الفصل الاول1
بقلم ايه الموافي
كانت لابسة طاقية وحاطة شنب رجالي، بصت بخبث للبنت اللي لابسة لبس مايع، وقالت:
- فهمتي هتعملي ايه؟!
البنت وهي بتاخد الفلوس منها وبتاكل اللبانة بطريقة مايعة:
- فهمت يا ابلتي.
مشت البنت من قدامها وسارة صاحبتها بصتلها وقالت:
- انتي متأكدة من اللي انتي بتعمليه دا؟!
مها وهي بتعدل الباروكة:
- اه متأكدة ويستاهل اللي هيجراله.
حطت مها ايدها على وسطها وكملت كلامها بغيظ وقالت:
- بقى انا اروح استنجد بيه واقوله يعمل اى حاجة علشان يوقف الجوازة يقوم البيه قايلي انه مش مهتم بالموضوع والمفروض نتجوز زي ما عيلتنا عايزة وخلاص!!
لا واللي يفرس في الموضوع ان البيه منفض دماغه لدرجة انه راح حفلة صاحبه واحنا جوازنا الاجباري المفروض بعد بكرة.
بصتلها سارة بغيظ وقالت:
- تقومي فاضحاه والواد يعيني برئ.
مها بتشفي:
- يستاهل، واخرسي بقى علشان اوثق اللحظة الجميلة دي.
طلعت مها موبايلها وهي شايفة سوزي البنت اللي اجرتها بتقرب منه، كان ادم بيلعب في موبايله بزهق بس قربت سوزي من ادم وقالت وهي بتغمز:
- ايه الطعامة دي يا ولاد، مصلحة ولا مروح يا قمر.
بصلها ادم بصدمة من لبسها الفاضح وقال بإرتباك:
- ب بتكلميني انا!!
ضحكت سوزي برقة وقالت وهي بتحط ايدها على كتفه:
- انت مالك متخشب كدا ليه ما تفك يواد.
بعد ادم عنها وقال بتوتر:
- ابعدي عني يا ست انتي.
كانت مها بتصور كل اللي بيحصل وهي بتبسم بشماتة، حضنت سوزي ادم مرة واحدة ومها صورتهم بسرعة وهي بتقول:
- علشان تبقى تقولي ان الموضوع مش فارقلك، البس بقى يا معلم .
زق ادم سوزى بسرعة وقال بعصبية:
- ابعدي عني يا ولية انتي.
شهقت سوزي بصدمة، وقالت بشرشحة:
- ولية مين يدلعاادي انت اعمى ومبتشوفش ولا ايه يالا؟!
اتنططت مها في مكانها وقالت وهي بتسقف:
- الله، هتحصل شكلة يارب تجيبه من شعره يارب.
ضحكت سارة عليها ورجعت خطوة لورا بس خبطت في واحد من غير ما تقصد، وقع العصير اللي كان في ايد الراجل فقال بزعيق:
- مش تفتحي يا عامية.
اتحرجت سارة اوي وكانت لسة هتعتذر منه بس مها قالت بعصبية وهي بترفع حاجبها:
- ما تهدى شوية يا شبح.
بصلها الراجل بصدمة وقال:
- ازاى انت ولد وصوتك بنت!!!
بلعت مها ريقها وقالت:
- احيه.
مسك الراجل الباروكة بتاعتها وشدها جامد فظهر شعرها الطويل، الراجل بصدمة:
- انتي بنت ومتنكرة!!
اتعصبت مها اوي ومقدرتش تمسك نفسها فقالت بزعيق:
- وانت مالك امك انا متنكرة ولا لا؟!
بصلها كل اللي في الحفلة من زعيقها بما فيهم ادم وسوزي اللي كانت لسة بتشرشحله، قرب ادم منها وقال بصدمة:
- مها! انتي بتعملي ايه هنا وايه اللي عملاه في نفسك دا؟!
بصتله مها بإرتباك وقالت بصوت واطي:
- لقد وقعنا في الفخ.
لطمت سارة على وشها لما حست انهم انكشفوا، وكان لسة ادم هيتكلم بس الرجل مسك ادم من قفاه وقال بعصبية:
- طالما انا مبمدش ايدي على حريم والبت دي تخصك فحسابي هيبقى معاك انت.
شهق ادم بصدمة وقال وهو بيبص على عضلاته برعب:
- ومين قالك اني تبعها انا معرفهاش.
ابتسمت مها بخبث، وقالت:
- هو ايه دا اللي متعرفهاش.
بصت مها على الراجل، وقالت:
- دا جوزي حضرتك وهو هيقطعك علشان ضايقتني.
لطم ادم على وشه، وقال برعب:
- هتوديني في داهية الله يخربيتك، صدقني انا مش جوزها دي بتضحك عليك انا معرفهاش.
قربت سارة من مها وقالت بخوف:
- انتي بتعملي ايه دا الراجل هيفرمه.
مها بخبث: ودا المطلوب.
الراجل بعصبية: انجز انت وهي انتوا تعرفوا بعض ولا لا.
مها بسرعة: دا ابن عمي وقريب اوي هيبقى جوزي.
سابه الراجل وقال بشر وهو بيشمر الكم:
- استعنا على الشقى بالله.
زقه ادم بسرعة وطلع يجري على بره فبص الرجل على مهما بشر وقال:
- كنتي بتقوليلي بقى يا روح امك صح!!
بلعت مها ريقها وقالت: هو السحر اتقلب عليا ولا ايه؟!
شدتها سارة بسرعة، وقالت وهي بتجري:
- اجري يا بنت المجنونة.
جرت مها بسرعة وهي بتصوت فجرى الراجل وراهم وهو بيقول:
- مش هسيبكم.
مها بصريخ وهي بتجري:
- وانت مجرتش وراه هو ليه ولا بتتشملل علينا احنا بس.
سارة بصريخ: اخرسي بقى الله يخربيتك.
سابت مها ايد سارة وقالت:
- اجري من الحتة التانية على ما احاول اتوهه.
سارة: انتي متأكدة؟!
مها بعصبية: انجزي بدل ما نتعمل انا وانتي كفتة.
جرت سارة من الناحية التانية ومها فضلت تجري من حواري علشان تتوهه الراجل، وقفت علشان تاخد نفسها شوية وبعدين واصلت الجرى.
• في حتة تانية
كان قاعد ببرود وكل رجال الاعمال بيحاولوا يتكلموا معاه علشان يعملوا صفقة مع بعض، اتنهد بملل وهو حاسس بالخنقة فقام من مكانه علشان يعد في في مكان تاني بس نفخ بعصبية لما لقى ناني في الحفلة.
هرش في دماغه وقال بزهق: اخلع منها ازاى دي بت لازقة؟!
شافها وهي بتدور عليه بعيونها فاتسحب من وراها وخرج بره بسرعة، اول ما خرج مراد افتكر انه اجى مع صاحبه بالعربية بتاعته، كان لسة هيطلع الموبايل علشان يرن عليه بس وسع عيونه بصدمة لما لقاها بتخرج بره
مفكرش مراد كتير وطلع يجري بسرعة ونسى انه رجل اعمال وليه هيبته، بس مهتمتش، اهم حاجة انه يخلع منها، بص وراه وهو بيجري علشان يشوفها شافته ولا لا بس اتخبط جامد في حد ووقعوا هما الاتنين على الارض.
رفع مراد حاجبه وقال من غير ما يبص على اللي خبط فيه:
- لو انت اعمى ومبتشوفش يبقى متنزلش من بيتك يا حيوان.
قامت مها من مكانها وهي بتقول بعصبية:
- مين فينا اللي اعمى يا حيوان انت؟!
اتصدم مراد لما عرف انها بنت بس اتعصب لما هي شتمته فقام من مكانه وقرب منها وهو بيقول بحدة:
- انتي قولتي ايه؟!
حطت مها ايدها على وسطها وقالت بشرشحة:
- لو انت مفكر انك لما تبرقلي زي دراكولا انا هخاف منك لا يابا فوق.
مراد بصدمة: يابا.
بصتله مها من فوق لتحت وقالت بعد ما صفرت:
- شكلك يالا ابن ناس، ايه البدلة الجامدة دي؟!
اتعصب مراد وقال بزعيق:
- بدلة ايه بقى ما الهانم علشان مبتشوفش وقعتني والبدلة اتبهدلت.
بصتله مها بسخرية وقالت:
- ياختي بطة، زعلان علشان البدلة اتوسخت يا جميلة.
شدها مراد من هدومها وقال بعصبية:
- اتلمي يا بت انتي بدا ما ازعلك.
مسكته مها هي كمان من هدومه وقالت بزعيق:
- تزعل مين يالا لا حاسب.
مراد بزعيق: يابت اتلمي دا انتي متجبيش نص طولي يا اوزعة.
شهقت مها بصدمة وقالت: انا اوزعة!!
ابتسم مراد بإستفزاز وقال: اه.
اتعصبت مها اوي فزقته جامد فاتكعبل مراد بسبب الطوب الصغير على الارض وووقع جامد ومها فوقه، بصوا لبعض بصدمة فزقته مها بسرعة وقامت بإحراج، قام مراد من مكانه وقال بتكبر:
- البدلة دي انا هرميها في الزبالة علشان انتي لمستيها.
جزت مها على اسنانها بس ابتسمت ابتسامة صفرا وقالت:
- انت اللي جبته لنفسك.
بصلها مراد بعدم فهم وهو مرتبك من ابتسامتها، نزلت مها مرة واحدة على الارض وجابت طوب وفضلت تلقه عليه.
اتصدم مراد اوي وصرخ بعصبية ونزل هو كمان وجاب طوب وفضل يلقه عليها، شهقت سارة بصدمة وهي بصه ورا وسابت كل حاجة في ايدها وطلعت تجري بخوف، ابتسم مراد بغرور وقال بصوت عالي:
- ناس تخاف متختشيش.
بص مراد وراه علشان يمشي بس شهق لما لقى كلب اسود بيجري ناحيته، ساب مراد كل حاجة في ايده وطلع يجري وهو بيصرخ:
- عاااااايامامااااا.
فضل مراد يجري والكلب وراه وهو بيقول:
- بقى بنت الواطية تجري ومتقوليش.
دخل مراد في اول باب حوش قابله وقفل على نفسه بسرعة، اعد مراد على الارض وهو بيتنفس بسرعة، وقال:
- يارب ميكون حد شافني، شكلي بقى عرة اوي.
لما هدى مراد شوية قام من على الارض وفضل ينفض هدومه وهو بيقول:
- بقى انا مراد باشا يحصل فيا كل دا وبسبب بت مفعوصة.
ابتسم مراد بشر وقال:
- اعرف بس هي مين وانا هوريها ازاى تجري وتسيبني كدا.
فتح مراد الباب براحة علشان يشوف الكلب موجود ولا لا، خرج بره ورن على صاحبه، اول ما صاحبه رد قال مراد بعصبية:
- انا فين!!
مروان بعدم فهم: مين اللي فين، قصدك انا فين.
هرش مراد في دماغه وقال بعصبية:
- انا هبعتلك اللوكيشن وتيجي تاخدني حالا.
مروان: طب انت متعصب ليه؟!
مراد بغيظ: علشان انا اعدت اقولك نروح بعربيتي انا بس انت اللي نشفت دماغك.
كان مروان لسة هيتكلم بس مراد قال ببرود:
- انت لسة هتتكلم، انجز.
قفل مراد في وشه وهو بيبص حواليه بخوف للكلب يجي تاني.
• عند مها
دخلت البيت وهي بتتسحب وخايفة ليكون ادم قالهم، وسعت عيونها بصدمة لما لقت ادم قاعد في الصالة مع عيلتها وهو بيبتسملها بشر، لطمت على وشها وهي بتقول:
- ليلتك سودة يا مها.
بصتلها وفاء مامتها وقالت وهي بتجز على سنانها:
- انتي كنتي فين؟!
كانت لسة هتعتذر على اللي عملته، بس ادم قال بسرعة:
- تلاقيها كانت بتقابل صاحبتها ولا حاجة.
بصتله مها بصدمة وهي بتقول في سرها:
- هو مقلهمش ولا ايه؟!
قام ادم من جنبهم وقل بغيظ:
- مش كدا برضو يا بنت عمي.
هزت مها راسها بسرعة وقالت: اه
رفعت وفاء حاجبها وقالت:
- بعد كدا لما تخرجي قوليلي.
مها بتوتر: حاضر يا ماما.
دخلت وفاء علشان تعمل عصير في المطبخ وادم قرب من مها بملامح جحيمية، ابتسمت مها ببلاهة، وادم قال بحدة:
- انا تعملي فيا كدا.
مها بتوتر: وانا عملت ايه يعني مش المفروض انك هتبقى حوزي وتحميني.
اتصنعت مها البكا وقالت: ولا انا مهمكش علشان هنتجوز اجباري، دا حتى يا اخي احنا قرايب، اخص عليك لا لا انت متستاهلش تبقى ابن عمي.
حط ادم ايده على ايده التانية وقال ببرود:
- خلصتي؟!
بصتله مها بعدم فهم وادم شدها من هدومها جامد، شهقت مها بصدمة وقالت:
- ايدا في ايه؟!
قرب ادم من وشها وقال بغيظ:
- انا مبتكلمش على الراجل اللي قد الحيط اللي كنتي هتخليه يفرمني، انا بتكلم على اتفاقك مع البت المايعة علشان تصوروتي وهي بتقرب مني.
اتجمدت مها في مكانها وهي بصاله بصدمة، فابتسم ادم بغضب وهو بيقول:
- ايوه عرفت.
مسك ادم موبايلها اللي كانت مسكاه في ايدها ومسح صوره هو وسوزي ورجعهولها تاني، بصتله مها بإستغراب: طالما انت عارف مقولتش ليه لامي وابويا على اللي انا عملته.
سابها ادم ببرود وقال: علشان ميحصلش مشاكل والجوازة متتأجلش.
زقته مها بعصبية وقالت: ولا انا بحبك ولا انت بتحبني، ليه بتعمل كل دا!!
ادم ببرود: علشان استلم شركة ابويا.
بصتله مها بصدمة وقالت:
- هو ابوك قالك لو انت اتجوزتني هيحليك تمسك شركته.
ادم: اه.
اتملت الدموع في عيون مها وقالت بحزن:
- هو انتوا ليه بتعملوا معايا كدا، يعني فوق ان جوازنا من بعض اجباري كمان مصلحة، هو انا مش بني ادمة ومن حقي اتجوز اللي احبه ويحبني.
اتنهد ادم بحزن وقال:
- من حقك طبعا بس صدقيني دا مش بإيدي، انا اعدت سنين طويلة بحلم ان بابا يخليني استلم شركته علشان انفذ الفكرة اللي في دماغي واكبر الشركة بس هو مش راضي غير لما اتجوزك.
مها: وانا بابا ايه مصلحته علشان يوافق يرميني كدا؟!
ادم: ابوكي ملوش مصلحة يا مها بالعكس دا نفسه يجوزني ليكي علشان يطمن عليكي لانه عارف اني عمري مهأذيكي علشان انتي بنت عمي ويعتبر كنا اخوات.
مها: اديك قولت اهو اخوات، يبقى ازاى نتجوز.
اتنهد ادم بتعب وقال:
- مش هنكر اني بعتبرك اختي، بس ليه منديش لبعض فرصة مش يمكن ننفع؟!
ابتسمت مها بسخرية وقالت:
- محدش هامه غير نفسه.
دخلت مها اوضتها ورزعت الباب في وشه وهي بتمنع نفسها من البكا، اتنهد ادم بحزن ونزل من البيت.
• عند مراد
كان واقف مستني مروان وهو مش طايق نفسه، وقف مروان العربية قدامه ونزل منها وهو بيقول بصدمة:
- ايه اللي مبهدلك كدا؟!
نزلت ناني من العربية فبص مراد لمروان بغضب وقال:
- ايه اللي خلاك تجيبها؟!
ضحك مروان ببلاهة: بتبصلي كدا ليه وانا مالي يا لمبي؟! دي هي اللي شبطت فيا لما عرفت اني جايلك.
سمعتهم ناني فقالت وهي بتقرب من مراد:
- بقى كدا يا مراد، وانا اللي جيت علشان انت وحشتني.
ابتسم مراد بسخرية وقال:
- وايه الجديد ما انا كل مرة بوحشك؟!
ناني: هو ايه اللي حصلك؟!
جز مراد على سنانه وقال:
- اصل كان في كلب بيجري ورايا وكلبة مسعورة خلعت وسابتني.
تنح مروان وهو بيبصله وقال:
- كلبة خلعت وسابتك ازاى يعني؟!
اتأفف مراد وقال وهو بيركب العربية:
- محدش يتكلم معايا علشان انا على اخري وممكن اطين عيشتكم كلكم.
بلع مروان ريقه، وركب بسرعة وناني ركبت وهي بتبص على مراد بهيام، كتم مروان ضحكته بصعوبة لما لقى ان مراد مش طايق نفسه بسبب ناني.
بصله مراد بتبريقة وغيظ فساق مروان العربية بسرعة، بعد ما وصل مروان ناني لبيتها قال مراد كل حاجة لمروان، انفجر مروان في الضحك وقال وهو مش مصدق:
- بقى كل دا يحصلك انت!!
صرخ مراد وقال: هو انا بقولك علشان تهديني ولا علشان تغيظني اكتر.
وقف مروان ضحكته بصعوبة بس مقدرش وضحك بصوت عالي وهو بيقول:
- هموت واشوف البنت اللي قدرت تعمل فيك كدا، بقى مراد السيوفي حتت بت تعلم عليه!
صرخ مراد بعصبية وقال وهو بيقرب منه:
- علمت عليا!! طب ايه رأيك بقى لما اعلم عليك انت؟!
جرى مروان بسرعة وهو بيقول: يا لهوي.
مراد بغضب: تعالا هنا.
مروان بضحك: وهو انا مستغني عن عمري يا اخويا علشان اسلمك نفسي.
وقف مراد في مكانه علشان ياخد نفسه شوية، فقال مروان وهو بيضحك:
- اكيد شكلك كان مسخرة وانتوا بتلقوا بعض بالطوب.
احمرت عيون مراد من الغضب وطلع يجري وراه بسرعة فصرخ مروان وهو بيجري على الاوضة:
- يا عمو محموووود.
اجى ابو مراد بسرعة وهو بيقول بخوف: في ايه يالا؟! حصل حاجة؟!
مروان وهو بيستخبي وراه:
- ابنك الهولاكو هياكلني.
مراد بغضب وهو بيتجه ناحيته:
- انت كمان بتسخبى مني ورا ابويا.
بصله محمود بصدمة وقال: انت ايه اللي مبهدلك كدا؟!
بص مراد على نفسه وقال بغيظ:
- هو انا كل ما اكلم حد يقولي ايه اللي حصلك؟!
محمود: وانت مش شايف نفسك ولا ايه؟!
بص مراد على مروان فرقص مروان حواجبه علشان يستفز مراد، صرخ مراد فيه وقال وهو بيشمر هدومه علشان يضربه:
- وكمان بتستفزني، دا انت ليلتك سودة معايا.
مروان وهو بيمسك في محمود من ورا:
- شوفت يا عمي عايز يضربني ازاى ومش عاملك اعتبار.
بص محمود لمراد وقال: وانا مش مالي عينك ولا ايه؟!
بلع مراد ريقه وقال: لا طبعا يا حج متقولش كدا.
محمود: ايوا كدا.
طلعت بوسي ام مراد على السلم وقالت:
- انتوا صوتكوا عالي ليه؟!
مروان: ايه يا بوسبوس اخبارك ايه؟!
مسكه محمود من قفاه وقال بغيرة:
- ولما اديك على قفاك هتبقى مبسوط؟!
بصله مروان بخوف وقال: اهدى يا حجوج.
بصله مراد بشماتة وقال:
- اديله يا بابا ومترحموش.
بصله محمود ببرود، وقال: اسكت انت كمان.
ضحك مروان عليه وفلت نفسه من ايدين محمود وقال:
- انتي عاملة عشا ايه يا حبيبة قلبي انتي.
صرخ مروان لما اداله محمود بالقفا وهو بيقول بعصبية:
- انت بتعاكسها وقدامي.
ضحكت بوسي عليهم وقالت:
- دا قد ابني يا محمود.
محمود بغيظ: ولو، برضو يحترم نفسه.
بصلهم مراد بملل وقال:
- لو خلصتم ممكن تنزلوا تحت علشان صوتكم عالي وانا مش عايز اى ازعاج.
ابتسم محمود بخبث وقال وهو بيقلع حزامه:
- طبعا يا حبيبي.