رواية دماء بريئة على الطريق
الفصل الثامن8
بقلم ولاء حامد
أشرق النهار يطوي سواد الليل ولكن لم يطوي سواد النفوس الكل قام من نومه بس على غير العاده كان الكل بيقوم يضحك ووشوش راضيه ونفوس مطمئنه بس انهارده يوم غير عادي وشكل الأيام اللي جايه شايله خبايا ووجع اكتر اتجمع الكل على الطبليه على الفطار بس غابت سمر عن الانظار ومحضرتش الفطار زي عادتها الأيام اللي فاتت
جلال:اومال فين سمر مش هاتفطر ولا ايه يا جماعه
حسن بص لأمه
نعيمه:لاء سمر نايمه سيبها عشان على الضهريه كده هاننزل المحافظه نبداء نجيب في شوارها
قام حسن وأخواته ودخلوا اوضه سمر اللي راقده على السرير صاحيه وأمه نفسها من الخوف ومن اللي جاي
حسن بحنان: سموره مطلعتيش ليه تفطري
سمر بصتله بعيون حمرا زي الجمر من العياطوبصوت مبحوح: ماليش نفس
جلال بمحاوله لاخراجها من حزنها ووجعها: طيب وانا اجيب منين النفس اللي اكل بيها من غير وشك اللي يفتح النفس
سمر بدموع: زي كل يوم فات وانتوا بتاكلوا من غيري زي كل يوم فات ومحدش صدقني زي كل يوم جاي مهبقاش موجوده زب كل يوم اتظلمت فيه عودو نفسكم على عدم وجودي اصلي اتاكدت ان وجودي زي عدمه سد خانه لحد ما ييجي وقتها الكل بص لبعضه بوجع وانسحبوا زي ما دخلو
ونعيمه وقفت جمب الباب حطت ايدها على بوقها تكتم شهقه وجع بس سكتت اصل خلاص الأمر محسوم لا هاتقدر تتكلم ولا هاتقدر تعمل حاجه بيتها اللي عملت المستحيل عشان تحافظ عليه وتعمره هايتخرب بعمله عملتها بسبب بنت اختها وهي دلوقتي اللي بقت بين الف نار ونار بس اللي خلها في ثانيه اتمالكت نفسها انها جوزت بنتها جوازه الكل بيحلف وتحالف بيها وانه كان هايفيدها بإيه العلام اللي بالنسبالها ضياع وقت وخوتت رأس وكلها أيام وتقدر تطلع من تحت ضرس ليلي وانسحبت نعيمه من غير ما حد يشوفها ورجعت مكانها المطبخ طلع الكل وقعدوا على الطبليه مره تانيه بس بصمت تتم يشبه صمت الأموات حتى الأكل الكل بيمثل انه بياكل واللي بياخد لقمه مش قادر يبلعها كأنها متغمسه شوك بيدبح حلوقهم والكل طلع على اشغاله ومر الوقت بين الحريم في تنضيف المطبخ وتجهيز الغداء وقطع الوقت صوت المؤذن بأذان الضهر دخلت نعيمه على سمر
نعيمه بدلع: سموره يا عروسه قومي وفوقي كده عشان تقومي تلبسي
سمر بعيون مورمه وصوت مبحوح بصت لأمها نظره مليانه بكل الوجع والقسوه والظلم اللي حاسه بيهم وعاشتهم وبتعيشهم: ليه
نعيمه وهي بتشيل عينها من عين بنتها الصغيره : عشان ننزل المخافظه مش كان نفسك من زمان تروحي هناك ادينا يا ستي هانروح ومش انهارده بس لا كل يوم لحد ما نجيبلك احلى واغلي وشوار في البلد كلها
سمر بدموع: روحي انتي وهاتي اللي عايزاه واللي على كيفك طول عمري حياتي بتمشي على كيفك حتى علامي حتى جوازي جت على جهازي روحي يا أما الله يسامحك روحي وسيبيني في حالي
نعيمه بشخطه: قومي فزي بقى وجعتي قلبي معاكي
سمر بدموع: أما هو انتي عندك قلب زينا هو صدرك داه فيه قلب بيحس بوجع الناس مش بيدق بس عشان تعيشي
نعيمه بصدمه وعيون جاحظه: ليه كنت مرات ابوكي ولا ضره أمك
سمر بصوت مبحوح: ياريت كنت عرفت سبب كرهك ليا انما للأسف انتي أمي لييه
نعيمه بعدم فهم: ليه يايه يابت
سمر بدموع: ليه اللي عملتيه ليه دانا بنتك متوجعتيش عليا وانا بنضرب وانا مظلومه مصعبتش عليكي وأنا سمعتي بتتمرمغ في الارض
نعيمه بخوف: قصدك إيه يابت وكملت بعلو صوت تطبيق لمثل خدوهم بالصوت ليغلبوكم: وهو كنت انا اللي قولتلك تدوري على حل شعرك احمدي ربك إن ابوكي مدفنكيش مطرحك
سمر بإبتسامه وجع: ياريت والله ياريت كنت هاحط همي تحت جمبي وارتاح قبل ما اعرف ان كل اللي جرالي كان من تحت رأس أمي ومرات اخويا اللي هي بنت خالتي يعني في مقام اختي
نعيمه بقلب قرب يقف من الرعب: بتخرفي تقول ايه يابت
سمر بشرود وكأنها هربت من الدنيا بخيالها: يا ريته كان تخريف ياريت حد قالي كنت كدبت بس انا سمعتك بعدني وانتي بتقولي لحسن سمعت كل حاجه
نعيمه قعدت جارها على السرير وبمسايسه ومحايله: يبقى سمعتي اني مكنتش اعرف اللي عملوه وأنهم خموني وكدبو عليا
سمر على نفس وضعها: ميفرقش مبقاش فارق
نعيمه بتردد: هاتقولي لابوكي
سمر فاقت من شرودها ودموعها على خدها: متخافيش عارفه انك خايفه على نفسك وبيتك وبس يا حاجه مش هاقول عارفه ليه عشان نار الغريب ولا جنتك اصل جنتك يا أما جنه مليانه شوك وسِل بيقطع في الجسم ويحشه حش بس نار الغريب جايز تكون زي نار سيدنا إبراهيم برد وسلام روحي يا حاجه الله يسامحك روحي وافرحي ونقي الشوار الغالي انتي وحريم أولادك الرجاله اللي عرفوا وسكتوا وعطيتها ضهرها وشدت الغطا لحد ما استخبت تحته كله كأنها متكفنه وبيجهزوها للموت
طلعت نعيمه بحال غير الحال لقت حريم أولادها كلهم لابسين
ليلي بمكر :ايه يا خالتي في العروسه كده هنتأخر عايزين ناخد اليوم من أوله داه الموال طويل
نعيمه بوش اصفر وريق ناشف: سمر تعبانه هاننزل احنا
وسابتهم بسرعه ودخلت اوضتها ودقايق وكانت لبست عبايه خروج وطرحتها وخرجت هي وليلي وشروق ونورا وخلت هاجر تقعد مع سمر وتكمل هي تجهيز الأكل والكل اتحرك مر اليوم بطوله ونعيمه الحريم معاها واتعمدت نعيمه تنقي كل ما هو غالي وتروح أعلى وأغلي المحلات وتختار أغلى ما فيها عشان تشرف بنتها ترفع رأسها وراس جوزها وتتباهي وسط حريمزالبلد بجهاز بنتها اللي مجاش ولا هاييجي لحد زيه
ليلي بخنقه من كتر الحاجات اللي اشترتها حماتها لبنتها وهما لسه في أول يوم :ايه يا خالتي خفي شويه احنا لحد دلوقتي جايبين شيى وشويات ودفعين فلوس تجهز عشر عرايس خفي شويه مش كده
نعيمه بتبرقه عنين وايدين متخصره في وصتهاوبصوت سمع اللي حواليها: واخف ليه هي دي اي حد دي سمر بنت مسعود ابو شامه على سن ورمح ومتجوزه عين أعيان البلد جمال ابن علام الشلاواني بجلاله قدره لما تدفعي حاجه من جيبك ولا جيب ابوكي تبقى تقولي خفي انما داه من جيب ابوها وربنا يخلي ابوها وإخواتها الرجاله ويبارك فيهم فهمتي يا بنت اختي ولا نقول كمان
سكتت ليلي على مضض وكملت نعيمه تنقيه وكأنها ولا لسه مشرشحه لبنت اختها ومرات ابنها من دقايق وخلصت ودفعت مبلغ كبير وكأن اليوم انجاز كبير ليهم جابو جزء كويس من شوار سمر
طول الطريق ونعيمه فرحانه بالجهاز المفتخر وتطمن نفسها ان اكيد سمر هاتفرح لما تشوف ان شوارها من أغلى المحلات ومن أغلى كل حاجه جواه وصلوا البيت ونزلت الحريم من العربيه اللي اخظوها مخصوص عان تنقلهم وتنقل الحاجات اللي اشتروها نزلت هي والحريم والليل كان بداء يفرش بساطه الأسود وطلع الرجاله ونزلوا الحاجات ودخلوها البيت
نعيمه قعدت على الكنبه اللي في الصاله وبتحاول تريح ضهرها من الوجع اللي فيه
مسعود :ها يا حاجه طمنيني عملتي إيه
نعيمه بفرحه: كل خير يا حاج جبنا شويه حاجت من الرفايع بس بكره بحبح ايدك شويتين الأسعار بقت مولعه
ليلي بعوجه بوق: لاء وانتي الصادقه يا خالتي انتي اللي روحتي محلات أسعارها مولعه
نعيمه برفعه حاجب: مش قولتلك لما تدفعي من جيبك ولا جيب ابوكي حاجه ابقي قولي داه غالي وداه رخيص كل من خير ابوها يا حبيبتي
سكتت ليلي على مضض وودت وشها النحيه التانيه
مسعود: اومال سمر مارحتش معاكم ولا ايه
نعيمه بتردد: لاء يا حاج سمر تعبانه من عشيه ونامت وقالتلي اجيب مكانها
مسعود: نايمه من إمبارح لحد دلوقتي
هاجر طلعت من المطبخ: والله يا عمي محطت لقمه في جوفها لحد دلوقتي وعنيها من كتر العياط بقت زي البرتقانه ووشها بقى زي قشره الليمونه الصفرا
مسعود بقلق: حاولي تخليها تاكل لقمه تصلب بيها طولها
هاجر بيأس: والله يا عمي ريقي نشف معاها وهي على حالها دمعتها منشفتش من عنيها لما نظرها هايروح من كتر البكا
مسعود بقبضه قلب بس بسرعه ما افتكر اللي حصل من بنته وطلع صوته كأنه جبل تلج : سبيها لما الجوع يقرصها هتاكل بلا دلع بنات ناقصه ربايه تحمد ربنا انه سترها بدل ما كانت فضيحتنا وسيرتنا بقت على كل لسان من اللي ما يسوى قبل اللي يسوى
بص جلال ومصطفي ومحمود وحسن على نعيمه اللي عنيها زاغت في كل مكانوالا ان عنيها تيجي في عنين أولادها اللي بقت على يقين بإنهم عرفوا كل حاجه من حسن
محدش نطق بكلمه والكل انسحب على شقته من سكات
ومر الليل مرور الكرام بس محدش غمضله جفن وكل واحد بحال الاخوه الأربعه من الحسره والكسره على اختهم وظلمها
أما الأم فعنيها جفاها النوم خايفه ان المستور يتكشف وبيتها يتخرب وجوزها لو عرف او شم خبر مش هايرحمها
أما ليلي فطول الليل تتقلب على السرير وكأنه مراجل نار من تغير جوزها اللي هجرها وماني كلامه المبطن بتهديد إيه ومن نار حماتها اللي نازله سلخ فيها زي دبيحه العيد
أما مسعود فالنوم ابعد ما يكون عن عنيه قلبه بيكدب اللي شافه وعقله بيدور على مبرر وما بينهم مش قادر يصدق ان بنته ممكن تعمل كده طيب يسمعها هاتقول إيه داه شافها بعنيه وشاف الجواب في شنطتها وهي بتحطه وقراء المكتوب فيه ياتري هو ظلم بنته بجوازتها ولا مين ظالم ومين مظلوم
أما الجميله الحزينه سمر فطول الليل والدمع رفيق زي مكان ملازم ليها طول ايامها اللي فاتت وطول لياليها الطوال الحسره اللي في قلبها من الكل كل يوم بتكبر ابوها اللي رباها على ايده يصدق فيها الشين وأخواتها اللي عرفوا ظلومتها وسكتوا وأمها واااااه من امها سبب كل اللي جرالها وشاركت فيه بقلب قوي وسؤال واحد بس هو ليه بيحصل فيها كل داه طول عمرها ماشيه جمب الحيط طول عمرها بتخاف حتي من خيالها ليه الظلم بقى سهل وبقى هين على الناس
طلع النهار والعيون مجافيها النوم
نعيمه قامت مع باقي الحريم وجهزت الفطار واتجمع الكل بياكل بنفس الصمت اللي قطعه صوت مسعود بغلظه وكان شخصين جواه بيتخانقوا: جهزي نفسك انتي والحريم عشان العصريه هايعدي أهل بيت الحاج علام عشان تجيبوا الشبكه وخلي بنتك تطفح لثمه تسند قلبها وتفرد وشها بدل ما افرده انا وتحمد ربنا اني جوزها وسترتها فاهمه
نعيمه هزت رأسها بخوف: فاهمه يا حاج فاهمه
قام الكل موجوع بس النفوس ياما بتشيل والبطون ياما بتخبي
الكل قام يشتغل في البيت زي خليه النحل عشان يجهوا ضيافه تليق بأهل العريس والوقت بيجري والكل بمسابقه الوقت وسمر طول النهار نايمه زي حالتها في كل الأيام اللي فاتت وقرب اذان العصر دخلت نعيمه على سمر : قومي يا بت استحمي والفضي غبار التعب من على جتتك اللبسي الفستان داه وظبطي نفسك
سمر بتعب رقدت مكانها تاني: اطلعي يا حاجه الله يسهلك وروحي وافرحي ونقي الشبكه على كيفك زي كل حاجه مهي على كيفك
نعيمه بشخطه مهي عارفه بنتها جبانه واللي بتقوله ما هو إلا حلاوه روح ومكابره كدابه: فزي يابت بلاش مرقعه بنات فاضيه فزي بدل ما اجيبلك ابوكي يقومك
سمر بدموع: تعمليها يا حاجه تعمليها منتي عملتي اللي اكتر من كده
نعيمه بصوت عالي: ايه حاجه اللي مسكاها على لسانك زي اللبانه دي
سمر بصوت مبحوح من الوجع : اصل الأم حاجه وانتي حاجه تانيه يا حاجه لو خلصتي اطلعي وردي الباب وراكي وانا هاجهز واريحك مني وارتاح من نارك اطلعي الله لا يسيئك وانا هاجهز واضحك وافرح وادفن وجعي وكسرتي جوايا اطلعي وطمني قلبك يا حاجه خطتك نجحت وانتي اللي كسبتي
طلعت نعيمه وهي متنرفزه من عمايل بنتها واللي شايفه ان من حقها كأم انها تطمن على بنتها زي كل بنات البلد وان بنتها متكونش اقل من حد منهم وانها اختارت لبنتها جوازه تليق بيهم وترفعها وترفعهم معاها وكان مبررها لنفسها ولضميرها الغايه تبرر الوسيله
ومر الوقت بسرعه الريح ومع اول نداء من مأذنه الجامع ببداء الأذان لصلاه العصر الكل جري بسرعه البرق اللي تلمحه بسرعه ومتلحقش عينك تتمكن منه انها تتأمل فيه جريت كل حريم البيت تلبس بسرعه وكل واحده من منهم تلبس أجمل ما عندها
أما عند العروسه الحزينه اختارت فستان بسيط لونه حكلي وفيه ورد لونه بمبى فاتح ولبست طرحه بلون الورد اللي في الفستان ولبست صندل بسيط ومن غير اي زينه او تكليف وبرغم تعبها ووهنها إلا أنه منقصش من جمالها شيئ ورغم شحوب وجهها اللي باين لكل اللي يطل ويطلع في وشها إلا أنه منقصش من جمالها شيئ
والكل جهز وطلعت سمر وكان الصمت سلاحها وبعد السلامات والمجاملات
محروسه بفرحه: يا مشاء الله يا الف صلاه على النبي يخزي العين عنك ويبارك فيكي يا ست البنات سبحان من خلقك وصورك
فرحه وهي السلفه الكبيره زوجه ممدوح اخو جمال: ليه يعني يا حاجه ماهي بت زي كل بنات البلد ولا خرطها الخراط واتمدد مات
محروسه بتكبره وتخمسه في وش كل اللي واقف :ايوه يا اختي خرطها الخراط واتمدد مات لا صب في القالب بنات بعدها ولا أتصور جمالها بين البنات
سكتت على مضض
محروسه بفرحه هموا بينا يا جماعه لجل ما نلحق بدري بدري لسه ورانا ياما دي عروسه الغالي يلا شهلو اومال
وفعلا اتحرك الكل وركب العربيات اللي بعتها الحاج علام علشان راحت الكل ووصلوا اوام اوام عند ايميل الجواهرجي المشهور في البلد واللي كل كبارات البلد بيتعاملوا معاه
ايميل بفرحه وترحيب حار: يالف اهلا وسهلا يا جماعه يا مليون خطوه عزيزه وغاليه
محروسه بغرور :مرحبا بيك يا مقدس
ايميل بترحاب: منورين المحل
محروسه بنفس الغطرسه: منور بيك
ايميل :اؤمري يا حاجه
محروسه بفرحه: عايزين شبكه بس مش اي شبكه حاجه كده اخر الاجه مجتش لبت من بنات البلد حاجه كده اوبها تليق بعروسه الغالي وتليق ببيت الحاج علام الشلاولني وتليق بجمال العروسه اللي يتقال بالدهب
ايميل شاور على عنيه
يا تري يا صبيه الزمن جاي ليا ولا عليا
ياتري المستخبي إيه
الفصل التاسع
ايميل شاور على عنيه :من عنيا يا حاجه انتي تؤمري أمر وانا يجيني اعز منكم وفتح الخزنه الكبيره اللي جمبه وطلع منها شغل المخصوص اللي مبيطلعش لأي حد طلع منها كميه دهب كبيره تزغلل عنين أجمل النساء بس سمر ولا لفت نظرها بريق الدهب لان عنيها اطفي من الحزن والخذلان والكسره
محروسه ونعيمه فرزوا القطع الكتير اللي قدامهم وسمر قاعده ساكته تماما وكأن كل اللي بيدور ميخصهاش ولا كأن دي شبكتها اللي بتتنقى
محروسه اختارت اكبر واتقل سلسله فيهم وكانت شرابيه اربع أدوار بسلسلة حلبي تقيله ووزنها خرافي
محروسه بفرحه: بصي كده يا عروسه ايه رائيك تخطف العين مش كده
سمر هزت رأسها ومنطقتش
محروسه: لو مش عجباكي نغيرها اللي يعجبك نقيه شاوري بس والكل هايقول امين
سمر هزت رأسها بلا
محروسه بقلبه وش: في ايه يا صبيه مالك
نعيمه بتغطيه الموقف: ولا حاجه يا حاجه سلامتك هي بس سمر يتتكسف من خيالها وطبعها هادي مبتتكلمش كتير
محروسه بفهم: اااه طيب يا حاجه يلا نكمل ولو حاجه معجبتش العروسه نشوف في الاخر
وفعلا كملوا تنقيه وشاركهم الحريم من البيتين
اختارت محروسه ونعيمه السلسله ونقت عشر غوايش كبار شكلهم يخض ووزنهم كمان ونقت كفه ب 4 خواتم ونقت للعروسه اسوره كبيره شبه المعصم وانسيال جنزير كبير ونقت 3 خواتم كبار ودبله عريضه ومحبس كبير ونقت سلسلتين واحده فيها مصحف وواحده فيها خمسه وخميسه
واختارت لام العروسه سلسله كبيره تملى العين فيها ايه الكرسي كبيره أوي
محروسه: دي هديتك يا ام العروسه
نعيمه بذهول: مالهوش لازمه يا حاجه خيرك سابق ودي شبكة العرسان
محروسه بشهقه وخبطه على صدرها: يا ندامتي ايه يا حاجه داه سلو البلد عايزه الناس تاكل وشي
نعيمه بمقاطعه: مش القصد يا حاجه بس خيرك سابق وسبق وجبتي قبل كده
محروسه بزعل: ليه كده يا حاجه بقى اللي فاتت دي حلاوه الصنيه لزينه الصبايا تعدميني لو مخدتيها
نعيمه: تفي من بوقك نردها في الأفراح يا حاجه
ونقت محروسه لابنها دبله فضه جميله
محروسه بفرحه: والنبي يا مقدس اكتبلنا على الدبله بتاع العريس اسم العروسه سمر وعلى دبله العروسه اسم العريس جمال بس حاجه كده ايه معملتش لحد
ايميل شاور على عنيه: تؤمري يا حاجه وفعلا طلع جهاز صغير وكتب على الدبل من جوه الاسمين
ولما خلص محروسه الحاج هيحاسب ولا احاسب انا
ايميل: لا يا حاجه الحاج الضهريه عدى عليا وساب فلوس بزياده ولما ييجي العشاء هانخلص الحساب
محروسه خلصت ورقعت زغروده عاليه ونعيمه معاها والكل تحت النظر زغردوا بصوت عالي معاها
ايميل ميل على عامل من المحل: اجري على ابو وليد هات صندوقين شاقه بسرعه اغمض وافتح القيك قدامي
العامل : فوريره وطلع العامل جري ينفذ المطلوب
ايميل :اقعدي يا حاجه على ما الطلب يترص في علبه وتاخدوا واجبكم
محروسه: واجبك وصل يا مقدس
ايميل بإصرار: عيب عليكي يا حاجه طب والمسيح الحي ما يحصل دانتوا كده بتشتموني وعيبه في حقي
قبل ما تتكلم محروسه كان وصل عاملين كل واحد شايل صندوق حاجه سقعه ووزع على كل الموجودين في المحل والعمال وطلع كمل توزيع على بعض الناس اللي حوالين المحل
خلص العمال والكل شرب والفرحه عمت المكان والصمت مازال حليف العروس الحزين
خرج الجميع من المحل وركبوا العربيات ورجعوا بعد جهد سمر بدون كلام مع أي حد دخلت اوضتها ورجعت لسجنها ووحدتها
سمر لنفسها بوجع: وبعدين يا دنيا لسه شايلالي وجع ولا داه اخر المطاف لسه في ظلم ولا دي اخر الظلومات لسه فيه حزن ولا دي اخر الأحزان لسه فيه خساره ناني بعد حلمي وحياتي والا لسه
غمضت عنيها بوجع وسابت دموعها تعبر عن اللي جواها
********
نعيمه دخلت البيت بفرحه والدنيا مش سيعاها
مسعود: خير يا حاجه خلصتوا
نعيمه بفخر وغرور: طبعا والنبي يا حاج البت سمر دي مرزقه دانا دعيالها في ليله القدر ساعه استجابه جابولها شبكه اللهم صلي على النبي إيه شيئ وشويات وشويات وشويات أشكال وانواع مجاتش لبنت من بنات البلد وطلعت علب الشبكه اللي ملت 3 علب كبار وطلعت علبه تانيه وسط ودي هديه الشبكه من ام العريس ليا نقوط الصنيه
حسن بص لأمه بتهكم وبسخريه: تعيشي وتدوبي يا ام الرجاله
مسعود:مالك يا واد بتتكلم مع امك كده ليه
حسن بخذلان: ولا حاجه يا حاج ببارك ليها على فرحتها مش كان نفسها ومنى عينها سمر تتجوز واهي وشهادة حق اتجوزت جوازه ملوكي على كيفها وهواها
وسابلهم القعده ومشي وطلع وراه اخواته اللي كل واحد مبقاش طايق البيت بسبب اللي عرفوه وبقى ملجم الكل بلجام من نار لو حد نطق هايبقى خراب وهايعم على الكل البيت كله هايتخرب فوقاني تحتاني غير سيرتهم اللي هاتكون على كل لسان فالحل هنا هو السكات
مر اليوم ومرت بعده الأيام وجه يوم الجمعه يوم كتب الكتاب وكل البيت بيجهز وسمر على وضعها الفرق انها بقت تاكل كام لقمه متشبعش عصفور بعد تهديد وسعيد من أمها انها هاقول لابوها يسوي ويسوي فيها قامت نعيمه من الفجريه وكان الصيوان اتنصب والفراشه من بالليل والطباخ جهز حاجاته من بالليل
نعيمه بصوت عالي: يلا يا نسوان هموا شويه ورانا يوم طويل انفضي النوم منك ليها
نزل الكل واتجمع وكل واحد كل على قد مقدرته كام لقمه وطلعوا يقفوا مع الطباخ والناس
نعيمه جوه شغلت الاغاني بصوت عالي والكل بيهيص ويزغرد واللي بيردد مع الاغاني
دخلت نعيمه اوضه سمر اللي بقت سجنها الأساسي الأيام اللي فاتت والأيام اللي جايه: قومي يابت فزي من السرير اللي بقيتي لازقه فيه زي الغرا في الخشب همي استحمي عشان تتجهزي انهارده كتب كتابك يا حزينه وانتي قاعده تسحي وتنحي زي اللي ماتلها عزيز قومي منتي وشك فقر
سمر بوجع روح قبل جسد: عندك حق يا حاجه حزينه بس ياترى مين السبب
نعيمه بشخطه: اكتمي نفسك لاكتمك بكره تبوسي ايدي ورجلي وتدعيلي لما تعيشي وتتهنني وتتبغددي في العز والهنا بكره تقولي ربنا يباركلك يا أما
سمر بوجع: روحي ربنا يسامحك روحي وانا هاقوم روحي ومالكيش صالح بيا روحي واعرفي اني عمري مهسامحك مش عشان الجوازه ولا عشان حلمي اللي اتدفن لا يا حاجه يا اللي زرتي بيت الله وخطيتي ايدك على شباك النبي لا عشان عرضي وشرفي وسمعتي اللي انتي ومرات ابنك خوضتوا فيهم عشان ابويا اللي اتكسر بسببي وانا بريئه روحي واعرفي ان مرات ابنك عندها بت وبكره الأيام ترده وسابت أمها اللي نزل عليها سهم الله من الصدمه من بنتها ودخلت الحمام وغابت جواه وطلعت لقيت حريم أخواتها مستنيينها
سمر قعدت على السرير: نعم جايين ليه
ليلي برفعه حاجب: جايين نظبطك ونجهزك قبل ما تروحي الكوافير يا عنيا
سمر بنظره وجع: مش عايزه منك حاجه يا مرات اخويا روحي لحال سبيلك
ليلي بزعيق: بتطرديني يا سمر صحيح هستني ايه من واحده
قطعت كلامها سمر: كملي واحده ايه ها واحده مظلومه ومغدوره بس متقلقيش سلف ودين خدتيه من الأيام سلف وبكره هاتردي الدين ورفعت وشها للسما يارب يقعدوهلك في بنتك تشوفيها شوفتي وتتظلم ظلومتي صره حلبه لا تعت ولا تسوس
ليلي بصدمه طلعت وهي شارده: قصدها ايه البت دي تكون عرفت حاجه يالهوي يالهوي دي لو عرفت اخوها مش هايسكت وهايكون فيها خراب بيتي لالا يا ليلي لو عرفت ايه دليلها وأمها كمان هاتتعك فيها جمبي قلبك اومال
وطلعت قعدت مع الحريم واتجمع الجيران والكل فرحان وبيهني ويبارك
لبست سمر فستان نبيتي وعليه طرحه سوده
نعيمه فرحه قدام الحريم: الف صلاه على النبي حصوه في عين اللي يشوفك ولا صلاش على النبي كل اللي بيصلك بأيافه يوعدها بحيه لهافه وحضنت سمر
سمر بعدت عن حضن أمها اللي بقى زي الشوك بيغرز في جسمها
نعيمه بصوت واطي اشبه بالهمس: مالك يابت بتفطي من حضني زي اللي لدعك عقرب
سمر بهدوء: حضنك شوك يا حاجه بيوجع مبيدفيش
وسابتها وطلعت ركبت العربيه اللي بعتها أهل العريس ومعاها هاجر مرات اخوها بس طول الطريق كان الصمت حليفها وصديقها الصدوق
وصلت بصمت الكوافير في البلد ونزلت هي وهاجر اللي شايله كيس كبير فيه الفستان وسمر ماسكه كيس تاني فيه الجزمه والطرح اللي هاتلبسها ودخلت بدون اي كلمه او أدنى مقاومه
ومرت ساعات وهي بين ايدين الكوافيره اللي قدرت تحول بعلبه مكياج وبعض اللمسات وشها الطفولي البريئ لابسه كبيره فوق عمرها عمر زياده
وفي نفس الوقت في الجماع الكبير اتعمل عقد اشهار لزواج القاصر وابتدت الإجراءات قعد مسعود قدام علام وحط ايديهم في ايدن بعض
المأذون: قول ورايا اني استخرت الله وزوجتك موكلتي البكر الرشيد سمر مسعود محمود أبو شامه على كتاب الله وسنه رسول الله وعلى مذهب الإمام ابي حنيفه النعمان وعلى الصداق المسمى بيننا عاجله وآجله
مسعود كرر نفس كلام المأذون
بص المأذون لعلام: قول ورايا وانا استخرت الله وقبلت زواج موكلتك لابني جمال علام سنهور الشلاواني زواجا شرعيا على كتاب الله وسنة رسول الله وعلى مذهب الإمام ابي حنيفه النعمان وعلى الصداق المسمى بيننا عاجله وآجله
علام كرر نفس الكلام
وطلع المأذون عقدي إشهار زواج لان القاصر لاتزوج الا بعقد إشهار قبل بلوغ السن القانوني وهو 18 سنه
وتم توقيع الشهود ووكيل العروس ووكيل العريس وكان قبل الإجراءات بصمت العروسه والعريس على عقد الاشهار
انتهى المأذون والكل بقى يهني ويبارك وارتفعت اللصوات بالمباركه بين جميع الأطراف
رجع جمال البيت ولبس بدلته السودة وقميص ابيض وطلع من الأوضه أمه كانت مستنياه بمبخره دحان البخور ملئ الجو من حواليهم
محروسه وهي بتلف حواليه بالمبخره: حسبتك وسلمتك لرب العرش من عين أمك ومن عين ابوك ومن عين القوم اللي صادفوك ولا صلوش على النبي يا عين يا عنيا يا سوده يا رضيا يسلم منيكي ببركه محمد ابن عبد الله عين الراجل احد من الخناجر عين المرا احد من الشرشره عين البنيه احد من السفيه عين العجوز اللعنه عليها تجوز كل اللي يبصلك بأيافه يوعدها بحيه لهافه تجعل عين الحسود في قلبك وكل عين تتردلها ان كان خير بخير وان كان شر بشر
جمال بضحك: ايه يا أما بترقي عيل
محروسه بفرحه: لا برقى راجلي وسندي مهما كبرت وعودك شبك هاتفضل في عيني عيل صغير
جمال ميل بأس ايد أمه: طيب يلا يا حاجه عشان اروح اجيب العروسه من الكوافير
محروسه : يلا يا ضنايا
وطلع الكل من البيت وركب العريس عربيته اللي اتغسلت واتزيت واتحط على الكابوت بوكيه ورد كبير واتحركت عربيه العريس في موكب كبير مليان عربيات وموتوسيكلات في زفه ولا الف ليليه وليله والكل جاي يجامل الحاج علام الشلاواني وطول الطريق العربيات مبطلتش كلكسات واصوات عاليه والشباب بيعملوا خمسات بالموتسيكلات والعربيات لحد ما اخيرا وصل العريس لمكان الكوافير
دخل جمال وطلعت بنت من بنات الكوافير: البقشيش يا عريس
جمال ضحك وطلع ورقه ب مئه جنيه :خدي يا ستي مش خساره فيكي
البنت بفرحه مش سيعاها: ربنا يباركلك يا بيه بس عروستك قمر قمر الله أكبر
جمال: طيب يلا استعجلي العروسه اومال
البنت وهي بتشاور على عنيها: من عنيا يا عريس ودخلت جوه بسرعه وطلعت وهي وراها سمر اللي عنيها ثابته في الارض حتى مرفعتهاش فيه
جمال وهو مصدوم من جمال سمر واللي زاد اكتر بالمكياج: الله أكبر قمر يا عروسه قمر والقمر جمبك مالهوش مكان
سمر اكتفت بالصمت وهزت رأسها
مد جمال دراعه وانكج العروسه وطلعوا وسط الزفه وركبت العروسه الحزين العربيه بمساعده هاجر وركب جمال ومعاهم هاجر قدام جمب السواق واتحرك الكل في زفه وموكب مهيب من العربيات لحد الاستوديو وتم التصوير وسط اعتراض سمر البريئ على كتير من وضعيات الصور اللي بفطرتها متعرفش عنها حاجه وواصل الموكب سيره لحد بيت العروسه