رواية مراتي طفله مجنونه
الفصل الرابع4
بقلم ايه الموافي
فتح كريم عيونه ولقى نفسه على الارض زي ما هو، حط ايده على ضهره وقال بوجع:
- ااه
بص حواليه لما مسمعش صوت اي حاجة فقال:
- هو البيت هادي كده ليه؟ لتكون عملت في نفسها حاجة وريحتني منها
قام من على الارض وقال بصياح:
- يارب تتهد بقى انا تعبت
دخل يدور عليها في اوضة وملقهاش، خرج وراح اوضتها بس اتصدم لما لقاها لابسة باتمان، كريم بصدمة:
- باتمان يا ليلى
وقفت قدامه وقالت:
- السهم المنطلق تحميل
بصلها بعدم فهم وهي ضربته بالقلم، حط كريم ايده على وشه بصدمة وقال:
- هي حصلت
مشت ليلى من قدامه ودخلت اوضتها فقال كريم بغيظ:
- خدى يا بت هنا
راح وراها واتصدم لما لقاها واقفة على سور البلكونة، كريم بخوف:
- انتي بتعملي ايه يا مجنونة انتي، انزلي الله يخربيتك
ليلى: السهم المنطلق، تحميل
مسكها كريم بسرعة قبل ما تنط وقال بصدمة:
- نهار اسود، هو مخك وصل للدرجة دي
بعدته ليلى عنها وفتحت باب الشقة وخرجت منه، برق كريم بصدمة وقال بفزع وهو بيجري وراها:
- تعالي هنا يا بت الله يخربيتك
نزل وراها على السلم بس ملقهاش، كريم بلطم:
- راحت فين المجنونة دي، جيب العواقب سليمة يارب ده انا غلبان والله
فضل كريم يدور عليها بس انتبه لما سمع صوت ناس بتتخانق، راح كريم ليهم بسرعة واتصدم لما لقى ليلى واقفة قدام راجل مليان عضلات، الراجل بعصبية:
- انتي قد اللي عملتيه ده
كريم بخوف: هي البت دي عملت ايه؟
الراجل بعصبية: وانت مالك انت
بلع كريم ريقه بخوف وقال: لامؤاخذة يا كبير انا اسف
وطى كريم للولد اللي كان واقف جنبه وقال بهمس:
- متعرفش ايه اللي حصل؟
الولا: شخلل جيبي الاول وانا اقولك
كريم بقرف: مادي حقير
حط كريم ايده في جيبه واداه للولد وهو بيقول:
- ما انا كده كده بيتي اتخرب خلاص جات على دي يعني
الولد: الراجل ده اسمه حماصا بلطجي حتتنا من الاخر ومحدش يستجري يعمل اى حاجة الا بأمر منه
كريم: وبعدين
الولد بهمس: الست دي شافته بياخد اتاوه من راجل عجوز فشتمته
وقف كريم وقال بغيظ: هي مفكرة نفسها باتمان بجد عشان تقف للراجل ده
الراجل بعصبية: انتي مبتردبش ليه؟
ليلى: السهم المنطلق، تحميل
ضربته ليلى بالقلم وكلهم شهقوا بصدمة، كريم بخوف:
- بما اني واخد علقة يومين ورا بعض ومدشدش خلقة فا سكسكيوزمي يعني على اللي هعمله
شال كريم ليلى على كتفه وجري بسرعة، جرى الراجل وراه وهو بيقول بزعيق:
- خد هنا يالا، ورحمة امي ما هسيبكم
كريم بصياح وهو بيجري:
- يالهوتاااي، الحقونا يا ناس
فضل كريم يجري بيها والراجل يجري وراه، لحد ما وقف كريم مرة واحدة ونزل ليلى على الارض وهو بياخد نفسه بالعافية، كريم:
- لا مش قادر نفسي هيتقطع
لاحظ كريم ان الراجل بيقرب منهم فقال كريم بخوف:
- اجري يا بت
فضلت ليلى واقفة وكريم كان هيشتالها بس الراجل قرب منهم، كريم وهو بيحاول ميعيطش:
- وحياة ابوك يا شيخ ما تضربني في وشي عشان هو معدتش صالح خلاص، الضرب في الميت حرام يا جدعان
الراجل بعصبية: بقى بتاخدها وتهرب
كان لية هيديله بالبوكس بس ليلى طلعت من جيبها رزاز حارق للعين ورشته على الراجل، حط الراجل ايده على عيونه وقال بوجع:
- اااه عيني، مش شايف حاجة
كريم بفخر: ايوه كده يا بت يا ليلى اديله، جادعة يا ب
مكلمش كريم كلامه لان ليلى رشت الرزاز في عينه هو كمان، كريم وهو بيتنطت من الوجع:
- اه يا بنت الغدارة
ليلى: السهم المنطلق، تحميل
جرت من قدامهم وكريم قال بخوف وهو مغمض عيونه:
- انتي راحة فين يا بت انتي تعالي هنا
حاول كريم انه يلحقها بس خبط في الراجل ووقعوا الاتنين على الارض لانهم مش شايفين حاجة، كريم بخوف:
- انا لازم اهرب بسرعة عشان لو اتعكشت هيعجني
مسكه الراجل من هدومه وقال:
- رايح فين يا حلو ده لسة الحساب ما بينا طويل، افتح عيوني بس وانا هوريك انت لعبت مع مين
كريم بلطم: اعمل ايه الحقوني يا ناس
عضه كريم من ايده فسابه الراجل بوجع، جرى كريم على طول وهو بيحاول يفتح عيونه بس لبس في عامود نور من غير ما ياخد باله، وقع على الارض وقال بوجع:
- ااه يا نفوخي، هو انا ليه حاسس ان الدنيا بتلف بيا
افتكر كريم الدعوة اللي دعاها على ليلى فضحك ببلاهة وقال:
- واضح اني كنت بدعي على نفسي مش عليها
قام وهو بيطوح يمين وشمال وقال بخوف:
- انا هجري وزي ما تيجي بقى، شكلي كده هحصلك قريب يا جدي
جرى كريم وهو بيطوح يمين وشمال ولما اتأكد انه بعد عن الراجل اعد على الرصيف، كريم بصياح:
- اعمل ايه المشكلة اني لو طلقتها كل الورث هيروح ليها
بص حواليه وقال: راحت فين دي كمان، يارب صبرني
قام وفضل يدور عليها كتير لحد ما تعب، كريم:
- لتكون عملت مصيبة، اه يا كريم بقى ده اخرتها بس هقولك تستاهل ما انت اللي عملته زمان بيطلع عليك دلوقتي
وقف في مكانه وقال بحيرة: طب اعمل ايه دلوقتي، اه يا رجلي ياني
سمع كريم صوت زعيق واحدة ست ولما بص اتصدم لما لقاها ماسكة ليلى من شعرها وبتتخانق معاها، جرى كريم عليهم وقال وهو بيحاول يبعد ليلى من تحت ايدها:
- في ايه يا ست انتي
الست: وانت مالك انت
كريم: لا انا مالي ونص الست اللي انتي بتشدي شعرها دي مراتي
بصت الست لليلى وقالت: جوزك ده؟
هزت ليلى راسها وقالت: لا
كريم بصدمة: نعم يا روح امك، يعني لسانك مكنش بينطق بحاجة غير السهم المنطلق ودلوقتي نطق عادي
الست بعصبية: اه قول كده بقى هو انت منهم
كريم بإستغراب: من مين؟
الست: انت اللي بتستغل اي تجمع فيه خناقة عشان تتحشر فيه وتسرقنا
كريم بصدمة: نعم يا اختي!! اسرقكم، انتي بتقولي ايه يا ولية يا خرفانة انتي
الست بشرشحة: انا خرفانة يا راجل يا ناقص انت، طب انا هوريك، نسوااان عندنا طالعة
اتصدم كريم لما لقى ستات كتير خرجت من بيوتها، ست منهم:
- في ايه يا ابلتشي
الست: الراجل العرة دا عايز يتربى
افنان: بس كده يا ابلتشي، من عيوني
بصلها كريم بترقب بس اتصدم لما لقاهم مسكوا عصيان خشب وطوب، كريم بصدمة:
- انتوا ستات انتوا، ده انتوا غجر
افنان: اهي بسبب طولة لسانك دي هتشوف احنا هنعمل فيك ايه
شهق كريم بصدمة لما اتكب عليه ماية مش نضيفة، بص فوق ولقى ست بتقول:
- دا اقل واحب عندنا
قربت الستات منه عشان تضربه بس هو جري بسرعة وهما وراه، وقف كريم تاكسي وقال بخوف:
- اطلع يا اسطا بسرعة انشالله يخليلك عيالك
خاف السواق من الستات اللي جايين عليهم فساق العربية العربية بسرعة، اتنهد كريم براحة وقال:
- الحمد لله خلقعت منهم
السواق: مين الستات دي وكانت بتجري وراك ليه؟
كريم: ستات هبلة متاخدش في بالك انت
السواق ببرطمة: والله ما انا مين فيكم الاهبل
كريم: بتقول حاجة يا اسطا
السواق: لا مبقولش
روح الكريم البيت وهو مش عارف يعمل ايه، اعد على الكنبة وقال:
- اعمل ايه يا ربي انا تعبت اوي
ضرب راسه وقال بغباء:
- مكينش ينفع اسيبها لوحدها مهما كان
افتكر منظر الستات فقال بخوف:
- ما انا لو كنت اتمسكت كان اتعمل مني شاورما، ااه يا ليلى الاقيكي فين دلوقتي
رجع راسه لورا عشان يفكر ومن غير ما ياخد باله نام
• بعد ساعتين
صحى كريم من النوم وقال بنعاس:
- انا فين؟
انتفض من مكانه وقال بخوف:
- هارسوح انا نمت وسيبت البت بره
خرج بره بسرعة عشان يدور عليها، كريم بتذمر:
- يعني فوق ده كله العربية لسة بتتصلح، ده انا رجلي لو كانت بتتكلم كان فاتها شتمتني
شاف كريم سعيد قدامه فلف وشه وكان لسة هيهرب بس سعيد قال:
- استنى عندك
جز كريم على سنانه وقال بغيظ وصوت واطي:
- ده انا غبي، كان المفروض الاول اشوف هو موجود ولا لا وبعدين انزل
لف كريم وقال بتوتر: نعم يا استاذ سعيد
سعيد بغيظ: بقى انا اجيلك امبارح عشان اخد حقي تسيبني ملطوح قدام الباب ومتعبرنيش
كريم: مكنتش اقصد والله يا عمي سعيد انا كنت بس تعبان امبارح ومش داري باللي بيحصل حواليا
سعيد: طب ايدك بقى على الفلوس
كريم بتوتر: هاا
سعيد: ها ايه، بقولك ايدك على الفلوس بدل ما اشتكيك للحكومة
كريم بغيظ: ما تصبر شوية يا عم سعيد يعني انا ههرب يعني
سعيد: وانا ايش عرفني انا انك مش هتخلع
كريم بسخرية: اكيد مش هسيب شقتي الملك عشان اهرب من شوية ديون
سعيد: لو صبرت عليك الفلوس هتجيبها امتى؟
كريم: هي الفلوس كام الاول
سعيد: عشر تلاف جنيه
كريم بصدمة: كاام
سعيد: على فكرة انا كارمك اوي، انت لو دخلت المحل وشوفت منظره هتتصدم، بس انا مش هاخد منك كتير عشان عربيتك اللي ادشدشت وخبطتين في الراس توجع
كريم وهو بيحاول ميعيطش:
- مينفعش اديهوملك بالتقسيط؟
كشر سعيد وقال: لا يا اخويا فلوسي تجيلي مرة واحدة
كريم: احم، طب بقولك ايه يا عم سعيد، ما تستنى شهر ولا اتنين كده عما ارجع الشغل عشان انا اخد اجازة بدون مرتب بسبب ظرووف حصلالي
سعيد: نعم يا اخويا، شهر ولا شهرين! وانا هفضل قافل المحل كتير عشان سيادتك مأنتخ وواخد اجازة بدون مرتب، هو اسبوع واحد وتقب بالفلوس عشان اصلح المحل من التكسير اللي مراتك عملته
كريم بصدمة: اسبوع بحاله، ما تبحبحها شوية يا عم سعيد ده احنا جيران برضو
سعيد: ده اكل عيش يا حبيبي مفيهاش مجاملات دي
مشى سعيد من قدامه وكريم قال بقرف:
- اخص على الجيرة العرة
مشى كريم وهو بيقول: انتي فين يا ليلى انتي كمان
ضحك كريم بسخرية على نفسه عشان كان بيتمنى انها تخلعه وتبعد عنه ودلوقتي هو اللي بيجري وراها
كريم بغيظ: ماشي يا ليلى الكلب
فضل كريم ماشي شوية كتير لحد ما لقى ليلى ماشية في الشارع، جرى ناحيتها وقال:
- اخيرا
مسك ايدها وقال: تعالي يا اخرة صبري
ليلى: السهم المنطلق
حط كريم ايده على بوقها بسرعة وقال بغيظ:
- انتي اول ما بتقولي الجملة دي بتعملي وراها مصيبة، اتنهدي بقى، ويلا نروح عشان انا جبت اخري بلا سهم منطلق بلا بتاع
روحي البيت ودخلوا جوه، مراد بغيظ:
- ادخلي يا هانم
دخلت جوه وهو قال:
- دلوقتي خارسة صح؟ انما لما الست سألتك نطقتي
سابته ليلى ودخلت المطبخ، خرجت اكل من التلاجة وفضلت تاكل، كريم بغيظ:
- انا مش بتكلم معاكي!!
بصتله ببرود ورجعت تاكل تاني فخبط كريم بإيده جامد على الترابيزة وقال بعصبية:
- ردي عليا انا مبحبش التجاهل
بصتله بعصبية وخرجت الصاعق من جيبها وقالت ببرود:
- ششش
كريم بسخرية: هأ أو أو، انتي مفكراني هخاف؟ لا يا حبيبتي ده كان زمان بعد اللي شوفته بسببك معنتش بخاف، وهاتي البتاع ده كده
اخد كريم منها الصاعق وقال بسخرية:
-هتهدديني بإيه دلوقتي؟
نزلت على الارض وبصتله بتحدي، كريم بسخرية:
-متبصيش البصة دي عشا
مكملش كلامه لانها داست برجلها على رجله جامد، مسك كريم رجله وقال بغيظ:
-انتي مبتحرميش بقى
جرى كريم وراها وهي جرت وهي بتقول:
-السهم المنطلق، تحميل
خرجت من جيبها بلي وكبته على الارض بسرعة، خرج كريم من المطبخ وداس عليهم واتزحلق ووقع على الارض، كريم بوجع:
-انتي بتجيبي الحاجات دي امتى
ضحكت عليه وهو قال: بتضحكي!! ماشي يا ليلى يا انتي في ام البيت ده واذا كان انتي مجنونة فانا اجن منك
قام من على الارض وكان هيجري وراها بس قال بخبث:
-انا عرفت هعملك ايه
دخل كربم اوضته ومسك تعبان لعبة وافتكر لما كان بيخوفها بيه، خرج من الاوضة وكريم حدف التعبان عليها بس اتصدك لما ملقهاش خافت او صرخت، هرش في دماغة وقال:
-هي ليه معملتش اى ريأكشن مش المفروض انها بتترعب منهم؟
دخلت ليلى الاوضة بتاعتها وجابت مسدس الخرز، كريم بصدمة:
-لا غباء مش عايز
ابتسمت ليلى بخبث وطلقت واحدة عليه، كريم بوجع:
-اه، كده ماشي
جاب كريم مسدس الماية بتاعه وقال بسخرية:
-هو ده اللي قدرت عليه، كتك خيبة
رشها كريم بالماية وليلى صرخت وطلعت تجري، كريم بصدمة:
-يعني ما خوفتش من التعبان وخوفتي من المياة!!
كانت ليلى هتجري على بره بس كريم مسكها بسرعة قال:
-لا مهو انا مش كل مرة هيتختم على قفايا
قربها منه وقال بغيظ:
-اعمل ايه بس ضرب ومينفعش اضرب عشان انتي مش في وعيك، زعيك ومش هيجيب نتيحة لانك لما كنتي عاقلة مكنتيش بتتأثري ما بالك بقى وانتي مجنونة
حاولت تبعده عنها فنيمها كريم على الكنبة وهو بيقول:
-السهم المنطلق، تحميل
فضل يزغزغ فيها وهي تضحك، كريم بغيظ:
-ده انتي عاملة زي عصاية المقشة، يطلع منك كل ده يا مفترية
بعد كريم عنها واعد على الارض وقال بصياح:
-ابوس ايدك ارجعي انا اتبهدلت اوي، يا ولية حرام عليكي ده انا مهما كان جوزك وابن عمك برضو
مردتش ليلى عليه فقال كريم بغيظ:
-كله بحسابه، دكتور المجانين ده بس يشوفلك العلاج وانا هطلعه عليكي حي ني
ابتسمت ليلى بخبث فقال كريم بخوف:
-في ايه انا البصة دي مبطمنيش ابدا
ليلى بخبث: السهم المنطلق، تحميل
طلعت ليلى الصاعق اللي خطفته منه من غير ما ياخد باله وضربته بيه، كريم وهو بيتكهرب:
-ا اخدتيه ازاى ده يا ح حرامية
شالت ليلى الصاعق من عليه وهو قال بتعب وشعره منكوش نتيجه الكرهبه:
- ربنا ياخدك اوي ياخدني ايهما اقرب
اغمى عليه على الارض وهي كانت هحطت الصاعق في جيبها بس شغلته بالغلط، فضلت تتكهرب لحد بعدته عنها بالعافية، ليلى قبل ما يغمى عليها:
-السهم المنط
مكملتش كلامها واترمت جنب كريم على الارض