الفصل الثالث3
بقلم مريم احمد
ناديه بصدمه: مدام زينه!!
نور بدهشه:إيه دا انتوا تعرفوا بعض!؟
زينه بإبتسامه: اه شوفتها انهارده دي البنت اللي قولتلك عليها
نور بفرحه: بجد
ابتسمت بمجرد اني عرفت ان سيرتي جت في حاجه حلوه و لاقتهم حضنوني و رحبوا بيا أكتر
زينه: طبعا انتي بتسألي انا اي اللي جابني هنا صح
ناديه بتشتت: اه
نور: طنط زينه تبقي أقرب صاحبه لماما و هي كمان جارتنا هنا
ابتسمتلهم بفرحه و بصتلهم بحب عشان طريقتهم الكويسه الي اتعاملوا بيها معايا و حسيت فعلا ان كل حاجه بتقعد و عشان انا بتعامل مع الناس بحب لاقيت ان ربنا بعتلي ناس تحبني بجد
والدة نور: بصي يا حبيبتي انا اسمي سهي بس انتي قوليلي يا ماما
هزتلها دماغي بفرحه مع ابتسامه
سهي: تعالي اوريكي اوضتك
روحت معاها و كنت مبسوطه
سهي : ارتاحي شويه علي ما احضر الاكل
و خرجت و قفلت الباب وراها
ظبط نفسي و حاجتي و من تعب اليوم اعتذرتلها عن العشا و نمت
*****الصبح****
كنا قاعدين بنفطر و لاقيت نور بتسألني انتي في كليه ايه؟
ناديه: حقوق
نور: إيه دا بجد ماما برضو محاميه
بصيت لطنط و ابتسامتلها
سهي: انتي فاضلك قد ايه و تتخرجي
ناديه : انا في اخر سنه خلاص و قربت امتحن
'دعولي كلهم ان ربنا يوفقني'
شكرتهم علي الفطار استأذنت منهم عشان انزل الشغل
جهزت و نزلت و اليوم عدي بس كان يوم متعب اوي بالنسبالي كانت الطلبات مبتخلصش و عشان انا بطبعي سريعه و بتحرك كتير ف كان الضغط عليا انا
في اخر اليوم عرفت ان المدير عايزني روحتله و اذنلي بالدخول دخلت و لاقيته بيشكرني علي مجهودي الي بذلته انهارده
ناديه: علي ايه دا واجبي
تلقيت منه رد خلاني في فرحه لا توصف و هو انه زودلي المرتب شويه
شكرته بإمتنان و حمدت ربنا و استأذنت منه و خرجت، رجعت البيت و انا مبسوطه اوي و حكيتلهم و قولتلهم بسعاده قد ايه الجزء الي زاد في المرتب هيساعدني و كلهم فرحوا لفرحتي و طنط سهي قالت لنور تروح تجيب مدام زينه
اتجمعنا كلنا و كان يوم جميل بعد كدا لاقتهم بيسألوني عن الي حصلي و ايه السبب الي خلاني كدا
حكيتلهم كل حاجه و قولتلهم اني مش هسيب حقي و اني هعمل اسمي بنفسي و هثبت للكل اني شقيت و تعبت عشان ابقي حاجه كبيره مش طالعه بالوسطه و الكلام الفارغ دا
نور : ماما هتساعدك
سهي : خلصي امتحانات و انا معاكي
شكرتها و هي حضنتني و بعدين استأذنت منهم و دخلت اوضتي اتوضيت و صليت و حمد ربنا انه واقف جمبي و انه موقفلي الناس الكويسه معايا
*** عدي ايام و شهور و جي اول يوم خلصت فيه الامتحانات***
كنت راجعه مبسوطه ان خلاص كل حاجه قربت و اني قريب اوي هنتقم لأجل كرامتي و اجيب حقي فتحت الفون اشوف اخر اخباره الي هتفدني و الي ممكن تساعدني اني اوصل لحاجه بس زي ما توقعت ملقتش حاجه تفيدني بالقدر الكافي دعيت ربنا انه يساعدني و بعدها نمت
بعد وقت صحيت علي صوت الفون كان رقم غريب مردتش لكن لاقيت الرقم مُصر و كل شويه يتصل رديت اشوف مين
ناديه: السلام عليكم
مجهوله بصوت باكي: و عليكم السلام *و بعدين كملت بتساؤل لتأكيد ظنها* :ناديه؟
قولتلها : اه *و كملت بتساؤل*مين معايا؟!
تلقيت اجابتها و اتصدمت من الي سمعته