رواية نعيمي وجحيمها
الفصل الثاني والستون62
بقلم امل نصر بنت الجنوب
-نعم! قصدك إيه بالظبط؟
هتفتت بها بتحدي غير عابئة بغضبه ولا بهذه الهيئة الخطرة التي بدت على وجهه بوضوح وهو يقترب منها حتى أصبح أمامها
.
مباشرة، ليُطالعها بتفحص وقراءة جيدة، حتى عاد بالسؤال بنبرة هادئة ومريبة:
- ما انا بسألك يا زهرة عن صاحبتك، هو انتي تعرفي هي راحت فين؟
ردت وعينيها تواجه خاصتيه بقوة:
-وانا برضوا سألتك قصدك ايه بالسؤال ده؟ ولا انت شاكك من الأساس اني هربتها؟
رد على ثقة استنتجها بذكائه الحاد:
-انا مش شاكك، انا متأكد يا زهرة انك هربتيها.
-وانا معنديش مرارة للظنون بتاعتك دي، ولا عندي أي حاجة تجبرني اتحمل الكلام الفارغ ده، انا ماشية.
قالتها وتحركت على الفور نحو المغادرة، توقف هو قليلًا خلفها يستوعب الهيئة الجديدة لهذه المرأة التي تزوجها جاسر، وهي ضعيفة، منكسرة، تخشى من ظل خيالها، تبدوا الاَن كنمرة شرسة تكشر بأنيابها بكره في وجهه هو وبهذا اليوم، بعد فعل صديقتها، على خاطره الاخير، استفاق ليهدر بها قبل أن تصل لباب الغرفة بصوت زلزل اركان الجناح الواسع، حتى انتفضت الفتيات من هيئته ليلتصقن ببعضهن، وهو يعدوا بخطواته الواسعة ليصل إليها في ثوان قليلة، ليتبع بأعين مشتعلة بسعير من الجحيم:
-انا دلوقتي بس اتأكدت إن انتي اللي ساعدتيها، صاحبتك راحت فين يا زهرة؟
ردت بحدة غير اَبهة به:
- وانا بقولك إني مش قابلة تحليلك ولا أسئلتك دي، وابعد بقى عن طريقي، بدل وديني لقول لجاسر على اتهامك ده، واسيبه هو اللي يتصرف معاك .
تبسم ساخرًا بجانبية قاسية، فتوحشت ملامح وجهه ليجعل قلبها يرتجف بداخلها، ولكنها تمالكت لتتمسك بالطفل، تحاول حمايته، مع كلمات الاخر التي تصدر مع هدير أنفاسه:
-بلاش الألعاب دي وفوقي كويس يا زهرة وفوقي صاحبتك، هي مش قدي ولا قد حركة زي دي أبدًا، اتصلي بيها تيجي حالا وتلم الدور، دا لو انتي خايفة عليها بجد، ولا خايفة على اخوها اللي مش سيباه من إيدك ده .
قال الأخيرة، خاطفًا نظرة سريعة نحو ميدو، فتتحول هي لمخلوق اَخر أمامه بعد تهديده الصريح، وبرقت عينيها لتنسى خوفها منه ومن هيئته، فتصيح بوجهه:
-اقسم بالله ما تقربلوا ولا تقرب لأي حد من خواته لدفعك التمن عمرك كله، وإن كان على كاميليا، انا قولتلك إني مليش دعوة ودي حاجة ما بينك وبينها، يعني لا انا ولا عيلتها لينا أي دخل باللي بيحصل ما بينكم .
إلى هنا وقد فقد زمام أمره فصاح بقوة يضرب بكفه على الجدار من خلفها:
-أمال مين اللي دخل لما انتي وعيلتها ملكمش؟ للمرة أخيرة بنبهك، لو مجاتش صاحبتك في ظرف نص ساعة، لكون جايبها من شعرها لو كانت حتى مستخبية في جهنم نفسها، بس ساعتها هتبقى تحت رجلي، هدوقها من العذاب الوان وتبقي توريني مين اللي هيقدر يرحمها من عذابي
-كاااارم
هتف بها جاسر على مدخل الجناح بعد أن وصل إليه وذلك بعد الرساله التي بعثتها له زهرة منذ دقائق ، تطلبه ليأتي إلى الجناح فورًا من أجل حدث هام، فيصل الاَن ويرى هذا المشهد، كارم وهو يحاصر زهرة وميدو الصغير، ملاصقين بالحائط من الخوف وهو يبدوا وكأنه يريد الفتك بهم
فتابع له جاسر بوجه صارم وهو يخطو بداخل الغرفة نحوه
-إيه اللي بيحصل هنا؟
تمالك المذكور يستقيم بجسده ليجيب الاَخر، مسيطرًا بعض الشئ على انفعاله:
-تعالى وشوف بنفسك يا جاسر باشا، أنا كنت بسألها عن كاميليا وهي زي ما انت شايف كدة، مش متقبلة سؤالي، رغم علمها بالظرف الي انا فيه .
-مالها كاميليا؟
سأله جاسر باستفهام، فتغير وجه الاَخر على الفور، حتى بدا أنه لا يريد الإجابة، ولكنه تمكن في الاخير ليجيب باقتضاب:
-حصل مشكلة ما بينا، وانا دلوقتي بطلب من زهرة هانم تكتم ع الخبر ده قدام أي حد، أنا مش عايز إسم عيلتي يتجاب على لسان أي حد.
سأل جاسر مرة أخرى وقد زادته آجابة الاَخر حيرة:
- طب وهي فينها كاميليا، اتكلم انا معاها لو انت عايز .
سمع منه لليشيح بوجهه عنه، ثم رد وهو يقضم بأسنانه على شفته السفلى من الغيظ:
-زهرة هانم هي اللي هتفهمك يا جاسر باشا.
أجفل جاسر على هذه الهيئة الغريبة لكارم، وفعله الأغرب، قبل أن ينتبه على زهرة وهي تجذبه من ذراعه وتخاطبه:
-تعالي معايا يا جاسر دلوقتي وانا هفهمك.
تحرك معها رغم استغرابه، ولكنها توقفت فجأة ملتفة لكارم:
-بس انا كنت عايزة اخد البنات معايا غادة ورباب .
رد إليها بعضب يوشك أن يحرق الأخضر واليابس:
- ولما تاخذي الاتنين وتمشي، هيبقى سيبنا مين لأمين ابن عمي عشان يحقق معاه؟ مش كفاية انتي ماشية اهو؟
- تحقيق إيه؟
صاح بها جاسر بنفاذ صبر ، فتمسكت به زهرة لتسحبه للخارج، متمتمة له:
-أنا هقولك يا جاسر، بس تعالى .
استسلم جاسر لسحبها مضطرًا، حتى إذا ابتعدوا قليلًا عن الغرفة تفاجأ برؤية هذا المدعو اَمين ظابط الأمن، وخلفه والد كاميليا متجهين نحو الغرفة التي خرجوا منها، وقبل ان يخرج صوته لحقت هي لتهمس بإذنه حتى لا يسمع ميدو الصغير:
- كاميليا سابت الفرح وهربت.
-إيه؟
خرجت منه بارتياع اختلط بعدها بمشاعر غريبة تقارب الإرتياح، كبتها سريعًا ليسألها بتجهم:
-ازاي يعني؟ انتي بتتكلمي جد ولا بتهزري؟
اومأت بعينيها لينتبه إلى الصغير، ثم همست مرة أخرى:
-بعدين هفهمك على كل حاجة، المهم دلوقتي فين إمام؟
زادته بقولها تشتتًا، ليهدر هامسًا هو الاَخر:
-إمام كمان؟ وانتي مالك بإمام؟
❈-❈-❈
نزل جاسر في الأسفل ليصل إلى صديقه الذي كان في انتظاره على نار ليسأله على الفور:
-في إيه يا جاسر؟ انا ليه حاسس إن في حاجة مش مظبوطة
عاد المذكور لمقعده ليجلس دون أن يجيبه، وهو يطالعه بنظرة غير مفهومة أثارت ارتياب الاَخر، ليهتف به:
-يا بني ما ترد مالك؟
بابتسامة لم تصل لعينيه رد جاسر:
-بصراحة محتار ابلغك الخبر ازاي؟ لأن لحد الآن مش قادر استوعب.
عقب على قوله طارق بنفاذ صبر
-مش قادر تستوعب إيه بالظبط؟ ما تتكلم يا جاسر، انا بدأت اتوتر فعلا.
اقترب جاسر برأسه منه ليهمس بصوت خفيض:
-كاميليا هربت وسابت الفرح
سمع طارق والتف برأسه إليه يطالعه بأعين متوسعة وعدم تصديق، فتابع له جاسر بنفس الهمس:
-والله زي ما بقولك كدة، والدنيا مقلوبة فوق، بس كارم بيكتم ع الخبر.
ظل طارق على صمته يتطلع إلى جاسر بتشكك، رغم رغبته الشديدة في التصديق، فأتى نداء مقدم الحفل حاملًا له التأكيد بقوله:
-يا جماعة... يا جماعة معلش.... احنا جالنا خبر مؤسف دلوقتي، هو إن العروسة تعبت جدًا، والعريس اضطر يأجل الحفل، بنعتذر من كل المدعوين في الحفل.
زاد الهرج في قلب القاعة، والتساءلات الفضولية مع حركة البشر، ليستفيق اَخيرًا طارق لسؤال صاحبه:
- لكن دا بيقول تعبانة؟
اوما له جاسر يجيبه:
-ما انا قولتك بيكتم ع الخبر، عشان صورته قدام الناس.
برقت عيني طارق، وتسارع الخفقان بصدره لهذا الصغير، وكأنه وجده القشة التي يتعلق بها الغريق، ليسأله على الفور بلهفة:
-طب هي زهرة فين دلوقتي؟ انا مش شايفاها معاك!
رد جاسر يمط بشفتيه:
-والله الست زهرة نزلت معايا من شوية، بس سابتني بعد كدة عشان عايزة إمام في حاجة مهمة!
غمغم طارق بعدم فهم:
- حاجة إيه؟
❈-❈-❈
عايز إيه يا إمام؟
هتف بها كارم فور أن ولج إليه المذكور لداخل الجناح الذي فرض عليه حماية مشددة لعدم الأقتراب منه لأي شخص من المدعوين او الصحفين، وقد تمكن حتى الاَن من التعتيم بهذه الإجراءات التي فرضها على إدارة الفندق، وحصار الفتيات التي حضرن وقت هروب كاميليا بالإضافة إلى افراد عائلتها ومعهم غادة التي تطلعت بلهفة إلى إمام وهو يجيب كارم بكل ثقة:
-الباشا باعتني احضر معاكم ومع عيلة كاميليا هانم، عشان انا اللي هروحهم بعد كدة .
هتف كارم بتهكم وتشكيك:
-يا راجل، بقى الباشا برضوا اللي هو اللي أمرك بكدة؟
صمت إمام عن الرد، فتدخل أمين ضابط الشرطة ليخاطب ابن عمه:
-خلينا في اللي احنا فيه دلوقتي يا كارم، وانت بتقول انه من طرف جاسر باشا، يبقى خلاص بقى .
ابتلع كارم اعتراضه، حتى يتجنب فتح جبهات أخرى، فعليه الاَن التركيز في مشكلته.
وقف إمام في إحدى جوانب الغرفة يتابع اسئلة المدعو أمين وهو يوجهها للفتيات الاَتي اتخذت جهة واحدة، منهن من جلسن بجوار التخت، وبعض الأخريات على المقاعد القليلة ووالد كاميليا يتابع من الجهة الأخرى بوجه واجم، ومتجمد:
- يعني انتوا متأكدين مافيش ولا واحدة فيكم شافتها؟ طب مش يمكن تكون اتخطفت والرسايل دي تكون من الخاطفين.
عقب على قوله كارم بحدة:
- اتخطفت ازاي بس يا امين؟ طب والرسالة اللي بعتتها لوالدها.
رد أمين:
-عادي يعني، ما هو يمكن يكون الخاطف هو اللي باعتها، هو فين تليفونها؟
هتفت رباب من بينهن:
-التليفون مع كاميليا، وانا برن عليها من وقت طويل ومبترودش.
تطلع اَمين للفتاة الصغيرة، المختلفة عن بقية اقاربه، بهيئتها الرقيقة وشعرها القصير والبراءة التي تطل من عينيها رغم ذبولها من البكاء الكثير، فسألها بنبرة متغيرة أثارت انتباه كارم:
انتي اختها الصغيرة رباب مش كدة؟
اومأت برأسها بخجل، لحق به كارم ليُفيقه بلكزة من مرفقه مع نظرة محذرة بقوله:
-يبقى كدة احنا لازم نشوف صور الكاميرات عشان نشوف اللي دخل واللي خرج من الجناح في الوقت ده بالذات.
اجابه أمين وقد عاد إليه تركيزه:
-اللقطات زمانها بتتجهز، انا أمرت مدير الفندق يحضرها.
هتفت فجأة واحدة من الفتيات:
-بس انا افتكرت حاجة دلوقتى.
-افتكرت إيه يا نهلة؟ قولي بسرعة .
هتف بها كارم بخشونة نحو الفتاة التي اجابته سربعًا باضطراب:
-واحنا بنرقص ومندمجين انا كنت لمحت بنت من عمال النظافة وهي خارجة من الأوضة باليونيفورم بتاعها، بس بصراحة مشوفتش وشها، ولا اعرف هي دخلت هنا ليه
-بلبس العمال !
تمتم بها كارم بتساؤل قطعه المدعو امين بقوله:
-متتعبش نفسك في الأسئلة تعالى نشوف صور الكاميرات دلوقتي حالا.
هم ليتحرك معه، ولكنه استدرك فجأة ليسأله:
-طب ودول؟
قالها بإشارة إلى الفتيات فرد امين موجهًا نظراته نحوهن:
- دول اكيد يروحوا بس المهم بقى ماحدش يطلع كلمة لبرا يا بنات ، حتى لو أهاليكم، تمام يا بنات.
التف كارم برأسه فجأة بصيحة ارعبت الجميع .
-اللي هسمع انها طلعت كلمة من اللي اتقالت دلوقتي، متولموش الا نفسها بعد كدة.
❈-❈-❈
في غرفته وبعد أن كبح جماح غضبه طوال طريق عودتهما معًا حتى ينفرد بها ويأخذ فرصته كاملة في التحدث معها، ثم انتظارها الاَن، حتى تطمئن على هذا الصغير ميدو والذي أصرت على عودته معهما، ومبيته في غرفة الطفل المنتظر؛ طفلهما.
كان يفور ويغلي من داخله، يستعجل الثواني وكأنها سنوات، فعقله لا يستوعب حتى الآن ماحدث، وقلبه يؤنبئه بأن لها دخلًا كبيرًا بذلك.
انتبه على دخولها الغرفة بخطوات متعبة تتأوه من الألم:
-اَه يا ضهري.
خلعت الحجاب وخلعت حذائها سريعًا لتستلقي بظهرها على الفراش، بفستان السهرة
اقترب يلقي كلماته بتهكم:
- ولما ضهرك واجعك كدة، مرجعتيش على السرير على طول ليه، وسيبتي اللي اسمه ميدو ده تنيموا الخدامة؟
رفعت رأسها إليه لترد باستنكار:
- لا طبعًا مينفعش الكلام ده، الولد مخضوض اساسًا من اللي حاصل، دا انا لو عليا، كنت نمت بالمرة معاه .
-كماان
اومأ بها ليضيف بكلمات مقصودة:
- ودا على كدة بقى، هيقعد معانا كتير في البيت؟
ردت بصوت شارد وكأنها تفكر بشيئًا ما:
-يعني بقى حسب الظروف.
سمع منها ليميل برأسه إليها قائلًا:
- والظروف دي بقى اللي هي إيه بالظبط عشان افهم؟
انتبهت على هذه النظرة الحادة من عينيه؛ والتي كان يرمقها بها من علو، فاعتدلت بجذعها لتجيب بوجه جدي:
- على ما ربنا يسهل وتتحل أزمة كاميليا، لأن بصراحة انا مش هقدر اتخلى عنه في غيابها.
صمت قليلًا وعيناه ازدادت حدة ليسألها مباشرةً:
- انتِ كنتِ عارفة باللي صاحبتك هتعمله يازهرة؟
اجابته على الفور وبدون مواربة:
-ايوه يا جاسر وانا اللي ساعدتها كمان.
ردد خلفها يستوعب صحة ما سمعه:
-وانتي اللي ساعدتيها كمااان! دا على كدة كارم كان عنده حق بقى.
توقف ليهدر بصوت عالي:
- انتو مجانين؟ لما هي مش عايزة تتجوزو قبلت بيه من الأول ليه؟ تعمل الحركة الغبية دي مع واحد زي كارم وراه عيلة تسد عين الشمس! طب نفترض انها غبية ومش حاسة بخطورة اللي عملتوا، انتي تساعديها ليه؟
هتفت تخرج عن صمتها:
- كاميليا مش غبية ولا متخلفة، ولا هي كانت عايزة إن دا يحصل، بس مكانش في غير الحل دا اللي لقته قدامها، وكارم اللي انت بتتكلم عنه ده يستاهل كل اللي يجراله منها، بعد ما زلها وكان عايز يكسرها.
عقب جاسر على قولها باستفهام:
-انتي بتقولي إيه؟ ما توضحي كويس عشان اكون افهم زيك.
تطلعت إليه لعدة لحظات صامتة وصــ درها يصعد ويهبط بشدة من فرط انفعالها، وما تشعر به تجاه هذا الرجل، بعد الذي فعله مع صديقتها لتقول اَخيرًا:
-حاجة زي دي مقدرش احكي فيها يا جاسر، بس اللي اقدر اقولهلك بجد، هو إن الراجل ده سئ جدًا، وشخصيته عكس ما كل الناس شايفاها.
صاح جاسر بها:
-لكن اختيارها يا زهرة ومحدش غصب عليها، هي اللي عايزة كل حاجة على كيفها، موافقتش بطارق ليه من الاول؟ كانت ريحت نفسها وريحتنا احنا معاها كمان.
ردت تجيبه عن اقتناع:
-محدش يعرف بظروف الناس يا جاسر، أكيد كاميليا كان عندها سبب قوي يدفعها للبعد عن طارق، واختيار إنسان ضده على الإطلاق، بعيد عن الموضوع انت ممكن تلوم براحتك، لكن اللي جوا الموضوع نفسه أكيد بيبقى ليه أسباب قوية في اختيارته .
ضق عينيه جاسر يعقب مندهشًا من لهجتها:
-كلامك بقى كله اللغاز يا زهرة، وانا بصراحة مش مقتنع .
خاطبته برجاء:
-ومش هقدر اوضح أكتر من كدة يا جاسر، انا بس اللي بطلبه منك، انك تقف معايا في رعاية ميدو، وحماية عيلة كاميليا، انا وصيت إمام يبعت حد من طرفه يحرس عند بيتها هناك ويتابع هو معاه، بس برضوا قلقانة.
-يا سلام! لدرجادي انتوا خايفين منه؟
قالها جاسر باستخفاف، قابلته هي بخوف حقيقي:
-واكتر يا جاسر، وعشان كدة انا بترجاك..
صمت يتأملها قليلًا بصمت ثم قال:
- طب حيث كدة بقى، يبقى انتي لازم تقوليلي هي فين عشان اعمل حسابي بالمرة .
ردت بثقة أذهلته:
-لا هي متشلش همها خالص، ولا تعمل حسابك عليها، انا بس اللي يهمني عيلتها.
هز برأسها يسألها باستغراب:
-فيه أيه يا زهرة؟ وصاحبتك دي راحت فين بالظبط؟
ردت بنفس وضعها السابق:
-ما انا قولتلك متشلش همها، يعني ماتشغلش نفسك بيها ولا بحمايتها خالص، وياريت وحياتي عندك ما تسألني تاني كمان .
هتف فاقدًا السيطرة:
-طب ولما انتي مطمنة كدة يا حبيبتي، طمني قلوبنا احنا كمان، وليكي علينا يا ستي مش هنقول لمخلوق، بس اطمن المسكين دا اللي بيلف بالعربية بقالوا ساعات في الشوارع بيدور عليها .
ردت ببساطة لتزيد من دهشته:
-انت قصدك على طارق؟ لو هو عايزها بجد، هيوصلها على فكرة.
-ياسلام! وهو هيعرفها بقى كدة لوحده؟ إيه جو الفوازير ده يا زهرة؟ انا دوخت معاكي.
تبسمت تجيبه:
-والله ولا في جو فوازير ولا حاجة، المسألة سهلة خالص، بس زي ما قولتلك في الاول، انت برا الموضوع، يعني مش شايف الصورة كاملة .
❈-❈-❈
بداخل السيارة وبعد أن ابتعدت عن محيط الخطر نهائيًا، تنفست الصعداء اَخيرًا لتضع رأسها على إطار النافذة المغلقة وعينيها تنظر خارجًا للطريق المظلم الذي تقطعه السيارة، لاتصدق انها اخيرًا قد نجت، تنهدت ببعض الارتياح، وقد علمت الاَن بعودة أباها وأشقائها لمنزلهم، بعد ان انتهى الحفل كما توقعت لمعرفتها بطريقة تفكيره، وجبروته أيضًا في إيقاف أي خطر قبل أن يصل إليه، وفرض إرادته في تنفيذ ما يُصر عليه، عادت بذاكرتها تتذكر هذه اللحظة العصيبة وقت انسحابها من جوار الفتيات لتدخل مرحاض الغرفة، فوجدت الحقيبة التي بها الملابس بحسب اتفاقها مع زهرة في إحدى الزوايا الغير ظاهرة من الحمام الفاخر، خلعت فستانها سريعًا لتضعه على المغسلة الرخام، وارتدت يونيفرم عاملات النظافه لتمسح على جميع زينة وجهها بالمنظف ثم لفت
شعرها للخلف كدائرة لتكمل بوضع الكمامة الطبية على نص وجهها، ثم انتظرت على الهاتف حتى ارسلت لها زهرة المراقبة لمدخل الجناح وحركة الفتيات به، بكلمة مقتضبة" اخرجي" لتسمع منها كاميليا وتخرج على الفور دون الالتفاف
للدخل على الإطلاق ، حتى لا تثير نحوها الشكوك، ومن باب الغرفة لمدرج الخادمات ارتدت السترة الثقيلة التي خرجت بها، لتهبط متخذ طريقها إلى باب الخروج.
تثائبت بتعب فقد ارهقت اليوم جسديًا ونفسيًا، حتى نال منها الإجهاد بحق، القت نظرة على الساعة الملفوفة حول رسغها قبل ان تسأل السائق أو من بجواره في الأمام:
-باقي كتير على ما نوصل؟
اجابها أحدهم باقتضاب:
-لا بالعكس، دي كلها دقايق ونوصل.
❈-❈-❈
أمام الشاشة المصغرة كان جالسًا يتابع مع المسئول في المكان وبحضور ابن عمه الضابط أمين، تتبُع خط سيرها من وقت أن خرجت من الجناح، وارتدائها السترة الثقيلة على ملابسها ثم الخروج من الفندق نهائيًا، ثم صعودها لهذه السيارة الغريبة في قلب الظلمة:
-متقدرش تجيلي صور أوضح للعربية دي عشان اشوف لونها او ارقامها كويس.
هتف بها كارم نحو الرجل المتخصص امام الشاشة، وكان رد الرجل:
-للأسف يا فندم، العربية دي ركنت خلف الفندق في المنطقة الضلمة وحتى لما اتحركت، خدت طريق جانبي مداري عشان متظهرش كويس فلا يبان شكلها ولا أرقامها
صاح به كارم غاضبًا:
-نعم ! إنت هتستعبط عليا ؟ بقولك إيه، تتشال تتحط في اللي بتشتغل عليه عندك، وتطلعلي صور كويسة للعربية دي وارقامها، انت فاهم ولا لأ؟
لهجته القوية أثارت الخوف بقلب الرجل الذي بدا على وجهه الإرتياع، وتدخل اَمين بلهجة أقل حدة للمذكور وبنفس الوقت يضغط بيده على ساعد كارم كي يتماسك بعض الشئ:
- اسمع الكلام يا بني، وجرب تاني من صور الكاميرات اللي باقية، اتعب شوية .
أومأ له الرجل رغم ثقته في عدم الجدوى من محاولاته، أما كارم فقد ابتعد عنه قليلًا ليهدر هامسًا لابن عمه الذي لحق به لخارج الغرفة:
-شوفت بنت ال.... كان مرتبة نفسها كويس قوي، ومعاها كمان اللي يساعدها، ماشي يا كاميليا .
رد الاَخر يتسائل بتعجب:
- بس انا مش فاهم، هي تعمل معاك كدة ليه؟ وهي عارفة ومتأكدة انها في الاول والاَخر مراتك، يعني مربوطة بإسمك مش مجرد خطوبة...
توقف فجأة ليُضف بسؤاله:
-ولا تفتكر انها عاملة حسابها في دي كمان؟
وصل إلى كارم مغزى ما يقصده ابن عمه لتحتد عينيه وتزداد اشتعالًا في قوله:
-دا انا اموتها احسن لو فكرت فيها، أقتــ لها بإيدي ولا إنها تبقى لراجل غيري .
❈-❈-❈
- بتقول إيه؟ وضح أكثر أنا مش فاهم.
هتف بها طارق يخاطب محدثه عبر الأتير في الهاتف وهو يغادر مبنى عمله بعد أن أتاه ليلًا في محاولة بائسة من البحث، علّها تكون قد جاءت واختبأت في مكتبها، فجاءه رد الاَخر:
-يا بني زي ما بقولك كدة، كل ما اسئلها تقولي هو هيعرف لوحده.
صاح به طارق وهو يفتح باب سيارته ليعتليها:
- هعرف لوحدي ازاي يعني؟ هشم على ضهر إيدي مثلًا؟ هي الستات دي عايزة إيه بالظبط؟ إدهاني يا جاسر عشان خاطري.
وصله رد الاَخر بتنهيدة مثقلة:
-ما هي نامت يا طارق، هصحيها ازاي بس؟
زفر المذكور يتمتم بالكلمات الحانقة، قبل أن يهتف بالرد نحو جاسر:
-وكمان جالها قلب تنام؟ اقفل يا جاسر اقفل.
اغلق يلقي الهاتف بجاوره ليغمغم بالسباب، ضاربًا بقبضتيه على عجلة القيادة:
-طب اروح فين دلوقتي بس يا ربي؟ اروح فين؟ الستات دي اللي هطير برج من نفوخي...
أنهى ليتسمر لاهثًا وعقله مشتت بالأفكار الكثيرة والتكهنات العديدة حول مكان وجود هذه المجنونة الاَن، عصر بعقله حتى فاض به وهم بتشغيل المحرك، مقررًا الذهاب إلى زهرة ولو وصل به الأمر للإعتصام في المنزل عندها سيفعل ولن يغادر سوى بعد أن يعرف عنوان كاميليا، ولكن وقبل أن يتحرك بالسيارة جيدًا، استدرك فجأة فتذكر الرقم الذي لم ولن ينساه ابدًا، فتوقف يتناول الهاتف ليتصل بها، ثم جاءه الرد على الفور:
- الوو مين معايا؟
توقف قليلًا يتنفس بخشونة على أسماعها مفكرَا ببداية جيدة للحديث معها، وعلى حين غرة سبقه لسانه في الرد المفاجئ لها بانفعاله:
- إنتي عارفة أنا مين، فين كاميليا؟
صمتت قليلًا هي الأخرى قبل ان ترد:
-وانت عايز كاميليا في ايه يا طارق؟
سمع منها ليهدر متفاجئًا من ردها:
-يعني انتي عارفاني اهو، يبقى بتسأليني ليه؟ قوليلي هي فين؟ طمني قلبي عليها، حرام عليكي اللي بتعمليه فينا ده يا شيخة.
-خلصت كلامك.
تفوهت بها ثم رددت بنفس النبرة الهادئة:
-انا سألتك سؤال وجاوبني عليه، عايز كاميليا ليه؟
كبح بصعوبة صرخة قوية كادت ان تخرج من عمق حلقه، ليصيح غاضبًا
على هذه المعتوهة التي تسأله غير مقدرة لحالته، ولكنه تمالك اَخيرًا ليجيبها باستجداء:
-عايز احميها، عايز احاوط عليها في أشد وقت هي محتجاني فيه، أنا عايزها دايمًا وعمري ما هتخلى عنها، حتى لو هي اتخلت عني زي ما حصل قبل كدة... أرجوكي قوليلي على مكانها.
صمتت مرة أخرى لتزيد من عذابه، ثم قالت:
-مدام كدة بقى، يبقى تعالى يا طارق وانا اقولك على مكانها.
هتف متلهفًا يردد بعدم تصديق:
-يعني انتي عارفة مكانها صح؟ طب ما تقولي مستنية إيه؟ قوليلي هي فين أرجوكي..
قاطعته بقولها:
- وانا بقولك لو عايز تعرف مكانها تعالى .
تمالك أنفاسه قليلًا ليسأله قاطبًا:
-أجيلك! طب انتي ساكنة فين أساسًا؟
❈-❈-❈
في صباح اليوم التالي .
ولجت زهرة للغرفة المزينة بالرسوم الكرتونية والألوان الزاهية، وقعت عينيها في البداية على التخت الصغير لطفلها
المنتظر قبل أن تذهب نحو النائم على السرير الاَخر، ليُشرق وجهها مع رؤية الابتسامة الرائعة على
هذا الوجه الطفولي وهو ينظر لها وكأنه كان ينتظرها، فهتفت به مبتهجة وهي تقترب لتجلس بجواره:
- يا صباح الغمزات، يا صباح الجمال كله، أيه يا عم ميدو الحلاوة دى؟
اعتدل جالسًا بجزعه يتلقى قبلاتها على غمازتيه كما تفعل شقيقته، ورد يجيبها:
- صباح الفل يا أبلة زهرة.
رددت وهي تضمه إليها وتزيد بتقبيله على شعر رأسه في الأعلى:
-يا حبيب الابلة انت يا ميدو ياقمر، صاحي بدري ليه بقى؟ وراك مشوار ؟ ولا انت منمتش كويس؟
خرج سؤالها الاَخير بقلقٍ تبدد مع اجابته البسيطة:
-لا طبعًا نمت، بس انا متعود ع الصحيان بدري عشان المدرسة ولا انتي ناسية؟
نفت برأسها ضاحكة لترد وهي تقبله مرة أخرى على رأسه:
-شكلي كدة فعلا ولا بايني فقدت الذاكرة.... لكن قولي يا ميدو.
تطلع إليها باستفهام في انتظار قولها، وهي فكرت قليلًا قبل أن تسأله بتردد:
-بصراحة كنت عايزة أسألك، حاسس بأيه النهاردة؟ لسة خايف برضوا؟
نفى برأسه لها، فقالت متابعة بتشكك:
-يا راجل، يعني مش قلقان بعد اللي حصل امبارح.... من كاميليا؟
اجاب بعفويته:
- لأ مش قلقان، عشان كاميليا اتكلمت معايا من الاول، وقالتلي لو حصل أي حاجة في الفرح متخفش عليا، انا عاملة حسابي .
تبدلت ملامحها للذهول التام وهي تُعيد بأسألتها:
-إنت بتتكلم بجد؟ يعني كاميليا قالتلك كدة فعلًا؟
-والله ما بكدب، دا حتى في يوميها خدتني وفسحتني وخلتني شوفت ماما.
سمعت منه لتتوسع عينيها وتدلى فكها بصدمة قبل أن تسأله متلهفة:
-إنت روحت وشوفت ماما؟! طب ازاي؟ وهي فين؟ انا عايزاك تحكيلي كل حاجة دلوقتي يا ميدو، ماشي؟
❈-❈-❈
خرج من سيارته بعد أن توقف بها أمام العنوان المذكور، فتسمر قليلًا
أمام اليافطة المدون عليها بالخط العريض على المبنى الضخم، اسم المؤسسة، دار الأمل لرعاية كبار
السن، ليتمتمه بداخله وتزداد بعقله الحيرة، ثم ما لبث ان يتحرك نحوه بخطوات مسرعة، حتى يصل لنهاية لهذه الألغاز.
في الداخل وبعد أن سأل في الاستعلامات، وصل إلى الغرفة المنشودة ليطرق
على بابها بحرج، قبل أن يصله ندائها من الداخل:
-ادخل .
دفع الباب بتردد، يلقي بتحية السلام قبل أن يرى من بالدخل، وتُعلمه هي
عن مكانها بالرد على تحيته:
-وعليكم السلام ورحمة الله وبركاته، اتفضل يا طارق.
التف نحو مصدر الصوت، ليجد امرأة جالسة على مقعدها المريح أمام
النافذة الزجاجية الكبيرة بوسط الحائط، لم يتبين وجهها جيدًا مع انعكاس ضوء الشمس عليه، فظهر له غطاء الرأس وجزء من مما تريديه في الأعلى من
جلباب بيتي، تابعت بندائها إليه حتى يكف عن تحديقه بها من محله:
-ادخل بدل وقفتك دي وانت تشوفني كويس.
كلماتها زادت من حرجه، تحمحم ليرد وهو يخطو إلى داخل الغرفة نحوها:
- معلش انا اسف، بس دي اول مرة ادخلك يعني و...
قطع كلماته فور أن
توقف أمامها وظهر له وجهها بصورة أوضح، فانقبض قلبه وابتلع ريقه بصعوبة، لا يصدق ما يراه أمامه
، فقد كانت المرأة صورة طبق الأصل من ابنتها، فتذكر قول كاميليا قبل ذلك عن الشبه الكبير بينهم، ولكن
هذه المرأة هيئتها خالفت كل توقاعته، فهي بالفعل تُشبهها، ولكن كنسخة باهتة، شاحبة بشدة، نحيفة، مريضة!
-إيه مش هتسلم عليا؟
قالتها لتُخرجه من شروده، فاقترب على الفور يصافحها مع قوله:
- للمرة التانية انا بعتذر، اَسف بجد.
بادلته المصافحة تقول مبتسمة:
-يا سيدي انا عايزاك تقعد، وكفاية بقى اعتذرات .
اومأ صاغرًا على مطلبها فتناول المقعد خلفه ليُقربه منها، ثم جلس أمامها، ليقول بتوتر:
-أنا بتأسفلك للمرة الألف على اسلوبي معاكي دلوقتي، وطريقة ردودي الناشفة
دايمًا في التليفون، بس انا عايزك تعذريني، كاميليا ولا مرة لمحت لي عن مكانك هنا .
ردت بابتسامة تطابقت مع بهتان وجهها الذابل:
-وكنت عايزها تلمحلك ازاي؟ ولا تقولهالك بشكل مباشر كدة، إن والدتها
اللي سابت جوزها وولادها بطفلها اللي عمره سنة، وراحت بأنانية اتجوزت الراجل اللي كان حلم
عمرها وهي صغيرة، وبعد ما عاشت معاه في الدلع وافتكرت ان الدنيا ضحكت لها، جالها ال.....
توقفت متنهدة بقوة قبل أن تكمل:
-المرض اللعين، عشان ياخد منها جمالها اللي كانت فرحانة بيه، وتشوف
بقى جزاءها من الراجل اللي ضحت بالدنيا كلها عشانه،
ويضحى هو بيها ويرميها مع اول امتحان، ومايبقاش ليها لازمة معاه.