رواية ويبقي الحب
الفصل السادس6
بقلم اسماء ابرهيم
كانت جاسمين في طريقها لمقابله احمد في الميعاد المتفق عليه.
تدخل جاسمين الكافيه تلقي التحيه علي احمد ثم يقف احمد مستقبلا لها بابتسامه مليئه بالحب
جاسمين...ازيك يا احمد عامل ايه
احمد...الحمدلله ياجيسي اتفضلي استريحي ويسحب لها الكرسي وتجلس ثم يرجع الي كرسيه ويجلس امامها.
جاسمين...طبعا يااحمد انا وافقت بس اني اقابلك بره البيت عشان خاطر جاسر ونفس الوقت انا متضايقه اني بعمل حاجه من وراه
احمد...وانا عمري ماهكون السبب في انك تضايقي ومقدر ده بس كان لازم اتكلم معاكي واعرف رايك عشان انا ناوي بعد قعدتنا دي هاكلم جاسر في موضوعنا علي طول
جاسمين بابتسامه...ماشي يااحمد اتفضل اتكلم بس مش عايزه اتأخر علي فريده لانها لسه في الجامعه.
احمد...بصي بقي من غير مقدمات انا بحبك وعايز اتجوزك وانتي طبعا عرفاني كويس اوي وبعتذرلك ياستي علي الرسايل الهبله اللي كنت ببعتهالك
جاسمين تضحك...بس تعرف اني علي قد ماكنت متغاظه اني معرفش مين اللي بيبعتها علي قد ما فرحت لما عرفت انك اللي بتبعتهالي.
احمد...والله ياجيسي بحبك واوعدك طول ما فيه نفس هفضل احبك واحافظ عليكي ودلوقتي عايز اعرف انتي موافقه انك ترتبطي بيه ونكمل حياتنا مع بعض ولا لأ
جاسمين...تنظر له بخجل وتحرك رأسها بنعم وتقف لكي تذهب الي فريده يمسك يدها احمد وهو يقول رايحه فين خليكي معايا شويه
جاسمين...اتأخرت علي فيري يا احمد وعد بعد ما تكلم جاسر مش هاسيبك لحظه.
احمد....جيسي نفسي اسمعها منك زي ما انا شايفها في عيونك. وحياتي عندك تقوليها.
جاسمين بخجل تقول بهمس بحبك...وتذهب مسرعه وهي في قمه سعادتها.
في منزل فاروق
كان فاروق يتحدث علي الهاتف مع أحد رجاله وهو يضحك يعني خلاص الشحنه خرجت من المينا وفي طريقها للمخازن
المتصل..طبعا يافاروق بيه واطمن كل حاجه هاتتسلم في ميعادها
فاروق...تمام وابقي عدي عليا بالليل عشان تاخد باقي حسابك.
المتصل...تسلم ياباشا احنا عايشين في خيرك واي حاجه تاني انا رقبتي سداده
فاروق...قدها وقدود يالا سلام واستني مني الامر بالتسليم.
يغلق فاروق الهاتف ويقول بكل غل وحقد ماشي ياابراهيم لما نشوف مين فينا اللي هيضحك في الاخر.
تدخل منه عليه وتطلب منه بعض الاموال
منه...بابي كنت عايزه فلوس عشان مسافره يومين مع اصحابي
فاروق...سفر ايه دلوقتي مش المفروض عندك امتحانات بعد شهر
منه...بابي انا حره وبعدين دول يومين بس تغير قبل الامتحانات.
فاروق...براحتك واتفضلي الفيزا اهيه
منه تاخذها وتقول ميرسي كتير باي انا خارجه اشتري شويه حاجات للسفر
فاروق...ماشي يامنه لما اشوف اخرتها معاكي ايه.
⚘⚘⚘⚘⚘⚘⚘⚘⚘⚘
عند فريده في الجامعه كانت تنتظر جاسمين .بقي كده ياجيسي كل ده تاخير يارب بقي وكمان قافله الفون
يأتي محمود عليها وهو يقول مساء الخير يافريده ازيك
فريده...نعم انت بتكلمني انا
محمود...اه هو في حد هنا اسمه فريده غيرك انتي مش فكراني ولا ايه
فريده...انت مين اصلا وتعرفني منين واه انا مش فاكره حد
محمود...انا محمود اللي اتعرفت عليكوا مع منه.
فريده ...اه اهلا خير في حاجه
محمود ...لا ابدا بس كنت ماشي ولامحتك قاعده لوحدك قولت اجاي اسلم عليكي اشوفك لو محتاجه حاجه..
فريده بغلاسه...لا شكر مش محتاجه حاجه و اممم خلصت اتفضل بقي لان مش منظر انك تقعد معايا
محمود...انا اسف اني تطفلت عليكي عن اذنك
يذهب محمود ويتصل بجاسر يبلغه ان اتكلم مع فريده وان اروي شافته وهو بيكلمها عشان تبلغ منه
جاسر...تمام يامحمود واي جديد كلمني علي طول
محمود....اكيد وانا دلوقتي هاروح اقابل منه واقولها اني كلمت فريده وبدأت الخطه عشان ماتقلقش مني
جاسر...تمام ويغلق معه الخط.
في المساء كانت تجلس جاسمين مع فريده تحكي لها ما دار في مقابله احمد
فريده ...بجد ياجيسي انا فرحانه اوووي ربنا يسعدك ياقلبي
جاسمين ...عقبالك يافيري ياسلام لو نعمل خطوبتي وخطوبتك في يوم واحد
وفي اثناء حديثهم. يرن جرس الهاتف فكان جاسر من كان يقوم بالاتصال عليها
جاسر...الو يافيري عايزك تجهزي في نص ساعه عشان هانخرج نتعشا بره
فريده..حاضر ياحبيبي هاجهز بسرعه
جاسمين ...علي فين كده طبعا ماناس ليها عشا بره وناس قاعده تندب حظها
تضربها فريده بالمخده ليه بقي ما انتي كنتي مع حبيب القلب من شويه وسبتيني ملطوعه لوحدي
جاسمين....هههههه ماشي يااختي روحي اجهزي عشان ما تتأخريش
تدخل فريده تاخذ حمام وترتدي بنطلون جينز وشميز احمر وعليه جاكت اسود وتترك شعرها ينسدل بحريه علي ظهرها وكانت تضع القليل من الملمع للشفاه وكحل فكان شكلها جذاب ووضعت بعض قطرات من عطرها وأخذت شنطها وخرجت
كان جاسر يجلس في سيارته ينتظرها وهو شارد فكان يفكر في كلام المهندس المختص بخصوص كاميرات المراقبه
ياتري ايه الحاجه اللي اكتشفها المهندس وعايز يقابلني بره الشركه في ذلك الوقت كانت فريده تصل الي السياره وتقول
ايه ياجاسر سرحان في ايه ينتبه جاسر لها وهو يغمز ويصفر علي جمالها
جاسر... سرحان فيكي ياعمري وبعدين ايه الجمال ده كله
فريده...بحبك
جاسر وهو يمسك يدها ويقبلها وانا كمان بعشقك
فريده ...ربنا يخليك ليا ياجاسر ويالا بقي احنا هانقضي الليل كله في العربيه ولا خلعت من العشا..
جاسر...لا طبعا حبيبتي تحب تتعشا ايه
فريده..اممم بيتزا بسي فود
جاسر يضحك..عيوني احلي بيتزا بسي فود لأحلي عيون في الدنيا
فريده تبتسم بخجل وتنظر خارج السياره وتهمس بحبك ياجاسر
جاسر بضحكه عاليه..سمعتك علي فكره وانا بعشقك ياقلب جاسر.
#اســـــــــمــــــــااء
يوم جديد علي جميع الابطال يحمل كثير من المفاجأت منها السعيد والاخر مؤلم .
احمد كان يجلس في مكتبه يفكر في موضوعه مع جاسمين وانه يجب الحديث مع جاسر فقرر أنه يذهب الي مكتب جاسر ويفتح معه الموضوع
احمد يقوم ويذهب الي مكتب جاسر ويدخل عليه ويقول..
احمد...جاسر كنت عايزك في موضوع مهم مش مستحمل تأجيل.
جاسر يضيق عينيه...موضوع ايه اللي مخليك عامل كده
احمد...جاسر انت صديق عمري واحنا متربين مع بعض وحابب انك تكون اول واحد اتكلم معاك في الموضوع ده
جاسر بقلق...خير يا احمد انت قلقتني هو فيه ايه بالظبط
احمد بدون مقدمات..انا بحب جاسمين وعايز اخطبها.
جاسر....يضحك ويقول هو ده الموضوع اللي عامل عليه كل ده .احمد انت مش صديق وبس انت اخويا وانا يشرفني انك تكون جوز اختي لاني واثق فيك وانها هتكون معاك في امان
احمد يجري عليه وياخذه بين احضانه..ربنا يخليك ياجاسر وانا بوعدك طول ما فيه نفس جاسمين هتكون في عينيا وقلبي ومش هاسمح لحد يزعلها
جاسر يشدد من احتضانه...مبروك يا احمد وربنا يسعدكوا
احمد...طيب رتب انت بقي ميعاد عشان اقابل عمي ونشوف هانعمل الخطوبه امتي وكده
جاسر ...ايه ياعم حيلك مش لما اتكلم مع العروسه وناخد رأيها ويغمز جاسر له ثم يكمل كلامه ولو اني عارف رأيها من دلوقتي
احمد...انت بتقول ايه وعارف ايه...
جاسر بابتسامه خبث ...ابدا انا بقول يعني عارف ممكن تقول ايه ولا تحب تاخد رايها انت زي موضوع الرسايل..
احمد يندهش علي كلام جاسر وانه يعلم بموضوع الرسايل ثم يقول له تمام اعرف الميعاد وبلغني ويخرج مسرعا من امام جاسر..
جاسر يضحك عليه ويقول مجنون وهايتلم علي مجنونه ربنا يستر.
⚘⚘⚘⚘⚘⚘⚘⚘⚘
في سوهاج انه يوم كتب الكتاب المتفق عليه الحاج محمد وفرج
الحاج محمد...ياحاجه فاطمه جهزتي كل حاجه عشان الناس
فاطمه...ماتخافش انت كل حاجه هاتبقي في ميعاد بالمظبوط
الحاج محمد...ربنا يتمها علي خير
فاطمه...والله ياحاج محمد كان نفسي فريده تكون معانا
الحاج محمد...يعني هاتسيب دراستها وتاجي باذن الله تكون معانا في الفرح.
يتركها الحاج محمد ويدخل مكتبه وتقوم الحاجه فاطمه بتجهيز المنزل لاستقبال اهل العريس واقاربهم.
ياتي المساء عليهم يحمل السعاده لهنيه وفرج لقد تم عقد قرانها واصبحت زوجته علي سنه الله ورسوله وبعد انتهاء المأذون تعلو اصوات النساء بالزغاريد والمباركات للعروس يخرج الحاج محمد ومعه فرج لكي يبارك لهنيه.
الحاج محمد...مبروك ياهنيه وربنا يسعدك يابتي.
هنيه ...بخجل وهي تنظر الي الارض الله يبارك فيك يابا الحاج.
الحاج محمد...سلم علي مراتك يافرج وباركلها واسمعها مني كلمه خلي بالك منها وحافظ عليها واوعاك تغضبها في يوم هاتلاقيني انا اللي واقفلك.
فرج ...ماتخافش يابا الحاج هنيه هتكون في عينيا وربنا ما يجيبش زعل بينا
فاطمه...مبروك يافرج يجعلها جوازة العمر.
في الفيلا يدخل جاسر وهو يغني
(هي دي هي فرحه الدنيا دق ياقلبي غني ياعينيا)
تخرج ناديه علي صوته وتقول ايه الروقان ده ربنا يروق بالك دايما بس ايه سببه
جاسر يحضنها ويقبل يدها وجبينها...انت تكرهي تشوفي جاسر حبيبك رايق وفرحان
ناديه تربت علي كتفه ...يارب يابني يفرحك ويسعدك
جاسر...امال فين البنات مس سامع صوتهم
ناديه...رجعوا من الكليه اتغدوا وطلعوا ناموا ولحد دلوقتي مش راضين يصحو بس سيبك منهم وقولي ايه الروقان ده
جاسر...حاضر يجلس ويقول لها جاسمين جالها عريس وعايز نحدد ميعاد عشان يجي يقابل بابا.
ناديه بفرحه ..بجد ياجاسر انت بتتكلم بجد ومين ده انت تعرفه يعني ابن ناس ومركزه كويس.
جاسر...ايه كل الاسئله دي اهدي ياماما لما اتكلم مع جاسمين الاول واشوف بابا وعلي العموم انتي تعرفيه كويس
ناديه ...اعرفه كويس ده مين ده
جاسر...احمد صاحبي ياماما وانتي عارفه اخلاقه ومتربي معانا وانا بصراحه موافق جدا
ناديه....بجد ياجاسر احمد هو اللي طالب جيسي طبعا ياحبيبي احمد ابني وبحبه زي ابني ربنا يقدم الخير.
⚘⚘⚘⚘⚘⚘⚘⚘⚘⚘
في فيلا فارس
يدخل احد الحراس..فاروق بيه في واحد ظابط عايز حضرتك.
فاروق....ظابط وعايزني انا ليه علي العموم خليه يدخل.
فاروق في باله ياتري عايز ايه ده كمان ويارب مايكنش ليه علاقه بالشغل ولا حد عرف بموضوع المخازن.
الظابط يدخل عليه ومعه قوه ويقول لفاروق انت فاروق البنهاوي
فاروق ...كان يجلس واضعا قدم فوق الاخري ايوه انا وازاي تدخل هنا باللي معاك دول انت مش عارف بتكلم مين
الظابط...انا لحد دلوقتي مش عايز اتصرف بطريقه ماتعجبش حضرتك وياريت تتفضل معانا من غير شوشره
فاروق...انا مش هاتحرك من مكاني وهاتصل بالمحامي هو يروح يشوف عايزني ليه
الظابط...مافيش داعي لان مطلوب القبض عليك للاتجار في السلاح .
فاروق بعصبيه وصوت عالي انت اكيد غلطان وانا هعرف اخليك تعرف كويس اوي من هو فاروق البنهاوي.
الظابط ...اعمل اللي انت عايزه ودلوقتي اتفضل معانا ..