رواية انتقام بمنطق الحب) الفصل الحادي والعشرون21بقلم امل احمد
دلفا يونس ورغد لغرفة ابنتهما وجدوها تجلس على الأرض تبكي ويدها ملطخة بالدماء
اتجهت رغد بلهفة ورفعت رأس ابنتها وجدت الدماء تسيل من أنفها أردفت : تااااني يا روفيدة رجعنا للحر وقرفة من تااااني
يونس بقلق: الدم ده سببه ايه ؟
رغد : روفيدة عندها سيولة في الدم يا يونس في الصيف بيحصل معاها كده على فترات
أنهت حديثها وهي تمسك رأس ابنتها تقدمها للأمام وهي جالسة وتضغط على أنفها برقة من الجانبين
يونس : أنتي بتعملي ايه ؟ مش المفروض ترجعي رأسها لورا عشان النزيف يوقف
رغد: لا غلط كده الدم الفاسد هيرجع تاني ، ممكن تسكت يا يونس أنا عارفة بعمل ايه؟لانها مش أول مرة تحصل معاها
بعد دقائق توقف النزيف
احتضت رغد طفلتها وهي تربت على ظهرها بحنية حتى ذهبت لنوم عميق
نهضت من على الأرض وحملتها بين يديها ووضعتها على فراشها
أردفت: كده تمام
ونظرت ليونس لاحظت تغيرات ملامحة أردفت : روفيدة كويسة يا يونس أطمن دي بس عشان أول مرة تشوفها كده بس صدقني دة طبيعي والله أنا أول مرة كنت زيك كده ويمكن أكتر بس خلاص تقبلت الأمر عادي
خارج المركز الطبي
انتهى كل من ساعات عمل إياد وأميرة
إياد : استني يا أميرة أوصلك
أميرة : لا شكراً عارفة طريقي كويس أوي يا دكتور ، وبعدين بعد ساعات العمل لا تعرفني ولا أعرفك
إياد : خايفة مني ليه كده ؟
أميرة : مفيش حاجة تستدعي للخوف ابعد عني وعن خصوصياتي يا إياد بقولك ممكن
عن إذنك وتركته ورحلت
إياد: لا يا أميرة مش هبعد عنك لازم اكتشف سرك الغامض
في منزل يونس
يونس : لسه مصممة برضة ذي ليلة أمبارح هنام على الأرض
رغد : أنت لو شاطر وحليت اللغز مكنش ده هيكون حالك
يونس : أمري لله لغز النهاردة ايه ؟
رغد: شئ ينكسر دون لمسة أو كسرة؟
يونس : قولتي ايه ؟ ازاي ده
رغد : سهلة جدا يا يونس
يونس : مش عارف يا رغد
رغد : الوعد ، مش كل الوعود نقدر نوفي بيها ، في وعود غصب عننا بتتكسر أو ممكن تحصل بأرادتنا
يونس : قصدك ايه باللغز ده
رغد : ولا حاجة يا يونس
يونس : عارف يا رغد أن كسرت وعدي ومكنتش قد كلامي بس للمرة المليون بقولها لك كان غصب عني ، حاولي تقفلي أبواب الماضي عشان نعرف نعيش الحاضر والمستقبل
رغد : بحاول يا يونس ، تاخد لغز تاني
يونس : قولي
رغد :ما هو الشئ كلما زاد قل ما تراه ؟
يونس : تصبحي على خير يا رغد
رغد بضحك : الظلام يا يونس
ذكاءك ضايع خالص
يونس : ضايع معاكي أنتي بس " ساحرة قلب يونس ووتينه"
رغد كنت عايز اقولك على حاجة كده
رغد : حاجة ايه ؟
يونس : ياريت أي حاجة تكون بينا مش لازم مامتك تعرفها ؟
رغد : قصدك ايه ؟
يونس : أنا عارف أنك بتحبي مامتك وقريبة منك وهي عمرها ما هتتمنى لك الوحش بس ياريت علاقتنا يكون فيها خصوصية شوية بمعني مش كل حاجة تحصل بينا تقولي لها حتى لو كانت تافهه عموما أي علاقة ناجحة بين أي طرفين يعتمد على السرية يعني مثلا حصل بيني وبينك مشكلة أي كانت بلاش ندخل بينا طرف تالت لأن ده هيسبب مشكلة أكبر لان كل مشكلة ليها حل وهنتصالح بس مشكلة الطرف التالت ممكن يشكك في علاقتنا
رغد : قصدك أن ماما عايزة تعمل مشاكل بينا يا يونس أنت واعي لكلامك أنا عارفة من الأول أن علاقتك أنت وماما مش قوية بس متوصلش للدرجة دي
يونس بهدوء : مش قصدي يا رغد بالعكس خالص مامتك أنا يحترمها جدا انتي فهمتيني غلط كل الحكاية أن عايز خصوصيتنا متخرجش برة اللي عايز أوصله ليكي أي كانت المشكلة بينا ونحلها سوا بيني وبينك هيكون أفضل بكتير مش هيكون ليها أثار نتائج سلبية ليا وليكي
رغد : تمام يا يونس فهمت قصدك
يونس : متزعليش مني يا رغد
رغد : خلاص يا يونس ممكن تنام تصبح على جنه
وتركته وتسطحت على الفراش
التقط يونس الشرشف ووضعة على الأرض وفوقة الوسادة وتسطح على الأرض وذهب في نوم عميق
في غرفة أميرة تجلس على فراشها بحيرة أردفت وسط شهقاتها : لييييييه يا آسر توصل حالتي لكده ليه تدمرني بالشكل ده بسببك مش عارفة أثق بحد ولا أكون علاقات خدت ثقتي مني وكل طموحي مني خدت أماني وراحتي وسعادتي وخدت منك الوجع والخذلان والانعزال ،بسببك مش قادرة أثق في حد حتى لو صادق معايا لدرجة اني أوقات بكدب احساسي حتى لو صح
عايزة أقرب من إياد وخايفة يخذلني وخائفة أبعد أندم وأكون ضيعت فرصة حقيقية من إيدي
بعد ثلاثة أشهر
في الإسكندرية
في منزل الصاوي
تقف رانيا أمام المرآة تتفحص بطنها المنتفخة يأتي حازم من خلفها ويطوقها بذراعية ويستند بذقنه على كتفيها أردفت : شوفت يا حازم نص الخطر عدى وأول ثلاثة شهور خلصوا بسلام ، وان شاء الله النص التاني يعدي وابننا ينور حياتنا ودنيتنا
حازم : أن شاء الله يا حبيبي ، كرم ربنا كبير أوي وحسن الظن بيه قوي وأنا واثق أن زي ما كرمنا في أول الطريق هنوصل لبر الأمان في النهاية
رانيا : يارب يا حازم ، عارف فعلا رب الخير لا يأتي الا بالخير بس كل شئ بأوانه كل حاجة في وقتها المناسب بتكون ليها ميزة مختلفة ، فعلا ترتيبات ربنا أحلى بكتير بس محتاجة صبر كل ما تصبر تكون النتيجة أجمل وأحلى
في منزل الدمنهوري
يامن : وبعدين يا مي معاكي كمية الخوف دي غير طبيعية
مي : غصب عني يا يامن ، بحاول بقدر الإمكان أكون أم سوية من البداية مش عايزة عيالي يكونوا زي ويكبروا ويكونوا عندهم عقدة نفسية مش عايزاهم يمروا بالمراحل اللي أنا مريت بها
يامن : بس مش لدرجة دي كده ممكن تقلب عندك " عقدة أمهات"
عزيزي القارئ عقدة الأمهات هي عقدة نفسية تكون عند الإناث بنسبة متفاوتة وهي آثار لعلاقة الطفولة بينها وبين والديها تؤدي فيما بعد إلى الاهتمام بالأطفال بشكل مبالغ فيه أو الإهمال
طبعا اللي قرأ الجزء الأول عارف العقدة اللي كانت عند مي واتعافت منها ازاي هل ممكن آثار العقدة دي تؤثر في تربيتها لابنائها ؟
مي: يا يامن افهمني مش عايزة عيالي يكونوا ضحية زي ما أنا كنت ضحية أنت مش عارف أنا وصلت لايه ؟
يامن :عارف بس ده كان غصب عنك بس الوضع اتغير دلوقتي يا مي أنا معاكي وجمبك وهساعدك بس بلاش الأمور توصل لكده عشان نعرف نسيطر عليها في المستقبل سهى وسراج حاليا معندهمش إدراك ولا وعي لم يكبروا شوية وأنتي معاهم بالشكل ده هيخافوا منك وهيبعدوا منك مش هيقربوا ، الاهتمام والاهمال والرعاية الزيادة عن اللازم مش حلوة كل أم بتهتم بعيالها وتخاف عليهم بس مش كده
اقترب منها والتقط كفها واردف : زي ما قدرتي تعدي عقدتك هتقدري تعدي أثارها
في القاهرة
يونس : كفاية يا رغد ثلاثة شهور أنا زهقت بجد
رغد : زهقت من ثلاثة شهور يا يونس ، طيب أنا انتظرت واتعاقبت أربعة سنين
يونس : أنا حاولت بقدر الإمكان أراضيكي ، ونفذت كل اللي أنتي عايزاة بحاول أكسر سور الماضي اللي عامل حد بينا بس مقدرتش ومراعي وجود روفيدة بس أنا تعبت من الوضع ده
رغد : وأنا ذنبي اييييه مش عارفة يا يونس أنا كمان أتعود اللي حصل لي مش قليل كل ما أحاول أنسى وأبدأ من جديد مش عارفة أوصل عارف علاقتي بيك زي ايه ؟
زي البحر من بعيد صافي وهادئ ومن قريب مالح وعميق لا قادرة أقرب ولا قادرة أبعد
يونس : يبقي نغير الطريقة ونستخدم طرق تانية
رغد : زي ايه ؟
يونس ...............
"كانت غريبة ولكن الآن أصبحت جزء لا يتجزأ من حياتي ، علمت بملامحها الحزينة دون القرب منها ، كل يوم أرى كحل عينيها يذوب فيبكي القلب معها ، قد جاءت لحظة الانفجار المفاجئ لتكشف كل شئ"
_ أمل أحمد
خارج المركز الطبي
يسحب إياد ذراع أميرة بعنف
أميرة : أنت أتجننت أبعد عني يا إياد
ولكن إياد متجاهلا حديثها ، أخذها لمكان بعيد عن أنظار الجميع أردف وماذال ممسك بذراعيها : ثلاثة شهور وأنا متحمل كلامك الغامض وتجاهلك وتقلك عليا بس خلاص جبت أخري للصبر حدود ، المركز كله واخد باله إلا أنتي ده حتى المرضى لاحظوا نظراتي ليكي وانتي في عالم تاااني ، كل ما أحاول أقرب تبعدي أقرب خطوة تبعدي عشرة لييييه كده أفهم ليه ؟
كل البنات تتمنى نظرة مني أو كلمة بس أنا عايز قربك أنتي مش عايز غيرك يا أميرة
أميرة : بس أنا مش عايزة قرب حد مني لا أنت ولا غيرك ومش عارفة أصلا بتعمل معايا كده لييييه
أردف بصوت عال : عشان بحبك
أميرة ودموعها مهددة بالسقوط : وهتفضل تحبني حتى لو عرفت اني مطلقة ؟
أفلت ذراعها وعاد خطوة للوراء أردف بذهول وصدمة ............