رواية بسمتي الفصل الحادي عشر11بقلم حليمة عدادي

كان لي وكنت له كان لي قطرة مطر فكنت له أحلى الزهر

 كان لي أرق نغم فكنت له أجمل وتر

 كان لي نجماً منير فكنت له أبهى قمر 

حبه لي بسعة السماء وحبي له بسعة البحر فأيقنت أنه الحياة وأني له ضي البصر

**********************************************

بسمة بإبتسامة : أبوها وافق يلا اجهزوا ماعندناش وقت معادنا معاهم بالليل ..

كريم بفرح : إنتي بتتكلمي بجد يامرات أخويا ..

بسمة : لو متحركتوش بسرعة أنا هسيبكم وأمشي ..

كريم جري لأوضته وهو مبسوط  علي بصله وضحك على جنان صاحبه

بسمة : بتضحك ليه يلا علشان تجهز إنت كمان ..

علي : بضحك على الحب بيخلي الواحد من غير عقل كريم الراجل العاقل عمال يجري زي العيل الصغير ..

 

بسمة : هو دا الحب ياحبيبي يلابينا

زقت الكرسي ودخلت به لأوضتهم

وبعد وقت صغير كانوا جاهزين 

علي : كريم إنت هتروح علشان تجيب حاجات ناخذها معانا وإحنا هنروح عند ماما جميلة اتفقنا ..

كريم : ماشي ومش هتأخر ..

كريم خرج بسرعه وكمان بسمة خرحت هي وعلي

علي : طالعه قمر النهاردة ..

بسمة : امممم قمر النهاردة بس ..

علي بحب : إنتي دائما قمر ياقلبي ..

وصلوا لبيت جميلة بسمة خبطت على الباب جميلة فتحتلهم ورحبت بهم

بسمة : ماما تتوقعي إن أبو جوري هيوافق على كريم ..

 

 جميلة : ومايوافقش ليه كريم قيمه وسيمه ومش ناقصه حاجة ..

بسمة : جوري مش تلاقي زي كريم ..

علي : إن شاءالله هيوافق ..

و هما بيتكلموا دخل كريم وهو بينهج  

كريم : معلش إتأخرت عليكم كنت بجري بكل قوتي شوفوا شكلي عامل إزاي ..

علي : ماله شكلك ما إنت كويس أهو يلابينا ..

**********************************************

جوري ساعدت أمها في التحضير لإستقبال العريس أول مرة تحس إنها مكسوفه العرسان اللي كانت بتيجي قبل كدا كانت بتخلق المشاكل علشان تتخلص منهم أما النهاردة وافقت على طول مش عارفه ليه .. 

فاقت من أفكارها لما سمعت أبوها بيرحب بيهم 

محمود : اهلا وسهلا إتفضلوا شرفتونا ..

علي : الشرف لينا ياعم محمود ..

دخلوا وقعدوا كريم بيدور بعينه عنها 

جميلة : محمود إحنا جينا علشان نطلب إيد بنتك جوري ..

محمود : وجايين تطلبوها لمين ..

جميلة : إبني كريم ..

محمود : عرفنا عن نفسك يابني أنا معرفش عنك حاجة ..

كريم : أنا كريم متوكل عندي 30سنة بشتغل في شركة ..

محمود : أهلك فين ليه مجوش معاك ..

كريم : ماما متوفيه وبابا مريض علشان كدا جيت أنا وأخويا ..

علي : عم محمود إحنا قلنا نجي إحنا الأول ولو حصل نصيب ساعتها بابا هيجي إن شاءالله ..

محمود : أنا كل اللي يهمني راجل يكون سند لبنتي ..

نسأل العروسة الأول هي صاحبة القرار أنا كل اللي يهمني سعادة بنتي ..

بسمة : طنط أومال فين جوري مجتش ليه ..

 

نادية : روحي ناديها البنت مكسوفه ..

 

بسمة : حاضر ياحبيبتي ..

بسمة دخلت عند جوري لاقتها قاعدة متوتره وعماله بتفرك بإيديها 

بسمة بإبتسامة : ما شاءالله إيه القمر دا يلا يابنتي تعالي نخرج ..

جوري : بسمة أنا خايفه مش عايزه أخرج حاسه إني لو خرجت هقع من طولي ..

بسمة : اهدي ياجوري خذي نفس يلا نخرج أنا معاكي ..

دخلت جوري أوضة الصالون وعينيها في الأرض كانت حاسه إنها هتموت من الإحراج قعدت جنب بسمة 

محمود : جوري يابنتي إنتي عارفه أنا أد إيه بحبك أنا عارف إني بقسى عليكي بس أنا بعمل كدا من خوفي عليكي سامحيني يابنتي  كريم طالب إيدك إنتي رأيك إيه ..

 

جوري خرجت الكلام بصعوبة : اللي تشوفوا يابابا لو إنت موافق أنا موافقه ..

محمود : جوري من اللي قالته عنه الست جميلة أنا شايف إنه هيكون سند ليكي من بعدي ..

جميلة زغرطت بفرحة : لووووولووووي ألف مبروك ياولاد ..

بسمة : ألف مبروك ياحبيبتي

الكل باركلهم 

علي : عم محمود بعد إذنك خلينا نسيبهم وحدهم شوية ..

محمود : تعالوا نخرج ونسيبهم لوحدهم ..

 

خرجوا وسابوهم جوري كانت بتضغط على إيديها من توترها

كريم : اهدي ياجوري متوترة كدا ليه ها عايزه تعريفي إيه عني ..

جوري بكسوف : ليه اخترتني أنا ..

كريم : هجاوبك لما يتكتب كتابنا ها عايزه تعرفي حاجة ثانية ..

 

جوري : لا ..

كريم : أنا هتكلم مع عم محمود علشان نعمل الخطوبة وكتب الكتاب مرة واحدة ..

 

جوري : ليه  .. 

كريم : وقتها هتكوني مراتي وأقدر أتكلم معاكي براحتي علشان منعملش حاجة حرام هتكوني مراتي قدام كل الناس هديكي وقت علشان تفكري وهستنى ردك ..

جوري : إن شاءالله خير هفكر وأرد عليك ..

 

كريم خرج من عندها 

كريم : عم محمود أنا هستنى ردك ..

علي : إن شاءالله خير ..

كريم : كل حاجة جت بسرعة أنا إديتها وقت علشان تفكر ونعمل الخطوبة وكتب الكتاب مع بعض ..

 

جميلة : فكرة حلوة يابني ألف مبروك ..

بسمة : هشوف جوري وجايه بسرعه ..

بسمة دخلت  عند جوري لاقتها قاعدة وسرحانه

بسمة بإبتسامة : مين اللي شاغل عقل عروستنا ..

جوري : مش عايز يقولي هو اختارني ليه قال هيقولي بعد كتب الكتاب طب هو ليه مستعجل ..

بسمة : كريم بيحبك يابت وعايز يكتب الكتاب علشان يتكلم معاكي براحته .. أنا همشي دلوقتي علي مستنيني ..

 

جوري : أخيراً اعترفتوا بمشاعركم لبعض ربنا يسعدكم ..

بسمة : ألف مبروك ياحبيبتي ..

*********************************************

 كريم بفرحه : ااااه أنا النهاردة أسعد إنسان في العالم حاسس إني ملكت العالم ..

علي : ربنا يسعدك ياحبيبي ألف مبروك  ..

كريم : يبارك فيك ياخويا بس أنا عايز أشوف ولاد أخويا الأول ..

علي بتمني : يااااه إمتا اليوم دا يجي إنت عارف إني بحب الأطفال مستني اليوم اللي أشيل فيه إبني بين إيديا ..

كريم : إن شاءالله اليوم دا هيجي قريب لازم أكلم عمي مراد أنا قلت إن بابا مريض أنا كذبت ودا مضايقني ..

 

علي : إنت ماكذبتش أبويا هو أبوك هو اللي رباك بعد موت أهلك ..

أنا لازم اتكلم مع بسمة وأقولها على كل حاجة مش عايز حياتنا تبدأ بكذبه ..

كريم : فعلاً ياعلي إنت لازم تقولها على كل حاجة علشان حياتكم تبدأ على نور ..

**********************************************

قعدوا وهما ساكتين كل واحد بيبص على الثاني ومستني الثاني يتكلم 

بسمة : علي في إيه إنت قلتلي أجي بسرعة علشان في موضوع مهم عايز تكلمني فيه ولحد دلوقتي ساكت مش بتتكلم ..  

كريم : يلا ياعلي قولها الحقيقة هتفضل مخبي لإمتا التأخير مش حل هيجي يوم والحقيقة هتتكشف ..

بسمة بقلق : علي إنت فيك حاجه علي أتكلم إنت ساكت ليه ماتخوفنيش عليك.. 

علي : بسمة أنا هقولك على كل حاجة بس ماتقاطعنيش لحد ما أكمل كلامي لكن قبل ماقول أي حاجة عايزك تعرفي إني حبيتك من كل قلبي واتمنى إن الكلام اللي هقوله مايأثرش على علاقتنا ..

بسمة بنفاذ صبر : علي أنا هفقد أعصابي إتكلم أنا عارفه إنك بتحبي قولي بقى في إيه ..

 

علي أولاً كريم مش أخويا كريم صاحبي علي بدأ يحكيلها عن كل حاجة تخص حياته لحد خطة كريم لحد ماوصل لجوازوه منها 

على : في حاجة واحدة بس من كل اللي قولته دا كانت حقيقي هو حبي ليكي أنا حبيتك بجد ..

  

بسمة بدموع : دلوقتي فهمت يعني أنا كنت في فترة إختبار لحد ماتلاقي زوجة ليك وأنا زي الغبيه لحقت مشاعري وحبيتك من كل قلبي وإنت كل الوقت دا كنت بتكذب عليا علشان تشوف لوكنت واحدة طماعه كل همها الفلوس ولالا صح كدا 

إنت فاكر إن كل البنات زي مايا كل همهم الفلوس وبس في بنات بتدور على السند والحب والأمان .. 

وإنت ياكريم قولت لجوري على الحقيقة ولا هتعمل زي صاحبك ..

كريم : أنا طلبت من علي إنه يقولك الحقيقة علشان أنا كمان أقولها على كل حاجة قبل مانتجوز ..

علي : بسمة إفهميني علشان خاطري ..

بسمة : مش عايزه أفهم حاجة أنا حبيت علي الفقير لكن علي سلمان الغني أنا معرفوش ..

 علي اللي حبيته مات خلاص ليه ماقولتليش من الأول كنت فاكر إن هحاول أقرب منك علشان فلوسك ..

كريم : بسمة دي كانت فكرتي أنا أرجوكي أعطيه فرصة واحدة بس علي مش بيفكر بالطريقة دي ..

 علي بيحبك إنتي عرفت دلوقتي هو عمل كدا ليه ..

 

بسمة سابتهم ودخلت أوضتها وهي بتعيط هو كذب عليها ليه هو شايفها إنها ممكن تقرب منه علشان الفلوس ..

في الخارج قعد علي حزين 

علي : أعمل إيه دلوقتي ياكريم بسمه هتسيبني مش هتصدقني ثاني ..

كريم : بسمة بتحبك ياعلي إديها شوية وقت تستوعب اللي حصل وأكيد هتسامحك ..

علي بحزن : هي بقت كل حاجة في حياتي مش هقدر اعيش من غيرها لوهي سابتني دي بتعاملني كأني ابنها لما بتألم هي كمان بتتألم ولما بضحك كانت بتفرح علشاني ..

كريم : اهدى ياعلي ماتزعلش ياخويا بسمه هتسامحك ..

علي : أنا ماقصدتش اللي هي قالته أنا شايفها جوهرة غاليه ياريت تعرف أنا بحبها أد إيه ..

علي حط إيده على صدره لما حس إنه بيختنق وحاسس بألم قوي في صدره ..

 

كريم بخوف : اهدى ياعلي حالتك كدا هتسوء أنا هجبلك كوباية ميه ..

كريم جاب الميه شاف علي مرمي على الأرض مش قادر يتنفس 

كريم بصراخ : علي إنت سامعني على رد عليا علي لكن مافيش رد ..

خرجت بسمة كانت بتمثل الجمود عكس اللي جواها

كريم بخوف : بسمة اعملي حاجة علي بيموت ..

بسمة لما سمعت كلمة الموت حست بنغزه في قلبها جريت عليه قعدت جنبه على الأرض حطت رأسه على رجليها والدموع بتنزل من عينيها 

بسمة بدموع : أنا صحيح زعلت منك لكن أنا مقدرش أعيش من غيرك علي إفتح عينيك ياعلي ماتخوفنيش عليك ..

 

  كريم جه شال علي وخرج بيه 

بسمة : إنت هتوديه على فين ..

كريم : هاخذ على المستشفى ..

**********************

في قصر مراد سلمان 

مراد : بيجاد جهز نفسك علشان هتيجي معايا ..

بيجاد : هنروح على فين يابابا ..

مراد : هنروح لعلي عايز أفهم موضوع جوازه دا ..

هناء : إتصل بيه واسأله ..

مراد : تلفونه مقفول لازم أروحله بنفسي ..

لارا : أيوه يامراد لازم تروح وترجعه على البيت ..

 

رؤيا : بعد إذنك يابابا أنا عايزه أجي معاكم ..

 

مراد : ماشي ياحبيبتي يلابينا.. 

************************

في المستشفى 

كانوا قاعدين قدام أوضة علي والصمت سيد الموقف مافيش غير صوت عياط بسمة دموعها كانت مغطيه وشها 

جميلة : اهدي يابنتي هيبقى كويس بإذن الله ..

بسمة ببكاء: أنا السبب أنا اللي عملت فيه كدا ..

جوري : العياط مش هيفيد بحاجة ادعيله يابسمة إنه يقوم منها بالسلامة ..

 كريم كان قاعد لوحده والدموع متجمعه في عينيه علي مش بس صاحبه علي

 

أخيراً خرج الدكتور  من الأوضة 

بسمة بلهفه : طمني يادكتور هو عامل إيه دلوقتي ..

الدكتور : إنتوا عارفين إنه قلبه تعبان وإنه لازم يبعد عن الزعل والتوتر .. 

 

كريم : هو حالته إيه دلوقتي يادكتور ..

الدكتور : لوكنتوا إتأخرتوا شوية كنا فقدنا المريض حالته وحشه لازم نلاقي متبرع بأسرع وقت ممكن ..

 

كريم : معانا وقت أد إيه ..

الدكتور : بس ثلاثة شهور ..

 بسمة وقعت على الأرض بعدما سمعت كلام الدكتور معقول بعد ثلاثة شهور هتفقد علي 

بسمة : أنا مستعدة اديله قلبي ولو طلب عينيا هدهم له ..

الدكتور : لازم الأول نعمل فحوصات وتحاليل علشان نشوف لوفي تتطابق ..

 

بسمة : ممكن أدخل أشوفه ..

الدكتور : تقدروا تدخلوا هو شويه وهيفوق بس لازم تبعدوه عن الزعل والضغط النفسي ..

دخلت بسمة قعدت جنبه حطت رأسها على صدره ودموعها نزلوا 

بسمة : أنا السبب ياريت أنا اللي كنت مكانك ..

علي فتح عينيه

علي بهمس وصوت متعب : متعيطيش دموعك غاليه عليا متخافيش أنا كويس ..

بسمة سامحيني منكتش عايز أكذب عليكي ..

 

بسمة: ششش مش وقت الكلام في الموضوع دا ماتتكلميش كثير إنت لسه تعبان ..

 

كريم : حمدالله على سلامتك ياصاحبي كدا تخوفنا عليك ..

 

علي : الله يسلمك واقف بعيد ليه تعالى ..

كريم بدموع : علي إحنا لازم نلاقي متبرع في أسرع وقت حالتك بتسوء ..

علي : إنتوا مكبربن الموضوع ليه أنا كويس ..

 

قاطع كلامهم دخول مراد دخل يجري وبيجاد ورؤيا وراه 

علي بإستغراب : بابا و بيجاد ..

مراد بقلق : فيك إيه ياعلي حصلك إيه يابني ..

 

علي : ماتخافوش أنا كويس ..

رؤيا حضنته وهي بتعيط 

رؤيا : إنت كويس بجد ولا بتقول كدا علشان ماتقلقناش عليك ..

بسمة كانت هتموت من الغيظ تطلع مين دي علشان تخضن جوزها

علي : ماتخافيش أنا كويس دا التعب بتاع كل مرة بس إنتوا عرفتوا منين إن أنا هنا

مراد : لما وصلنا الحارة روحنا البيت ولما ملاقناش حد إتصلت بكريم هو قالي إنكم هنا ..

رؤيا : وحشتيني ياعلي لما سمعت إنك هنا كنت هموت علشان خاطري خلي بالك من نفسك بلاش تتضايق 

جت تحط إيدها على رأسه بسمة ما استحملتش مسكت إيدها 

رؤيا بضيق : مالك في إيه بتمسكي إيدي ليه .. 

بسمة : مش عارفه في إيه طيييب أنا هقولك ..

علي : بسمة بتعملي إيه ..

 

بسمة نسيت وجودهم في الأوضة بسبب غيرتها : عايزني أقف ليه أنا بس هعرفها أنا مسكتها ليه إزاي تسمحلها إنها تاخذك بالحضن وتمسك إيدك أنا صبرت لكن هي زودتها أوي وأنا صبري نفذ .. 

علي بضيق : بسمة ابعدي عنها دي أختي رؤيا ..

كريم بضحكة : يابت دب أخته هههههه ..

بسمة حست بالإحراج من تصرفها وخرجت تجري برا الأوضة 

جوري : بسمة إستني فيكي إيه ..

 بسمة ماردتش عليها جوري لحقتها

في أوضة علي ..

علي : رؤيا اهدي متعيطيش بسمة ماتقصدش أنا آسف ياحبيبتي ..

مراد : مين البنت دي وإزاي تتجرأ إنها تضرب بنتي ..

كريم بهزار : لازم تتعود عليها اللي يقرب من علي هتقتله ههههه ..

علي : بابا دي مراتي وأكثر حد وقف جنبي أنا آسف إني خبيت عليك أنت كنت مستني الوقت المناسب علشان أقولكم ..

 

مراد : هتيجي معانا على القصر لحد مانلاقي متبرع ونبقى نتكلم في الموضوع لما تخف ..

علي : لو بسمة وافقت أنا هاجي معاكم..

مراد بضيق : نعم هتستنى منها الموافقة علشان ترجع لبيتك ..

علي : إنت مش فاهم يابابا هي حبتني وأنا فقير ولما عرفت 

بالخطة اللي عملها كريم قالت إنها مش عايزه علي الغني هي حبت علي الفقير خايف إنها ماتوافقش إنها تيجي معايا ..

مراد بعصبية : مش هناخذ رأيها هتيجي معانا ..

 

كريم : علي بسمة بتحبك ومش هتسيبك عمي اهدى .. 

علي : كريم روح وجيبها علشان أتكلم معاها ..

رؤيا بإبتسامة : أنا اللي هروحلها عايزه أتعرف على مرات أخويا ..

 

عند بسمه

بسمة : دا كل اللي حصل إزاي هبص في وشهم دلوقتي ..

جوري :الموضوع بسيط دا جوزك ومن حقك إنك تغار عليه ..

رؤيا : سلام أقدر أتعرف على مرات أخويا ..

بسمة بإحراج : أنا آسفة مكنتش أعرف إنك أخته أنا آسفة أوي ...

رؤيا بإبتسامة : أنا رؤيا أخت علي الوحيدة ..

بسمة : إتشرفت بمعرفتك أنا بسمة ودي جوري صاحبتي وتبقى خطيبة كريم ..

رؤيا : إتشرفت بيكم كنت متحمسة علشان أشوف اللي سرقت قلب أخويا علي تعالي ندخل علي عايزك ..

جوري : أنا همشي مع السلامة ابقي كلميني ..

دخلت بسمة هي ورؤيا كانت بسمه باصه للارض بخجل 

رؤيا : أنا جبتلكم مرات أخويا الجميله ..

 

مراد : إيه الأرض عجباكي للدرجة دي قربي عايز أتعرف على مرات إبني ..

 

 بسمة رفعت راسها وبصت لعلي شاورلها علشان تقرب من أبوه 

مراد قرب منها رفع رأسها

مراد : إنتي بقى مرات الغالي لازم رأسك دائما يبقى مرفوع لفوق ومن النهاردة اعتبريني أبوكي ولو علي زعلك تعالي واشتكيه ليا ..

بسمة نزلت دموعها لما قالها تعتبروا أبوها لأن أبوها مات وسابها وهي لسه صغيرة محستش يعني إيه حنان الأب حست بالحرمان

مراد : هو أنا قلت كلام يزعل انا كنت متعصب من علي ..

بسمة بنفي : لا أبداً أنا بس أفتكرت بابا ودموعها نزلوا 

مراد مسح دموعها واتكلم بحنيه : من النهاردة أنا أبوكي وإنتي بنتي مفهوم ..

بسمة بإبتسامة من وسط دموعها : مفهوم يابيه ..

مراد بتحذير : إحنا قلنا إيه في بنت بتقول لأبوها بيه قولي بابا زي رؤيا ..

بسمة : تسلملي يابابا ..

رؤيا حضنتها حب كانت مبسوطه 

رؤيا : من النهاردة أنا انا أختك ماتنسيش دا ..

 

مراد : أنا هستناكم برا هخلص إجراءات الخروج هيا يلا ياولاد ..

 وهما خارجين علي بص لبسمة شاف أثر الدموع على وشها

علي : بسمة أنا آسف إني كنت السبب في دموعك دي دموعك عاملين زي السكين المغروس في قلبي بسمة علشان خاطري متعيطيش ثاني ..

بسمة مسحت دموعها : مش إنت السبب ياعلي إنت سبب فرحتي وبس أنا بس أفتكرت بابا ..

علي : من النهاردة أنا أبوكي وأخوكي وجوزك ..

بسمة : إنت كل حاجة ليا في الدنيا دي علشان خاطري متسبنيش لوحدي في الدنيا دي .. 

ضمها لحضنه بحنان 

بسمة : الأمان بالنسبة ليا هو حضنك ..

علي : هفضل معكي دائما لحد آخر نفس بسمة أنا عايز اتكلم معاكي 

بابا طلب مني إننا نروح معاه القصر وأنا حبيت أسألك بالاول ..

بسمة : اللي شايفه مناسب ويريحك أعمله وأنا هكون معاك منين ماتروح مش هسيبك ..

 

علي : أنا هقول لبابا إننا نروح معاه كلمي ماما جميلة علشان تيجي معانا ..

بسمة : حاضر هقولها لكن حربي هتبدأ ..

علي بإستغراب : حرب إيه ..

بسمة بضيق : هنلاقي الحية بنت عمتك يكون في علمك لوقربت منك أنا هقتلها ..

علي ضحك : هههه عينيا وقلبي مش شايفين غيرك أنا شايفك إنتي وبس ..

الباب خبط دخلت جميلة 

جميلة : السلام عليكم عامل إيه دلوقتي يابني ..

علي : أنا كويس الحمدلله بسمة كانت لسه هتتصل بيكي وإنتي جيتي ..

جميلة : خير يابنتي في إيه ..

علي قالها على كل حاجة : دلوقتي هتيجي معانا ياماما ..

جميلة : معلش يابني أنا مش هسيب بيتي روحوا إنتوا ..

علي :مش هنسيبك لوحدك ..

بسمة : كلام علي صحيح إزاي عايزانا نسيبك لوحدك ..

جميلة : دا قراري ..

  

مراد : يلابينا يابني أنا كلمتك والدتك إننا هنروح على القصر ..

 

علي : بابا أعرفك بماما جميلة والدة بسمة ..

مراد : إحنا إتعرفنا برا ست جميلة تقدري تيجي في أي وقت ..

 

جميلة بإبتسامة : تسلم يارب مع السلامه يابنتي خلي بالك على نفسك وعلى جوزك ..

 ودعتهم وروحت وهما خرجوا من المستشفى ركبوا العربيات واتحركوا كانت بسمة تبتسم قدامهم وجواها بتتألم خايفه إنها تفقد علي هي حبته حد الجنون بقى هو روحها 

حطت رأسها على كتفه علي بصلها شافها نامت كان خايف إنه يموت ويسيبها