رواية حب بعد الزواج
الفصل الثالث3
بقلم زينب أمير
معليش حصلت لخبطهه شويه في الأسماء،، لجين،، عمر ابوها واحمد اخوها، مشوها مشوها
تاني يوم الصباح صحيت ع صوت بعيد شويه شويه بديت استوعب ده صوت تلفوني من تحت المخده سحبت يدي براحه واتناولتو،،، بصوت ناعس ومرهق رديت،، امممم،، الطرف التاني شغال لي الو لجين! كيفك؟ وانا شغال ليهو امممم ايوه، سكت شويه وقال بصوت واطي زي البتتكلم مع نفسو "شكلها نايمه ولا شنو؟ " رديت اممم،، ضحك خفيف وقفل الخط..
دخلت المطبخ وأثر النوم لسه فيني كبيت شاي وقعدت أتلفت...سمعت أصوات ضحك مشيت ع مصدر الصوت لقيت رحمه وامي في الصاله بتونسوا والنفسيات شكلها عاليه،، قلت ليهم صباح الخير ردت لي امي صباح التجهيزات والشيله،، رحمه قعدت تضحك،، رديت ليها هو متين هو حار حار كده طوالي؟ رحمه قالت لي يختي انتي نايمه وم عارفه حاجه،، خالتي دي من الصباح اتصلت وقال منذر بجي 10 كده تشتروا حاجات الحبسه والشيله ع زوقك.. ردت ليها امي وقالت ليها كدي شوفي الساعه جنبك كم ي رحمه؟ رحمه تناولت التلفون من التربيزه الجنبها وقالت 8 ونص امي قالت لي م باقي حاجه ساعه ونص بالكتير وتلقيهو واقف ليك جنب الباب،، قامت علي حيلها وقالت اقوم اشوف الفطور بشنو،، نفطر قبل م تمشي م معروف تنتهوا متين.. رحمه وقفت ع حيلها وقال ليها اقوم اساعدك .. قلت ليها ماشه وين ي بتنا اقعدي قبلك انا بساعدها ارتاحي انتي بس.. قالت لي لا والله من الصباح قاعده ساي بقوم اتحرك شويه م كويس،، امي قالت لي كلامها صح خليها تاخد ليها مشيه مشيتين وانتي زاتك اتمشى معاها شوفو ح تشتروا شنو وتجيبوا شنو،، الفطور زاتو م ح ياخد كتير ح اسخنو بس،، قلتا ليها تمام وفاتت..
رحمه قالت لي آها دايره تعملي شنو؟ قلت ليها بخصوص؟ قالت لي بخصوص حاجات كتيره! قلت ليها زي شنو برضو وضحي لي؟ قالت لي كتير قلت ليك،، بضيق وخلاص على أخري منها قلت ليها هو انا ح اشيل منك كلمه كلمه كده خلصينا يشخيهه قعدت تضحك وتهتز كلها،، بصوت ضاحك ومتقطع قالت لي أعصابك أعصابك ي اللخت مالك انفعلتي كده مش ع اساس ح تكوني عروسه وكيوت كمان ؟! قلت ليها في عينك.. ضربتني في يدي وقالت لي بجديه... براحه علشان م يزعل وهو بسمعك بتنبذي في امو.. عاينت ليها بطرف عيني وم هي إلا ثواني واشوفها ليك بتهتز تاني من الضحك.. مسكتني من يديني وقبلتني عليها عاينت ليها
وفكينا الضحكه من جديد...
في محل تياب ومعاي مزن... لينا ساعه واقفين وياداب طلعنا توبين والتالت في يدي بعاين ليهو وافصل في قماشو ولونو،،، لكزتني مزن وانا عيني ع التوب قلت ليها آها قالت لي عايني هناك.. قبلت عليها ومديت ليها راسي نظام وين؟ قالت لي قدامك طوالي على يمينك التوب التالت،، اتفحصتو سمح وقلت ليها ظريف لكن اللون م عجبني شديد قالت لي والله حلو وبعدين اللون رهيب شكلك م بتعرفي الالون بس عاينت ليها وقلت ليها بترولي؟ قالت لي مالو سمح عديلل.. قلت ليها بتفكير أمم تمام ح اشيلو... قالت لي وده هو المطلوب عندي، احساس ح يطلع فيك رهيب ✨
قلت ليها سمح... قالت للراجل الببيع ينزلو لينا..
طبعا الساعه كانت 10 وربع لمن منذر وقف جنب باب بيتنا دخل وكانت معاهو مزن سلموا وطلعنا طوالي ع السوق واياهو تاني الباقي عارفنو ..
لمن جينا نركب العربيه.. مزن ركبت ورا.. ف قمت ركبت قددااام م ظريفهه الاتنين نقعد ورا،،، بعاين في الشباك للناس الواقفه والماشه... منذر مركز في سواقتو وكان هادئ شديييد، الا من صوت مزن الكانت بتتكلم بالتلفون مع راجلها بصوت واطي شويه،، بعد وصلنا السوق ياهو نزلنا جنب محل التياب ده،، دخلنا،، منذر قعد حبه وقال بجينا بعدين بعد نخلص نتصل عليهو يجي يرجعنا...
بعد انتهينا من موضوع التياب ده كنت شايله قريب ال 12 توب.. ع حسب كلام مزن مفترض اشيل اي حاجة اتناشر اتناشر، ساعه جات تدفع، دفعت بنكك اتاريهو منذر أداها رقم الحساب وكاش برضو للضمان ..
. مشينا اشترينا الكريمات والعطور والبخور،، غايتو م خلت حاجه م اشترتها لمن خجلتني... الساعه 5 بعد العصر جانا منذر في مطعم جنب السوق بعد م كلمتو مزن نحنا وين.. سلم علينا وشغال يشيل في الأكياس للعربيه قريبا ال 10 أكياس.. انتظرناهو لمن انتهى وجا قعد معانا.. طلبنا الغدا وقعدنا نتونس،، أو بالأحرى هو م معانا علشان جاتو مكالمه وطلع بره يتكلم...
مع فتحتي لباب العربيه سمعت اذان المغرب بإذن وشايفه ابوي جاي علينا بعربيتو...ديل نزلو برضو... منذر مشى ع اتجاه ابوي... سلم عليهو.. مزن مسكتني من يدي وقال لي ارح نسلم ع ابوك.. فعلا سلمنا وقالو ح يمشوا الصلاة طوالي.. قمت قلت ل مزن ارح جوه.. لقيت امي بتتوضى ورحمه شكلها في بيتها بهناك... نفضت المويه من يدها وجات ع اتجاهنا اتقدمنا ليها سلمت ع مزن وحضنتها،، جيت بستا في رأسها وقلتا ليها قيلتو كيف اليوم؟ قالت الحمدلله كويسين نحمد الله قلت ليها له الحمد.. قالت لينا ادخلو جوه.. وافتحي معاك المكيف ي لجين مسافه اصلي واجيكم... قلتا ليها تمام.... قلت ليها يلا ي بتنا ابتسمت وقالت لي اتوضي وتعالي قلت ليها بعد اوصلك اول علشان م تضيعي ضحكت وقالت لي ارح طيب.. وصلتها وطلعت اتوضيت وصليت طوالي طبعا الأخت معزوره....
مشيت عملت عصير جبت ليها كبايه وجيت.. امي قالت لي بتحميها الغدا كده.. مزن قالت
ليها متشكره ي خالتو والله.. وزاتو منذر ده م اظنو يقعد ونحنا زاتنا شبعانين والله اكلنا وجينا.. ردت ليها امي بتقزقزوا ي بتي وبعدين عمك ده م برضى تمشوا من دون غدا. ع ذكرهم سمعنا صوت الباب فتح وقفل.. بعدها جو داخلين طلعت أمي تسلم ع منذر.. هم مشوا الديوان وهي جات داخله وقالت لي قومي ي لجين معاي المطبخ ابوك ده قال الغدا سريع منذر ده مستعجل عندو شغل قلت ليها سمح ارح.. مزن أصرت تساعدنا وامي مصره انها تقعد ترتاح، شغالين يتحاججوا قلت ليهم ي جماعه الناس ديل قالو مستعجلين وانتي ي اللخت ارح قدامي اعملي الشاي بس واطلعي طوالي.. عاينتا ل امي وقلت ليها كده تمام؟ قالت لي سمح ارحكم قدامي...
بعد الغدا والشاي قاموا طلعو.. طلعنا معاهم ودعناهم وجينا داخلين،،ابوي دخل غرفتو.. قعدت مع امي في الصالون قالت لي انتي ي بتي وين الحاجات الجبتيها؟ قلت ليها قاعدات ثواني بقيت أتلفت.. قلت ليها غريبه وين الأكياس؟ ختيتهم وين ي ربي؟ امي قالت لي م تكوني نسيتيهم في المحل! قلت ليها لالا ي امي كدي ثواني بقيت افتش بجاي وبجاي،، قامت قالت لي انا زاتي م شوفتك جيتي داخله ب حاجه، سكت كده وقلت معناها في العربيه بس.. ومنذر نسى ينزلهم لانو طلع مع ابوي الصلاه طوالي.. قالت لي أمكن برضو.. كان كده خلاص تعالي اقعدي هنا ووريني اشتريتو شنو؟ لمن بكره ان شاء الله يجيبوهم ليك قلت ليها تمام.. اديني دقائق بس بغير وبجيك قالت لي خلاص سمح م تتأخري بس.. قمت ع حيلي وخليتها مسكت الريموت وقعدت تغير في القنوات..