CMP: AIE: رواية حكاية قمر الفصل الحادي الثلاثون31بقلم هاجر محمود
أخر الاخبار

رواية حكاية قمر الفصل الحادي الثلاثون31بقلم هاجر محمود

رواية حكاية قمر
 الفصل الحادي الثلاثون31
بقلم هاجر محمود

نرجع لفارس 
يمر يوم ورا يوم وفارس بيتابع مع الدكتور النفسي وبيتابع مع الدكتور العضوي وفي يوم في اخر اسبوع في شهر الاجازه كان في العياده عند الدكتور بيتابع اخر تحليل انيميا وبعد ما قرأه الدكتور بص لفارس وقال بابتسامة: كده تمام، حمدلله على سلامتك
فارس: الله يسلمك يا دكتور
الدكتور: خلي بالك من نفسك وبلاش اهمال 
فارس: حاضر، عن اذنك
الدكتور: اتفضل
***********
وناوله نتيجة التحليل الاخير واخده فارس منه ومشي راح للدكتور النفسي بتاعه ودخل عليه وسأله: انا حالتي ايه؟ 
الدكتور: انت في تحسن كبير، والدليل على كده حبك لنادين، وانك تقبلت ان قمر مش عاوزاك واعترفت بغلطاتك 
فارس: يعني انا خفيت خلاص؟ 
الدكتور: مجرد ما ترجع شغلك وتبدأ تتعامل مع الناس من تاني هتخف خالص
فارس: شكرا يا دكتور
وخرج من عنده ورجع شقته، ودخلها لقى ابوه مستنيه واول ما شافه سأله: عملت ايه يا فارس؟
ناوله فارس نتيجة التحليل وقال: الحمدلله
الحج سالم: الحمدلله، هترجع شغلك امتى؟ 
فارس: كمان ٣ ايام
الحج سالم: على خير 
فارس: في حاجه عاوز اتكلم معاك فيها
الحج سالم: خير 
فارس: عاوز اخطب نادين
الحج سالم بابتسامة: ياريت، دي بنت حلال وتستاهلك، بس انت متأكد؟ 
فارس: طبعا، هي الوحيده اللي وقفت جنبي معاك وانا عيان واستحملت كل حاجه عشان خاطري، كفاية حنيتها واهتمامها وخوفها وسهرها على راحتي قبل ما تسافر
الحج سالم: خلاص نروح بكره نخطبها من امها
فارس: ماشي 
في الوقت ده وصلت رسالة لفارس على تليفونه من سيف ففتحها وقرأها واستغرب بفرحة فسأله ابوه: في ايه؟ 
فارس: انا اترقيت، بقيت رائد 
اخده سالم في حضنه وقال: مبروك يابني
فارس: الله يبارك فيك يا بابا، انت ونادين اللي هتلبسوني الرتبة الجديده
الحج سالم: ان شاء الله
فارس: طيب يلا ناكل، ولا تحب نخرج ناكل بره 
الحج سالم: لا نادين طبخت قبل ما تسافر
فارس: ماشي
وراح فارس جاب الاكل وقعد هو وابوه يتغدوا سوا وبعد الغدا خرجوا يتمشوا شوية مع بعض يختاروا الهدايا اللي هيروحوا يخطبوا بيها نادين، وبعد ما خلصوا رجعوا لشقة فارس ودخلوا ناموا، وتاني يوم الصبح اتصل فارس بنادين فقال: انا وعمك جايين عندكم
نادين بفرحة: تنوروا، اهلا بيكم.....
*********************
نروح لنادين
قبل يومين من سفرها، كانت نادين قاعده في الصالة بتكلم امها فسألتها: مش كفاية قعاد بقا عندك ولا ايه؟ 
نادين: ليه يا ماما كده 
ناهد: ارجعي من غير كلام
نادين: وافرضي سألوني عن السبب؟ 
ناهد: قولي اني تعبانه شويه 
نادين: حاضر
وقفلت التليفون وقامت وقفت في البلكونه تستنى فارس يرجع من بره وبتفكر هتقوله ازاي انها هتمشي فقعدت على كرسي وفضلت تفتكر كل حاجه حلوه حصلت بينها وبين فارس الفترة الاخيره، لحد ما رجع فارس ودخل اوضته فدخلت وراه وقالتله: انا همشي
فارس باستغراب: ليه؟ 
نادين: امي تعبانه شوية
فارس: خلاص سافري، ولو اني اتعودت على وجودك معايا 
نادين: هاجي تاني 
مسك فارس ايديها وبص لعيونها وقال: انا بحبك اوي يا نادين
نادين بمفاجأه: اخيرا يا شيخ طلعت روحي 
فضحك فارس وحضنوا بعض وبعد شوية حاولت نادين تفك ايدين فارس من حوالين وسطها وقالت: اييه خلاص، عشان احضر الشنطه
سابها فارس وقال: ماشي، كام شهر ومش هتعرفي تقولي "خلاص" دي تاني
وبعد عنها وسابته وراحت تحضر شنطتها...
**************
تاني يوم سافرت لأمها، واول ما وصلت دخلت اوضتها ونامت وبعد كام ساعة صحيت على صوت امها وهي بتنادي عليها عشان يتغدوا سوا فقامت نادين وسألتها: هي الساعة كام؟ 
ناهد: سبعه، يلا
فراحت نادين غسلت وشها وقعدت مع امها ياكلوا فسألتها: عامله ايه مع فارس؟ 
نادين بابتسامة: اعترف اخيرا بحبه ليا 
ناهد: كويس اوي 
نادين: لا مش كويس، انتي ناسيه اللي حصل بيني وبين تميم، وفارس ميستاهلش كده
ناهد: فارس ابن عمك ويوم ما يتجوزك مش هيفضحك
نادين: تفتكري اصلا هو في دماغه جواز بعد قمر؟
ناهد: وليه لا هي مش اخر واحده ف الدنيا، وانتي اولى به منها
سكتت نادين وكملت اكل وبعد ما خلصت رجعت اوضتها وفضلت تعيط لحد ما نامت، وقامت تاني يوم على صوت رنة تليفونها برقم فارس، وبعد ما ردت عليه وخلصت مكالمة ندهت على امها وقالت بفرحة كبيرة: جاي يخطبني، فارس جااااي
ناهد بفرحة: الف مبروك يا حببتي
نادين: يلا يا ماما اعملي غدا محترم وانا هروح اشوف هلبس ايه عشان نقابلهم
ناهد: من عينيا
وبعد ٣ ساعات وصل فارس وابوه لبيت نادين ورحبت بيهم ناهد ودخلوا قعدوا في الصالون وبدأوا يتكلموا سوا وبعد شوية دخلت نادين وقرأوا الفاتحة واتفقوا ان الفرح بعد ٦شهور وبعد ما اخدوا ضيافتهم طلع فارس علبة شبكة كبيرة وفتحها وبدأ يلبسها لنادين وزغرطت امها وكان يوم جميل لحد ما فارس وابوه رجعوا بيت الحج سالم، وبات فارس هناك وتاني يوم رجع شقته وابوه فضل في اسكندرية........
*************************
نروح لقمر
عدى اسبوعين وقمر قعدت في البيت بتستعد للامتحانات وكل يوم ورده مبعوته ليها ومعاها كارت، وعدى اسبوع كمان وفي يوم كانت قمر في اوضتها بتذاكر عشان الامتحانات خلاص وفجأه سرحت وسألت نفسها: هو بطل يبعت ورد ليه؟ طيب هو مين؟ 
وقامت راحت لوالدتها وسألتها: هو مجاش ورد النهارده برضه؟ 
نبيلة: لا مجاش
قمر: طيب، هروح اكمل مذاكره
نبيلة: ماشي
ورجعت قمر اوضتها وقعدت قدام الكُتب وهي ساكته لحد ما تليفونها رن برقم أمل فردت عليها وبعد ما سلموا على بعض قالتلها أمل: حبيت تكوني اول واحده اعزمها على كتب كتابي بعد بكرة والفرح بعد الامتحانات باسبوع 
قمر: الف مبروك واكيد هاجي 
وبعد ما خلصت مكالمة رجعت قمر تكمل مذاكرتها وتاني يوم قامت قمر تحضر نفسها وتجهز لبسها وبعد ما خلصت استأذنت ابوها تروح واخوها يوصلها، وتاني يوم قمر راحت المكان اللي وصفته امل ليها عشان كتب الكتاب، وهناك وقفت جنب أمل وهي بتمضي على عقد الجواز وبعد ما خلصت باركتلها قمر وحضنتها بفرحة كبيرة اوي وباركت لزياد وبعد ما خلص كتب الكتاب طلعت قمر وقفت بره تستنى اخوها وهي واقفه سمعت حد بينادي عليها فلفت للصوت لقت دكتور أنس بيقرب منها وهو بيسألها: واقفه كده ليه؟؟
قمر: مستنية اخويا
أنس: عقبالك
قمر بكسوف: شكرا يا دكتور
أنس بغيرة: معايا انا مش مع حد تاني
سكتت قمر بابتسامة اما أنس فسألها: مالك؟ 
قمر: مفيش مستغربة شوية
أنس: من ايه؟ 
قمر: معاملتك معايا ف الجامعة حاجه وبره الجامعه حاجه تانيه
أنس: طبيعي، عشان محدش يتكلم علينا 
قمر: عندك حق 
وفضلوا يتكلموا شوية لحد ما وصل اياد، واتعرف على أنس واخد قمر ومشي، وعدى اسبوع كمان وبدأت الامتحانات وكل مرة قمر تخلص امتحان وتخرج تلاقي أنس واقف مستنيها بيطمن عليها وعلى مجموعة طلبة تانيين معاها، لحد ما اخر يوم امتحان خرجت قمر من لجنتها بس ملقتش دكتور أنس فاستغربت وفضلت واقفه تدور عليه بعينيها في المكان لحد ما لقت أمل بتسألها: بتدوري على مين؟ 
قمر: ها؟ لا ولا حاجه
أمل: طيب يلا بينا 
قمر: يلا 
************
نروح لطارق 
كان طارق في شركته ساعة ما تليفونه رن برقم غريب فرد طارق عليه وسأله: مين معايا؟ 
-:..................
طارق:وحضرتك عاوز ايه؟ 
-:...................
طارق: وايه اللي يخليك متأكد انها هتوافق
-:...................
طارق: انا موافق انت انسان هايل
-:...................
طارق: ماشي، احنا هنكون هناك كلنا 
-:....................
طارق: مع السلامة 
***********
وعدت الايام وجه يوم فرح أمل وجهزت قمر ولبست فستان أوف وايت بسيط وحطت ميك اب خفيف واهلها جهزوا وراحوا كلهم فرح أمل ووصلوا هناك وبدأوا كلهم يحتفلوا سوا وشافت قمر زمايلها البنات وسلمت عليهم وراحت قعدت جنب واهلها وفي اخر الفرح سمعت قمر الدي چي بيقول: ياريت كل الانسات يتفضلوا معانا عالبيست ورا العروسة عشان البوكيه 
قامت قمر وقفت مع زمايلها البنات ورا أمل، ورفعت أمل البوكيه عشان تحدفه وكلهم وراها بيقولوا: ١...٢...٣ 
وبدل ما أمل ترمي البوكيه لفت لقمر وسلمته ليها بابتسامة وفجأه لقت كشاف متسلط عليها وأمل خلت قمر تلف وراها فاتفاجأت قمر بأنس راكع على ركبه ونص قدام قمر وفاتح علبة فيها خاتم وبيقول في المايك: تتجوزيني 
بصت قمر لابوها بكسوف اما طارق فهز دماغه ليها بالموافقه، فقالت قمر: ايوه 
وجت واحده من وراهم ولبست قمر طرحة فستان ووقف أنس ولبس قمر الخاتم فايدها وقال: بحبك
قمر بابتسامة: وانا كمان بحبك اوي
قرب طارق منهم وباركلهم وحضن قمر فسأله أنس: ايه رأي حضرتك نخليها خطوبه رسمي
طارق باستغراب: ماهو رسمي اهو 
انس: لا اكتب على قمر دلوقتي
بص طارق لقمر وسألها: ايه رأيك؟ 
قمر: موافقه
فنادى أنس: هاتوا المأذون
ودخل مأذون بعمة وقعد أنس قدام طارق وكتبوا الكتاب، وبعد ما خلصوا قال أنس: مبروك
اتكسفت قمر وقالت: الله يبارك فيك
أنس: تعالي عاوزك في حاجه مهمه
قمر: ماشي 
وخرجوا بره القاعة ووقفت قمر قدامه وقالتله: قبل ما تقول اي حاجه، انت اللي بعت الورد
أنس: ايوه انا 
قمر: وعرفت ازاي اني بحب الورد الاحمر وكمان نوع الشيكولاته؟ 
أنس: من اصحابك ومن بروفايلك عالفيس بوك
استغربت قمر وسكتت شويه وبعدين سألته: وليه مقولتش لما سألتك في الكلية؟ 
أنس: عشان محدش من الطلبه يجرحك بكلمة لكن من بكره خلاص محدش له حاجه عندنا
ابتسمت قمر وسألته: حبتني ليه؟ 
أنس: لو قولت سبب يبقا بحبك عشانه، لكن مفيش هو ربنا أمر قلبي بحبك واني اشوف فيكي العوض منه عن كل حاجه وحشه 
قمر: بس انا...
مسك أنس ايديها وباسهم ورفع راسه ليها وقال بابتسامة صافية: مش عاوز اعرف، بس انا هعوضك عن كل حاجه وحشه وهنفتح صفحة جديدة ونكتبها سوا بطريقه ترضي ربنا
قمر: عندك حق 
قرب منها أنس واخدها في حضنه وهمسلها: عارفه بقالي قد ايه مستني الحضن ده؟ 
قالت قمر بفرحة وهي حاسه بالامان: قد ايه؟
أنس بفرحة: ٤ سنين يا مفترية
ضحكت قمر اما أنس فقال: الخطوبه دي ٦ شهور بس 
قمر: ان شاء الله..........

تعليقات



حجم الخط
+
16
-
تباعد السطور
+
2
-