رواية ذئاب لا تعرف الحب الاسيره الفصل التاسع9 بقلم نجمه براقه

بدر 

رجعت البيت  وقبل ما  ادخل  اطمن علي ابوي سمعت صوت ليلي جاي من وراي بتقولي  

_ يا كبير 

بصتلها وقولت 

:  إيه 

مسكت صنيه الوكل اللي كانت علي السُفره وقالتلي 

_ استاذ شبل قالي اجهز وكل للبت اللي فوق علشان جنابك تدخله ليها لما ترجع  "

: ايوه  صح 

الحقيقه  هي فكرتني بعد ما كنت ناسي انها لازم تاكل  ،  مكنتش فاكر حاجه زي دي وكملت ساعات بره البيت  من مكان لمكان وحل مشاكل  علشان الناس متفكرش ان اكده راحت علينا وعشان اللي ناويته وبدات فعلاً في تنفيذه يتصدق. 

 

خدت الصنيه  وطلعت  ف لقيتها نايمه علي الارض وحاطه راسه علي يديها فوق السرير     ف اتقدمت نحيتها  من غير ما اعمل صوت وحطيت الصنيه علي السرير علشان تاكل لما تصحي وقبل ما اتحرك قامت مفزوعه من نومها و وقفت بسرعه  وبقت تمسح وشها علشان تفوق وبعدين بتبصلي وتقول بلهفه وهي لسه  مفقتش بشكل كامل

:  ايه؟!  همشي؟! 

مردتش عليها ودورت علشان امشي ف لقيتها سبقاني و واقفه قدامي وبتقولي بترجي

_ ارجوك  ،  ونبي  خليني امشي   ،  علشان خاطر ربنا   و اوعدك هخلي بيجاد يرجعلك اختك لو كانت معاه 

مردتش ف قالت ودموعها بدات تظهر  

:  احلفلك بأيه هخليها يرجعها  ،  من فضلك "  

مردتش عليها ف كملت وهي بتبصلي ونظرات الترجي في عنيها 

:  بيجاد قالي انك شخص كويس ورحيم رغم هيبتك ورغم كل حاجه بتعملها  واكيد ميرضيكش اللي هيحصل لبابا وكلام الناس عننا   ،  ارجوووك  

اتنهدت وقولت بعد ما كلامها رجع اللي حصل معانا زي شريط الفيلم 

_ انتي خايفه علي ابوكي  ،  وانا ابوي قلبه تعب ومعرض للموت في اي دقيقه  ،  خايفه علي سمعتك  وخايفه من كلام الناس  ،  وانا واخواتي  بعد ما كنا كبرات النجع الكل بيعملنا الف حساب  دلوك مبقيناش قادرين نمشي في الشارع من العار اللي لحقنا بسبب اخوكي  

_  يااااا عمده  او ياااكبير  يا اي حاجه  ،  بيجاد اخويا تليفونه مقفول ومحدش يعرف عنه حاجه  ،  والله ما اعرف عنه حاجه  ،  مين قالك انت انه خطفها  حد شافه؟! 

سكت لأني مكنتش عارف اقولها كيه انها هربت ف قالت 

:  بيجاد مستحيل يعمل كده  والله مش ممكن يكون خطفها  ،  اكيد انتو فاهمين غلط  

اترددت كتير قبل ما اقولها 

_ هو مخطفهاش  ،  هي هربت امعاه 

قالت بذهول 

: هربت؟!   لا!!!  والله لا  بيجاد قالي انه لما عرض عليها تهرب عملتله بلوك وقطعت اي كلام معاه  ،   وهو كان مجهز شُنطه وراجع وهيبعد عنها علشان ميأذهاش ولا يأذي نفسه  ،  صدقني هو ده اللي حصل  

_ انا بتكلم في ايه  ،  بوضحلك ليه من اصله  ،  اسمعي!!  انتي مش هتمشي من اهنه غير لما اخوكي يظهر وبعدها انا بنفسي هرجعك من  مطرح ما جبتك

قولت كده وجيت امشي ف مسكت في دراعي و وقفت قدامي  تبكي وتبصلي وعنيها بتترجاني قبل  لسانها وكل اللي يفصل بيني وبينها خطوه واحده  

:  طيب متقفلش وانا مش ههرب  ارجوك  انا بتخنق من الامكان المقفوله  ،  وحيات والدك" 

كانت بتبكي ومشعبطه في يدي بطريقة للأسف رققت قلبي ف قولت بعد ما بعدت يدها 

_ انا كارمك اخر كرم  ، عندنا بنحبس في السجن  ، ايوه السجن ما النجع فيه سجن  بس انا جبتك في اوضتي  وسيبتهالك  ترتاحي فيها  ،  قدامك تلفزيون اهه وحمام  والوكل هيوصلك زيك زي اي واحده قاعدة في بيتها 

،  ف متخلنيش اعاملك معامله تانيه متعجبكش عاد

قولت اكده ومشيت وقبل ما تمسك في الباب قفلت  عليها ونزلت علشان الاقي شبل واقف تحت وبيبصلي  ولما وصلت عنده قالي 

:  وبعدين يا بدر المسكينه اللي فوق دي ذنبها إيه 

_ وانا وانت وعبيده وكل البيت ذنبنا إيه  في اللي اخوها عمله  ،  اسكت يا شبل  مفيش غير الطريقه دي اللي هترجع الواد ومعاه فاطمه  

:  وافرض مرجعش 

_ هيرجع 

كنت متأكد انه هيرجع علشان اللي شوفته منه وسمعته بيقول انه بيحب اخته قوي وهتهمه

#شبل 

مبقتش عارف اصدق انها هربت ولا أفضل ماشي ورا احساسي ان في حاجه وحشه حصلت معاها  ،  كل حاجه بتقول انها هربت مفيش اي مجال لشك في كده بس انقباضة قلبي كل شويه وقلقي بيقولو انها في مشكله لكن مشكله ايه ولا ايه اللي حصل معاها معرفش وكله راح مع رسالتها اللي اختفت معاها أكيد لو كنت لقيتها كان فهمت كل اللي حصل  والسبب اللي خلاها تروحله 

                         ***** 

بعد ما تعبت من التفكير قومت علشان اعمل قهوه لنفسي وهناك لقيت فتحيه وليلي بيطبخو ف قالت فتحيه 

_ تأمرني بحاجه يا شبل 

:  ماشي يا خاله فتحيه قهوه لو سمحتي 

_حاضر يا ولدي  حالا تكون عندك  

قالت كده ودارت عشان تجيب الكنكه وانا عيني راحت ناحية ليلي اللي واقفه تبصلي وشكلها حاسه اني متضايق ف سيبتها ورجعت الصالة وبعد شويه لقيتها جايبه القهوه وجايه 

_ اتفضل  

:  متشكر 

خدتها منها ورجعت اسكت وهي بقت واقفه شويه لغيت ما بصتلها ف قالت 

_ ايه مزعلك 

:  كل حاجه مزعلاني   ،  وخايف اكون واثق ثقه زياده في احساسي وفي فاطمة  وتطلع هربت بجد 

_ انا مقدره اللي انت فيه  بس لو مكنتش هربت  او راحت معاه لأي سبب هتكون راحت فين  

:  معرفش  بس انا قلبي مش مطمن حاسس ان هي فيها حاجه  ،  تعبانه  ،  مخطوفه  

اترددت كتير وانا مصتصعب نطقها وقولت 

_  ماتت  

:  له بعد الشر عليها من الموت متقولش اكده  

_ حتي لو مماتتش مسيرها تموت  

_ شبل امانه متقولش اكده  ،  ادعي انها تكون معاه ومحدش يلاقيها احسن ما تموت  ،  ست ليلي مستاهلش تموت  اكده 

:  مش عارف  ،  ربنا يعمل اللي هو رايده بقا  ،  فوضت امري إليه  

_ ايوه اكده   ،  ربنا كبير وعالم بينا واكيد مش هيرضا بوجع قلوبنا 

:  يارب 

ـــــــــــــــــــــــــــــــــــــ 

#ورد 

عدو يومين وهو لسه علي بالي مش قادره أبطل تفكير فيه وبقول يارب يجي واشوفه تاني ونتكلموا مع بعض زي كل مره قابلته فيها  ،  بس يا خساره مجاش ولا سمعت  اي خبر عنه لغيت  ما دخلت عندي جريدة الاخبار تماضر اختي  وزي عادتها دخلتها بتقول ان في جديد ف قالت 

:  انت اهنه وسايبه اللي بيتقال والبلد اللي مقلوبه

_ ايه اللي بيتقال 

: كتيييير

_ طيب ايه قولي 

: النجع اتقسم نصين نص بيقولو فاطمه اتخطفت  ، ناس بتقول الدكتور هو اللي خطفها زي ما كان هيعمل الغريب زمان لما رفضوه  ، وناس تقول ان اللي خطفها حد عاوز يشوه صورة رضوان وعياله  ،  وناس تانيه  بتقول ان دي كدبه علشان يدارو علي عملتها 

: اتخطفت؟!  ايوه!  صح اكده  "

لما قالت الكلام ده صدقت انها صح اتخطفت والوحيد اللي جه علي بالي شحاده  وكنت هروح اسأله بس عرفت انه حتي لو كان هو هيكدب  ف ناويت اسكت واخد بالي من بعيد  وبعدها خدت القفه وسبت تماضر وطلعت من الخيمه وانا بتمنا اقابل عبيده  عشان اجيبله اللي فهمته ده  في ضربي للودع  يمكن ده يخليهم يفكرو بطريقة  تانيه ويدورو علي اللي حصل بدل ماهما كل تفكيرهم في هروبها وبس وسايبين الناس اللي بتتمنا موتهم علي راحتهم يعملوا اللي عاوزينه  ،  وبعد ما لفيت في النجع علي امل اني القاه ماشي  في  اي شارع وملقتهوش روحت  عند العيادة و وقفت اهناك ابص ناحية السرايا يمكن المحه جاي زي المرات اللي فاتت  وبعد شويه وانا علي نفس الوقفه   لقيت واحده واقفه اهناك وبتناديني ف روحتلها قوام  وقولت 

:  اؤمريني يا ست البنات 

بصت علي  خلقاتي وقالت 

_ انتي غجريه 

:  خدامتك يا ست 

_ اممم  ،  انتي بتيجي اهنه ليه؟!  ، انا شوفتك جايه  قبل اكده  ،  بتيجي علشان مين؟! "

خوفت اقولها سبب جياتي للمكان ده  ف قولت 

:  انا محسوبتك ورد بضرب الودع لناس واسترزق من اهنه ومن اهنه  ف تلاقيني في كل مكان في النجع  ياست 

بصتلي من فوقي لتحتي وقالت 

_ ايوه  .. طيب بتعرفي تضربي الودع صح ولا ده نصب 

:  جربي وشوفي  

_ طيب يلا وريني 

قعدت وفردت الايشرب قدامي ورميت الصدف  وعلي حسب اللي اتعلمته من امي ف كان اللي انا شيفاه قدامي  كله  شوم ومفهوش اي حاجه تفرح غير حاجه واحده بس ف بصتلها وقولتلها 

:  خير يا ست 

_ لقيتي إيه 

:  في شوية مشاكل  ،  بس كمان في حاجه جايه هتفرحك قوي  

ابتسمت وقالت 

_ ايه هي الحاجة دي 

:  حاجه انتي بتسعيلها   ،  فلوس  ،  رجوع غايب  ،  هتخلصي من مشكله مضيقاكي  ،  المهم انها  حاجه انتي بتسعيلها الايام دي وانتي ادرا بيها   

_ متاكده من الكلام ده يابت 

:  متاكده زي ما انا متاكده اني شيفاكي وبكلمك اكده 

قلعت سلسله من رقبتها وادتهاني والفرحه علي وشها 

_ طيب خدي  ،  ولو حصل اللي بتقوليه ده ليكي عندي الحلاوه الكبيره  

خدتها منها وقولت وانا بلم الايشرب واحطه في القوفه 

:  تعيشي ياست الناس  من يد منعدمهاش  ،   وربنا ينولك اللي في بالك  ياااارب 

_ يارب  ..  انتي قولتيلي اسمك ايه؟! 

:  خدامتك ورد  ،  وست الناس اسمها ايه 

_ دعاء  

:  حلو ياست عاشت الاسامي  ،  بالإذن انا  

_ ابقي تعالي تاني هحتاجك 

كانت فرصتي اني اقدر اجي واشوفه ف قولت وابتسامتي علي وشي 

:  تؤمريني ياست الناس  ،  اجيكي من عيني

ـــــــــــــــــــــــــــــــــــــ 

#بدر 

بعد ما وكلت جلال بمهمتين يعملهم  جيت النهارده لقيت اول مهمه اتنفذت وبان اثرها علي الناس حتي لو كان نصهم ممصدقش  بس انا عارف ان اكده هقدر امشي النجع زي الاول وهيكون عندي اللي اسكت بيه الناس لو حد اتكلم تاني.. 

وتاني مهمه مكنتش اعرف اذا قدر ينفذها هو واللي معاه ولا له لغيت ما لقيته جايلي المندرة بعد يومين وبيديني الأمانه ويقولي 

:  اتفضل يا كبير  الأصل مش الصور  ،  الحمدلله لقيناها 

مسكتها بين يدي ابص واتاكد اذا كانت  هي ولا  لا وقولت 

_ عفارم عليك يا جلال..  المهم قولي حد شافكم ولا بان حاجه 

:  لا يا كبير كله زي مانت طلبت ومحدش هيحس ان في حاجه حصلت...  ايوه ومش بس اكده  ده انا جبت لجنابك حاجه تانيه كمان 

طلع من جيبه صورة شخصية وادهاني 

_ وانا بقلب لقيتها اكيد هتحتاجها

:  اااالله ينور عليك  ،   انا عرفت اختار الراجل المناسب للمهمه المناسبه يسلم مخك يا جلال  

_ خدامك يا كبير  

كنت محتاج الحاجات دي لحاجه في راسي  علشان آآمن نفسي واخواتي لو حسيت ان حاجه هتحصل بعد اكده 

ـــــــــــــــــــــــــــــــــــــ 

#فهيم 

فجأه النجع كله بقا يتكلم ان فاطمه اتخطفت ايوه في منهم مش مصدق بس الأكتر مصدقين وبيستدلو بادبها اللي الكل كان شايفه وده كان هينقط شحاده ف بقا يقول بغيظ

: يعني ايه بعد كل اللي عملناه يقولو اتخطفت والناس تصدق!!  ازاي يصدقو كدبه زي دي وازاي بدر لسه ممشي الناس  ازاااي!!!!  

_ براحه يا معلم  

:  هي فين الراحه اعمل ايه تاني علشان الناس تثور عليهم  اعمل ايه!!!  

_ هدي نفسك يا معلم مش كده 

بقا واقف مكانه يشيط من الغيظ  وبعد تفكير قال وهو بيصك علي اسنانه من الغيظ  

:  لو منتهوش بفضيحه  ينتهو بموتهم   

قال كده وطلع تلفون وعمل مكالمه ولما جاله الرد قال 

_ لازم نتقابلو دلوقتي حالا 

بعد ما خلص مكالمته قالي يلا هنروحو  ف اتحججت بأني وراي حاجه ضروريه اعملها ومش هقدر  ف قالي طيب وراح هو وحده وانا  طلعت وراه علشان اكمل اللي بعمله 

ـــــــــــــــــــــــــــــــــــــ 

#ليلي 

كنت طالعه لمشوار وقبل ما اطلع شوفت دعاء  طالعه بلبس الخروج وبتقول لشجر 

:  رايحه للمره اللي بتخيط اشوفها ظبطت  الخلقات ولا له يا مرت عمي 

_ ما تخلي حد تاني  هتروحي علشان خلقتين 

:  ما  علشان لو مكنتش عدلتهم اخليها تفكهم وتعدلهم تاني  اصلها مره  عفشه ومش بتراعي ضميرها 

_ طيب يابتي روحي  "

نزلت النقاب علي وشها وعدت من جمبي وطلعت وانا روحت وراها  وبعد ما عدينا عيادة الدكتور حست بيه و وقفت تقولي 

:  ماشيه وراي ولا ايه 

_ له وانا امشي وراكي ليه 

:  طيب شهلي يا محروسه  ،  مشي قدامي "  

مكنتش هقدر اعرف هي رايحه فين لأني كنت هتأخر علي البيت وكمان هي هتاخد بالها لإنها بعد ما شافتني ملحقاها هتحرص مني  ف سيبتها ومشيت وانا هموت واعرف بتقابل مين وبينهم ايه  ـــــــــــــــــــــــــــــــــــــ 

#حامد 

بعد بحث وإبلاغ كل الوحدات بمواصفات وفاء وطلبنا منهم بإبلاغنا لو في اي خبر عنها  جه علي بالي بيجاد اللي كنت ناسيه تماماً واللي افتكرت بعدين انه شغال في الصعيد وانها قالتلي ان في اتنين صعايده يعرفوه سألوا عنها  وفوراً  من ناس في مديرريه امن المحافظه اللي هو شغال فيه بتتبع اثره وانهم يجبولي كل الاخبار عنه وعن البلد اللي هو فيها  ، و معملتش كده علشان الاقيه انا عملت كده علشان اعرف ليه علاقه بخطف وفاء ولا لا  وفعلا جاتني التقرير بعد يومين بتقول ان في النجع اللي شغال فيه منتشره اشاعه انه خطف او هرب مع بنت الكبير هناك  ،  وفورا طلبت اذن من النيابه علشان نروح نقبض علي الناس دي اللي مكنش عندي شك ان ممكن يكونو هما اللي خطفوها  ،  لا ده انا كنت متأكد  انهم هما  

ـــــــــــــــــــــــــــــــــــــ 

#حنان 

اسمي حنان  عايشه في منطقه جبليه يحيط بيها البحر  و ورا الجبل او التل العالي صحره كبيره  ومش كتير يعرف ان في ناس عايشه في المناطق دي  . أو ان ورا التل ده في  حياه من اساسه.. 

وف يوم كنا قاعدين انا وابوي الكفيف وفارس اخوي وناس من القريه بنرعي البقر  والغنم  ونسمع قصص ابوي اللي القريه كلها بتجمع علشان تسمعها فجأه  كلب ابوي اللي بيرافقه في كل مكان  بقا ينبح بشكل متواصل  ومش عارفين مالوه ف قام فارس يشوف في ايه  وطلع فوق التل يبص بعيد  ف بقا ينادي علينا وروحت انا وشوية بنات وشباب نشوف في ايه وقبل ما نوصله لقيناه بيجري قدامنا ف لحقناه  ومن فوق شوفنا واحد مرمي  في ردم المباني والمكان اللي بنرمي فيه البهايم الميته ف كله جري يشوف في ايه  وكل ما نقرب نسمع صوت تألمه ولما وصل اخويا شاله رقبته علي كتفه ف صرخ من الوجع وكان باين ان في حاجه في ضهره  ، ف شيلناه وخدناه معانا ودخلناه  بيتنا  وبعد دقيقه دخل علينا دكتور من القريه وبدء يكشف عليه   ،  وطول الوقت الشخص ده يصرخ من ألم ضهره ضهره  ف اداله حقنه مسكنه  وقال لازم يروح  المستشفي  ويتعملوه اشاعه  وتوقع ان حد رماه رمي فوق ردم المباني ف وقع علي ضهره وحصله كسر   وفعلا وداه فارس وكام واحد من شباب القريه ولما رجعو قالوا انه في كسر في العمود الفقري ولازم عمليه  ولما سألناه اذا عرف هو مين ومين اللي عملوا فيه كده قال انه طول الطريق رايح جاي منطقش بكلمه  ف بقينا نبص لبعض ونسأل ممكن يكون حصله ايه وليه مش راضي يتكلم  لغيت ما رجع يصرخ من وجع ضهره بعد ما مفعول المسكن راح    ف رجع الدكتور يديله مسكن تاني ولما هدي شويه قعد ابوي جمبه وقاله 

_ عامل اية دلوقتي يا ولدي "

مكنش بيرد وعنيه بتلمع فيها الدموع   ،  كان شكله حزين وفيه حاجه تقيله علي صدره واتقل من انها تتحكي  كمان ، ودام سكوته  مع استمرار اعطائه المسكنات اللي مش بتدوم اكتر من ساعه ويرجع يصرخ تاني ..

 وبعد كام  واحنا مش عارفين نعمل ايه معاه  جمع فارس اخويا شباب القريه  وطلب منهم يتشاركو بجمع تمن العمليه  . 

في  منهم اللي وافق ودفع فوراً  ومنهم اللي قال واحنا لقين ناكول ومشو،  لكن باللي دفعو وعلي رأسهم الدكتور اللي مكرس حياته لخدمة الناس قدر فارس واللي معاه  يجمعوا المبلغ كله واتحدد يوم للعمليه وفي وقت كنا قاعدين انا  وابوي وفارس بنعمل الشاي علي الحطب قال فارس عن الشخص ده  بعد ما حصل شويه تغير في حياتنا وزاد خيرنا شويه  وبقرتنا ولدت جابت جوز والفراخ بتوعي بشرو بالبيض بعد ما استنيتهم شهور يبشرو هههههه 

: والله قدومه خير علينا  ولا ايه قولك ياحج 

دخلت في كلامهم وقولت 

_ وانا حاسه بكده   ، من اول ما الفراخ باضو وانا متفائله بيه هههههه  واهي البقره كمان جابت تؤام  ده لو قعد شهر كمان  مش هنلاحقو علي الرزق 

:  ومالك فرحانه كده ما تتلمي 

_ يوه يا فارس انا بتكلم معاك متبقاش رزل 

:  لا متتكلميش في كلام بارد 

مطيت بوزي وسكت ف قال ابوي 

_ براحه علي اختك يا فارس  

:  يا حج مش سامع كلامها 

قولت 

_ وانا قولت ايه يعني ولا انت عايز تزعق وخلاص 

رفع يده ف وطيت راسي وسكت  ف قال ابوي 

:  اسكتو  ،  وقولولي  ،  الضيف صحي 

رد فارس 

_ لا ياحج لسه واخد المسكن ونايم 

: طيب الدكتور مقالكش امتي معاد العمليه

_ قالي الجمعه الجايه  يعني باقي تلات ايام 

قولت 

:  وهو هيفضل يتعذب كده  لجمعه الجايه  قوله يشهل محدش ناقصه الراجل بيصحي يصرخ حرام عليه  والله خساره فيه شهادة الطب 

قولت كده ف برقلي بعنيه ف سكت وانا مش طيقاه وبشتمه في سري  ف قال ابوي 

_ عاوزين نعرف ايه اللي حصله ومين ناسه 

قال فارس بتنهيده

:  مش عارف بس انا حاسس سكوته ده بسبب اللي حصله  ،  شكله كده مر بحاجه صعبه مش مخلياه عايز يتكلم ولا يقول حاجه عن نفسه 

ـــــــــــــــــــــــــــــــــــــ 

#شبل 

مرو تلات ايام ومفيش حاجه  حصلت ولا  حد  دور عليها  ولا بيجاد ظهر  واحنا قاعدين مستنين ظهوره  اللي اتاخر ومش عارف هيوصل بينا لفين... 

 وبعد التلات ايام وهي  في الأوضه مبطلتش تخبيط وصراخ علشان حد يفتحلها فجأه صوتها وقف  قولنا يمكن تعبت ورضيت بالأمر الواقع بس عدا الوقت ساعة  ورا ساعة ومفيش صوت وانا قلقت تكون عملت في نفسها حاجه  ف قولت موجه كلامي ل امي و مرات ابويا 

:  البنت سكتت ليه  ، ليكون عملت حاجه في نفسها 

قالت امي ببغض 

_ خليها تموت هي مش احسن من بتي  

ردة شجر عليه متجاهله كلمتها 

:  يمكن نايمه يا ولدي 

_ طيب ما حد يطلع يكلمها ويشوف  ،  معلش يا مرات ابويا شوفيها هي ملهاش ذنب 

_ حاضر ياولدي 

طلعت فوق وبقت تكلمها وتخبط عليها بس مكنش في رد منها خالص ف رجعت تنادي علينا وتقول بقلق 

:  الحقو  البت مش بترد عليه  اجري يا شبل 

قومت وطلعت عندها و وقفت عند الباب اخبط وانادي عليها ومفيش اي رد ف بعدت خطوه وقولت هكسر الباب ف وقفتني مرات ابويا وقالت 

_ له  ،  بدر هيزعل 

:  يا مرات ابويا ممكن تكون عملت في نفسها حاجه  ،  وسعي 

بقيت اضرب في الباب  برجلي لغيت ما اتفتح ولما بصيت في المكان ملقتهاش ف اتجهت انا ومرات ابويا ناحية الحمام وفجأه.. 

#وفاء 

لساعات بقيت ساكته عشان يفتحولي واقدر اهرب ولما اتفتح الباب كنت وراه ومجرد ما دخلو ناحية الحمام طلعت اجري وساعتها هما انتبهولي  وجم جري ورايا..

 ف نزلت درجات السلم بسرعه وانا رافعه فستاني بإديه ومنها علي الباب وكل خطوه بقربها من الخروج بيزيد خوفي اني اتمسك ويقتلوني او يرموني لديب اللي قال عليه بيجاد  ،  وقبل ما اوصل الباب  لقيت ست بتوقف في وشي وبتحاول تمنعني ولما بصيت ورايا لقيت الولد ده والست التانيه قربو يوصلوني ف زقيتها عن طريقي وجريت علي الباب واول ما فتحت لقيت بدر في وشي ف غمضت عيني من الخضه والخوف و صرخت  بعلو صوتي وبعد ما مسكني بقيت اقاومه واحاول ابعده وانا بصرخ واقول 

:  ابعد عني!!!  سيبني انا عاوزه امشي من هنا  !!! 

مسك فيه بعنف وقالي وهو بيثبتني قدامه 

_ اوقفي!!!  انتي قدرتي تطلعي  كيه 

بصلهم وقال بغضب

:  مين طلعها!!! 

ردت الست وقالت 

_ والله يا ولدي كنا فاكرين جرالها حاجه  

_ سيبني!!!  انا همشي من هنا  ،  بقولك سيبني!!! 

#عبيده 

كنت قاعد في اوضتي مستني دعاء علشان اعرف طلعت ليه من غير ما تسألني وبتروح فين  .

  وفي الوقت ده سمعت صوت صراخ ف طلعت لقيت البت  عند الباب بتصرخ وبتحاول تفك نفسها من بدر اللي ماسكها ف اتقدمت نحيتهم وقولت 

:  مين طلعها دي  ،  في ايه يا بدر 

شد في مسكتها وقال 

_ طلعت وحدها بس هي اللي اختارت متقعدش في مكان نضيف 

 قال كده وشدها من دراعها لبرا ف كلنا روحنا وراه علشان نعرف هيعمل ايه ف قال شبل وهو بيحاول يبعده عنها 

_ بدر كفايه!!!  خلاص سيبها انت موديها فين 

قالت وهي بتبكي وتتحاما فيه 

:  ارجوك الحقني متخلهوش يخدني  ،  هرجع الأوضة تاني بس يسيبني  

رجعها ورا ضهره وقال بتحذير

_ ارجع مكانك وبعد اكده متدخلش في شؤؤني

رجعت تحاول تمسك في شبل وتقول وهي بتبكي وتترجاه

:  ونبي متسبنيش  ،  ارجوكي يا حجه خليه يسيبني وانا مش هفكر اهرب 

قالت شجر 

_ سيبها يا ولدي اهي قالت مش هتهرب 

ردت احكام بغيظ 

:  خليه يعمل فيها ما بداله  دي تستاهل الدبح 

حاولت تفك ايده وهي بتنزل بجسمها لتحت لغيت ما وصلت الأرض وقالت ببكا

_ سيبني حرام عليك انا عملتلكم إيه  

رفعها عن الأرض وقال وهي بيبصلها بحده 

:  لو سمعت صوتك هرميكي لديب ده 

بصت لديب برعب وبقت تبكي من غير ولا كلمه  ف قال شبل بعد ما صعبت عليه 

_ يا بدر حرام عليك  ،  طيب  رجعها الاوضه هي مش هتفكر تهرب تاني "

تجاهل كلامه وشدها ناحية مخرج الجنينه ف قولت 

: استني يا بدر  ،   قولنا ناوي علي ايه  ،  موديها فين 

مردش علي حد فينا ودخلها العربية اللي محدش بيركبها داخل النجع غير لضروره  ومشي  وبعد شويه احنا رجعنا البيت ف سمعنا صوت ابوي  بينادي  وصوت مناديته مصاحبها كحه وتعب ف جرينا عليه ولما وصلنا لقيناه قاعد جمب السرير بتعب وساند بدراعه عليه ف شيلناه انا وشبل وريحناه مكانه وقولت 

:  سلامتك ابوي  ، ايه نزلك    

قالت شجر 

_ سلامتك ياخوي  ،  ايه اللي حصلك قولي 

قال شبل 

:  انت كويس؟! 

قال بتعب 

_ مرجعتوش اختكم ليه لغيت دلوك  ، قاعدين وناسينها  

قولت 

:  مفيش حاجه بيدنا نعملها ومعملنهاش يابوي،  بدر سافر وجاب اخت الدكتور معاه  وبردك مفيش اي خبر عنه  ،  نعمل ايه تاني 

_ متعملوش  ، اقعدو جمب امهاتكم وحريمكم  وسيبو البت اللي جابتلنا العار وسط النجع ومقدرينش نرفعو عنينا في حد  "

رد شبل 

:  حاضر يابوي هنعمل اللي نقدر عليه علشان نلاقيها بس انت متزعلش نفسك الدكتور قال الزعل غلط عليك 

_ فين بدر  ،  بدر هو اللي هيعرف يتصرف  فين ولدي  هاتولي ولدي  "

مبطلش يسأل عنه ومكنش صابر علي جيته ف طلعت عشان اشوفه وشبل وراي  وقبل ما افتح الباب اشتغل الخبط   بصينا انا وشبل لبعض واحنا مش عارفين في ايه ومين بيخبط اكده ف فتحت قوام  علشان الاقي مجموعة عساكر وقدامهم واحد لابس لبس مدني وده اللي بقا يبصلنا ويتفحص شكلنا وكأننا متهمين عنده  وبعدين بيقول 

:  فتشو البيت  

قولت وانا شايفهم بينتشرو جوه البيت 

_ يفتشو البيت ليه؟!  ايه اللي بيحصل اهنه 

بصلي وقالي وهو بيتقدم نحيتي 

: وفاء فين يلااا؟! 

اتوتر شبل وقرب مني ف قولت وانا بحاول اكون طبيعي 

_ وفاء مين؟!  منعرفش حد اسمه وفاء 

:  اممم طيب  دقيقه وهنعرف "

فتشو البيت كله ورجعو يقولو ملقنهاش ف بصلي وقال وهو بيرفع المسدس عليه 

_ وفاء فين؟!!! 

نزلت المسدس  وقولت 

:  المسدس ده ميترفعش في بيت الكبير   ودخلتكم دي مش هتعدي علي خير  

_ لا واااالهي  ،  طيب  هاتوا يابني  

شارو علي شبل وقال 

:  وهات ده كمان   ،  نشوف حكاية الكبير دي في القسم  

لما جه العسكري يمسكني زقيت يده وقولت 

_ يجيبونا فين  ،  ابعد يدك!!!! 

قولت اكده علشان اتفاجيء بضربه فوق راسي بضهر مسدس  من شدتها محستش بنفسي تاني  وفتحت عيني بعد وقت علي ميه بتدلق عليه  ولما بصيت حوليه لقيت الظابط ده وتلاته مخبرين حجمهم كبير محاوطيني من كل جانب ف قال الظابط باستهزاء و بطريقة  خلتني عاوز اكسر صف سنانه 

: ابن كبير اغمي عليه من ضربه علي الراس  والله عيب  

بصتله وانا مش قادر اخفي غيظه منه ف بص للمخبر اللي وراي وفجأه لقيت قلم نازل علي وشي خلي دمي يغلي ولما جيت اتحرك علشان اقتله ثبتوني بيدهم علي الكرسي ف قولت بغيظ 

: مش هتلاقيها  لو لفيت الدنيا كلها مش هتلاقيها

مال نحيتي وقال 

_ ايوه كده حلو 

قام وبقا يلف حوليه ويحط يده علي كتفي ويقولي 

:  هي مين دي بقا اللي مش هلاقيها  ،  احكيلي يا عبيده 

بصتله وقولت

_ مش هقولك حاجه  واعمل اللي عندك 

ابتسم باستفزاز وقالي 

:  مانت قولت خلاص 

ربت علي كتفي وقال للمخبرين 

_ ريحوه شكله تعبان 

قال كده ومشي وهما مسكوني ضرب لغيت ما بقيت مش عارف حتي ارفع يدي عن الأرض