رواية زينب
الفصل الرابع 4
بقلم لولو محمد
يحيي / جبت لك الشاورما ... خير كنتى فين ؟
زينب / روحت أزور لبنى صاحبتى ما شوفتهاش من ساعه ما جيت الشقه هنا
يحيي / طب ما قولتليش ليه كنت وديتك و جيبتك او على الاقل جبتك بدل ما انتى جايه لوحدك دلوقت
زينب / انت عندك شغل و بعدين انا ما اتاخرتش الساعه ما جاتش عشره
يحيي / طب بعد اذنك بعد كدا لو هتخرجى ابقي بلغيني و انا هروحك
زينب / ليه ؟
يحيي / افرضي حد ضايقك افرضي اى حاجه حصلت ما اعتقدش انك هتخسرى اى حاجه لو بلغتيني اكيد مش قصدى اتطفل يعني بس دا لمصلحتك و الله
زينب / تمام ... انا مش بخرج كل يوم يعني
يحيي يناولها الكيس و يفضل واقف
زينب / قولت تمام ايه تانى
يحيي / مستنيكى تدخلى
زينب تبص له باستغراب و تفتح الباب و تدخل تقفل الباب تسمع صوت الباب بيتقفل
زينب / غريب اوى
.......................
فى قاعه فى الكليه
يس / احنا قدامنا النهرده و بكره عشان نلخص الشغل دا كله الدكتور مش طايقنا خلقه و مستحلف لينا
احمد / صدقنى انا سالت كل الدفعات اللى قبلنا قالوا اهم حاجه عنده تظبطله اكله حلوه يوم المناقشه و هو هيتلهى فيها و مش هيسال هلى حاجه
يحيي / و هو الاكل بيبقي وقت المناقشه دا بيبقي بعدها يعني نلم نفسنا و نعمل زى ما يس بيقول
محمود / انا عن نفسي جاهز و مخلص
يس / يا سيدى انت بريفكس ما حدش كلمك
احمد / يا عم بيكلمونى انا عرفنا
يحيي / احنا مش بنكلمك عشان نستعجلك و لما يس اتكلم قال قدامنا يعني كلنا هنقعد و نخلص الجزء ده
محمود / و انا مالى يا عم انا خلصت الجزء بتاعى
يحيي / هو مين اللى جابه ده يا ابنى انت مش خلصت الجزء بتاعك و سلمته ما تقوم تروح
محمود / مستنى احمد يوصلني
يس / يا مرارتى و الله انا عارف من الاول انها هترسي على كدا قولتلك صح
احمد / بقولك ايه النهرده كل حاجه هتبقي خلصان اهدى ما توترناش
يحيي توصله مسج
يس / يا عم ما احنا قاعدين معاك عشان نساعدك
يحيي يقرأ المسج و يبتسم
محمود / ايه ؟! الضحكه دى انا عارفها .. يايا ... عمهم
يحيي / ايه يا عم فى ايه مالك
محمود / خير .. بطمن بس
يحيي / لا اطمن ... احمد اخر كلام عاوزنا نساعدك فى الجزء بتاعك و لا هنقضيها رغى كلنا خلصنا ما عدا انت
احمد / بكره الصبح اسلمكوا الملف جاهز
يحيي / تمام اتفقنا على بركه الله استأذن انا بقي عشان ورايا شغل
يس / يحيي انت يا ابنى استنى انا جاى معاك
يحيي يمشي و يس يجرى وراه
محمود / اقطع دراعى ان ما كانش جريانه ده بسبب الرساله اياها
احمد / ما تسرحش بخيالك تلاقيه جاتله توصيله بمبلغ محترم قام يجرى عليها انت اول مره تعرفه ما بيعملش حاجه غير انه يشتغل و يذاكر و يحوش فلوس غير كدا بلح
محمود / لا المرادى مختلفه اشترى منى انا خبره
احمد يضحك و يلم حاجته و يقوم
.................
قدام الدرس
يحيي يركن العربيه زينب تركب و فى ايدها ورقه امتحان و ميه جنيه يحيي يمد ايده و يناولها كيس فيه ساندوتش
زينب / انا فرحانه جدا الامتحان المرادى كان صعب جدا و انا حرفيا الوحيده اللى قفلته كله و مش عاوزه اقولك الكلام الحلو اللى اتقالى جوه
يحيي / المهم اخر السنه لازم الفتره الجايه نجيب اخر ما عندنا ما عادش في وقت
زينب / ما تقلقش انا جاهزه و باذن الله هرفع راسك و اعرفك ان تعبك معايا طول الفتره دى ما راحش هدر
يحيي / ما بتاكليش ليه دا انا وقفت طابور قد كدا عشان اجيبه
زينب / عشان فى محشي فى البيت هنروح نص ساعه على ما تاخد دوش كدا و تغير يكون استوى تأكله سخن من ايديا انما ايه حكايه
يحيي / و الله انتى ما هتهدى الا اما تلبسيني الاربعه اكس لارج
زينب / الراجل اللى ما لوش كرش ما يسواش قرش
يحيي / على ضمانتك
زينب / اضرب ما يهمكش ايه من ماله و لا يهناله و لا ايه
يحيي / لا ما دام كدا بقي بقول نخلى المحشي ده لبكره ما دام كدا كدا مش مستوى و نطلع دلوقت انا و انتى نتفسح و نحتفل بآخر خروجه قبل الامتحانات الفاينال
زينب / ماشي كلامك
زينب تفتح الساندوتش و تقطم و يحيي مبتسم
.....................
فى شقه سعيد
سعيد قاعد مع اخوه سامح
سامح / يعني ما روحتش تزورها و لا مره
سعيد / ما انت عارف انا مشغول قد ايه يا سامح هو انا اللى هقولك
سامح / طب كلمتها فى التليفون طيب
سعيد / يووووه بقي انت عاوز تقول ايه انى اب فاشل انا اب فاشل يا سيدي اعملك ايه يعني هو فى حد بيحس بحد فى الزمن ده ما جاتش عليك يعني
سامح / طب اديني رقمها و عنوانها اروح ابص عليها
سعيد / عنيا حالا ابعتهملك على الواتس
سامح / و الله ما عارف هروح لها اقولها ايه و لا اقابلها بانهى وش دا انا لا اعرف شكلها و لا هى تعرف شكلى
سعيد / عشان تصدقني لما اقولك الدنيا تلاهى
سامح / طب انا عمها انما انت ابوها
سعيد / و انا على يدك لا اتاخرت و لا اثرت و لعلمك انا مطمن عليها جدا انا عارف بنتى و ربايتها و عارف انها أسد
سامح / ربنا يبعد عنها ولاد الحرام
......................
فى الملاهي
يحيي و زينب بيتمشوا و بياكلوا ايسكريم
يحيي / بالراحه عشان زورك
زينب / حاضر يا ماما
يحيي يبصلها بتضحك يبتسم
زينب / كان فى موضوع كدا حصل من كام يوم و انا ما اتكلمتش مع حد فيه و قولت راح لحاله يعني بس ... اتفاجئت النهرده انه ... بص هو انا الموضوع مش فى دماغى يعني بس ... مش عارفه انا كنت فاكره انى صغيره و كدا ... بس ... بصراحه مش عارفه المفروض اصلا اتكلم معاك و لا لا فى حاجه زى دى
يحيي / هو الموضوع محرج اوى كدا ؟!
زينب / لا مش محرج و لا حاجه بالعكس دا موضوع كويس ... بس انا ... بص انا هحكيلك كل حاجه من الاول عشان انا بصراحه ما ليش غيرك و مش عاوزه اورط عمتى فى اى حوار الا اما انت يكون عندك علم الاول انا عارفه ظروفها و ظروف جوزها و ابويا انت عارف
يحيي / خشي فى الموضوع يا زينب
زينب / انا فى واحد عاوز يتقدملى
يحيي / نعم !!
زينب / مستر وليد ... الاسيستانت بتاع مستر وفائى ... كلمنى المره اللى فاتت و انا طنشته و بصتله من فوق لتحت و سبته و مشيت بس رجع كلمنى تانى النهرده و عاوز ييجيب اهله و قابل اهلى و طلب رقم بابا لان رقم ماما اللى مكتوب فى ملفى مقفول طول الوقت و مش عارفه اعمل ايه
يحيي / انتى رايك ايه ؟! انتى مش شايفه انك صغيره حبتين تلاته ... انتى على فكره لسه قدامك على الاقل اربع سنين كليه دا لو لا فدر الله ما جبتيش مجموع و دا بالنسبه لواحده فى شطارتك مستبعد دا انتى ما شاء الله لسه عزمانى اهو على ايسكريم من الميه جنيه بتاعتك
زينب / يعني اقوله لا ؟!
يحيي / انتى عاوزه تقولى له يجي ؟
زينب / ما اعرفش يا يحيي الموضوع مش بالبساطه دى مش مجرد اه أو لا يحيي انت ليه مش قادر تفهمني ... انا ... يحيي انا حتى لو قولتله يجي يقابل اهلى هيقابل مين ؟ طب هيتفقوا علي ايه ؟ طب هو لو عرف بوضعى ده هيقول ايه ؟
يحيي / وضع ايه مش فاهم
زينب / لا انت فاهم يا يحيي ... انا واحده ابوها رميها لابن جوز امها يصرف عليها و يراعيها دا انا الأيتام احسن منى على الاقل ... استغفر الله العظيم ... الحمد لله انا احسن من غيرى بكتير الف حمد و شكر ليك يا رب و الله ما قصدى اتبتر و لا اى حاجه بس انا ... يحيي انا خايفه اوى
يحيي / من ايه ؟ يا بنتى انتى لسه صغيره جدا اصلا
زينب / ما هو كمان صغير يا يحيي دا تقريبا قدك دا لسه متخرج السنه اللى فاتت
يحيي / طب انتى مرتحاله يعني ؟
زينب / ما اعرفش
يحيي / يعني لو على مين يقابله و يقعد معاه فالحمد لله احنا كتير انا و عمتى و جوزها و خالتك و جوزها و ابوكى اكيد هتقوله برده
زينب / ايوه بس
يحيي / جهازك من الألف للياء ابويا الله يرحمه متكفل بيه مش هنطلب من حد حاجه كل المطلوب انهم يقعدوا بس منظر كدا قدام الناس
زينب / و بعد ما الناس تمشي يا يحيي ايه اللى هيحصل
يحيي / مش فاهم
زينب / اكيد هيعرف ان ما ليش حد
يحيي / ليكي ... انا موجود مهما حصل انا هبقي على طول موجود
زينب / بانهى صفه
يحيي / باى صفه وقت ما هتحتاجيني هبقي موجود ... فكرى و شوفى انتى عاوزه تعملى ايه و اى كان قرارك انا معاكى اتكلمى مع خالتك و عمتى و شوفى هيقولوا ايه اكيد هيبقي ليهم راى كستات يعني بس انا شايف ان دى فتره امتحانات و مفيش وقت لاى كلام من ده دلوقت لما ربنا يكرم و الامتحانات تخلص و النتيجه تبان يبقي يتفضل
زينب / انا كمان شايفه كدا
يحيي / كويس يبقي مفيش مشكله اهو
زينب / انت زعلان منى ؟
يحيي / و ازعل ليه ؟ مفيش حاجه تزعلني ابدا !!
زينب / مش عارفه حسيتك اتقفلت و بطلت تضحك
يحيي / لا دا انا بفكر بس هنركب انهى لعبه بعد كدا انا اصلي بقالى سنين كتير اوى ما جيتش هنا و ما شاء الله غيروا كل اللعب فكانى اول مره اجى و كدا يعني
زينب/ تحب نروح
يحيي / يا ريت لو مش هيضايقك
زينب / ابدا انا كمان صاحيه من بدرى و مش قادره اصلا
يحيي / تمام يلا بينا
يحيي و زينب يمشوا و الاتنين كل شويه يبصوا لبعض و يفتعلوا الابتسامه
........................
فى شقه زينب
رانيا / لا طبعا ليه لا هو يعني الفرح بكره ما فى لسه فتره خطوبه شوفى بقي كام سنه و اللى يتبقي تكمله فى بيت جوزها
ايمان / هى فى كليه نظرى و لا انتساب دى باذن الله هتدخل طب او صيدله يعني كليه عمليه هتزاكر و لا تحمل و لا ترضع و لا هتعمل ايه بالظبط
رانيا / و هى يعني داخله تجيب عيال من اول يوم كدا
ايمان / ما لكيش حق يا رانيا و هى بتتجوز ليه لو مش هتجيب عيال
رانيا / يا ستى دا شاب فى اول حياته يعني
ايمان / يعني مش جاهز
رانيا / و هو مين جاهز دلوقت يحيي جاهز ما هم فى نفس السن و كلها شهر و يتخرج هيعمل ايه هيدور على شغل أو يكمل مع الدكتور بتاعه ده و يحط القرش على القرش لحد ما ربنا يكرمه و يلاقى بنت الحلال اللى تصبر عليه و تبنى معاه بيتهم طوبه طوبه
ايمان / يحيي وضعه مختلف يحيي مهندس اللهم بارك دخله اكيد مش زى دخل مساعد مدرس
رانيا / يا ستي هو احنا وافقنا انا بقول نقعد مع الناس و نشوف ما يمكن كلامه يعجبنا
ايمان / انا مش موافقه البت لسه صغيره و الواد ده كمان صغير و مش جاهز و دخول بيوت الناس مش لعبه يا رانيا ايه البت عشان يتيمه نرميها
رانيا / ما حدش قال هنرميها يا ايمان لو سمحتى ما تقولينيش كلام انا ما قولتوش انا بقول نقعد معاهم ما يمكن ربنا كارمه بقرشين و أهله مرتاحين ما اكيد لو مش جاهز مش هيتجرا و ياخد الخطوه دى
ايمان / انا قولت اللى عندى
رانيا/ كلمى ابوكى يا زينب لازم يبقي ليه رأي فى الموضوع
ايمان / هيوافق طبعا على الاقل مش هيضر يبعت الالف جنيه اللى بيرميهم لها كل شهر للسكن و المصاريف ... و لا يمكن يرفض و يخاف يدبس فى الجهاز حكم انا عرفاه واطى ابن كلب
زينب تبص لخالتها و تتنهد و تسكت
رانيا / احنا مش مستنين منه حاجه بس لازم يجي يقعد مع الناس دى اتفاقات و لازم يبقي على نور
ايمان / هو خلاص يعني الواد ده مش هيجي غيره نجرى نرمى البت لاول واحد و خلاص
رانيا / هو احنا وافقنا احنا بس هنفتح الباب و نستقبل الناس و نتعرف عليهم و يا نقبل يا نرفض و بعدين الواد شارى و صبر عليها لحد ما خلصت امتحانات خالص اهو و عمال يزن مش صابر على النتيجه
ايمان / عشان هتفرق فى قرارها دى هتبقي دكتوره باذن الله
رانيا / يا حبيبتي ما لهاش دعوه ما يمكن يطلع واد ابن حلال و ما يتعوضش هى الدنيا مظاهر و فلوس بس مفيش دين مفيش اخلاق مفيش اهل طيبين دا دول اللى بيعيشوا مع الواحد هو يعني لسه فى حد بيشتغل بشهادته اصلا
ايمان / انا مش مرتاحه
رانيا / هنصلى كلنا استخاره و اللى فيه الخير يقدمه ربنا
ايمان / ايه رايك يا زينب
زينب/ بابا مش هيجي و لا يقعد
ايمان / كبدى يا بنتى انتى عقلك لسه هناك
ايمان و رانيا يبصوا لبعض بحزن
.......................
فى شقه زينب
زينب ممدده فى السرير التليفون يرن تمد ايدها تجيبه و ترد
زينب / السلام عليكم اتاخرت جامد على الله تكون خلصت
يحيي / الحمد لله استلمنا النسخ و كل حاجه تمام
زينب / فرحت عشانك
يحيي / كنت عاوز اتكلم معاكى فى حوار العريس ده
زينب / انا كلمت بابا و قال هيجي يقعد معاه و حددوا معاد يوم الخميس بإذن الله
يحيي / عرفت ما عشان كدا بكلمك
زينب / خير
يحيي / انتى ليه مستعجله اوى كدا يا زينب
زينب / الكل مرحب بالموضوع
يحيي / انا ما ليش دعوه بالكل انتى لسه صغيره
زينب / انا كبيره كفايا ان يتقدملى عرسان و كبيره كفايه برده انى ما ينفعش اعيش هنا كتير
يحيي / مين قال كدا دا بيتك و مفتوح لك فى اى وقت
زينب / مش هنضحك على نفسنا يا يحيي الكل مرحب و شايف ان دى حاجه كويسه حتى خالتوا اللى كانت مقلقه فى الاول دلوقت متحمسه جدا للموضوع
يحيي / الجواز مش قرار ينفع يتاخد بحماس لازم هدوء و تفكير لازم ترتيبات نسأل عن الناس
زينب / ما عموا محمود و عمو على سالوا
يحيي / انا ما ليش دعوه بحد قولت
زينب / خلاص يا يحيي اسال انت كمان لو عاوز
يحيي / انتى مش مرتاحه هنا ؟
زينب / انا ما ينفعش أوقف حياتك اكتر من كدا انت خلاص بتتخرج اهو و من حقك تبنى مستقبلك زى ما الكل بيعمل انا حمل تقيل محطوط على كتافك انت مش ملزم بيه
يحيي/ انتى امانه لازم اصونها ... و بعدين انتى الكلام ده مين حطه فى دماغك انا عمرى ما اشتكيت ليكي و لا لغيرك بالعكس انا سعيد انك موجوده انتى ما ينفعش تمشي من هنا غير لمكان احسن تتعاملى فيه معامله احسن
زينب / ما انا مش هتجوز بكره فى لسه فتره خطوبه هعرفه اكتر و اكيد يعني مش هتسيبونى غير و انتوا مطمنين عليا
يحيي / زينب بالله عليكي ما تستعجلي و لا تاخدى قرار بسببي انا ما اشتكتلكيش و لا مضايق من وجودك و لا مصاريفك تقيله عليا و لا موقف حياتى عشانك و لا الشقه دى تفرق معايا فى حاجه زينب بالله عليكي ما تسحى لهم يلعبوا فى دماغك خالتك نفسها اللى كانت قلقانه الاول غيرت رأيها عشان جوزها هو اللى متحمس لجوازك
زينب / عشان قعادى هنا كان قرار غلط من الاول بس هو ما كانش قدامه اختيار تانى عشان ابويا يتحمل المسؤليه
يحيي / و ابوكى حول الفلوس ما خدكيش ليه ... زينب انا عاوز اقولك حاجه مش عشان تريحي الكل تتعبى نفسك العمر كله كل الناس اللى مستعجله على جوازك دول هيستفيدوا لما تتجوزى
زينب / ما انت كمان
يحيي / انتى مش تقيله عليا و اللقمه اللى بتاكليها بتاكليني اختها زينب انا مش عاوزك تمشي دلوقت
زينب / ما انا اكيد همشي يا يحيي
يحيي / امشي و انتى واقفه على رجلك معاكى شهاده معاكى شغلانه معاكى قرش ينفعك امشي و انتى مش معتمده على حد
زينب / ما انا هنا معتمده عليك يا يحيي
يحيي / انا ما اقدرش امنعك تقابليه يوم الخميس انا كمان مش هكدب سألت عليه فعلا و هو مش وحش بس مش مناسب ... التوقيت مش مناسب ... بصي المهم انك ما تعمليش اى حاجه تحت اى ضغط ... انتى هنا بيتك العمر كله حتى بعد الجواز حتى لو انا اتجوزت هفضل موجود عشانك فى اى وقت و لو فى اخر الدنيا هجيلك
زينب / ربنا ما يوريني فيك حاجه وحشه ابدا
يحيي / تصبحى على خير
زينب / و انت من اهله
زينب تقفل الموبايل و تبص للسقف و تتنهد ... تبتسم تقوم تتوضي و تلبس الاسدال و تصلى
.......................
يوم الخميس
ايمان / ما كانش المفروض اصدقه و اعتمد عليه كان المفروض اقول لممدوح يفضى نفسه و يجي ... اطلبيه تانى الناس زمانهم على وصول
زينب / مش هيجي
ايمان/ امال مين هيقعد مع الناس... حسبي الله و نعم الوكيل فيك يا سعيد يتردلك فى ولادك يا سعيد ... انا هتصل بممدوح اخليه يسيب اللى فى ايده و يجي ... العيب عليا انى وثقت فيه شوفت منه ايه اصلا عشان اصدقه
جرس الباب يضرب
ايمان / يا مصيبتي ... جم !!
زينب تقوم عشان تفتح ايمان تمنعها
ايمان / استنى رايحه فين ادخلى جوه و انا اللى هستقبلهم و اقعد معاهم
زينب تبص لايمان بحزن و تهز راسها و تدخل ايمان تفتح الباب تلاقي يحيي شايل علبه حلويات
يحيي / السلام عليكم ... اتاخرت و لا ايه ؟! .. جم ... طب تمام الحمد لله
ايمان / شوفت سعيد عمل ايه قفل موبايله و اختفى الحيوان بيهرب من يوم زى ده مش عاوز يقف لبنته حتى فى يوم زى ده دا اب ده
يحيي / اهدى بس عشان زينب انا موجود اهو
زينب تطلع من الاوضه و تبص له
يحيي/ هنقعد و نتكلم و نتفق على كل حاجه احنا كدا كدا كنا قايلين لباباكى انى متكفل بكل حاجه هو يقعد و يتفق بس و انا ملزم انفذ فكدا احسن انا اتفق عشان ابقي انا الملزم انى انفذ
زينب تبتسم بحزن صوت على السلم
ايمان / شكلهم جم استقبلهم و انا هدخل الحاجات دى جوه تعالى يا زينب ساعديني
زينب و ايمان يدخلوا و يحيي يفضل واقف على الباب يستقبل وليد و والدته ( اميره )
يحيي / السلام عليكم ... استاذ وليد مش كدا ؟!
وليد / اكيد حضرتك باشمهندس يحيي
يحيي / ايوه انا اتفضلوا ... فى معادكوا ما شاء الله اتفضلوا اهلا و سهلا اهلا و سهلا
وليد و مامته يدخلوا يقعدوا
يحيي / نورتونا اهلا و سهلا اتفضلوا .. إن شاء الله ما يكونش المشوار تعبكوا و عرفتوا توصلوا بسهوله
وليد / لا خالص بالعكس الوصف كان دقيق جدا و الدنيا كانت متيسره الحمد لله
اميره / امال فين عروستنا الحلوه
وليد / جايه باذن الله ما تقلقيش حضرتك
اميره / اصلك مش متخيل وليد بيحكي و يتحاكى عليها قد ايه ... دا من شهور من يوم ما جت السنتر و هو رايح جاى اخطبيهالى يا ماما عجبانى يا ماما قولت ما بدهاش بقي
يحيي يبتسم ايمان تدخل هى و زينب شايلين صوانى يعزموا
اميره / ما شاء الله ما شاء الله قمر زى ما وصفت يا وليد ... تعالى اقعدى جنبى هنا يا ست البنات
زينب تقعد جنب اميره
ايمان / انا ايمان خاله زينب
اميره / اهلا و سهلا انا دكتوره اميره عبد الله استاذ مساعد و استشارى الامراض الجلديه فى جامعه القاهره و مديره مركز يور شايب اللى فى المعادى لو تسمعى عنه
ايمان تبص لزينب و يحيي
ايمان / اهلا و سهلا
اميره / وليد بقي طول الوقت بيحكي و يتحاكى عن شطاره و ذكاء عروستنا
زينب / ميرسي دا من زوق حضرتك
اميره / عاوزه اقولكوا انى كنت ضد ان وليد يشتغل فى السنتر تماما و ياما اتحايلت عليه يجي يمسك السنتر عندى او انى حتى افتحلي اكاديميه تعليميه يقولى لا يا ماما لازم ابدء السلم من أوله و اتعلم الاول و بعدين اقرر افتح مشروعى الخاص اقوله يا حبيبي اللى بيبدأ كبير بيفضل كبير يقولى انا بحب التدريس اتاريه ما كانش يقصد التدريس كان يقصد حاجه تانيه
الكل يبتسم و زينب تبص فى الارض
اميره / طبعا احنا مش محتاجين مقدمات طويله احنا هنبقي اهل و مش هنبدها بكسوف من اولها و لا ايه يا عروستنا
ايمان / و هى زينب بترفع عينها من الارض
وليد / بصراحه كدا انا من اول مره شوفت زينب و انا لفتت انتباهي اوى و تابعتها طول الفتره اللى فاتت و شوفت أخلاقها و تعاملاتها مع زمايلها و زميلاتها و قد ايه هى انسانه جميله و متعاونه و مثابره و لا عمرها ضحكت مع حد و لا خدت و ادت مع حد جد و يعتمد عليها عشان كدا ما اترددتش ثانيه انى اجى اطلبها شريكه لحياتي
اميره تضحك
اميره / طول الليل بيتمرن على الجمله دى لدرجه انه مستعجل يقولها يا ابنى مش دلوقت اصبر لما الحج يجي ... الا هو فين الله يعينه البلد كلها زحمه دا احنا عشان نوصل فى معادنا نازلين من بدرى اوى
زينب تبص ليحيي و ايمان بحرج
يحيي / هو الحقيقه حصل له ظرف و مش عارفين هيقدر يجي فى المعاد و لا لا بس على العموم انا موجود و تقدروا تتفقوا معايا على كل التفاصيل و تسالونى عن اى حاجه عاوزين تعرفوها
اميره / ايه الكلام ده !!! و دا ينفع
ايمان / يحيي فى مقام اخو زينب الكبير و انتوا اكيد سألتوا يعني و عرفتوا ان زينب والدها و والدتها الله يرحمها منفصلين و زينب عايشه هنا لوحدها فى شقه دعاء اختى الله يرحمها
وليد / ايوه عرفت
زينب / لا ... دى مش شقه ماما دى شقه بابا محمود الله يرحمه و من بعده يحيي ربنا يديله الصحه و طوله العمر سمح لى اعيش فيها و هو المتكفل بمصاريفي من ساعه موت ماما
اميره تبص لوليد
اميره / ما تاخذونيش انا توهت منكوا ... هو انتوا مش اخوات ؟
ايمان / يحيي يبقي ابن جوز مامه زينب بس فى مقام اخوها الكبير بالظبط
اميره / لا دا كلام جديد خالص يا وليد ... انت كان عندك علم بالكلام ده
وليد / انا اتكلمت مع باشمهندس يحيي و هو فهمنى الوضع و الصراحه هو شاب ممتاز
اميره / انا ما غلطتش فيه و لا انت هتتجوزه هو انت هتتجوزها هى
يحيي / دا لو وافقنا حضرتك
اميره/ افندم
يحيي / حضرتك لسه جايه تفاتحينا فى الموضوع و لسه زينب هتصلى استخاره و تشوف زينب صغيره جدا و لولا خالتها اقنعتها تدى لابن حضرتك فرصه و تفكر ما كناش هنول شرف زياره حضرتك
اميره / ما هو عشان كدا اول ما قعدت سألت على ابوها لانه اكيد كان هيعرف يتكلم
ايمان/ اعتبرى ابوها متوفى
اميره / لا احنا هنعتبر اننا ما جيناش خالص قوم يا وليد
وليد / ماما لو سمحتى
اميره / انا فى العربيه تحت عن اذنكوا
اميره تمشي و وليد وراها و صوتها عالى على السلم
اميره / انت اتجننت انت جايبلى واحده من الشرع لا اب و لا ام و فى واحد غريب بيصرف عليها ... انت نسيت نفسك و لا ايه
ايمان تقوم تقفل الباب و تبص على زينب باصه فى الارض و ساكته
يحيي/ يا باااااى دا ايه الوليه القرشانه دى شوفتى من ساعه ما دخلت كلت القاعده ازاى دى نزلت لنا بالسي فى كله من اول دقيقه دى ولادها ما ينفعش ينادوها فى البيت اميره دى لازم الدكتوره اميره استشارى مش عارف ايه و استاذه مش عارف ايه و مديره مش عارف ايه لازم الرصه على بعضها حفظتها ازاى دى
ايمان تضحك بحزن
يحيي / و لا شوفتى احرجت الواد ازاى ... قاعد طول الليل بيتمرن عليها !!! طب و الله صعب عليا
ايمان / زوزه!!
يحيي يبص على زينب ساكته
يحيي / احنا ما كناش وافقنا اصلا انا من الاول قولت الناس دول سربعتهم مش طبيعيه
زينب تعيط ايمان تجرى تاخدها فى حضنها
ايمان / بكره ربنا يبعتلك نصيبك اللى يخليكي تفتكرى الهبل اللى حصل ده و تضحكى
يحيي / و الله و من غير ما يبعت انا اساسا هموت من الضحك ... لحظه هم جم بايدهم فاضيه !!!
ايمان / تصدق ... دا ربنا نجدك يا بت دا طلع بخيل يعنى أبن امه و ايحه دا انتى امك دعيالك و الله
زينب تقوم تجرى على الاوضه و هى منهاره من العياط
ايمان/ للدرجادى ؟!
يحيي / استاذنك تخليكي معاها تطمني عليها
ايمان / اكيد
ايمان تقوم تدخل ليها الاوضه
ايمان / ليه كل ده على ايه يعني امال لو كان حلو شويه
زينب / انا زعلانه منه اوى ... بابا ... ازاى يسيبني فى يوم زى ده
ايمان / اذا كان سابك يوم ولادتك هيجي دلوقت يعمل ايه ؟!
زينب تعيط ايمان تروح تحضنها
ايمان / ما كانش مناسب احنا اللى استعجلنا... انا ما بقللش من المدرسين بس انتى بكره هتبقي دكتوره قد الدنيا هتبقي اشطر من أمه الهبله دى مش هيمشي معاكى هيحس بالنقص جنبك و هيطلع عقده عليكي دا ان سابك تنجحي اصلا
زينب / انا بعيط عليا انا ما الموقف ده هيتكرر مع كل اللى هيجي بعده انا ما ليش اهل
ايمان / يا بت اتلمى بقي و انا روحت فين
زينب/ ربنا ما يوريني فيكي حاجه وحشه
ايمان تحضن زينب و تبوس راسها
....................
فى حفل التخرج
يحيي واقف فى الكالوس مع يس لابسين ارواب التخرج و الكابات
يس / اقسم بالله عريس ياله عريس ... عريس ايه قول ملك نشيل بقي ام الكاب ده و نديها تاج عظمه و تبقي عظمه
يحيي / و الله انت رايق
يس / ايه متوتر و لا ايه ... دا انت هريتنا بروفات
يحيي / فكك فكك
يس / سيبك بقي من كل ده و قولى هتعزمنى فين بعد الحفله ما تخلص
يحيي / هطلبلك عربيه تروحك انت عارف ان عمتى بره و اكيد هوصلها ما تستهبلش
يس / عمتك معاها جوزها و جوزها عنده عربيه و اكيد جايين بيها ما تصيعش على اخوك و هاتها من الاخر و قول زينب
يحيي / و خالتها ... هاخدهم و نروح لعمتي عزمانا على الغدى و زمان بنات عمتى واقفين بيطبخوه دلوقت فاهدى على نفسك كدا
يس / انا هادى يا عم بنكشك بس انا مش فاهم انت واخد الموضوع على أعصابك ليه
يحيي / يا ابنى انت حد مسلطك عليا تنفطنى
احمد يدخل
احمد / انت فين يا عم قالبين عليك الدنيا هنا يلا عشان تقول كلمه حفل التخرج العميد قرب يخلص كلمته
يحيي يجرى يقف جنب دكتوره
دكتوره/ دا كلام يا يحيي
يحيي / اسف و الله انا جيت اهو
اسم يحيي يتنادى
يحيي يدخل يقف و ياخد نفس زينب تقف و تصور يشوفها يبتسم
يحيي / لما اختاروني اقول كلمه التخرج للدفعه اتحمست جدا و شكرت كل اساتذتى و زملائى على ثقتهم فيا بس لما روحت البيت اتوترت جدا و فوقت على المسؤليه اللى انا شايلها هقول ايه هتوتر و لا لا هتلعثم هغلط هضحك الناس عليا و لا هيملوا و يناموا منى ساعتها افتكرت كلمه دكتورى العزيز حمدى منصور فى واحده من التدريبات الصيفيه اللى سعدت و تشرفت انى نزلتها معاه و اتعلمت منه كتير دكتور حمدى قالى ان كليه الهندسه مش بتدينا حبر على ورق كليه الهندسه بتبنى شخصيه و الحقيقه ان ده ادق وصف للمكان ده خمس سنين من عمرنا دخلنا عيال و طلعنا رجاله و هنا انا مش بقلل من زميلاتنا المهندسات لان اقل واحده فيهم كانت و مازالت بمليون راجل ... احنا فى المكان ده اتعلمنا نواجه و نسيطر و نحل اى مشكله هتقابلنا بكل هدوء و باسلوب علمى ممنهج اتعلمنا نكون قاده نقف فى الموقع أو المصنع او حتى فى الشركه بكل ثبات و ثقه ... يعني باختصار احنا مجتمعين هنا النهرده عشان احنا جاهزين جاهزين لبكره و المستقبل جاهزين لسوق العمل جاهزين لمرحله جديده من حياتنا بكل التحديات اللى فيها و فى الختام احب اشكر اى حد ساهم و لو بحرف فى اننا نوصل للحظه دى عشان اللحظه دى بعمرنا اللى فات كله ... و شكرا
الكل يسقف و يحيي ينزل
يس / ما انت طلعت جامد اهو امال كنت متوتر ليه
يحيي / كنت كويس و الله
يس / كينج عليا الطلاق كينج
زينب تدخل
زينب / كنت هايل حقيقي انا فخوره بيك اوى
يحيي / شوفتك بتصورينى
زينب / صورت كل حاجه بجد كنت هادى و ثابت و واثق من نفسك بجد كنت احسن من البروفات بكتير
يس / انا يس صاحبه معاه هنا فى الكليه و مساعده فى كتابه الكلمه دى
زينب / اهلا و سهلا ... انا هروح اقعد بقي بس ما قدرتش ما اجيش ابارك لك
يس / تقعدى ايه دول هينادوا اسامينا نتكرم و ناخد الشهاده اهو هيفوتك صورى من هنا احسن
زينب / بجد !!! طب تمام اوك
يس / على فكره يحيي ما بيبطلش كلام عنك
يحيي يزغد يس
يس / اقسم بالله خصوصا الاكل بتاعك اصله زى ما انتى عارفه عاذب و وحداني و عايش على اكل الشارع و فين و فين لما بيروح ياكل لقمه طريه عند عمته انتى بقي جيتي غيرتى حياته حرفيا
يحيي / ما خلصنا يا خالتى اللتاته انت هتشحت عليا
يس / يا عم بقولها ما انا كنت معاك و احنا بنشترى القميص فى اكس زادت فى النمره
يحيي / عشان تعرفى انا مستحمل ايه
زينب تبتسم
يحيي / بينادوا على الاسامى اتبط بقي
.................
فى شقه رانيا
الكل قاعدين ياكلوا و هم بيضحكوا
رانيا / دا يس دا مسخره انا مش مصدقه انك ما شوفتيهوش لحد دلوقت
يحيي / و هى تشوفه بتاع ايه دا لولا النصيب النهرده ما كانوش اتقابلوا اساسا عادى يعني
رانيا / ما اقصدش ... عموما انا عندى ليكوا خبر حلو
زينب / خير شكل وش حضرتك بيقول ان فى فعلا خبر حلو
رانيا / فى عريس كويس اوى شاف صورتك و عاوز يجي يتقدم لك
زينب / ايه !!
رانيا / انا حكيتله الوضع بالكامل و مستوعب و متفهم و طاير بيكي طير
زينب / حضرتك بتورى صورتى لعرسان !!
رانيا / يا حبيبتي ما كلنا اتجوزنا كدا
يحيي / بس زينب مش مستعجله على الجواز دى لسه صغيره
رانيا / اش حال ما كنتش انت بنفسك اللى قعدت مع العريس اللى فات
يحيي / كانت غلطه و راحت لحالها زينب هتركز فى دراستها و مستقبلها و بس
رانيا / يا حبيبي ما هى تكمل بعد الجواز عادى
ايمان / سيبك منهم يا رانيا ركزى معايا انا بيشتغل ايه العريس ده
زينب / انتى بتقولى ايه يا خالتوا
ايمان / يا حبيبتي عمتك رانيا بتحبك لدرجه انها بتفضلك على بناتها اللى فى نفس سنك و جيبالك انتى العريس
رانيا / عيب اوى اسلوب رمى الكلام ده يا ايمان
ايمان / انا ما برميش كلام و عاوزه اعرف تفاصيل العريس اللى انتى طايره بيه اوى كدا
يحيي / ما لوش لزوم اى كان مرفوض مفيش نصيب ... انا شبعت الحمد لله ... لو شبعتي يا زينب قومى اوصلك انتى و خالتوا ايمان يلا
على / كمل اكلك يا يحيي ما لكش دعوه بالحاجات دى انت عارف عمتك
رانيا / يعني ايه عارف عمته يعني
على / يعني ما تقصديش حاجه وحشه يا رانيا انتى مالك النهرده
رانيا / ما ليش ... اصلا العريس جارنا ... بناتى كانوا قدامه لو كانت عجبته واحده منهم كان أتقدم لها مش فاهمه هو انتوا كلكوا شايفيني بقرون اوى كدا
يحيي / ما حدش قال كدا يا عمتى اهدى حصل خير
رانيا / هو انا يعني اللى كنت جبت لزينب العريس الاولاني... و بعدين انا بناتى مش بايرين اهم قدامكوا و العرسان بيخبطوا على بابنا كل يوم احنا اللى قافلين السكه عشان دراستهم
ايمان / طب ما زينب كمان
رانيا / انتوا وافقوا تقابلوا العريس اللى فات يعني السكه مفتوحه
ايمان / كانت غلطه و مش هنكررها
زينب / خلاص يا جماعه دا سوء تفاهم و خلاص المفروض اننا متجمعين عشان نحتفل بيحيي بلاش ننكد عليه
على / كمل اكلك يا يحيي
يحيي / شبعت و الله يا عمى تسلموا ايديكوا يا جماعه الاكل عظمه
على / لا و لسه ما دوقتش الحلو
رانيا / يلا يا بنات ساعدونى نشيل الاكل و نعلق على الشاى
البنات يشيلوا الاكل زينب تيجي تساعد
رانيا / ارتاحى انتى يا زينب انتى ضيفه
على و يحيي يبصوا على رانيا و يبصوا لبعض ايمان تشد زينب تقعدها
.....................
فى عربيه يحيي قدام بيت ايمان
ايمان / تسلم يا يحيي تعبتك
يحيي/ تعبك راحه ايه الكلام ده بس
ايمان / ابقي طمنيني عليكي لما تروحى
زينب تبتسم ايمان تنزل و تقفل الباب وراها و يحيي يسوق
زينب / نكدنا عليك يومك معلش
يحيي / بالعكس اليوم جميل و زى الفل ... و لسه فى أوله
زينب / ازاى ؟!! معقول كنت عارف اننا هنمشي بدري اوى كدا فرتبت مع صحابك و لا كنت ناوى كدا كدا
يحيي / يا ستى و لا مرتب و لا ناوى انا ابن الساعه دى
زينب / ايوه بس هم اكيد رتبوا نفسهم برده و
يحيي / انا بتكلم عليكي انتى على فكره ايه ركزى شويه
زينب / بجد !! قشطه هنروح فين
يحيي / تحبى تروحى فين ؟
زينب / اى حته دا يومك انت
يحيي/ ما هو احنا اكلين و محليين و شاربيين الشاى يعني لا مطعم و لا كافيه نروح فين انتى اخترتي الشخص الغلط اللى تخليه يرتب خروجه
زينب / سينما ؟
يحيي / دى فكره ممتازه يلا بينا
زينب / يلا
.......................
فى شقه ايمان
ايمان و ممدوح بيتخانقوا
ايمان / الغدى على البوتجاز ايه مش هتعرف تغرف و تاكل يعني و لا فى ايه
ممدوح / فى ان الحوار طول و بوخ على الاخر
ايمان / حوار ايه انت عاوز تتخانق و خلاص
ممدوح / اسمعى يا ايمان انا عمرى ما قليت مع اختك الله يرحمها و لا بنتها و لا منعتك منهم و لا منعتك تساعديهم بس لما الكلام ده يجي على حساب بيتي يبقي لازم اتكلم
ايمان / و بيتك ناقصه ايه اكل و طبخت قبل ما انزل و غسلت المواعين و نشرت الغسيل و حطيت اخوه فى الغساله و البيت محروق و زى الفل انا قصرت فى ايه
ممدوح / العيال يا هانم
ايمان / مالهم هم صغيرين محتاجينى ارضعهم ما هم كبار و كل واحد عارف اللى وراه بيعمله و لو سبتهم فى البيت يوم ايه اللى هيجرا ما عندهم اكلهم و شربهم و بيعرفوا يعملوا لنفسهم كل حاجه و ان كان على طلوعهم لجارتنا فوق فعادى ما عيالها بينزلوا يلعبوا معانا هنا كتير ما حدش بيتكلم و الحوار ده من سنين عادى يا هم عندنا يا احنا عندهم يا بياجروا ملعب و بيلعبوا سوا كوره يا خارجين سوا يعني مفيش اى حاجه جدت على حياتنا غير انك بقيت شايل زينب فوق راسك و كل ما تشوفني راجعه من عندها يركبك مليون عفريت
ممدوح / دا انا !!
ايمان / خليني بقي اقولك الجمله الجايه ... زينب دى زى عيالى و عمرى ما استخسرت فيها حاجه و قطعت من بيتي خمسميه جنيه ببعتهم لها كل شهر دا غير الحاجات اللى بتشتريها لها كل أسبوع مع ان مش ناقصها حاجه بس بسكت مش دا نفس الكلام اللى بتقوله كل مره
ممدوح / و ايه كمان
ايمان/ زينب مش زى عيالك لو كانت زى عيالك كنت سبتها هنا وسطينا بدل ما هى عايشه لوحدها بدل ما كل يومين الوليه اللى اسمها رانيا دى تديها كلمتين و لا تجيب ليها اى عريس يمكن تخلص منها و تفضي الشقه ... البت اتمقتت و اللى يوجع القلب انها ما بتفتحش بقها و لا قادره تتكلم لا ام و لا اب
ممدوح / ابوها عايش
ايمان / ميت ... ميت يا ممدوح حتى لو لسه فيه الروح هو ميت لا بيحس و لا فى دم بيجري فى عروقه يبقي ميت ... انا مش مقصره فى بيتك و مش هقدر استحمل الخناقات دى طول الوقت و مش هقدر اسيب بنت اختى بطولها فى الدنيا دى و مش هقدر ارمى حملها كله على الغريب.. كتر خيره بس حتى لو ملاك لازم يشوف ليها اهل لازم يعرف انها مش بطولها ...عشان الشيطان ما يلعبش فى دماغه
ممدوح/ كنت فاكره ملاك نزل من السما و ما فيش منه اتنين و ربنا يقدرنا و نربى عيالنا زيه
ايمان / كلامى ما اتغيرش ... بس الشيطان شاطر و البت حلوه
ممدوح / اللى عاوز يغلط هيغلط و الكام ساعه اللى بتروحيهم مش دول اللى هيمنعوهم من الغلط
ايمان / و ما دام هم مجرد كام ساعه واجع قلبك و قلبي ليه
ممدوح / عشان دا مش دورنا
ايمان / ميت يا ممدوح ميت ... ما تستناش منه حاجه .. ميت ميت
ممدوح يبص الناحيه التانيه و يتنهد ايمان تقرب منه
ايمان / لعل الخير اللى بتعمله مع البت اليتيمه دى يتردلك فى عيالك فى يوم من الايام او يزيح عنهم حاجه وحشه كانت ممكن تحصل ليهم
ممدوح يهز راسه
ايمان / هقوم اسخن لك تاكل
ايمان تقوم و ممدوح ينفخ
....................
على السلم
زينب بتفتح باب الشقه و يحيي بيفتح باب شقته
زينب / ميرسي على فكره اليوم كان ظريف بغض النظر ان الفيلم كان عبيط جدا بس انا كأول مره ادخل سينما فالتجربه كانت حلوه
يحيي/ اول مره !!
زينب / مين بيدخل سينما دلوقت اصلا ... المنصات ما خلاتش
يحيي / هو كواحد بقاله سنين ما دخلش سينما فاحب اقولك انها اتغيرت خالص عن زمان
زينب / كل حاجه اتغيرت عن زمان
يحيي / دى حقيقه و مش للأحسن للاسف بس حقيقي يعني... الصحبه بتحلى مرار الايام
زينب/ مرار الايام !!! لا هو الفيلم كان وحش اه بس مش للدرجادى يعني
يحيي / المره الجايه نبقي مرتبين من قبلها و سائلين عن الفيلم فتكون تجربه احسن بإذن الله
زينب / انت بجد ناوى تكررها واحد غيرك كان قال توبت و حرمت الفيلم كان حقيقي ملل و سخيف جدا
يحيي/ بس كملناه للاخر و دا فى حد ذاته انجاز
زينب تضحك بصوت يحيي يبص على السلم
يحيي / مش حاسس ان واقفه السلم دى لذيذه ادخلى احسن بدل ما حد يتكلم
زينب تحييه تحيه عسكريه و تدخل و تشاورله و تقفل الباب و هى مبسوطه تليفونها يرن يحيي تبتسم و تدخل الاوضه و يتكلموا
زينب / خير !!
يحيي / كنت بفكر بكره لما اخلص شغل انزل اشترى كام طقم جديد كدا و قولت لو فاضيه تيجي معايا
زينب / كنت فكراك بتاخد يس فى المشاوير اللى زي دى
يحيي / لا مش هعرفه مقاساتى بعد كدا بيقعد يعايرني
زينب تضحك
يحيي / هحاول برده اوفر وقت اروح جيم او اى حاجه
زينب / دايت يعني
يحيي / و الله على حسب انتى ناويه على ايه
زينب/ مش عارفه انت تحب تاكل ايه بكره
يحيي / اى حاجه من ايدك حلوه
زينب / خلاص سبنى اشوف كدا اصل فى وصفه جديده شوفتها على الفايس و داخله دماغى اوى
يحيي / هتجربيها فيا !!!
زينب / على الحلوه و المره سوا جرا ايه يا يحيي
يحيي / لا ابدا مفيش على الحلوه و المره طبعا بس ... مراره فيلم واحد كفايا مش ورا بعض يا زينب اديني فاصل
زينب / لا انا متفائله هتطلع حلوه باذن الله
يحيي / امرى لله هثق في قدراتك
زينب / شاكر كلمنى و انت خارج من الشركه اللبس اوك؟
يحيي / اتفقنا
........................
فى شقه رانيا
رانيا قاعده على السرير مضايقه على يدخل ينام
رانيا / انت هتنام
على / عاوزه حاجه
رانيا / انا مضايقه و مش عاجبنى اللى بيحصل
على يتنهد و يتعدل
رانيا / انا مش شريره يا على و انت عارف بس اللى بيحصل ده كله ما يرضيش ربنا و مش هينفع نسكت عليه
على / عاوزه ايه يا رانيا قوليلى اقدر اعمل ايه و انا اعمل
رانيا / ما اعرفش فكر معايا فى حل
على / حل لايه ؟ وضع و اتفرض على الكل و اولهم يحيي و زينب و خصوصا زينب على الاقل زينب فى شقه يحيي بمزاجه و هو اللى عرض
رانيا / عشان احساسه بالذنب مش اكتر
على / بس هو مبسوط و البنت خدماه و هو ما بيشتكيش
رانيا / بتمص دمه يا على
على / بكيفه ... يحيي مش صغير و ما تدخليش فى حياته عشان ما تبوظيهاش و فى الاخر هتبقي انتى الوحشه عشان تبقي عامله حسابك
رانيا / يحيي سايب زينب عايشه فى الشقه عشان لسه ما لقاش بنت الحلال انا بقي هلاقيهاله عشان يعرف قيمه الشقه اللى راميها دى و يتحرك