رواية احببت قلبآ ليس لي
الفصل الخامس والثلاثون36 والاخير
بقلم سهيله مصطفي
_عادت فرح وقصي بمشاعر جديدة غير التي أتيا بها، البسمة تعلو ثغرهما والجو تملؤه السعادة والفرح
فرح: يلا بقا خليني اروح اسلم على أهلي علشان وحشوني جدا جدا
قصي: طيب م تيجي نتغدى سوا وبعد كدا اروحك
فرح: غدا اي يا حاج احنا بقينا بالليل خلاص وبعدين استعجل شوية إنت ماشي بالراحة كدا لي أنا لو ماشية على رجلي هبقى أسرع من كدا
قصي: يا عديمة الرومانسية معنى كدا اني عايز أفضل معاكي وقت طويل
فرح: طيب يا عم روميو يا بتاع الرومانسية استعجل وامشي بسرعة كدا دا آدم قالي انهم تعبانين جدا في غيابي وبصراحة كدا انا خلاص عايزة اطير على البيت
قصي: اطير يعني ولا إي؟! وبعدين مين اللي قالك انهم تعبانين؟!
فرح: آدم
قصي: على فكرة بقا أنا زعلان اشمعنا آدم اللي انتي بتكلميه وإزاي أصلا تكلميه هو بس ومتكلميش حد غيره
فرح بضحك: إي دا إنت بتغير ولا إي
قصي: ع فكرة أنا غيور جدا وخلاص قربت أطلع دخان من وداني
فرح بجدية: على فكرة آدم دا أخويا وصاحبي وأقرب صديق لقلبي وأكتر حد وقف جنبي ودعمني وأنا مسافرة وشكلك متعرفش إن آدم أخويا في الرضاعة
قصي: بس برضو المفروض متكلميش غير خطيبك اللي هو هيكون زوجك يعني بعد الفرح مش هخليكي تكلمي حد غيري
فرح: حيلك حيلك احنا لسة متخطبناش أصلا ومتنساش إن أهلنا فيه بينهم تاتش قبل كدا يعني ممكن أصلا بابا يرفض
قصي: نعم يا حجة؟! لا إن شاء الله كله هيوافق وبعدين إحنا تعبنا كتير أوي واتعذبنا بإسم الحب وربنا مش هيخذلنا أبدا وحبنا هينتصر بإذن الله
فرح: طيب اقف هنا يلا احنا وصلنا
قصي: طيب م تخليكي قاعدة نحكي شوية هنا في العربية
فرح: لا انا اصلا اعتبرني مشيت
قصي: طيب استني أنا ممكن انزل معاكي دلوقتي واتكلم مع عمو
فرح: يختاااااي كدا هنبقى بتعك الدنيا من الأول لازم طبعا والدك يتصل عليه ويكلمه ويتفقوا على ميعاد وبعدين تيجوا هنا وتتقدموا رسمي
قصي: يالهووي دا لسة حوار
فرح: طيب يلا سلام بقا
قصي: مع السلامة يا مستعجلة
_كانت ڤيلا أحمد الهاشمي يسودها الظلام من الخارج فظنت فرح أن كل من في المنزل ناموا، دخلت على أطراف أصابعها حتى لا يسمعها أحد إذا كان مستيقظ فوجدت غرفة السفرة ضوءها مقاد فعلمت أن أهلها يتناولون الطعام
فرح: طيب والله عيب تاكلوا من غيري
أحمد بصدمة: فرح؟! ثم قفز يأخذ بنته في أحضانه فحقا إشتاق لها كثيرا كيف لا وهي صغيرته المحببة لقلبه وأضاف بفرحة: وحشتيني أوووي يا قلب بابا
فرح: وانت وحشتني أوي يا بابا
مريم: اوعى يا أحمد كدا انت م صدقت عايزة اسلم على بنتي انا كمان
أحمد: هي بنتك لوحدك ولا اي سيبيها دي وحشتني اوي وفرحان اوي برجوعها بالسلامة
فرح: وانا مبسوطة اوي اني شوفتك يا بابا
مريم: طيب اي وماما موحشتكيش ولا اي
فرح قفزت في حضن والدتها: لا طبعا وحشتيني اوي يا ماما وحشني حضنك الدافي ووحشتني حنيتك
مريم: وانتي وحشتيني اوي اوي يا قلب ماما
ياسين: وحشتي قلبي اوي يا بنوتي
قفزت فرح في حضن أخيها التي تحبه أكثر من نفسها: وانت وحشت قلب بنوتك اوي يا سينو
ياسين: البيت مكانش ليه طعم ولا صوت من غيرك
فرح: اديني رجعت اهو بس ياريت متبقاش تقول حد يبعد عني فرررررررح
ياسين: لا متخفيش بس انا زعلان منك اوي ازاي هان عليكي متكلميناش طول الفترة اللي فاتت دي وازاي تيجي من غير م تكلمينا كدا
فرح: م انا كنت عارفة ان لو كلمتكم مرة واحدة كنت هتلاقيني في أول طيارة ونازلة مصر وحبيت آجي من غير م أقولكم علشان تكون مفاجأة وكدا أنا أصلا كنت جاية من الصبح بس كان لازم أتمم الصفقة الأول وبعد كدا روحت مشوار طارئ فاتأخرت شوية
أحمد بإستغراب: صفقة إي اللي كان لازم تتممي عليها
فرح: احم م هو بصراحة دي المفاجأة التانية والكبيرة بقا
ياسين: خير اللهم اجعله خير
فرح: فاكرين الشركة اللي اسمها F. A. A اللي اتعاملتوا معاها قبل كدا
ياسين بتذكر: آه أنا اللي كنت ماسك الصفقة بتاعت الشركة دي
فرح بفخر: م هي الشركة دي تبقى بتاعتي وأنا المديرة بتاعتها F فرح وA أحمد وA أمين يعني فرح أحمد أمين الهاشمي
أحمد: بتهزري
ياسين: بس على ما أعتقد مالك الشركة دي كان اسمه علي
فرح: علي دا المساعد بتاعي وأنا اللي كنت بطلب منه يطلع بإسم المدير
أحمد بفخر: ألف ألف مبروك يقلب أبوكي فرحان ليكي من قلبي وفخور بيكي أوي أوي
فرح: ياااه ياما حاربت وتعبت علشان اسمع منك الكلمة دي الله يبارك فيك يا بابا
مريم: الف الف مبروك يا حبيبتي وربنا يوفقك ويزيدك كمان وكمان
ياسين: بنوتي الصغيرة كبرت وأسست شركتها الخاصة يا جدعان ألف ألف مبروك يقلب أخوكي
فرح: الله يبارك فيك يا حبيبي
أحمد: بس فيه حاجة أنا مش فاهمها لي مكنتيش راضية تقولي لحد انك انتي صاحبة الشركة لي سكتي كل الوقت دا
فرح بحرج: احم لازم تعرفوا السبب يعني؟!
ياسين: اي فيه اي
فرح: بصراحة أنا كنت عايزة نجاحي أول حد يعرفه الشخص اللي قالي اني هفشل.. الصفقة دي قصي دفع فيها فلوس كتيرة ولما خسرها شركته اتهدمت وفلوسه ضاعت واحم بصراحة دا اللي انا كنت عايزة اوصله بس والله يا بابا هو السبب وهو اللي بدأ في الأول واسأل ياسين فاكر يا ياسين يوم المطار قالي اي
ياسين: اه هو غلط في الكلام بصراحة
أحمد: بس كدا هنفتح مشاكل من الاول ونخلق خلافات احنا في غنى عنها
فرح: م هو دا المشوار الطارئ اللي انا روحته.. بصراحة انا روحت قابلت قصي واتكلمنا واتفاهمنا وقالي كمان ان دموع وأمير اتخطبوا
ياسين: أيوة صح آدم قالي
__كان الجو الأسري يملؤه المرح والسرور حتى قاطع تلك الاجواء رنين هاتف أحمد أخرجه فوجد اسم ابراهيم يملئ شاشته
أحمد: دا إبراهيم يا ترى فيه حاجه ولا اي
مريم: رد طيب يمكن عايزك في حاجة
أحمد: الو ازيك يا ابراهيم عامل اي
ابراهيم: الحمد لله تمام.. الف الحمد لله على سلامة مهندستنا اللي رفعت راسنا وشرفتنا ثم أضاف بضحك: وأخدت الصفقة من قصي طالعة لعمها إبراهيم محدش يقدر يقف قدامنا في الشغل
أحمد: والله حقك عليا بس أنا لسة عارف منها الموضوع دلوقتي
ابراهيم: يعم ولا يهمك الموضوع دا مش هو اللي متصل عليك علشان اكلمك فيه انا عايزك في موضوع تاني
احمد: خير ان شاء الله
ابراهيم: طبعا انت وانا وكلنا عارفين ان فرح وقصي بيحبوا بعض وانهم تعبوا اوي وعانوا قد اي في علاقتهم فواجبنا اننا نساعدهم ونقف جنبهم علشان يكملوا قصتهم دي فأنا طالب منك ايد البشمهندسة فرح ل قصي ابني وأتمنى انك توافق
أحمد: ابراهيم انت عارف انك اخويا قبل م تبقى صاحبي واولادك هما اولادي وحتى لو حصل خلافات قبل كدا بس قصي هيفضل ابني وانا عن نفسي مش هلاقي ل فرح أحسن منه بس لازم رأيها هي الأول.. ها يا فرح رأيك إي
فرح بخجل: اللي تشوفه يا بابا
أحمد: يبقى على بركة الله بكرة تشرفونا هنا ان شاء الله نتفق ونقرا الفاتحة
ابراهيم: تمام هنكون عندك ع الميعاد ان شاء الله
__انهى أحمد مع إبراهيم المكالمة على أن يتم اللقاء غدا
وها قد أسدل الليل ستاره لينام كل من أبطالنا تملؤه السعادة والسرور
________________♡♡____________
"إنَّ عوض اللهِ إذا حلَّ
أنساكَ ما فقدتَ !" 🖤
كانت تلك العبارة تتردد في بال قصي منذ أن استيقظ من نومه فها وأخيراً سينال قلبه ما تمناه ، اوشكت قصة حبه أن تكتمل وإنتصر عشقه لها وأخيراً ، فمنذ الأمس والسعادة عرفت طريقها لقلبه عندما تحدث والده مع والدها وكان القبول واللين سيدا الموقف ، لم يصدق أنها ستبقى له بعد كل هذه المعاناة، تعلو دقات قلبه وعيناه فقط مثبتة على الحائط لما لا تتحرك عقارب الساعة تبدو الآن وكأن أحدهم سلطها عليه، يعيش الآن أحلامه الوردية ويتخيلها عقله بفستانها الابيض وهي تزف عروسا على اسمه، بل ويتخيل أيضا أميرة صغيرة تشبه والدتها وتناديه بإسم "بابا" ، أيقظه من أحلامه تلك صوت والدته
نسمة: قصي يلا من الصبح وإنت قاعد وسرحان كدا
قصي بسعادة: مش مصدق يا أمي والله إنها وافقت وباباها كمان وافق طب احلفي كدا اننا رايحين النهاردة عندهم علشان نتفق ونقرا الفاتحة بتاعتنا
نسمة: يووووه فلقت دماغي من الصبح ماما احنا بجد رايحينلها النهاردة ماما انا مش بحلم صح ماما شديني من ايدي كدا احسن تكون اوهام ولا حاجة روح البس بقا لأحسن هتبقى أحلام لآخر عمرك
قصي: اعتبريني لبست خلاص
نسمة: والله و جه اليوم اللي شوفتك فيه واقع ومحدش مسمي عليك يا قصي
حنين: والله انا فرحانة فيك على اللي فرح عملاه معاك دا انت من الصبح عينك منزلتش من ع الساعة يعيني مستني الميعاد بفارغ الصبر
قصي: انا اروح البس احسن مش فاضيلك انتي وماما
_________________&&_____________
في ڤيلا أحمد الهاشمي... دق الجرس
مريم: فرررررح روحي شوفي مين اللي بيرن الجرس
فرح: ماما مش المفروض انا عروسة يعني معملش حاجة
مريم: طيب روحي افتحي بلا عروسة بلا بتاع
ذهبت فرح لترى من على الباب وانصدمت بما رأته
دموع: أكيد مش هتبقي عروسة وقراية فاتحتك النهاردة وانا مش هاجي.. احنا اتفقنا ان انا اللي هلبسك بإيدي
فرح بدموع: دموع انا...
دموع: فرح خلاص الماضي راح لحاله ودلوقتي احنا في الحاضر ولسة قدامنا المستقبل، هنكون فيه فرح ودموع الاصحاب اللي مفيش حاجة هتبعدهم أبدا ، علشان دموع عمرها م صاحبت ولا هتصاحب زي فرح
فرح: وفرح عمرها م صاحبت ولا هتصاحب زي دموع
ثم تعانقا عناق أخوي خالص
مريم: مين يا فرح.. اي دا دموع ازيك يا حبيبتي
دموع: الحمد لله يا طنط
مريم: كويس انك جيتي خدي فرح معاكي وخليها تلبس علشان الناس خلاص على وصول
دموع: حاضر
وبالفعل أخذت فرح وصعدا سويا للأعلى
بعد وقت ليس بطويل ، أتى الجميع وأولهم كان إبراهيم الراوي وعائلته ثم أتى بعده مالك الصياد وعائلته، وأتى أيضا زين وأمير الذي يعتبرهم قصي إخوته
إبراهيم بضحك: هي عروستنا نسيت اننا هنا ولا اي
مريم: لا جاية بس هي مكسوفة شوية
أحمد: أهي عروستنا جت
_كانت اول عيون ترفع لترى فرح هي عيون ذلك العاشق، نظر اليها وليته لم يفعل فكانت جميلة جدا بفستانها الأسود الذي يعتبر لونها ولون قصي المفضل أيضا
قصي في سره: بسم الله ماشاء الله ربنا يحميكي يا قطتي
نسمة: تعالي يا حبيبتي اقعدي جنبي هنا
وبالفعل تم الاتفاق وقراوا الفاتحة
أحمد: طيب يا جماعة الخطوبة هتكون امتا
قصي بمقاطعة: خطوبة اي؟! احنا ان شاء الله هنعمل فرح على طول لإن العمر بيعدي بسرعة
آدم: ونعم الكلام يا قصي
أمير: اللهي تنستر يا قصي يا ابن عمي ابراهيم
ياسين: والله قصي دا بيقول عظمة
زين: أكتر حد بيقول كلام صح
أحمد: فرح إي لا لازم نعمل خطوبة الاول
قصي: يا عمي أنا عايز افرح بنفسي وبيها قبل م اموت
فرح: بعد الشر عنك
ياسين: بالراحة شوية
مريم: بس متحرجش اختك يا ياسين
إبراهيم: بما اني انا أكبر واحد فيكم فأنا هقول الفرح آخر الأسبوع دا ان شاء الله
أحمد: بس بدري أوي يا ابراهيم
ابراهيم: بدري من عمرك يا أحمد خلي الولاد يفرحوا
_وبالفعل تم الإتفاق على أن يقام حفل الزفاف نهاية هذا الاسبوع
__ انتهت تلك الأمسية الرائعة وذهب كل واحد الى منزله ليناموا جميعا وراحة البال تملؤهم فها وأخيرا الأماني تتحقق، أول من نام بسعادة هي جميلتنا فرح فهي أكثر وأشد من عانى تحت مسمى الحب، داعب النوم أيضا أعين ذاك العاشق الذي انحرم من النوم لسنوات ولكن الآن ينام وتملؤه السعادة
_____________♡♡_________♡♡_________
مرّ الأسبوع بلمح البصر على البعض ومرّ كالسنة على البعض الآخر.... ها وأخيرا أتى يوم الزفاف
آدم والبقية خارج صالون التجميل
آدم: أنا مش عارف بيعملوا فيهم اي جوة علشان ياخدوا الوقت دا كله
أمير: دا لسة لازم يمحروا وشهم ولا كأنهم شقة
ياسين: وطبعا بعد التمحير لازم السنفرة
زين: وبعد السنفرة لازم يحطوا البتاع الابيض دا
قصي: ومتنساش فضايل ألوان الطيف اللي فوق عينيهم
خرجت في ذلك الوقت فتاة من البيوتي سنتر
# تقدروا تتفضلوا دلوقتي العرايس جهزت
آدم: يااااه دا أنا كنت قربت أفقد الامل خلاص
_وبالفعل دخل الخمس شباب إلى الداخل فانصدموا بهيئة الخمس فتيات التي تقفن وتوليهن ظهورهن
أمير: ودا إي دا بقا هنعرفهم ازاي دلوقتي
قصي: أنا عن نفسي عارف عروستي
ياسين: أيوة م أبو طويلة اللي واقفة هناك دي هي أختي اللي هي عروستك
آدم: وأنا عارف عروستي برضو
قصي: م الاوزعة اللي هناك دي أختي اللي هي عروستك
زين: ودي تقريبا منسة بنت عمي اللي هي عروستي عرفتها من فستانها علشان اختارناه سوا
أمير: وطبعا دي دموع عرفتها برضو من فستانها
ياسين: ودي جنى أهو عرفتها من غير حاجه
جنى: انت عرفتني علشان مفيش غيري وكلهم عرفوا
_ تقدم قصي أولا ناحية فرح ف أدارت وجهها ناحيته وانصدم هو من كتلة الجمال الواقفة أمامه، فكانت جميلة جداً بذلك الفستان الأبيض الجميل الذي تناسب تماما مع طولها الذي تحسد عليه، كما أضافت لها خبيرة التجميل بعض لمسات المكياج التي زادتها جمالا فوق جمالها، وأبرزت عيونها الخضراء بالكحل الأسود فأصبحت ساحرة حد الهلاك
قصي: زي القمر يا قطتي بسم الله ماشاء الله ألف الف مبروك
فرح: الله يبارك فيك
ثم أمسكها من يديها وخرج
_دخل بعده آدم ليتفاجأ بتلك القصيرة التي خطفت قلبه من أول وهلة، فكانت كالملاك بذلك الفستان المنفوش والمكياج البسيط الذي أظهر ملامحها الفاتنة
آدم: زي القمر يا أوزعتي والفستان الأبيض زادك جمال على جمالك مبروك يا حبيبتي
حنين بخجل: الله يبارك فيك يا آدم
أمسكها آدم وخرج
دخل أمير وتفاجأ بتلك الحورية الواقفة أمامه فكانت دموع ترتدي فستان طويل جدا فأظهر طولها المتواضع وحددت ملامحها ببعض المكياج التي وضعته لها خبيرة التجميل بدقة واحترافية
أمير: ربنا يحميكي يا حبيبتي طالعة قمر الف مبروك
دموع: الله يبارك فيك ومبروك لينا احنا الاتنين
ثم أمسكها من يديها وخرج
__ دخل زين فوجد إبنة عمه وانصدم بجمالها فكانت ترتدي فستان انسدل على جسدها الممشوق فأعطاها طلة ساحرة وزينتها أيضا خبيرة التجميل ببعض المكياج الرقيق
زين: ألف ألف مبروك يا منسة ربنا يحميكي جميلة أوي
منسة: الله يبارك فيك يا زيني
__ وأخيرا جاء دور ياسين ليدخل وتفاجا بجمال جنى التي بدت كالملاك بذلك الفستان الضيق الى حد ما وزينتها ايضا خبيرة التجميل بلمسات رقيقة جدا من المكياج
ياسين: اي الفستان الضيق دا
جنى بزعل: يعني كلهم دخلوا وقالوا لعرايسهم كلام حلو وانت لازم تنتقدني
ياسين: انتي عارفة انك زي القمر والفستان والمكياج بس هيزيدوا جمالك اللي خلقك بيه ربنا بس الفستان ضيق شوية
جنى: طيب م الطرحة طويلة اهو
ياسين: عموما ألف مبروك يا جنينة
جنى: الله يبارك فيك يا ياسين
أخذ كل عريس عروسته وذهبوا نحو القاعة التي سيقام بها حفل الزفاف .. جلس كل اثنين بمكانهم المخصص لهم وسط نظرات كثيرة منها السعادة والفرح ومنها الحقد من بعض الموجودين ، جاء دور رقصة العروسين بما تسمى رقصة(سلو)
عند زين ومنسة......
زين: عمري م تخيلت إن البنوتة اللي ربيتها على ايدي واحنا صغيرين اللي كانت بضفاير كدا كبرت خلاص وهتبقى عروستي، انتي عمرك م كنتي مجرد بنت عمي بالنسبالي انتي بنتي اللي ربيتها واختي اللي اتحرمت منها وأمي وصاحبتي ولو هحمد ربنا على حاجة فهو على وجودك في حياتي وأوعدك اني هحاول أسعدك على قد م اقدر
منسة: وأنا طول عمري بحلم باليوم اللي هكون فيه مراتك وافضل جنبك وقريبة منك واليوم دا اتحقق أخير ربنا يخليك ليا يا زيني
زين: ويخليكي ليا يا حبيبتي ثم طبع قبلة على جبينها ليصفق جميع الحاضرين
__عند أمير ودموع
أمير: مكنتش متخيل اني هرجع أحب تاني بعد م اتجرحت مرتين من الحب بس انتي جيتي وكأنك الدوا اللي داوى جروحي وطلعني من الزعل اللي أنا فيه ، أوعدك اني هفضل دايما جنبك وأكون ليكي السند والضهر وهحاول قد م اقدر اعوضك عن كل اللي مريتي بيه
دموع: انت مش لسة هتعوضني لا بالعكس انت عوضتني من زمان لما فضلت جنبي في الوقت اللي أنا مكنتش لاقية حد جنبي ودعمتني لحد م عالجت جروحي وساعدتني أنسى الماضي أنا ممتنة لوجودك في حياتي
أمير: ربنا يباركلي فيكي يا حبيبتي ثم طبع قبلة على جبينها ليصفق جميع الحاضرين
_عند ياسين وجنى........
ياسين: مش مصدق انك خلاص بقيتي مراتي وانك هتفضلي دايما معايا ، دايما كنتي جنبي وبتساعديني وتسعديني والنهاردة أنا بوعدك اني هكون ليكي باباكي ومامتك اللي اتحرمتي منهم، هكون ليكي الصاحب والأخ والصديق عايزك تعتبريني حصنك اللي تتخبي فيه من كل الدنيا مبروك على قلبي يا جنينة
جنى: مكنتش اتخيل ابدا اني أحب حد أبدا بس جيت انت وبطيبتك وحنيتك خليتني حبيتك وهفضل أحبك لحد م اموت ربنا يخليك ليا يا ياسين
ياسين: ويخليكي ليا يا جنينة ثم طبع قبلة على جبينها ليصفق جميع الحاضرين
عند آدم وحنين.....
آدم: مش مصدق ان البنوتة اللي أنا حبيتها من وهي طفلة متعرفش حاجة وهي كانت بتحب واحد غيري النهاردة مراتي وهتنور بيتي وحياتي وهتفضل جنبي لآخر العمر ، ياما اتمنيت انك بس تكلميني بطريقة حلوة لأنك مكنتيش بتحبي تتكلمي معايا بس شوفتي ربنا كريم ازاي النهاردة انتي خلاص بقيتي مراتي.. أوعدك اني هحميكي من اي حاجة وحشة واني هكون في ضهرك وانك هتكوني بنتي قبل م تكوني زوجتي
حنين بخجل: وأنا أوعدك اني هعوضك عن كل الأيام اللي كنت بتحبني فيها ومحستش بيك، اوعدك اني هكون أختك وأمك وصاحبتك والركن الهادي اللي تهرب ليه من مشاكل الدنيا وهمومها
طبع قبلة على جبينها قائلا: مبروك لحياتي وجودك فيها
_ اما عند قصي وفرح
كان قصي ينظر فقط لعينيها وعيناه هو تأبى أن توقف تلك الدموع التي تهبط منهما
فرح بضحك: يا عم بطل عياط الناس هيفكروك مجبور ولا حاجة
قصي: دي دموع الفرحة يا فرحتي ، لو يعرفوا السعادة اللي أنا فيها دلوقتي مش هيصدقوا، أنا متهيألي هفضل لحد م أموت مش مصدق اني خلاص اتجوزتك وانك خلاص بقيتي مراتي، مش مصدق ان حبنا انتصر وقصتنا اكتملت، انا اتعذبت اوي اوي من غيرك وعانيت واتحملت مرة واتنين من غيرك، ومستعد أتحمل مليون مرة وأتعذب الف مرة علشانك، انتي تستاهلي يتحارب علشانك، تستاهلي الواحد يتمسك بيكي لآخر يوم في عمره، تستاهلي اني أفضل منتظرك عمري كله، كله يهون لأجل اني افتح عيني الصبح الاقيكي في بيتي، كله يهون لاجل آكل أكلة من ايدك وواثق انها هتكون اجمل أكلة آكلها ، كله يهون لأجل أميرة صغيرة شبهك تناديني بابا، انتي تستاهلي كل حاجة حلوة تتعمل علشانك ، اوعدك اني هحاول اسعدك على قد ما اذيتك، اوعدك اني هحميكي من كل الدنيا ولو التمن حياتي ، اوعدك اني هفديكي بروحي لو اتطلب الأمر، هكون القرار اللي عمرك م هتندمي عليه ، هكون شريك رحلتك اللي مش هتزعلي انك وثقتي فيه ومسكتي ايده من البداية ، كنت هقولك بحبك لكن أنا تخطيت مرحلة الحب من زمان بصي هناك كدا
__ نظرت فرح مكان ما أشار لها قصي لتجد ألعاب نارية في السماء بالوان مختلفة تجمعت لتشكل عبارة "أنا بعشقك يا قطتي"
فرح بدموع: وأنا بحبك أوي يا قصي ومش مصدقة ان حبي انتصر وحصلت عليك في النهاية وكنت مستعدة أصبر لحد آخر نفس علشانك،ثم أضافت بضحك: كله يهون لأجل أكون قطة
قصي بعشق: ربنا يحفظك لقلبي يا قطتي وانحنى على يديها وقبّلها ثم قبل جبينها قبلة رقيقة وحملها ودار بها وسط ذهول الجميع وضحكاتها التي ملأت الأرجاء
___كان زفافا أسطوريا يتحاكى به الجميع بل العالم بأكمله ، كل زاوية في هذا الزفاف تروي معاناة ما مر به كل اثنين ليكونوا سويا ولكن حبهم انتصر على الظروف والمشكلات ، وتعاهدوا أن يدافعوا عن علاقتهم بسيف الحب لينتصر على العدو من الخلافات والمشكلات واولهم الظروف
_لن نقول عاشوا بسلام لا بل كانت تملئ حياتهم المشكلات ولكنهم أوفوا بتلك الوعود وظل الحب هو الميثاق الغليظ بينهم .
تمت