رواية غلطة كلفتني الكثير
سلمى مسرعة: مينفعش طبعا اصل مقولتش لماما انى هخرج معاك
حسام: طب وفيها ايه يا بنتى هو انتى لسه عيلة صغيرة عشان تاخدى الاذن وبعدين متقلقيش هرجعك فى وقت ما الدرس يخلص يعنى محدش هياخد باله ولا انتى مش حابة تخرجى معايا؟
سلمى: لا طبعا خلاص ماشى بس هنروح فين؟
حسام: نروح نتغدى الاول اصل واقع من الجوع
عدى اليوم وكان اسعد يوم فى حياتى كلها مكنتش مصدقة انى معاه وجنبه وبعد ما خلصنا خروجتنا وصلنى بعيد عن البيت بحاجة بسيطة
حسام: الوقت عدى بسرعة تصدقى محستش بنفسى وانا معاكى! بقولك ايه اعطينى رقمك
سلمى: بس انا مش معايا فون
حسام: ليه كده؟!
سلمى: عادى ماما وعدتنى هتجيبلى واحد لما اجى ادخل الكلية يعنى عشان ميشغلنيش عن المذاكرة
طلع حسام فونه من جيبه وكان ايفون لقيته خرج شريحته وقالى: خودى ده خليه معاكى
سلمى باستغراب: ايه ده اعمل ايه بيه؟!
حسام: هيكون من النهاردة بتاعك عشان اعرف اتواصل معاكى ع فكرة هو لسه جديد والله لسه شاريه امبارح
سلمى: ايوة بس اي..............
حسام: مبسش ولا حاجة خديه وانا هشترى لنفسى واحد مش انتى معاكى شريحة ولا لا
سلمى: ايوة
حسام: شغليها بقى وانا كتبتلك رقمى عندك عليه
نزلت وانا طايرة من الفرحة ولما طلعت لقيت ماما مستنيانى ... وجدان: ها عملتى ايه يا سلمى؟! كلمتيه؟!
حكيت لها كل حاجة ووريتها الفون لمعت عيونها بفرحة وقالت: هى دى بنت بطنى بصحيح شوفى بقى انا مش عايزاكى تتطيريه من ايدك اعملى اى حاجة فى الدنيا بس متضيعيش الفرصة دى منك
عدى شهر وانا وحسام دايما بنتقابل فسح وخروجات وهدايا
وكمان اى حاجة بتكون ناقصانى كان بيجبها ليا وفى يوم كنا قاعدين فى كافيه لقيته بيقولى: سلمى انا بحبك اوى
سلمى بفرحة ممزوجة بخجل: ايه؟ انت قولت ايه؟!
مسك ايدى وقعد فى الكرسى اللى جنبى: بقول انى بحبك معرفش ازاى
وفى وقت قصير كده بس انا اتعلقت بيكى جدا وكان لازم اخرج اللى فى قلبى ها وانتى بقى بتحبيني؟!
بصيتله بخجل ونزلت راسى بالارض رفع راسى بايده وقالى: نفسى اسمعها منك مرة واحدة وانتى باصة فى عيونى
سلمى: ايوة بحبك يا حسام ومش من دلوقتى من زمان اوى من واحنا صغيرين وانت فتى احلامى
حسام: ايوة بقى طب ومخبية ليه عنى ده كله حرام عليكى طب حيث كده بقى احنا لازم نتجوز وبسرعة
سلمى وعينها بتلمع من الفرحة: ايه نتجوز؟
حسام: ايوة طبعا هو مش احنا بنحب بعض يبقى لازم نتجوز
سلمى: ايوة بس انا لسه فى تالتة ثانوى وانت فى تانية جامعة هى طنط الهام ممكن توافق او بابا ممكن يوافق!
حسام: طب واهلنا مالهم ومال الموضوع ده
سلمى بعدم فهم: ازاى يعنى اومال مين اللى ليه؟!
حسام: حبيبتى دى حياتنا احنا واحنا اللى هنحددها مش هما
سلمى: ايوة بس ازاى يعنى من غير موافقتهم ولنفترض ان طنط
وافقت وبابا لا هنتجوز ازاى وانا لسه عندى 17 سنة
حسام: يا بنتى محدش من اهلنا هيعرف بموضوع جوازنا
سلمى باستغراب: يعنى ايه؟
حسام: احنا هنتجوز عرفى
سلمى بصدمة: ايييييييييه؟!