رواية دار الايتام
الفصل الحادي والثلاثون31
بقلم اميره اسامه
أصعب وقت هو وقت الانتظار .
انتظارك لحدوث شئ تمنيته كثيراً
وأصبح الوقت الفاصل بينك وبين تحقيق ما تتمني مجرد ساعات
وقتها تشعر بأن الساعات المتبقيه هي أطول ساعات تمر عليك.
لا تستطيع ان تنتظر ولا الوقت يمضي كي يرحمك لا تستطيع النوم ولا حتي الاستيقاظ فقط تقف تتابع رحيل الليل وظهور اول خيط من النور يبعث فيك الأمل.
.........
روكا كانت واقفه في الشباك من بعد ما وصلت الڤيلا هي وعامر مستنيه يجي الصبح بفارغ الصبر عشان تروح الصعيد لجد ليان
حاسه ان الوقت مش راضي يجري وكل دقيقه كانت بتمر كأنها ساعات حاولت تسمع كلام عامر وتنام لكن مكانتش عارفه فضلت علي حالها لحد ما صحي عامر علي صوت موبايله.
كانت الساعه 11 وكان دياب بيصحيه عشان يبدأوا يجهزوا.
بص عامر حواليه ملقهاش نزل تحت يشوفها لمح الباب بتاع الڤيلا مفتوح وهي قاعده علي الكرسي بره.
عامر....صباح النور يا حبيبي.
روكا...صباح الخير يا حبيبي
عامر...انتي منمتيش يا روكا.
روكا....بتنهيده معرفتش يا عامر
عامر....كان لازم تنامي شويه ياروكا لسه الطريق طويل
روكا....مش مهم النوم الوقت ياعامر انا كويسه صدقني.
عامر....بأبتسامه طبعا كويسه من بدري لابسه و جاهزه كمان🤨
روكا....بابتسامه بسيطه مانا مكنتش لاقيه حاجه اعملها قولت البس واجهز لحد ما تصحي
عامر....ماشي يا ستي عموما دياب لسه مكلمني وقاللي نجهز.
روكا...طيب يلا اطلع خد شاور والبس وانا هعمل الفطار والقهوه
عامر....متعمليش حاجه يا حبيبي انا هاخد شاور بسرعه وانزل اعمل فطار ليا انا وانتي.
روكا....متتكلمش كتير بقي يلا روح ما انا قاعده اهو مش بعمل حاجه.
عامر....ماشي يا ستي مش هتأخر
باسها عامر من خدها وطلع علي فوق ياخد شاور ويجهز
دخلت روكا جوه جهزتله الفطار وحضرت القهوه . مسكت روكا موبايلها كانت حاسه انها محتاجه اوي هاشم في الوقت ده وأفتكرت يوم ماخرجت من عند سيلا وهي في حاله وحشه وكلمته ومردش عليها حست بوجع في قلبها لقت نفسها بتتصل علي صفيه..
اتأخرت علي بال ما ردت.
صفيه....الووووو ايوه ياروكا
روكا....ايه يا حبيبتي كنتي نايمه ولا ايه .
صفيه....لا نايمه ايه بس انا كنت بصلي الضهر يا حبيبتي
روكا....طمنيني عليكي
صفيه.....انت بخير يا حبيبتي زي الفل متقلقيش عليا اختك لسه معايا المهم طمنيني انتي عليكي عامله ايه الوقت وبتاخدي علاجك ولا لا.
روكا....بخير يا صفيه العلاج خلص
اميارح بليل بس انا احسن كتير متقلقيش عليا.
صفيه....بس صوتك لسه زي ماهو مش عايزه اشوفك بالشكل ده ياروكا.
روكا...بحزن صدقيني انا كويسه
صفيه....يارب اشوفك ديما كويسه انتي نازله شغلك انهارده.
روكا...لا يامامي لسه مش قادره انزل بس انا راحه مشوار كده ومتصله بيكي مخصوص عشان تدعيلي ياصفيه من قلبك🥺
صفيه....طول عمري بدعيلك انتي واختك يا حبيبتي بس طمنيني مشوار ايه ومالك فيكي ايه.
روكا...سكتت شويه وهي صوتها مخنوق بتحاول متتكلمش عشان مايبانش صوت عياطها.
صفيه.....روكا ردي عليا يا بنتي متقلقنيش.
روكا....بدموع اطمني يا حبيبتي والله انا بخير انا بس محتجاكي تدعيلي اوي المشوار اللي هروحه لو تم يا صفيه روحي هتترد ليا من تاني ولو متمش انا هتعب اوي اوي يا صفيه🥺💔
صفيه.....يابنتي متوجعيش قلبي لو ليكي خير في مشوارك هتلاقيه مستنيكي لو ملكيش خير فيه ربنا هيبعده عنك المهم من جواكي تبقي راضيه.
روكا....انا راضيه والله العظيم راضيه بس خايفه يا صفيه خايفه اتوجع في اكتر وقت انا موجوعه فيه
صفيه.....طب قوليلي بس مشوار ايه يا روكا متخوفنيش.
روكا....والله المشوار ميقلقش اطمني بس يمكن انا اللي بقيت خايفه عموما لو رجعت مبسوطه من المشوار ده هفرحك
صفيه....هترجعي مبسوطه وفرحانه يا حبيبتي المهم خلي بالك من نفسك عشان خاطري وهستناكي تطمنيني ياروكا
روكا....حاضر يا صفيه بس متنسيش تدعيلي .
صفيه....ربنا يريح بالك ويهدي قلبك ويحققلك اللي بتتمنيه يا روكا.
روكا....بحب ربنا يخليكي ليا يلا روحي شوفي كنتي بتعملي ايه وهكلمك ان شاء الله.
صفيه....ماشي يا حبيبتي سلام.
قفلت روكا ومسحت دموعها كانت حاسه انها من جواها مرتاحه شويه بعد ما كلمت صفيه.
شعور الاحتياج بالام وقت الضيق ميعرفش سن مهما كنت كبير وناضح وقت ضيقتك بتلاقي نفسك طفل محتاج امك ودعوتها محتاج الحنا والامان محتاج الطبطبه 💔🥺
نزل عامر بعد ما جهز وفطروا سوا كالعاده علي البار بتاع المطبخ مش السفره. وبعد ما فطروا.
عامر....روكا حبييتي عايز اقولك حاجه ممكن.
روكا....اكيد
عامر....عارف انك جواكي لغبطه ومشاعر كتير عكس بعض مبسوطه علي خايفه وانا مقدر ده بس انا ليا عندك طلب انا لما وافقت علي ليان صدقيني لاني حابب اعمل كده بجد اول حاجه عشان عارف انك هتفرحي تاني حاجه عشان انا هبقي مبسوط بجد بس كنان ياروكا لازم نحط اهم احتمال قدام عنينا وهو رفض جد البنت وده لو حصل مش عايزه يأثر عليكي احنا هنعمل اللي نقدر عليه متبقيش مسافره وانتي عندك يقين انك هترجعي بليان حطي الاحتمال الوحش او المرفوض قدام عينك الاول عشان لو حصل العكس تبقي الفرحه اكبر فهماني ياروكا
روكا...بابتسامه هزت راسها فهماك ياعامر و مش هكدب عليك انا فعلا خايفه بس كمان بحاول اقنع نفسي انه ممكن يرفض ولازم نتقبل ده
عامر...براڤو عليكي ده اهم حاجه بالنسبالي.
روكا...طيب ممكن انا كمان أسألك سؤال
عامر....طبعا ياعمري❣️
روكا....انت ليه عملت كده يعني انت كنت رافض خالص عملت كده عشان ترضيني وتحاول تخليني اخرج من الحاله دي وجاي علي نفسك يا عامر ؟ لو حاسس انك بتضغط علي نفسك بلاش
عامر...بحب مسك ايدها باسها اولا انا مستعد اعمل اي حاجه عشان ارضيكي وعشان اخرجك من حاله الحزن اللي انتي فيها وعشان مش حابب اشوفك كده حتي لو الحاجه دي علي حساب راحتي
بس صدقيني يمكن السبب الاول في موافقتي هو اني فعلا عارف ان الموضوع ده هيفرق معاكي اوي وتاني سبب لاني حابب فعلا اعمل كده واهم سبب ياروكا حابب اشوفك ام حابب اشوفك ازاي هتتعاملي مع ليان بجد ياروكا بتخيل نفسي جاي من الشغل وشايفك انتي وهي بتلعبوا مع بعض وماليين البيت ضحك وحركه الشعور ده عجبني اوي ونفسي اجربه معاكي 🥺❣️
نزلت دموع روكا وهي مبتسمه ومسكت ايد عامر باستها بحب
ربنا يخليك ليا انا بحبك اوي
عامر...بحب مسك خدها وانا بموت فيكي يا احلي بنوته هتبقي مامي قريب جدا😉
ضحكت روكا من بين دموعها
عدي الوقت بسرعه وطلعوا عالطريق قابلوا دياب وليل وعشق وكان معاهم ليان اللي اول ما شافتها روكا فضلت تحضن فيها وليان مش راضيه تسيبها هي وعامر وركبت معاهم وكان وراهم عربيات الجارد.
...................
صحيت سيلا من النوم كان بدر راح شغله وهي كمان قررت انها تنزل الشغل بعد غياب كام يوم
نزلت تحت كانت نوني في المطبخ.
سيلا كانت لسه مش علي طبيعتها رغم انها رجعت والدنيا هديت وحست بحب الكل إلا انها كانت حاسه انها محرجه حاسه انها مش قادره ترفع عينها في عين حد وخاصتاً نوني .
دخلت سيلا علي المطبخ
سيلا....صباح الخير يا نوني
نوني....صباح النور يا حبيبتي تعالي يلا عشان نفطر سوا انا لسه مفطرتش.
سيلا بهدوء راحت قعدت قدامها وهي بتدعك في ايدها .
نوني....ايه هتروحي الشغل بردو
سيلا....اه بقالي كتير مروحتش
نوني....طيب هتقدري تسوقي بايدك.
سيلا...بابتسامه شكلي اتعودت علي الخياطه والجروح.
نوني...بابتسامه ان شاء الله تفكي السلك علي خير.
كلت نوني وهي ساكته خالص وطال الصمت بينهم سيلا بتلعب في طبقها ومش قادره تاكل وعارفه ان نوني علي قد ما بتعاملها بحنيه لكن جواها زعل
سيلا بصتلها بحزن وهي نوني مش بصالها.
سيلا....من يوم اللي حصل ومن بعد ما بدر طلقني وانتي مش واخده اي رد فعل يا نوني حتي بعد ما سبنا وخرج جيتي خدتيني في حضنك ومقولتيش ولا كلمه
حتي لما شوفتك في الاعزاء حصنتيني ومقولتيش ولا كلمه
بدر عاتبني قاللي انه سامحني بس لسه موجوع وصارحني باللي في قلبه
روكا عاتبتني وسامحتني وقالت علي كل اللي جواها.
إلا انتي يانوني خدتيني في حضنك وسامحتيني و في عز تعبي مكنتيش سيباني حتي لما فضلت مع روكا فضلتي معايا رغم اني عارفه انك مش بتحبي تباتي بره.. لما سافروا وسابونا وبقيت انا وانتي في اوضه مع بعض كنت بحس بيكي بليل تقومي من نومك تحطي ايدك علي راسي تطمني اني مش سخنه كنتي ظابطه المنبه علي كل وقت اخد في العلاج كنت بحس بيكي وانتي بتبوسيني من راسي.🥺
لما كنت اقلق واصحي الاقيكي تاخديني في حضنك وتطبطبي عليا لحد ما انام تاني عمرك ما فشلتي في مره يا نوني انك تحسسيني ان امي لسه عايشه فيكي انتي 💔
ومع كل ده لحد الوقت متكلمتيش مقولتيش اي حاجه معاتبتنيش خدتيني في حضنك في عز الوقت اللي انا شيفاكي فيه زعلانه وانا مش قادره ابص في عينك عشان كل ما عيني تيجي في عينك بحس بلوم وعتاب كبير اوي يا نوني
بصتلها نوني بأبتسامه حب
نوني....من يوم ما شوفتك انتي والبنات يا سيلا كلكم دخلتوا قلبي حبيتكم بجد لكن انتي بالذات مش هقول كنتي اقرب ليا بس كنت حاسه ان في علاقه هتطور بينك انتي وبدر رغم انكم كنتوا ديماً بتتخانقوا واللي حسبتوا لقيتوا بدر حبك يا سيلا ومكنتش اتخيل في يوم انه يحب حد كده لانه طول الوقت كان شايل الموضوع ده من دماغه كان ديماً عنده جزء خايف يخليه يدخل في علاقه وارتباط وجواز كان شايف ان شغله صعب وشايف انه هيظلم اللي هيتجوزها بس مقدرش يسيبك يا سيلا وقرر يتجوزك والغريب يا سيلا ان بدر عمره ما حسسك بموضوع الخلفه ولا حتي عمره اتكلم معايا فيه يوم ما حصلت المشكله وشوفت بدر قدامي منهار بالشكل ده كنت وقتها حاسه ان الانفجار ده نتيجه صبر سنتين وضغط علي نفسه عشان مش حابب يجرحك..بدر حبك سا سيلا لدرجه ان شال من دماغه حكايه الشغل الصعب و اتجوزك ..بدر حبك لدرجه انه اتمني يخلف منك ونسي خالص الخوف من الموت في ظل ظروف شغله الصعبه.. يمكن يا سيلا انا عارفه كويس ان نيتك كانت طيبه واللي عملتيه ده كان بدافع الحب لروكا ومش تقليل خالص من بدر
لكن انتي غلطتي يا سيلا!! وغلط مش هين وده مش معناه اننا نعلقلك المشنقه خالص لازم نعدي بس المهم اننا نتعلم.
عارفه ياسيلا اول مره في حياتي كلها أمد ايدي علي بدر كانت بسببك مش بحملك ذنب خالص والله.. بس لما لقيته بيقرب منك مقدرتش اسكت عشان انا عمري ما اعتبرتك مرات ابني انا بعتبرك بنتي اللي مخلفتهاش وقتها رغم اللي عملتيه لكن غضبي راح ناحيه بدر اللي فكر يمد ايده عليكي وضربته بالقلم....القلم اللي لحد الوقت واجعني و بعاتب نفسي عليه كل ثانيه لاني كنت فاكره اني كده بحميكي منه مكنتش عارفه ابدا اني هبقي سبب اساسي في الطلاق بدر كرامته وجعته وده اللي خلاه قالك انتي طالق فا لو شيفاني يا سيلا مش عايزه اتكلم فا ده حقيقي لاني حاسه بالذنب وعارفه اني كنت سبب ولو مكنتش مديت ايدي عليه كان اخره هيتعصب ويمشي
🥺 بس كمان مقدرتش استحمل اشوفه بيمد ايده عليكي
سيلا...بدموع يعني انتي زعلانه من نفسك عشاني يا نوني هو بجد في حد زيك كده🥺
نوني....الام بتاخد علي خاطرها يا سيلا لكن مستحيل تشيل من ولادها غلطتي اه بس اغضب واثور عليكي مستحيل🥺
قامت سيلا خدتها في حضنها وفضلت تعيط هي ونوني🥺
نوني....مسحت دموعها بمرح يلا يا بت انتي جايه تعيطيني علي الصبح بدل ما تصبحي عليا بورده ولا شكولاتايه🤨
ابتسمت سيلا من بين دموعها لا خلاص مش هعيطك وهجبلك احلي ورد واحلي شيكولاته كمان♥️
نوني...طب قوليلي عايزه تاكلي ايه انهارده و متقوليش زي بدر اي حاجه احسن ارتكب جريمه فيكم
سيلا....صدقيني اي حاجه من ايدك بحبها اوي❣️
نوني....خلاص ياستي هعملكم علي ذوقي.
سيلا...باستها من خدها تسلم ايدك يا احلي نوني مش هتأخر عليكي ماشي.
نوني....سوقي براحه عشان ايدك.
سيلا...حاضر يلا باي ♥️
نوني....في امان الله يا سيلا❣️
....................
الوقت كان بيعدي والطريق طويل
طول الوقت روكا ماسكه ايد ليان ومش قادره توقف دعاء من قلبها
ان ايدهم ما تسيبش بعض ابدا
اما عامر كان حاسس بيها جدا طول الطريق يطبطب علي راسها ويطبطب علي راس ليان بحب
لحد ما اخيراً وصلوا قدام البيت الكبير لعائله طاحون.
كانت ليان نايمه ورا في الكنبه.
نزل دياب من عربيته راح علي عربيه عامر وروكا. ولحقه ليل وعشق.
عامر....هو ده البيت ؟
دياب.....ايوه هو بس في حاجه
روكا...في ايه يا دياب.
دياب....عايزك تفضلي هنا في العربيه انتي وليان مش عايزكم تنزلوا الوقت.
روكا...بقلق ليه انت قلقان من حاجه.
دياب...لا طبعا قلقان من ايه بس كل الحكايه اني مش عايز ليان تظهر الوقت لحد ما نحكي للراجل الكبير كل حاجه وعشان كمان لو عمها موجود جوه نمنعه انه يفكر في اي كدبه لما يشوف ليان خليه يتصدم وحابب اشوف كلامه
عامر....ايوه بس هنسيبهم هنا لوحدهم.
دياب...احنا مش بعيد عنهم وبعدين الجارد جمبهم متقلقش.
روكا...طيب خلاص روحوا هي كده كده نايمه انا هفضل معاها.
عشق....انا بس قلقانه من حاجه خايفه لو عرفت ان بباها ومامتها اتوفوا يحصلها حاجه دي بردو طفله.
دياب...متقلقيش عشان كده انا وافقت ان روكا تيجي هي وعامر لان واضح انها متعلقه بيهم جدا واكيد هيقدروا يمتصوا وجعها.
روكا.....بحزن طيب يلا بقي ادخلوا والنبي. خلونا نخلص بسرعه.
عامر...خلي بالك من نفسك واقفلي الباب عليكي من جوه وانا هبلغ الجارد يبقوا جمبك.
روكا....متقلقش.
........
دخلوا كلهم علي جوه مع الغفير
وطلبوا يشوفوا زكريا دخلتهم الشغاله جوه وبعد وقت بسيط نزل إبراهيم استقبلهم عرفهم علي نفسه كانوا قرفانين منه جدا لكن قرروا يتعاملوا عادي هما في الاول والاخر عايزين يقابلوا زكريا اهم حاجه.
وطبعا بعد اللي حصل إبراهيم وسحر جم عاشوا مع زكريا عشان ميسبهوش لوحده وهو تعبان.
إبراهيم....يامرحب يامرحب بأهل مصر الشغال جالت انكم طالبيت تشوفوا الحاچ زكريا اني ولده خير.
دياب...اهلا بيك خير إن شاء الله بس كنا محتاجين نتكلم معاه في شغل مهم جداً.
إبراهيم...وإني معاكم أصل عدم اللاموأخذه ابويا تعبان من وجت موت اخوي وهو جاعد علي كرسي متحرك وماهينزلش كتير واني اللي بدير كل الشغل
دياب...علي راسي مختلفناش واكيد طبعا وجودك معانا مهم بس احنا جايين من طرف حد كبير ولازم يكون موجود في القاعده دي بناءاً علي كلام الشخص اللي باعتنا للحاج زكريا وطبعاً احنا عندنا علم بحالته واطمن مش هنتعبه.
إبراهيم....أيوه بس.
قاطعه عامر بنبره حده بسيطه.
عامر....لا بس ولا حاجه احنا معندناش وقت كبير يا حضرت الله يرضي عنك لسه قدامنا سفر🤨
بصله دياب عشان يهدي ورجع بص لابراهيم مش هناخد من وقتكم كتير إن شاء الله.
إبراهيم بص لعامر باستغراب من طريقته ورجع بص لدياب تمام هطلع أچيبه وانزل طوالي بعد اذنكم.
ليل...أهدي شويه يا عامر بلاش تتعصب.
عامر...انا مش طايق اصلا اشوفه قدامي وهو يحرق الدم.
عشق....بصراحه هو عنده حق صعب تشوف واحد عارف هو عمل ايه في بنت صغيره وتكلمه عادي
دياب.....ضبط النفس مهم في المواقف دي فاهمني ياعامر.
عامر....بنفخ خليها علي الله.
عدي حوالي 12 دقيقه لمحوا إبراهيم داخل قدامهم من الاوضه وبيزق والده علي كرسي متحرك
قاموا كا احتراما ليه ولسنه الكبير.
بصتله عشق بشفقه.
سلم عليه دياب وليل وعامر
كان زكريا بيتكلم بصعوبه لكن أفضل من الاول الجلطه أثرت علي كلامه ولان سنه ميسمحش تعب اوي.
زكريا....أتفضلوا أجعدوا نورتوني
دياب....ده نورك يا حاج زكريا أسفين طبعا علي تعبك مكنتش حابب اتعبك بس كان لازم نتكلم مع حضرتك..
زكريا...متجولش إكده ياولدي الدار داركم بش متآخذنيش انتوا مين وچايين من طرف مين.
دياب...مبدأيا كده البقاء لله في ابنك
زكريا....بحزن ونعم بالله ياولدي
دياب...طبعاً انا عارف ان حضرتك متعرفناش ولا حتي عمرك شوفتنا وطبعا احنا كمان مكانش لينا الحظ اننا نتعرف علي حضرتك لما جيت قولت للاستاذ إبراهيم اننا جايين في شغل والشغل ده تبع حد كبير هو اللي باعتنا ليك.
زكريا...أيوه ياولدي جالي واني تحت أمركم
دياب....الحقيقه هو لا في شغل ولا في حد كبير كل الحكايه اننا كنا حابين نشوف حضرتك ضروري فا أعذرني أعتبرها كدبه بيضا.
زكريا....طيب جولي في ايه يا ولدي خير.
دياب....احنا جايين عشان حادثه ابنك ومراته وبنته.
ارتبك إبراهيم فحاول ينهي الكلام من قبل ما يبدأ وأتكلم بعصبيه.
إبراهيم....أسمع يا حضرت الله يرضي عنيك بعيد عن الكدبه اللي كدبتها هنسامحوا فيا لكن اخويا الله يرحمه ابويا كيف ما انت شايف مهواش حمل تعب اكتر أحنا مصدجنا انه اتحسن فا انتوا إهنه ضيوف علي عيننا وعلي راسنا اكتر من إكده مش هنجبل حاچه تتعبه تاني.
وقف عامر بغضب راح ناحيه الباب وسط نظرات الجميع قفله بأيده ولف بص لابراهيم وبسرعه حط ايده في ضهره طلع مسدس وجهه ناحيه راسه😡
وقف دياب وليل بذعر شهقت عشق وحطت أيدها علي بوئها
اتصدم ابراهيم من رده فعله وهو مش فاهم حاجه اما زكريا مات من الخوف علي ابنه الوحيد.
ليل....عامرررر
دياب...نزل المسدس ده 🙈
عامر....لابراهيم صوتك ده لو اتسمع تاني او فكرت تقول حرف واحد واللي خلقني وخلقك هطير نفوخك وخليك جسم من غير راس 😡
إبراهيم...بارتباك وخوف هتعمل ايه انت اياك مچنون ده ولا أيه.
زكريا....في ايه يا ولدي حوصل ايه انتوا مين بالظبط.
دياب....معلش يا حاج حقك علينا عامر باشا ميقصدش ولما تعرف اللي احنا جايين عشانه هتعذره.
عامر...يعذرني 🤨 ده هيمسك المسدس بدالي.
إبراهيم كان ابتدا يحس ان في حاجه مش مريحه وكان خايف اللي بيفكر فيه يطلع صح.
زكريا....طيب جولي في ايه ياولدي.
عامر....مبدأياً تروح تقعد هناك ومسمعش صوتك
إبراهيم بيحاول انه يستقوي شويه.
بجولك إيه انت زودتها جوي شكل متعرفش انت بتتكلم مع مين إياك
عامر....اوسخ واحد شوفته في حياتي ولا انت مش عارف انك وسخ🤨
دياب....طيب عامر من فضلك اهدي ومعلش يا حاج زكريا هندخل في الموضوع علي طول عشان نمنع اي مشاكل.
زكريا...ياريت يا ولدي .
عشق....حاج زكريا فين بنت ابنك الله يرحمه؟
زكريا....بحزن ماعرفش يا بنتي إبراهيم سأل وجال ماتت
عشق....يعني انت شوفت جثتها بنفسك.
زكريا...لاه ولا حتي شوفت ابني ابني چاني البلد علي جبره ملحجتش حتي اودعه ولا أسأله علي البت واطمن ماتت ودفنها بيده ولا راحت فين بس ارتاحت شويه لما إبراهيم سأل وجدر يعرف انها ماتت في بلاد بره.
عشق...بحزن بس دي مش الحقيقه يا حاج زكريا🥺
زكريا....امال ايه حوصل ايه مش فاهم.
عشق....ليان بنت ابنك عايشه 🥺
زكريا...بدموع وفرحه وه بتجولي ايه كيف يعني ؟ صوح عايشه اااااه نزلت دموعه وهو بيضحك فينها وكيف عايشه وچبتوها كيف من بلاد بره وكيف ابوها هملها لحالها.
ليل....حاج زكريا ليان وصلت مع والدها ووالدتها و كانت معاهم في الحادثه واتنقلت معاهم علي المستشفي اللي هما راحوا فيها.
إبراهيم....كلام ايه الفارغ ده اني روحت بنفسي و كانوا لوحدهم وسألت عليها في بلاد بره وعرفت انها ماتت هناك. شكلكم نصابين اني لازم اطلب الشرطه.
وقبل ما يقوم شد عامر زناد المسدس 😡
عشق...عامر ارجوك اهدي والنبي🥺 عشان خاطر ليان.
قام دياب وقف وطلع من جيبه بطلقه تعريفيه وحطها في وش إبراهيم . وهو باصصله بقرف
دياب....دياب الدالي ظابط مباحث
يعني مش محتاج خالص انك تجيب الشرطه لو حابب اجيبهالك كلها لحد عندك في ثواني تحضر.
سكت إبراهيم بخوف وحس انه خلاص مش لاقي مخرج.
عشق....انا هحكيلك كل حاجه يا حاج زكريا.
بدأت عشق تحكي دياب وليل بيأكدوا علي كلامها عامر واقف و موجهه المسدس علي إبراهيم اللي كان منزل راسه ومش لاقي حاجه يدافع بيها عن نفسه.
اما زكريا فا كان جواه وجع محدش قادر يستوعبه جواه بركان بيفور غاضب مستني الفرصه اللي ينفجر فيها.
..................
في الجريده.
مراد.....انا مستحيل اوافق علي الانتي بتقوليه ده قوليلي ياسيلا في ايه حصل مضايقك اوي كده الموضوع ملهوش علاقه بموت والد صحبتك ولا حتي انك زعلانه عشانها بالشكل ده في حاجه ضايقتك هنا حد عمل معاكي حاجه.
سيلا...بابتسامه خالص والله يا مستر مراد انا اللي حابه اقدم أستقالتي مش اكتر.
مراد....طب ليه افهم الاول وبعدين اشوف هوافق ولا لا.
سيلا....كل الحكايه اني حقيقي حاسه اني مأثره في الشغل جداً خصوصا اخر فتره دي والمفروض كنت كملت القضيه بنفسي لكن مكنتش قادره
مراد...بس انتي مقصرتيش واول ما جالك معلومه قولتيهالي والخبر نزل عادي
سيلا....عارفه بس بيني وبين نفسي حاسه اني مقصره وعشان مكدبش عليك اكتر انا حاسه اني مش قادره اشتغل الفتره دي محتاجه اخد اجازه طويله جدا نفسيا مش مظبوطه حاسه اني مأثره مع نفسي وفي حياتي وكل حاجه وعمري ما هقدر اشتغل وانا كده مش هقدر ادي الجريده اي حاجه لاني معنديش طاقه وعشان اعمل كده لازم استقيل لاني مش هقدر اقعد كام يوم وارجع انا حقيقي محتاجه اجازه طويله وعارفه ان ده مش هينفع.
مراد...لا هينفع ياسيلا حابه تاخدي اجازه مفتوحه معنديش مانع تاخدي شهر اتنين.. سنه معنديش اي مانع لكن انا معنديش أستعداد اخسرك في الشغل ابدا استقالتك مرفوضه يا سيلا ودا ياستي قرار ممضي مني شخصياً علي أجازه طويله المدي وقت ما تحسي انك احسن هتلاقي مكانك...اتققنا ادي الاجازه اهي.
سيلا...بأبتسامه مش عارفه اقولك ايه🥺
مراد.....ولا اي حاجه بس نصيحه بلاش تاخدي اي قرار يخص مستقبلك في وقت انتي مضغوطه فيه نفسياً لانك هتندمي بعد كده خصوصا لو القرار ده يخص شغلك وانتي عارفه يا سيلا انك بتحبي شغلك جدا وشاطره فيه وهتتعبي بجد لما تحسي ان القرار اللي خدتيه في وقت كنتي حاسه انه هيريحك هو اسوء قرار خدتيه واتسببلك في تعب كبير بعد كده.
سيلا....انا عارفه يا مستر مراد انه قرار صعب بس كمان غصب عني مقدرش اطلب اجازه طويله
مراد...لا يا ستي اطلبي براحتك وانا تحت امرك انا والجريده اعتبري نفسك من انهارده في اجازه مفتوحه اتفقنا.
سيلا....بأبتسامه أتفقنا🥰
...........
في الصعيد خلصت عشق كلامها
زكريا كانت دموعه بتنزل وهو سامعها وباصص لابراهيم اللي حاطت ايده علي راسه بكسوف من اللي عمله.
عشق....دي كل الحكايه وهو ده اللي عاشته ليان اليوم ده محدش عارف كان ممكن يحصلها ايه بس كل مره كان ربنا بيقف معاها لاخر لحظه لحد ما و صلتلي الدار.
زكريا.....بدموع البت فين عايز اشوفها عايز اخدها في حضني عايز احب علي يدها.
إبراهيم....بدموع أبوي
زكريا....ماعيزش اسمع صوتك عشان مجتلكش مش عايز حد يجول زكريا جتل ولده ليه
إبراهيم....يا ابوي اسمعني
زكريا.....اني برئ منك ليوم الدين جلبي وربي غضبانين عليك زكريا طاحون بيچيب رچاله ما هيچيبش نسوان ولا شياطين رميت عرضك رميت بنت اخوك جدرت تعملها ده انت حداك عيال طيب جولي چالك جلب تسيبها لوحدها وهي متعرفش عن البلد كلها حاچه فين نخوتك وانت سايب بت صغيره مرميه في الشارع مصعبتش عليك
واني بموت جدامك ضحكت علي عجلي فاكرني كبرت وخرفت. يوماتي كنت اصحي مفزوع واجولك اخوك فيه حاچه شايفه مخنوج وماسك رجبته تجولي مفيش يا ابوي ادعيله اجراله الفاتحه.. وانت رامي ضناه في الشارع للكلاب تنهش فيها .
وعشان ايه ده كله عشان فلوس وورث
إبراهيم بدموع وطي علي ايده يبوسها صدجني يا ابوي هي سحر الشيطانه اللي لعبت في دماغي كنت عايز اخلص من زنها
مسكه زكريا من رقبته وهو بيضغط عليها جامد وقرب من وشه. بغضب 😡
زكريا....كان عندي حج لما جولت زكريا طاحون ما هيخلفش نسوان
معلوم ما الراچل اللي تمشيه مره يبجي كيفها الراچل اللي يرمي عرضه ميبجاش راچل... وكمل بدموع وهو بيضغط اكتر علي رقبته ياكلب ده احنا بنحاچو علي اللي مش منينا بنستر البنات وبنحافظ عليها نجوم احنا نرمي اللي منينا
فضل إبراهيم يكح جامد
جري عليه ليل ودياب بعدوه عنه
زكريا سيبوني اموته وأدفن عاره هجول للناس ايه اجولهم ولدي رمي بنت اخوه جولولي ياخلج اجولهم ايه 💔💔
اطمن عليها كيف لو چرالي حاچه ده انت رميتها وانا لسه بصحتي هتعمل فيها ايه واني مش جادر اتحرك.. حسبي الله ونعم الوكيل حسبي الله ونعم الوكيل.
قرب منه عامر وقعد قدامه
عامر...حاج زكريا ارجوك يمكن اللي هقوله ده صعب علي راجل صعيدي زيك بس انا اتمني انك توافق..
ليان من يوم ما راحت الدار وهي قريبه مني انا و مراتي وقبل ما نعرف ان ليان ليها اهل مراتي طلبت مني اننا نتبناها بس انا رفضت مع ان ربنا اللي عالم لما بشوف ليان بيحصل فيا ايه لكن رفضت لاني مقدرش انسب بنت ليا وهي مش من صلبي ولما عرفت انها ليها اهل مكانش عندي اي مانع اني اخدها في حضني انا ومراتي وتعوضنا ونعوضها وصدقني هتفضل محتفظه بأسم والدها واسمك واسم عيله طاحون. لو كانت البنت اتخطفت تاهت راحت مستشفي تانيه وعرفنا ان ليها اهل بيدوروا عليها صدقني مكانش زماني قاعد قدامك لكن بعد اللي ابنك عمله كان لازم اجي لاني معنديش استعداد انه يأذيها تاني هو شخص غير امين ولو عمل كده مره مش بعيد المره الجايه يموتها صدقني بنت ابنك هتكون في امان معانا هنوفرلها كل حاجه هتحتاجها هدخلها احسن مدارس في مصر لو متسمعش عن عامر الالفي فا احب اعرفك بنفسي انا رجل اعمال عندي كبيره للمقاولات
يعني مش محتاج منك غير الموافقه وبس.
زكريا ...بدموع يااااارب🥺
دياب....حاج زكريا بنت ابنك صدقني هتكون في امان وانا اضمنلك ده بنفسي وتقدر تاخد ألاجراء القانوني اللي يريحك ويخليك حاسس انك متطمن.
زكريا...بوجع بنت ابني كانت حداكم واني فاكر انها ميته كان ممكن تفضل واني بردو معرفش عنيها حاچه انتوا كنتوا أحن عليها من عمها وضهرها وسندها الست فيكم كانت بألف راچل من عينته.
عامر....وانا مش هحرمك منها أي وقت حابب تشوفها هجيبهالك لحد عندك عايز تيجي تقضي معاها كام يوم هجيلك بنفسي واخدك لعندها واعتبرني ابنك
ليل....بترقب ها يا حاج زكريا قولت ايه.
زكريا...بعد صمت دام ثواني.
عايز اشوف البت
عامر...هجيبهالك حالا هي معانا بره.
زكريا...وانت خارچ يا ولدي نادي وجول يا سكينه
خرج عامر ونادي علي الشغاله اللي حضرت بسرعه .
زكريا....سكينه اطلعي جولي لسحر الحاچ عايزك.
سكينه...تحت امرك يا حاچ.
............
خرج عامر لمح ليان صحيت وبتضحك مع روكا وروكا بتلاعبها لكن ملامحها مليانه قلق
قرب من العربيه وخبط علي الباب فتحاله بسرعه.
روكا.....ايه🥺
عامر...تعالي انتي وليان.
مسكت روكا ايده انا خايفه ياعامر.
ضغط عامر علي ايدها بهدوء متخافيش تعالي ياروكا جدها عايز يشوفها.
بلعت روكا ريقها بصعوبه وعينها بتلمع بتوتر.
مسك عامر ايدها ومسكت روكا كف ليان بقوه🥺🥺🥺
ودخلوا بخطوات بطيئه ضربات قلب روكا كانت عاليه جدا و ماشيه رجلها بتخبط في بعض و مرعوبه.
وصلوا قدام الأوضه اللي هما فيها.
اول ما روكا شافت جدها وعمها قربت ليان وقفتها قدامها وضمت كتفها ليها بخوف..
عامر....حاج زكريا ليان محمد زكريا طاحون حفيدتك
رفع زكريا راسه 🥺🥺🥺
لقراءة باقي الفصول الجزء الثالث من هنا
لقراة باقي الفصول الجزء الثاني من هنا