رواية مهاد والنذير
الفصل الثامن عشر18
بقلم منوش
عاين لي القميص لقي زرايرو مقطعه قال لي يعني قميصي دا وضح ليك شنو انا كنته مع بنت قلته ليو عندك تفسير تاني قال لي في تفسير تاني ومنطقي اكتر يمكن كنته في خناقه م معقول قلته ليو لا انت قمته من جنبي نص الليل وجيت الصباح عايزني افهم شنو انا م عايزة كلام في الموضوع دا اصلا انا الغلطانه م كان اتزوجك من الاول فرقك شنو من جميل قال لي تقارنيني بالحقير دا سكته م رديت ليو قال لي ردي قلته ليو كلم صنف واحد انا م عايز كلام لحدي هنا طلقني بس قال لي طيب اتفضلي قال لي دي التلفونات والفلاشات الفيها صورك كلها وكمان رجعته اوراق ملكيه المستشفي لي ابوك وانتي طالق لمي حاجاتك عشان اوصلك اهلك ودخل جوة انا فضلته مصدومه من الحصل م قادره اصدق السمعتو فضلته ساعه في مكاني لحدي م طلعه قال لي م جهزتي حاجاتك قلته ليو م عايزة حاجه الساعه كانت يا داب خمسه قال لي خليني اوصلك قلته ليو مافي داعي قال لي زي م جبتك من بيت ابوك ح اوصلك بيت ابوك مشيت ركبته ورا واتحرك كنته ماشه بيت عثمان قال لي لا دقينا الجرس ودخلنه امي من شافتني حضنتني ابوي كان نازل لمن شافني برضو جا حضني وباسني طبعا متفاجاه قال لينا خير بدري كدا النذير قال ليو انفصلنا لمن سألو من السبب قال الغلط منو غلط في حقي غلط م بيغتفر وانا طلبته الطلاق وهو وافق واستاذن وطلع طبعا انا م قادره افهم احساسي مشيت غرفتي انهرته من البكاء علي غبائي طبعا مرت تلاته يوم لا اكل ولا شراب اوبوي جا شكرني انو قدرته ارجعي المستشفي ليو بدون مساعده من حد وانو فخور فيني خلاص هنا روحي طلعت من البكاء وتاني م صحيت الا وانا في المستشفي وكان النذير قاعد جنبي قال لي حمدالله علي السلامه م علي قلبك شر تاني رجعته ابكي قال لي مافي حاجه تخليك تبكي مالك هسي قلته ليو كان تسيبوني اموت قال لي مافي زول بموت من غير يومو جا داخل ابوي وامي وعثمان وهو طلع بالي معاهو نفسي امسكو من يدو واقول ليو انا اسفه سامحني نفسي اقول ليو م تمشي خليك جنبي نفسي اقول ليو انا بحبك ومحتاجه ليك طلعوني البيت فضلته قريب شهر علي الحال دا تاني قررته ابقي قويه وارجع زي م كنته وم اخلي حاجه تأثر علي رجعته المستشفي اشتغل من جديد شغلته نفسي شديد عشان م افكر في النذير هو كان مافي في لندن مشى يحضر مؤتمر طبي الا م جا واتلاقينه رجعته للصفر لكن م بينتا ليو سلمته ليو عادي هو كمان كان بارد معاي وهيام من اليوم داك تاني م شفتها وزوبه قدر م حاولته اعرف النذير كيف قدر يرجع المستشفي والصور قالت م عندها فكره مافي زول غير النذير يقدر يفهمني بعد يومين من وصلو مشيت دقيت ليو الباب قال لي ادخل لمن دخلته قلته ليو سلام قال لي هلا قلته ليو ممكن نحكي قال لي اسف والله داخل عمليه بعد خمسه دقايق وقت تاني وطلع خلاني في المكتب