رواية حب مستحيل الفصل الاول1والثاني2بقلم ايمان شلبي
-نعممممم بقي انا اناااا الدكتوره فلك اتجوز واحد فلاح ؟
بابا بحده :
-وماله بقي الفلاح مش بني آدم زينا
هزيت راسي بهستريه :
-لا لا يابابا انا مش موافقه لا ارجوك مش عايزه اتجوزه عشان خاطري مترمنيش الرميه ديه و....
بابا وهو بيشاورلي بأيده بجمود وإصرار :
-ولا كلمه زياده انا خلاص اخدت قراري وهتتجوزي "هادي" ابن خالتك يلا اتفضلي علي اوضتك يلا
طلعت اجري علي اوضتي وانا بعيط وفجأه خبطت في جسم صلب ،رفعت راسي لقيته "آدم" أبن عمي
آدم بقلق :
-مالك بتعيطي ليه
رديت بصوت متقطع وانا بحاول اخد نفسي :
-ب بابا ب بابا يا آدم عايز يجوزني لهادي ابن خالتي الفلاح اللي بيحلب الجاموسه
فتح عيونه بذهول :
-انتي بتقولي ايه عمي بيهزر ؟؟
هزيت راسي بنفي :
-لا والله بيتكلم بجد وقالي خلاص انا اخدت القرار وهيجوزني غصب عني ا ارجوك يا آدم ارجوك اتصرف اعمل اي حاجه خلي بابا يرجع عن قراره انا استحاله اتجوز البني آدم ده المو*ت اهونلي من العذ*اب ده
شاورلي بأيده وهو بيحاول يهديني :
-خلاص اهدي طيب اهدي وانا هتصرف تمام
هزيت راسي ومسحت دموعي بكف ايدي زي العيال الصغيره وطلعت اجري علي اوضتي
قفلت الباب وروحت اترميت علي السرير وانا بدفن وشي في الغطا وبعيط بصوت مكتوم
عمري ما كنت اتخيل أن احلامي وطموحي وكل اللي بخططله من صُغري هيتحطم في لمح البصر !
طول عمري بحلم احلام تانيه خالص غير الواقع اللي بيفرض عليا نفسه
بحلم لما اتخرج من الكليه اعمل مستشفي بأسمي واكون انا المديره ،بحلم بقصه حب اسطوريه زي الروايات والافلام ،شخص يجي ينتشلني من حاله الضياع والفتور اللي عايشه فيها مع بابا من وقت موت ماما ،شخص يشاركني تفاصيلي بدون ملل أو كلل،شخص يستحملني ويحتويني في كل الأوقات ،بيت دافي مليان حب وامان ،اطفال صغيره بتجري هنا وهناك
طموحي واحلامي مفيش اسهل منها مطلبتش المستحيل ليه بيحصل فيا كده ؟!
ليه كل ما اتمني حاجه محققهاش
ليه سقف طموحي بينهار قدام عنيا وانا مش عارفه اعمل حاجه
الفون بتاعي رن
رفعت راسي وانا برد من غير ما اشوف الرقم
-الو
-ا احم ازيك يا فلك
ضميت حواجبي في بعض باستغراب :
-مين
-ا احم احم انتي مش عارفه صوتي
رديت بعصبيه:
-وانا اعرف منين صوتك ما تخلص وتقول انت مين ؟!
اتنهد تنهيده طويله ورد بهدوء :
-انا هادي
اتنفضت من مكاني وانا برد بذهول :
-انت
رد باستغراب :
-ايوه مالك اتخضيتي كده ليه
فضلت ادور في الأوضه زي المجنونه وانا برد عليه بعصبيه عمرها ما كانت من طبعي نهائياً
-بص بقي يابني آدم انت جواز من واحد فلاح زيك مش هيحصل تمام ؟
رد بهدوء عكس ما كنت متوقعه:
-ماله الفلاح اللي زي مش بني ادم يا فلك
-بني آدم بقي مش بني آدم انا مش هتجوز واحد زيك بيحلب الجاموسه وكل يوم في الغيط مع البهايم ويرجع نص الليل ريحته تقرف شبه وشه و.....
قاطعني المره ديه لكن بحده :
-الفلاح اللي بتتكلمي عنه ده احسن من ميه واحد مش بيشتغلوا ولا شايلين مسؤوليه ،الفلاح ده انضف منك ومن عشره زيك ،الفلاح ده لولا وجوده مكنتيش لقيتي طفح تطفحيه يابت عمي ،الراجل ميعبهوش شغله لكن اللي عيب أنه يفضل قاعد في البيت زي النسوان ...
"جماعه كل الفلاحيين علي راسي من فوق عشان محدش يفتكر اني بغلط فيهم بس ده تفكير بني أدمه سطحيه زي "فلك "
رديت بقرف وضيق:
-بقولك ايه مش وقت محاضرات الله يخليك انا مصممه علي رأي ومش هتجوزك روح شوفلك واحده فلاحه زيك ياسيدي انت مالك ومالي ؟!
رد بسخريه:
-كان بودي اعمل كده والله بس هنقول ايه لخالتي الله يسامحها هي السبب
قعدت علي طرف السرير وبهمس:
-ماما
-للاسف هي اللي طلبت مني اتجوزك ودي وصيه مي"ت مقدرش معملش بيها
سكتت وانا ببص قدامي بشرود والدموع بتلمع في عيني
عمري ما كنت اتخيل أن ماما ممكن تعمل فيا كده مع انها اكتر واحده عارفه اني مبكرهش في حياتي قد أهلها اللي في البلد وعاداتهم والجهل اللي هما عايشين فيه ،اكتر واحده عارفه قد ايه انا بكره البلد ديه ولما كنت بروح معاها زياره وانا صغيره بفضل طول الوقت مخنوقه وعايزه ارجع الفيلا في اقرب وقت !!
فوقت من شرودي علي صوته الهادي :
-انتي معايا
بلعت ريقي وانا برد بصوت مبحوح :
-ا انا انا مش قادره اصدق ان ماما تعمل كده ا أنت اكيد بتكذب عليا صح
-لا مش بكذب عليكي مامتك طلبت مني اعمل كده وانا بنفذ وصيتها بالرغم اني لا بطيقك ولا بطيق اشوف وشك في الحقيقه
الدم فار في دماغي ورديت وانا بصرخ في الفون :
-يعني علي الأساس أن انا اللي بطيقك يافلاح يابو جلبيه معفنه شبه وشك
سكت لحظه لكن صوت نفسه العالي واصل لودني
اتكلم من بين أسنانه بنبره كلها تهديد:
-انتي عارفه لو انتي قدامي دلوقتي كان زماني دفنتك مطرحك
بلعت ريقي بخوف وقلبي بيدق لكن حبيت ابين شجاعتي المزيفه
-بقولك ايه انت حالا تتصل علي ب بابا وتقوله انك مش عايز الجوازه ديه مفهوم ؟؟
رد ببرود :
-لا مش مفهوم
رديت بغيظ :
-انت معندكش كرامه يابني آدم بقولك مش بطيقك مش عايزاك مش طايقه اشوف وشك و...
قاطعني بعصبيه وجنون :
-اخررررررسي بقي اخرررررسي مش عايز اسمع صوتك
رديت بعند بالرغم من رعشه الخوف اللي احتلت كياني من نبرته اللي كلها غضب
-لا مش هخرس ومش هتجوزك غصب عني المو*ت اهون من أني اتجوز واحد زيك واعيش مع واحد زيك !
تيت تيت تيت
شيلت الفون من علي ودني وانا ببصله بصدمه وبجز علي اسناني
-الحقي*ر اللي مترباش بيقفل في وشي الفون طب وحياه امك ما هسيبك يافلاح يابني ادم براس بخاخه
الباب خبط رديت بعصبيه:
-مين
-انا آدم
اخدت نفس عميق في محاوله بائسه مني اني اكون هاديه بس للاسف خرجت نبره صوتي كلها عصبيه
-ادخل يا آدم
فتح الباب ودخل وهو بيقرب مني بجمود
فركت ايدي وانا بسأله بلهفه ممزوجه بتوتر :
-ها قدرت تقنع بابا أنه يرفض ؟!
حط وشه في الأرض وهو بيهز رأسه بأحراج:
-للاسف لا
رديت بنبره كلها عياط :
-بتهزر صح؟؟
رد بحزن ويأس:
-لا والله مش بهزر انا اسف يا فلك
قعدت علي طرف السرير وعيوني بتلمع بالدموع
آدم بحزن وهو بيقعد جنبي :
-هو انا ممكن أسألك سؤال ؟
هزيت راسي من غير ما انطق حرف وكأن طاقتي خلصت
-هو انتي ليه رافضه تتجوزي هادي هو بشع اوي كده
بصيتله بذهول :
-معقوله يا آدم انت اللي بتسألني السؤال ده ؟!
ده إذا كان انت بنفسك لما قولتلك اتضايقت
هز رأسه بتأكيد:
-انا اتضايقت وحاولت أقنع عمي أنه يرفض لانه علي حسب كلامك مش مناسب ليكي بس علي حسب كلام عمي اعتقد أنه شخص مناسب جدا وحتي شكله وسيم !
رديت باستغراب :
-هو بابا قالك ايه بالظبط ؟
-قالي أنه مهندس مساحه ومش عايش في البلد عايش هنا في شقه لوحده عشان شغله كله هنا وهيتجوزك هنا وشوفت كمان صورته
سألت بذهول:
-انت بتتكلم جد
-والله بجد انتي ازاي متعرفيش
رديت بضيق :
-بقالي حوالي سبع سنين مش بروح مع ماما الله يرحمها البلد ومش مهتمه اعرف حاجه عنهم كل اللي اعرفه اني مكنتش بطيق هادي ده حتي شكله مش فاكراه تخيل!!
طب شوفي صورته كده
قالها وهو بيفتح الفون وبيحطه قدام عيوني
لطمت علي خدي وانا بهمس بنبره كلها دموع :
-ياسواد الحلل بقي ده اللي بقول عليه فلاح ده انا اللي فلاحه !!
آدم بضحك:
-ا اه والله الواد تحسيه اجنبي كده
-بس تفتكر هيسامحني بعد اللي قولته؟
قفل عيونه نص قفله بشك:
-قولتي ايه
-ا احم ا اصل هو من شويه كلمني
-وبعدين!!
فركت ايدي بتوتر وخوف :
-ب بصراحه كده انا قولتله كلام مُهين اوي
-قولتي ايه بالظبط
-ف فضلت اقوله انت فلاح وانا مش بطيقك ولا بطيق وشك وشويه كلام كده وبجد بجد انا مني لله
مسح علي وشه بغيظ:
-يخرررررابي هتجبيلي جلطه اقسم بالله انا لو من هادي ده وبنت قالتلي الكلام ده هدفنها مكانها
رديت بتلقائية:
-ماهو قالي كده قالي لو انتي قدامي كنت دفنتك مطرحك!
هز أكتافه بقله حيله ويأس:
-ده اقل حاجه ممكن يقولها انا لو منه كُنت طخيتك عيارين وخلصت منك ومن لسانك اللي عايز قطعه
بلعت ريقي وانا ببصله بخوف :
-تفتكر هينتقم مني علي اللي قولته؟
حط أيده تحت دقنه وهو بيبص للسقف بتفكير:
-امممممم مش عارف الحقيقه بس انا لو منه هنتقم منك واوريكي النجوم في عز الظهر!!!
ضربته في كتفه بغيظ :
-اسكت بقي هو انا ناقصه رُعب
ضحك وهو بيهز رأسه بيأس :
-ولما انتي جبانه كده بتتسحبي من لسانك لييه
-اهو بقي حبيت اعمل استرونج وكده اتاريني هبله اصلا
طبطب علي كتافي بسخرية:
-طب ياحبيبه قلبي كويس انك عارفه نفسك
رديت بضيق وانا بمط شفايفي لقدام :
-قوم ياض امشي من هنا
بص في الساعه بتاعته :
-هو انا فعلا مضطر امشي عشان عندي شغل اشوفك بكره ياعروسه بااااي
قاله كلامه وهو بيغمزلي بخبث وفي الحقيقه معرفش ليه خدودي احمرت بخجل مش غضب المره ديه!!
الفصل الثاني
البارت الثاني 🖤 بقلمي إيمان شلبي 🖤
اووووماي جاد هو ده العريس ؟
قالتها صاحبتي "ياسمين" وهي بتبص علي صوره هادي بهيام واعجاب
شديت منها الفون بضيق :
-ايوه
-وانتي رفضتيه وقولتيله مش بطيق شكلك !!
هزيت راسي بيأس وانا بحط وشي في الأرض وبمط شفايفي بضيق وحزن
-لا بجد ملكيش حق يافلك الواد قمر
بصيتلها بغضب :
-انتي هتعاكسيه ولا ايه
ردت بخبث :
-الاه احنا بدأنا نغير ولا ايه ؟؟
فركت ايدي بتوتر وانا ببص في كل مكان إلا عيونها
-غيره ايه وكلام فاضي ايه لا طبعا هو انا بحبه اصلا عشان اغير عليه لا استحاله لا و....
-ممكن نتكلم ؟
قالها حد من ورايا قدرت أميز هو مين من نبره صوته المميزه
بلعت ريقي بصعوبه وانا بلف راسي وبرفع عيوني ابص في عيونه
اول ما عيوني اتقابلت مع عيونه حسيت برعشه غريبه وقلبي فضل يدق دقه ورا التانيه ورا التالته!!!
هزيت راسي وانا بقوم اقف وببتسم ابتسامه مهزوزه
-م ممكن ياهادي اتفضل
بص علي ياسمين اللي فهمت وقامت بأحراج
-طب هستأذن انا هستناكي في المدرج
رديت بهمس :
-تمام
شاورلي بأيده بهدوء :
-اتفضلي
قعدت مكاني وهو راح قعد علي الكرسي اللي في وشي
اكذب لو قولت انه مش وسيم !!
هو فعلا كان وسيم جدا ،شعره بُني وطويل ،بشرته بيضا ،عيونه زرقا ،رموشه طويله ،جسمه رياضي ،لبسه شيك جداً كله براند وكأنه بطل من ابطال هوليود أو خارج من روايه
سكت لحظه وبعدها بصلي وهو بيتنهد وبيقولي بجديه:
-طبعا انا كلمتك امبارح عشان كنت حابب أننا نتقابل ونتعرف علي بعض
وقف كلام وهز أكتافه وهو بيبتسم بسخريه:
-لكن للاسف مكانش في فرصه إلا لطوله لسان حضرتك
فركت ايدي ووشي احمر بأحراج وانا بحط وشي في الأرض وبهمس بتلقائيه وصوت مبحوح :
-اسفه
رد بجمود :
-لا ماهو مش بالساهل كده بعد ما تهزقيني اقبل أسفك واعدي الموضوع !
رفعت عيوني وانا بهز راسي بتساؤل وسخريه:
-اعملك ايه يعني اقوم ابوس رجلك
مش كفايه أن فلك هانم اتأسفت لواحد زيك
جز علي أسنانه وهو بيبصلي وعيونه لونها احمر :
-برضو برضو بتقلي ادبك ؟
رديت بعند:
-انا متربيه غصب عنك
-لا ماهو واضح
قالها بعصبيه وهو بيبص لعيوني بغيظ
لا اخفي عليكم سر كانت نظراتنا تُشبه الحرب تماماً
عيونه كانت بتطلع شرار وعيوني كلها عند وتحدي وقوه
-بصي بقي يابنت الناس ،اولا انا اه فلاح وافتخر اني فلاح وافتخر اني اشتغلت في الغيظ ولبست جلابيه انضف من وشك ،ثانياً الجوازه ديه هتكمل برضاكي أو غصب عنك ولو سمعت منك كلمه زياده فيها اهانه لبلدي ولا شغلهم ولا لبسهم صدقيني مش هرحمك ،انا اه متعلم ومش عايش هناك بس مهما كان دي بلدي واصلي وانا عمري ما اتكسف منهم ،والفلاحين مش جهله زي مانتي بتقولي ده معظم الدكاتره والمهندسين والمشاهير فلاحيين!!!
انتي اللي حاطه في دماغك فكره معينه عنهم ومش هتتغير لانك بني ادمه سطحيه بتبص للمظاهر وبس
جزيت علي اسناني بغيظ وانا بهبد علي التربيزه اللي كانت بتفصل ما بيني وبينه
-طب الجوازه دي مش هتكمل ووريني بقي هتغصبني عليها ازاي
سند ظهره علي الكرسي اللي وراه وهو بيرفع حاجبه ببرود
-انتي بتتحديني؟
رديت بتحدي وقوه :
-اه
ابتسم ابتسامه صفراء :
-وانا قبلت التحدي والجوازه هتكمل ومش بس كده احنا هنقضي شهر العسل في البلد كمان
برقت بصدمه وانا بقوم اقف وبهز راسي بهستريه:
-لا لا لااااااا استحاله بقولك مش عايزاك يا اخي هو عافيه خلي عندك دم خلي عندك كرامه شويه و....
قاطعني بعصبيه وهو بيقوم يقف وبيبص في عيوني بقوه
-لو متجوزتكيش انا هتتجوزي زعيم مافيا
رمشت بعيوني اكتر من مره باستغراب :
-ا انت بتخرف بتقول ايه ؟
-انا مش بخرف انا بقولك الحقيقه ،في زعيم مافيا شافك في حفله كان ابوكي عاملها عندكم في الفيلا واتقدملك وابوكي للاسف مكتشفش أنه زعيم مافيا إلا لما اتقدملك
خاف عليكي وقرر يرفض ويقوله انك متجوزه عشان كده لازم تتجوزيني ونسافر من هنا
قعدت مكاني بصدمه وانا ببص قدامي وبسأله بشرود :
-طب ليه بابا مرفضش علي طول من غير ما يقوله اني متجوزه!
رد بهدوء :
-عشان لو ابوكي رفضه بدون اسباب هيصمم عليكي اكتر ومش بعيد يخطفك ويتجوزك غصب عنك وعن ابوكي وعن اي حد
نزل لمستوايا وهو بيسند بأيده الاتنين علي التربيزه وبيبص في عيوني وبكل قسوه
-انا بقولك الحقيقه عشان متاخديش قلم في نفسك وتفتكري اني بحبك لا فوقي انا ميشرفنيش احب واحده زيك
رفعت عيوني اللي كانت بتلمع بدموع مكتومه :
-وبتساعدني ليه بقي طالما مش بتطيقني؟
وليه قولتلي أن دي وصيه ماما وكذبت عليا في الاول
-انا مكذبتش عليكي مامتك الله يرحمها وصيتني اتجوزك فعلا بس انا بصراحه محبتش انفذ الوصيه لاني زي ما قولتلك مش بطيق وشك صدقيني
بس لما باباكي كلمني وقالي اساعده واتجوزك حفاظاً عليكي اضطريت اوافق
وقف كلام واخد نفس طويل وبعدها اتعدل في وقفته وهو بيعدل ياقه قميصه
-اعملي حسابك هنعمل الفرح وكتب الكتاب يوم الجمعه وبعدها هنطلع علي البلد
قال جملته بجمود ومشي من قدامي وانا قاعده ببص بشرود والدموع بتلمع في عيني
ــــــــــــــــــــــــــــــــــــــــــــــــــــــــــــــــــــــــــــــــــــــــــ
"بارك الله لكما وبارك عليكما وجمع بينكما في خير "
قالها المأذون من هنا وتوالت المباركات من حوليا من هنا
كنت قاعده ببص حوليا وانا مش فاهمه حاجه
مش قادره استوعب اني اتجوزت
ومن مين ؟!
من أكتر شخص مكنتش بحبه وانا صغيره
بتجوز في ظروف غريبه وقصه غير مناسبه أو غير مشابهه لقصه الحب الاسطوريه اللي بحلم بيها طول الوقت
كنت حاسه اني في حلم مش علي هوايا علي الاطلاق !
حلم مُمل بشكل ميتوصفش
جوازي من شخص مش علي مقاس قلبي فكره مكنتش اقدر اتخيلها أو اتقبلها في يوم
لكن اوقات الظروف بتحكم علي الشخص أنه ياخد قرار منطقي نابع من عقله ويلغي اي مشاعر نابعه من قلبه
اصل انا في الحقيقه طول عمري شايفه أن قرار الجواز ده اكتر قرار لازم ناخده بقلوبنا أو علي الاقل نخلي قلوبنا جزء من التفكير
صحيح هو مطلوب العقل في كل قرار في حياتنا
لكن قرار زي الجواز ضروري جدا استخدم فيه قلبي واخليه يشارك عقلي في التفكير
إن كان قلبي مرتاح ،ميال ،مبسوط ،مطمن ،بيحب وميقدرش في يوم يستغني إذاً اقدر اقول وقتها أن قراري صح مليون في الميه بجانب بعض المواصفات اللي لازم افكر فيها بعقلي!
-انتي كويسه ؟
فوقت من شرودي لما همس في ودني بهدوء ورقه
اخدت نفس طويل وانا ببص علي الناس اللي كانت بتبصلي بنظرات مختلفه ،حب ، كره ،غل ،فرحه ،تمني
-تمام
-مالك؟!
هزيت اكتافي بلا مبالاه :
-مفيش
رد ببرود :
-طيب
-بنت عمي حبيبتي الف الف مبروك ياقمر
قالها آدم وهو بيقرب مني وبيفتحلي دراعه وانا بدوري قومت عشان احضنه لاني مش بعتبره ابن عمي لا ده اخويا الكبير
وقبل ما احضنه لقيت اللي بيشدني من دراعي وبيقف قدامي زي الحيطه