رواية احببت مجنونة الجزءالخامس5
الفصل الثامن عشر18
بقلم نجمه براقه
لما استدرت عشان اشوفه بعد ما سابني لقيته حسام.... وكنت بتألم بشده و رغم كده مثلت اني موت عشان ميكملش عليه
،... الألم صعب
بس الموت هيكون اصعب، ويمكن لو مشي وسابني اقدر انقذ نفسي.. وفعلا وقعت علي الارض، وهو قلبني برجله عشان
يتأكد اني. موت، وبعدين خد شنطة الفلوس وطلع يجري وبعد ما اطمنت انه بعد قومت بصعوبه والدم بينزف مني، وحسيت اني خلاص هموت بعد ما خسرت دم كتير،.. بس بردو كملت، وسندت علي الحيط، وبقيت امشى لغيت بره، ولما بعدت شويه عن الاوضه دي، شوفت زين و واحد معاه بعيد عني بمسافة، حاولت انده عليهم كذا مره وصوتي مش واصل ليهم، ف نزلت علي الأرض، ومسكت حجر وبقيت اخبط علي السكه الحديد، وقبل ما اعرف شافوني ولا لا، فقدت الوعي
زين
عبقرينو كلمني وقالي انه عرف يدخل حساب قاهر القلوب وعرف انه معمول برقم اسراء وانا قولتله يعرفلي طريقها فين، ولما قالي علي الموقع، قولتله يجيلي، وبالفعل جه وخدته وروحنا الموقع اللي حدده، ولما وصلنا وقبل ما ندخل الاوضه سمعنا صوت تخبيط ولما بصينا على مصدر الصوت شوفنا شخص علي السكه الحديد بس شكله مش باين اوي عشان الضلمة ، قولت ل عبقرينو يشوفوه وانا هدخل اشوف اسراء جوه، ولما دخلت شوفت اثار دم علي الارض، وفون اسراء واقع، نزلت اخدته.. وبعدين سمعت عبقرينو بينده عليه
طلعت بسرعه، لقيته ساند واحده علي دراعه
روحت عنده بسرعه لقيتها اسراء، وفي سكينه مغروزه في ضهرها ودمها بينزف ومش بتنطق، كنت همسك السكين واشيلها بس عبقرينو وقفني
عبقرينو _ اوعا تلمسها
زين بارتباك _ طيب هنعمل ايه، لازم نلحقها
عبقرينو _ يلا بسرعه هنوديها المستشفى روح افتح العربيه
خدناها وروحنا المستشفي ودخولها جوه غرفة وبعد وقت البوليس جه، وبدأو يحققو معانا وقولنالهم اللي حصل، طبعا كنت انا وعبقرينو ضمن المشتبه بيهم وتحفظو علينا ، يكون فاقت وقالت اللي حصل
عبقرينو _ اقولك حاجه يا زين
زين _ قول
عبقرينو _ من اول يوم شوفتك فيه وانا مبحبكش، فيما بعد حسيت انى غلطان في حقك، بس دلوقتي طلع عندي حق وانا بكرهك دلوقتي
زين بضحك _ Sorry عبقرينو، هنطلع منها دلوقتي متخفش
عبقرينو _ تخيل البت تفوق وتتهمنا احنا
زين _ اه و متوقع يحصل كده
عبقرينو _ منك لله يا ميادة
زين _ مالها ميادة
عبقرينو _ مش عارف بس انا بحسها هي السبب في مشاكل المجره
زين _ ههههه
بعد وقت جه الدكتور سليمان ودخل عندها شويه وبعدين طلع وجه عندنا
زين _ دكتور سليمان، قالولك اني انا مظلوم؟
سليمان _ ايوه، وروحتلك عشان اعتذرلك بس ملقتكش،
زين _ يعني مصدقني
سليمان يربت على كتفه _ اكيد، ومتشكر على اللي انت عملته مع نسمه، وفلوسك هتوصلك الصبح
زين _ مش مهم الفلوس، المهم انكم تكونو عرفتو اني مأذتهاش
سليمان _ الظابط قالي علي كل حآجه وبنسبه لنشر الفيديوهات ف انا متأكد ان مش انت اللي نشرتهم
زين بإبتسامة _ متشكر يا دكتور
سليمان _ بس ربنا يستر وتهمت قتل البنت متلبسوهاش انتو
عبقرينو _ هي ماتت؟
سليمان _ لا بس خسرت دم كتير ومحتاجه نقل دم وربنا يعين
زين _ نسمه عرفت الي حصل؟
سليمان _ لأ لسه
زين _ طيب ليه
سليمان _ نسمه متعاقبه في اوضتها، وهتعرف بس مش دلوقتي
زين _ امتي
سليمان _ مستعجل؟
زين _ طبعا،، يهمني انها تعرف
سليمان _ هتعرف
زين _ وحاجه كمان
سليمان _ ايه
زين _ ممكن اطلب ايدها
سليمان بإبتسامة _ موافق
زين بفرحه _ بسرعه كده
سليمان _ مش هلاقي احسن منك، كفاية انك ساعدتها من غير مقابل
زين بإبتسامة _ متشكر اوي، هتقولها امتي بقا
سليمان _ لما اعقابها الأول
زين _ والعقاب ده هيتأخر
سليمان _ يومين كده
زين _ مينفعش النهارده
سليمان _ لا
عبقرينو _ ياعم اقعد بقا، احنا هنتمرجح وانت فاضي للكلام ده
زين _ يعني ايه نتمرجح
عبقرينو _ يعني هنتمرجح علي حبل المشنقه
زين يمسك رقبته _ متكملش اكيد لأ
سليمان _ ، قولي صحيح، انتو لمستو السكين؟
عبقرينو _ لا
سليمان _ تمام متقلقوش، براءه ان شاءلله وانا هقف معاكم
زين بإبتسامة _ متشكر يا دكتور
ياسر
رجعت البيت متأخر ودخلت الأوضة لقيت مريم نايمة على الكرسي ولما دخلت صحيت من نومها
مريم تقوم وتتقدم نحيته _ اتاخرت ليه
ياسر يتجاهل كلامها ويترمي علي السرير
مريم توقف جمبه _ ياسر، احنا لازم نتكلم
ياسر يعتدل _ لو هتفتحي الموضوع اياه تاني اسكوتي احسن
مريم _ مفيش موضوع غيره، ارجوك صدقني، شاهر خدعك وبوظلي حياتي
ياسر بحده _ انا سكتلك قبل كده،.. حرف زياده وهرميكي برا
مريم تقعد علي ركبتيها وتمسك ايده _ انت لازم تسمعني.. احلفلك ب أيه اني مش كدابه
ياسر ينظر لها لبعض الوقت _ متحاوليش تلعبي بيه،،، قومي من جمبي
مريم _ وانا هكدب عليك ليه بس، انت نفسك بتقول انك معملتش حآجه،.. طيب انا دخلت هناك ازاي،
ياسر بانفعال _ انتي عايزة توصلي ل ايه بظبط
مريم تقعد جمبه علي السرير _ عاوزاك تعرف الحقيقة وان شاهر شيطان وبيخدعك
ياسر ينظر لها ولا يُجيب
مريم _ صدقني يا ياسر
ياسر بتنهيده _ معنديش مشكله انك غلطتي.. انتي حره، بس بلاش تحاولي توقعي بيني وبينه عشان ثقتي فيه مليون في المية
مريم _ تبقا بضيع نفسك، شاهر عدو مش صاحب
ياسر يقوم _ كلمه زياده وهفقد اعصابي
مريم بدموع _ عشان خاطري
ياسر بحده _ولا كلمة
مريم _ حاضر
سبتها ونيمت على الكنبه وهى جت ورايا
مريم _ نام على السرير
ياسر يستدير وميردش عليها
مريم _ ياسر
ياسر يقوم بانفعال _ متجبيش اسمي على لسانك تاني، انتي مش بقيلك غير ساعات وهتمشي
مريم بتنهيده _ مش همشي
ياسر _ نعم
مريم _ مش عايزة اطلق
ياسر _ وايه جد بقا
مريم _ اللي جد اني مش عايزة اطلق
ياسر _ لا ماهو مش بمزاجك
مريم _ مش لازم تعتبرني مراتك، ممكن اقعد في اوضه تانيه عادى
ياسر _ ولا حتى في اوضه تانيه، بعد ما يخلص بكره وتنفذي الاتفاق هتمشي
مريم _ لأ
ياسر _ لأ ايه
مريم _ مش همشي
ياسر _ انتي عايزة توصلي ل أيه بظبط نفسي افهم
مريم _ مش عايزة اوصل لحاجه،، تقدر بعد سنه تطلقني لو حابب
ياسر _ وانتي فاكره ان في السنه دي هتقبلك يعني
مريم _ متتقبلنيش، قولتلك انام في اوضه تانيه
ياسر _ مش موافق، اخرك معايا بكره وهتمشي
مريم _ لما يجي بكره نشوف
ياسر _ حسم الامر، انتي هتمشي ومفيش حاجه هترجعك تاني
مريم _ طيب ممكن تقوم تنام علي السرير
ياسر بغضب _ انتي بتستفزيني، ايه البرود ده .. مكنتيش مستنيه تمشي ودلوقتي بتطولي في المده سنه كامله
مريم _ اخر طلب هطلبه منك، واعتبره رجاء
ياسر بعد صمت_ ،، موافق بس بشرط
مريم _ ايه
ياسر _ تقعدي في المطبخ، وتنضفي وتطبخي مع الشغالين
مريم _ موافقه
ياسر بانفعال _ دا انتي قاصده تشليني بقا
مريم _ انا هنفذ شرطك علشان اقعد
ياسر _ وايه اللى جد
مريم _ اللى جد اني عرفت الحقيقه
ياسر _ بتلاوعي تاني
مريم _ مش بلاوع
ياسر _ امال اسمه ايه ده
مريم _ اسمه بحبك وعاوزه اكمل معاك ومش هسيبك
ياسر _ ايه
مريم _ زي ما سمعت انا بحبك
ياسر يبعد عنها _ يااالله، مريم، لغيت ما يجي بكره مش عاوز اسمع كلمه واحده منك، تعرفي تسكوتي لبكره
مريم _ اعرف
ياسر _ طيب روحي نامى
مريم _ مش هنام انت قوم نام على السرير
ياسر يزفر بخنقه _ ماشي... وسعي ممكن
خبيثه ومش ساهله، في ثانيه قالت بتحبني بعد ما عرفت ان مفيش فايده وانها هتمشي،،
رودينا
صحيت بالليل عشان اطمن علي الاولاد، ف لقيت مراد قاعد وبيبصلي ولما شافني فتحت بص بعيد
رودينا _ انت صاحي؟
مراد _ اه كنت عاوز اشرب
رودينا _ دقيقة هجبلك
مراد _ شربت خلاص
رودينا _ طيب مالك... في حاجه ولا ايه
مراد يبص بعيد وميردش
رودينا _ في ايه يا مراد
مراد بعد صمت _ ظلمتك معايا يا رودينا
رودينا تعتدل في قعدتها _ بتقول كده ليه
مراد _ في الاول اتعذبتي بسببي وبعدين عيشتي بقيت عمرك مع واحد عاجز
رودينا تقبل يده بإبتسامة _ انا لو هعيش طول عمري اصلي واحمد ربنا علي وجودك في حياتي مش هوفي... مراد انت البصه في وشك كل يوم جنه
مراد بإبتسامة باهته _ انتى عارفه
رودينا _ ايه
مراد _ لما افكر في نصيبي بلاقي اني اكتر راجل محظوظ، بس للأسف مفيش حاجه كامله... اول حاجه بابا مشفتهوش سنين طويله وعيشت من غير اب وتاني حاجه جودي حب عمرى ماتت صغيره، وسابتني، وسيف مقدرتش اعيش معاه طفولته،.. وانتي اكتر حد كمل معايا بس ظلمتك معايا...
رودينا _ يمكن كل ده حصل علشان ربنا بيحبني وكاتبلي اعيش معاك
مراد _ اممم بالمناسبة، انتي ولا مره قولتيلي حبتيني ليه
رودينا بإبتسامه شارده _ مبحبش افتكر الموضوع ده، لكن هقولك
مراد _ ايوه
رودينا بدموع _ عمري ما كنت اتخيل اني يجي يوم واحب جوز صحبتي، ... انا وقفت معاها عشان تجوزك، ويمكن وقعت نفسي في مشكله كبيره عشان تجمعو مع بعض، بس لما اتجوزتو وبقيت اجي عندكم.. ولعبنا انا وانت مع بعض، واهتمامك بيه في تعبي، خلوني غصب عني افكر فيك والتفكير فيك اصبح شيء اساسي، في يومي، مع انى كنت دايما بأنب نفسي، واقول لا يابت ده غلط حتي لو كانت حاجه بينك وبين نفسك.. وحاولت كتير ميبنش عليه، بس بان وانتو فهمتو، ... انا اكتر حاجه مزعلاني ان جودي ماتت قبل ما اعرف هي مسمحاني ولا لا..... وتبتدي تبكي
مراد يحضنها _ مسمحاكي، هي قالتلي، ولما عرفت انك عملتي حادثه وقعت بسبب حزنها عليكي ومقامتش تاني
رودينا بدموع _ انا كنت بحبها والله يا مراد وكنت خايفه تموت وتسيبنا، عمري ما تمنيت يحصل معاها كده ولا اتمنيت اني اخدك منها، حتي بعد ما حبيتك
مراد _ انا عارف
رودينا تعتدل _ طيب ممكن نبقا نروح في يوم نقرالهم الفاتحه كلهم،
مراد _ ممكن
رودينا _ طيب، هروح اطمن علي الاولاد
مراد _ متتأخريش
رودينا _ هتخاف ولا إيه
مراد _ ايوه... دا انا بخاف تتاخري عليه لما تدخلي المطبخ،.. بحس بالامان وانتي وجمبي
رودينا بإبتسامه _ ايه الكلام ده، جاي دلوقتي تقوله
مراد _ بقوله بيني وبين نفسي كل لما تبعدي.... انتي الأمان بنسبالي
رودينا بدموع _ مش هتأخر
مراد
قلبي كان مقبوض، ومش عاوزها تسيبني،... وبعد ما طلعت فضلت مستنيها اكتر من نص ساعة، ومجتش، ف قومت عشان اشوفها، ولما دخلت و ولعت النور، لقيتها واقعه على الأرض ودم نازل من راسها، روحت عندها بسرعه وسندتها علي دراعي،
مراد بقلق شديد _ رودينا، مالك يا رودينا... ردي عليه...... كررردي يا سرور.......... رودينا قومي عشان خاطري،
كردي يجي و وراه سرور ولما بيشوفوها كده بيجرو عليها
كردي_ في ايه يا باشا مالها
مراد _ شيلها بسرعه هنوديها المستشفي. بسرعه
سرور _ فين الواد سليم يا باشا
مراد ينظر لسريره ولا يجده _ الولد راح فين.... يا سليم!
سرور يطلع يدور عليه في البيت وميلقهوش_ مش موجود يا باشا
مراد ببكاء _ طيب شيل هنوديها المستشفى، وانت كلم سيف، خليه يجي حالا
سرور _ يجي فين دلوقتي
مراد _ اتصلي بيه بسرعه وبطل رغي
سيف
روحت لمسك علشان ارضيها زي كل يوم وهي مش متقبله اي كلام
مسك _ انا عايزة انام من فضلك امشي بقا
سيف يقترب منها وهي تبتعد ثم يمسك بها ويجذبها اليه _ انت مبتتعبيش
مسك تشد فى نفسها _ ابعد عنى، مش كده
سيف _ امال ازاى،... انا تعبت من صدك ليه،. حني بقا
مسك _ مش هحن وابعد لا اصوت
سيف يكتفها بيده وباليد الأخرى يداعب خصلات شعرها بلطف _ وحشتيني يا مسك
مسك _ ماشي بس ممكن تسيبني بقا
سيف _ يعني موحشتكش كمان
مسك _ لأ
سيف _ عينيكي بتقول غير كده
مسك تبعد نظرها عنه _ متعملش فيها فاهم، انت مبقتش فارق معايا
سيف يداعب وجنتيها _ بيبان عليكي لما بتكدبي،
مسك _ مش بكدب انت بيتهيألك
سيف بإبتسامة خفيفه _ فاكره لما كنا مع بعض في الفندق في امريكا
مسك _ لأ
سيف _ بس انا فاكر
مسك _ وبعدين
سيف يتأمل وجهها _ كنت أول مره اشوفك بفستان، ومن وقتها سرقتي قلبي وعقلي وراحت بالي
مسك _ علشان كده خونتني
سيف _ مخونتكش
مسك _ نفسي اكدب عيني بس ازاي
سيف يضع يده علي عينيها _ بلاش عينيكي، انتي من جواكي مصدقه اني ممكن ابص لغيرك
مسك _ ملهوش لازمه الكلام ده،
سيف _ انا عارف ان هيجي يوم وتعرفي الحقيقه، بس خايف اليوم ده يتأخر
مسك _ طيب ممكن تشيل ايدك من على عيني
سيف يشيل ايده _ اهو
مسك _ طيب انا هديك فرصه تثبتلي كلامك، لو قدرت انا هرجعلك
سيف بإبتسامة _ ماشي
مسك تشد في ايدها وهو يمسكها باحكام _ عاوزاني اسيبك؟
مسك _ ايوه
سيف بإبتسامة _ طيب بصيلي كده
مسك تتهرب منه _ لأ
سيف _ يبقا مش مصدقك
مسك تنظر له _ اهو، ممكن تسيبني كده
سيف بإبتسامة _ لسه مش مقتنع
مسك _ ايوه
سيف _ ايوه ايه
مسك بتردد _ ايوه مش عاوزاك...
التليفون يرن ويقطع حديثها
سيف _ ايوه كملي
مسك _ تليفونك بيرن
سيف _ سيبيه، ... ها سامعك
مسك _ رد علي التليفون ليكون في حآجه مهمه
سيف _ مش هتكون اهم منك،.. اتكلمي يا مسك
مسك بتنهيده _ لما تثبتلي انك مخونتنيش هقول
سيف _ تمام،
سبتها ورديت على التليفون، وسمعت صوت بابا بيعيط
مراد ببكاء _ سيف، انت فين يابني
سيف بقلق _ في ايه بابا، بتعيط ليه
مراد ببكاء _ رودينا تعبانه، حد ضاربها ومودينها المستشفى وسليم اتخطفت، تعاله انا مش قادر اعمل حآجه
سيف _ امتي دا، وفين الكلاب اللي عندك
مراد _ مش وقته
سيف _ حاضر حاضر، انا هحجز علي اول طياره واجيلك متقلقش
مسك _ في ايه يا سيف ايه اللي حصل
سيف بغضب _ سليم اتخطف واللي خطفوه ضربو رودينا
مسك _ ماماا... هي حصلها ايه ، طمني
سيف _ رايحه المستشفى ،،، اقعدي هنا متطلعيش انا راجعلك
مسك تمسك دراعه _ رايح فين
سيف بغضب _ سيبني.. مفيش غير الكلب ده هو اللي عملها
مسك توقف قدامه _ لا ياسيف، متتهورش
سيف بحده _ خطف سليم وضرب امك، لازم يموت . وسعي
مسك ببكاء _ اهدي الله يخليك كفاية مصيبه واحده ... احنا لازم ننزل مصر حالا
سيف يبعدها عن طريقه ويروح عند اوضة خالد، ويخبط وميلقيش رد
مسك توقف قدامه وبترجي _ كفايه علشان خاطري.. تعاله معايا
سيف بقهر _ لازم يموت، مش هنرتاح منه غير بالموت
مسك تمسك ايده وتشده لغيت الأوضة وتقفل الباب
مسك _ طيب ممكن تهدا يكون اطمنا على ماما
سيف _ وسليم ولا مخدتيش بالك
مسك _ انا معرفش سليم، ومين ما كان اللي عمل كده ف هو السبب في اللي حصل،
سيف _ سليم طفل عنده 5 سنين، وجاي مضروب ومتعذب وصباعه مقطوع، بسببي انا، وبسببي ليه، خليني اقول ان بسبب خالد... خالد اللي ساعد عاصم انه يوصلك، وخطف رودينا.. ودلوقتي فرق بيني وبينك
مسك _ سيف مش وقته دلوقتي
سيف بغضب _ لسه مش مصدقاني بردو
مسك _ مصدقه بس ممكن تتصل وتحجز
سيف يمسكها بغضب _ تبقي مش مصدقه... ومش هتصدقي غير لما كل حاجه تضيع مننا
مسك بدموع _ مش وقت الكلام ده خلينا نلحق بابا وماما وبعدين نتكلم
سيف _ نلحق ايه بقا، انتي مش هتقدري تسافري معايا، يعنى مجبر اسيبك هنا مع الكلب ده
مسك _ خلاص انت روح وانا هتصرف ان شاءلله اخليهم يرحلوني ترحيل
سيف _ مقدميش حل تاني .... بس اوعي تخزليني يا مسك
مسك بدموع _ اخزلك؟..... مش هعتب عليك دلوقتي
سيف بخنقه _ اعذريني، بس انا عارف انه شيطان
مسك تسمك ايده _ انا عمري ما هستبدلك باي شخص لغيت ما اموت حتي لو انت خونتني
سيف يلمس وجهها بحب _ انا واثق من كده
مسك تحضنه وتبكي _ طمني علي ماما... ومتنساش اللي قولتلك عليه
سيف يضمها بقوه _ حاضر... لو هدفع عمري كله، مش هرتاح غير لما اثبتلك.... بحبك يا مسك
مسك بدموع _ وانا
شاديه
مهدي جه ومعاه سليم وهو نايم وقالي خليه هنا يكون خالد جه وخدته منه ونومته في اوضتي اللي حاطه فيها سرير ميرال، وبعدين طلعت من الاوضه وروحت اصلي
***
بعد وقت بيصحا سليم ويبص حوليه يلاقي ان المكان متغير، ف يقوم من مكانه،، يلاقي سرير طفل... وبيبتدي صوت ميرال يطلع،.. ف بيطلع علي السرير تاني ويبص عليها وهي لما تشوفه بتلاغي بكلمات مش مفهومه مناسبه لسنها
سليم بغيظ _ انتي وحشه
ميرال تضحك
سليم _ باباكي وحش وانتي وحشه كلكم كلبين
ميرال وهي بترفع رجليها وتاكول فيهم _ دا دا دا
سليم _ كليهم، خلي رجلك تتقطع زي صوباعي، شوفي،.... وبيمدلها ايده
ميرال تمسك ايده وتشدها لفمها
سليم يشد ايده منها _ يا وحشه بس اكبر وهضربك في عينك طاخ
ميرال تضحك
سليم بغيظ _ متضحكيش
ميرال تبصله
سليم _ بس اكبر وهخلي بابا يجبلي مسدس واضربك بيه
ميرال _ دا دا دا
سيلم يبصلها بغيظ وينزل يدور على حاجه لغيت ما يلاقي مقص وياخده ويطلع عندها تاني
سليم _ اقصلك شعرك و وشك
بيقرب المقص منها ويقصلها شويه من شعرها وهي تبص عليه
سليم يخبي الشعر في جيبه _ قصتلك شعرك بقيتي وحشه... وكمان هقصلك وشك
بيقرب المقص من وشها وهي بتبكي ف بيرجع المقص تانى
سليم _ خلاص مش هقص وشك.. بس متعيطيييش
ميرال تزيد في البكاء
بيبص حولية يلاقي الرضاعه جمبه، ف بيمسكها ويدهالها وهي بترضع وتسكت
سليم _ خلاص بس تكبري هقص وشك وصوباعك