح.... عددددي كل ده بتصحيها 

عدي _ اهي جايه استني

أسامة بتردد _ انا حلمت بيكي 

شيري باستغراب  _ بيه انا 

أسامة _ ايوه 

شيري _ كان ايه الحلم

أسامه _ مش فاكره كويس 

شيري  _ وبتقولي ليه 

أسامة _ علشان كنتي في الحلم 

شيري _  أسامة،  انا فهماك كويس بلاش لعب

أسامة _ حاضر 

شيري بغيظ _ انت انسان حقير علي فكره 

أسامة _ وانتي كدابه 

عدي _ انتو بتتخانقو ولا إيه 

شيري بارتباك _ ايوه 

عدي _ مالكم 

أسامه _ مش  راضيه تعمل لمون 

شيري بغيظ _ انا مش قولتلك تشرب قولت لا 

أسامة _ انا قولت لأ،  ربنا يسامحك 

شيري بقرف_ تشرب لمون ياعدي 

عدي _ اشرب 

أسامه_ حطي عليه نعناع 

كان قاصد يشغل تفكيري بكلمته،.. بجد انسان حقير اوي وندل 

أسامه

 قولتلها علي الحلم بعد تردد كتير، ومعرفش قولتلها ليه، بس كنت عاوزها تعرف اني بقيت احلم بيها... ودي الحقيقه انا بقيت احلم بيها وافكر فيها، وبتوحشني، لما تغيب،..

 انا فاهم ايه الاحساس ده كويس لكن خايف اصارح نفسي بيه، انا طول عمري متأكد اني شاطر مش هقع زي الباقين وان المواضيع دي تفاهه مش أسامة اللي يوقع فيها، لغيت ما عرفت ان ما يوقع الا الشاطر... ورغم كده انا خايف من الارتباط بواحده، انا لسه معنديش ثقه فيهم ومش هطمن من نحيتهم

أمنية 

رجعت من برا ودخلت الاوضه ونمت كأني منمتش من سنين،  ودلوقتي حاسه ان خاليه من اي احاسيس،  مفيش زعل ولا فرح ولا رغبه لأي حاجه،  ولا ثقه لاي حد،  انا بقيت انسانه فاضيه وجسد بلا روح 

**

أسامة كان جاي ياخدنا نشتري الفستان والخاتم،  وروحنا كلنا اشترينا الخاتم وبعدين  روحنا محل الملابس وبقو يختارو ويسألوني رأيي، وانا قولت لشيري تقيس بدالي لاننا نفس المقاس مع فرق بسيط في الطول... وبعد  شويه شوفت عدي بيبعد عننا بحذر وشككني فيه ف روحت وراه.. كنت عايزة اشوف بيتسحب ليه،  

ف لقيته واقف ورا شوية هدوم وبيتكلم مع واحد ويقوله يا خالو،  قربت منه  وشديت منه  التليفون  فجأه وحطيته علي  ودني من غير  ما اتكلم 

عز _ لو احتجتو اي حاجه كلمني متتكسفش

أمنية بغضب _ مين ده 

عدي بارتباك _ دا صاحب التليفون 

أمنية  بحده _ مين ده  يا عدي 

عز _ عز الدين.. مبروك يا عروسه 

أمنية بغيظ _ انت اللي جبتله التليفون 

عز _ لأ 

أمنية بانفعال _ مين جابلك التليفون  ده رد عليه 

عدي _ هو 

أمنية  ترمي التليفون علي الارض  تكسره 

عدي بدموع _ ليه كسرتيه 

امنيه تضربه بالقلم _ كدبت عليه ليه 

عدي يحط ايده علي خده ويبكي _ علشان مكنتيش هتوافقي ولا كنت هقدر اجيب تليفون زيه في  حياتي 

امنيه بعصبيه _ ومقولتليش ليه كنت اتصرفت وجبتلك واحد بدال ما تشحت من واحد زي ده 

عدي ببكاء _ انا مشحتش،  خالي هو اللى جابهولي هديه  

أمنية  بانفعال _ خالك.. وخالك منين ان شاءلله 

عدي بانفعال _ هو قالي اقوله كده ومش عاوز اتكلم  معاكي تاني انا  ماشي 

أمنية _ عدي تعاله  هنا  ...  عدي  انت ياولد انا بكلمك

أسامة وشيري يجو علي  صوتهم 

شيري _ في ايه 

أمنية ببكاء _ اجري الحقي اخوكي 

أسامة _ هو  راح  فين 

أمنية _ طلع على الشارع 

أسامة  _ طيب  متقلقيش  انا  هجيبه 

أسامة 

سمعنا صوتهم ف روحنا عندهم لقينا أمنية بتبكي وعدي مشي،  وانا طلعت  ورا لقيته ماشي بسرعه وبيبكي،، روحت عنده و وقفته

أسامة _ رايح  فين 

عدي ببكاء _ سيبني يا اسامة 

أسامة _ طيب تعاله بس واهدي 

عدي بانفعال _  انا  مش  صغير  علشان  تضربني وتكسرلي تليفوني كده 

أسامة _ انا  اجبلك غيره ولا تزعل،   وروق دمك 

عدي بانفعال _   انا  مش  على  التلفون،  انا  على معاملتها معايا  كأني  عيل

أسامه  _ لا طبعا  مش  عيل انت  راجل  البيت دلوقتي،  بس  هي  خايفه  عليك 

عدي _ خايفه  عليه من ايه،  كل  ده  علشان  بكلم واحد هي مش حباه،  انا  مالي  ما عنها ما حبته 

أسامة _ واحد مين ده 

عدي _ مفيش  حد،  انا  ماشي 

أسامه _ استنا بس،  يلا ارجع  معايا هي  قلقانه عليك 

عدي _ مش راجع يا أسامة،  روح انت وانا مروح 

أسامه _ ياحبيبي مينفعش استنا هوصلكم مع بعض 

بقيت اتحايل عليه ومقدرتش ارجعه معايا،  ف رجعتلهم تاني لقيت شيري حضناها وبتبكي..  عيله كلها دموعها قريبه 

أسامة_ مرضيش يرجع معايا

أمنية _ أنا مروحه

شيري _ مش قبل ما تختاري فستانك 

أمنية _ اختاري انتي،  انا هروح اشوف عدي 

شيري _ طيب انا جايه معاكي 

أمنية _ انا عاوزة اتمشا لوحدي،  سيبني علشان خاطري 

 

مشيت امنيه وسابتها معايا،  وهي راحت علي جمب وبقت تبكي زي العيل اللي  امه سابته،  

اسامه _ شيري بلاش تبكي زي العيال الصغيره 

شيري ببكاء _ ما انت  معندكش احساس هتفهم ازاي

 أسامه _ مين قالك،  طيب  ده  انا  قلبي بيتقطع لما اشوفك  بتبكي 

شيري تذقه بغيظ _ ياخي  دا انت بارد،  خلصنا خلينا  نغور 

أسامة بإبتسامة _ ماشي  هعدهالك،  اتفضلي  قدامي 

روحنا نختار فساتين وكل ما يعجبني فستان  اخليها تقيسه معظمهم طلعت قمر فيهم، كانها هي العروسه

شيري تطلع من البروفه وهي ترتدي فستان ازرق بحمالات رفيعه، بجسد رشيق وبشره ناعمه وبيضاء، وشعر ناعم يصل منتصف ظهرها بلون الاسود وعيون رماديه  

شيري بانفعال _ دا اخر فستان هقيسه انا تعبت

اسامه باعجاب _ تمام ده حلو عليكي، اكيد هينفع معاها، انتو تقريبا نفس الطول بس هي اطول سنه

شيري _ ودا طويل عليه اكيد هينفع

أسامة بإبتسامة _ أنا بقول نشوف فستان غيره وانتى متقيسهوش

شيري بقرف _ اشمعنا 

أسامة بتامل _ مفتكرش ان بعد ما لبستيهم هيطلعو احلي من كده علي حد تاني

شيري بارتباك _ طيب خلص وبطل رغي 

أسامة _ شيري مش فاضل غير النهارده، وبكره الخطوبه هتكون رسمي فكري تاني

شيري _  وافرض قولتلك اللي عاوزه.. هتسيبها بعد ما جبنا الخاتم 

أسامة _ انا مش عاوزك تزعلي لما تشوفينا مع بعض

شيري _ لا مش هزعل، وانت لو بتحبها صح مش هتسمح لحد يقولك سيبها....بس  انت اناني ومستهتر 

أسامة _  وانتي كدابه وبتحبيني وبتداري

شيري _ انا نفسي افهم هتعمل اية لو قولتلك بحبك دلوقتي 

أسامة _ هسيب أمنية

شيري_ بس كده

أسامة _ بس كده

شيري _ يعني مش هتجوزني انا

أسامة_ لأ 

شيري _ امال عاوزني اقولهالك ليه

أسامة_ علشان مجرحكش 

شيري بضحك _ بتبهرني بنبل اخلاقك 

اسامه ينظر لها باعجاب _ ميرسي 

شيري _ طيب  بطل رغي وخلينا نمشي، دقيقة اغير وجايه ،وهناخد الفستان ده اوكى 

اسامه _ لأ، انا عاوز الفستان ده وهنشوف غيره ليها

شيري_ هتعمل بيه ايه

اسامه_ هلبسه 

شيري_ كان ناقصك فستان فعلاً

أسامة بغيظ _ طيب اخلصي 

شيري _ بكلمك جد والله انت ناقصك فستان وطرحه هيليقو عليك اكتر

أسامه بانفعال _ شيري خلصنا 

شيري _ متزعلش اوي كده غيرك بيخدوها من قصيرها ويعملو تحويل 

اسامه يمسكها بغضب _ تحبي اوريكي اذا راجل ولا لأ 

شيري بغيظ _ طيب سيب 

اسامه بحده _ ماشي بس خليكي فاكره كلامك ده كويس، عشان بكره لما تبكي مش هعبرك

شيري بدموع _ مش هبكي، و اوعدك اني هزغرتلكم وهرقص كمان..، وبتزقه بعيد عنها

راحت غيرت وجابت الفستان وانا شديته منها بغيظ، ورجعت خدت فستان تاني غيره، واشتريتهم هما الاتنين،، الأزرق هحتفظ بيه والتاني ل أمنية

تاني يوم 

يارا 

كنت في الجامعة ولقيت شيري بتدور عليه 

شيري _ قلبت عليكي الجامعه كلها يابنتي 

يارا _ ليه اكده 

شيري _ جاية  اعزمك علي خطوبه امنيه

يارا _ على  اسامه بردو

شيري _ اه 

يارا _ يابتي ايه العب ده كيه توافقو عليه 

شيري _ اللي  حصل،  المهم انك لازم  تيجى 

يارا _ انا معرفش بيتكم هاجي  كيه

شيري _ طيب تعالي معايا دلوقتي 

يارا _ لسه ورايا  محاضره وبعدين  هرجع السكن  اغير 

شيري _ لا انتي  سيبك  من المحاضره وروحي  غيري 

يارا _ ماشي 

شيري  _ انا  هروح  اشوف  منه وكام بنت زمايلي وهرجعلك هنا تاني 

يارا _ ماشي  حبيبتي 

سبتها وانا  وماشيه قابلت سامر 

سامر _ ممكن نتكلم  شويه

يارا _ مش  ممكن 

سامر _ يارا اسمعيني مينفعش تحكمي عليه قبل ما تفهمي اني  اتغيرت 

يارا _ قولتلك  ميفرقش معاي تغيرك ده،  ومتبقاش تكلمني تاني لحسن  والله  ابلغ عنك

سامر _ براحتك بس انا مش هيأس وهفضل وراكي لغيت ما تطمنيلي

يارا _ سمعت قصيدة الاستاذ احمد شوقي بتاعت الثعلب 

سامر _ لأ بس سمعت فيلم الثعلب والأرنبه بتاع الكرتون

سامر 

مبقتش  راضيه تسمعني وكرهاني،  ومش عارف  ممكن  اتعامل معاها  ازاي وهي  بتصدني كل  ما اكلمها

مشيت من الجامعة  ورحت ل اسامة  في  بيتهم لقيته  بيشد مع عز 

أسامة _ تعاله شوف  ياعم  سامر خالي مش  عاوز يجي  معايا  الخطوبه 

سامر _ ليه ياعز ينفع  متروحش

عز _ انا مليش في المناسبات دي،  روحو انتو

اسامه _ طيب والله لو ما روحت  ما انا  رايح  وخلي البنت تتكسف وسط معازيمها

سامر _  خلاص  ياعز وافق بقا 

عز _ لأ 

أسامة _ لأ لأ انا  كمان  مش  رايح 

عز بعصبيه _ امال خطبتها ليه  من الاول  لما  مش  هتروح،  اتفضل  روح  يلا وبلاش لعب عيال 

أسامة _ انا  مش  رايح  من غيرك  يا عزوز

عز بخنقه _ يوووه انت حر متروحش

سامر _ ليه مش عاوز تروح  هو  ينفع  تسيبه في  يوم  زي ده بردو

اسامه _ سيبه يا سامر،  لو مرحش انا  مش  رايح هو حر بعد كده 

عز بخنقه _ ماشي يا اسامه  هروح بس هسلم وامشي..  عن اذنكم

سامر _ انت زعلته في  حاجه

اسامه _ لا هو  كده  من وقت  ما موزته سافرت

سامر _ عز ليه  موزه،  طيب  ازاي  ده 

أسامة _ ليه وطلع عاشق ولهان ده  عملها تمثال ومحرج عليه اشوفه 

سامر _ طيب  قول  والله 

أسامة _ والله  ..  اسكت  انا  بفكر اروح اجبهالو من  كتر  ما انا  شايفه  زعلان 

سامر _ وانت عارفها هي  مين

اسامه _ لأ  هو بيقول  كانت  سكرتيره  عنده 

سامر _ طيب  بعد  الخطوبه  ابقا شوف موضوعها،  بس  يلا يدوب  تروح للحلاق 

أسامة بخنقه _ مش  راضيه تعترف انها  حبتني 

سامر _ هي مين 

أسامة _ شيري،  قولتلها قولي  قبل  الخطوبة  وهي  تقولي  مبحبكش وصديقي وكلام متخلف

سامر _ حد قالك  انك  بارد قبل  كده 

أسامة _ هي 

سامر _ يابني انت هتشلني،  عاوزها تقولك بحبك  وانت خدعتها وبتخطب اختها

أسامة _ معرفش بقا

سامر _ طيب  وانت  زعلان  ليه 

أسامة _ كنت فاكرها هتوقفني وتمنع الموضوع ده

سامر _ طيب  افرض منعته كنت هتعمل ايه بعد كده 

أسامة _ مش عارف 

سامر _ يابني ما لو بتحبها قول واحنا نخترع اي حجه علشان متمش الخطوبه دي 

أسامة _ مش بحبها 

سامر _ طيب خلاص انساها وركز  مع  أمنية 

أسامة _ انا مش فاكرها  اصلا،  تولع بقا

عز 

هبصلها ازاى بعد اللى  حصل وهى قاعده مع ابن اختى وهتبقا مراته،،  موقف  زفت مش  عارف  هعديه ازاى،  ومش  ضامن رد فعلها لما  تعرف  اني  خاله،  هتسكت ولا  تعمل  فضيحه وسط الناس

أمنية

عدي طول الليل قافل على نفسه ومش راضي يرد عليه.. والنهارده طلع من الاوضه وهو لابس لبس المدرسة

أمنية _ استنا ياعدي 

عدي بيمشي نحية الباب وميردش وهو توقفه عند الباب

أمنية بدموع_ مش عاوز تكلمني 

عدي _ وسعي انا اتأخرت علي المدرسة

أمنية بدموع_ هتروح المدرسة في يوم خطوبتي، مش انت اللي هتظبطلي الحفله وتجبلي صاوريخ زي ما بتقولي دايما

عدي _ لما تعتبريني راجل ابقا اعمل كده

أمنية _ راجل وسيد الرجاله كمان، بس انت اللي كدبت عليه 

عدي _ كدبت علشان انتي مكنتيش هتوافقي اني اعرفه وكنتي هترفضي التليفون 

أمنية _ تعرفه من امتي، وليه مخبين عليه انت وهو

عدي _ هو قالي انك لو عرفتي هتزعلي،.. طيب انتي عارفه اني كنت هتفصل من المدرسه وهو اللي ساعدني وخلا منير يحترمني بعد ما كان بيتريق عليه

أمنية  _ كمان راح معاك المدرسه ومتقوليش، كتر خيرك

عدي _ يا أمنية والله هو راجل كويس ومحترم، انا كنت عاوزك تجوزيه هو مش أسامة

أمنية _ انت متعرفهوش دا شيطان، ابعد عنه ، متخلهوش يدخل في حياتنا تاني 

عدي _ ما خلاص انتي زعلتيه واكيد مش هيجي تانى ولا هيكلمني، الله يسامحك

أمنية  _ هيسامحني علشان ببعده عننا، 

عدي _ انتي بتكرهيه ليه اديني سبب واحد 

أمنية _ كلني في فلوس

عدي _ مستحيل هو يعمل كده، قولي سبب تانى

أمنية بدموع _ لعب بمشاعري، حلو السبب ده صح

عدي _ لعب بمشاعرك ازاي مش فاهم

قولتله اللي حصل، وهو مصدقش 

عدي _ هو طيب ميعملش كده، اكيد انتي فهمتيه غلط

أمنية بدموع_ ياريت اكون فهمته غلط، بس ده قالي بلسانه انه مستحيل يبص لواحده مسترجله  بعد ما كان عندي من عشر دقايق في المطعم وبيقولي انه بيحبني وعاوز يتجوزني 

عدي _ حتي لو عمل كده، اكيد في سبب يخليه يقولك كده

أمنية _ انت لسه صغير ولما تكبر هتفهم كلامي

عدي _ انا كبير يا أمنية واقدر افهم في الناس كويس، وخالي مش وحش زي مانتي فاهمه

أمنية _ حتي بعد اللي قولتهولك بتقول خالي 

عدي _ ايوه،، انا هروحلوه واسمع منه متأكد انه هيطلع مظلوم 

أمنية _ لا متروحش ومش عايزة اعرف انك اتعاملت معاه تاني

عدي _ هروح يا أمنية

أمنية _ لو هتروحلوه انسا ان معاك اخت 

عدي يرمي الشنطه بنرفزه _ أمنية انا مبقتش صغير علشان تعامليني كده وتقوليلي اعمل ومعملش

أمنية _ وحتي لو عندك 50 سنه هتفضل صغير وبقولك اهو يا عدي لو روحتلوه انا هنسا انك اخويا

عدي بغيظ _ متشكر ياستي متشكر اوي

أمنية _ هتروح تجيب الصواريخ ولا غيرت رأيك

عدي _ بعد اللي

 سمعته انا مش موافق على جوازك من أسامه ومش هجيب صواريخ

أمنية _ براحتك، بس

 لغيت ما تخلص الخطوبه مش عايزة مشاكل ولا تحسس أسامه انك مش موافق

                      الفصل العشرون من هنا   

لقراءة باقي الفصول اضغط هنا

تعديل المقال