رواية ابعد عن الغلط
الفصل الاول1
بقلم اسراء ابرهيم عبد الله
هي ببرود: قلبك دا فندق بيستقبل أي أنثى وخلاص
هو بتبرير: يا بنتي ايه اللي بتقوليه دا؟
هي: ما كل حاجة واضحة قدام عنيا وبنتكر كمان يا بجح، خد دبلتك أهي ومش عايزه أشوفك تاني
هو بسرعة: يا بنتي بعمل خير
هي باستهزاء: إنك تشوف مشاكلهم وتقدم ليهم ضيافة كمان، شوفلك واحدة بقى منهم تقبل بيك
ورمتله الدبلة ومشيت وهي بتاخد نفسها وبتقول: أخيرا خلصت منه كان مشكلة بالنسبالي والحمد لله خلصت منها
رجعت البيت لمامتها وهي بتقول: ماما أنا فركشت الخطوبة باركيلي
والدتها بصدمة: على إيه يا خيبتها مش عارفه ألاقيها منك ولا من أخوكي يا وسام
وسام: يا ماما يعني عشان بنعمل الصح تزعلي، أولا أخويا بيعمل اللي شايفه مناسب إيه يعني لما ساب شغله عشان شايف إنهم بياخدوا ربا من الناس، وأنا سِبت المحروس عشان بتاع ستات وقلبه أتوبيس بيحمل أي واحدة المهم إنها أنثى وخلاص
فين الغلط اللي احنا عملناه يا حبيبتي؟
بقلم إسراء إبراهيم عبدالله
ربنا سبحانه وتعالى قال إيه «يَا أَيُّهَا الَّذِينَ آمَنُواْ لاَ تَأْكُلُواْ الرِّبَا أَضْعَافًا مُّضَاعَفَةً وَاتَّقُواْ اللّهَ لَعَلَّكُمْ تُفْلِحُونَ»
واللي بياخد ربا مش هيلاقي البركة في فلوسه ولا في حياته ولهم عذاب أليم ولازم يتوبوا قبل فوات الأوان
وبالنسبة اللي فركشت معاه، لو كملت كنت هتعب معاه والبيت مش هيخلوا من المشاكل والنتيجة هتبقى الطلاق
مع إننا كنا مخطوبين صالونات عايزنا نقضي الفترة دي كلام حب وغزل وقرف كأننا واخدين بعض عن حب اومال لو مش لسه عارفين بعض من أسبوع بلا نيلة، وحتى لو كنا واخدين بعض عن حب ماينفعش نتغزل في بعض ولا نتعدى الحدود طالما لسه في فترة الخطوبة، بس هو مابيعرفش حاجة صراحة عن الحدود دي زي ما يكون مشاعره مصدية وجاي يسنفرها معايا
يعني ما هو كان سنجل بقاله كام سنة مش قادر يستحمل كمان كام شهر ولا سنة لغاية ما يكتب كتابه على شريكة حياته ويبقى يقول اللي عايزه وكله في الحلال المهم دا مش مناسبني يا ماما والخطوبة اتعملت عشان كدا عشان نعرف إننا مناسبين بعض ومتقبلين عيوب بعض ومتفاهمين ولا لأ... مش عشان نحب ونتغزل في بعض ونعصي ربنا
ومش شرط بعمل كدا يبقى أنا شيخة وكدا وبعدين الواحد يطول يبقى شيخة وعارف كل تفصيلة في دينه، بس البنت عندها حياء وأخلاق ولو عملت مع خطيبها اللي بنشوفه دلوقتي يبقى كدا اتجردت من حيائها، افرض ماحصلش نصيب وفركشوا هيبقى موقفها إيه وكانت سايبة واحد بيمسك إيدها ويقول كلام حب وغزل ماينفعش يتقال غير بعد الجواز عشان مايفتحش عليهم أبواب تانية لارتكاب المعاصي ويرجعوا يقولوا ياريت اللي جرى ما كان
والدتها: كلامك صح يا حبيبتي
ربنا يبارك فيكي أنتِ وأخوكي ويسعدكم