رواية حب بعد الزواج الفصل التاسع عشر19بقلم زينب أمير

رواية حب بعد الزواج

 الفصل التاسع عشر19

بقلم زينب أمير 

*جانب منذر*

الليله مر اسبوعين من قالت ماشه بيت أهلها، للأن بتذكر، الصباح وانا طالع ع الشغل، وقفتني وقالت لي منذر م تنسي بعدين انا ماشه، ح اطلع بعد الفطور، رديت ليها ح اجي انا واسوقك بنفسي، انتي جهزي حاجاتك ولمن تنتهي اضربي لي اجيك، قالت لي تمام، الوكت داك كانت الساعه تمنيه، طلعت وبقيت لافي ع الموظفين وتفكيري مشتت، فكره انها تمش وتعدي فتره طويله وم اشوفها دي مازماني شديد خلاص، لمن جات اتناشر لقيت منها مكالمه، ل وهله قلبي وخزني شديد، التلفون في يدي وغالبني ارد ليها، محمد جا ماري ب جنبي، خت يدو في كتفي وقال لي، تلفونك ده بضرب، شوف ده منو، م سامعو ولا شنو، هزيت ليهو راسي بس، ساعه فتحت الخط ارد هو مشي فات، جاني صوتها وهي بتتكلم مع زول تاني وبتقول، منذر ده من قبيل بضرب ليهو وم رفع، م عارفه مالو، رديت ليها، ايوه كيفك، قالت لي واخيرا، تمام الحمدلله، انت كيفك؟ + ضربت ليك كتير، وم رديت لي، قلت ليها مشغول بس، قالت لي آها، طيب تمام، ح تجي توصلني ولا امشي لي بترحال، دام مشغول م اشغلك اكتر، رديت ليها سرعه، لا جاي مسافه الطريق بس، قفلت منها واتحركت ع البيت، ساعه دخلت كانو قاعدين كلهم، كانت ماسكه تلفونها وبتتكلم بيهو، خاته جنبها شنطه متوسطه الحجم، سلمت عليهم وقعدت، لمن انتهت قبلت علي ، قلت ليها مشينا؟! قالت لي ايوه خلاص م عندي حاجه، خليتها بتودع في ناس امي، شلت شنطتها واتقدمت قدامها، جات هي فتحت باب العربيه وركبت جنبي،، الطريق كلو كانت ساكته وبتعاين بالشباك،، وقفت جنب باب بيتهم وقلت ليها انزلي، فتحت لينا ريم، وبابتسامه جات سلمت علينا، قعدت معاهم شويه وطلعت ع شغلي تاني،،

فتحت باب الشقه ودخلت، لا في ريحه البخور البتعملو، لا سوره البقره ال بسمعها وانا داخل، ولا حتي صوتها البسألني  منذر ده انت؟! حرفيا اليوم كان صعب علي شديد، اخدت وكت طويل وانا بحاول انوم، كفايه جدا اني كنت بنوم معاها في غرفه وحده وسرير واحد، اتنهدت وقلت لسه ي منذر لسه، ده يداب اول يوم ي ترى باقي الايام ح تكون عليك كيف؟؟!

*جانبي*

اسبوعين بحالهم لا شوفتو لا سمعت صوتو، حتى المرتين  الجانا ليهم، م صادفتو ولا مره، يوم جا زي تسعه مسا كده، وقتها كنت نايمه وم عرفت بجيتو الا الصباح ساعه حكت لي امي، قلت ليها كان تصحوني طيب، قالت لي قمت ع حيلي والله وكنت ماشه اصحيك وقفني هو زاتو قال لي م تصحيها لو نايمه، وانو هو زاتو طالع م قاعد، ساعتها زعلت شديد، وقمت دخلت جوه،، ياهو تاني بقيت قاعده في بيتنا، لحدي م يوم رحمه تعبت ومشينا معاها المستشفى، للساعه عشره مسا حتى ولدت وجابت بت،، تاني يوم طوالي رجعنا البيت ومعانا رحمه وبتها، قبل يوم من السمايه جات لمى اختي وأولادها، بقينا في تجهيزات التسميه من أكل وعزومات وغيرو، صحيت الصباح وبقيت مع ناس امي في نعمل ده ونشيل ده، ونخت ده، بعد الفطور ، الناس جات باركت الاسم كان سموها "دان" باقي اليوم مر عادي، بعدها ب يومين كنت شغاله في المطبخ بعمل في قهوه خاته تلفوني في جيب الجلباب ، جاتني منو مكالمه، اتوترت شديد ساعه شفتا اسمو، اشتقت ليهو ولسماع صوتو،،ركزت معاهو  ساعه سمعتو بقول لي الو لجين،رديت ليهو منذر! قال لي كيفك كويسه "بصوت بعيد ومبحوح" قلت ليهو الحمدلله، سكت مسافه والخط كان  فاتح وهو م راضي يتكلم،، قال لي حمدلله على السلامه، قلت ليهو الله يسلمك، لقيت نفسي بقول ليهو، طولت شديد ياخي، ياداب فكرت تتصل؟ وبعدين السمايه كانت من اول امس، شكلي م فرقت معاك زي م انت فرقت معاي، لمن م لقيت منو جواب، ناديتو كم مره، بس م رد لي، سمعت امي بتنادي لي قفلت الخط، صفيت القهوه، شلتها وطلعت...

بالليل ونحنا قاعدين في الحوش ومفرشين السراير، الجو كان رهيب وبارد، باب الشارع دق كو، كو، امي قالت ده منو ده؟ احمد قام ع حيلو، لبس شبشبو، ومشي جهه الباب ،سامعين صوت السلام، عرفتو من صوتو، جا داخل ومعاو منذر، قال السلام عليكم، ردينا ليهو السلام وقعد ليهو في كرسي، قمت عملت شاي لبن في سيرمس ومعاهو صحن البسكويت، الساعه ديك كنت قاعده جنب امي، همست لي، قومي اجهزي وطلعي شنطتك طوالي، بدون م ارد ليها مشيت اعمل القالتو، لقيت رحمه نايمه وجنبها بتها صاحيه بتعاين ب عيونها، قعدت اشاغل فيها، لحدي م امي جات وقالت لي لسه ي لجين؟! الزول ده ماشي بعده، الوكت اتاخر، م بقعد ليك تاني، قلت ليها اهو ماشه، دخلت ملابسي ولبست لي عبايه وطلعت وراها، وقف وقال يلا ي جماعه تصبحو ع خير، طلع معانا ابوي واحمد الشارع، ودعونا ودخلو ونحنا ركبنا مشينا.. في الشارع بسأل فيني عن احوالي واخباري، كنت برد ليهو ومبسوطه شديد، وفي نفس الوكت متوتره جدا، اسبوعين بعيده منو،، قبل م ننزل جاهو اتصال سامعاهو بقول مسافه الطريق بس، أتلفت علي وقال  انتي انزلي انا شويه وبجي قلت ليهو ح تتأخر يعني؟ قال لي لا ساعه بالكتير هزيت ليهو راسي ونزلت، بعد دخلت البيت جوه حتي هو اتحرك مشى،، لقيت مها وسهى ، فاتحين الشاشه وبحضرو ليهم في فيلم، قلت ليهم مسا مسا كيفكم، مشيت سلمت عليهم، مها قالت لي والله مشتاقين عديلل قلت ليهو تشتاق ليك العافيه، حتى انا والله، اشتقت ل ونسه الصباح معاكم وشراب الشاي، سهى قالت لي النفسيات عاليه شكلها، اتخليت ح اشوفك تعبانه ومنتهيه، ساعه شفناك يوم السمايه م كنتي كده، حنه وحركات، والوش ناير، ضحكت وقلت ليها دي امي والله، اديها العافيه بس، امس بعد العشا، ختتها لي وقعدت، قالت لي لالا تمام، قلت ليهم دايره اطلع فوق، الليله ح القى الشقه حاله تانيه، مها قالت، سوزي دي كل يومين بتنضفها امشي نومي ساي وارتاحي ، قلت ليها كان كده خلاص، قالت لي بالمناسبه انتي جيتي براك ولا كيف؟ رديت ليها لالا جابني منذر وطلع عندو حاجه مستعجله، قالت لي آها، طيب امشي اطلعي فوق وارتاحي، فعلا مشيت ومن فتحت البيت جاتني ريحه بخور سمحه، ختيت الشنطه، وشلت لي بجامه، اخدت لي شور ولبستها، مسكت العطر بخ، بخ وجيت رقدتا في السرير، عاينت للساعه، قلت بعده أمكن يجي، قمت ع المطبخ، طلعت لي كم ليمونه وعملت بيها عصيرر، جيت قعدت قدام الشاشه ، سمعت صوت المفتاح، قلت منذر! جا داخل وقف قدامي بقيت أعاين ليهو "باستغراب"كان ساكت ومتوتر كده، قلت ليهو منذر في حاجه؟ هز لي براسو لا قلت ليهو طيب مالك؟ مد يدو ومسكني من يدي وخلاني واقفه، قلت ليهو منذر في... قبلي م اكمل ليهو كلامي، لقيتو بقول لي، اشتقت ليك، اطرافي بردت واتوترتا شديد واصل كلامو ووترني زياده : البيت كان كئيب بدونك، م عارف اقول ليك شنو لكن انا، انا... بقى "يتمتم" قلبي كان بضرب شديد وانا بسمع فيهو، مسكت يدو الكانت بتركف وقلت ليهو انت شنو ي منذر، عايز تقول شنو؟! شال يدو مني وختاها في ، قلبو كان قريب شديدد، مسك يدي التانيه وأشر بيها عليهو وتاني ختاها في صدرو ع جهه قلبو، الكان بضرب سريع، وضغط ع يدي، واشر بيها علي،، كنت بس بعاين ليهو وحسيت اني شويه وح ابكي ليهو، كرر الحركه تاني فكرني م فهمتو،، لقيت اني بقرب منو اكترر، لفيت يديني حولين خصرو، وختيت راسي في كتفو، لقيتو بحضني عليهو زياده، وبهمس بإسمي، لجين! رديت ليهو وانا مغمضه عيوني، امممم، زحيت منو شويه، عاينت ليهو في عيونو وقلت ليهو ممكن اقول ليك حاجه، هزا لي براسو "ايوه" قلت ليهو منذر، الود الحلو الجذاب لمن قلت ليهو كده ابتسم، قمت ابتسمت معاهو، وتميت كلامي، صدقني كلمه حب دي بسيطه جدا عليك انا م بحبك وبس، لا انا بالحيل بريييدك، لا من الليله ولا امس، لا من زمان و... اتوترتا لمن لقيتو بوزع في قبل رقيقه في وشي، غلبني الكلام وسكتا، "بصوت لاهث وبعيد" ناديتو منذر! م رد لي غمضت عيوني شديد، ساعه شفايفو لامست شفايفي..

 *#خاطره:* 

*‏‎تعالي هذا المساء أعيدي بعثرة نبضي و أشعلي جنوني فقد إشتقت إليك كثيرا💛*

 *#خاطره :* 

*لقد غزوت قلبي ب جيوش حبك فما كان مني إلا الخضوع والاستسلام💛

         الفصل العشرون من هنا

لقراءة باقي الفصول اصغط هنا