رواية قضية خلع
الفصل السادس والسابع
بقلم عمرو راشد
نادية انتي.. ، انتي طالق
= بعد ايه ، بعد ما كسرتني ، تخيل ان جوزي هو اللي يكسرني ، يا ترى لسة فاكر انك جوزي ولا انت كنت بتقضي وقت معايا وخلاص
يا نادية انا عارف اني غلطان بس بلاش تبقا دي النهاية ، الأكيد ان خلاص كل واحد هيروح لحاله بس على الاقل سامحيني
" صرخت في وشه
اسامحك!! ، اسامحك على ايه ولا ايه ، انا مش عارفة اسامحك على ايه بالظبط ، على اهانتك ونظرتك المخيفة ليا دايما ، ايوا انا بخاف منك ، والله بخاف وانت بتبصلي ، بحسك بتاكلني بعنيك ، انت اخطر عليا من اللي بيكونو في الشارع
" دموعي خانتني ونزلت
انت متخيل اني المفروض لما اخاف اجري عليك واستخبى لكن انا ممكن اجري على اي حد استنجد بيه الا انت ، انا بس عايزة اعرف انت ليه عملت فيا كدا يعني قولي انا عملتلك ايه وحش ، قولي يمكن انا غلطانة ، دا انا... ، انا كنت بدور ازاي اعرف اخليك مبسوط ، بس انت أكتر حاجة بتبسطك هي.. ، هي انك تنام معايا ، على فكرة انا مش معترضة ، دا حقك ، بس انت بتعمل كدا معايا كأني واحدة من الشارع
" مبقتش عارفة اسيطر على نفسي ، مش عارفة اتكلم من كتر العياط
وحتى لما بقولك لا ، انت برضو بتعمل كدا غصب ، فاهم يعني ايه غصب ، دا غير ادمانك الغير مبرر للحاجات اللي انت بتشوفها ، بتشوفها ليه ، هو انا مكنتش مكفياك طيب ، يعني انا مثلا كنت مهملة في نفسي ، وحتى انت بتشوفها وبتقولي تعالي اتفرجي معايا ، اتفرج على ايه وائل ، اتفرج على ايه ، انت مش عارف انه حرام ، ازاي تقولي كدا وازاي جالك قلب تعمل اللي انت عملته في بيت اهلي دا ، ليه يا وائل ليه
" بدأت أصرخ فيه ، حسام قرب مني وبدأ يهدي فيا ، وفورا الدكتور دخل الأوضة وطلب من وائل و حسام يخرجو برا ، الممرضة جت وحاولو يرجعوني للسرير عشان يدوني حقنة مهدأ وبالفعل بعد دقايق انا مكنتش حاسة و رجعت نمت تاني... ، مكنتش عارفة نمت قد ايه لكن لما فوقت لقيت حسام قاعد جنبي ، ندهت عليه بصوت هادي جدا لاني مكنتش قادرة اتكلم
حسام
" فتح عينه بسرعة و قام وهو مخضوض
أنتي كويسة ، في حاجة بتوجعك؟
= انا.. ، انا كويسة
محتاجة حاجة طيب ، شكلك جعانة ، انا هكلمهم يجيبو الاكل حالا
= حسام انا مش عايزة ااكل
طب عايزة ايه وانا اجيبه
= هو راح فين
نادية الموضوع دا خلص ومش هنفتحه تاني ، متجبيش سيرته لو سمحتي ، هو مشي خالص
= خايفة يرجع تاني
لو رجع هيتحبس ، المرادي مش هسيبه غير وهو في السجن
= حسام انا عايزة اخرج من هنا
مينفعش يا نادية ، انتي لسة تعبانة
= هبقا كويسة بس عايزة اخرج عشان خاطري
عشان خاطري انا خليكي هنا ، على الاقل انا هنا مطمن عليكي شوية
طب لحد امتا
= يعني يومين
" بس ثواني هو انا هخرج اروح فين ، هو انا ليا مكان تاني ، مفيش غير بيت اهلي وأنا مستحيل ارجع هناك تاني ، بس كدا انا هقعد في الشارع ، هروح فين ، اول حاجة اكيد جات في بالي هما صحابي ، بس للاسف انا مليش صحاب ، انا مليش حد اساسا ، صعبان عليا نفسي اوي وانا مليش حد الجأله ، معنديش غير حل واحد ، انا تقريبا معايا في البيت 5000 جنيه ، هاخد شقة ايجار و احاول الاقي شغل واعيش لوحدي بعيد عن اي حد لكن المهم اني اخرج الاول من هنا ، عدا الوقت و قعدت بالظبط 5 أيام في المستشفى ، حسام مسبنيش تقريبا ولا لحظة ، كل يوم كان معايا ، واخد باله من اكلي ومن مواعيد العلاج ، متابع حالتي كويس مع الدكتور عشان يطمن في تحسن ولا لا ، بيعمل كل حاجة تقريبا ، تعرفو انا اول مرة حد يعمل معايا كدا ، اكيد اهلي كانو بيعملو كدا لما بتعب ولكن مش بنفس الاهتمام دا حتى وائل ، لما كنت بتعب كان بيديني فلوس و اروح اكشف لوحدي وحتى لما برجع بينسى يسأل أنا عملت ايه هناك ، محدش عمره افتكرني غير حسام اللي يدوبك عارفاه بقالي أسبوع او 10 ايام ، بس وأخيرا انا خرجت من المستشفى ، ركبنا العربية
بصي يا نادية ، انتي ممكن تقعدي في شقتي مؤقتا وانا هرجع شقتي القديمة ، ايه رأيك
= لا طبعا انا مش موافقة ، انا خدت قرار ، انا هأجر شقة واعيش فيها وهدور على شغل واشتغل واصرف على نفسي
طب هقولك ، انتي حاليا لسة في مرحلة الشفاء ، تعالي عندي لحد ما الاقيلك شقة كويسة
= برضو لا ، احنا ندور من دلوقتي
انتي خايفة مني يا نادية ولا ايه ، متقلقيش انتي هتكوني براحتك فيها وانا هرجع الشقة التانية
= يا حسام افهمني انا مش عايزة اكون تقيلة اكتر من كدا ، انت عملت اللي عليك و زيادة ومتقلقش الاتعاب بتاعتك هتاخدها بس لما اشتغل ف معلش ممكن تصبر شوية
" ضحك وقال
اتعاب ايه ، هو انا عملت حاجة ، انا يدوبك رفعت دعوة ، و بعدين هو اللي طلقك يعني احنا هنتنازل عن القضية ، ولو في اي مصاريف اعتبريها اتدفعت أما دلوقتي عشان خاطري اسمعي كلامي وتعالي معايا
= طب هو انا ممكن اسألك سؤال
اتفضلي طبعا
= هو مقالش حاجة تانية
مين
= وائل
هيقول ايه يعني
= اخر حاجة فاكراها انه خرج من الأوضة بعد ما طلقني ، مقالش حاجة ساعتها؟
لا ميقدرش يقول عشان أنا حذرته
= طب عملت ايه
فلاش باك
" خرجنا من الأوضة بعد ما الدكتور طلب مننا ، هو كان باصص في الارض وباين عليه انه مش عارف يتصرف أو محتار يمشي ولا يستنا بس قررت ابدأ انا معاه
بقولك ايه ياالا
" رفع وشه و بص ليا
مشوفش وشك تاني في اي مكان ، فاهم ولا لا ، لإني لو شوفتك هحبسك
= انا هبعد خالص ومش هتشوفوني تاني
متقدرش تعمل غير كدا ، وقبل ما دماغك الوس*خة دي تفكر تعمل حاجة ، افتكر انت واقف قدام مين وخلي الاسم في دماغك ، حسام الهواري اياك تنساه لانك لو نسيته دماغك هتشتغل وساعتها محدش يعرف مصيرك هيبقا مصيرك ايه ، يلا امشي
" لكن فضل واقف باصصلي ، زعقت وقولتله
غوور
" وفعلا مشي ، بس حبيت احذره لاخر مرة
اياك تنساه هاااا
بااك
طب انا دلوقتي عايزة اروح البيت الم هدومي وحاجتي كلها
= يلا حالا نروح
بقلم عمرو راشد
" مشينا بالعربية ، طول الطريق بفكر هقابل وائل ازاي ، هل هتكلم معاه ولا ادخل الم حاجتي من غير كلام ولا اعمل ايه ، لكن وصلنا
انا خايفة اطلع
= ليه
خايفة يعمل فيا حاجة
= خلاص انا هطلع معاكي
لا بلاش عشان متتخانقش معاه تاني
= يلا يا نادية انزلي عشان اطلع معاكي
" بالفعل نزلت و دخلت العمارة ، طالعة على السلم وانا بقدم رجل وبأخر التانية لحد ما وصلت للشقة خبطت على باب الشقة ، دقايق والباب اتفتح ، و اول ما شافني ، أبتسم وقال
نادية ، انا كنت عارف انك هترجعي ، انتي عارفة اني بحبك برضو
" بصتله ومردتش عليه لان حسام ظهر من ورايا و هو اللي رد عليه
ترجع فين يا حبيبي ، نادية جاية تاخد حاجتها وهتمشي ، يلا يا نادية ادخلي وانا هستناكي هنا
" دخلت وهو واقف ومتابعني ، مشيت بسرعة لحد ما دخلت الأوضة ، بس سمعتهم من برا
طب اتفضل ادخل اقعد
= لا معلش اخاف على هدومي تتوسخ وأنا هدومي غالية أوي
" خوفت وبدأت الم حاجتي بسرعة عشان اخرج ونمشي من هنا ، حاولت الم اللي أقدر عليه و خرجت
جبتي حاجتك كلها
= اه
طب يلا
" كنت لسة هنزل لكن صوته خلاني اقف
لو احتاجتي حاجة يا نادية ابقي كلميني
" حسام كان نازل قدامي بالشنطة لكن سابها وطلع فوق
تكلمك ليه ، هي بقت تقربلك؟
= على فكرة انا بكلمها هي
" في اللحظة دي حسام صوته كان عالي جدا
بتقول ايه يالاا ، عايز اسمع ، سمعني كدا وعيد اللي انت قولته
" وائل كان ساكت و مردش عليه ، حسام بص ليا
انزلي استنيني تحت
" محبتش اعترض وهو متعصب ، نزلت من الدور اللي كنا فيه ووقفت عشان كنت خايفة يتخانق معاه تاني
لو كنت راجل وعيدت كلامك ، كنت على الاقل هقتنع انك راجل لكن انا نظرتي عمرها ما فشلت ، سلام
" نزلت بسرعة على تحت وحسام جه ورايا ، ركبنا العربية ومشينا روحنا على بيته ، طول الطريق متكلمناش لإني كنت خايفة اتكلم وهو عصبي كدا فقررت اسكت لحد ما وصلنا ، دخلنا الشقة ، كانت حلوة أوي و ذوقها تحفة
انت اللي مختار كل حاجة في الشقة
= اه تقريبا
ذوقك حلو على فكرة
= العيون الحلوة مبتشوفش غير الحلو
" ابتسمت وسكت معرفتش ارد
بصي بقا ، دي شقتك اقعدي فيها براحتك ، وأنا كل يوم هااجي اطمن عليكي او بلاش كل يوم عشان متحسيش اني بستغل الموقف يعني ، نخليها كل اسبوع
= لا عادي دي شقتك ، تيجي في اي وقت
لا من النهاردة بقت بتاعتك أنتي
= شكرا بجد يا حسام
انا معملتش حاجة ، عموما انا همشي ولو احتاجتي اي حاجة متكلمنيش
= ايه!
" ضحك وقال
بهزر ، كلميني في اي وقت ، يلا باي
" مشي وانا دخلت خدت دش ، كنت محتاجة افوق شوية ، غيرت هدومي وبما اني لوحدي ف لبست حاجة خفيفة ، اتمشيت شوية في الشقة ، عاجبني اوي الديكور بتاعها ، كل حاجة حلوة فيها ، ضحكت وقولت وهو اللي زي حسام يعني هيجيب شقة وحشة برضو ، كنت محتاجة انام جدا ، عايزة أستريح ، دخلت انام في الأوضة بتاعته ، كل حاجة مترتبة فيها ، كل حاجة منظمة بطريقة تخنق فعلا ، شخص غريب جدا ، كل حاجة فيه غريبة
بس لذيذ ، نمت ، قلقت في نص الليل ، كانت الساعة 12 ، كنت لسة هقوم من السرير بس سمعت صوت برا في الصالة ، باب الأوضة اتفتح ، نور الأوضة كان مطفي لكن النور اللي كان في الصالة خلاني شايفة ، صرخت لما شوفته
وائل
" ضحك بطريقة هستيرية
هتهربي مني فين يا نادية ، هو انا معقول هسيبك برضو ، هو الجسم دا يتساب؟ ، وكمان ايه دا ، ايه اللي أنتي لابساه دا ، دا واضح ان ليلتنا عسل أوي!!
رواية قضية خلع
الفصل السابع7
بقلم عمرو راشد
هتهربي مني فين يا نادية ، هو انا معقول هسيبك برضو
= ابعد عني يا وائل ، ابعد عني بدل ما اصو*ت و الناس كلها تسمعك
هو انا مجنون عشان اسيب الجس*م دا ؟
= بقولك متقربش مني ، انت طلقتني خلاص
" حاولت اغ*طي نفسي باللحاف اللي كان موجود
وكمان ايه دا ، ايه اللي أنتي لا*بساه دا ، دا واضح ان ليلتنا عسل أوي يا ندود
" كان باصص عليا بطريقة قذرة اوي كأنه عمره ما شاف واحدة ، اتحركت من على السر*ير وقومت بسرعة
انا بقالي كام يوم محروم وقاعد لوحدي ، يرضيكي هاا اكيد ميرضيكيش
" بيقرب مني وانا بحاول ابعد لحد ما لز*قت في الحيطة
و اظن انك مش هتما*نعي ان جوزك حبيبك يتبسط شوية
" صرخت بأعلى صوت ، قعدت أصرخ كتير أوي ، جاتلي هيسترية من كتر الخوف ، غمضت عيني وحسيت اني هقع ، قعدت على الارض وانا ضا*مة* نفسي ، لكن في وسط كل دا انا سمعت صوت غير صوت وائل ، دا صوت حسام ، فتحت عيني و بصيت عليه وفعلا هو اللي كان واقف قدامي ، لقيته بص في الأرض
انا اسف اني دخلت بس انتي كنتي بتصرخي ف انا كان لازم ادخل ، انا اسف ، هستناكي برا
" خرج وقفل الباب ، هو انا كنت بحلم ولا دا ايه انا مش فاهمة حاجة ، الأوضة زي ما هي مفيش حاجة ، بدون ما ادخل في متاهة معرفش هتوصلني لفين ، غيرت هد*ومي ولبست لاني طبعا كان لبسي
خ ف ي ف جدا وعشان كدا حسام اتحرج و خرج برا ، خرجت لقيته بيروح يمين وشمال مش واقف ثابت واول ما شافني
نادية انتي كويسة
= اه كويسة بس هو انت جيت ازاي ولا ازاي دخلت الشقة و ازاي افتح عيني الاقيك انت اللي معايا في الأ*وضة
نعم! ، ليه هو كان في حد تاني؟
= مش قصدي ، انت مش هتفهمني يا حسام
لا فهميني معلش ، هو انتي كان معاكي حد في الأ*وضة
= لا ، بس تقريبا كنت بحلم أو بتخيل معرفش عشان كدا عايزاك تحكيلي ايه اللي حصل
بصي اول ما سيبتك الصبح مقدرتش امشي و اسيبك عشان عارف انك اكيد هتبقي خايفة ومتوترة و احتمال تحتاجي حاجة ، استنيت تحت في العربية وفضلت قاعد فيها بالعكس دا انا نمت شوية كمان بس لما صحيت كنت زهقت بس مينفعش امشي عشان كنت حاطط احتمالات لكل حاجة ، فكرت اني ممكن اطلع و لو لقيتك صاحية ننزل نتمشى شوية وبالمرة تغيري جو ، طبعا كنت نسيت وانا اسف يعني ، انا كان معايا نسخة تانية من مفتاح الشقة بس والله نسيت انها معايا اصلا ، فتحت الباب و دخلت ، خبطت على باب الأوضة وفعلا حسيت بحركة جوا وقولت انك كدا اكيد صاحية ، ندهت عليكي عشان متتخضيش
فلاش باك
نادية ، انا حسام متقلقيش ، انا اسف كان معايا نسخة و دخلت ، ممكن تخرجي نتكلم شوية
" بس مكنش في رد او تحديدا انتي مش بتردي عليا ، انتي بتردي على حد وبتقولي كلام غريب
• وائل لو سمحت ابعد عني بدل
ما اص*وت
• بقولك متقر*بش مني
" وفجأة لقيتك بتص*رخي ف طبعا كان لازم ادخل و الحقك
بااك
انا كدا فهمت ، جايز لما انت خبطت عليا انا افتكرت انك وائل وطبعا عقلي كمل اكتر واتخيلت ان وائل معايا في الأ*وضة
= انسي وائل يا نادية ، الشخص دا انتي لازم تنسيه وتخرجيه برا حياتك كلها
مش بالسهولة دي يا حسام.. انا
= انا عارف انك تعبتي معاه بس خلاص هو مشي ومش هيرجع تاني ، اكيد مش هتفضلي عاملة في نفسك كدا
" اتنهدت وكملت
انا أعصابي تعبانة ، مجرد التخيل ان في حد بيخبط عليا باب الأ*وضة ف علطول مخي افتكر اللي وائل كان بيعمله ، حرفيا عمره ما استأذن انه يدخل ، كان بيخبط ولما اقوله استنا انا بغير هد*ومي كان بيدخل برضو وعن قصد والله و كان اول ما يدخل ويشو*فني
فلاش باك
لا بس احلو*ينا وج*سمنا بقا مد*ور وعسل
= وائل على فكرة انا قولتلك استنا عشان بغير هد*ومي
وهو انا حد غريب يا حبيبة قلب وائل ، دا انا جوزك وبعدين ليا حق اشو*فك
= وانا المفروض يكون عندي خصوصية
انا بصر*احة مبقدرش اقاوم يا نادية ، مبقدرش اقاوم اي لحظة ممكن ابقا قريب من*ك فيها
= طب لو سمحت اطلع برا عشان اكمل لب*س
" ضحك بطريقة مستفزة
ما انا خلاص شوفت بقت ، غيري براحتك وانا قاعد اهو ، وابقي فكريني اديكي فلوس تجيبلنا كام حاجة حلوة كدا
= مش فاهمة حاجة حلوة زي ايه ، عايز بسبوسة يعني
بسبوسة برضو وانتي معايا يا قشطة انتي
= امال عايز ايه
ما تفهميها انتي يا نادية ، هاتي زي أي ست بتجيب
= على فكرة الستات بتجيب حاولت كتير
خلاص هوضحها أكتر
= هاتي زي أي ست بتجيب ل جوزها
وهما بيجيبو ايه
" ساعتها اتعصب وصو*ته كان عالي
هاتي قم*صان نو*م يا نادية ، بقالي كتير مشوفتش حاجة جديدة عليكي
= لا ، لا انا مبحبش الحاجات دي
ملكيش دعوة ، انا بحبهم عليكي ولو عايزة فلوس هديكي المهم تبقي قشطة يا قشطة
بااك
متخيل بقا ، متخيل ان بعد كل المواقف دي هكمل حياتي عادي
= صعب وانا عارف بس نحاول مش هنخسر حاجة
مانا بحاول يا حسام ، انا مش عايزة ابقا كدا
= وانا معاكي وهساعدك ، و اول خطوات العلاج تعالي هننزل دلوقتي
دلوقتي! ، انت عارف الساعة كام
= عارف بس انا زهقان وفي نفس الوقت مش عايز اسيبك لوحدك
هنروح فين دلوقتي دا الساعة 1 بليل
= انا مبعرفش اخرج غير دلوقتي أصلا وبعدين دا مش بعيد ، دا على اول الشارع
وهيكون ايه اللي موجود على اول الشارع
= بيتزا الحسيني
مين
= هنطلب اتنين فطيرة سجق
اضافة كيري صح
= وهنحلي من عنده برضو ، بيعمل كريم كراميل اوووف بجد مش ممكن
شو*قتني ، ايه دا هو حلو أوي كدا
= اقسم بالله ما يتاكل ، بس هناكله عشان مفيش محلات فاتحة دلوقتي نحلي من عندها ، الساعة 1 بليل يا هانم واخدة بالك أنتي هتخلينا ننزل امتا
بس انا مطلبتش ننزل ، والله ما طلبت
" بدأ يضحك بشكل هستيري
= انا نفسي اعرف أنتي بتاخدي كل حاجة جد ليه ، انتي مبتعرفيش تهزري؟
اصل انت شكلك ميقولش انك بتعرف تهزر
= ليه هو في أكتر من كدا ، دا انا بقولك انا بنفسي هعزمك وهتاكلي معايا على ترابيزة واحدة كمان ، يلا افرحي بقا
ليه هو انت مين حضرتك عشان الغرور دا كله
= حسام الهواري محامي ، اهلا وسهلا
" ضحكت من طريقته
بس كدا هو دا اللي انا عايزه انك تضحكي ، يلا انا هستناكي في العربية
" مشي وفتح باب الشقة وكان لسة هيخرج لكن رجع ونده عليا وقال
نادية ، المفتاح التاني اللي كان معايا ، اهو عندك
" لقيته حطه على ترابيزة السفرة
مرة تانية انا اسف اني دخلت عليكي ، انا هستنا*كي تحت متتأخريش
" قفل الباب ونزل ، هو انت ايه حكايتك يا حسام ، هو في حد بيعمل كل دا من غير مقابل ، يا ترى عايز مني ايه ، خايفة اتخدع فيك ، طب خلينا منسبقش الأحداث واعيش ولو ساعة واحدة من غير نكد ، لب*ست ونزلت ركبت العربية ، لقيته بيلم حاجته وبيقولي
يلا انزلي
" استغربت جدا ، هو غير رأيه ولا ايه
انزل فين
= افتحي باب العربية و انزلي يا نادية في ايه
" قولتها بخوف
هو انت غيرت رأيك
= لا هغير رأيي ليه
امال انزل ليه
= المحل على اول الشارع يا نادية ، هنركب العربية ليه هو احنا عندنا روماتيزم
ماهو انت اللي قولتلي انا هستنا*كي في االعربية
= ايوا انا قولت هستنا*كي في العربية عشان مينفعش انا اقف في الشارع لكن مقولتش هنروح بالعربية
فرقت يعني
= والله تفرق من سنة ل 3 سنين سجن
" اتصدمت و حطيت ايدي على بوقي
يا نهار اسود ، سجن ليه هو انت خبطت حد بالعربية
= هتقتنعي لو قولتلك بهزر ، مش هتقتنعي صح ، طبعا مش هتقتنعي ، كنتي اقتنعتي المليون مرة اللي فاتو ، انزلي يا نادية
" ابتسمت وسكت ثانيتين ورجعت اتكلم بهدوء
طب ممكن تفهمني كان قصدك ايه
= يعني اني محامي و الكلام مهم جدا عندنا ، ف لازم نبقا واخدين بالنا احنا قولنا ايه ، يعني مثلا انا قولت اني هستنا*كي في العربية لكن مقولتش هنروح هناك بالعربية ، اختلاف المعنى دا ممكن يدخلني الس*جن و دا مثلا يعني
" كنت ساكتة ومبنطقش لأني واضح اني مش فاهمة وواضح برضو انه اخد باله
انزلي يا نادية ، بتاع البيتزا هيقفل
" نزلنا و اتمشينا
الجو حلو أوي
= انتي عمرك ما نزلتي في وقت زي دا
خالص ، اصل هنزل امتا
= معاه مثلا
قصدك وائل ، لا دا الليل بتاعه ثابت مبيعملش غير حاجة واحدة بس فيه
= غريبة أوي الناس اللي متعرفش تستفاد من وقت زي دا ، الوقت دا حرفيا ينفع تعملي فيه كل حاجة بس حاجات مفيدة طبعا ، يعني تقومي تصلي مثلا بعيد عن زحمة اليوم و دوشة الدنيا ، الصلاه في وقت زي دا ليها احساس تاني خالص ، بتحسي نفسك طايرة في السما ، مبسوطة من نفسك ، وينفع تذاكري ، ينفع نتمشى زي ما احنا بنعمل كدا وبنتكلم ومفيش حد ماشي في الشارع ولا باصص علينا ، الأوقات دي كنز ولكن.. احنا مخلوقين بنظام حياه معين ، ننام بليل ونقوم بالنهار نعمل كل حاجة وممكن نختلس كام ساعة من الليل نعمل فيهم اللي معرفناش نعمله بالنهار ، مش عارف حاسس نفسي رغاي شوية
لا خالص ، كلامك حلو
= اصل انا فين وفين لما تلاقيني بتكلم كتير ، نادرا لما اتكلم بسبب اني عايش لوحدي و ابويا و امي مسافرين اما صحابي قليل لما نقعد مع بعض بسبب ان كل واحد مشغول في حياته
مفكرتش تتجوز؟
= لا ، اصل هتجوز ليه ، واحد زيي وبيشتغل الشغلانة دي مينفعش انه يتجوز لإني لو اتجوزت هبقا خايف ، تخيلي بقا لما اخلف ، والرجالة عندنا حساسة شوية ومجرد ما يعرف انه مرفوع عليه قضية خلع يجري يدور على اسم المحامي وعنوانه عشان يعمل معاه زي وائل كان عايز يعمل ، ف ايه بقا اللي يجبرني اني اتجوز
ومش خايف ان عمرك يعدي وانت لوحدك
= على الأقل انا اللي مختار اكون لوحدي
يعني ايه
= يعني دي بإختياري مش مفروضة عليا ، تخيلي مثلا حبيت و اتجوزت و حد جه وهد حياتي كلها هتبقا الوحدة اتفرضت عليا وساعتها هيكون اصعب
ليه بتتخيل الأسوأ
= عشان دا اللي بيحصل ، في مقولة بتقول " لا تتخيل الأسوأ ولكن تخيل الأسوأ منه لانه غالبا يحدث " يعني انا كدا متفائل شوية
غلط يا حسام ، انت بتفكر غلط مش معنى ان مهنتك صعبة شوية انك تح*بس نفسك وتضيع عمرك ، انت متخلقتش عشان الشغل بس ، بالعكس انت ممكن تعمل أسرة و تعيش حياتك زي اي بني آدم طبيعي
= صدقيني انا اتعودت على كدا و .. ايه دا فين المطعم
" بصيت حواليا
هو احنا لسة موصلناش ولا ايه
= احنا خطوتين كمان وهنبقا على حدود الخرطوم ، يلا نرجع بسرعة
" ضحكنا ، طول الطريق بنضحك حتى من غير ما نتكلم ، هو لمجرد اننا بنفتكر الموقف
شوفتي هو دا اللي باخده لما بتكلم
= بس بتعرف تهرب
محامي بقا
= بجد يا حسام انت لازم تعيش حياتك وتشيل الافكار دي من دماغك خالص ، جرب بس
هحاول ، يلا احنا وصلنا
" طلبنا الاكل وقعدنا ناكل الاختراع الغريب بتاعه بس هو حلو بصراحة ، حلو أوي يعني ، خلصنا وطلبنا الكريم كراميل وطبعا كان عنده حق هو ميتاكلش فعلا ، بصتله وضحكت
ياريت تقوله يا حسام يركز في البيتزا بس
= حذرته كتير والله
" مكنتش قادرة اسيطر على نفسي من الضحك ، خرجنا واتمشينا لحد البيت
شكرا يا حسام ، بجد انا كنت محتاجة اغير جو
= انا اللي كنت محتاج اتكلم و ابعد شوية عن جو المكتب والمحاكم
انا موجودة اهو لو احتاجت تتكلم في اي وقت
= شكرا ، يلا اطلعي ولو احاجتي حاجة كلميني
حاضر
= تصبحي على خير
" دخلت الشقة وانا فرحانة أوي ، بقالي زمان مخرجتش واتمشيت لا وكمان بناكل برا وبنهزر ، مش هبالغ لو قولت اجمل ساعتين في حياتي ، اخيرا عرفت افرح ولو شوية صغيرين ، غيرت هد*ومي و دخلت انام بسرعة عشان دا يبقا اخر حاجة في يومي ، وفعلا نمت ، صحيت تاني يوم على صوت التليفون وهو بيرن ، قومت من النوم وبصيت في الساعة كانت 2 الضهر ، رديت
كل دا نوم ، دي المرة العشرين اللي بكلمك فيها
= معلش محستش خالص
طب أولا صباح الخير
= صباح النور
فوقي كدا معايا ، انا خلاص اتنازلت عن القضية ، يعني خلاص احنا كدا خلصنا من الكابوس دا
= شكرا يا حسام
شكرا ايه بس ، قومي اغسلي شك و افطري يلا
= حاضر
هكلمك كمان شوية
" كلمني كمان شوية وبعدها وبعدها ، كتير ، كل يوم بيكلمني تقريبا ، بيطمن عليا ، كل يومين بلاقيه بيخبط وجايب حاجات للبيت ، سواء اكل أو فاكهة او حلويات ، بيحاول يهون عليا بكل الطرق ، انا كمان حاسة انه بقا جزء من حياتي ، حاجة أساسية مينفعش اليوم يعدي من غير ما هو يكون موجود فيه ، بقالي شهر وأنا في الحال دا ، بحاول انسا واعيش حياتي دا غير اني خلاص هبدأ شغل جديد عند واحد صاحب حسام ، كل حاجة هتبدأ تتغير لكن هل الماضي هيسيبني ، اكيد لا ، الماضي بيفضل يطاردك دايما زي ما حصل معايا لما لقيت وائل بيكلمني ، بس مردتش عليه ، رن كتير اوي لحد ما زهقت وقررت ارد
عايز ايه
= مش عايزة تردي عليا يا نادية
عايز ايه يا وائل ، ياريت تقول بسرعة
= هانت عليكي العشرة تسبيني كدا
لو سمحت انا مش عايزة اتكلم في اللي فات
= انا عايز ، انا لسة بحبك يا نادية ومش عارف اعيش من غيرك ، ممكن بس تيجي ونتكلم
ااجي فين
= شقتك
لا دي مبقتش شقتي ولا ليا علاقة بيها
= دي هتفضل شقتك يا نادية ، عشان خاطري افتكري اي حاجة حلوة انا عملتها وتعالي نتكلم
" تتوقعو ايه ، بالظبط كدا ، انا وافقت وجهزت نفسي ونزلت روحتله لكن كنت طول الطريق خايفة ومينفعش حسام يعرف عشان ميقلبش الدنيا بس بحاول اطمن نفسي لحد ما وصلت ، خبطت على الباب
نادية
" كان مبتسم ، شاورلي اني ادخل ، وقفت في مكاني لدقيقة خايفة
ادخلي يا نادية متخافيش
" دخلت وقعدت
تشربي حاجة؟
= شكرا ، قولي عايز ايه وبسرعة
الكلام مش بيكون كدا يا نادية
= انا مليش كلام معاك اساسا ، بس انا جيت عشان تبقا كل الفرص بتاعتك معايا خلصت
طيب ماشي ، بصي يا نادية أول حاجة انا اسف على اللي انا عملته ممكن اكون اتسرعت بس... ، انا هبقا أسعد إنسان في الدنيا لو خدت فرصة تانية ونرجع نعيش مع بعض زي الاول و اوعدك عمري ما هزعلك و....
" وسط كلامه سمعت صوت واحدة بتنده عليه ، الصوت جاي من جوا
هو انت معاك حد
= ماهو انا كنت هفهمك
" قومت بسرعة من مكاني ، لقيتها جاية عليا ، واحدة لابسة... ، لا دي مش لا*بسة ، باللي هي لبساه دا ف تعتبر مش لا*بسة حاجة ، جات وحض*نته وباسته من خده
اتأخرت عليا أوي يا روحي ، كدا ينفع برضو
" مردش عليها لانه كان مركز معايا ، قام وقف
بصي يا نادية ، دي ريهام مراتي
= مراتك!!
اه مراتي على سنه الله ورسوله
= انا ماشية
" كنت لسة همشي لكن مسكني من ايدي
استني بس انا هفهمك ، انا اتجوزت ريهام عشان اريحك و ارضيكي يعني انا مش هطلب منك اي حاجة من حقو*قي الزو*جية ، أنتي هتكوني موجودة معايا في البيت عشان بحبك ومش عارف اعيش من غيرك اما بالنسبة ل حقو*قي ف انا متجوز ريهام عشان تشيل عنك الدور دا ، ايه رأيك!!